Udupi | ಮುಂದುವರಿದ ಮಳೆಯ ಕಣ್ಣುಮುಚ್ಚಾಲೆಯಾಟ ; ರೈತರಿಗೆ ಸಂಕಟ

ಉಡುಪಿ : ಉಡುಪಿ ಜಿಲ್ಲೆಯಲ್ಲಿ ಮುಂಗಾರು ಪೂರ್ವ ಮಳೆಯ ಜೊತೆ ಜೊತೆಗೆ ಮುಂಗಾರು ಮಳೆಯ ಕೊರತೆಯೂ ದೊಡ್ಡ ಪ್ರಮಾಣದಲ್ಲಿ ಕಾಣಿಸಿಕೊಂಡಿದೆ. ಎಲ್‌ನಿನೋ ಪ್ರಭಾವದಿಂದ ಈ ಬಾರಿ ಮಳೆಯಲ್ಲಿ ಕೊರತೆ ಕಾಣಿಸಿಕೊಳ್ಳುತಿದ್ದೆ ಎಂದು ವಿಜ್ಞಾನಿಗಳು ಹಾಗೂ ಕೃಷಿ ತಜ್ಞರು ಹೇಳುತ್ತಾ ಬಂದಿದ್ದರೂ, ಪ್ರತಿ ವರ್ಷ ಮೇ-ಜೂನ್ ತಿಂಗಳಲ್ಲಿ ಭತ್ತ ಬೆಳೆಯುವ ಕೃಷಿ ಚಟುವಟಿ ಪ್ರಾರಂಭಿಸುವ ಜಿಲ್ಲೆಯ ರೈತರು ಮಾತ್ರ ಎಚ್ಚರಿಕೆಯ ಹೊರತಾಗಿಯೂ ಆತಂಕಿತರಾಗಿದ್ದಾರೆ.

ಕೃಷಿಯ ಪೂರ್ವಸಿದ್ಧತೆಗಾಗಿ ಎಪ್ರಿಲ್-ಮೇ ತಿಂಗಳಲ್ಲಿ ಬರಬೇಕಿದ್ದ ಮುಂಗಾರು ಪೂರ್ವ ಮಳೆ ಕೈಕೊಟ್ಟ ಬಳಿಕ ಜೂನ್‌ನಲ್ಲಿ ತಪ್ಪದೇ ಬರಬೇಕಿದ್ದ ಮುಂಗಾರು ಮಳೆಯಲ್ಲೂ ಶೇ.50ರಷ್ಟು ಕೊರತೆ ಕಂಡುಬಂದಿರುವುದರಿಂದ ಭತ್ತದ ನಾಟಿಗೆ ರೈತನ ಸಿದ್ಧತೆ ಆಯ ತಪ್ಪಿದೆ. ಬೆಟ್ಟು ಗದ್ದೆಯ ಆಸೆಯನ್ನು ಕೈಬಿಟ್ಟರೂ ಬಯಲು ಗದ್ದೆಯಲ್ಲೇ ಆತನಿಗೆ ಈ ಬಾರಿ ಪೂರ್ಣರೀತಿಯ ಸಿದ್ಧತೆ ನಡೆಸಲು ಸಾಧ್ಯವಾಗುತ್ತಿಲ್ಲ.

ಇದೀಗ ಕಳೆದೊಂದು ವಾರದಿಂದ ಮಳೆ ಬಿರುಸುಗೊಳ್ಳುವ ಆಸೆ ಮೂಡಿಸುತಿದ್ದಂತೆ, ಹಗಲಿಡೀ ಬಿಸಿಲು ಕಾದು ನಿರಾಶೆ ಮೂಡಿಸುತ್ತಿದೆ. ಈ ಸಮಯದಲ್ಲಿ ಸರಾಸರಿ 8ರಿಂದ 9ಸೆ.ಮಿ. ಮಳೆಯಾಗಬೇಕಿದ್ದಲ್ಲಿ ಪ್ರತಿ ದಿನ ಬರುತ್ತಿರುವುದು 2ರಿಂದ 3ಸೆ.ಮೀ. ಮಳೆ ಮಾತ್ರ. ಈಗಿನ ಸ್ಥಿತಿಯಲ್ಲಿ ಜೂನ್ ತಿಂಗಳಿನಂತೆ ಜುಲೈ ತಿಂಗಳಲ್ಲೂ ಮಳೆಯ ಕೊರತೆ ಕಂಡುಬರುವ ಸಾಧ್ಯತೆಯೇ ಅಧಿಕ.

