'ಆಕ್ಷೇಪಾರ್ಹ' ಪೋಸ್ಟ್‌ ಗಳನ್ನು ಗುರಿಯಾಗಿಸಿಕೊಂಡ ಪೊಲೀಸರು: ಸಾಮಾಜಿಕ ಮಾಧ್ಯಮಗಳಿಂದ ಮಾಯವಾಗುತ್ತಿವೆ ಜಂತರ್ ಮಂತರ್‌ ನಲ್ಲಿ ನಡೆದ ವಿದ್ಯಾರ್ಥಿಗಳ ಪ್ರತಿಭಟನೆಯ ವರದಿ ಹಾಗೂ ರೀಲ್ಸ್‌ ಗಳು

2026 ಜುಲೈ 26 ರಂದು, ಕಾಕ್ರೋಚ್ ಜನತಾ ಪಾರ್ಟಿ ತನ್ನ 36 ದಿನಗಳ ಸುದೀರ್ಘ ಪ್ರತಿಭಟನೆಯನ್ನು ಹಿಂಪಡೆದ ಕೆಲವೇ ಗಂಟೆಗಳಲ್ಲಿ, ಪತ್ರಕರ್ತ ಯಾಕೂತ್ ಅಲಿ ಅವರು ಆ ಸಂಘಟನೆಯ ಮಾಜಿ ವಕ್ತಾರ ವಿಜೇತಾ ದಹಿಯಾ ಅವರೊಂದಿಗಿನ ಸಂದರ್ಶನವನ್ನು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದರು. ಅವರಿಬ್ಬರೂ ಸೋನಮ್ ವಾಂಗ್ಚುಕ್ ಅವರನ್ನು ಟ್ರೋಲ್ ಮಾಡುತ್ತಿರುವ ವಿಷಯದ ಬಗ್ಗೆ ಚರ್ಚಿಸಿದ್ದರು. ಅವರ್ಯಾರೂ ಪ್ರಧಾನಿಯವರ ಕುರಿತು ಯಾವುದೇ ನಿಂದನಾತ್ಮಕ ಅಥವಾ ಆಕ್ಷೇಪಾರ್ಹ ಮಾತುಗಳನ್ನು ಆಡಿರಲಿಲ್ಲ.

ಆದರೆ, ಕೆಲವೇ ನಿಮಿಷಗಳಲ್ಲಿ ಆ ವೀಡಿಯೋವನ್ನು ಭಾರತದಲ್ಲಿ ಕಾಣಿಸದಂತೆ ಮಾಡಲಾಯಿತು.

ಯಾಕೂತ್ ಅಲಿ ತಮ್ಮ ಎರಡನೇ ಖಾತೆಯಾದ 'ನಾಟ್‌ಯಾಕೂತ್' (Notyaqut) ಮೂಲಕ ಈ ವೀಡಿಯೋವನ್ನು ಮುಖ್ಯ ಖಾತೆಗೆ ಕೊಲಾಬೊರೇಟ್ ಮಾಡಿ ಮತ್ತೆ ಪೋಸ್ಟ್ ಮಾಡಿದರು. ಅದನ್ನು ಸಹ ಬ್ಲಾಕ್ ಮಾಡಲಾಯಿತು. ಹ್ಯಾಶ್‌ ಟ್ಯಾಗ್‌ ಗಳಿಲ್ಲದೆ ಅವರು ಮೂರನೇ ಬಾರಿಗೆ ಪ್ರಯತ್ನಿಸಿದರು. ಅದು ಏಳು ಅಥವಾ ಎಂಟು ಗಂಟೆಗಳ ಕಾಲ ಇತ್ತು. ನಂತರ ಅದಕ್ಕೂ ಅದೇ ಗತಿಯಾಯಿತು. ಮಾಹಿತಿ ತಂತ್ರಜ್ಞಾನ (IT) ಕಾಯ್ದೆಯಡಿ ಈ ಪೋಸ್ಟ್ ಭಾರತದಲ್ಲಿ ಲಭ್ಯವಿಲ್ಲ ಎಂದು ನೋಟಿಸ್‌ ನಲ್ಲಿ ತಿಳಿಸಲಾಗಿತ್ತು.

ಪ್ರಧಾನಿಯವರ ಕುರಿತು ಆಕ್ಷೇಪಾರ್ಹ ವಿಷಯಗಳನ್ನು ಹೊಂದಿರುವ ಪೋಸ್ಟ್‌ ಗಳನ್ನು ತೆಗೆದುಹಾಕುವಂತೆ ದಿಲ್ಲಿ ಪೊಲೀಸರು ಸಾಮಾಜಿಕ ಜಾಲತಾಣಗಳಿಗೆ ಸೂಚಿಸುತ್ತಿರುವ ಕಾರ್ಯಾಚರಣೆಯ ನಡುವೆಯೇ ಈ ಘಟನೆ ನಡೆದಿದೆ. ತಮ್ಮ ಸಾಮಾಜಿಕ ಜಾಲತಾಣ ವಿಭಾಗವು ವಿವಿಧ ವೇದಿಕೆಗಳನ್ನು ಪರಿಶೀಲಿಸುತ್ತಿದ್ದು, ಇಲ್ಲಿಯವರೆಗೆ 450 ಪೋಸ್ಟ್‌ ಗಳನ್ನು ಗುರುತಿಸಲಾಗಿದೆ ಎಂದು ಪೊಲೀಸರು ತಿಳಿಸಿರುವುದಾಗಿ ‘newslaundry’ ವರದಿ ಉಲ್ಲೇಖಿಸಿದೆ.

