ಭಟ್ಕಳದ ಕಾರವಾನ್-ಎ-ಶಬಾಬ್‌ನಿಂದ ಐತಿಹಾಸಿಕ ಸಾಕ್ಷ್ಯಚಿತ್ರ ಸ್ಪರ್ಧೆ

ಭಟ್ಕಳ: ಭಾರತೀಯ ಮುಸ್ಲಿಂ ಆಡಳಿತಗಾರರ ಇತಿಹಾಸವನ್ನು ಯುವಜನರಿಗೆ ಪರಿಚಯಿಸುವ ಉದ್ದೇಶದಿಂದ ಇಲ್ಲಿನ ಮಕ್ಕಳ ಸಾಹಿತ್ಯ ಸಂಘದ (ಇದಾರಾ ಅದಬ್-ಎ-ಅತ್ಫಾಲ್) ವಿಭಾಗವಾದ ಕಾರವಾನ್-ಎ-ಶಬಾಬ್ ವತಿಯಿಂದ ವಿಡಿಯೊ ಸಾಕ್ಷ್ಯಚಿತ್ರ ಸ್ಪರ್ಧೆ ಆಯೋಜಿಸಲಾಗಿದೆ. ಸ್ಪರ್ಧೆಯಲ್ಲಿ ವಿಜೇತರಾಗುವವರಿಗೆ ಒಟ್ಟು 55,555 ರೂ. ನಗದು ಬಹುಮಾನ ನೀಡಲಾಗುವುದು ಎಂದು ಸಂಘಟಕರು ತಿಳಿಸಿದ್ದಾರೆ.

ಗೋವಾದಿಂದ ಮಂಗಳೂರಿನವರೆಗೆ ವಾಸಿಸುವ ಪುರುಷರು ಮತ್ತು ಮಹಿಳೆಯರು ಧರ್ಮಭೇದವಿಲ್ಲದೆ ಸ್ಪರ್ಧೆಯಲ್ಲಿ ಭಾಗವಹಿಸಬಹುದು. ಯುವಜನರಲ್ಲಿ ಐತಿಹಾಸಿಕ ಅರಿವು ಹಾಗೂ ಸೃಜನಶೀಲತೆಯನ್ನು ಬೆಳೆಸುವುದು ಮತ್ತು ಭಾರತದ ಇತಿಹಾಸವನ್ನು ಆಧುನಿಕ ಮಾಧ್ಯಮದ ಮೂಲಕ ಹೊಸ ಪೀಳಿಗೆಗೆ ಪರಿಚಯಿಸುವುದು ಈ ಸ್ಪರ್ಧೆಯ ಉದ್ದೇಶವಾಗಿದೆ.

ಔರಂಗಜೇಬ್ ಆಲಂಗೀರ್, ಮುಜಫರ್ ಷಾ ಗುಜರಾತಿ, ಅಲಾವುದ್ದೀನ್ ಖಿಲ್ಜಿ, ಕುತುಬುದ್ದೀನ್ ಐಬಕ್ ಹಾಗೂ ಟಿಪ್ಪು ಸುಲ್ತಾನ್ ಸೇರಿದಂತೆ ಆಯ್ದ ಐತಿಹಾಸಿಕ ಆಡಳಿತಗಾರರ ಕುರಿತು ಸಾಕ್ಷ್ಯಚಿತ್ರಗಳನ್ನು ಸಿದ್ಧಪಡಿಸಬೇಕು. ಉರ್ದು, ಹಿಂದಿ ಅಥವಾ ಇಂಗ್ಲಿಷ್ ಭಾಷೆಯಲ್ಲಿ ವಿಡಿಯೊ ತಯಾರಿಸಿ, ನವೆಂಬರ್ 30, 2026ರೊಳಗೆ ಸಲ್ಲಿಸಬೇಕು ಎಂದು ಸಂಘಟಕರು ತಿಳಿಸಿದ್ದಾರೆ.

ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನವಾಗಿ 12,000 ರೂ., ದ್ವಿತೀಯ ಬಹುಮಾನವಾಗಿ 10,000 ರೂ. ಹಾಗೂ ತೃತೀಯ ಬಹುಮಾನವಾಗಿ 8,000 ರೂ. ನೀಡಲಾಗುವುದು. ಇದರೊಂದಿಗೆ ಇತರ ಹತ್ತು ಅತ್ಯುತ್ತಮ ಕೃತಿಗಳಿಗೂ ಪ್ರೋತ್ಸಾಹಕ ಬಹುಮಾನಗಳನ್ನು ನೀಡಲಾಗುತ್ತದೆ. ಒಟ್ಟು ಬಹುಮಾನ ಮೊತ್ತ 55,555 ರೂ. ಆಗಿದೆ.

ಆಸಕ್ತರು ಸಂಘಟಕರು ಒದಗಿಸಿರುವ ಲಿಂಕ್ https://forms.gle/9b88rrUYu1mehcmM8 ಅಥವಾ ಕ್ಯೂಆರ್ ಕೋಡ್ ಮೂಲಕ ನೋಂದಣಿ ಮಾಡಿಕೊಳ್ಳಬಹುದು ಎಂದು ಪ್ರಕಟಣೆ ತಿಳಿಸಿದೆ.