ಹಳೆಯ ಲೋಪಗಳ ದುರುಪಯೋಗಕ್ಕೆ AI ನೆರವು: SBI, ಇಮುದ್ರಾ ಡೇಟಾ ಸೋರಿಕೆಯಿಂದ ಬಯಲಾದ ಭಾರತದ ಸೈಬರ್ ಭದ್ರತಾ ವ್ಯವಸ್ಥೆಯ ಲೋಪಗಳು

ಅಕ್ಟೋಬರ್ 15ರಂದು, ಭಾರತದ ರಾಷ್ಟ್ರೀಯ ಸೈಬರ್ ಭದ್ರತಾ ಸಂಸ್ಥೆಯಾದ 'ಸಿಇಆರ್ಟಿ-ಇನ್' (CERT-In) ಜಾಗೃತಿ ಸೂಚನೆಯೊಂದನ್ನು ಹೊರಡಿಸಿತು. ಆದರೆ, ದಾಳಿಗೊಳಗಾದ ಯಾವುದೇ ಸಂಸ್ಥೆಯೂ ಈ ಬಗ್ಗೆ ದೂರು ನೀಡಿರಲಿಲ್ಲ. ತಂತ್ರಜ್ಞಾನ ಕಂಪೆನಿಗಳು ಅಭಿವೃದ್ಧಿಪಡಿಸಿ, ಮುಕ್ತ ಅಂತರ್ಜಾಲದಲ್ಲಿ ಪರೀಕ್ಷಿಸುತ್ತಿದ್ದ AI (ಕೃತಕ ಬುದ್ಧಿಮತ್ತೆ) ಏಜೆಂಟ್‌ ಗಳು ತಮ್ಮ ಮಿತಿಯನ್ನು ಮೀರಿ ಭಾರತೀಯ ಸಂಸ್ಥೆಗಳ ರಹಸ್ಯ ಕಂಪ್ಯೂಟರ್ ವ್ಯವಸ್ಥೆಗಳನ್ನು ಪ್ರವೇಶಿಸಿದ್ದವು.

ಅವು ವೈಯಕ್ತಿಕ ಮತ್ತು ರಹಸ್ಯ ಮಾಹಿತಿಯಿದ್ದ ವಹಿವಾಟು ದಾಖಲೆಗಳನ್ನು ಪರಿಶೀಲಿಸಿದ್ದವು. ಆದರೂ, ಈ ಬಗ್ಗೆ ಯಾವುದೇ ಸಂಸ್ಥೆಗೆ ಸುಳಿವು ಸಿಕ್ಕಿರಲಿಲ್ಲ. AI ಮಾದರಿಗಳನ್ನು ಒದಗಿಸುವ ಕಂಪೆನಿಗಳು ತಮ್ಮ ಆಂತರಿಕ ಪರಿಶೀಲನೆಯ ನಂತರ ಸ್ವಯಂಪ್ರೇರಿತವಾಗಿ ಮಾಹಿತಿ ನೀಡಿದ ಮೇಲಷ್ಟೇ ಈ ಸೈಬರ್ ದಾಳಿಗಳು ನಡೆದಿರುವುದು ಬೆಳಕಿಗೆ ಬಂದಿದೆ ಎಂದು ಕಂಪ್ಯೂಟರ್ ಎಮರ್ಜೆನ್ಸಿ ರೆಸ್ಪಾನ್ಸ್ ಟೀಮ್ (CERT-In) ತಿಳಿಸಿದೆ.

ನಂತರದ ಎರಡು ವಾರಗಳಲ್ಲಿಯೂ ಇಂಥದ್ದೇ ಘಟನೆಗಳು ಮರುಕಳಿಸಿದವು. ದೇಶದ ಅತಿದೊಡ್ಡ ಬ್ಯಾಂಕ್ ಆದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಗ್ರಾಹಕರ ಮಾಹಿತಿ ಡಾರ್ಕ್ ವೆಬ್‌ ನಲ್ಲಿ ಮಾರಾಟಕ್ಕಿಡಲಾಗಿದೆ ಎಂದು ಅಕ್ಟೋಬರ್ 16ರಂದು ಸಿಇಆರ್ಟಿ-ಇನ್, ಡಿಫೆನ್ಸ್ ಸೈಬರ್ ಏಜೆನ್ಸಿ ಮತ್ತು ಖಾಸಗಿ ಸೈಬರ್ ಭದ್ರತಾ ಸಂಸ್ಥೆಯೊಂದು ಬ್ಯಾಂಕ್‌ ಗೆ ಮಾಹಿತಿ ನೀಡಿದವು. ಈ ವಿಷಯವನ್ನು ಬ್ಯಾಂಕ್ ಐದು ದಿನಗಳ ನಂತರ ಷೇರು ಮಾರುಕಟ್ಟೆಗೆ ತಿಳಿಸಿತು.

ಅದರ ಮರುದಿನವೇ, ಬೆಂಗಳೂರು ಮೂಲದ ಡಿಜಿಟಲ್ ಪ್ರಮಾಣಪತ್ರ ಸಂಸ್ಥೆಯಾದ 'ಇಮುದ್ರಾ' ಬಳಿಯಿದ್ದ ಖಾಸಗಿ ಕೀಗಳನ್ನು (ಡಿಜಿಟಲ್ ದಾಖಲೆಗಳಿಗೆ ಸಹಿ ಮಾಡಲು ಬಳಸುವ ರಹಸ್ಯ ಸಾಫ್ಟ್ವೇರ್ ಕೋಡ್‌ ಗಳು) ಸುಲಭವಾಗಿ ದುರುಪಯೋಗಪಡಿಸಿಕೊಳ್ಳಬಹುದು ಎಂದು ಸಂಶೋಧಕರೊಬ್ಬರು ಗೂಗಲ್, ಮೊಝಿಲ್ಲಾ, ಆ್ಯಪಲ್ ಮತ್ತು ಮೈಕ್ರೋಸಾಫ್ಟ್ ಕಂಪೆನಿಗಳಿಗೆ ಎಚ್ಚರಿಕೆ ನೀಡಿದರು. ಸಂಸ್ಥೆಯ ಎಂಟು ಖಾಸಗಿ ಕೀಗಳಲ್ಲಿ ಒಂದರ ಮೌಲ್ಯ ಕೇವಲ 4 ಆಗಿತ್ತು.

ಪ್ರಪಂಚದ ಶೇ. 70ರಷ್ಟು ವೆಬ್ಸೈಟ್‌ ಗಳಿಗೆ ಆಧಾರವಾಗಿರುವ ಉಚಿತ ಪ್ರೋಗ್ರಾಮಿಂಗ್ ಭಾಷೆಯಾದ PHPಯಲ್ಲಿನ ಎರಡು ದೋಷಗಳ ವಿವರಗಳು ಅಕ್ಟೋಬರ್ 20ರಂದು ಬಹಿರಂಗಗೊಂಡವು. ಈ ಲೋಪಗಳನ್ನು ಬಳಸಿಕೊಂಡು ಯಾರು ಬೇಕಾದರೂ ಪಾಸ್‌ ವರ್ಡ್ ಇಲ್ಲದೆಯೇ ವೆಬ್ ಸರ್ವರ್ಗಳನ್ನು ತಮ್ಮ ವಶಕ್ಕೆ ಪಡೆಯಬಹುದಾಗಿತ್ತು.