ಕೃಷಿ ಇಲಾಖೆಯ ಆಶಾವಾದ :

ಈ ನಡುವೆ ಕೃಷಿ ಇಲಾಖೆ ರೈತರಲ್ಲಿ ಧೈರ್ಯ ತುಂಬುವ ಕೆಲಸ ಮಾಡುತ್ತಿದೆ. ಮಳೆ ಮೂರು ವಾರಗಳಷ್ಟು ವಿಳಂಬವಾಗಿದ್ದರೂ, ಈಗ ಉತ್ತಮ ಮಳೆಯಾಗುತ್ತಿರುವುದರಿಂದ ನಾಟಿಯೂ ಸೇರಿದಂತೆ ಕೃಷಿ ಚಟುವಟಿಕೆಗಳನ್ನು ಮುಂದುವರಿಸುವಂತೆ ಹುರಿದುಂಬಿಸುತ್ತಿದೆ. ಪ್ರಸ್ತುತ ನೇರ ಬಿತ್ತನೆ ಅಥವಾ ಡ್ರಂ ಸೀಡರ್ ಮೂಲಕ ಬಿತ್ತನೆ ಮಾಡುವುದು ಉತ್ತಮ. ಪ್ರಸ್ತುತ ಪರಿಸ್ಥಿತಿಯಲ್ಲಿ ಯಾವುದೇ ತಳಿಗಳ ಬದಲಾವಣೆಯ ಅಗತ್ಯವಿರುವುದಿಲ್ಲ ಎಂದು ಇಲಾಖೆಯ ಹಿರಿಯ ಅಧಿಕಾರಿಗಳು ಸಲಹೆ ನೀಡುತ್ತಾರೆ.

ಆದರೆ ಜೂನ್ ತಿಂಗಳಿನಲ್ಲಿ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆ ಸುರಿಯದಿರುವುದರಿಂದ ನಾಟಿ ಕಾರ್ಯಗಳು ಹಲವು ಪ್ರದೇಶಗಳಲ್ಲಿ ವಿಳಂಬಗೊಂಡಿವೆ. ಕರಾವಳಿ ಜಿಲ್ಲೆಗಳಲ್ಲಿ ಭತ್ತದ ಕೃಷಿ ಮಳೆ ಆಧಾರಿತವಾಗಿರುವುದರಿಂದ, ಜೂನ್ ಮೊದಲ ವಾರದಿಂದಲೇ ಉಳುಮೆ, ಬೀಜ ಬಿತ್ತನೆ ಹಾಗೂ ನಾಟಿ ಕಾರ್ಯಗಳು ಆರಂಭವಾಗುವುದು ಸಾಮಾನ್ಯ. ಆದರೆ ಈ ಬಾರಿ ಮುಂಗಾರು ಚುರುಕುಗೊಳ್ಳಲು ವಿಳಂಬವಾದ ಕಾರಣ ಜಿಲ್ಲೆಯ ಅನೇಕ ಭಾಗಗಳಲ್ಲಿ ಗದ್ದೆಗಳು ಇನ್ನೂ ನೀರಿನಿಂದ ತುಂಬಿಲ್ಲ. ಪರಿಣಾಮವಾಗಿ ರೈತರು ಮಳೆಯ ನಿರೀಕ್ಷೆಯಲ್ಲೇ ಕಾಲ ಕಳೆಯುವಂತಾಗಿದೆ.

ಉಡುಪಿ ಜಿಲ್ಲೆಯ ಬ್ರಹ್ಮಾವರ, ಹೆಬ್ರಿ, ಕಾರ್ಕಳ, ಕುಂದಾಪುರ, ಬೈಂದೂರು ಮತ್ತು ಕಾಪು ತಾಲೂಕುಗಳ ಹಲವು ಗ್ರಾಮಗಳಲ್ಲಿ ರೈತರು ಗದ್ದೆಗಳನ್ನು ಸಿದ್ಧಪಡಿಸಿಕೊಂಡಿದ್ದರೂ, ಸಮರ್ಪಕ ನೀರಿನ ಕೊರತೆಯಿಂದ ನಾಟಿ ಕಾರ್ಯ ಆರಂಭಿಸಲು ಸಾಧ್ಯವಾಗಿಲ್ಲ. ಕೆಲವು ಪ್ರದೇಶಗಳಲ್ಲಿ ಬೀಜ ಬಿತ್ತನೆ ನಡೆಸಲಾಗಿದ್ದರೂ, ನಿರಂತರ ಮಳೆಯ ಕೊರತೆಯಿಂದ ಸಸಿಗಳ ಬೆಳವಣಿಗೆ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ರೈತರು ಅಭಿಪ್ರಾಯಪಡುತ್ತಿದ್ದಾರೆ.