ಪ್ರತಿಭಟನೆಯ ಕುರಿತು ಆನ್‌ಲೈನ್‌ ನಲ್ಲಿ ನಡೆಯುತ್ತಿದ್ದ ಅಭಿಪ್ರಾಯಗಳ ಸಂಘರ್ಷದ ಬೆನ್ನಲ್ಲೇ ಈ ಕ್ರಮ ಕೈಗೊಳ್ಳಲಾಗಿದೆ. ವಾರಗಳ ಕಾಲ CJP, ಕಂಟೆಂಟ್ ಕ್ರಿಯೇಟರ್‌ ಗಳ ನೆರವಿನಿಂದ ಇನ್‌ಸ್ಟಾಗ್ರಾಮ್‌ನಲ್ಲಿ ಬಿಜೆಪಿಗಿಂತ ಮೇಲುಗೈ ಸಾಧಿಸಿತ್ತು. ಇದು ಸರ್ಕಾರವೂ ಅದೇ ಹಾದಿಯಲ್ಲಿ ಪ್ರತಿಕ್ರಿಯಿಸುವಂತೆ ಮಾಡಿತು. ಅಂತಿಮವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರೂ ಸಹ ಸೆಲ್ಫಿ ವೀಡಿಯೋ ಮೂಲಕ ಯುವಕರನ್ನು ಉದ್ದೇಶಿಸಿ ಮಾತನಾಡಬೇಕಾಯಿತು.

ಪ್ರಧಾನಿಯವರು ಇಂತಹ ಇನ್ನಷ್ಟು ಸೆಲ್ಫಿ ವೀಡಿಯೋಗಳನ್ನು ಪೋಸ್ಟ್ ಮಾಡಿದ್ದರು. ಅವುಗಳಲ್ಲಿ ಒಂದನ್ನು ಮೆಟಾ ಸಂಸ್ಥೆಯು ಫೇಸ್‌ಬುಕ್‌ನಲ್ಲಿ ತಾತ್ಕಾಲಿಕವಾಗಿ ಬ್ಲಾಕ್ ಮಾಡಿತ್ತು. ತಾಂತ್ರಿಕ ದೋಷದಿಂದಾಗಿ ವೀಡಿಯೋ ತೆಗೆದುಹಾಕಲಾಗಿತ್ತು ಎಂದು ಸ್ಪಷ್ಟನೆ ನೀಡಿರುವ ಮೆಟಾ ಸಂಸ್ಥೆಯು ಸರ್ಕಾರದ ಬಳಿ ಕ್ಷಮೆಯಾಚಿಸಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.

ಪ್ರಧಾನಿಯವರ ವೀಡಿಯೋ ಕುರಿತಾದ ಗೊಂದಲಗಳ ನಡುವೆ, ಯಾವುದೇ ಅಸಭ್ಯ ಅಥವಾ ನಿಂದನಾತ್ಮಕ ಅಂಶಗಳಿಲ್ಲದ ಇತರ ಹಲವು ಪೋಸ್ಟ್‌ ಗಳ ಮೇಲೆಯೂ ನಿರ್ಬಂಧ ಹೇರಲಾಗಿದೆ. ಆದರೆ, ಈ ನಿರ್ಬಂಧಗಳಿಗೆ ಅನುಸರಿಸಲಾದ ಪ್ರಕ್ರಿಯೆಯ ಕುರಿತು ಯಾವುದೇ ಸ್ಪಷ್ಟತೆ ಸಿಕ್ಕಿಲ್ಲ.

View this post on Instagram

A post shared by ABHINAV BISHT (@issac1rl)

►ಯಾವ ವೀಡಿಯೋಗಳನ್ನು ನಿರ್ಬಂಧಿಸಲಾಗಿದೆ?

