ಮುಝಫರ್ ಅಸ್ಸಾದಿಯವರ ಬದುಕು, ಬರವಣಿಗೆಗಳ ಸಮಗ್ರ ಚಿಂತನೆ ಅಗತ್ಯ: ದಿನೇಶ್ ಅಮಿನ್ ಮಟ್ಟು

ಉಡುಪಿ, ಜ.25: ರಾಜ್ಯಶಾಸ್ತ್ರ ಪ್ರಾಧ್ಯಾಪಕರಾಗಿದ್ದ ಮುಝಫರ್ ಅಸ್ಸಾದಿಯವರು ಲಿಂಗಾಯತ ಪ್ರತ್ಯೇಕ ಧರ್ಮ, ಆದಿವಾಸಿಗಳು, ರೈತ ಚಳವಳಿ ಬಗ್ಗೆ ಅಧ್ಯಯನ ಮಾಡಿದ್ದರು. ಅವರ ಎಲ್ಲ ಪುಸ್ತಕಗಳು, ಬದುಕು ಹಾಗೂ ಬರವಣಿಗೆಗಳ ಬಗ್ಗೆ ಸಮಗ್ರ ರೂಪದ ಚಿಂತನೆ, ಚರ್ಚೆ ಹಾಗೂ ಅಧ್ಯಯನ ಆಗಬೇಕಿದೆ. ಅವರ ಬಗ್ಗೆ ಅವರ ವಿದ್ಯಾರ್ಥಿಗಳು, ಸಹಪಾಠಿಗಳು ಬರೆದಿರುವ ಬರಹಗಳನ್ನು ಪುಸ್ತಕ ರೂಪದಲ್ಲಿ ಹೊರತರುವ ಕೆಲಸ ಮಾಡಬೇಕಾಗಿದೆ. ಆ ಮೂಲಕ ಅಸ್ಸಾದಿ ನೆನಪು ಶಾಶ್ವತವಾಗಿ ಇಟ್ಟುಕೊಳ್ಳಬೇಕು ಎಂದು ಹಿರಿಯ ಪತ್ರಕರ್ತ, ಚಿಂತಕ ದಿನೇಶ್ ಅಮಿನ್ ಮಟ್ಟು ಹೇಳಿದ್ದಾರೆ.

ಸಾಹೇಬಾನ್ ಸಮುದಾಯ ವೇದಿಕೆ ದ.ಕ. ಮತ್ತು ಉಡುಪಿ ಜಿಲ್ಲೆ ಇದರ ವತಿಯಿಂದ ಇತ್ತೀಚಿಗೆ ಅಗಲಿದ ಉಡುಪಿ ಜಿಲ್ಲೆಯ ಶಿರ್ವ ಮೂಲದ ಖ್ಯಾತ ರಾಜ್ಯಶಾಸ್ತ್ರ ಪ್ರಾಧ್ಯಾಪಕ, ಹಿರಿಯ ಚಿಂತಕ ಮುಝಫರ್ ಅಸ್ಸಾದಿಯವರಿಗೆ ಉಡುಪಿಯ ಮಣಿಪಾಲ್ ಇನ್ ಹೋಟೆಲ್ ಸಭಾಂಗಣದಲ್ಲಿ ಶನಿವಾರ ಆಯೋಜಿಸಿದ್ದ ಸಂತಾಪ ಸೂಚಕ ಸಭೆಯಲ್ಲಿ ಭಾಗವಹಿಸಿ ಅವರು ಮಾತನಾಡುತ್ತಿದ್ದರು.

ಬಹಳ ಮಂದಿ ಪ್ರಾಧ್ಯಾಪಕರು ಕೇವಲ ತರಗತಿಯಲ್ಲಿನ ಪಾಠಕ್ಕೆ ಮಾತ್ರ ಸೀಮಿತರಾದರೆ, ಕೆಲವರು ಪಾಠದ ಜೊತೆ ಸಂಶೋಧನೆ ಮಾಡಿ ಸಮಾಜದ ಬಗ್ಗೆ ಚಿಂತನೆ ಮಾಡುವವರಾಗಿದ್ದಾರೆ. ಇನ್ನು ಕೆಲವರು ಇದರೆಲ್ಲದ ಜೊತೆಗೆ ಬೀದಿಯಲ್ಲಿ ನಿಂತು ಹೋರಾಟ ಮಾಡುವವರಾಗಿದ್ದಾರೆ. ಈ ಕೊನೆಯ ವರ್ಗಕ್ಕೆ ಮುಝಫರ್ ಅಸ್ಸಾದಿ ಸೇರಿದವರಾಗಿದ್ದಾರೆ ಎಂದರು.