ಮಳೆ ಕೊರತೆ ಮುಂದುವರಿದರೆ...? :

ಕೃಷಿ ಇಲಾಖೆ ಅಧಿಕಾರಿಗಳು ಹೇಳುವಂತೆ ಜಿಲ್ಲೆಯಲ್ಲಿ ಜುಲೈ ತಿಂಗಳ ಮೊದಲಾರ್ಧದವರೆಗೆ ನಾಟಿ ಕಾರ್ಯ ಕೈಗೊಳ್ಳಲು ಅವಕಾಶವಿದೆ. ಮುಂದಿನ ವಾರಗಳಲ್ಲಿ ಉತ್ತಮ ಮಳೆಯಾದರೆ ರೈತರು ವೇಗವಾಗಿ ನಾಟಿ ಕಾರ್ಯ ಕೈಗೊಳ್ಳಲು ಸಾಧ್ಯವಿದೆ. ಕೃಷಿ ವಿಜ್ಞಾನಿಗಳ ಅಭಿಪ್ರಾಯದಂತೆ, ಮಳೆ ವಿರಳವಾದ ಸಂದರ್ಭಗಳಲ್ಲಿ ಕಡಿಮೆ ಅವಧಿಯಲ್ಲಿ ಬೆಳೆಯುವ ಭತ್ತದ ತಳಿಗಳನ್ನು ಆಯ್ಕೆ ಮಾಡುವುದು ರೈತರಿಗೆ ಅನುಕೂಲಕರ. ಜೊತೆಗೆ ಗದ್ದೆಗಳಲ್ಲಿ ಲಭ್ಯವಿರುವ ತೇವಾಂಶವನ್ನು ಸಂರಕ್ಷಿಸುವ ಕ್ರಮಗಳನ್ನು ಅನುಸರಿಸಿದರೆ ಬೆಳೆ ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ.

ಒಂದು ವೇಳೆ ಮುಂದಿನ ದಿನಗಳಲ್ಲಿ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆ ಬಾರದೇ ಇದ್ದರೆ ಪರ್ಯಾಯ ಅಲ್ಪಾವಧಿ ತಳಿಗಳ ಬಿತ್ತನೆ ಮಾಡಬಹುದು ಎಂದು ಇಲಾಖೆಯ ಅಧಿಕಾರಿಗಳು ರೈತರಿಗೆ ಸಲಹೆ ನೀಡುತ್ತಾರೆ. ಇಲಾಖೆಯಲ್ಲಿ ಅಲ್ಪಾವಧಿ ತಳಿಗಳಾದ ಸಹ್ಯಾದ್ರಿ ಕೆಂಪುಮುಕ್ತಿ, ಜಯ, ಜ್ಯೋತಿ, ಎಂ.ಓ-23, ಉಮಾ ತಳಿಗಳ ಬಿತ್ತನೆ ಬೀಜಗಳು ಸಾಕಷ್ಟು ಲಭ್ಯವಿದೆ. ಅಲ್ಲದೇ ಮಳೆಯ ಕೊರತೆ ಸಂದರ್ಭದಲ್ಲಿ ನೀರನ್ನು ಗದ್ದೆಯಲ್ಲಿ ಉಳಿಸಿಕೊಳ್ಳಲು ಬದುಗಳನ್ನು ಬಲಪಡಿಸಬಹುದು ಎಂದು ವಿವರಿಸಿದರು.

ರೈತರು ಯಾವುದೇ ಸಂದರ್ಭದಲ್ಲಿ ಸ್ಥಳೀಯ ಕೃಷಿ ಇಲಾಖೆಯೊಂದಿಗೆ ಸಂಪರ್ಕದಲ್ಲಿದ್ದು, ಹವಾಮಾನ ಮುನ್ಸೂಚನೆ ಹಾಗೂ ತಾಂತ್ರಿಕ ಸಲಹೆಗಳನ್ನು ಪಡೆಯಬಹುದು ಎಂದು ಇಲಾಖಾಧಿಕಾರಿಗಳು ರೈತರಿಗೆ ಭರವಸೆ ತುಂಬುತ್ತಾರೆ.