"ರಾಜಶೇಖರ ಕೋಟೆ ವಿರುದ್ಧ ನ್ಯಾಯಾಲಯದಲ್ಲಿ ಕ್ರಿಮಿನಲ್ ಮೊಕದ್ದಮೆ"

ಉಡುಪಿ: ತನ್ನನ್ನು ಹಾಗೂ ಕರ್ನಾಟಕ ರಾಜ್ಯ ದಸಂಸ ಕುಂದಾಪುರ ತಾಲೂಕು ಸಂಚಾಲಕ ರಾಜು ಬೆಟ್ಟಿನಮನೆ ಅವರನ್ನು ಸಂಘಟನೆಯಿಂದ ಮೂರು ವರ್ಷಗಳ ಅವಧಿಗೆ ಉಚ್ಛಾಟಿಸಿರುವ ಕ್ರಮ ಹಾಗೂ ಈ ಸಂಬಂಧ ನೀಡಿದ ಹೇಳಿಕೆ ವಿರುದ್ಧ ಸಮಿತಿಯ ಮೈಸೂರು ವಿಭಾಗೀಯ ಸಂಚಾಲಕರೆನ್ನಲಾದ ರಾಜಶೇಖರ ಕೋಟೆ ಅವರ ಮೇಲೆ ಕುಂದಾಪುರದ ಸಕ್ಷಮ ನ್ಯಾಯಾಲಯದಲ್ಲಿ ತಕ್ಷಣವೇ ಕ್ರಿಮಿನಲ್ ಮಾನನಷ್ಟ ಮೊಕದ್ದಮೆ ಹೂಡುವುದಾಗಿ ಉಡುಪಿ ಜಿಲ್ಲಾ ಸಂಚಾಲಕ, ಹಿರಿಯ ದಲಿತ ಮುಖಂಡ ಮಂಜುನಾಥ ಗಿಳಿಯಾರ್ ಹೇಳಿದ್ದಾರೆ.

ಉಡುಪಿಯಲ್ಲಿಂದು ಕರೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ನ್ಯಾಯವಾದಿಯೂ ಆಗಿರುವ ಗಿಳಿಯಾರು, ಕಳೆದ ಹಲವು ದಶಕಗಳಿಂದ ದಲಿತ ಚಳವಳಿ, ಪ್ರಗತಿಪರ ಹಾಗೂ ತಳಸಮುದಾಯದೊಂದಿಗೆ ನಡೆಸಿದ ಹೋರಾಟದ ಮೂಲಕ ಸಮಾಜ ದಲ್ಲಿರುವ ನನ್ನ ಶುದ್ಧ ಚಾರಿತ್ರ್ಯ, ಪ್ರಾಮಾಣಿಕೆ ಹಾಗೂ ನಂಬಿಕೆಗೆ ನಷ್ಟವನ್ನುಂಟು ಮಾಡುವ ದುರುದ್ದೇಶದಿಂದ ಈ ಪ್ರಕಟಣೆಯಲ್ಲಿ ನೀಡಲಾಗಿದೆ ಎಂದು ಆರೋಪಿಸಿದರು.

ಉಡುಪಿ ಜಿಲ್ಲೆಯಲ್ಲಿ ಕೋಮುವಾದಿ ಶಕ್ತಿಗಳೊಂದಿಗೆ, ಮೂಢನಂಬಿಕೆ ಗಳು, ಅಂಧಾಚರಣೆ, ಸಾಮಾಜಿಕ ಅಸಮಾನತೆ ಹಾಗೂ ದಲಿತರು ಮತ್ತು ಮಹಿಳೆಯರ ಮೇಲೆ ದೌರ್ಜನ್ಯಗಳು ಅವ್ಯಾಹತವಾಗಿ ಹೆಚ್ಚುತ್ತಿರುವ ಇಂದಿನ ದಿನಗಳಲ್ಲಿ ಜಿಲ್ಲೆ ಯಲ್ಲಿ ಪ್ರಗತಿಪರ, ತಳಸಮುದಾಯಗಳ ಹಾಗೂ ರೈತ ಚಳವಳಿಗಳು ಮತ್ತೆ ಒಗ್ಗೂಡಿ ಹೋರಾಟ ಸಂಘಟಿಸುವುದು ಇಂದಿನ ತುರ್ತು ಅಗತ್ಯವಾಗಿದೆ ಎಂದು ಅವರು ವಿವರಿಸಿದರು.