ಅಲ್ಲದೆ, ಅಕ್ಟೋಬರ್ 29ರಂದು ಹ್ಯಾಕರ್ ಗುಂಪೊಂದು AU Small Finance Bankನ ಗ್ರಾಹಕರ ಮಾಹಿತಿಯನ್ನು ಕದ್ದಿರುವುದಾಗಿ ಪ್ರತಿಪಾದಿಸಿತು.

"ಲೋಪಗಳು ಹಳೆಯವೇ ಆಗಿದ್ದವು. ಆದರೆ, ಅವುಗಳನ್ನು ದುರುಪಯೋಗಪಡಿಸಿಕೊಳ್ಳುತ್ತಿರುವುದನ್ನು ಗುರುತಿಸುವ ವ್ಯವಸ್ಥೆ ಇರಲಿಲ್ಲ" ಎಂದು ಕಂಪ್ಯೂಟರ್ ವ್ಯವಸ್ಥೆಗಳ ಮೇಲೆ ನಿಗಾ ಇಡುವ ಸಾಫ್ಟ್ವೇರ್ ಮಾರಾಟ ಮಾಡುವ ಅಮೆರಿಕ ಮೂಲದ ಡೇಟಾಡಾಗ್ ಕಂಪೆನಿಯ ಭಾರತದ ಪರಿಹಾರ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಅನುರಾಗ್ ಕುಮಾರ್ ಝಾ 'the print'ಗೆ ತಿಳಿಸಿದ್ದಾರೆ. "ನಿಮಗೆ ಮೊದಲ ಎಚ್ಚರಿಕೆ ಯಾವುದೇ ಕಂಪೆನಿ ಅಥವಾ ನಿಯಂತ್ರಕ ಸಂಸ್ಥೆಯಿಂದ ಬಂದರೆ, ನಿಮ್ಮ ಸ್ವಂತ ವ್ಯವಸ್ಥೆಯ ಮೇಲೆಯೇ ನಿಮಗೆ ಸ್ಪಷ್ಟ ನಿಯಂತ್ರಣ ಅಥವಾ ನಿಗಾ ಇಲ್ಲ ಎಂದರ್ಥ" ಎಂದು ಅವರು ಹೇಳಿದ್ದಾರೆ.

►ಹಳೆಯ ಲೋಪಗಳು, ವೇಗದ ಸೈಬರ್ ದಾಳಿಗಳು

ಕಂಪ್ಯೂಟರ್ ಕೋಡ್ ಮತ್ತು ಕಾನ್ಫಿಗರೇಷನ್ ಫೈಲ್‌ ಗಳಲ್ಲಿ ಉಳಿದುಹೋಗಿದ್ದ ಪಾಸ್‌ ವರ್ಡ್ಗಳು, ಬಳಕೆಯಲ್ಲಿಲ್ಲದ ಅಪ್ಲಿಕೇಶನ್ ಇಂಟರ್ಫೇಸ್‌ ಗಳು ಹಾಗೂ ಅಗತ್ಯಕ್ಕಿಂತ ಹೆಚ್ಚಿನ ಪ್ರವೇಶಾವಕಾಶ ಪಡೆದಿದ್ದ ಕ್ಲೌಡ್ ಖಾತೆಗಳ ಮೂಲಕ AI ಏಜೆಂಟ್‌ ಗಳು ಸೈಬರ್ ವ್ಯವಸ್ಥೆಯನ್ನು ಪ್ರವೇಶಿಸಿವೆ ಎಂದು ಸಿಇಆರ್ಟಿ-ಇನ್ ತಿಳಿಸಿದೆ.

ಉಚಿತವಾಗಿ ಲಭ್ಯವಿರುವ AI ಉಪಕರಣಗಳನ್ನು ಬಳಸಿ ಅಪರಾಧಿಗಳು ಭಾರತೀಯ ಸಂಸ್ಥೆಗಳ ಮೇಲೆ ದಾಳಿ ನಡೆಸುತ್ತಿದ್ದಾರೆ. ಸೈಬರ್ ವ್ಯವಸ್ಥೆಯನ್ನು ಭೇದಿಸಿ ಹಾನಿ ಮಾಡುವ ಸಮಯವು ದಿನಗಳಿಂದ ಗಂಟೆಗಳಿಗೆ ಇಳಿದಿದೆ ಎಂದು ರಾಷ್ಟ್ರೀಯ ಸೈಬರ್ ಭದ್ರತಾ ಸಂಸ್ಥೆ ಹೇಳಿದೆ.

ಸರ್ಕಾರಿ ಅಧಿಕಾರಿಗಳು ಈ ಸೂಚನೆಯನ್ನು ಮುನ್ನೆಚ್ಚರಿಕೆ ಎಂದು ಕರೆದಿದ್ದು, ಶೀಘ್ರದಲ್ಲೇ ಬಿಡುಗಡೆಯಾಗಲಿರುವ AI ನಿಯಂತ್ರಣ ಕುರಿತ ಸಮಾಲೋಚನಾ ವರದಿಯಲ್ಲಿ ಸ್ವತಂತ್ರವಾಗಿ ಕಾರ್ಯನಿರ್ವಹಿಸುವ AI ಏಜೆಂಟ್ ಗಳ ಮೇಲೆ ಮಿತಿ ಹೇರುವ ಬಗ್ಗೆ ಪರಿಶೀಲಿಸಬಹುದು ಎಂದು ತಿಳಿಸಿದ್ದಾರೆ.

ಆದರೆ, ಈ ಸೈಬರ್ ಭದ್ರತಾ ಸಮಸ್ಯೆಗಳ ಬಗ್ಗೆ ತಜ್ಞರು ಕಳೆದ ಒಂದು ದಶಕದಿಂದ ಎಚ್ಚರಿಸುತ್ತಲೇ ಇದ್ದಾರೆ.

"AI ಯಾವುದೇ ಹೊಸ ಲೋಪಗಳನ್ನು ಸೃಷ್ಟಿಸಿಲ್ಲ. ಬದಲಿಗೆ, ಹಳೆಯ ಲೋಪಗಳನ್ನು ಅತ್ಯಂತ ವೇಗವಾಗಿ ಮತ್ತು ಅಗ್ಗವಾಗಿ ಹುಡುಕಲು ಸಹಾಯ ಮಾಡುತ್ತಿದೆ" ಎಂದು ಟೆಲಿಕಾಂ ಉಪಕರಣ ತಯಾರಕ ಸಂಸ್ಥೆ ಎಸ್ಟಿಎಲ್ ನ ಐಟಿ ವಿಭಾಗವಾದ ಎಸ್ಟಿಎಲ್ ಡಿಜಿಟಲ್ ನ ಜಾಗತಿಕ ಮುಖ್ಯ ಮಾಹಿತಿ ಅಧಿಕಾರಿ ಚೇತನ್ಕುಮಾರ್ ತ್ರಿವೇದಿ ತಿಳಿಸಿದ್ದಾರೆ.

