ಸ್ಥಳೀಯ ನಿವಾಸಿಗಳಿಗೆ ಅಗ್ಗದ ಟೋಲ್ ಪ್ಲಾಝಾ ಪ್ರಯಾಣ: NHAI ನೂತನ ವಾರ್ಷಿಕ ಪಾಸ್ ಬಳಸುವುದು ಹೇಗೆ?

ದೇಶಾದ್ಯಂತ ಟೋಲ್ ಪ್ಲಾಝಾಗಳ ಸಮೀಪ ವಾಸಿಸುವ ಜನರು ತಮ್ಮ ದಿನನಿತ್ಯದ ಸಂಚಾರದ ವೆಚ್ಚದ ಬಗ್ಗೆ ದೀರ್ಘಕಾಲದಿಂದ ದೂರು ನೀಡುತ್ತಿದ್ದರು. ಇದೀಗ ರಾಷ್ಟ್ರೀಯ ಹೆದ್ದಾರಿ ಟೋಲ್ ಪ್ಲಾಝಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸಿಸುವ ಅರ್ಹ ಖಾಸಗಿ ವಾಹನ ಮಾಲೀಕರಿಗೆ ಕೇಂದ್ರ ಸರ್ಕಾರವು ಹೊಸ ರಿಯಾಯಿತಿ ವಾರ್ಷಿಕ ಟೋಲ್ ಪಾಸ್ ಯೋಜನೆಯನ್ನು ತಂದಿದೆ. ಈ ನೂತನ ನಿಯಮಗಳು 2026ರ ನವೆಂಬರ್ 1ರಿಂದ ಜಾರಿಗೆ ಬರಲಿದ್ದು, ಟೋಲ್ ಪ್ಲಾಝಾ ಇರುವ ಪ್ರದೇಶವನ್ನು ಆಧರಿಸಿ ಅರ್ಹ ನಿವಾಸಿಗಳು 1,500 ರೂಪಾಯಿ ಅಥವಾ 3,000 ರೂಪಾಯಿಗೆ ವಾರ್ಷಿಕ ಪಾಸ್ ಪಡೆಯಬಹುದು.

ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಪರಿಚಯಿಸಿರುವ ಈ ಪಾಸ್ ಅನ್ನು 'ರಾಜಮಾರ್ಗಯಾತ್ರಾ' (Rajmargyatra) ಆ್ಯಪ್ ಮೂಲಕ ಖರೀದಿಸಬಹುದು. ಇದು ಪ್ರಸ್ತುತ ಚಾಲ್ತಿಯಲ್ಲಿರುವ ಮಾಸಿಕ ಡಿಜಿಟಲ್ ಪಾಸ್ ಗಿಂತ ಕಡಿಮೆ ವೆಚ್ಚದ್ದಾಗಿದೆ.

ಈ ವಾರ್ಷಿಕ ಪಾಸ್ನ ವೆಚ್ಚ ಎಷ್ಟು? ಇದನ್ನು ಒಂದಕ್ಕಿಂತ ಹೆಚ್ಚು ಟೋಲ್ ಪ್ಲಾಝಾಗಳಲ್ಲಿ ಬಳಸಬಹುದೇ? ಇದನ್ನು ಬೇರೆಯವರಿಗೆ ವರ್ಗಾಯಿಸಬಹುದೇ ಹಾಗೂ ಇದರ ದರವನ್ನು ಪರಿಷ್ಕರಿಸಬಹುದೇ? ಸಂಪೂರ್ಣ ವಿವರ ಇಲ್ಲಿದೆ.

►ಹೊಸ ವ್ಯವಸ್ಥೆ

ಸ್ಥಳೀಯ ನಿವಾಸಿಗಳಿಗೆ ಪಾಸ್ ನೀಡುವ ಕಲ್ಪನೆ ಹೊಸದೇನಲ್ಲ. NHAI ಈ ಹಿಂದೆ ಮಾಸಿಕ ಡಿಜಿಟಲ್ ಸ್ಥಳೀಯ ಪಾಸ್ ಅನ್ನು ಪರಿಚಯಿಸಿತ್ತು. ಇದನ್ನು ಜುಲೈ 2026ರಲ್ಲಿ ದಿಲ್ಲಿಯ ಅರ್ಬನ್ ಎಕ್ಸ್ಟೆನ್ಶನ್ ರೋಡ್-IIನ ಮುಂಡ್ಕಾ-ಬಕ್ಕರ್ವಾಲಾ ಟೋಲ್ ಪ್ಲಾಝಾದಲ್ಲಿ ಮೊದಲ ಬಾರಿಗೆ ಜಾರಿಗೊಳಿಸಲಾಯಿತು.