ಕಂಟೆಂಟ್ ಕ್ರಿಯೇಟರ್ ಜ್ಯೋತಿ ಯಾದವ್ ಅವರ ಮೂರು ವಾರಗಳ ವೀಡಿಯೋಗಳನ್ನು ಬ್ಲಾಕ್ ಮಾಡಲಾಗಿದೆ. ಜುಲೈ 5 ರಂದು ಉಪವಾಸ ಸತ್ಯಾಗ್ರಹದ ಕುರಿತು ಐಸಾ (AISA) ಸದಸ್ಯರೊಂದಿಗೆ ನಡೆಸಿದ ಸಂವಾದ, ಜುಲೈ 23 ರಂದು ಪ್ರಶ್ನೆಪತ್ರಿಕೆ ಸೋರಿಕೆ ಕುರಿತು ಆಪ್ (AAP) ನಾಯಕ ಸಂಜಯ್ ಸಿಂಗ್ ಅವರ ಸಂದರ್ಶನ ಹಾಗೂ ಜುಲೈ 25 ರಂದು ಭೀಮ್ ಆರ್ಮಿ ಸದಸ್ಯರೊಂದಿಗೆ ಅದೇ ವಿಷಯದ ಕುರಿತು ನಡೆಸಿದ ಚರ್ಚೆಯ ವೀಡಿಯೋಗಳನ್ನು ತಡೆಯಲಾಗಿದೆ. ಈ ಮೂರೂ ವೀಡಿಯೋಗಳಲ್ಲಿ ರೈತರ ಪ್ರತಿಭಟನೆ ಸೇರಿದಂತೆ ಈ ಹಿಂದಿನ ಚಳವಳಿಗಳ ವಿಷಯಗಳನ್ನು ಪ್ರಸ್ತಾಪಿಸಲಾಗಿತ್ತು. ಒಂದರಲ್ಲಿ, 30ಕ್ಕೂ ಹೆಚ್ಚು FIR ಎದುರಿಸುತ್ತಿರುವ ಹಿಂದುತ್ವ ಕಾರ್ಯಕರ್ತ ಪಿಂಕಿ ಚೌಧರಿ ಅವರನ್ನು ಭೀಮ್ ಆರ್ಮಿ ಸದಸ್ಯರೊಬ್ಬರು "ನಾಲಾಯಕ್" ಎಂದು ಕರೆದಿದ್ದರು ಹಾಗೂ ಸ್ವಾತಂತ್ರ್ಯ ದಿನಾಚರಣೆಯಂದು ಅವರನ್ನು ಎದುರಿಸುವುದಾಗಿ ಹೇಳಿದ್ದರು.

ಈ ಮೂರೂ ವೀಡಿಯೋಗಳನ್ನು ಭಾರತದಲ್ಲಿ ವೀಕ್ಷಿಸದಂತೆ ನಿರ್ಬಂಧಿಸಲಾಗಿದ್ದರೂ, ಫೇಸ್‌ಬುಕ್‌ ನಲ್ಲಿ ಅವು ಇಂದಿಗೂ ಲಭ್ಯವಿವೆ. ಆದರೆ, ಯಾವ ಇಲಾಖೆ ಅಥವಾ ಸಂಸ್ಥೆ ಈ ಕ್ರಮಕ್ಕೆ ವಿನಂತಿಸಿದೆ ಎಂಬುದನ್ನು ನೋಟಿಸ್‌ ನಲ್ಲಿ ನಿರ್ದಿಷ್ಟವಾಗಿ ತಿಳಿಸಿಲ್ಲ.

"ನಾನು ಸ್ವತಂತ್ರ ಪತ್ರಕರ್ತೆಯಾಗಿ ಕಾರ್ಯನಿರ್ವಹಿಸುತ್ತಿದ್ದೇನೆ ಮತ್ತು ನನ್ನ ಸ್ವಂತ ಖಾತೆಯಲ್ಲೂ ವೀಡಿಯೋಗಳನ್ನು ಅಪ್‌ಲೋಡ್ ಮಾಡುತ್ತೇನೆ. ಯಾವುದೇ ಅಜೆಂಡಾಗಳಿಗೆ ಒಳಗಾಗದೆ ಉತ್ತಮ ಮಾಹಿತಿ ನೀಡಲು ನಾನು ಬಯಸುತ್ತೇನೆ. ಆದರೆ, ಯಾವುದೇ ಕ್ಷಣದಲ್ಲಿ ನನ್ನ ಈ ಖಾತೆಯನ್ನು ಸಹ ರದ್ದುಗೊಳಿಸಬಹುದು ಎಂಬ ಭಯ ನನಗಿದೆ" ಎಂದು ಜ್ಯೋತಿ ಯಾದವ್ ಹೇಳಿದ್ದಾರೆ.