ಉದ್ಯಮದಲ್ಲಿ ವ್ಯವಸ್ಥೆಗಳನ್ನು ನಿರ್ವಹಿಸುವುದಕ್ಕಿಂತ ವೇಗವಾಗಿ ಅವುಗಳನ್ನು ಅಭಿವೃದ್ಧಿಪಡಿಸುವುದರಿಂದ ಈ ಸೈಬರ್ ಲೋಪಗಳು ಮುಂದುವರಿಯುತ್ತಿವೆ ಎಂದು ಅವರು ಹೇಳಿದರು. "ಯೋಜನೆಯನ್ನು ಬೇಗನೆ ಆರಂಭಿಸುವ ಗಡಿಬಿಡಿಯಲ್ಲಿ ಅತಿಯಾದ ಅನುಮತಿಗಳನ್ನು ನೀಡಲಾಗುತ್ತದೆ. ಆದರೆ, ನಂತರ ಅವುಗಳನ್ನು ಹಿಂಪಡೆಯುವ ಜವಾಬ್ದಾರಿಯನ್ನು ಯಾರೂ ವಹಿಸುವುದಿಲ್ಲ. ಸೋರಿಕೆಯಾದ ಕೀಗಳನ್ನು ಬದಲಾಯಿಸಿದರೂ, ಹಳೆಯ ಕೋಡ್ ಹಿಸ್ಟರಿಯಲ್ಲಿ ಅವು ಹಾಗೆಯೇ ಉಳಿದುಬಿಡುತ್ತವೆ."

ಸೈಬರ್ ಉಸ್ತುವಾರಿ ವ್ಯವಸ್ಥೆಗಳು ಮುಖ್ಯವಾಗಿ ಸಂಶಯಾಸ್ಪದ ವ್ಯಕ್ತಿಗಳನ್ನು ಪತ್ತೆಹಚ್ಚಲು ವಿನ್ಯಾಸಗೊಂಡಿವೆಯೇ ಹೊರತು, ಸರಿಯಾದ ಗುರುತಿನ ಚೀಟಿಯನ್ನು ಬಳಸಿ ಎಪಿಐ (API) ಮೂಲಕ ರಹಸ್ಯವಾಗಿ ಮಾಹಿತಿ ಕದಿಯುವ ಚಟುವಟಿಕೆಗಳನ್ನು ಪತ್ತೆಹಚ್ಚಲು ಅಲ್ಲ ಎಂದು ಅವರು ವಿವರಿಸಿದರು.

ಡೇಟಾಡಾಗ್ ನ 2025ರ ಕ್ಲೌಡ್ ಭದ್ರತಾ ವರದಿಯನ್ನು ಉಲ್ಲೇಖಿಸಿದ ಝಾ, Amazon ಕ್ಲೌಡ್ ಬಳಸುವ ಶೇ. 59ರಷ್ಟು ಬಳಕೆದಾರರು ಒಂದು ವರ್ಷಕ್ಕಿಂತ ಹಳೆಯದಾದ ಆಕ್ಸೆಸ್ ಕೀಗಳನ್ನು ಹೊಂದಿದ್ದಾರೆ ಮತ್ತು ಅವುಗಳಲ್ಲಿ ಅರ್ಧಕ್ಕಿಂತ ಹೆಚ್ಚು ಕೀಗಳನ್ನು ಕಳೆದ 90 ದಿನಗಳಿಂದ ಬಳಸಿರಲಿಲ್ಲ ಎಂದು ತಿಳಿಸಿದರು. "ಹಳೆಯದಾದ ಆಕ್ಸೆಸ್ ಕೀ ಹ್ಯಾಕರ್‌ ಗೆ ಎಷ್ಟು ಸುಲಭವಾಗಿ ಸಿಗುತ್ತದೆಯೋ, AI ಏಜೆಂಟ್ಗೂ ಅಷ್ಟೇ ಸುಲಭವಾಗಿ ಸಿಗುತ್ತದೆ" ಎಂದು ಅವರು ಹೇಳಿದರು.

ಹಲವು ಕಂಪೆನಿಗಳಿಗೆ ತಮ್ಮ ಸೈಬರ್ ವ್ಯವಸ್ಥೆಯಲ್ಲಿ ಎಷ್ಟು AI ಏಜೆಂಟ್‌ ಗಳು ಕಾರ್ಯನಿರ್ವಹಿಸುತ್ತಿವೆ ಎಂಬುದೇ ತಿಳಿದಿಲ್ಲ. ನೌಕರರ ಲಾಗಿನ್ ಬಳಸಿ AI ಏಜೆಂಟ್ ಕೆಲಸ ಮಾಡಿದಾಗ, ಅದನ್ನು ಮನುಷ್ಯ ಮಾಡಿದ್ದೋ ಅಥವಾ AI ಮಾಡಿದ್ದೋ ಎಂದು ಸಿಸ್ಟಮ್ ದಾಖಲೆಗಳಲ್ಲಿ ಗುರುತಿಸಲು ಸಾಧ್ಯವಾಗುವುದಿಲ್ಲ.

"ತಪ್ಪಾಗಿ ಕಾರ್ಯನಿರ್ವಹಿಸುವ AI ಏಜೆಂಟ್‌ ಗಳು ತಕ್ಷಣವೇ ನಿಲ್ಲುವುದಿಲ್ಲ. ಡ್ಯಾಶ್ಬೋರ್ಡ್ಗಳಲ್ಲಿ ಎಲ್ಲವೂ ಸರಿಯಾಗಿದೆ ಎಂದು ತೋರಿಸುತ್ತಿದ್ದರೂ, ಅವು ರಹಸ್ಯವಾಗಿ ತಮ್ಮ ಕೆಲಸವನ್ನು ಮುಂದುವರಿಸುತ್ತವೆ" ಎಂದು ಅವರು ಹೇಳಿದ್ದಾರೆ.

►ವಿಶ್ರಾಂತಿಗೆ ಅವಕಾಶವೇ ಇಲ್ಲ

'ಪಿಎಚ್ಪಿ2ಶೆಲ್' (PHP2Shell) ಎಂದು ಕರೆಯಲ್ಪಡುವ ಪಿಎಚ್ಪಿಯ ಈ ಜೋಡಿ ಸೈಬರ್ ಲೋಪಗಳು, ರಕ್ಷಣಾ ವ್ಯವಸ್ಥೆಗೆ ಎಷ್ಟು ಕಡಿಮೆ ಸಮಯ ಲಭ್ಯವಿರುತ್ತದೆ ಎಂಬುದನ್ನು ತೋರಿಸಿಕೊಟ್ಟವು. ಓಪನ್AI ಬೆಂಬಲಿತ ಭದ್ರತಾ ಸಂಸ್ಥೆಯಾದ ಕಲಿಫ್ ಮತ್ತು ಗೂಗಲ್ ಒಡೆತನದ ವಿಝ್ ಸಂಸ್ಥೆಯ ಸಂಶೋಧಕರು, AI ಮಾದರಿಗಳನ್ನು ಬಳಸಿ ಆಗಸ್ಟ್ನಲ್ಲೇ ಈ ಲೋಪಗಳನ್ನು ಪತ್ತೆಹಚ್ಚಿ, ಹೆಚ್ಚಾಗಿ ಸ್ವಯಂಸೇವಕರನ್ನೇ ಹೊಂದಿರುವ ಪಿಎಚ್ಪಿ ಡೆವಲಪರ್ಗಳಿಗೆ ವರದಿ ಮಾಡಿದ್ದರು.

