ರಾಷ್ಟ್ರಮಟ್ಟದ ಇನ್ಸ್ಪಾಯರ್ ಅವಾರ್ಡ್ ಸ್ಪರ್ಧೆ: ರಾಜ್ಯ ಮಟ್ಟಕ್ಕೆ ಆಯ್ಕೆಯಾದ ಕುಕ್ಕುಜೆ ಶಾಲೆಯ 4 ವಿದ್ಯಾರ್ಥಿಗಳು
ಉಡುಪಿ, ಮೇ24: ಕೇಂದ್ರ ಸರಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ ನಡೆಸುವ ಪೌಢ ಶಾಲಾ ವಿದ್ಯಾರ್ಥಿಗಳಿಗೆ ವಿಜ್ಞಾನ ಮಾದರಿ ತಯಾರಿಕೆಯ ‘ಇನ್ಸ್ಪಾಯರ್ ಅವಾರ್ಡ್’ ಸ್ಪರ್ಧೆಯಲ್ಲಿ ಕಾರ್ಕಳ ತಾಲೂಕಿನ ಕುಕ್ಕುಜೆಯ ಸರಕಾರಿ ಪದವಿ ಪೂರ್ವ ಕಾಲೇಜಿನ ಪ್ರೌಢ ಶಾಲಾ ವಿಭಾಗದ ನಾಲ್ವರು ವಿದ್ಯಾರ್ಥಿಗಳು ರಾಜ್ಯಮಟ್ಟಕ್ಕೆ ತೇರ್ಗಡೆಗೊಳ್ಳುವ ಮೂಲಕ ಐತಿಹಾಸಿಕ ಸಾಧನೆ ಮಾಡಿದ್ದಾರೆ.
ಕುಕ್ಕುಜೆ ಸರಕಾರಿ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿಗಳಾದ ಅನಿಶ್ ಪೂಜಾರಿ (ಮುಫತ್), ಅಮೂಲ್ಯ ಹೆಗ್ಡೆ (ಫ್ಲಡ್ ಡಿಟೆಕ್ಟರ್), ಶ್ರೇಯಾ (ಕ್ರಾಪ್ ಸೇವರ್), ನಿಕಿತಾ (ರೋಪೊ ಮೀಟರ್) ಜಿಲ್ಲಾಮಟ್ಟದ ಸ್ಪರ್ಧೆಯಲ್ಲಿ ರಾಜ್ಯವನ್ನು ಪ್ರತಿನಿಧಿಸಲು ಆಯ್ಕೆಯಾದ ವಿದ್ಯಾರ್ಥಿ ಗಳಾಗಿದ್ದಾರೆ. ಇವರನ್ನು ಶಾಲೆಯ ರಾಷ್ಟ್ರಪುರಸ್ಕೃತ ಸಮಾಜವಿಜ್ಞಾನ ಶಿಕ್ಷಕ ಸುರೇಶ್ ಮರಕಾಲ ತರಬೇತುಗೊಳಿಸಿದ್ದರು.
ದೇಶದ ಪ್ರಾಥಮಿಕ ಹಾಗೂ ಪ್ರೌಢ ಶಾಲಾ ವಿದ್ಯಾರ್ಥಿಗಳಲ್ಲಿ ಸುಪ್ತವಾ ಗಿರುವ ವೈಜ್ಞಾನಿಕ ಪ್ರತಿಭೆಗಳಿಗೆ ವೇದಿಕೆ ಒದಗಿ ಸುವ ಉದ್ದೇಶದಿಂದ ಕೇಂದ್ರ ಸರಕಾರದ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯ ಪ್ರತಿ ವರ್ಷ ಜಿಲ್ಲಾ ಮಟ್ಟದಲ್ಲಿ, ರಾಜ್ಯ ಮಟ್ಟದಲ್ಲಿ ಬಳಿಕ ರಾಷ್ಟ್ರಮಟ್ಟದಲ್ಲಿ ವಿಜ್ಞಾನ ಮಾದರಿ ತಯಾರಿಕೆಯ ‘ಇನ್ಸ್ಪಾಯರ್ ಅವಾರ್ಡ್’ ಸ್ಪರ್ಧೆಯನ್ನು ನಡೆಸುತ್ತದೆ.