ಅಂತಾರಾಷ್ಟ್ರೀಯ ಮಟ್ಟದ ವಿವಿಗಳ ವಿಚಾರ ಸಂಕಿಣದಲ್ಲಿ ಭಾಗವಹಿಸಿ ಪ್ರಬಂಧ ಮಂಡಿಸುವ ಇವರು, ಬೆಂಗಳೂರು, ಮೈಸೂರು, ಮಂಗಳೂರಿನಲ್ಲಿ ಬೀದಿಯಲ್ಲಿ ನಿಂತು ಹೋರಾಟ ಕೂಡ ಮಾಡುತ್ತಿದ್ದರು. ಅವರು ದಂತ ಗೋಪುರದಲ್ಲಿ ಕುಳಿತ ಪ್ರಾಧ್ಯಾಪಕರಲ್ಲ. ಈ ಸಮಾಜಕ್ಕೆ ಒಳಿತು ಮಾಡಬೇಕೆಂಬ ಕಾಳಜಿ ಅವರಿಗೆ ಇತ್ತು. ಪ್ರತಿಕ್ಷಣವೂ ಇವರು ಈ ಸಮಾಜದ ಬಗ್ಗೆ ಚಿಂತನೆ ಮಾಡುತ್ತಿದ್ದರು. ಬುದ್ಧಿವಂತರಾಗಿ ಒಳ್ಳೆಯವರಾಗಿದ್ದ ಅಪರೂಪದ ವ್ಯಕ್ತಿತ್ವ ಇವರದ್ದು ಎಂದು ಅವರು ಹೇಳಿದರು.

ಅಸ್ಸಾದಿ ಜ್ಞಾನವನ್ನು ಹಂಚುತ್ತಿದ್ದರು

ಜ್ಞಾನವನ್ನು ಬಚ್ಚಿಡುವುದು ಈ ದೇಶದ ಸಂಸ್ಕೃತಿಯಾಗಿತ್ತು. ಎಲ್ಲರಿಗೂ ಜ್ಞಾನ ಸಿಗಬಾರದು ಎಂಬ ಭಾವನೆ ಇತ್ತು. ಈ ದೇಶದ ಹಿಂದುಳಿದ ವರ್ಗದ ಜನರನ್ನು ಅಕ್ಷರ ಸಂಸ್ಕೃತಿಯಿಂದ ವಂಚಿತರನ್ನಾಗಿ ಮಾಡುವ ಸಂಸ್ಕೃತಿಯಾಗಿತ್ತು. ಆದರೆ ಅಸ್ಸಾದಿ ತಮ್ಮಲ್ಲಿನ ಜ್ಞಾನವನ್ನು ಎಲ್ಲರಿಗೂ ಹಂಚುತ್ತಿದ್ದರು ಎಂದ ಅವರು, ಅಸ್ಸಾದಿ ಕೇವಲ ಮುಸ್ಲಿಮರ ಬಗ್ಗೆ ಮಾತ್ರವಲ್ಲದೆ ಒಟ್ಟು ಸಮಾಜದ ಬಗ್ಗೆ ಚಿಂತನೆ ಮಾಡುತ್ತಿದ್ದರು. ಸಮಾಜದಲ್ಲಿ ಅವಕಾಶ ಹಾಗೂ ಪ್ರಾತಿನಿಧ್ಯಗಳಿಂದ ವಂಚಿತರಾದವರ ಪರವಾಗಿ ಅವರು ತಮ್ಮ ಬದುಕಿನುದ್ದಕ್ಕೂ ಕೆಲಸ ಮಾಡಿದರು ಎಂದರು.