2022 ಸೆಪ್ಟೆಂಬರ್‌ ನಿಂದ ತಮ್ಮ ಖಾತೆಯನ್ನು ನಡೆಸುತ್ತಿರುವ ಮತ್ತು 'ನ್ಯೂಸ್ ಡಿಗ್ಗಿ' ಪೋರ್ಟಲ್‌ ನಲ್ಲಿ ವೀಡಿಯೋ ಪೋಸ್ಟ್ ಮಾಡುವ ಗಜೇಂದ್ರ ಸಿಂಗ್, ಜುಲೈ 20 ರಂದು ಸಂಸತ್ ಚಲೋ ಸಂದರ್ಭದಲ್ಲಿ ಪೊಲೀಸರ ಲಾಠಿಚಾರ್ಜ್‌ನಿಂದ ಗಾಯಗೊಂಡ ಪ್ರತಿಭಟನಾಕಾರರ ದೃಶ್ಯಗಳನ್ನು ಅಪ್‌ಲೋಡ್ ಮಾಡಿದ್ದರು. ಐಟಿ ಕಾಯ್ದೆಯ ಸೆಕ್ಷನ್ 79(3)(b) ಅನ್ನು ಉಲ್ಲೇಖಿಸಿ, ಮರುದಿನವೇ ಆ ವೀಡಿಯೋವನ್ನು ಭಾರತದಲ್ಲಿ ನಿರ್ಬಂಧಿಸಲಾಯಿತು.

"ನಾನು ಸ್ವರಾ ಭಾಸ್ಕರ್ ಅವರ ಸಂದರ್ಶನ ಮಾಡಿದ್ದ ಮತ್ತೊಂದು ವೀಡಿಯೋವನ್ನೂ ಸಹ ತೆಗೆದುಹಾಕಲಾಗಿದೆ. ಅದು ಭಾರತದಲ್ಲಿ ಲಭ್ಯವಿಲ್ಲ. ನಾವು ಯಾವುದೇ ಸುಳ್ಳು ಮಾಹಿತಿಯನ್ನು ಹಂಚಿಕೊಳ್ಳದಿರುವಾಗ ಹೀಗೆ ಮಾಡುವುದು ಎಷ್ಟು ಸರಿ?" ಎಂದು ಸಿಂಗ್ ಪ್ರಶ್ನಿಸಿದ್ದಾರೆ.

ಪತ್ರಕರ್ತ ಮತ್ತು ಕ್ರಿಯೇಟರ್ ರಾಘವ್ ತ್ರಿವೇದಿ ಅವರು ರವಿವಾರ, ಘಾಜಿಯಾಬಾದ್‌ನಲ್ಲಿ ನಡೆದ ಘಟನೆಯೊಂದರ ಕುರಿತು ವೀಡಿಯೋ ಪೋಸ್ಟ್ ಮಾಡಿದ್ದರು. ಅಲ್ಲಿ ಸತ್ಯಂ ಪಂಡಿತ್ ಎಂಬ ವ್ಯಕ್ತಿ, CJP ಪ್ರತಿಭಟನೆಯಿಂದ ಹಿಂತಿರುಗುತ್ತಿದ್ದ ಪ್ರತಿಭಟನಾಕಾರರ ಧರ್ಮವನ್ನು ಕೇಳಿ ಅವರ ಮೇಲೆ ದಾಳಿ ಮಾಡಿದ್ದ. ವಿದ್ಯಾರ್ಥಿಗಳ ಮೇಲೆ ಲಾಠಿಚಾರ್ಜ್ ಮಾಡುವ ಪೊಲೀಸರು, ಪ್ರತಿಭಟನಾಕಾರರ ಮೇಲೆ ಹಲ್ಲೆ ನಡೆಸುವವರ ವಿರುದ್ಧ ಏಕೆ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ತ್ರಿವೇದಿ ಪ್ರಶ್ನಿಸಿದ್ದರು. ಈ ವೀಡಿಯೋವನ್ನು 'ಮಾಲಿಟಿಕ್ಸ್' (Molitics) ಮಾಧ್ಯಮ ಸಂಸ್ಥೆಯೊಂದಿಗೆ ಕೊಲಾಬೊರೇಟ್ ಮಾಡಿ ಪೋಸ್ಟ್ ಮಾಡಲಾಗಿತ್ತು.

ಅವರ ಪೋಸ್ಟ್ ಅನ್ನು ನಿರ್ಬಂಧಿಸದೆ, ಸಂಪೂರ್ಣವಾಗಿ ತೆಗೆದುಹಾಕಲಾಯಿತು. "ಈ ವೀಡಿಯೋ ಮೀಮ್ಸ್, ತಮಾಷೆ ಅಥವಾ ಆಕ್ರೋಶ ವ್ಯಕ್ತಪಡಿಸುವ ನೆಪದಲ್ಲಿ ಮಕ್ಕಳ ಮೇಲಿನ ದೌರ್ಜನ್ಯವನ್ನು ತೋರಿಸುವಂತಿದೆ" ಎಂದು ನೋಟಿಸ್‌ನಲ್ಲಿ ತಿಳಿಸಲಾಗಿತ್ತು.

