Udupi | ಯಕ್ಷಗಾನದಿಂದ ಭಾಷೆ, ಆರೋಗ್ಯ, ಭವಿಷ್ಯಕ್ಕೆ ಒಳಿತು : ಎಂ.ಎಲ್.ಸಾಮಗ

ಉಡುಪಿ : ಯಕ್ಷಗಾನದಂತಹ ಅದ್ಭುತ ಕಲೆ ಜಗತ್ತಿನಲ್ಲಿ ಎಲ್ಲೂ ಇಲ್ಲ. ಇದರಲ್ಲಿ ನೃತ್ಯ, ವೇಷಭೂಷಣ, ಗಾಯನ ಹಾಗೂ ಮಾತುಗಾರಿಕೆಯ ಅಪೂರ್ವ ಸಂಗಮವಿದೆ. ಈ ಕಲೆಯಿಂದ ಶರೀರ ಮತ್ತು ಬುದ್ಧಿಗೆ ಉತ್ತಮ ಕಸರತ್ತು ಸಿಗಲಿದ್ದು, ಆರೋಗ್ಯಕ್ಕೂ ಇದು ಬಹಳ ಒಳ್ಳೆಯದು ಎಂದು ಯಕ್ಷಗಾನ ಅಕಾಡೆಮಿಯ ಮಾಜಿ ಅಧ್ಯಕ್ಷ ಎಂ.ಎಲ್.ಸಾಮಗ ಹೇಳಿದ್ದಾರೆ.

ಸುಮನಸಾ ಕೊಡವೂರು ಸಂಸ್ಥೆಯ ರಜತ ಸಂಭ್ರಮದ ಸರಣಿ ಕಾರ್ಯಕ್ರಮಗಳ ಅಂಗವಾಗಿ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಕಾರದೊಂದಿಗೆ ಯಕ್ಷರಂಗದ ಸವ್ಯಸಾಚಿ ದಿವಂಗತ ಜಯಂತ್ ಕುಮಾರ್ ತೋನ್ಸೆ ಸ್ಮರಣೆಯಲ್ಲಿ ಕೊಡವೂರು ವಿಪ್ರಶ್ರೀ ಕಲಾಭವನದಲ್ಲಿ ಆಯೋಜಿಸಲಾದ ಯಕ್ಷಪಥ -ಚಿಣ್ಣರ ಯಕ್ಷ ಹೆಜ್ಜೆ’ ಕಲಿಕಾ ಶಿಬಿರವನ್ನು ಉದ್ಘಾಟಿಸಿ ಅವರು ಮಾತನಾಡುತಿದ್ದರು.

ಇಂದು ಜಗತ್ತಿನಾದ್ಯಂತ ಯಕ್ಷಗಾನ ತಂಡಗಳಿದ್ದು, ಈ ಕಲೆಯನ್ನು ಕರಗತ ಮಾಡಿಕೊಂಡರೆ ವಿದೇಶಗಳಲ್ಲೂ ಅವಕಾಶ ಸಿಗಲಿದೆ. ನಿಮ್ಮ ಭವಿಷ್ಯಕ್ಕೂ ಒಳ್ಳೆಯದು. ಯಕ್ಷಗಾನ ಕಲಿಕೆಯಿಂದ ಕನ್ನಡ ಭಾಷೆಯನ್ನು ಸ್ಪಷ್ಟವಾಗಿ ಮತ್ತು ಚಂದವಾಗಿ ಮಾತನಾಡಲು ಸಾಧ್ಯವಾಗುತ್ತದೆ ಎಂದರು.

ವಿದ್ಯಾರ್ಥಿಗಳು ಬಹಳ ಆಸಕ್ತಿಯಿಂದ ಯಕ್ಷಗಾನ ಕಲಿಯಬೇಕು. ಹಿಂದಿನ ದಿನ ಕಲಿಸಿದ್ದನ್ನು ಸ್ವತಃ ಅಭ್ಯಾಸ ಮಾಡಿ, ಗುರುಗಳಿಂದ ಕೇಳಿ ತಿಳಿದುಕೊಳ್ಳಿ. ಯಕ್ಷಗಾನದಲ್ಲಿ ಕಥೆಗಳನ್ನು ತಿಳಿಯುವುದರಿಂದ ಅಜ್ಜಿ-ಅಮ್ಮ ಕಥೆ ಹೇಳುವ ಅಗತ್ಯವೇ ಬರುವುದಿಲ್ಲ. ಕೇವಲ ಒಂದು ಪ್ರದರ್ಶನ ನೀಡಿ, ಫೋಟೋ ಹಾಕಿಕೊಂಡು ಕಲಿಕೆಯನ್ನು ನಿಲ್ಲಿಸಬಾರದು. ಇತರರ ಅಭಿನಯವನ್ನು ಗಮನಿಸುತ್ತಾ ಯಕ್ಷ ಕಲಿಕೆಯನ್ನು ನಿರಂತರವಾಗಿ ಮುಂದುವರಿಸಬೇಕು ಎಂದು ಅವರು ತಿಳಿಸಿದರು.

ಶಿಬಿರದ ಗುರುಗಳಾದ ಶೈಲೇಶ್ ತೀರ್ಥಹಳ್ಳಿ, ಸಂಸ್ಥೆಯ ಅಧ್ಯಕ್ಷ ಪ್ರಕಾಶ್ ಜಿ.ಕೊಡವೂರು, ಗೌರವಾಧ್ಯಕ್ಷ ಎಂ.ಎಸ್.ಭಟ್, ಸಂಚಾಲಕ ಭಾಸ್ಕರ್ ಪಾಲನ್ ಹಾಗೂ ಶಿಬಿರದ ಸಂಯೋಜಕ ಅಕ್ಷತ್ ಅಮೀನ್, ಕಾರ್ಯದರ್ಶಿ ಚಂದ್ರಕಾಂತ್ ಕುಂದರ್ ಉಪಸ್ಥಿತರಿದ್ದರು.