ಕೊರಗರು ಈ ನೆಲದ ವಾರಸುದಾರರು: ಮಂಜುನಾಥ ಗಿಳಿಯಾರ್

ಕುಂದಾಪುರ: ಆಶ್ರಯ ನೀಡಿದ ಮೂಲನಿವಾಸಿಗಳಿಗೆಯೇ ಒಂದು ತುಂಡು ಭೂಮಿ ಇಲ್ಲದ ರೀತಿಯಲ್ಲಿ ಇಂದು ವ್ಯವಸ್ಥಿತ ವಾಗಿ ಮೇಲ್ ಜಾತಿಗಳ ಆಡಳಿತ ವರ್ಗ ನಡೆದುಕೊಂಡಿದೆ. ಅದರ ಭಾಗವಾಗಿ ಅಜಲು, ಅಸ್ಪೃಶ್ಯತೆ, ಒಡೆಯ ಆಳು ಎನ್ನುವ ಆಚರಣೆ, ಪದ್ಧತಿಗಳು ನಡೆದು ಬಂದಿದೆ ಎಂದು ನ್ಯಾಯವಾದಿ ಮಂಜುನಾಥ್ ಗಿಳಿಯಾರು ಆರೋಪಿಸಿದ್ದಾರೆ

ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ನಾಡ ವಲಯ ಸಮಿತಿಯ ಜನಶಕ್ತಿ ಕಚೇರಿಯಲ್ಲಿ ರವಿವಾರ ಆಯೋಜಿಸಲಾದ ಕಾನೂನು ಮಾಹಿತಿ ಶಿಬಿರ ಮತ್ತು ಆದಿವಾಸಿ ನಾಡ ವಲಯ ಸಮಿತಿ ಸಮಾವೇಶದಲ್ಲಿ ಅವರು ವಿಚಾರ ಮಂಡನೆ ಮಾಡಿದರು.

ಕರಾವಳಿ ಜಿಲ್ಲೆಗಳಲ್ಲಿ ಕೊರಗ ಸಮುದಾಯದವರಿಗೆ ಭೂಮಿ ನೀಡಲು ಡಾಕ್ಟರ್ ಮಹ್ಮದ್ ಫೀರ್ ವರದಿ ಶಿಫಾರಸು ಮಾಡಿದರು ಸಹ ಇಂದಿಗೂ ಕೊರಗ ಸಮುದಾಯಕ್ಕೆ ಭೂಮಿ ಸಿಕ್ಕಿಲ್ಲ. ಅಂದಿನ ದರ್ಖಾಸ್ತು ಕಾನೂನು, ಉಳುವವನೇ ಹೊಲದೊಡೆಯ ಕಾನೂನು ಪ್ರಯೋಜನ ಈ ಸಮುದಾಯಗಳಿಗೆ ಸಿಕ್ಕಿಲ್ಲ ಎಂದು ಅವರ ದೂರಿದರು.

ಈ ಸಮುದಾಯಗಳಿಗೆ 5 ಸೆನ್ಸ್ ಭೂಮಿಗಿಂತ ಕಡಿಮೆ ನೀವೆಶನ ನೀಡಿ ಕಾಲೋನಿಗಳನ್ನು ನಿರ್ಮಿಸಿ ಮತ್ತೆ ಕೂಲಿ ಆಳು ಗಳು, ಅಜಲಿನ ಸೇವಕರನ್ನಾಗಿ ಮಾಡಲಾಗಿದೆ. ಈ ಸಮುದಾಯದ ಘನತೆ ಗೌರವದ ಬದುಕು ರೂಪಿಸಿಕೊಳ್ಳಲು ಭೂಮಿ ಹಕ್ಕು ಅತ್ಯಂತ ಮಹತ್ವದ ವಿಷಯವಾಗಿದೆ. ಆದಿವಾಸಿ ಸಂಘಟನೆ ನಿರಂತರವಾಗಿ ನಡೆಸುತ್ತಿರುವ ಭೂಮಿ ಚಳುವಳಿ ಅಭಿನಂದನೆಯ ಕೆಲಸವಾಗಿದೆ ಎಂದರು.

ಸಮಾವೇಶ ಉದ್ಘಾಟಿಸಿದ ಆದಿವಾಸಿ ಹಕ್ಕುಗಳ ಸಮಿತಿಯ ರಾಜ್ಯ ಸಮಿತಿ ಸದಸ್ಯ ಕೃಷ್ಣ ಇನ್ನಾ ಮಾತನಾಡಿ, ಕೊರಗ ಸಮುದಾಯದ ಘನತೆ ಗೌರವದ ಬದುಕಿಗೆ, ಒಳಮಿಸಲಾತಿಗಾಗಿ, ಉದ್ಯೋಗ, ಆಹಾರ, ಆರೋಗ್ಯ ಮತ್ತು ಭೂಮಿಯ ಹಕ್ಕಿಗಾಗಿ ಮಂಗಳೂರಿನಲ್ಲಿ ಜನವರಿ 23 ರಂದು ನಡೆಯಲಿರುವ ಆದಿವಾಸಿ ಆಕ್ರೋಶ ರ್ಯಾಲಿ ಹಾಗೂ ಬಹಿರಂಗ ಸಭೆಗೆ ಸಮುದಾಯದವರು ಹಾಗೂ ಜನಪರ ಕಾಳಜಿಯನ್ನು ಹೊಂದಿರುವ ಎಲ್ಲಾ ನಾಗರಿಕರು ಭಾಗವಹಿಸಬೇಕೆಂದು ಕರೆ ನೀಡಿದರು.

