ನಾವು ಸಂರಕ್ಷಿಸಲೇಬೇಕಾದ ಏಕೈಕ ವಾಸಸ್ಥಾನ ಭೂಮಿ: ಡಾ. ಬಾಶಬಿ ಫ್ರೇಸರ್
ಉಡುಪಿ, ನ.15: ನಾವು ಸಂರಕ್ಷಿಸಲೇಬೇಕಾದ ನಮಗಿರುವ ಒಂದೇ ಒಂದು ವಾಸಸ್ಥಾನವೆಂದರೆ ಈ ಭೂಮಿ ಎಂದು ಎಡಿನ್ಬರೋ ನೇಪಿಯರ್ ವಿಶ್ವವಿದ್ಯಾಲಯದ ಸ್ಕಾಟಿಷ್ ಸೆಂಟರ್ ಫಾರ್ ಟಾಗೋರ್ ಸ್ಟಡೀಸ್ನ ನಿರ್ದೇಶಕಿ ಡಾ. ಬಾಶಬಿ ಫ್ರೇಸರ್ ಹೇಳಿದ್ದಾರೆ.
ಮಾಹೆಯ ಗಾಂಧಿಯನ್ ಸೆಂಟರ್ ಫಾ ಫಿಲಾಸಫಿಕಲ್ ಆರ್ಟ್ಸ್ ಆ್ಯಂಡ್ ಸೈನ್ಸಸ್ (ಜಿಸಿಪಿಎಎಸ್)ನಲ್ಲಿ ನಡೆದ ಕಾರ್ಯ ಕ್ರಮದಲ್ಲಿ ಡಾ ಬಾಶಬಿ ಫ್ರೇಸರ್ ಅವರು ಕವಿತೆಗಳ ಕುರಿತು ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಿದರು.
ಯುದ್ಧಗಳು ಮತ್ತು ಮಾನವನ ದುರಾಸೆಗಳು ಈ ಏಕೈಕ ವಾಸಸ್ಥಾನವನ್ನು ನಾಶಪಡಿಸಬಹುದು ಮತ್ತು ನಾವು ಅದರ ವಿರುದ್ಧ ನಿರಂತರವಾಗಿ ಹೋರಾಡಬೇಕಿದೆ ಎಂದು ಅವರು ಹೇಳಿದರು.
ಭಾರತೀಯ ಮೂಲದ ಇಂಗ್ಲೆಂಡಿನಲ್ಲಿ ನೆಲೆಸಿರುವ ಪ್ರಶಸ್ತಿ ವಿಜೇತ ಕವಿ, ಸಮಕಾಲೀನ ಕಾಲಕ್ಕೆ ಪ್ರತಿಕ್ರಿಯೆಯಾಗಿ ಕಾವ್ಯವು ಹೇಗೆ ಹುಟ್ಟುತ್ತದೆ ಎಂಬುದನ್ನು ವಿವರಿಸಿದರು.
‘ಹೆಬಿಟ್ಯಾಟ್’(ಆವಾಸ) ಅವರ ಇತ್ತೀಚಿನ ಕವನ ಸಂಕಲನ. ಈ ಕವನ ಸಂಕಲನದಿಂದ ಕವಿತೆಗಳನ್ನು ತೆಗೆದುಕೊಂಡು ಅವರು ಅನೇಕ ಯುದ್ಧ- ವಿರೋಧಿ, ಮಾನವ ಪರ, ಪರಿಸರದ ಕವಿತೆಗಳನ್ನು ಓದಿದರು. ಅವುಗಳನ್ನು ಅಫ್ಘಾನಿಸ್ತಾನ, ಪ್ಯಾಲೆಸ್ಟೈನ್ ಮತ್ತು ಪರಿಸರ ಕಾಳಜಿಗಳಿಗೆ ಅರ್ಪಿಸಿದರು.
ತನ್ನ ತಾಯಿಯ ಮೇಲಿನ ಕವಿತೆಯನ್ನು ಓದುತ್ತಾ, ನಮ್ಮನ್ನು ಪ್ರೀತಿಸುವವರು ನಮ್ಮೊಂದಿಗೆ ಸದಾ ಇರುತ್ತಾರೆ ಮತ್ತು ಅವರೊಂದಿಗೆ ಸಂಭಾಷಣೆಯನ್ನು ನಾವು ಮುಂದುವರಿಸಬಹುದು ಎಂದು ಹೇಳಿದರು. ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದ ಅವರು, ಹಾಡು ಅಥವಾ ಭಾವಗೀತೆಗಳನ್ನು ಕಾವ್ಯದ ಪ್ರಮುಖ ರೂಪವೆಂದು ಪರಿಗಣಿಸಬಹುದು ಮತ್ತು ಕನಿಷ್ಠ ಇಬ್ಬರು ಗೀತರಚನೆಕಾರರಾದ ಬಾಬ್ ಡಿಲನ್ ಮತ್ತು ರವೀಂದ್ರನಾಥ್ ಟ್ಯಾಗೋರ್ ಅವರು ಸಾಹಿತ್ಯಕ್ಕಾಗಿ ನೊಬೆಲ್ ಪ್ರಶಸ್ತಿ ಯನ್ನು ಪಡೆದರು. ಇದು ಸಾಹಿತ್ಯ ಪ್ರಪಂಚದಲ್ಲಿ ಹಾಡುಗಳ ಮಹತ್ವವನ್ನು ಸ್ಥಾಪಿಸುತ್ತದೆ ಎಂದರು.
ಜಿಸಿಪಿಎಎಸ್ ಮುಖ್ಯಸ್ಥ ಪ್ರೊ.ವರದೇಶ್ ಹಿರೇಗಂಗೆ ಅವರು ಡಾ. ಬಾಶಬಿ ಅವರ ಕಾವ್ಯದಲ್ಲಿ ಸೌಂದರ್ಯ ಮತ್ತು ರಾಜಕೀಯ ವಿಲೀನಗೊಂಡು ಅವುಗಳನ್ನು ಪರಿಣಾಮಕಾರಿಯಾಗಿಸುತ್ತದೆ ಎಂದು ಅಭಿಪ್ರಾಯಪಟ್ಟರು.
ಎಡಿನ್ಬರೋ ವಿವಿಯ ಮಾಜಿ ಪ್ರಾಧ್ಯಾಪಕ ಡಾ.ನೀಲ್ ಫ್ರೇಸರ್ ಉಪಸ್ಥಿತರಿದ್ದರು.