ಉಡುಪಿ ಜಿಲ್ಲಾ ಮಟ್ಟದಲ್ಲಿ ನಡೆದ ಸ್ಪರ್ಧೆಯಲ್ಲಿ ಕಾರ್ಕಳ ತಾಲೂಕಿನ ಅತ್ಯಂತ ಗ್ರಾಮೀಣ ಪ್ರದೇಶದಲ್ಲಿರುವ ಸರಕಾರಿ ಪದವಿ ಪೂರ್ವ ಕಾಲೇಜಿನ ಪ್ರೌಢ ಶಾಲಾ ವಿಭಾಗದ ನಾಲ್ವರು ವಿದ್ಯಾರ್ಥಿಗಳು ಇದೀಗ ರಾಜ್ಯ ಮಟ್ಟಕ್ಕೆ ಆಯ್ಕೆಯಾಗುವ ಮೂಲಕ ಅಪೂರ್ವ ಸಾಧನೆ ಮಾಡಿದ್ದಾರೆ.
ಏನಿದು ಇನ್ಸ್ಪಾಯರ್ ಅವಾರ್ಡ್?: ಶಾಲಾ ಮಕ್ಕಳಲ್ಲಿರುವ ವೈಜ್ಞಾನಿಕ ಪ್ರತಿಭೆ, ಸಂಶೋಧನಾ ಮನೋಭಾವ, ನಾವೀನ್ಯ ಚಿಂತನೆಗಳನ್ನು ಸಮಾಜಕ್ಕೆ ಉಪಯುಕ್ತಗೊಳಿಸುವ ನಿಟ್ಟಿನಲ್ಲಿ ವಿದ್ಯಾರ್ಥಿಗಳಿಗೆ ಸೂಕ್ತ ವೇದಿಕೆಯೊಂದನ್ನು ಕಲ್ಪಿಸಿ ಪ್ರೋತ್ಸಾಹಿಸುವುದಕ್ಕಾಗಿ ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯ ಪ್ರತಿ ವರ್ಷ ದೇಶಾದ್ಯಂತ ನಡೆಸುವ ರಾಷ್ಟ್ರಮಟ್ಟದ ಮಾದರಿ ತಯಾರಿಕೆ (ಮಾಡೆಲ್ ಮೇಕಿಂಗ್) ಸ್ಪರ್ಧೆ ಇದಾಗಿದೆ.
ಈ ಸ್ಪರ್ಧೆಯಲ್ಲಿ ಸರಕಾರಿ, ಅನುದಾನಿತ ಹಾಗೂ ಅನುದಾನರಹಿತ ಶಾಲೆಗಳ 6ರಿಂದ 12ನೇ ತರಗತಿಯ ವಿದ್ಯಾರ್ಥಿ ಗಳು ಭಾಗವಹಿಸಲು ಅರ್ಹರಿರುತ್ತಾರೆ. ಶಾಲಾ ಮಟ್ಟದ ಸ್ಪರ್ಧೆಯಲ್ಲಿ ಆಯ್ಕೆಯಾದ ವಿದ್ಯಾರ್ಥಿಗಳು ತಮ್ಮಲಿರುವ ನಾವೀನ್ಯಪೂರ್ಣ ವೈಜ್ಞಾನಿಕ ಯೋಚನೆಗಳಿಗೆ ಶಿಕ್ಷಕರ ಮಾರ್ಗದರ್ಶನ ಪಡೆದು, ಸೂಕ್ತವಾದ ಯೋಜನೆಯನ್ನು ಸಿದ್ಧ ಗೊಳಿಸಿ ಆನ್ಲೈನಿನಲ್ಲಿ ಅರ್ಜಿಯನ್ನು ಸಲ್ಲಿಸಬಹುದು. ಇದರಲ್ಲಿ ಒಂದು ಶಾಲೆಯಿಂದ ಗರಿಷ್ಠ ಐವರು ವಿದ್ಯಾರ್ಥಿಗಳು ಆನ್ಲೈನ್ ಅರ್ಜಿಗಳನ್ನು ಸಲ್ಲಿಸಬಹುದು.