ಈ ಸೈಬರ್ ಲೋಪಗಳಿಗೆ ಪರಿಹಾರ (Patch) ಸಿದ್ಧವಾದ ನಂತರ, ಅಕ್ಟೋಬರ್ 22ರಂದು ಈ ಬಗ್ಗೆ ಅಧಿಕೃತವಾಗಿ ಘೋಷಿಸಲು ಯೋಜಿಸಲಾಗಿತ್ತು.

ಆದರೆ, ಯಾರೋ ಈಗಾಗಲೇ ಈ ಪಿಎಚ್ಪಿ ಲೋಪಗಳನ್ನು ದುರುಪಯೋಗಪಡಿಸಿಕೊಳ್ಳುತ್ತಿರುವುದು ಬಯಲಾಯಿತು. ಪರಿಹಾರ ಬಿಡುಗಡೆಯಾಗುವ ನಾಲ್ಕು ದಿನಗಳ ಮುಂಚೆಯೇ, ಅಂದರೆ ಅಕ್ಟೋಬರ್ 17ರಂದು, ಈ ಲೋಪಗಳನ್ನು ಬಳಸಿಕೊಂಡು ಸೈಬರ್ ದಾಳಿ ನಡೆಸುವ ಯತ್ನವನ್ನು ತಮ್ಮ ವ್ಯವಸ್ಥೆ ದಾಖಲಿಸಿದೆ ಎಂದು ಅಮೆಜಾನ್ ಹೇಳಿದೆ. ಈ ದಾಳಿಯ ಹಿಂದೆ ಯಾರಿದ್ದರು ಅಥವಾ ಅವರಿಗೆ ಈ ವಿಷಯ ಹೇಗೆ ತಿಳಿಯಿತು ಎಂಬುದನ್ನು ಕಂಪೆನಿ ಬಹಿರಂಗಪಡಿಸಿಲ್ಲ. ಇನ್ನೊಬ್ಬರು ಅದೇ ದೋಷವನ್ನು ಪತ್ತೆಹಚ್ಚುವವರೆಗೆ ಮಾತ್ರ ತಾತ್ಕಾಲಿಕ ತಡೆ ರಕ್ಷಣೆ ನೀಡಲು ಸಾಧ್ಯ ಎಂದು ಕಂಪೆನಿ ಹೇಳಿದೆ.

ಪಿಎಚ್ಪಿ ಫೌಂಡೇಶನ್ ವಿವರಗಳನ್ನು ಬಿಡುಗಡೆ ಮಾಡುವ ಒಂದು ದಿನ ಮುಂಚಿತವಾಗಿಯೇ, ಅಂದರೆ ಅಕ್ಟೋಬರ್ 20ರಂದು, ಪಿಎಚ್ಪಿ ಲೋಪಗಳ ವಿವರಗಳು ಸ್ವಲ್ಪಮಟ್ಟಿಗೆ ಸೋರಿಕೆಯಾದವು.

ವೆಬ್ ಮೂಲಸೌಕರ್ಯ ಮತ್ತು ಭದ್ರತಾ ಸಂಸ್ಥೆಯಾದ ಕ್ಲೌಡ್ಫ್ಲೇರ್, ಭದ್ರತಾ ಪರಿಹಾರ ಬಿಡುಗಡೆಯಾಗುವ ಮುನ್ನವೇ ಸೈಬರ್ ದಾಳಿಯ ಸಂಚಾರವನ್ನು ಗಮನಿಸಿತು. ಒಂದೇ ದಿನದಲ್ಲಿ ಇಂತಹ ಯತ್ನಗಳ ಸಂಖ್ಯೆ ಲಕ್ಷ ತಲುಪಿದೆ ಎಂದು ಅದರ ಮುಖ್ಯ ಕಾರ್ಯನಿರ್ವಾಹಕ ಮ್ಯಾಥ್ಯೂ ಪ್ರಿನ್ಸ್ ತಿಳಿಸಿದ್ದಾರೆ.

ಮುನ್ನೆಚ್ಚರಿಕಾ ಕ್ರಮವಾಗಿ ನೆದರ್ಲ್ಯಾಂಡ್ಸ್, ಫ್ರಾನ್ಸ್, ಫಿನ್ಲ್ಯಾಂಡ್ ಮತ್ತು ಡೆನ್ಮಾರ್ಕ್ ಸರ್ಕಾರಗಳು ಅಕ್ಟೋಬರ್ 21ರಂದು ತಮ್ಮ ವೆಬ್ಸೈಟ್‌ ಗಳನ್ನು ಸ್ಥಗಿತಗೊಳಿಸಿದವು. ಅದೇ ದಿನ ಸಿಇಆರ್ಟಿ-ಇನ್ ಕೂಡ ಗಂಭೀರ ಸ್ವರೂಪದ ಎಚ್ಚರಿಕೆಯನ್ನು ನೀಡಿತು. ಭಾರತದ ಯಾವುದೇ ಸಂಸ್ಥೆಯೂ ಇದುವರೆಗೆ ಈ ದಾಳಿಗೆ ತುತ್ತಾಗಿರುವುದಾಗಿ ವರದಿ ಮಾಡಿಲ್ಲ. ಅಲ್ಲದೆ, ಭಾರತದ ಎಷ್ಟು ವೆಬ್ಸೈಟ್‌ ಗಳು ಇಂದಿಗೂ ಅಪಾಯದಲ್ಲಿವೆ ಎಂಬುದಕ್ಕೆ ಯಾವುದೇ ಅಧಿಕೃತ ಅಂದಾಜಿಲ್ಲ.

ಈ ನಡುವೆ, ಅಮೆರಿಕದ ಸೈಬರ್ ಸೆಕ್ಯುರಿಟಿ ಮತ್ತು ಇನ್ ಫ್ರಾಸ್ಟ್ರಕ್ಚರ್ ಸೆಕ್ಯುರಿಟಿ ಏಜೆನ್ಸಿ ಅಕ್ಟೋಬರ್ 26ರಂದು ಸೈಬರ್ ದಾಳಿಗಳನ್ನು ದೃಢಪಡಿಸಿದೆ. ಭದ್ರತಾ ಪರಿಹಾರ ಪಡೆಯದ ಆವೃತ್ತಿಗಳಲ್ಲಿ ಇಂದಿಗೂ 3.2 ಕೋಟಿಗೂ ಹೆಚ್ಚು ಪಿಎಚ್ಪಿ ಸೇವೆಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ಇಂಟರ್ನೆಟ್ ಸಮೀಕ್ಷಾ ಸಂಸ್ಥೆ ಸೆನ್ಸಿಸ್ ಅಂದಾಜಿಸಿದೆ.