ಈ ಡಿಜಿಟಲ್ ಪಾಸ್‌ ನಿಂದಾಗಿ ಭೌತಿಕ ದಾಖಲೆಗಳ ಸಲ್ಲಿಕೆ ಮತ್ತು ಪರಿಶೀಲನೆಯ ಅಗತ್ಯವಿಲ್ಲದಂತಾಯಿತು. ಕೆಲವೇ ನಿಮಿಷಗಳಲ್ಲಿ ಸಂಪೂರ್ಣ ಪ್ರಕ್ರಿಯೆಯನ್ನು ಆನ್‌ ಲೈನ್ನಲ್ಲೇ ಪೂರ್ಣಗೊಳಿಸಲು ಇದು ಅನುವು ಮಾಡಿಕೊಟ್ಟಿತು. ಈ ಹಿಂದೆ, ವಾಹನ ಸವಾರರು ಸ್ಥಳೀಯ ನಿವಾಸಿ ಎಂಬುದನ್ನು ಸಾಬೀತುಪಡಿಸಲು ದಾಖಲೆಗಳೊಂದಿಗೆ ಟೋಲ್ ಪ್ಲಾಝಾಗಳಿಗೆ ಖುದ್ದಾಗಿ ತೆರಳಬೇಕಿತ್ತು.

ಈಗ ಪರಿಚಯಿಸಲಾಗಿರುವ ವಾರ್ಷಿಕ ಸ್ಥಳೀಯ ಪಾಸ್‌ ನಿಂದ ಪ್ರತಿ ತಿಂಗಳು ಪಾಸ್ ನವೀಕರಣ ಮಾಡುವ ಗೊಂದಲ ತಪ್ಪಲಿದೆ. ರಾಷ್ಟ್ರೀಯ ಹೆದ್ದಾರಿ ಬಳಕೆದಾರರ ಶುಲ್ಕ ನಿಯಮಗಳ ಪ್ರಕಾರ, ಖಾಸಗಿ ವಾಹನಕ್ಕೆ ಮಾಸಿಕ ಪಾಸ್ ದರ 350 ರೂಪಾಯಿ ಆಗಿದೆ.

►ಸ್ಥಳೀಯ ವಾರ್ಷಿಕ ಪಾಸ್ ನ ದರ ಎಷ್ಟು?

ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ (MoRTH) ಅಕ್ಟೋಬರ್ 26ರ ಅಧಿಸೂಚನೆಯ ಪ್ರಕಾರ, ಟೋಲ್ ಪ್ಲಾಝಾ ಮುನಿಸಿಪಾಲಿಟಿ ಅಥವಾ ಸ್ಥಳೀಯ ನಗರ ಪ್ರದೇಶದ ಗಡಿಯಿಂದ ಹೊರಗಿದ್ದರೆ ವಾರ್ಷಿಕ ರಿಯಾಯಿತಿ ಪಾಸ್ ದರ 1,500 ರೂಪಾಯಿ ಆಗಿರುತ್ತದೆ.

ಒಂದು ವೇಳೆ ಟೋಲ್ ಪ್ಲಾಝಾ ಮುನಿಸಿಪಾಲಿಟಿ ಅಥವಾ ಸ್ಥಳೀಯ ನಗರ ಪ್ರದೇಶದ ಗಡಿಯ ಒಳಗಿದ್ದರೆ, ವಾರ್ಷಿಕ ಪಾಸ್ ದರ 3,000 ರೂಪಾಯಿ ಆಗಲಿದೆ. ಅಂದರೆ, ದಿಲ್ಲಿ-ಎನ್ಸಿಆರ್ ಮತ್ತು ಇತರ ಮೆಟ್ರೋ ನಗರಗಳ ಸುತ್ತಮುತ್ತಲಿನ ಟೋಲ್ ಪ್ಲಾಝಾಗಳಿಗೆ ಸ್ಥಳೀಯ ವಾರ್ಷಿಕ ಪಾಸ್ ದರ 3,000 ರೂಪಾಯಿ ಇರಲಿದೆ.

ಟೋಲ್ ಪ್ಲಾಝಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿರುವ ನಿವಾಸಿಗಳು ಪ್ರಸ್ತುತ ಇರುವ ಮಾಸಿಕ ಪಾಸ್ ಅಥವಾ ಹೊಸ ವಾರ್ಷಿಕ ಪಾಸ್ ಗಳಲ್ಲಿ ಒಂದನ್ನು ಆಯ್ಕೆ ಮಾಡಿಕೊಳ್ಳಬಹುದು. ದೀರ್ಘಾವಧಿಯ ಬಳಕೆಗೆ ವಾರ್ಷಿಕ ಪಾಸ್ ಅತ್ಯಂತ ಲಾಭದಾಯಕವಾಗಿದೆ.