ಅವರ ಅಗಲಿಕೆ ಬಳಿಕ ಅವರು ಉಪಕುಲಪತಿ ಆಗಬೇಕಿತ್ತು ಎಂಬ ಚರ್ಚೆ ಬಹಳ ಕಡೆ ನಡೆಯುತ್ತಿದೆ. ಅವರು ಆ ಹುದ್ದೆಗೆ ಅರ್ಹರು ಎಂಬುದು ಎಲ್ಲರಿಗೂ ಗೊತ್ತಿತ್ತು. ಅವರು ಆ ಹುದ್ದೆಗೆ ಆಕಾಂಕ್ಷಿಯಲ್ಲದಿದ್ದರೂ ಈ ವಿಚಾರವನ್ನು ಎಲ್ಲರೂ ಹೇಳುವಾಗ ಅವರಿಗೆ ನೋವು ಕಾಡುತಿತ್ತು. ರಾಜ್ಯಪಾಲರ ಬಳಿ ಇವರು ಹೆಸರು ಹೋದಾಗ ಒತ್ತಡದಿಂದ ಹೆಸರು ಕೈಬಿಡಲಾಗುತ್ತಿತ್ತು. ಇಂತಹ ವಾತಾವರಣವನ್ನು ಬದಲಾವಣೆ ಮಾಡಲು ಪ್ರಯತ್ನ ಪಡುತ್ತಿದ್ದರೋ ಅಂತಹದ್ದೇ ವಾತಾವರಣಕ್ಕೆ ಅಸ್ಸಾದಿ ಬಲಿಯಾದರು ಎಂದು ಅಮಿನ್ ಮಟ್ಟು ಖೇದ ವ್ಯಕ್ತಪಡಿಸಿದರು.

ಮುಸ್ಲಿಮ್ ಮೀಸಲಾತಿಗೆ ಸಂಬಂಧಿಸಿ ಅಸ್ಸಾದಿ ಸಾಕಷ್ಟು ಅಧ್ಯಯನಗಳು ಮಾಡಿ ವರದಿ ತಯಾರಿಸಿದ್ದರು. ಸರಕಾರ ಮಾಡಬೇಕಾದ ಕೆಲಸವನ್ನು ಅಸ್ಸಾದಿ ಮಾಡಿದ್ದರು. ಮುಸ್ಲಿಮರಿಗೆ ಮೀಸಲಾತಿ ಯಾಕೆ ಬೇಕು ಎಂದು ಯಾರಾದರೂ ಕೇಳಿದರೆ, ಅಸ್ಸಾದಿಯವರ ಪುಸ್ತಕ ಮುಂದಿರಿಸಿದರೆ ಸಾಕಾಗುತ್ತದೆ. ಆ ರೀತಿಯ ಅಧ್ಯಯನ ಅದರಲ್ಲಿದೆ. ಇಡೀ ದೇಶದಲ್ಲಿ ಯಾರು ಮಾಡದ ಈ ಕೆಲಸವನ್ನು ಅಸ್ಸಾದಿ ಮಾಡಿದರು. ಆದರೆ ಇದೀಗ ಅವರ ಅಗಲಿಕೆ ನಮಗೆ ದೊಡ್ಡ ನಷ್ಟವಾಗಿದೆ. ಇನ್ನು ಆ ಖಾಲಿ ಸ್ಥಾನವನ್ನು ತುಂಬುದು ಬಹಳ ಕಷ್ಟ ಎಂದು ಅವರು ಹೇಳಿದರು.

ವೇದಿಕೆಯಲ್ಲಿ ಮುಖ್ಯ ಅತಿಥಿಗಳಾಗಿ ಉಡುಪಿ ಜಿಲ್ಲಾ ಮುಸ್ಲಿಮ್ ಒಕ್ಕೂಟದ ಕಾರ್ಯದರ್ಶಿ ಜಫ್ರುಲ್ಲಾ, ನಮ್ಮ ನಾಡ ಒಕ್ಕೂಟದ ಉಡುಪಿ ಜಿಲ್ಲಾಧ್ಯಕ್ಷ ಮುಸ್ತಾಕ್ ಅಹ್ಮದ್ ಬೆಳ್ವೆ, ಉದ್ಯಮಿ ಶಬ್ಬೀರ್ ಅಹ್ಮದ್ ಉಪಸ್ಥಿತರಿದ್ದರು.

ಮುಝಫರ್ ಅಸ್ಸಾದಿ ಸಂಬಂಧಿಕರಾದ ಇಮಾದ್ ಅಸ್ಸಾದಿ, ರಿಯಾಝ್ ಅಹ್ಮದ್ ಹಾಗೂ ಕಾಲೇಜು ಸಹಪಾಠಿ ರೆ.ಫ್ರಾನ್ಸಿಸ್ ಕೋಟಿಯಾನ್ ಮಾತನಾಡಿದರು. ಸಾಹೇಬಾನ್ ಸಮುದಾಯ ವೇದಿಕೆಯ ಅಧ್ಯಕ್ಷ ಅಫ್ರೋಝ್ ಅಸ್ಸಾದಿ ಸ್ವಾಗತಿಸಿದರು. ಕಾರ್ಯದರ್ಶಿ ಇಕ್ಬಾಲ್ ಮನ್ನಾ ಕಾರ್ಯಕ್ರಮ ನಿರೂಪಿಸಿ, ವಂದಿಸಿದರು.