ಮಾಲಿಟಿಕ್ಸ್ ಸಂಸ್ಥೆಯು ಶನಿವಾರ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದ ಮತ್ತೊಂದು ವೀಡಿಯೋದಲ್ಲಿ 'ಆರ್ಟಿಕಲ್ 19'ನ ನವೀನ್ ಕುಮಾರ್ ಅವರು ಸರ್ಕಾರ ಪರ ಮಾಧ್ಯಮಗಳ ಕುರಿತು ಚರ್ಚಿಸಿದ್ದರು. ಆ ವೀಡಿಯೋವನ್ನು ಸಹ ತೆಗೆದುಹಾಕಲಾಗಿತ್ತು. ಆದರೆ, ಈಗ ಅದನ್ನು ಮರುಸ್ಥಾಪಿಸಲಾಗಿದೆ.

CJP ಪ್ರತಿಭಟನೆಗೆ ಸಂಬಂಧಿಸಿದ ರೀಲ್ಸ್‌ಗಳನ್ನು ಪೋಸ್ಟ್ ಮಾಡುವ ಮೂಲಕ ತಮ್ಮ ಇನ್‌ಸ್ಟಾಗ್ರಾಮ್ ಫಾಲೋವರ್ಸ್ ಸಂಖ್ಯೆಯನ್ನು ಕೆಲವೇ ಸಾವಿರದಿಂದ 6 ಲಕ್ಷಕ್ಕೂ ಹೆಚ್ಚು ಹೆಚ್ಚಿಸಿಕೊಂಡಿದ್ದ ಅಭಿನವ್ ಬಿಷ್ಟ್ ಅವರ ಖಾತೆಯನ್ನು ರದ್ದುಗೊಳಿಸಲಾಗಿತ್ತು. ಕೆಲವು ಗಂಟೆಗಳ ನಂತರ ಅದನ್ನು ಮರುಸ್ಥಾಪಿಸಲಾಯಿತು. ಈ ಕ್ರಮಕ್ಕೆ ಕಾರಣ ಏನೆಂದು ತಮಗೆ ತಿಳಿದಿಲ್ಲ ಎಂದು ಬಿಷ್ಟ್ ಹೇಳಿದ್ದಾರೆ. ಅವರು ಹೊಸ ಖಾತೆಯನ್ನು ತೆರೆದ ನಂತರ, ಸಾವಿರಾರು ಬೆಂಬಲಿಗರು ಅವರ ಮೂಲ ಪ್ರೊಫೈಲ್ ಅನ್ನು ಮರುಸ್ಥಾಪಿಸುವಂತೆ ಇನ್‌ಸ್ಟಾಗ್ರಾಮ್ ಅನ್ನು ಒತ್ತಾಯಿಸಿದ್ದರು.

ಇನ್ನೊಂದೆಡೆ, ಪಶ್ಚಿಮ ಬಂಗಾಳದ ಬಾರಾಸತ್‌ನಲ್ಲಿ, ಪ್ರಧಾನಿ ಮೋದಿ ಅವರ ಭಾವಚಿತ್ರಕ್ಕೆ ಬೆಂಕಿ ಹಚ್ಚಿ ಅದರಿಂದ ಸಿಗರೇಟ್ ಹೊತ್ತಿಸುವ ವೀಡಿಯೋ ಪೋಸ್ಟ್ ಮಾಡಿದ್ದ ಸೌಮಿಕ್ ಚಟರ್ಜಿ ಎಂಬಾತನನ್ನು ಬಿಜೆಪಿ ನಾಯಕರೊಬ್ಬರು ನೀಡಿದ ದೂರಿನ ಆಧಾರದ ಮೇಲೆ ಬಂಧಿಸಲಾಗಿದೆ.

►ರೀಚ್ ಕುಸಿದಿದೆ ಎಂದ ಕ್ರಿಯೇಟರ್ಸ್

ಇಂಟರ್ನೆಟ್ ಫ್ರೀಡಂ ಫೌಂಡೇಶನ್ (IFF) ಈ ಹಿಂದೆ ಮೆಟಾ ಸಂಸ್ಥೆಗೆ ಕೆಲವು ಪ್ರಶ್ನೆಗಳನ್ನು ಕೇಳಿತ್ತು. "ದಿಲ್ಲಿಯಲ್ಲಿ ನಡೆಯುತ್ತಿರುವ ವಿದ್ಯಾರ್ಥಿ ಪ್ರತಿಭಟನೆಯ ವೀಡಿಯೋ ಮತ್ತು ರೀಲ್ಸ್‌ಗಳನ್ನು ಇನ್‌ಸ್ಟಾಗ್ರಾಮ್ 'ಸಂವೇದನಾಶೀಲ ವಿಷಯ' (ಸೆನ್ಸಿಟಿವ್ ಕಂಟೆಂಟ್) ಎಂದು ಗುರುತಿಸುತ್ತಿದೆ ಎಂದು ಭಾರತದಾದ್ಯಂತ ಬಳಕೆದಾರರು ದೂರುತ್ತಿದ್ದಾರೆ. CJP (CJP) ಅಧಿಕೃತ ಖಾತೆ ಮತ್ತು ಅನೀಶ್ ಗಾವಂಡೆ ಅವರು ಹಂಚಿಕೊಂಡ ಸ್ಟೋರಿಗಳಿಗೂ ಇದು ಅನ್ವಯಿಸಿದೆ. ಈ ರೀಲ್ಸ್‌ಗಳನ್ನು ಹಂಚಿಕೊಂಡಾಗ ಎಚ್ಚರಿಕೆಯ ಸಂದೇಶ ಕಾಣಿಸಿಕೊಳ್ಳುತ್ತಿದ್ದು, ಹಲವು ಬಾರಿ 'ಸೀ ರೀಲ್' (See reel) ಆಯ್ಕೆಯು ಕೆಲಸ ಮಾಡುತ್ತಿಲ್ಲ. ಕ್ರಿಯೇಟರ್ಸ್ ತಮ್ಮ ಖಾತೆಗಳ ರೀಚ್ ಹಠಾತ್ ಮತ್ತು ಅಸ್ಪಷ್ಟ ಕಾರಣಗಳಿಂದ ಕುಸಿದಿದೆ ಎಂದು ಹೇಳುತ್ತಿದ್ದಾರೆ. ಇದು ಸಾಮಾನ್ಯವಾಗಿ 'ಶ್ಯಾಡೋಬ್ಯಾನಿಂಗ್' ಎಂದು ಕರೆಯಲಾಗುವ ಕ್ರಮವನ್ನು ಹೋಲುತ್ತದೆ" ಎಂದು ಸಂಸ್ಥೆ ಹೇಳಿತ್ತು.

