ನ.29ರಿಂದ ಡಿ.1: ಸೋದೆಮಠದಿಂದ ಬಾಳೆ ಮೇಳ ‘ಕದಳೀ ವಿಶ್ವದರ್ಶನ’

ಉಡುಪಿ, ನ.5: ಉಡುಪಿ ಸೋದೆ ಶ್ರೀವಾದಿರಾಜ ಮಠದ ಆಶ್ರಯದಲ್ಲಿ ನವೆಂಬರ್ 29ರಿಂದ ಡಿಸೆಂಬರ್ 1ರವರೆಗೆ ಮೊದಲ ಬಾರಿಗೆ ಉಡುಪಿಯಲ್ಲಿ ರಾಷ್ಟ್ರ ಮಟ್ಟದ ಬಾಳೆ ಮೇಳ ‘ಕದಳೀ ವಿಶ್ವ ದರ್ಶನ’ ನಡೆಯಲಿದೆ ಎಂದು ಸೋದೆ ಮಠದ ಯತಿಗಳಾದ ಶ್ರೀವಿಶ್ವವಲ್ಲಭ ತೀರ್ಥರು ತಿಳಿಸಿದ್ದಾರೆ.

ರಥಬೀದಿಯಲ್ಲಿರುವ ಸೋದೆ ವಾದಿರಾಜ ಮಠದಲ್ಲಿ ಇಂದು ಕರೆದ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಶ್ರೀವಿಶ್ವವಲ್ಲಭ ತೀರ್ಥರು, ಸೋದೆ ಮಠದ ಮುಂಬರುವ (2028ಜ.18) ಪರ್ಯಾಯದ ಹಿನ್ನೆಲೆಯಲ್ಲಿ ನ.29ರಂದು ನಡೆಯುವ ಪರ್ಯಾಯ ಪೂರ್ವಭಾವಿ ಮುಹೂರ್ತಗಳಲ್ಲಿ ಮೊದಲನೇಯದಾದ ಬಾಳೆ ಮುಹೂರ್ತದ ಸಂದರ್ಭದಲ್ಲಿ ಇದನ್ನು ಆಯೋಜಿಸಲಾಗಿದೆ ಎಂದರು.

ಉಡುಪಿ ಶ್ರೀಕೃಷ್ಣ ಮಠದ ಪಾರ್ಕಿಂಗ್ ಪ್ರದೇಶದ ಸಮೀಪ ಮೂರು ದಿನಗಳ ಕಾಲ ಈ ಅಪರೂಪದ ಬಾಳೆ ಮೇಳ ನಡೆಯಲಿದ್ದು, ಬಾಳೆ ಕೃಷಿಯ ಮಹತ್ವವನ್ನು ಜನಸಾಮಾನ್ಯರಿಗೆ ಪರಿಚಯಿಸುವುದರೊಂದಿಗೆ ಬಾಳೆ ಕೃಷಿಯ ಲ್ಲಿರುವ ವಿಪುಲ ಅವಕಾಶಗಳನ್ನು ಅನಾವರಣಗೊಳಿಸುವ ಉದ್ದೇಶವನ್ನು ಹೊಂದಲಾಗಿದೆ. ವೈಜ್ಞಾನಿಕ ಪ್ರಗತಿ, ಸುಸ್ಥಿರ ಕೃಷಿ ಪದ್ಧತಿ, ಆರ್ಥಿಕ ಸಾಧ್ಯತೆಗಳು ಹಾಗೂ ಬಾಳೆಯ ಮೌಲ್ಯವರ್ಧನೆ ಹಾಗೂ ಉದ್ಯಮ ಶೀಲತೆಯ ವಿವಿಧ ಆಯಾಮಗಳ ಕುರಿತೂ ಮಾಹಿತಿ ಸಿಗಲಿದೆ ಎಂದರು.

