ಸಂಪೂರ್ಣ ಸಾವಯವ ಭತ್ತ ಕ್ವಿಂಟಾಲ್‌ಗೆ 4000 ರೂ.ನಂತೆ ಖರೀದಿ: ಸುಭಿಕ್ಷಾ ಸಾವಯವ ಸಂಘದ ಅಧ್ಯಕ್ಷರ ಭರವಸೆ
ಉಡುಪಿ, ಅ.7: ಇಂದು ಶುದ್ಧ ಸಾವಯವ ಆಹಾರ ಉತ್ಪನ್ನಗಳಿಗೆ ಬಹುಬೇಡಿಕೆ ಇದ್ದು, ಈ ನಿಟ್ಟಿನಲ್ಲಿ ಸುಭಿಕ್ಷಾ ಸಂಸ್ಥೆ ಹಾಗೂ ಭಾಕಿಸಂನ ಮೂಲಕ ಸಂಸ್ಥೆಯ ಸದಸ್ಯ ರೈತರು ಸಂಪೂರ್ಣ ಸಾವಯವ ಪದ್ಧತಿಯಲ್ಲಿ ಬೆಳೆಸಿ ನೀಡುವ ಭತ್ತವನ್ನು ಪ್ರತೀ ಕ್ವಿಂಟಾಲ್‌ಗೆ 4,000 ರೂ. ದರ ನೀಡಿ ಖರೀದಿಸಿ ಮಾರುಕಟ್ಟೆ ಮಾಡಲು ಸಿದ್ಧವಿರುವುದಾಗಿ ಸುಭಿಕ್ಷಾ ಸಾವಯವ ರೈತರ ಬಹುರಾಜ್ಯ ಸಹಕಾರ ಸಂಘ ನಿಯಮಿತ ಇದರ ಅಧ್ಯಕ್ಷ ಆ.ಶ್ರೀ. ಆನಂದ ಹೇಳಿದ್ದಾರೆ.
ಉಡುಪಿಯ ಭಾರತೀಯ ಕಿಸಾನ್ ಸಂಘದ ಜಿಲ್ಲಾ ಕಾರ್ಯಾಲಯದಲ್ಲಿ ಇಂದು ನಡೆದ ಸಭೆಯಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿ ಅವರು ಮಾತನಾಡುತಿದ್ದರು.
ಅಲ್ಲದೇ ಸುಭಿಕ್ಷಾದ ಷೇರುದಾರರು ಮತ್ತು ಭಾ.ಕಿ.ಸಂ. ಸದಸ್ಯರಿಗೆ ಕಡಿಮೆ ದರದಲ್ಲಿ ಗುಣಮಟ್ಟದ ಸಾವಯವ ಗೂಬ್ಬರಗಳನ್ನು ಪೂರೈಸಲಾಗುತ್ತಿದ್ದು ಹೆಚ್ಚಿನ ರೈತರು ಇದರ ಪ್ರಯೋಜನ ಪಡೆದುಕೊಳ್ಳುವಂತೆ ಕರೆ ನೀಡಿದರು.
ಭಾಕಿಸಂ ಜಿಲ್ಲಾಧ್ಯಕ್ಷ ನವೀನ್‌ಚಂದ್ರ ಜೈನ್ ಅಧ್ಯಕ್ಷತೆಯಲ್ಲಿ ನಡೆದ ಜಿಲ್ಲಾ ಸಮಿತಿಯ ಮಾಸಿಕ ಸಭೆಯಲ್ಲಿ ಬಹು ಮುಖ್ಯವಾಗಿ ಭತ್ತದ ದರದ ಬಗ್ಗೆ ಚರ್ಚಿಸಲಾಯಿತು. ಪ್ರಸ್ತುತ ವರ್ಷ ತೀವ್ರ ಬರ ಪರಿಸ್ಥಿತಿ ಹಾಗೂ ಹವಾಮಾನ ವೈಪರಿತ್ಯಗಳ ಕಾರಣದಿಂದ ಮಾರುಕಟ್ಟೆಯಲ್ಲಿ ಅಕ್ಕಿಯ ಬೆಲೆ ಗಣನೀಯವಾಗಿ ಏರಿಕೆಯಾಗಿದ್ದು, ಜಿಲ್ಲೆಯಲ್ಲಿ ಈ ಬಾರಿ ಭತ್ತದ ಉತ್ಪಾದನೆ ಕೂಡ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಅರ್ಧಾಂಶದಷ್ಟು ಕಡಿಮೆಯಾಗುವ ಎಲ್ಲಾ ಲಕ್ಷಣಗಳು ಕಂಡು ಬರುತ್ತಿದೆ ಎಂದು ಸದಸ್ಯರು ಕಳವಳ ವ್ಯಕ್ತಪಡಿಸಿದರು.