ಸಾಮಾಜಿಕ ಜಾಲತಾಣದ ಪೋಸ್ಟ್‌ ಗಳನ್ನು ತೆಗೆದುಹಾಕಲು ಪೊಲೀಸರು ಯಾವ ಕಾನೂನು ಅಧಿಕಾರವನ್ನು ಬಳಸುತ್ತಿದ್ದಾರೆ ಎಂಬುದು ಸ್ಪಷ್ಟವಾಗಿಲ್ಲ. ಪಿಟಿಐ ವರದಿ ಮಾಡಿರುವ ಪೊಲೀಸ್ ಮೂಲಗಳ ಪ್ರಕಾರ, "ಪ್ರತಿಭಟನೆಯ ಸಮಯದಲ್ಲಿ ಮತ್ತು ನಂತರ ಅಪ್‌ಲೋಡ್ ಮಾಡಲಾದ ವಿಷಯಗಳನ್ನು ಪರಿಶೀಲಿಸಿದ ನಂತರ, ನಿಂದನಾತ್ಮಕವಾಗಿರುವ ಪೋಸ್ಟ್‌ ಗಳನ್ನು ತೆಗೆದುಹಾಕಲು ಪೊಲೀಸರು ನೋಟಿಸ್ ನೀಡಲಿದ್ದಾರೆ. ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ಇಂತಹ ಪೋಸ್ಟ್‌ ಗಳನ್ನು ಗುರುತಿಸುವ ಪ್ರಕ್ರಿಯೆ ಈಗಾಗಲೇ ನಡೆಯುತ್ತಿದೆ."

ಇಂಟರ್ನೆಟ್ ಫ್ರೀಡಂ ಫೌಂಡೇಶನ್‌ನ ಸಂಸ್ಥಾಪಕ ನಿರ್ದೇಶಕ ಅಪಾರ್ ಗುಪ್ತಾ ಮಾತನಾಡಿ, ಈ ಕ್ರಮಗಳನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಬೇಕು ಎಂದು ಆಗ್ರಹಿಸಿದರು. "ಆನ್‌ಲೈನ್‌ ನಲ್ಲೇ ಬೆಳೆದ ಈ ಡಿಜಿಟಲ್ ಜನಾಂಗವು ಜವಾಬ್ದಾರಿಯನ್ನು ಪ್ರಶ್ನಿಸುವುದು ಹೀಗೆ. ದಿಲ್ಲಿ ಪೊಲೀಸರು ಜಾರಿಗೊಳಿಸಿದ ಪ್ರತಿಯೊಂದು ನೋಟಿಸ್ ಮತ್ತು ಅದಕ್ಕೆ ಬಳಸಲಾದ ಕಾನೂನು ನಿಯಮಗಳನ್ನು ಸಾರ್ವಜನಿಕವಾಗಿ ಪ್ರಕಟಿಸಬೇಕು ಎಂದು ನಾವು ಒತ್ತಾಯಿಸುತ್ತೇವೆ" ಎಂದರು.

