ಕುಡುಬಿ ಜನಾಂಗ ಭಾಗವಹಿಸುವ ಸಮಾವೇಶಕ್ಕೆ ನಾವಿಲ್ಲ; ಕರ್ನಾಟಕ ರಾಜ್ಯ ಮರಾಠಿ ಒಕ್ಕೂಟ ನಿರ್ಧಾರ: ಡಾ.ಸುಂದರ ನಾಯ್ಕ್

ಉಡುಪಿ, ನ.14: ಮರಾಟಿ ಸಮುದಾಯದ ಸಮಾವೇಶದ ಹೆಸರಿನಲ್ಲಿ ಬೆಂಗಳೂರಿನ ಕರ್ನಾಟಕ ಮರಾಟಿ ಸಂಘ ನ.22ರಂದು ಆಯೋಜಿಸಿರುವ ‘ಪಶ್ಚಿಮ ಘಟ್ಟದ ತಪ್ಪಲಿನ ಬುಡಕಟ್ಟು ಮರಾಟಿ ಸಮುದಾಯದ ಸಮಾವೇಶ’ ಪರಿಶಿಷ್ಟ ಪಂಗಡಕ್ಕೆ ಸೇರದ, ಇತರ ಹಿಂದುಳಿದ ಜಾತಿಗೆ ಸೇರಿರುವ ಕುಡುಬಿ ಜನಾಂಗವನ್ನು ಒಳಗೊಂಡಿರು ವುದರಿಂದ ಒಕ್ಕೂಟಕ್ಕೆ ಸೇರಿದ ಮರಾಟಿ ಸಮುದಾಯದ ಯಾರೂ ಇದರಲ್ಲಿ ಭಾಗವಹಿಸದಂತೆ ಮಂಗಳೂರಿನ ಕರ್ನಾಟಕ ರಾಜ್ಯ ಮರಾಟಿ ಒಕ್ಕೂಟ ಕರೆ ಕೊಟ್ಟಿದೆ.

ಉಡುಪಿ ಪ್ರೆಸ್‌ಕ್ಲಬ್‌ನಲ್ಲಿ ಇಂದು ಕರೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಒಕ್ಕೂಟದ ಅಧ್ಯಕ್ಷ ಡಾ.ಕೆ.ಸುಂದರ ನಾಯ್ಕ್, ನ.22ರ ಸಮಾವೇಶವು ಪರಿಶಿಷ್ಟ ಪಂಗಡಕ್ಕೆ ಸೇರಿದ ಮರಾಟಿ ಸಮುದಾಯದ ಸಮಾವೇಶ ಅಲ್ಲ. ಈ ಸಮಾವೇಶಕ್ಕೂ ಕರ್ನಾಟಕ ರಾಜ್ಯ ಮರಾಟಿ ಒಕ್ಕೂಟ, ದಕ್ಷಿಣ ಕನ್ನಡ, ಉಡುಪಿ, ಕೊಡಗು, ಚಿಕ್ಕಮಗಳೂರು, ಶಿವಮೊಗ್ಗ ಜಿಲ್ಲೆಗಳ ರಾಜ್ಯ ಮುರಾಟಿ ಒಕ್ಕೂಟದ ಸಂಯೋಜಿತ ಮರಾಟಿ ಸೇವಾ ಸಂಘಗಳ ಸದಸ್ಯತ್ವ ಪಡೆದ ಸಂಘಗಳ ಸಮಾವೇಶವಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಸಂಘಟಕರು ಇದು ಪಶ್ಚಿಮ ಘಟ್ಟದ ತಪ್ಪಲಿನ ಬುಡಕಟ್ಟು ಸಮುದಾಯದ ಸಮಾವೇಶವೆಂದು ಕರೆದಿದ್ದರೆ ನಾವು ಸಮಾವೇಶದಲ್ಲಿ ಭಾಗವಹಿಸುತಿದ್ದೆವು. ಆದರೆ ಅದನ್ನು ಮಾರಾಟಿ ಸಮುದಾಯದ ಸಮಾವೇಶ ಎಂದು ಕರೆದು, ಅದಕ್ಕೆ ಪರಿಷ್ಟ ಪಂಗಡದ 51ಸಮುದಾಯಗಳಲ್ಲಿ ಸೇರಿರದ ಒಬಿಸಿ ಸಮುದಾಯಕ್ಕೆ ಸೇರಿದ ವಿಶೇಷವಾಗಿ ಕುಂದಾಪುರ ಮತ್ತು ಬೈಂದೂರು ತಾಲೂಕುಗಳ ಕುಡುಬಿ ಜನಾಂಗದವರನ್ನು ಸೇರಿಸಿಕೊಂಡು ನಡೆಸುತ್ತಿರುವ ಸಮಾವೇಶವಾಗಿರುವುದರಿಂದ ಅದಕ್ಕೆ ನಮ್ಮ ವಿರೋಧವಿದೆ ಎಂದು ಕಾರ್ಯಾಧ್ಯಕ್ಷ ರಾಮಚಂದ್ರ ಕೆಂಬಾರೆ ಹಾಗೂ ಪ್ರಧಾನ ಕಾರ್ಯದರ್ಶಿ ವಾಸು ನಾಯ್ಕ ತಿಳಿಸಿದರು.

