ಶೀಘ್ರದಲ್ಲೆೇ ಓದುಗರ ಕೈ ಸೇರಲಿರುವ 50 ಸಾಧಕಿಯರ ಕುರಿತ ಪುಸ್ತಕ

ಬೆಂಗಳೂರು : ಕರ್ನಾಟಕ ಸುವರ್ಣ ಸಂಭ್ರಮದ ಪ್ರಯುಕ್ತ ಕರ್ನಾಟಕ ಸಾಹಿತ್ಯ ಅಕಾಡಮಿ ರೂಪಿಸಿರುವ ‘ಮಹಿಳಾ ಮುನ್ನಡೆ’ ಯೋಜನೆಯಡಿಯಲ್ಲಿ ನಾಡಿನ 50 ಸಾಧಕಿಯರ ಕುರಿತ ಪುಸ್ತಕಗಳು ಮುದ್ರಣಕ್ಕೆ ಸಿದ್ಧವಾಗಿದ್ದು, ಶೀಘ್ರದಲ್ಲೇ ಓದುಗರ ಕೈ ಸೇರಲಿವೆ.

ಕಲೆ, ಸಾಹಿತ್ಯ, ಜನಪದ, ವೈದ್ಯಕೀಯ, ವಿಜ್ಞಾನ, ರಾಜಕೀಯ ಸೇರಿದಂತೆ ವಿವಿಧ ಕ್ಷೇತ್ರದಲ್ಲಿ ಗಣನೀಯ ಸಾಧನೆ ಮಾಡಿರುವ ಮಹಿಳೆಯರನ್ನು ನಾಡಿನ ಜನತೆಗೆ ಪರಿಚಿಯಿಸುವ ನಿಟ್ಟಿನಲ್ಲಿ ಈ ಯೋಜನೆ ರೂಪಿಸಲಾಗಿದ್ದು, ಕರ್ನಾಟಕ ಲೇಖಕಿಯರ ಸಂಘದ ಅಧ್ಯಕ್ಷೆ ಡಾ.ಎಚ್.ಎಲ್.ಪುಷ್ಪಾ ಹಾಗೂ ಹೋರಾಟಗಾರ್ತಿ ಡಾ.ಮೀನಾಕ್ಷಿ ಬಾಳಿ ಅವರ ಸಂಪಾದಕತ್ವದಲ್ಲಿ ಪುಸ್ತಕಗಳು ರೂಪುಗೊಳ್ಳಲಿವೆ.

ಕರ್ನಾಟಕದಲ್ಲಿ ಎಲ್ಲ ಅನೇಕ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿ ಮರಣ ಹೊಂದಿರುವ ಸಾಧಕಿಯರ ಬಗ್ಗೆ ಈಗಾಗಲೇ ಹೆಸರು ಮಾಡಿರುವ ಲೇಖಕರ ಕೈಯಲ್ಲಿ ಪುಸ್ತಕ ಬರೆಸಲಾಗಿದೆ. ಇದು ಬಹಳ ಮುಖ್ಯವಾದ ಪುಸ್ತಕ ಮಾಲಿಕೆಯಾಗಿದೆ. ಮೊದಲ ಬಾರಿಗೆ ಅಕಾಡಮಿಯಿಂದ ಮಹಿಳೆಯರ ಬಗ್ಗೆಯೇ ಬರುತ್ತಿರುವ ಪುಸ್ತಕಗಳಾಗಿವೆ ಎನ್ನುವುದು ಮಹಿಳಾ ಮುನ್ನಡೆಯ ಸಂಪಾದಕಿ ಡಾ.ಎಚ್.ಎಲ್.ಪುಷ್ಪಾಅವರ ಅಭಿಪ್ರಾಯವಾಗಿದೆ.

ಎಚ್.ಗಿರಿಜಮ್ಮ ಅವರ ಬಗ್ಗೆ ಲೇಖಕಿ ಡಾ.ವಸುಂಧರಾ ಭೂಪತಿ ಪ್ರೇಮಾ ಕಾರಂತ್ ಅವರ ಬಗ್ಗೆ ಶಶಿಧರ್ ಭಾರಿಘಾಟ್, ಪತ್ರಕರ್ತೆ ಗೌರಿ ಲಂಕೇಶ್ ಅವರ ಬಗ್ಗೆ ಹೋರಾಟಗಾರ್ತಿ ಮಲ್ಲಿಗೆ ಅವರು ಬರೆದಿದ್ದಾರೆ. ಇನ್ನುಳಿದಂತೆ ಕನ್ನಡದ ಪ್ರಮುಖ ಲೇಖಕರು, ಲೇಖಕಿಯರಿಂದ ಸಾಧಕಿಯರ ಬಗ್ಗೆ ಪುಸ್ತಕಗಳನ್ನು ಬರೆಸಲಾಗಿದೆ.

ಒಂದು ಪುಸ್ತಕ ಅಂದಾಜು 100 ಪುಟಗಳಲ್ಲಿ ಇರಲಿದ್ದು, ಕೆಲವು ಪುಸ್ತಕಗಳಿಗೆ 100ಕ್ಕಿಂತ ಹೆಚ್ಚು ಪುಟ ಕೂಡ ಆಗಬಹುದು. ಎಲ್ಲ 50 ಪುಸ್ತಕಗಳು ಮುದ್ರಣವಾದ ನಂತರ ಒಂದೇ ಸಲ ಬಿಡುಗಡೆ ಮಾಡುವ ಯೋಜನೆಯನ್ನು ಕರ್ನಾಟಕ ಸಾಹಿತ್ಯ ಅಕಾಡಮಿ ಹಾಕಿಕೊಂಡಿದೆ.