ಈ ದಿಶೆಯಲ್ಲಿ ನಾವು ಇನ್ನೂ ಹೆಚ್ಚು ಕ್ರಿಯಾಶೀಲರಾಗಿ ಚಳವಳಿಯನ್ನು ವಿಸ್ತರಿಸಲು ನಿರ್ಧರಿಸಿ, ಸಮಾನಮನಸ್ಕ ಸಂಘಟ ನೆಯ ಇತರ ನಾಯಕ ರೊಂದಿಗೆ ಸೇರಿಕೊಂಡು ಸಂವೇದನಾಶೀಲ ಚಳವಳಿಯನ್ನು ರೂಪಿಸಲು ಪ್ರಯತ್ನಶೀಲರಾಗಿರು ವಾಗ, ಇದರಿಂದ ಹತಾಶಗೊಂಡ ಕೆಲವು ಶಕ್ತಿಗಳು ನಾಯಕತ್ವ ಪೈಪೋಟಿ ಮತ್ತು ಕೀಳರಿಮೆ ಮನಸ್ಥಿತಿಯಿಂದ ಈ ರೀತಿಯ ಸುಳ್ಳು ಹಾಗೂ ಕಪೋಲಕಲ್ಪಿತ ಹೇಳಿಕೆಗಳ ಮೂಲಕ ತೇಜೋವಧೆಗೆ ಪ್ರಯತ್ನಿಸುತ್ತಿವೆ ಎಂದು ಆರೋಪಿಸಿದರು.

ಕಳೆದ ಎರಡು ದಶಕಗಳಿಂದ ಕುಂದಾಪುರದ ನ್ಯಾಯಾಲಯದಲ್ಲಿ ನ್ಯಾಯವಾದಿಯಾಗಿ ಕಾರ್ಯನಿರ್ವಹಿಸುತ್ತಿರುವ ತಾನು, ಪ್ರತಿಷ್ಠಿತ ಕೋಟ ಸಹಕಾರಿ ವ್ಯವಸಾಯ ಸೇವಾ ಸಂಘದಲ್ಲಿ ಕಳೆದ 25 ವರ್ಷಗಳಿಂದ ನಿರ್ದೇಶಕ ನಾಗಿಯೂ ಸೇವೆ ಸಲ್ಲಿಸುತಿದ್ದೇನೆ. ಜಿಲ್ಲೆಯ ಬಹುತೇಕ ಎಲ್ಲಾ ಜನಪರ, ರೈತ ಹೋರಾಟಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುತಿದ್ದೇನೆ. ನಾನು ಮತ್ತು ರಾಜು ಬೆಟ್ಟಿನಮನೆ ಕುಂದಾಪುರ ಹಾಗೂ ಬೈಂದೂರು ತಾಲೂಕುಗಳ ಹಳ್ಳಿಹಳ್ಳಿಗಳಲ್ಲಿ ದಲಿತರನ್ನು, ದಸಂಸವನ್ನು ತಳಮಟ್ಟದಲ್ಲಿ ಸಂಘಟಿಸುವ ಕಾರ್ಯ ಮಾಡುತಿದ್ದೇವೆ. ಸಮಾಜದ ಎಲ್ಲಾ ವರ್ಗದ ಜನ ನನ್ನ ಬಗ್ಗೆ ಸದಾಭಿಪ್ರಾಯ ಉಳ್ಳವರಾಗಿದ್ದಾರೆ ಎಂದರು.

ನನ್ನ ತೇಜೋವಧೆ ಮಾಡುವ ಷಡ್ಯಂತ್ರದ ಭಾಗವಾಗಿ ಸಂಘಟನೆಯ ಮೂಲಕ ಇಂಥ ಹೇಳಿಕೆ ಕೊಡಿಸಲಾಗಿದೆ. ದಸಂಸ ದಿಂದ ನನಗೆ ಇದುವರೆಗೂ ಈ ಸಂಬಂಧ ಯಾವುದೇ ಶೋಕಾಸ್ ನೋಟೀಸ್ ಬಂದಿಲ್ಲ. ಉಚ್ಛಾಟನೆ ಬಗ್ಗೆ ಅಧಿಕೃತ ನೋಟೀಸು ಬಂದಿಲ್ಲ. ಅಲ್ಲದೇ ರಾಜಶೇಖರ ಕೋಟೆ ಎಂಬ ವಿಭಾಗೀಯ ಸಂಚಾಲಕರಿಗೆ ತಮ್ಮಿಬ್ಬರನ್ನು ಉಚ್ಛಾಟಿಸುವ ಅಧಿಕಾರವೇ ಇರುವುದಿಲ್ಲ ಎಂದು ಗಿಳಿಯಾರು ಪ್ರತಿಪಾದಿಸಿದರು.

