ಸಂಜೆಯ ಆಕಾಶದಲ್ಲಿ ಬರೀ ಕಣ್ಣಿಗೆ ಕಾಣುವ 4 ಗ್ರಹಗಳು!

ಉಡುಪಿ, ಜ.22: ಸದ್ಯ ಕೆಲವು ದಿನಗಳು ಸಂಜೆಯ ಆಕಾಶದಲ್ಲಿ ಬರೀ ಕಣ್ಣಿಗೆ ಕಾಣುವ ನಾಲ್ಕು ಗ್ರಹಗಳು ಕಾಣುತ್ತಿವೆ. ಸೂರ್ಯಾಸ್ತವಾಗುತ್ತಿದ್ದಂತೆ ಪಶ್ಚಿಮದಲ್ಲಿ ದಿಗಂತಕ್ಕೆ ಸಮೀಪ ಶನಿ, ಸುಮಾರು 45 ಡಿಗ್ರಿ ಎತ್ತರದಲ್ಲಿ ಹೊಳೆಯುವ ಶುಕ್ರ, ನೆತ್ತಿಯ ಮೇಲೆ ಗುರು ಗ್ರಹ, ಪೂರ್ವ ಆಕಾಶದಲ್ಲಿ ಕೆಂಬಣ್ಣದಿಂದ ಆಕರ್ಷಿಸುವ ಮಂಗಳ ಕಾಣುತ್ತಿವೆ.

ಜ.10ರಂದು ಪಶ್ಚಿಮ ಆಕಾಶದಲ್ಲಿ ಅತೀ ಎತ್ತರದಲ್ಲಿ 47 ಡಿಗ್ರಿಯಲ್ಲಿ ಹೊಳೆವ ಶುಕ್ರ ನಮ್ಮನ್ನ ಆಕರ್ಷಿಸುತ್ತಲೇ ಇದೆ. ದಿನದಿಂದ ದಿನಕ್ಕೆ ಕೆಳ ಕೆಳಗೆ ದಿಗಂತದೆಡೆಗೆ ಗೋಚರಿಸುತ್ತ ಮಾರ್ಚ್ ಅಂತ್ಯದವರೆಗೂ ಪಶ್ಚಿಮದಲ್ಲಿ ಕಾಣಲಿದೆ. ಸುಮಾರು ಎರಡು ವರ್ಷಕ್ಕೊಮ್ಮೆ 24 ಕೋಟಿ ಕಿಮೀಯಿಂದ 9 ಕೋಟಿಯವರೆಗೆ ಭೂಮಿಗೆ ಸಮೀಪವಾಗುವ ಮಂಗಳ, ಪೂರ್ವದಲ್ಲಿ ಈಗ ಕೆಂಬಣ್ಣದಲ್ಲಿ ಹೊಳೆಯುತ್ತಿದೆ.

ಶುಕ್ರ ಗ್ರಹವು ನಕ್ಷತ್ರದಂತೆ ಹೊಳೆಯುತ್ತಿದ್ದರೂ ದೂರದರ್ಶಕದಲ್ಲಿ ಈಗ ನೋಡಿದರೆ ಚೌತಿಯ ಚಂದ್ರನಂತೆ ಕಾಣುತ್ತಿದೆ. ಅತೀ ಸುಂದರ ಮಿಥುನ ರಾಶಿ ಓರಿಯಾನ್, ಅಂಡ್ರೋಮಿಡಾಗೆಲಾಕ್ಸಿಗಳೊಂದಿಗೆ ಆಕಾಶ ವೀಕ್ಷಕರಿಗೆ ಈಗಿನ ಸಂಜೆಯ ಆಕಾಶ ಬಹಳ ಪ್ರಶಸ್ತ ಎಂದು ಖಗೋಳ ಶಾಸ್ತ್ರಜ್ಞ ಡಾ.ಎ.ಪಿ.ಭಟ್ ಉಡುಪಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.