ಬಾಳೆ, ಬಾಳೆಹಣ್ಣು ಆಹಾರ, ಆರೋಗ್ಯ, ಧಾರ್ಮಿಕ ಆಚರಣೆ, ಸಾಂಸ್ಕೃತಿಕ ಸಂಪ್ರದಾಯ ಹಾಗೂ ಗ್ರಾಮೀಣ ಆರ್ಥಿಕತೆಯೊಂದಿಗೆ ಅವಿನಾಭಾವ ಸಂಬಂಧವನ್ನು ಹೊಂದಿದೆ. ಬಾಳೆಯು ಕೇವಲ ಹಣ್ಣಿನ ಬೆಳೆಯಾಗಿರದೆ, ಅದರ ಎಲೆ, ದಿಂಡು, ಹೂವು, ನಾರು ಸೇರಿದಂತೆ ಸಸ್ಯದ ವಿವಿಧ ಭಾಗಗಳಿಂದ ವೈವಿಧ್ಯಮಯ ಉತ್ಪನ್ನಗಳನ್ನು ತಯಾರಿಸಲು ಸಾಧ್ಯವಿರುವ ಬಹುಮುಖಿ ಕೃಷಿ ಸಂಪನ್ಮೂಲವಾಗಿದೆ. ಈ ಹಿನ್ನೆಲೆಯಲ್ಲಿ, ಬಾಳೆ ಕೃಷಿಯಲ್ಲಿ ರುವ ಅಪಾರ ಸಾಮರ್ಥ್ಯ ಹಾಗೂ ಅವಕಾಶಗಳನ್ನು ಸಮರ್ಪಕವಾಗಿ ಬಳಸಿಕೊಳ್ಳುವ ನಿಟ್ಟಿನಲ್ಲಿ ರೈತರಲ್ಲಿ ಜಾಗೃತಿ ಮೂಡಿಸುವುದು, ಆಧುನಿಕ ಮತ್ತು ವೈಜ್ಞಾನಿಕ ಕೃಷಿ ಪದ್ಧತಿಗಳನ್ನು ಪರಿಚಯಿಸುವುದು, ಬಾಳೆಯಿಂದ ತಯಾರಿಸಬಹುದಾದ ಮೌಲ್ಯವರ್ಧಿತ ಉತ್ಪನ್ನಗಳ ಉತ್ಪಾದನೆಗೆ ಉತ್ತೇಜನ ನೀಡುವುದು ಹಾಗೂ ಕೃಷಿ ಆಧಾರಿತ ಉದ್ಯಮಶೀಲತೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುವುದು ‘ಕದಳೀ ವಿಶ್ವದರ್ಶನ’ ಮೇಳದ ಪ್ರಮುಖ ಉದ್ದೇಶಗಳಾಗಿವೆ ಎಂದು ವಿವರಿಸಿದರು.

ಸಮಷ್ಟಿ ಸಮಾವೇಶ: ಮೇಳವು ರೈತರು, ಕೃಷಿ ತಜ್ಞರು, ಸಂಶೋಧಕರು, ಕೃಷಿ ವಿಜ್ಞಾನಿಗಳು, ಉದ್ಯಮಿಗಳು, ವಿದ್ಯಾರ್ಥಿಗಳು, ಕೃಷಿ ಉತ್ಪನ್ನಗಳ ತಯಾರಕರು ಹಾಗೂ ಸಾರ್ವಜನಿಕರನ್ನು ಒಂದೇ ವೇದಿಕೆಯಲ್ಲಿ ಸಮಾವೇಶ ಗೊಳಿಸಿ, ಬಾಳೆ ಕೃಷಿಯ ವಿವಿಧ ಆಯಾಮಗಳ ಕುರಿತು ಜ್ಞಾನ ವಿನಿಮಯ ಮತ್ತು ಅನುಭವ ಹಂಚಿಕೆಗೆ ವಿಶೇಷ ಅವಕಾಶ ಕಲ್ಪಿಸಲಿದೆ. ಮೂರು ದಿನಗಳ ಈ ಮೇಳದಲ್ಲಿ ಸುಮಾರು 2,000 ರೈತರು ಹಾಗೂ 2,000 ವಿದ್ಯಾರ್ಥಿ ಗಳು, ಸಂಶೋಧಕರು, ಕೃಷಿ ತಜ್ಞರು ಮತ್ತು ಉದ್ಯಮಿಗಳು ಸೇರಿದಂತೆ ವಿವಿಧ ಕ್ಷೇತ್ರಗಳ ಪ್ರತಿನಿಧಿಗಳು ಭಾಗವಹಿಸುವ ನಿರೀಕ್ಷೆಯಿದೆ. ಅಲ್ಲದೆ, ಮೇಳದ ಮೂರು ದಿನಗಳ ಅವಧಿಯಲ್ಲಿ ಒಟ್ಟು 10,000ಕ್ಕೂ ಅಧಿಕ ಸಾರ್ವಜನಿಕರು ಭೇಟಿ ನೀಡುವ ನಿರೀಕ್ಷೆಯಿದೆ ಎಂದು ಸ್ವಾಮೀಜಿ ತಿಳಿಸಿದರು.