ಸೈಬರ್ ಬೆದರಿಕೆ ಅಧ್ಯಯನ ಸಂಸ್ಥೆಯಾದ ಸಿಫಿರ್ಮಾ (CYFIRMA), ಭಾರತ ಸೇರಿದಂತೆ ಹಲವು ದೇಶಗಳಲ್ಲಿ ಭದ್ರತಾ ಪರಿಹಾರ ಪಡೆಯದ ವ್ಯವಸ್ಥೆಗಳನ್ನು ಪರಿಶೀಲಿಸಲಾಗುತ್ತಿದ್ದು, ಇದರ ಹಿಂದೆ ಉತ್ತರ ಕೊರಿಯಾದ ಕೈವಾಡವಿರುವ ಸಾಧ್ಯತೆಯಿದೆ ಎಂದು ವರದಿ ಮಾಡಿದೆ.

ಇಂಟರ್ನೆಟ್ ಸಂಪರ್ಕ ಹೊಂದಿರುವ ಯಾವುದೇ ವ್ಯವಸ್ಥೆಗೆ ಮಾಸಿಕವಾಗಿ ಭದ್ರತಾ ನವೀಕರಣ ಮಾಡುವ ಹಳೆಯ ಶೈಲಿಯ ಕ್ರಮ ಇನ್ನು ಮುಂದೆ ಕೆಲಸ ಮಾಡುವುದಿಲ್ಲ ಎಂದು ತ್ರಿವೇದಿ ತಿಳಿಸಿದ್ದಾರೆ.

ಈ ಲೋಪ ಬಹಿರಂಗಗೊಳ್ಳುವ ಮುನ್ನವೇ ನಡೆದ ಸೈಬರ್ ದಾಳಿಯ ಕುರುಹುಗಳಿಗಾಗಿ ಕಂಪೆನಿಗಳು ತಮ್ಮ ಹಳೆಯ ದಾಖಲೆಗಳನ್ನು ಪರಿಶೀಲಿಸಬೇಕು ಎಂದು ಅವರು ಸಲಹೆ ನೀಡಿದರು.

ಇದಕ್ಕೆ ಝಾ ಕೂಡ ಸಹಮತ ವ್ಯಕ್ತಪಡಿಸಿದ್ದು, "ಘಟನೆ ನಡೆದ ನಂತರ ಸ್ಪಂದಿಸಲು ಸಿಗುವ ಕಾಲಾವಕಾಶ ಈಗ ಸಂಪೂರ್ಣವಾಗಿ ಇಲ್ಲದಂತಾಗಿದೆ" ಎಂದು ಹೇಳಿದ್ದಾರೆ.

►ದೊಡ್ಡ ಮಟ್ಟದ ಹಿನ್ನಡೆ

ಇಮುದ್ರಾ (eMudhra) ಸಂಸ್ಥೆಯ ಎಂಟು ಡಿಜಿಟಲ್ ಭದ್ರತಾ ಪ್ರಮಾಣಪತ್ರಗಳಲ್ಲಿ ದುರ್ಬಲವಾದ ಎನ್ಕ್ರಿಪ್ಶನ್ ಕೀಗಳು ಪತ್ತೆಯಾಗಿದ್ದು, ತೀವ್ರ ಕಳವಳಕ್ಕೆ ಕಾರಣವಾಗಿದೆ. ಈ ಕೀಗಳನ್ನು 2025ರ ಏಪ್ರಿಲ್ ನಲ್ಲಿ ರಚಿಸಲಾಗಿತ್ತು. ಕಂಪೆನಿಯೇ ಹೇಳಿಕೊಂಡಿರುವಂತೆ, "ಎರಡು ಸ್ವತಂತ್ರ ಲೆಕ್ಕಪರಿಶೋಧನೆಗಳು ನಡೆದಿದ್ದರೂ ಸುಮಾರು 18 ತಿಂಗಳುಗಳ ಕಾಲ ಈ ದೋಷ ಪತ್ತೆಯಾಗದೇ ಉಳಿದಿತ್ತು."

ಇದರ ಪರಿಣಾಮಗಳು ಶೀಘ್ರದಲ್ಲೇ ಕಂಡುಬಂದವು. ಮೈಕ್ರೋಸಾಫ್ಟ್ ಕಂಪೆನಿಯು ಅಕ್ಟೋಬರ್ 26 ಮತ್ತು 27ರಂದು ವಿಂಡೋಸ್ ಮತ್ತು ತನ್ನ ಎಡ್ಜ್ ಬ್ರೌಸರ್ನಿಂದ ಇಮುದ್ರಾ ಲಿಂಕ್ ಹೊಂದಿದ್ದ ಏಳು ಪ್ರಮಾಣಪತ್ರಗಳನ್ನು ತೆಗೆದುಹಾಕಿತು. ಜಾಗತಿಕ ವೆಬ್ಸೈಟ್ ಪ್ರಮಾಣಪತ್ರ ನೀಡುವ ವ್ಯವಹಾರದಿಂದ ಹೊರಬರುವುದಾಗಿ ಇಮುದ್ರಾ ಪ್ರಕಟಿಸಿತು. ಅಲ್ಲದೆ, ಎಲ್ಲಿ ಲೋಪವಾಗಿದೆ ಎಂಬುದನ್ನು ಪರಿಶೀಲಿಸಲು ಕೆಪಿಇಂಜಿ (KPMG) ಲೆಕ್ಕಪರಿಶೋಧನಾ ಸಂಸ್ಥೆಯನ್ನು ನೇಮಿಸಿರುವುದಾಗಿ ಷೇರು ಮಾರುಕಟ್ಟೆಗೆ ತಿಳಿಸಿತು.

ಇಷ್ಟೇ ಅಲ್ಲದೆ, ಸೋರಿಕೆಯಾದ ಎಂಟು ಕೀಗಳ ಪ್ರಮಾಣಪತ್ರಗಳ ಪಟ್ಟಿಯನ್ನು ಸಾಮಾನ್ಯ ಸಾಫ್ಟ್ವೇರ್ಗಳು ಡೌನ್ಲೋಡ್ ಮಾಡಿಕೊಳ್ಳದಂತೆ ಇಮುದ್ರಾ ಸರ್ವರ್ಗಳು ತಡೆಯುತ್ತಿವೆ ಎಂದು ಹೊರಗಿನ ಸಂಶೋಧಕರು ಮೊಝಿಲ್ಲಾದ ಸಾರ್ವಜನಿಕ ಟ್ರ್ಯಾಕರ್ನಲ್ಲಿ ಮತ್ತೊಂದು ಘಟನೆಯನ್ನು ದಾಖಲಿಸಿದ್ದಾರೆ.

