ಶಿರ್ವ: ಬೈಕಿನಿಂದ ಬಿದ್ದು ಪೋಸ್ಟ್‌ಮೆನ್ ಮೃತ್ಯು

ಶಿರ್ವ, ಜು.26: ಬೈಕಿನಿಂದ ರಸ್ತೆಗೆ ಬಿದ್ದು ಪೋಸ್ಟ್‌ಮೆನೊಬ್ಬರು ಮೃತಪಟ್ಟ ಘಟನೆ ಜು.25ರಂದು ಸಂಜೆ ವೇಳೆ ತಿರ್ಲಪಲ್ಕೆ ಎಂಬಲ್ಲಿ ನಡೆದಿದೆ.

ಮೃತರನ್ನು ಮೂಡುಬೆಳ್ಳೆ ಕನರಾಡಿ ನಿವಾಸಿ ರಮೇಶ್ ನಾಯ್ಕ್(54) ಎಂದು ಗುರುತಿಸಲಾಗಿದೆ. ಇವರು ಮಣಿಪುರದಲ್ಲಿ ಪೋಸ್ಟ್‌ಮೆನ್ ಆಗಿ ಸುಮಾರು 30 ವರ್ಷಗಳಿಂದ ತಾತ್ಕಾಲಿಕ ನೆಲೆಯಲ್ಲಿ ಕರ್ತವ್ಯ ನಿರ್ವಹಿಸಿಕೊಂಡಿದ್ದರು.

ಇವರು ಅಂಗಡಿಯಿಂದ ಸಾಮಾನು ತರಲು ಬೈಕಿನಲ್ಲಿ ಮನೆಯಿಂದ ಮೂಡುಬೆಳ್ಳೆಗೆ ಹೋಗಿದ್ದು, ದಾರಿ ಮಧ್ಯೆ ಬೈಕಿನಿಂದ ಬಿದ್ದರೆನ್ನಲಾಗಿದೆ. ಇದರಿಂದ ಗಂಭೀರವಾಗಿ ಗಾಯಗೊಂಡ ಅವರು ಉಡುಪಿ ಜಿಲ್ಲಾಸ್ಪತ್ರೆಗೆ ಸಾಗಿಸುವ ದಾರಿ ಮಧ್ಯೆ ಮೃತಪಟ್ಟರೆಂದು ತಿಳಿದುಬಂದಿದೆ. ಇವರು ಪತ್ನಿ ಹಾಗೂ ಓರ್ವ ಪುತ್ರನನ್ನು ಅಗಲಿದ್ದಾರೆ. ಈ ಬಗ್ಗೆ ಶಿರ್ವ ಪೊಲೀಸ್ ಠಾಣೆ ಯಲ್ಲಿ ಪ್ರಕರಣ ದಾಖಲಾಗಿದೆ.