ಈಗ ಅಕ್ಕಿ ದರವನ್ನು ಗಮನಿಸಿದರೆ ಭತ್ತದ ದರ ಕೂಡ ಅಷ್ಟೇ ಪ್ರಮಾಣದಲ್ಲಿ ಏರಿಕೆಯಾಗಬೇಕಾಗಿದೆ. ಆದರೆ ಅಕ್ಕಿ ಗಿರಣಿ ಮಾಲಕರು ಮತ್ತು ವ್ಯಾಪಾರಸ್ಥರು ಭತ್ತದ ಖರೀದಿ ದರವನ್ನು ಏರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಈ ಕಾರಣದಿಂದ ಭತ್ತದ ಬೆಳೆಗಾರರಿಗೆ ನಷ್ಟದ ಪ್ರಮಾಣ ಹೆಚ್ಚುತ್ತಲೆ ಹೋಗುತ್ತಿದ್ದು ರೈತರು ಕೃಷಿಯಿಂದಲೇ ಹಿಂದೆ ಸರಿಯುವ ದುಸ್ಥಿತಿ ಬಂದಿದೆ ಎಂದು ರೈತರು ದೂರಿದರು.
ರೈತರ ಸಂಕಷ್ಟವನ್ನು ಅರ್ಥೈಸಿಕೊಂಡು ಅವರ ಪರ ನಿಂತು, ಸೂಕ್ತ ಬೆಂಬಲ ಬೆಲೆ ಘೋಷಿಸಿ ಭತ್ತವನ್ನು ಖರೀದಿ ಮಾಡುವ ಬಗ್ಗೆ ಕ್ರಮ ಜರಗಿಸುವ ಬಗ್ಗೆ ಜಿಲ್ಲಾಡಳಿತ ಯಾವುದೇ ಆಸಕ್ತಿ ತೋರಿಸುತ್ತಿಲ್ಲ. ಈ ಬಗ್ಗೆ ಜಿಲ್ಲಾಡಳಿತ ತಕ್ಷಣದ ಕ್ರಮವಾಗಿ ರೈತ ಸಂಘಟನೆಗಳು ಮತ್ತು ಅಕ್ಕಿ ಗಿರಣಿ ಮಾಲೀಕರ ತುರ್ತು ಸಭೆ ಕರೆದು, ಭತ್ತಕ್ಕೆ ನ್ಯಾಯಯುತ ಬೆಲೆ ನಿಗದಿಗೊಳಿಸುವಂತೆ ಒತ್ತಾಯಿಸಿ ಮನವಿ ಸಲ್ಲಿಸಲು ಸಭೆಯಲ್ಲಿ ತೀರ್ಮಾನಿಸಲಾಯಿತು.
ಅಕ್ಕಿ ಗಿರಣಿ ಮಾಲಕರು ಮತ್ತು ವ್ಯಾಪಾರಸ್ಥರು ಭತ್ತಕ್ಕೆ ಕ್ವಿಂಟಾಲ್‌ಗೆ ಕನಿಷ್ಟ 4,000ರೂ. ದರದಲ್ಲಾದರೂ ಖರೀದಿ ಮಾಡಲು ಮುಂದೆ ಬರುವಂತೆ ವಿನಂತಿಸಲು ಸಭೆ ತೀರ್ಮಾನಿತು. ರೈತರು ಕೂಡ ತರಾತುರಿಯಲ್ಲಿ ಭತ್ತವನ್ನು ಮಿಲ್‌ಗಳಿಗೆ ಹಾಕದೆ ಸರಿಯಾಗಿ ಒಣಗಿಸಿ, ಸಂಸ್ಕರಿಸಿ, ದಾಸ್ತಾನು ಇರಿಸಿ ನಿಧಾನವಾಗಿ ಮಾರುಕಟ್ಟೆ ಮತ್ತು ಮಿಲ್‌ಗಳಿಗೆ ನೀಡಿದಲ್ಲಿ ಹೆಚ್ಚಿನ ಬೆಲೆ ಪಡೆಯಬಹುದು ಎಂಬುದನ್ನು ರೈತರಿಗೆ ಮನದಟ್ಟು ಮಾಡಲು ನಿರ್ಧರಿಸಲಾುತು.
ಸಭೆಯಲ್ಲಿ ಭಾಕಿಸಂನ ಜಿಲ್ಲಾ ಉಪಾಧ್ಯಕ್ಷ ಶ್ರೀನಿವಾಸ್ ಭಟ್ ಇರ್ವತ್ತೂರು, ಜಿಲ್ಲಾ ಪದಾಧಿಕಾರಿಗಳಾದ ಸೀತಾ ರಾಮ ಗಾಣಿಗ, ಸಂತೋಷ್ ಶೆಟ್ಟಿ, ಮೋಹನ್‌ದಾಸ್ ಅಡ್ಯಂತಾಯ, ನಿರ್ಮಲ, ರೇವತಿ ಕಡ್ತಲ ಹಾಗೂ ಕುಂದಾಪುರ ಮತ್ತು ಕಾರ್ಕಳ ತಾಲೂಕು ಪ್ರಮುಖರು, ಸುಭಿಕ್ಷಾ ಶೇರುದಾರರು ಹಾಗೂ ವಿವಿಧ ಗ್ರಾಮ ಸಮಿತಿಗಳ ಪ್ರಮುಖರು ಉಪಸ್ಥಿತರಿದ್ದರು.
ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಸತ್ಯನಾರಾಯಣ ಉಡುಪ ಕಾರ್ಯಕ್ರಮ ನಿರ್ವಹಿಸಿ, ಚಂದ್ರಹಾಸ ಶೆಟ್ಟಿ ಇನ್ನಾ ವಂದಿಸಿದರು.