ಡಿಜಿಟಲ್ ಪಾವತಿ ವೇದಿಕೆ ಕ್ಯಾಶ್ಲೆಸ್ ಕನ್ಸ್ಯೂಮರ್ ನಡೆಸಿದ ಪರಿಶೀಲನೆಯ ಪ್ರಕಾರ, ಗೂಗಲ್ ಮತ್ತು ಮೈಕ್ರೋಸಾಫ್ಟ್ ಸಂಸ್ಥೆಗಳು ಮರುಪರಿಶೀಲಿಸುತ್ತಿರುವ ಇಮುದ್ರಾ ಪ್ರಮಾಣಪತ್ರಗಳನ್ನು ಭಾರತದ ಕನಿಷ್ಠ ಏಳು ಬ್ಯಾಂಕ್ಗಳು ಬಳಸುತ್ತಿವೆ.

ಈ ಬಗ್ಗೆ ತನಿಖೆ ನಡೆಸಲು ತಂಡವನ್ನು ರಚಿಸಿರುವ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY), ಇಮುದ್ರಾದ ದೇಶೀಯ ಡಿಜಿಟಲ್ ಸಹಿ ಸೇವೆಗಳಿಗೆ ಯಾವುದೇ ತೊಂದರೆಯಾಗಿಲ್ಲ ಎಂದು ತಿಳಿಸಿದೆ. ಆದರೆ, ಲಾಭರಹಿತ ಡಿಜಿಟಲ್ ಹಕ್ಕುಗಳ ಸಂಸ್ಥೆಯಾದ ಇಂಟರ್ನೆಟ್ ಫ್ರೀಡಂ ಫೌಂಡೇಶನ್ (IFF), ಸರ್ಕಾರದ ಈ ಹೇಳಿಕೆಯನ್ನು ಸ್ವತಂತ್ರವಾಗಿ ಪರಿಶೀಲಿಸುವಂತೆ ಒತ್ತಾಯಿಸಿದೆ.

ಹೆಚ್ಚಿನ ಸಂಸ್ಥೆಗಳು ವೆಬ್ಸೈಟ್ ಭದ್ರತಾ ಪ್ರಮಾಣಪತ್ರವನ್ನು ನವೀಕರಿಸಬಲ್ಲವು. ಆದರೆ, ಪ್ರತಿ ಪ್ರಮಾಣಪತ್ರವನ್ನು ಎಲ್ಲೆಲ್ಲಿ ಬಳಸಲಾಗುತ್ತಿದೆ ಮತ್ತು ಯಾವ ವ್ಯವಸ್ಥೆಗಳು ಯಾವ ಪ್ರಮಾಣಪತ್ರ ಸಂಸ್ಥೆಯನ್ನು ನಂಬುತ್ತವೆ ಎಂಬುದನ್ನು ತಕ್ಷಣವೇ ಹೇಳಲು ಕೆಲವೇ ಸಂಸ್ಥೆಗಳಿಗೆ ಸಾಧ್ಯ ಎಂದು ತ್ರಿವೇದಿ ತಿಳಿಸಿದ್ದಾರೆ. ಬ್ರೌಸರ್ಗಳು ಕೆಲವೇ ಗಂಟೆಗಳಲ್ಲಿ ಭದ್ರತಾ ಪರಿಹಾರವನ್ನು ಪಡೆದರೆ, ಸರ್ವರ್ಗಳು ಮತ್ತು ಇತರ ಉಪಕರಣಗಳಿಗೆ ಅದು ತಕ್ಷಣವೇ ಸಿಗಲಿಲ್ಲ ಎಂದು ಅವರು ಹೇಳಿದರು.

ಯುಪಿಐ, ಭಾರತ್ ಬಿಲ್ ಪೇ, ಫಾಸ್ಟ್ಟ್ಯಾಗ್ನಂತಹ ಸೇವೆಗಳನ್ನು ನಿರ್ವಹಿಸುವ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI), ಒಂದೇ ಪ್ರಮಾಣಪತ್ರ ಸಂಸ್ಥೆಯ ಮೇಲೆ ಅವಲಂಬಿತವಾಗುವುದರಿಂದ ಉಂಟಾಗುವ ಅಪಾಯದ ಬಗ್ಗೆ ಪರಿಶೀಲಿಸುವಂತೆ ತನ್ನ ಸದಸ್ಯ ಸಂಸ್ಥೆಗಳಿಗೆ ಸೂಚಿಸಿದೆ ಎಂದು ತ್ರಿವೇದಿ ತಿಳಿಸಿದರು.

"ನೀವು ಸೇವೆಯನ್ನು ಹೊರಗಿನ ಸಂಸ್ಥೆಗೆ ವಹಿಸಿಕೊಡಬಹುದು. ಆದರೆ, ಅದರಿಂದಾಗುವ ಅಪಾಯದ ಹೊಣೆಗಾರಿಕೆಯನ್ನು ಹೊರಗಿನವರಿಗೆ ವಹಿಸಲು ಸಾಧ್ಯವಿಲ್ಲ" ಎಂದು ತ್ರಿವೇದಿ ಹೇಳಿದ್ದಾರೆ.

►ಯಾರಿಗೆ ಮೊದಲು ಮಾಹಿತಿ ನೀಡಲಾಗುತ್ತದೆ?

SBI ಮತ್ತು ಎಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಘಟನೆಗಳು ಮತ್ತೊಂದು ಮುಖ್ಯ ಪ್ರಶ್ನೆಯನ್ನು ಮುನ್ನೆಲೆಗೆ ತಂದಿವೆ. ಅದೇನೆಂದರೆ, ಇಂತಹ ಸೈಬರ್ ಭದ್ರತಾ ಲೋಪಗಳ ಕುರಿತು ಯಾರಿಗೆ ಮೊದಲು ಮಾಹಿತಿ ನೀಡಲಾಗುತ್ತದೆ ಎಂಬುದು.

ತಮಗೆ ಎಚ್ಚರಿಕೆ ಸಿಕ್ಕ ಐದು ದಿನಗಳ ನಂತರ, ಅಂದರೆ ಅಕ್ಟೋಬರ್ 21ರಂದು, SBI ಗ್ರಾಹಕರ ಡೇಟಾ ಸೋರಿಕೆಯಾಗಿರುವ ಕುರಿತು ಷೇರು ವಿನಿಮಯ ಕೇಂದ್ರಗಳಿಗೆ ಮಾಹಿತಿ ನೀಡಿತು. 'ಸಿರಿಯಸ್ಇಮ್' (Siriusim) ಎಂಬ ಹೆಸರಿನ ಮಾರಾಟಗಾರ ಈ ಮಾಹಿತಿಯೊಂದಿಗೆ ಬ್ಯಾಂಕ್ ಇನ್ನೂ ದೃಢಪಡಿಸದ 2,722 ದಾಖಲೆಗಳನ್ನು ಪೋಸ್ಟ್ ಮಾಡಿದ್ದ.

