ಭಟ್ಕಳ: AITM ನಲ್ಲಿ IoT ಕ್ಲಬ್ ಉದ್ಘಾಟನೆ
ಭಟ್ಕಳ: ಅಂಜುಮನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಅಂಡ್ ಮ್ಯಾನೇಜ್ಮೆಂಟ್ (ಎಐಟಿಎಂ)ನ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಎಂಜಿನಿಯರಿಂಗ್ ವಿಭಾಗದ ವತಿಯಿಂದ ಐಒಟಿ (Internet of Things) ಕ್ಲಬ್ ಉದ್ಘಾಟಿಸಲಾಯಿತು.
ಕಾರ್ಯಕ್ರಮದ ಅಂಗವಾಗಿ ‘ಐಒಟಿ ಇನ್ ಆಟೋಮೋಟಿವ್’ ವಿಷಯದ ಕುರಿತು ವೆಬಿನಾರ್ ಹಾಗೂ ‘ಆರ್ಡ್ವಿನೊ 101’ ಪ್ರಾಯೋಗಿಕ ಕಾರ್ಯಾಗಾರ ನಡೆಯಿತು.
ಬ್ಲೂ ಸಂಸ್ಥೆಯಲ್ಲಿ ಎಐ ಆರ್ಕಿಟೆಕ್ಟ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಎಐಟಿಎಂನ ಹಳೆಯ ವಿದ್ಯಾರ್ಥಿ ನಿಹಾಲ್ ಸುರೇಶ ನಾಯ್ಕ ಮುಖ್ಯ ಅತಿಥಿಯಾಗಿ ಭಾಗವಹಿಸಿ, ಉದ್ಯಮ ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಐಒಟಿ ತಂತ್ರಜ್ಞಾನಗಳ ಹೆಚ್ಚುತ್ತಿರುವ ಮಹತ್ವದ ಕುರಿತು ಮಾತನಾಡಿದರು. ವಿದ್ಯಾರ್ಥಿಗಳು ತಮ್ಮ ಶೈಕ್ಷಣಿಕ ಹಂತದಿಂದಲೇ ಪ್ರಾಯೋಗಿಕ ಕೌಶಲ್ಯಗಳನ್ನು ಬೆಳೆಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ಜರ್ಮನಿಯ ಎಕ್ಸಲೆರಾ ಬೈ ಕಮ್ಮಿನ್ಸ್ ಸಂಸ್ಥೆಯ ಪ್ರಾಡಕ್ಟ್ ಎಂಜಿನಿಯರ್ ಅಶ್ಫಾಕ್ ಅಹಮದ್ ಅವರು ಜರ್ಮನಿಯಿಂದಲೇ ‘ಐಒಟಿ ಇನ್ ಆಟೋಮೋಟಿವ್’ ವಿಷಯದ ಕುರಿತು ವೆಬಿನಾರ್ ಮೂಲಕ ಉಪನ್ಯಾಸ ನೀಡಿದರು. ಆಟೋಮೋಟಿವ್ ಕ್ಷೇತ್ರದಲ್ಲಿ ಐಒಟಿ ತಂತ್ರಜ್ಞಾನಗಳು ತರುತ್ತಿರುವ ಬದಲಾವಣೆಗಳು ಹಾಗೂ ಜಾಗತಿಕ ಉದ್ಯಮ ಕ್ಷೇತ್ರದ ಬೆಳವಣಿಗೆಗಳ ಕುರಿತು ಅವರು ವಿವರಿಸಿದರು.
ಐಒಟಿ ಕ್ಲಬ್ನ ಪ್ರಮುಖ ಚಟುವಟಿಕೆಯಾಗಿ ಆಯೋಜಿಸಿದ್ದ ‘ಆರ್ಡ್ವಿನೊ 101’ ಕಾರ್ಯಾಗಾರವನ್ನು ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಎಂಜಿನಿಯರಿಂಗ್ ವಿಭಾಗದ ಅಂತಿಮ ವರ್ಷದ ವಿದ್ಯಾರ್ಥಿಗಳು ನಡೆಸಿಕೊಟ್ಟರು. ಪ್ರಥಮ ವರ್ಷದ ವಿದ್ಯಾರ್ಥಿಗಳು ಮೈಕ್ರೋಕಂಟ್ರೋಲರ್ಗಳು, ಸರ್ಕ್ಯೂಟ್ ನಿರ್ಮಾಣ ಹಾಗೂ ಸೆನ್ಸರ್ ಇಂಟರ್ಫೇಸಿಂಗ್ ಕುರಿತು ಪ್ರಾಯೋಗಿಕ ಅನುಭವ ಪಡೆದರು.