ಹೀಗೆ ಜಿಲ್ಲಾಮಟ್ಟಕ್ಕೆ ಆಯ್ಕೆಯಾದ ಪ್ರತೀ ವಿದ್ಯಾರ್ಥಿಗೂ ಕೇಂದ್ರ ಸಚಿವಾಲಯ ಪ್ರಾಜೆಕ್ಟ್ ತಯಾರಿಕೆ ಖರ್ಚುವೆಚ್ಚಗಳಿಗೆ ತಲಾ ಹತ್ತು ಸಾವಿರ ರೂ.ಗಳನ್ನು ವಿದ್ಯಾರ್ಥಿಯ ಖಾತೆಗೇ ನೇರವಾಗಿ ಜಮೆ ಮಾಡುತ್ತದೆ. ಜಿಲ್ಲಾ ಮಟ್ಟದ ಸ್ಪರ್ಧೆಯಲ್ಲಿ ಆಯ್ಕೆಯಾದ ವಿದ್ಯಾರ್ಥಿಗಳು ರಾಜ್ಯಮಟ್ಟಕ್ಕೂ, ರಾಜ್ಯ ಮಟ್ಟದ ಸ್ಪರ್ಧೆಯಲ್ಲಿ ವಿಜೇತರಾದ ವಿದ್ಯಾರ್ಥಿಗಳು ರಾಷ್ಟ್ರ ಮಟ್ಟಕ್ಕೂ ಆಯ್ಕೆಯಾಗುತ್ತಾರೆ.
ಹೊಸದಿಲ್ಲಿಯಲ್ಲಿ ನಡೆಯುವ ರಾಷ್ಟ್ರಮಟ್ಟದ ಸ್ಪರ್ಧೆಯಗೆ ಇಡೀ ದೇಶದಿಂದ 60 ವಿದ್ಯಾರ್ಥಿಗಳ ಮಾದರಿಗಳನ್ನು ಆಯ್ಕೆ ಮಾಡಲಾಗುತ್ತದೆ. ಈ 60 ಪ್ರತಿಭಾವಂತ ವಿದ್ಯಾರ್ಥಿಗಳಲ್ಲಿ ಆಯ್ದ ವಿದ್ಯಾರ್ಥಿಗಳು ಜಪಾನಿನಲ್ಲಿ ನಡೆಯುವ ಅಂತಾ ರಾಷ್ಟ್ರೀಯ ವಿಜ್ಞಾನ ವಿನಿಮಯ ಮೇಳ ’ಸುಕುರಾ’ ಕಾರ್ಯಕ್ರಮದಲ್ಲಿ ಭಾಗವಹಿಸುವ ಸುವರ್ಣಾವಕಾಶ ಪಡೆಯುತ್ತಾರೆ.
ಒಂದೇ ಶಾಲೆಯಿಂದ ನಾಲ್ವರು: ಇನ್ಸ್ಪಾಯರ್ ಅವಾರ್ಡ್ ಸ್ಪರ್ಧೆಯಲ್ಲಿ ಗೆಲುವು ಸಾಧಿಸುವುದು ಸುಲಭವಲ್ಲ. ಜಿಲ್ಲಾ ಮಟ್ಟದಲ್ಲಿ ನೂರಾರು ವಿದ್ಯಾರ್ಥಿಗಳ ಮಧ್ಯೆ ತುರುಸಿನ ಸ್ಪರ್ಧೆ ಇರುತ್ತದೆ. ಇಲ್ಲಿ ಮೌಲ್ಯ ಮಾಪಕರಿಗೆ ಯಾವುದೇ ಸ್ಪರ್ಧಿಯ ಗುರುತು ಪರಿಚಯ ಸಿಗದಷ್ಟು ಗೌಪ್ಯವಾಗಿರುತ್ತದೆ. ಈ ಬಾರಿ ಉಡುಪಿ ಜಿಲ್ಲಾ ಮಟ್ಟಕ್ಕೆ ಒಟ್ಟು 133 ವಿದ್ಯಾರ್ಥಿಗಳ ಮಾಡೆಲ್ಗಳು ಆಯ್ಕೆಯಾಗಿದ್ದವು. ಇದರಲ್ಲಿ ಜಿಲ್ಲೆಯ 5 ತಾಲೂಕುಗಳಿಂದ ಅಂತಿಮವಾಗಿ ರಾಜ್ಯಮಟ್ಟಕ್ಕೆ ಆಯ್ಕೆ ಯಾಗಿರುವುದು ಕೇವಲ 13 ವಿದ್ಯಾರ್ಥಿಗಳ ಮಾಡೆಲ್ಗಳು ಮಾತ್ರ. ಆಯ್ಕೆಯಾದ ಈ 13 ವಿದ್ಯಾರ್ಥಿ ಗಳಲ್ಲಿ ನಾಲ್ವರು ಒಂದೇ ಶಾಲೆಯ ವಿದ್ಯಾರ್ಥಿಗಳಾಗಿರುವುದು ವಿಶೇಷ.