ಆದ್ದರಿಂದ ರಾಜ್ಯದ ಎಲ್ಲಾ ಮರಾಟೆ/ಕೊಡಗು ಮರಾಠ ಸಮಾಜ ಸೇವಾ ಸಂಘಗಳ ಸಮುದಾಯದ ಸದಸ್ಯರು, ಒಕ್ಕೂಟದ ಆಡಳಿತ ಮಂಡಳಿ ಸದಸ್ಯರು, ಕಾರ್ಯಕಾರಿ ಸಮಿತಿ ಸದಸ್ಯರು, ಹಿರಿಯ ಸಲಹಾ ಸಮಿತಿ ಸದಸ್ಯರು ನ.22ರ ಈ ಸಮಾವೇಶದಲ್ಲಿ ಭಾಗವಹಿಸಬಾರದೆಂದು ಒಕ್ಕೂಟದ ಕಾರ್ಯಕಾರಿ ಸಮಿತಿ ನಿರ್ಣಯಕೈಗೊಂಡಿರು ವುದರಿಂದ ಸಮುದಾಯದ ಯಾರೂ ಇದರಲ್ಲಿ ಭಾಗವಹಿಸಬಾರದು ಎಂದು ಮನವಿ ಮಾಡಿದರು.

ರಾಜಕೀಯವಾಗಿ ಹಾಗೂ ಆರ್ಥಿಕವಾಗಿ ಬಲಿಷ್ಠವಾಗಿರುವ ಮರಾಟಿ ಸಮುದಾಯ, ಈಗಲೂ ರಾಜಕೀಯವಾಗಿ ಹಾಗೂ ಆರ್ಥಿಕವಾಗಿ ಅತ್ಯಂತ ದುರ್ಬಲವಾಗಿರುವ ಕುಡುಬಿ ಜನಾಂಗದ ವಿರುದ್ಧ ಯಾಕೆ ಪ್ರತಿರೋಧ ತೋರುತ್ತಿದೆ ಎಂದು ಪ್ರಶ್ನಿಸಿದಾಗ, ಈ ಜನಾಂಗದ ಕೆಲವರು ಅದರಲ್ಲೂ ಕುಂದಾಪುರ ಮತ್ತು ಬೈಂದೂರು ತಾಲೂಕಿನ ಕುಡುಬಿ ಗಳು ಕೆಲವು ಅಧಿಕಾರಿಗಳ ಸಹಕಾರದಿಂದ ಪರಿಶಿಷ್ಟ ಪಂಗಡಕ್ಕೆ ಸೇರಿದ ಮರಾಟ/ಕೊಡಗು ಮರಾಠ ಪಂಗಡಕ್ಕೆ ಸೇರಿದ ನಕಲಿ ಜಾತಿ ದೃಢೀಕರಣ ಪತ್ರಗಳನ್ನು ಕಂದಾಯ ಇಲಾಖೆಯಿಂದ ಪಡೆದು ಮರಾಟಿ ಮುದಾಯಕ್ಕೆ ಸರಕಾರದಿಂದ ದೊರೆಯುವ ಎಲ್ಲಾ ಸವಲತ್ತು, ಸೌಕರ್ಯ ಹಾಗೂ ಇತರ ಮೀಸಲಾತಿ ಸೌಲಭ್ಯಗಳನ್ನು ಪಡೆಯುತಿದ್ದು, ಇದರಿಂದ ನಮ್ಮವರಿಗೆ ತೊಂದರೆಯಾಗುತ್ತಿದೆ ಎಂದರು.

ಇದರ ವಿರುದ್ಧ ನಾವು ಕಾನೂನು ಹೋರಾಟವನ್ನು ನಡೆಸಲಿದ್ದೇವೆ. ಆದ್ದರಿಂದ ಕುಡುಬಿ ಜನಾಂಗದವರನ್ನು ಸೇರಿಸಿಕೊಂಡು ನಡೆಸುತ್ತಿರುವ ಈ ಸಮಾವೇಶಕ್ಕೆ ಒಕ್ಕೂಟದ ಯಾವುದೇ ಬೆಂಬಲವಿರುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಒಕ್ಕೂಟದ ಪದಾಧಿಕಾರಿಗಳಾದ ಅನಂತ ಎಸ್.ನಾಯ್ಕ್, ನರಸಿಂಹ ನಾಯ್ಕ್, ಭುಜಂಗ ನಾಯ್ಕ್, ದೇವ್ ನಾಯ್ಕ್ ಹಾಗೂ ಕೆ.ವಿ.ನಾಯ್ಕ್ ಉಪಸ್ಥಿತರಿದ್ದರು.