ಕಾಲೇಜಿನ ಪ್ರಾಂಶುಪಾಲ ಡಾ. ಕೆ. ಫಜ್ಲೂರ್ ರೆಹಮಾನ್ ಅವರು ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ವಿಭಾಗದ ಉಪಕ್ರಮವನ್ನು ಶ್ಲಾಘಿಸಿ, ಅಗತ್ಯ ಸಾಂಸ್ಥಿಕ ಬೆಂಬಲ ನೀಡುವುದಾಗಿ ತಿಳಿಸಿದರು. ರಿಜಿಸ್ಟ್ರಾರ್ ಪ್ರೊ. ಜಾಹಿದ್ ಹಸನ್ ಖರುರಿ ಶುಭ ಹಾರೈಸಿದರು.
ವಿಭಾಗದ ಮುಖ್ಯಸ್ಥ ಡಾ. ಕಿರಣ್ ವಿ. ಶಾನಭಾಗ್ ಅವರು ವಿದ್ಯಾರ್ಥಿಗಳ ನೇತೃತ್ವದ ತಾಂತ್ರಿಕ ವೇದಿಕೆಗಳ ಮೂಲಕ ನಾವೀನ್ಯತೆಗೆ ಉತ್ತೇಜನ ನೀಡುವ ಇಲಾಖೆಯ ಬದ್ಧತೆಯನ್ನು ವಿವರಿಸಿದರು. ಐಒಟಿ ಕ್ಲಬ್ ಸಂಯೋಜಕ ಪ್ರೊ. ಶ್ರೀಶೈಲ್ ಭಟ್ ಅವರು, ಕ್ಯಾಂಪಸ್ನಿಂದಲೇ ಜಾಗತಿಕ ತಂತ್ರಜ್ಞಾನ ಕ್ಷೇತ್ರದತ್ತ ವಿದ್ಯಾರ್ಥಿಗಳು ಹೆಜ್ಜೆ ಇಡುವ ಅವಕಾಶಗಳಿವೆ ಎಂದರು.
ಐಒಟಿ ಕ್ಲಬ್ನ ವಿದ್ಯಾರ್ಥಿ ಅಧ್ಯಕ್ಷ ಸಲ್ಸಬೀಲ್ ಕೊಬಟ್ಟೆ ಹಾಗೂ ಟೆಕ್ನೋವೇಟ್ (ಎಲೆಕ್ಟ್ರಾನಿಕ್ಸ್ ವಿದ್ಯಾರ್ಥಿ ವೇದಿಕೆ) ಅಧ್ಯಕ್ಷ ಮೊಹಮ್ಮದ್ ಸಾಯೀಮ್ ಚಂಪಾ ಅವರು ವಿದ್ಯಾರ್ಥಿ ಕಾರ್ಯಕಾರಿ ಸಮಿತಿಯ ಸಹಕಾರದೊಂದಿಗೆ ಕಾರ್ಯಕ್ರಮವನ್ನು ಸಂಯೋಜಿಸಿದರು.
‘ಸ್ಮಾರ್ಟ್ ಕ್ಯಾಂಪಸ್’ ಉಪಕ್ರಮದಡಿ ಕ್ಯಾಂಪಸ್ನಲ್ಲಿಯೇ ಐಒಟಿ ಆಧಾರಿತ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವ ಉದ್ದೇಶವನ್ನು ಕ್ಲಬ್ ಹೊಂದಿದೆ. ಮುಂದಿನ ದಿನಗಳಲ್ಲಿ ಕಾರ್ಯಾಗಾರಗಳು, ಹ್ಯಾಕಥಾನ್ಗಳು, ತಜ್ಞರ ಉಪನ್ಯಾಸಗಳು ಹಾಗೂ ಅಂತರ್ಕಾಲೇಜು ಸ್ಪರ್ಧೆಗಳನ್ನು ಆಯೋಜಿಸಲು ಉದ್ದೇಶಿಸಲಾಗಿದೆ.