ಆಕರ್ಷಣೆ: ಕದಳೀ ವಿಶ್ವದರ್ಶನ ಮೇಳದ ಪ್ರಮುಖ ಆಕರ್ಷಣೆಗಳಲ್ಲಿ 100ಕ್ಕೂ ಅಧಿಕ ವಿವಿಧ ತಳಿಗಳ ಬಾಳೆ ಗೊನೆಗಳ ಪ್ರದರ್ಶನ, ವಿವಿಧ ತಳಿಗಳ ಬಾಳೆ ಹಣ್ಣುಗಳ ಮಾರಾಟ ಹಾಗೂ 150ಕ್ಕೂ ಅಧಿಕ ಬಗೆಯ ಬಾಳೆ ತಳಿಗಳ ಪರಿಚಯ ಮತ್ತು ಅವುಗಳ ಸಸಿಗಳ ಮಾರಾಟಕ್ಕೆ ವಿಶೇಷ ಅವಕಾಶ ಕಲ್ಪಿಸಲಾಗಿದೆ. ಈ ಪ್ರದರ್ಶನವು ಈಗಾಗಲೇ ಬಾಳೆ ಕೃಷಿಯಲ್ಲಿ ತೊಡಗಿಸಿಕೊಂಡಿರುವ ರೈತರಿಗೆ ಹೊಸ ತಳಿಗಳು, ಸುಧಾರಿತ ಕೃಷಿ ಪದ್ಧತಿಗಳು ಹಾಗೂ ನವೀನ ತಂತ್ರಜ್ಞಾನಗಳ ಪರಿಚಯ ಮಾಡಿಕೊಡಲಿದೆ. ಅಲ್ಲದೇ ಬಾಳೆ ಕೃಷಿಯಲ್ಲಿ ಹೊಸ ಪ್ರಯೋಗಗಳನ್ನು ಕೈಗೊಳ್ಳಲು ರೈತರು ಹಾಗೂ ಕೃಷಿ ಉದ್ಯಮಿಗಳಿಗೆ ಪ್ರೇರಣೆ ನೀಡಲಿದೆ ಎಂದರು.

ಹೊಸ ಬ್ರ್ಯಾಂಡ್ ಘೋಷಣೆ: ಮೇಳದ ಮತ್ತೊಂದು ಆಕರ್ಷಣೆಯಾಗಿ ಭಾರತದಲ್ಲಿರುವ 500ಕ್ಕೂ ಅಧಿಕ ಬಗೆಯ ಬಾಳೆತಳಿಗಳಲ್ಲಿ ಕೆಲವು ತಳಿಗಳಿಗೆ ಇನ್ನೂ ನಿರ್ದಿಷ್ಟವಾದ ಹೆಸರುಗಳಿಲ್ಲ. ಇಂತಹ ಹೆಸರಿಲ್ಲದ ಬಾಳೆ ತಳಿಗಳ ಪೈಕಿ ಒಂದು ವಿಶಿಷ್ಟ ತಳಿಯನ್ನು ಆಯ್ಕೆ ಮಾಡಿ, ಈ ಮೇಳದ ಸಂದರ್ಭದಲ್ಲಿ ಸೋದೆ ಶ್ರೀವಾದಿರಾಜ ಮಠದ ವತಿಯಿಂದ ಅದಕ್ಕೊಂದು ವಿಶಿಷ್ಟ ನಾಮಕರಣ ಮಾಡುವ ಮೂಲಕ ಆ ಬಾಳೆ ತಳಿ ಹಾಗೂ ಅದರ ಹಣ್ಣನ್ನು ವ್ಯಾಪಕವಾಗಿ ಪರಿಚಯಿಸಿ, ಜನಪ್ರಿಯಗೊಳಿಸುವ ವಿಶೇಷ ಪ್ರಯತ್ನವನ್ನು ಹಮ್ಮಿಕೊಳ್ಳಲಾಗುವುದು ಎಂದರು.

ಬಾಳೆಯಿಂದ ತಯಾರಿಸಬಹುದಾದ ವಿವಿಧ ಮೌಲ್ಯವರ್ಧಿತ ಉತ್ಪನ್ನಗಳು ಹಾಗೂ ಉಪಉತ್ಪನ್ನಗಳ ಪ್ರದರ್ಶನ ಮತ್ತು ಮಾರಾಟ ಮೇಳದ ಮತ್ತೊಂದು ಪ್ರಮುಖ ಆಕರ್ಷಣೆ. ಬಾಳೆಹಣ್ಣಿನಿಂದ ತಯಾರಿಸಿದ ವೈವಿಧ್ಯಮಯ ಆಹಾರ ಉತ್ಪನ್ನಗಳು, ಸಂಸ್ಕರಿತ ಉತ್ಪನ್ನಗಳು ಹಾಗೂ ನವೀನ ಮೌಲ್ಯವರ್ಧಿತ ಉತ್ಪನ್ನಗಳ ಜೊತೆಗೆ, ಬಾಳೆ ದಿಂಡು, ಎಲೆ ಮತ್ತು ನಾರನ್ನು ಬಳಸಿ ತಯಾರಿಸಲಾದ ವಿವಿಧ ಉಪಯುಕ್ತ ವಸ್ತುಗಳನ್ನು ಈ ಸಂದರ್ಭದಲ್ಲಿ ಪರಿಚಯಿಸಲಾಗುವುದು ಎಂದು ಸೋದೆಶ್ರೀಗಳು ತಿಳಿಸಿದರು.