ಹೇಳಿಕೆಯಲ್ಲಿ ತಿಳಿಸಿದಂತೆ ಭಾರತ ಭಾಗ್ಯವಿದಾತ ಅಂಬೇಡ್ಕರ್ ಜಯಂತಿ ಕಾರ್ಯಕ್ರಮದ ದೇಣಿಗೆ ಹಣ ದುರುಪಯೋಗ ವಾಗಿಲ್ಲ. ಇದು ಕೋಟೆ ಅವರ ಸಂಘಟನೆಯ ಕಾರ್ಯಕ್ರಮವೂ ಅಲ್ಲ. ಕರ್ನಾಟಕ ದಲಿತ ಸಂಘರ್ಷ ಸಮಿತಿಗಳ ಐಕ್ಯ ಹೋರಾಟ ಸಮಿತಿ ಉಡುಪಿ ಜಿಲ್ಲೆ ಆಯೋಜಿಸಿದ ಕಾರ್ಯಕ್ರಮ ಇದಾಗಿತ್ತು. ಇದರ ಲೆಕ್ಕಪತ್ರ ಕೇಳುವ ಅಧಿಕಾರ ರಾಜಶೇಖರ ಕೋಟೆ ಎಂಬ ವ್ಯಕ್ತಿಗೆ ಇರುವುದಿಲ್ಲ. ಕಾರ್ಯಕ್ರಮದ ಲೆಕ್ಕಪತ್ರವನ್ನು 15 ದಿನಗಳಲ್ಲೇ ಉಡುಪಿಯ ಅಂಬೇಡ್ಕರ್ ಭವನದಲ್ಲಿ ಮಂಡನೆಯಾಗಿ ಸಮಿತಿಯ ಎಲ್ಲಾ ಸದಸ್ಯರು ಅನುಮೋದಿಸಿದ್ದಾರೆ ಎಂದು ಗಿಳಿಯಾರು ಸ್ಪಷ್ಟನೆ ನೀಡಿದರು.

ಆದ್ದರಿಂದ ಇಂಥ ಮಾನಹಾನಿಕರ ಪ್ರಕಟಣೆ ನೀಡಿದ ರಾಜಶೇಖರ ಕೋಟೆ ಅವರ ವಿರುದ್ಧ ತಾನು ತಕ್ಷಣವೇ ಕುಂದಾಪುರದ ಸಕ್ಷಮ ನ್ಯಾಯಾಲಯದಲ್ಲಿ ಕ್ರಿಮಿನಲ್ ಮೊಕದ್ದಮೆ ಹೂಡುವುದಾಗಿ ಅವರು ಪ್ರಕಟಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ರಾಜು ಬೆಟ್ಟಿನಮನೆ, ದಸಂಸ ಅಂಬೇಡ್ಕರ್ ಬಣದ ಪ್ರಧಾನ ಸಂಚಾಲಕ ಸುಂದರ ಮಾಸ್ತರ್, ಶ್ಯಾಮಸುಂದರ್ ತೆಕ್ಕಟ್ಟೆ, ಸುರೇಸ್ ಹಕ್ಲಾಡಿ, ಸುರೇಶ್ ಮೂಡುಬಗೆ ಉಪಸ್ಥಿತರಿದ್ದರು.

ಹುದ್ದೆಗೆ ರಾಜೀನಾಮೆ ನೀಡಿದ ರಾಜು ಬೆಟ್ಟಿನಮನೆ

ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದ ರಾಜು ಬೆಟ್ಟಿನಮನೆ, ಸಂಘಟನೆ ನೀಡಿದ ಪತ್ರಿಕಾ ಹೇಳಿಕೆಯಿಂದ ತನಗೆ ತೀರಾ ನೋವಾಗಿದೆ. ಹೀಗಾಗಿ ಇಷ್ಟು ವರ್ಷ ಸಂಘಟನಾ ಕಾರ್ಯದಲ್ಲಿ ಪ್ರಾಮಾಣಿಕವಾಗಿ ದುಡಿದಿರುವ ತಾನು ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿಯ ಹುದ್ದೆಗೆ ಇಲ್ಲೇ ರಾಜೀನಾಮೆ ನೀಡುತ್ತಿರುವುದಾಗಿ ಪ್ರಕಟಿಸಿದರು.

ಇನ್ನು ಮುಂದೆ ತಾನು ರಾಜ್ಯ ದಲಿತ ಸಂಘರ್ಷ ಸಮಿತಿ(ಅಂಬೇಡ್ಕರ್ ಬಣ)ಗೆ ಸೇರ್ಪಡೆಗೊಂಡು ಅದರ ಪರವಾಗಿ ಕೆಲಸ ಮಾಡುವುದಾಗಿಯೂ ರಾಜು ಬೆಟ್ಟಿನಮನೆ ತಿಳಿಸಿದರು.