ಈ ಸಂದರ್ಭದಲ್ಲಿ ನೂತನ ವಲಯ ಸಮಿತಿಯನ್ನು ಆಯ್ಕೆ ಮಾಡಲಾಯಿತು. ಅಧ್ಯಕ್ಷರಾಗಿ ಶಾರದ ಹಕ್ಲಾಡಿ, ಕಾರ್ಯದರ್ಶಿಯಾಗಿ ಜಯಂತಿ ಗುಜ್ಜಾಡಿ, ಉಪಾಧ್ಯಕ್ಷರಾಗಿ ಬಾಬು ಹಕ್ಲಾಡಿ, ಸಹ ಕಾರ್ಯದರ್ಶಿಯಾಗಿ ಸುನೀತಾ ಪಡುಕೋಣೆ, ಸಂಚಾಲಕರಾಗಿ ಶ್ರೀಧರ ನಾಡ ಆಯ್ಕೆಯಾದರು.

ಸಮಿತಿ ಸದಸ್ಯರಾಗಿ ಉದಯ ರಾಮನಗರ, ಸುನಂದ ಪಡುಕೋಣೆ, ಮಂಜುನಾಥ ನೂಜಾಡಿ, ಚಿಕ್ಕು ಹೆಮ್ಮುಂಜೆ, ಕೊರಗ ನಾರ್ಕಳಿ, ಮಾಲತಿ ಆಲೂರು, ಮಮತಾ ಪಡುಕೋಣೆ, ಸುನಂದ ಮಾಣಿಕೊಳಲು ಸರ್ವಾನುಮತದಿಂದ ಆಯ್ಕೆಯಾದರು.

ವೇದಿಕೆಯಲ್ಲಿ ನಾಡ ಗ್ರಾಮ ಪಂಚಾಯತ್ ಸದಸ್ಯೆ ಮಮತಾ ಪಡುಕೋಣೆ, ಗುಜ್ಜಾಡಿ ಗ್ರಾಮ ಪಂಚಾಯತ್ ಸದಸ್ಯೆ ಜಯಂತಿ ಉಪಸ್ಥಿತರಿದ್ದರು. ಶ್ರೀಧರ ನಾಡ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದರು, ಸುನೀತಾ ಪಡುಕೋಣೆ ವಂದಿಸಿದರು.

ಭೂಮಿ ಹಕ್ಕು ಸಹಿತ ಹಲವು ನಿರ್ಣಯಗಳು

ನಾಡ, ಆಲೂರು, ಹಕ್ಲಾಡಿ, ಗುಜ್ಜಾಡಿ, ನಾವುಂದ, ಮರವಂತೆ ಮತ್ತು ತ್ರಾಸಿ ಪಂಚಾಯತ್ ವ್ಯಾಪ್ತಿಯ ಭೂರಹಿತ ಕುಟುಂಬಗಳಿಗೆ ಭೂಮಿ ನೀಡುವುದು ಮತ್ತು ಭೂಮಿಗೆ ಸಂಬಂಧಿಸಿದ ಎಲ್ಲಾ ಸಮಸ್ಯೆಗಳನ್ನೂ ಬಗ್ಗೆ ಹರಿಸಬೇಕು. ಡಿಮ್ಡ್, ಅರಣ್ಯ ಭೂಮಿಯಲ್ಲಿ ವಾಸಿಸುವ ಕುಟುಂಬಗಳಿಗೆ ಭೂಮಿ ಹಕ್ಕು ನೀಡಬೇಕು.

ಒಡೆರ ಭೂಮಿಯಲ್ಲಿ ವಾಸಿಸುವ ಕೊರಗರಿಗೆ ಅವರ ಹೆಸರಿನಲ್ಲಿ ಪಹಣಿ ಒದಗಿಸಬೇಕು. ಲಭ್ಯವಿರುವ ಡಿ.ಸಿ ಮನ್ನಾ ಭೂಮಿ ಕೊರಗ ಕುಟುಂಬಗಳಿಗೆ ಮೊದಲ ಆದ್ಯತೆಯಲ್ಲಿ ಹಂಚಬೇಕು. ವಸತಿ ಸಮಸ್ಯೆ ಇರುವವರಿಗೆ ತುರ್ತು ವಸತಿ ಸೌಲಭ್ಯ ಕಲ್ಪಿಸಲು ಇಲಾಖೆಗಳ ಮುತುವರ್ಜಿ ಯಲ್ಲಿ ನಡೆಯಬೇಕು.

ಕುಲಕಸುಬು ದಾರರಿಗೆ ಅವರು ಸ್ವಾವಲಂಬಿ ಬದುಕು ಕಟ್ಟಿಕೊಳ್ಳಲು ಯೋಜನೆ ರೂಪಿಸಿ ಜಾರಿಗೆ ತರಬೇಕು.ಕೊರಗ ಸಮುದಾಯದವರಿಗೆ ಆರೋಗ್ಯ ವೆಚ್ಚದ ಅನುದಾನ ಸರ್ಕಾರ ಬಿಡುಗಡೆ ಮಾಡಬೇಕು ಎಂಬ ನಿರ್ಣಯವನ್ನು ಸಮಾವೇಶದಲ್ಲಿ ಮಾಡಲಾಯಿತು.