ಈ ವರದಿಯಲ್ಲಿ ಉಲ್ಲೇಖಿಸಲಾದ ನಿರ್ಬಂಧಗಳು ಮತ್ತು ವೀಡಿಯೋ ತೆಗೆದುಹಾಕಿದ ಘಟನೆಗಳಲ್ಲಿ ಎಷ್ಟು ದಿಲ್ಲಿ ಪೊಲೀಸರ ಕೋರಿಕೆಯ ಮೇರೆಗೆ ನಡೆದಿವೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. 'ನ್ಯೂಸ್ ಲಾಂಡ್ರಿ' ಈ ಕುರಿತು ದಿಲ್ಲಿ ಪೊಲೀಸ್ ಮತ್ತು ಮೆಟಾ ಸಂಸ್ಥೆಗೆ ಪ್ರಶ್ನೆಗಳನ್ನು ಕಳುಹಿಸಿದೆ. ಇಲ್ಲಿವರೆಗೆ ಅವರಿಂದ ಪ್ರತಿಕ್ರಿಯೆ ಬಂದಿಲ್ಲ.

►ಕಣ್ಗಾವಲು ಕುರಿತ ಪ್ರಶ್ನೆ

ಜಂತರ್ ಮಂತರ್ ಪ್ರತಿಭಟನೆಯಲ್ಲಿ ಸಾರ್ವಜನಿಕರ ಮೇಲೆ ನಡೆಸಲಾಗುತ್ತಿರುವ ಕಣ್ಗಾವಲನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಅರ್ಜಿಯನ್ನು ವಿಚಾರಣೆಗೆ ಕೈಗೆತ್ತಿಕೊಳ್ಳಲು ದೆಹಲಿ ಹೈಕೋರ್ಟ್ ನಿರಾಕರಿಸಿದ ಬೆನ್ನಲ್ಲೇ ಈ ನಿರ್ಬಂಧಗಳು ಬಂದಿವೆ. ಬದಲಿಗೆ ಸಾಮಾನ್ಯ ಮಾರ್ಗಸೂಚಿಗಳನ್ನು ರೂಪಿಸುವಂತೆ ಅರ್ಜಿ ಸಲ್ಲಿಸಲು ನ್ಯಾಯಾಲಯ ಸೂಚಿಸಿದೆ.

ಟೆಲಿಸ್ಕೋಪಿಕ್ ಮಸ್ಟ್‌ ನಲ್ಲಿ ಕ್ಯಾಮೆರಾಗಳನ್ನು ಅಳವಡಿಸಿ, ಜನಸಂದಣಿಯ 360-ಡಿಗ್ರಿ ನೋಟವನ್ನು ಸೆರೆಹಿಡಿಯುವ ದಿಲ್ಲಿ ಪೊಲೀಸರ ‘Ikshana’ ಎಂಬ ಸಂಚಾರಿ ಕಣ್ಗಾವಲು ವಾಹನದ ಚಿತ್ರಗಳನ್ನು ಪ್ರತಿಭಟನಾಕಾರರು ಈ ಹಿಂದೆ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದರು. ಇದರ ಜೊತೆಗೆ ಡ್ರೋನ್ ಕ್ಯಾಮೆರಾಗಳು ಮತ್ತು ಪೊಲೀಸ್ ಸಿಬ್ಬಂದಿಯೂ ಸ್ಥಳಕ್ಕೆ ಭೇಟಿ ನೀಡಿದವರ ವೀಡಿಯೋ ಚಿತ್ರೀಕರಣ ಮಾಡುತ್ತಿದ್ದರು.

ಪೊಲೀಸ್ ಆಯುಕ್ತ ಅನುರಾಗ್ ಕುಮಾರ್ ಅವರು ಸರ್ಕಾರಕ್ಕೆ ಸಲ್ಲಿಸಿರುವ ವರದಿಯ ಪ್ರಕಾರ, ಪೊಲೀಸರ ಮೇಲಿನ ದಾಳಿ ಮತ್ತು ವಾಹನಗಳಿಗೆ ಹಾನಿಯೆಸಗಿದ ಪ್ರಕರಣಗಳಿಗೆ ಸಂಬಂಧಿಸಿದಂತೆ 2,873 ಜನರನ್ನು ವಿಚಾರಣೆಗೆ ಒಳಪಡಿಸಲಾಗಿದೆ. ಅವರಲ್ಲಿ 989 ಜನರು ಈ ಹಿಂದೆ ಭೀಕರ ಅಪರಾಧ ಹಿನ್ನೆಲೆ ಹೊಂದಿದವರು ಎಂದು 'ಟೈಮ್ಸ್ ಆಫ್ ಇಂಡಿಯಾ' ವರದಿ ಮಾಡಿದೆ. ಮುಖ ಗುರುತಿಸುವಿಕೆ (ಫೇಶಿಯಲ್ ರೆಕಗ್ನಿಷನ್) ಕ್ಯಾಮೆರಾಗಳು, ಸಿಸಿಟಿವಿ ಹಾಗೂ ಪೊಲೀಸ್ ಮತ್ತು ಸಾರ್ವಜನಿಕರು ಚಿತ್ರೀಕರಿಸಿದ ವೀಡಿಯೋಗಳನ್ನು ಬಳಸಿ ಇವರನ್ನು ಗುರುತಿಸಲಾಗಿದೆ. ಜಂತರ್ ಮಂತರ್‌ ನಲ್ಲಿ ಪ್ರತಿಭಟನೆ ನಡೆಸಲು ಮಾತ್ರ ಅನುಮತಿ ನೀಡಲಾಗಿತ್ತು, ಸಂಸತ್ತಿಗೆ ಮೆರವಣಿಗೆ ನಡೆಸಲು ಅಲ್ಲ ಎಂದು ವರದಿ ಉಲ್ಲೇಖಿಸಿದೆ. ಜುಲೈ 20 ರಂದು ಸಂಸತ್ ಚಲೋ ಸಂದರ್ಭದಲ್ಲಿ ನಡೆದ ಹಿಂಸಾಚಾರದಲ್ಲಿ ಕೊಲೆ ಪ್ರಕರಣ ಎದುರಿಸುತ್ತಿರುವ 101 ಜನರು, ದರೋಡೆ ಮತ್ತು ಸುಲಿಗೆ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ 284 ಜನರು ಹಾಗೂ ಮಹಿಳೆಯರು ಮತ್ತು ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಆರೋಪ ಹೊತ್ತಿರುವ 92 ಜನರು ಭಾಗವಹಿಸಿದ್ದರು ಎಂದು ತಮ್ಮ ತನಿಖೆಯಲ್ಲಿ ತಿಳಿದುಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮುಖ ಗುರುತಿಸುವಿಕೆ ತಂತ್ರಜ್ಞಾನದ ಬಳಕೆಯ ಕುರಿತು ಇಂಟರ್ನೆಟ್ ಫ್ರೀಡಂ ಫೌಂಡೇಶನ್ ದಿಲ್ಲಿ ಪೊಲೀಸರಿಗೆ ಪತ್ರ ಬರೆದಿದ್ದು, ಆರ್‌ಟಿಐ ಅರ್ಜಿಗಳನ್ನೂ ಸಲ್ಲಿಸಿದೆ.