ವಿದ್ಯಾರ್ಥಿಗಳ ಸಾಧನೆಗೆ ಉಡುಪಿ ಜಿಲ್ಲಾ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆಯ ಉಪನಿರ್ದೇಶಕ ಗಣಪತಿ ಕೆ, ಡಯಟ್ ಪ್ರಾಂಶುಪಾಲ ಗೋವಿಂದ ಮಡಿವಾಳ, ಡಯಟ್ ಉಪಪ್ರಾಂಶುಪಾಲರಾದ ಡಾ. ಅಶೋಕ ಕಾಮತ್, ಇನ್ಸ್ಪಾಯರ್ ಅವಾರ್ಡ್ನ ಜಿಲ್ಲಾ ನೋಡಲ್ ಅಧಿಕಾರಿ ಸುಬ್ರಹ್ಮಣ್ಯ ಭಟ್ ಅಭಿನಂದಿಸಿದ್ದಾರೆ.
ಕುಕ್ಕುಜೆ ವಿದ್ಯಾರ್ಥಿಗಳ ಮಾಡೆಲ್ಗಳ ವಿಶೇಷತೆ
ಇದೀಗ ರಾಜ್ಯಮಟ್ಟಕ್ಕೆ ಆಯ್ಕೆಯಾಗಿರುವ ಕುಕ್ಕುಜೆ ಶಾಲೆಯ ನಾಲ್ವರು ವಿದ್ಯಾರ್ಥಿಗಳ ಮಾದರಿ ವಿಭಿನ್ನತೆಯನ್ನು ಹೊಂದಿದೆ. ಅನಿಶ್ ಪೂಜಾರಿ ತಯಾರಿಸಿರುವ ‘ಮುಫತ್’ (ಬಹುಪಯೋಗಿ ಕೃಷಿ ಯಂತ್ರ)ಅತ್ಯಂತ ಸರಳ ಕೃಷಿ ಯಂತ್ರ ವಾಗಿದ್ದು, ಒಂದೇ ಯಂತ್ರ ರೈತನ 13ಕ್ಕಿಂತ ಅಧಿಕ ಕೆಲಸ ಕಾರ್ಯಗಳನ್ನು ಸಮರ್ಥವಾಗಿ ನಿಭಾಯಿಸಬಲ್ಲದು.ಅಮೂಲ್ಯ ಹೆಗ್ಡೆ ತಯಾರಿಸಿರುವ ‘ಫ್ಲಡ್ ಡಿಟೆಕ್ಟರ್’ ಹೆಸರಿನ ಜೀವರಕ್ಷಕ ಯಂತ್ರ ನೆರೆ, ಪ್ರವಾಹಗಳಂತ ನೈಸರ್ಗಿಕ ವಿಕೋಪದ ಕಾಲದಲ್ಲಿ ಊರಿಗೆ ಊರೇ ಜಾಗೃತ ಗೊಳ್ಳುವಂತೆ ಎಚ್ಚರಿಕೆ ನೀಡುವ ಮೂಲಕ ಪ್ರಾಣ ಹಾನಿ ಆಗದಂತೆ ತಡೆಯುತ್ತದೆ!
