ತಲ್ಲೂರು ಪಾಲನಾ ದಿನಾಚರಣೆ-ಪಾಲಕ ಸಂತ ಫ್ರಾನ್ಸಿಸ್ ಅಸ್ಸಿಸಿ 800ನೇ ಸ್ಮರಣೋತ್ಸವ ಆಚರಣೆ
ಕುಂದಾಪುರ, ಅ.7: ತಲ್ಲೂರಿನ ಸಂತ ಫ್ರಾನ್ಸಿಸ್ ಅಸ್ಸಿಸಿ ಚರ್ಟ್‌ನಲ್ಲಿ ಸಂತ ಫ್ರಾನ್ಸಿಸ್ ಅಸ್ಸಿಸಿಯವರ ಮರಣದ 800ನೇ ವರ್ಷಾಚರಣೆಯ ಜುಬಿಲಿ ವರ್ಷ ಹಾಗೂ ಪರಿಶದ್ ದಿನಾಚರಣೆಯನ್ನು ಪವಿತ್ರ ಬಲಿಪೂಜೆಯೊಂದಿಗೆ ಆಚರಿಸಲಾಯಿತು.
ಬಿಇಸಿ ಕರ್ನಾಟಕ ಪ್ರಾಂತ್ಯದ ನಿರ್ದೇಶಕರಾದ ವಂ.ಡಾ.ಸುನಿಲ್ ಡಿಸೋಜ ಪವಿತ್ರ ಬಲಿಪೂಜೆಯ ಪ್ರಧಾನ ಯಾಜಕರಾಗಿದ್ದರು. ಅವರಿಗೆ ಕುಂದಾಪುರದ ಸೇಂಟ್ ಮೇರೀಸ್ ಪಿಯು ಕಾಲೇಜಿನ ಪ್ರಾಂಶುಪಾಲ ವಂ.ಫಾ. ರೋಲ್ವಿನ್ ಫೆರ್ನಾಂಡಿಸ್ ಹಾಗೂ ಸಂತ ಫ್ರಾನ್ಸಿಸ್ ಅಸ್ಸಿಸಿ ಚರ್ಚ್, ತಲ್ಲೂರಿನ ಧರ್ಮಗುರು ವಂ.ಫಾ.ಎಡ್ವಿನ್ ಡಿಸೋಜ ಸಹ ಬಲಿದಾನವನ್ನು ಅರ್ಪಿಸಿದರು.
ಫಾ.ಸುನಿಲ್ ಡಿಸೋಜ ಪ್ರವಚನ ನೀಡಿ, ನಾವು ದೀಕ್ಷಾಸ್ನಾನ ಪಡೆದ ದಿನದಿಂದಲೇ ಕ್ರಿಸ್ತನ ದೇಹದ ಸದಸ್ಯರಾಗು ತ್ತೇವೆ. ದೀಕ್ಷಾಸ್ನಾನದ ಮೂಲಕ ನಾವು ಯೇಸು ಕ್ರಿಸ್ತನ ದೇಹದ ವಿವಿಧ ಅಂಗಗಳಾಗುತ್ತೇವೆ. ದೇವರು ನಮಗೆ ನೀಡಿರುವ ಅತ್ಯಂತ ಮಹತ್ವದ ಉಡುಗೊರೆ ಸ್ವಾತಂತ್ರ್ಯವಾಗಿದ್ದು, ಅದನ್ನು ಎಂದಿಗೂ ದುರುಪಯೋಗಪಡಿಸಿ ಕೊಳ್ಳಬಾರದು. ಚರ್ಚಿನಲ್ಲಿ ನಾವು ನಿಷ್ಠಾವಂತ ಸೇವಕರಾಗಿ, ಒಳ್ಳೆಯ ಕಾರ್ಯಗಳನ್ನು ಮಾಡುತ್ತಾ, ಇತರರ ಒಳಿತಿಗಾಗಿ ಬದುಕಬೇಕು ಎಂದು ಕರೆ ನೀಡಿದರು.
ಪವಿತ್ರ ಬಲಿಪೂಜೆಯ ನಂತರ ಚರ್ಚ್ ಸಭಾಂಗಣದಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಆಯೋಜಿಸಲಾಯಿತು. ವಿವಿಧ ಚರ್ಚ್ ಸಂಘಟನೆಗಳು, ಮಕ್ಕಳು ಹಾಗೂ ಯುವಕರು ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಪ್ರಸ್ತುತಪಡಿಸುವ ಮೂಲಕ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಿದರು.
ಇದೇ ಸಂದರ್ಭದಲ್ಲಿ ಪಾಲನಾ ಮಂಡಳಿಯ ಪದಾಧಿಕಾರಿಗಳು ಮತ್ತು ಸದಸ್ಯರು, ಗುರಿಕಾರರು ಹಾಗೂ ವಿವಿಧ ಚರ್ಚ್ ಸಂಘಟನೆಗಳ ನಾಯಕರನ್ನು ನಿಸ್ವಾರ್ಥ ಸೇವೆಗಾಗಿ ಸನ್ಮಾನಿಸಲಾಯಿತು. ವಂ.ಡಾ.ಸುನಿಲ್ ಡಿಸೋಜ ಹಾಗೂ ವಂ.ಫಾ.ರೋಲ್ವಿನ್ ಫೆರ್ನಾಂಡಿಸ್ ಅವರನ್ನೂ ಧರ್ಮಗುರು ಫಾ.ಎಡ್ವಿನ್ ಡಿಸೋಜ ಸನ್ಮಾನಿಸಿದರು.
ಫಾ.ಸುನಿಲ್ ಡಿಸೋಜ ಮಾತನಾಡಿ, ಇಲ್ಲಿ ಉತ್ತಮವಾದ ಸಮುದಾಯ ಜೀವನವನ್ನು ಕಾಣಬಹುದಾಗಿದೆ. ಸಮುದಾಯ ಜೀವನದ ಮಹತ್ವವನ್ನು ವಿವರಿಸಲು ಅವರು ಒಂದು ಅರ್ಥಪೂರ್ಣ ಕಥೆಯನ್ನು ಹೇಳಿ, ಚರ್ಚಿನಲ್ಲಿ ಏಕತೆ, ಸಹಕಾರ ಮತ್ತು ಸಹೋದರತ್ವವನ್ನು ಇನ್ನಷ್ಟು ಬಲಪಡಿಸುವಂತೆ ಕರೆ ನೀಡಿದರು.
ಪಾಲನಾ ಮಂಡಳಿಯ ಪದಾಧಿಕಾರಿಗಳು ಮತ್ತು ಸದಸ್ಯರು ವಂಫಾ. ಎಡ್ವಿನ್ ಡಿಸೋಜಾ ಅವರು ಧರ್ಮಕೇಂದ್ರದ ಸಮುದಾಯಕ್ಕಾಗಿ ಸಲ್ಲಿಸುತ್ತಿರುವ ದಣಿವರಿಯದ ಸೇವೆ ಹಾಗೂ ಸಮರ್ಪಿತ ಧಾರ್ಮಿಕ ಸೇವೆಯನ್ನು ಗುರುತಿಸಿ ಅವರನ್ನು ಸನ್ಮಾನಿಸಿದರು. ಉಪಾಧ್ಯಕ್ಷರಾದ ಕ್ಯಾಲ್ವಿನ್ ಮೆಂಡೋನ್ಸಾ ಸ್ವಾಗತಿಸಿದರು. ಪ್ರವೀಣ್ ಪೆರೇರಾ ನಿರೂಪಿಸಿದರು.