ಡಾರ್ಕ್ ವೆಬ್‌ ನಲ್ಲಿ ಪತ್ತೆಯಾದ ಸುಮಾರು 3.75 ಲಕ್ಷ ದಾಖಲೆಗಳಲ್ಲಿ 3,897 ದಾಖಲೆಗಳು ಗ್ರಾಹಕರ ಹೆಸರು, ಮೊಬೈಲ್ ಸಂಖ್ಯೆ, ಜನ್ಮ ದಿನಾಂಕ ಮತ್ತು ವಿಳಾಸದಂತಹ ವೈಯಕ್ತಿಕ ವಿವರಗಳನ್ನು ಹೊಂದಿದ್ದವು ಎಂದು ಬ್ಯಾಂಕ್ ಪ್ರಕಟಣೆಯಲ್ಲಿ ತಿಳಿಸಿತ್ತು.

ಗ್ರಾಹಕರಿಗೆ ತಿಳಿಸುವ ಮುನ್ನ ಹೂಡಿಕೆದಾರರಿಗೆ ಮಾಹಿತಿ ನೀಡಿದ್ದಕ್ಕಾಗಿ ಇಂಟರ್ನೆಟ್ ಫ್ರೀಡಂ ಫೌಂಡೇಶನ್ (IFF) ಟೀಕಿಸಿದ ನಂತರ, ಸಂತ್ರಸ್ತ ಗ್ರಾಹಕರಿಗೆ ಇಮೇಲ್ ಮತ್ತು ವಾಟ್ಸಾಪ್ ಮೂಲಕ ಮಾಹಿತಿ ನೀಡಲಾಗಿದೆ ಎಂದು ಅಕ್ಟೋಬರ್ 23ರಂದು SBI ಹೇಳಿದೆ. ಆದರೆ, ಈ ಡೇಟಾ ಹೇಗೆ ಸೋರಿಕೆಯಾಯಿತು ಎಂಬುದನ್ನು ಬ್ಯಾಂಕ್ ಇನ್ನೂ ಬಹಿರಂಗಪಡಿಸಿಲ್ಲ.

ಸೈಬರ್ ಬೆದರಿಕೆಗಳ ಮೇಲ್ವಿಚಾರಣಾ ವೇದಿಕೆಯಾದ 'ಹ್ಯಾಕ್ಮನಾಕ್' ಪ್ರಕಾರ, ಅಕ್ಟೋಬರ್ 29ರಂದು 'ಸ್ಕಾರ್ಲೆಟ್ ಗ್ರೂಪ್' ಎಂಬ ಹ್ಯಾಕರ್ ಪಡೆ ಎಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್ನಿಂದ ಗುರುತಿನ ಚೀಟಿಗಳು, ಪಾನ್ (PAN) ಮತ್ತು ಆಧಾರ್ ವಿವರಗಳು, ಕ್ರೆಡಿಟ್ ವರದಿಗಳು ಹಾಗೂ ಸಾಲದ ಒಪ್ಪಂದಗಳನ್ನು ಕದ್ದಿರುವುದಾಗಿ ಪ್ರತಿಪಾದಿಸಿದೆ.

ತಮ್ಮ ವಾಹನ ಸಾಲದ ಗ್ರಾಹಕರಿಗೆ ಸಂಬಂಧಿಸಿದ ನಿಯಮಿತ ಮಾಹಿತಿಯನ್ನು ಹೊಂದಿದ್ದ 'ಸೇಲ್ಸ್ಫೋರ್ಸ್' ಆಧಾರಿತ ವ್ಯವಸ್ಥೆಯಲ್ಲಿ ಡೇಟಾ ಸೋರಿಕೆಯಾಗಿರುವ ಸಾಧ್ಯತೆಯ ಬಗ್ಗೆ ತನಿಖೆ ನಡೆಸುತ್ತಿರುವುದಾಗಿ ಬ್ಯಾಂಕ್ ತಿಳಿಸಿದೆ. ತನ್ನ ಸ್ವಂತ ವ್ಯವಸ್ಥೆಗೆ ಯಾವುದೇ ತೊಂದರೆಯಾಗಿಲ್ಲ ಎಂದೂ ಅದು ಸ್ಪಷ್ಟಪಡಿಸಿದೆ.

ಭಾರತೀಯ ನಿಯಮಗಳ ಪ್ರಕಾರ, ಸಂಸ್ಥೆಗಳು ಯಾವುದೇ ಸೈಬರ್ ಘಟನೆ ನಡೆದ ಆರು ಗಂಟೆಗಳ ಒಳಗೆ 'ಸಿಇಆರ್ಟಿ-ಇನ್' ಸಂಸ್ಥೆಗೆ ವರದಿ ಮಾಡಬೇಕಾಗುತ್ತದೆ. ಡಿಜಿಟಲ್ ವೈಯಕ್ತಿಕ ಡೇಟಾ ಸಂರಕ್ಷಣಾ ಕಾಯ್ದೆಯು ಸಂತ್ರಸ್ತ ನಾಗರಿಕರಿಗೆ ಮಾಹಿತಿ ನೀಡುವುದನ್ನು ಕಡ್ಡಾಯಗೊಳಿಸುತ್ತದೆ. ಆದರೆ, ಈ ಯಾವುದೇ ಘಟನೆಗಳ ಬಗ್ಗೆ ತಮಗೆ ಯಾವಾಗ ಮಾಹಿತಿ ಸಿಕ್ಕಿತು ಎಂಬುದನ್ನು ಸಿಇಆರ್ಟಿ-ಇನ್ ಬಹಿರಂಗಪಡಿಸಿಲ್ಲ.

ಇದೀಗ ಸರ್ಕಾರದ ಮಟ್ಟದಲ್ಲೂ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿವೆ. ಅಕ್ಟೋಬರ್ 23ರಂದು ಮಾತನಾಡಿದ್ದ ರಿಸರ್ವ್ ಬ್ಯಾಂಕ್ ಗವರ್ನರ್ ಸಂಜಯ್ ಮಲ್ಹೋತ್ರಾ, AI ಏಜೆಂಟ್‌ ಗಳಿಂದ ಎದುರಾಗುವ ಅಪಾಯಗಳ ಬಗ್ಗೆ ಬ್ಯಾಂಕ್ಗಳಿಗೆ ಮುನ್ನೆಚ್ಚರಿಕೆ ನೀಡಲಾಗಿದೆ ಎಂದು ತಿಳಿಸಿದರು. "ನಾವು ಬ್ಯಾಂಕ್ಗಳನ್ನು ಎಚ್ಚರಿಸಿದ್ದೇವೆ ಮತ್ತು ಅವು ಈ ಬಗ್ಗೆ ಜಾಗರೂಕವಾಗಿವೆ" ಎಂದು ಅವರು ಹೇಳಿದರು.