"ಕೇಂದ್ರ ಮಾಹಿತಿ ಆಯೋಗದ ಮೆಟ್ಟಿಲೇರಿದ ನಂತರ ದಿಲ್ಲಿ ಪೊಲೀಸರೇ ನೀಡಿದ ಆರ್‌ಟಿಐ ಉತ್ತರಗಳು, ಅವರು ಮುಖ ಗುರುತಿಸುವಿಕೆ ತಂತ್ರಜ್ಞಾನವನ್ನು (FRT) ಬಳಸಲು ಯಾವುದೇ ನಿರ್ದಿಷ್ಟ ನಿಯಮಗಳಿಲ್ಲ ಎಂಬುದನ್ನು ಸ್ಪಷ್ಟಪಡಿಸುತ್ತವೆ. ಖಾಸಗಿತನದ ಮೇಲಾಗುವ ಪರಿಣಾಮದ ಕುರಿತು ಯಾವುದೇ ಮೌಲ್ಯಮಾಪನ ನಡೆದಿಲ್ಲ ಹಾಗೂ ಕೇವಲ ಶೇ. 80ರಷ್ಟು ಹೋಲಿಕೆ ಕಂಡುಬಂದರೂ ಅದನ್ನು ಸೂಕ್ತ ಆಧಾರವೆಂದು ಪರಿಗಣಿಸಲಾಗುತ್ತಿದೆ" ಎಂದು ಫೌಂಡೇಶನ್ ಹೇಳಿದೆ. ಶಾಂತಿಯುತ ಪ್ರತಿಭಟನೆಗಳ ವೇಳೆ 'ಲೈವ್ ಎಫ್‌ಆರ್‌ಟಿ' ಬಳಕೆಯನ್ನು ತಕ್ಷಣವೇ ಸ್ಥಗಿತಗೊಳಿಸಬೇಕು, ಪ್ರತಿಭಟನಾಕಾರರ ಬಯೋಮೆಟ್ರಿಕ್ ಮಾಹಿತಿಯನ್ನು ಅಳಿಸಿಹಾಕಬೇಕು ಮತ್ತು ಈ ಸಂಬಂಧ ಇರುವ ನಿಯಮಗಳನ್ನು ಸಾರ್ವಜನಿಕಗೊಳಿಸಬೇಕು ಎಂದು ಆಗ್ರಹಿಸಿ ಫೌಂಡೇಶನ್ ಪೊಲೀಸ್ ಆಯುಕ್ತರಿಗೆ ಕಾನೂನು ನೋಟಿಸ್ ಕಳುಹಿಸಿದೆ. ಅಲ್ಲದೆ, 'Ikshana' ವಾಹನದ ಹಿಂದಿರುವ ಖಾಸಗಿ ಸಂಸ್ಥೆಯ ಒಪ್ಪಂದದ ವಿವರ ಸೇರಿದಂತೆ ನಾಲ್ಕು ಹೊಸ ಆರ್‌ಟಿಐ ಅರ್ಜಿಗಳನ್ನು ಸಲ್ಲಿಸಿದೆ.