ಸೌಜನ್ಯ ಕೊಲೆ ಪ್ರಕರಣದ ಪ್ರತಿಭಟನೆಗೆ ಅಡ್ಡಿ ಯತ್ನ: ಮಹಿಳೆಯರ ಗುಂಪಿಗೆ ಪೊಲೀಸರ ದಿಗ್ಭಂಧನ

ಉಡುಪಿ, ಆ.29: ಸೌಜನ್ಯ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದ ಮರು ತನಿಖೆ ಮಾಡುವಂತೆ ಆಗ್ರಹಿಸಿ ಉಡುಪಿ ಜಿಲ್ಲಾ ಸೌಜನ್ಯ ಹೋರಾಟ ಸಮಿತಿಯ ನೇತೃತ್ವದಲ್ಲಿ ಮಂಗಳವಾರ ಅಜ್ಜರಕಾಡು ಸೈನಿಕರ ಹುತಾತ್ಮ ಸ್ಮಾರಕ ಬಳಿ ಹಮ್ಮಿಕೊಳ್ಳಲಾದ ಪ್ರತಿಭಟನೆಯಲ್ಲಿ ಭಾಗವಹಿಸಲು ಅವಕಾಶ ಕಲ್ಪಿಸುವಂತೆ ಆಗ್ರಹಿಸಿ ಮಹಿಳೆಯರ ಗುಂಪೊಂದು ಪ್ರತಿಭಟನೆಗೆ ಅಡ್ಡಿ ಪಡಿಸಲು ಯತ್ನಿಸಿದ್ದು, ಇದರಿಂದ ಸ್ಥಳದಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಯಿತು. ಮುಂಜಾಗ್ರತಾ ಕ್ರಮವಾಗಿ ಪೊಲೀಸರು ಈ ಮಹಿಳೆಯರನ್ನು ಪ್ರತಿಭಟನೆ ಮುಗಿಯುವವರೆಗೆ ದಿಗ್ಬಂಧನದಲ್ಲಿರಿಸಿದರು.

ಪ್ರತಿಭಟನಾ ಸಭೆ ಆರಂಭಕ್ಕೆ ಮೊದಲೇ ನೂರಾರು ಮಹಿಳೆಯರ ಗುಂಪು ಅಜ್ಜರಕಾಡು ಹುತಾತ್ಮ ಸ್ಮಾರಕದ ಎದುರು ಜಮಾಯಿಸಿತು. ಈ ಗುಂಪು ಪ್ರತಿಭಟನೆಗೆ ವಿರುದ್ಧವಾಗಿರುವುದನ್ನು ಅರಿತ ಪೊಲೀಸರು ಕೂಡಲೇ ಮಹಿಳೆ ಯರನ್ನು ಅಲ್ಲಿಂದ ಹೊರಗಡೆ ಕಳುಹಿಸಿದರು. ಆದರೆ ಹೊರ ಹೋಗಲು ಒಪ್ಪದ ಮಹಿಳೆಯರು ಪೊಲೀಸರೊಂದಿಗೆ ವಾಗ್ವಾದಕ್ಕೆ ಇಳಿದರು.

ಈ ವೇಳೆ ಮಹಿಳೆಯರ ಗುಂಪು ಧರ್ಮಸ್ಥಳ ಕ್ಷೇತ್ರದ ಪರ ಘೋಷಣೆಗಳನ್ನು ಕೂಗಿ ನಮಗೂ ಪ್ರತಿಭಟನೆಯಲ್ಲಿ ಭಾಗವಹಿಸಲು ಅವಕಾಶ ಕಲ್ಪಿಸುವಂತೆ ಒತ್ತಾಯಿಸಿತು. ಇದರಿಂದ ಕೆಲಕಾಲ ಬಿಗುವಿನ ವಾತಾವರಣ ನಿರ್ಮಾಣ ವಾಯಿತು. ಮಹಿಳೆಯರ ಗುಂಪು ಪ್ರತಿಭಟನಾ ಸ್ಥಳಕ್ಕೆ ತೆರಳದಂತೆ ಬ್ಯಾರಿಕೇಡ್, ಪೊಲೀಸ್ ವಾಹನವನ್ನು ರಸ್ತೆಗೆ ಅಡ್ಡಲಾಗಿ ನಿಲ್ಲಿಸಲಾಯಿತು.

ಮುಂಜಾಗ್ರತಾ ಕ್ರಮವಾಗಿ ಮಹಿಳೆಯರ ಗುಂಪನ್ನು ಅಲ್ಲಿಂದ ಕಳುಹಿಸಿ ಅಜ್ಜರಕಾಡು ಪುರಭವನದ ಎದುರು ದಿಗ್ಭಂಧನದಲ್ಲಿರಿಸಲಾಯಿತು. ಸುಮಾರು ನಾಲ್ಕು ತಾಸಿನ ಬಳಿಕ ಪ್ರತಿಭಟನೆ ಮುಗಿದ ಬಳಿಕ ಮಹಿಳೆಯರನ್ನು ಕಳುಹಿಸ ಲಾಯಿತು. ಈ ಹಿನ್ನೆಲೆಯಲ್ಲಿ ಸುಮಾರು ನಾಲ್ಕು ತಾಸು ಅಜ್ಜರಕಾಡು ಮಾರ್ಗದ ಸಂಚಾರವನ್ನು ಸ್ಥಗಿತಗೊಳಿಸಲಾಗಿತ್ತು. ಎಸ್ಪಿ ಅಕ್ಷಯ್ ಹಾಕೇ ನೇತೃತ್ವದಲ್ಲಿ ಹೆಚ್ಚುವರಿ ಎಸ್ಪಿ ಎಸ್.ಟಿ. ಸಿದ್ಧಲಿಂಗಪ್ಪ, ಡಿವೈಎಸ್ಪಿಗಳಾದ ದಿನಕರ, ಬೆಳ್ಳಿಯಪ್ಪ ಸ್ಥಳದಲ್ಲಿ ಬೀಡುಬಿಟ್ಟು ಬಿಗಿ ಭದ್ರತೆ ಒದಗಿಸಿದ್ದರು.