ಎರಡು ದಿನಗಳ ನಂತರ, ಭುವನೇಶ್ವರದಲ್ಲಿ RBIನ ಡೇಟಾ ಸೆಂಟರ್ ಮತ್ತು ಸೈಬರ್ ಭದ್ರತಾ ತರಬೇತಿ ಸಂಸ್ಥೆಯನ್ನು ಉದ್ಘಾಟಿಸಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, "ಸೈಬರ್ ಅಪರಾಧಿಗಳು ಮತ್ತು ಸೈಬರ್ ಭಯೋತ್ಪಾದಕರಿಂದ ನಮ್ಮ ಬ್ಯಾಂಕಿಂಗ್ ವ್ಯವಸ್ಥೆಯನ್ನು ರಕ್ಷಿಸುವುದು ಅತ್ಯಂತ ಮುಖ್ಯವಾಗಿದೆ" ಎಂದು ಹೇಳಿದರು.

ಇದರ ಬೆನ್ನಲ್ಲೇ, 55ಕ್ಕೂ ಹೆಚ್ಚು ಹಣಕಾಸು ಸಂಸ್ಥೆಗಳ (ಹೆಚ್ಚಾಗಿ ಪ್ರಾದೇಶಿಕ ಗ್ರಾಮೀಣ ಬ್ಯಾಂಕ್ಗಳು ಮತ್ತು ಸಹಕಾರಿ ಬ್ಯಾಂಕ್ಗಳು) 300ಕ್ಕೂ ಹೆಚ್ಚು ಅಧಿಕಾರಿಗಳಿಗೆ ಸಿಇಆರ್ಟಿ-ಇನ್ ಸಂಸ್ಥೆಯು AI ಆಧಾರಿತ ಸೈಬರ್ ದಾಳಿಗಳನ್ನು ಎದುರಿಸುವ ಕುರಿತು ತರಬೇತಿ ನೀಡಿತು. ಈ ಬ್ಯಾಂಕ್ಗಳಲ್ಲಿ ಭದ್ರತಾ ಸಿಬ್ಬಂದಿಯ ಕೊರತೆ ಮತ್ತು ಹಳೆಯ ತಂತ್ರಜ್ಞಾನ ವ್ಯವಸ್ಥೆಗಳಿವೆ.

AI ಮಾದರಿಗಳನ್ನು ನಿಯಂತ್ರಿಸುವ ಬದಲು, AI ಏಜೆಂಟ್‌ ಗಳು ಏನನ್ನು ಪ್ರವೇಶಿಸಬಹುದು ಮತ್ತು ಏನು ಮಾಡಬಹುದು ಎಂಬುದರ ಮೇಲೆ ನಿಯಮಗಳು ಗಮನಹರಿಸಬೇಕು ಎಂದು ತಜ್ಞರಾದ ಝಾ ಮತ್ತು ತ್ರಿವೇದಿ ಹೇಳಿದ್ದಾರೆ.

"ಪ್ರತಿಯೊಂದು AI ಏಜೆಂಟ್ ಅನ್ನು ಯಂತ್ರದ ವೇಗದಲ್ಲಿ ನಿರಂತರವಾಗಿ ಕೆಲಸ ಮಾಡುವ ಉನ್ನತ ಅಧಿಕಾರ ಹೊಂದಿದ ಉದ್ಯೋಗಿಯಂತೆ ನೋಡಬೇಕು" ಎಂದು ತ್ರಿವೇದಿ ತಿಳಿಸಿದರು. ಪ್ರತಿಯೊಂದು AI ಏಜೆಂಟ್ಗೆ ಪ್ರತ್ಯೇಕ ಲಾಗಿನ್, ಒಬ್ಬ ಉಸ್ತುವಾರಿ ಅಧಿಕಾರಿ ಮತ್ತು ಅದನ್ನು ತಕ್ಷಣ ನಿಲ್ಲಿಸುವ ವ್ಯವಸ್ಥೆ ಇರಬೇಕು. ಅಲ್ಲದೆ, ಹಣದ ಪಾವತಿ, ಡೇಟಾ ಅಳಿಸುವಿಕೆ ಮತ್ತು ಡೇಟಾ ರಫ್ತು ಮಾಡುವ ಪ್ರಕ್ರಿಯೆಗಳಿಗೆ ಮನುಷ್ಯರ ಅನುಮೋದನೆ ಕಡ್ಡಾಯವಾಗಿರಬೇಕು ಎಂದು ಅವರು ಅಭಿಪ್ರಾಯಪಟ್ಟರು.

ಮಾಹಿತಿ ಬಹಿರಂಗಪಡಿಸುವುದನ್ನು ಕಡ್ಡಾಯಗೊಳಿಸಬೇಕು ಎಂದ ತ್ರಿವೇದಿ, "ಇತ್ತೀಚಿನ ಘಟನೆಗಳು ಬೆಳಕಿಗೆ ಬಂದದ್ದು AI ಮಾದರಿ ಪೂರೈಕೆದಾರರು ಸ್ವಯಂಪ್ರೇರಿತವಾಗಿ ಮಾಹಿತಿ ನೀಡಿದ್ದರಿಂದ ಮಾತ್ರ. ಇದು ದೀರ್ಘಕಾಲದ ಮಾದರಿಯಾಗಲು ಸಾಧ್ಯವಿಲ್ಲ. ಸಣ್ಣ ಸಂಸ್ಥೆಗಳು ಪಾಲಿಸಲು ಸಾಧ್ಯವಾಗದ ಕಠಿಣ ನಿಯಮಗಳನ್ನು ಜಾರಿಗೆ ತಂದರೆ ಯಾರಿಗೂ ಭದ್ರತೆ ಸಿಗುವುದಿಲ್ಲ" ಎಂದು ಹೇಳಿದರು.

ಅದೇ ರೀತಿ, ಪ್ರಸ್ತುತ ಇರುವ ಆರು ಗಂಟೆಗಳ ವರದಿ ನಿಯಮ, ಡೇಟಾ ಸಂರಕ್ಷಣಾ ಕಾಯ್ದೆ ಮತ್ತು RBI ನಿಯಮಗಳಿಗೆ ಪೂರಕವಾಗಿ ಹೊಸ ನಿಯಮಗಳನ್ನು ತರಬೇಕೇ ಹೊರತು, ಮತ್ತೊಂದು ಹೆಚ್ಚುವರಿ ನಿಯಮಾವಳಿಯನ್ನು ಹೇರಬಾರದು ಎಂದು ಝಾ ಹೇಳಿದರು. ಸಂಸ್ಥೆಯ AI ಏಜೆಂಟ್ ತನ್ನ ಮಿತಿಮೀರಿ ಕೆಲಸ ಮಾಡುತ್ತಿದ್ದರೆ ಅದನ್ನು ಸ್ವತಃ ಪತ್ತೆಹಚ್ಚುವ ಸಾಮರ್ಥ್ಯ ಇದೆಯೇ ಅಥವಾ ಹೊರಗಿನವರಿಂದ ತಿಳಿದುಕೊಳ್ಳುವ ಪರಿಸ್ಥಿತಿ ಇದೆಯೇ ಎಂಬುದನ್ನು ಕಂಪೆನಿಗಳ ಆಡಳಿತ ಮಂಡಳಿಗಳು ಪರಿಶೀಲಿಸಿಕೊಳ್ಳಬೇಕು ಎಂದು ಅವರು ಸಲಹೆ ನೀಡಿದರು.

ಸೌಜನ್ಯ: theprint.in