ರಾಷ್ಟ್ರಮಟ್ಟದ ಮೇಳದಲ್ಲಿ ಕರ್ನಾಟಕ, ಕೇರಳ, ತಮಿಳುನಾಡು ಹಾಗೂ ಮಹಾರಾಷ್ಟ್ರದ ಜಲಗಾಂವ್ ಸೇರಿದಂತೆ ದೇಶದ ವಿವಿಧ ಭಾಗಗಳಿಂದ ಆಗಮಿಸುವ ಕೃಷಿಕರು ಮತ್ತು ಉದ್ಯಮಿಗಳು ತಮ್ಮ ಬಾಳೆ ಕೃಷಿ ಉತ್ಪನ್ನಗಳು ಹಾಗೂ ಬಾಳೆ ಆಧಾರಿತ ಮೌಲ್ಯವರ್ಧಿತ ವಸ್ತುಗಳನ್ನು ಪ್ರದರ್ಶಿಸಿ, ಮೂರು ದಿನಗಳ ಕಾಲ ವಿಶೇಷ ಪ್ರದರ್ಶನ ಮತ್ತು ಮಾರಾಟ ಮಾಡಲಿದ್ದಾರೆ. ಇದಲ್ಲದೆ, ತಮಿಳುನಾಡಿನ ತಿರುಚಿರಾಪಳ್ಳಿಯ ರಾಷ್ಟ್ರೀಯ ಬಾಳೆ ಸಂಶೋಧನಾ ಕೇಂದ್ರದ ವಿಜ್ಞಾನಿಗಳ ವಿಶೇಷ ತಂಡ ಮೇಳದಲ್ಲಿ ಭಾಗವಹಿಸಿ, ಇತ್ತೀಚಿನ ಆವಿಷ್ಕಾರಗಳು, ಅಭಿವೃದ್ಧಿಗಳ ಕುರಿತು ರೈತರು ಮತ್ತು ಸಾರ್ವಜನಿಕರಿಗೆ ವಿಶೇಷ ಮಾಹಿತಿ ಹಾಗೂ ಮಾರ್ಗದರ್ಶನ ನೀಡಲಿದೆ ಎಂದರು.

ಗಣ್ಯರ ಉಪಸ್ಥಿತಿ: ಮೂರು ದಿನಗಳ ಕಾರ್ಯಕ್ರಮದಲ್ಲಿ ಹಲವು ಯತಿವರ್ಯರು, ರಾಜ್ಯ ಹಾಗೂ ಜಿಲ್ಲೆಯ ಜನಪ್ರತಿನಿಧಿಗಳು ಮತ್ತು ವಿವಿಧ ಕ್ಷೇತ್ರಗಳ ಗಣ್ಯರು ಭಾಗವಹಿಸಲಿದ್ದಾರೆ. ಈ ಮೂಲಕ ಧಾರ್ಮಿಕ, ಸಾಮಾಜಿಕ, ಕೃಷಿ ಹಾಗೂ ಉದ್ಯಮ ಕ್ಷೇತ್ರಗಳ ಪ್ರಮುಖರು ಒಂದೇ ವೇದಿಕೆಯಲ್ಲಿ ಸಮಾಗಮಗೊಳ್ಳಲಿದ್ದು, ಪರಸ್ಪರ ವಿಚಾರ ವಿನಿಮಯ, ಅನುಭವ ಹಂಚಿಕೆ ಹಾಗೂ ರಚನಾತ್ಮಕ ಸಂವಾದಕ್ಕೆ ಮೇಳವು ಉತ್ತಮ ವೇದಿಕೆಯಾಗಲಿದೆ ಎಂದರು.

ಪತ್ರಿಕಾಗೋಷ್ಠಿಯಲ್ಲಿ ಸೋದೆ ವಾದಿರಾಜ ಮಠದ ದಿವಾನರಾದ ಪಾಡಿಗಾರು ಶ್ರೀನಿವಾಸ ತಂತ್ರಿ, ಸೋದೆ ಟ್ರಸ್ಟ್‌ನ ಕಾರ್ಯದರ್ಶಿ ರತ್ನಕುಮಾರ್ ಉಪಸ್ಥಿತರಿದ್ದರು.