ಇನ್ನು ಶ್ರೇಯಾ ನಿರ್ಮಿಸಿದ ‘ಕ್ರಾಪ್ ಸೇವರ್’ ರೈತ ತಿಂಗಳುಗಟ್ಟಲೆ ಶ್ರಮಹಾಕಿ ಬೆಳೆಸಿದ ಬೆಳೆಗಳನ್ನು ಕಾಡುಪ್ರಾಣಿ, ಪಕ್ಷಿಗಳು, ಕಳ್ಳಕಾಕರರು ನಾಶ ಮಾಡದಂತೆ ತಡೆಯಬಲ್ಲದು. ಇದು ಸರಳ ಯಂತ್ರವಾಗಿದ್ದು ಯಾವುದೇ ಪ್ರಾಣಿ,ಪಕ್ಷಿ, ಮನುಷ್ಯರ ಚಲನವಲವನ್ನು ಅತ್ಯಂತಕರಾರುವಕ್ಕಾಗಿ ಗುರುತಿಸಿ, ಪ್ರಕಾಶಮಾನವಾದ ಬೆಳಕನ್ನು ಅವರ ಮೇಲೆ ಹಾಯಿಸಿ, ಅವಕ್ಕೆ ಅಚ್ಚರಿ ಮೂಡಿಸುವುದಲ್ಲದೇ, ದೊಡ್ಡ ಸೈರನ್ ಶಬ್ದದ ಮೂಲಕ ಅವರನ್ನು ಓಡಿಸಿ, ರೈತನ ಬೆಳೆಯನ್ನು ಉಳಿಸುತ್ತದೆ!
ಇನ್ನು ಹಗ್ಗ, ತಂತಿ, ವೈರ್ ಮೊದಲಾದ ತೆಳ್ಳಗಿನ ಉದ್ದನೆಯ ವಸ್ತುಗಳನ್ನು ಅಳೆಯುವುದಕ್ಕೆ ನಿಕಿತಾ ‘ರೋಪೋ ಮೀಟರ್’ ಎಂಬ ಯಂತ್ರವನ್ನು ಕಂಡು ಹಿಡಿದಿದ್ದಾಳೆ. ಈ ಯಂತ್ರದಿಂದ ವೈರ್, ತಂತಿ, ಹಗ್ಗ ಮೊದಲಾದವುಗಳನ್ನು ಚಿಟಿಕೆ ಹಾಕುವಷ್ಟ ರಲ್ಲಿ ಒಂದು ಇಂಚು ಕೂಡಾ ಹೆಚ್ಚುಕಡಿಮೆಯಾಗದಂತೆ ಬಹಳ ಸಲೀಸಾಗಿ ಅಳೆಯಬಹುದು!
ಮಾರ್ಗದರ್ಶಕ ಶಿಕ್ಷಕ: ಶಾಲೆಯ ರಾಷ್ಟ್ರಪ್ರಶಸ್ತಿ ಪುರಸ್ಕೃತ ಸಮಾಜ ವಿಜ್ಞಾನ ಶಿಕ್ಷಕ ಸುರೇಶ್ ಮರಕಾಲ, ವಿದ್ಯಾರ್ಥಿಗಳಿಗೆ ಮಾಡೆಲ್ ತಯಾರಿಕೆಯಲ್ಲಿ ಸಂಪೂರ್ಣ ಮಾರ್ಗದರ್ಶನ ನೀಡಿ ತರಬೇತಿಗೊಳಿದ್ದಾರೆ. ವಿಜ್ಞಾನ ಶಿಕ್ಷಕಿ ಯರಾದ ಪ್ರತಿಮಾ, ಗಣಿತ ಶಿಕ್ಷಕರಾದ ಬಾಬುರಾಯ ಕಾಮತ್ ಹಾಗೂ ಜಯಪ್ರಕಾಶ್ ಸಹಕಾರ ನೀಡಿದ್ದಾರೆ. ಸುರೇಶ್ ಮರಕಾಲ ಈ ಹಿಂದೆಯೂ ತಾವು ಕಾರ್ಯನಿರ್ವಹಿಸಿದ್ದ ಶಾಲೆಗಳಲ್ಲಿ ಮಕ್ಕಳನ್ನು ಇದೇ ರೀತಿ ರಾಷ್ಟ್ರಮಟ್ಟದ ಸ್ಪರ್ಧೆಗೆ ಸಜ್ಜುಗೊಳಿಸಿದ್ದರು.