ಕ್ಲೋಸ್ಡ್ ಯೂಸರ್ ಫೀ ಕಲೆಕ್ಷನ್ ಸಿಸ್ಟಂ ಹೊಂದಿರುವ ರಾಷ್ಟ್ರೀಯ ಹೆದ್ದಾರಿಗಳು ಅಥವಾ ಎಕ್ಸ್ಪ್ರೆಸ್ ವೇ ಗಳಲ್ಲಿ ಈ ಸ್ಥಳೀಯ ರಿಯಾಯಿತಿ ಪಾಸ್ ಅನ್ವಯಿಸುವುದಿಲ್ಲ ಎಂದು ಅಧಿಸೂಚನೆಯಲ್ಲಿ ಸ್ಪಷ್ಟಪಡಿಸಲಾಗಿದೆ.

ಸರ್ವಿಸ್ ರಸ್ತೆ ಅಥವಾ ಪರ್ಯಾಯ ರಸ್ತೆ ಸೌಲಭ್ಯವಿರುವ ಸ್ಥಳಗಳಲ್ಲೂ ಈ ಪಾಸ್ ನೀಡಲಾಗುವುದಿಲ್ಲ.

►ಹೊಸ ಟೋಲ್ ಪಾಸ್ ಗೆ ಯಾರು ಅರ್ಹರು?

ಪರಿಷ್ಕೃತ ನಿಯಮಗಳ ಪ್ರಕಾರ, ರಾಷ್ಟ್ರೀಯ ಹೆದ್ದಾರಿ ಟೋಲ್ ಪ್ಲಾಝಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸಿಸುವ ಖಾಸಗಿ ವಾಹನ ಮಾಲೀಕರು ಈ ರಿಯಾಯಿತಿ ವಾರ್ಷಿಕ ಪಾಸ್ಗೆ ಅರ್ಜಿ ಸಲ್ಲಿಸಬಹುದು.

ಸಕ್ರಿಯ ಹಾಗೂ ಚಾಲ್ತಿಯಲ್ಲಿರುವ ಫಾಸ್ಟ್ಯಾಗ್ (FASTag) ಹೊಂದಿರುವ ಖಾಸಗಿ ವಾಹನಗಳಿಗೆ ಮಾತ್ರ ಈ ಸೌಲಭ್ಯ ಸಿಗಲಿದೆ. ಇದರೊಂದಿಗೆ ವಾಹನ ಮಾಲೀಕರು ಅಧಿಸೂಚನೆಯಲ್ಲಿ ತಿಳಿಸಲಾದ ಇತರ ಷರತ್ತುಗಳನ್ನು ಪೂರೈಸುವುದು ಕಡ್ಡಾಯವಾಗಿದೆ.

ಈ ಪಾಸ್ ಅನ್ನು ಯಾವ ಟೋಲ್ ಪ್ಲಾಝಾಕ್ಕಾಗಿ ನೀಡಲಾಗುತ್ತದೆಯೋ ಆ ನಿರ್ದಿಷ್ಟ ಟೋಲ್ ಪ್ಲಾಝಾದಲ್ಲಿ ಮಾತ್ರ ಬಳಸಬಹುದು.

►ಎಷ್ಟು ಟೋಲ್ ಪ್ಲಾಝಾಗಳಿಗೆ ಇದು ಅನ್ವಯಿಸುತ್ತದೆ?

ಸ್ಥಳೀಯ ವಾರ್ಷಿಕ ಪಾಸ್ ಅನ್ನು ಯಾವ ಟೋಲ್ ಪ್ಲಾಝಾಕ್ಕಾಗಿ ನೀಡಲಾಗುತ್ತದೆಯೋ ಆ ನಿರ್ದಿಷ್ಟ ಟೋಲ್ ಪ್ಲಾಝಾಕ್ಕೆ ಮಾತ್ರ ಬಳಸಬಹುದು. ಈ ಪಾಸ್ ಅನ್ನು ಬೇರೆಯವರಿಗೆ ವರ್ಗಾಯಿಸಲು ಅಥವಾ ಇತರ ಟೋಲ್ ಪ್ಲಾಝಾಗಳಲ್ಲಿ ಬಳಸಲು ಅವಕಾಶವಿಲ್ಲ. ಅರ್ಹ ಟೋಲ್ ಪ್ಲಾಝಾಗಳ ಪಟ್ಟಿ ನವೆಂಬರ್ 1ರಿಂದ 'ರಾಜಮಾರ್ಗಯಾತ್ರಾ' ಆ್ಯಪ್ನಲ್ಲಿ ಲಭ್ಯವಾಗಲಿದ್ದು, ಸಾರ್ವಜನಿಕರು ಅಲ್ಲಿಂದಲೇ ಪಾಸ್ ಖರೀದಿಸಬಹುದು.

ಪರಿಶೀಲನೆಗಾಗಿ ಈ ವ್ಯವಸ್ಥೆಯನ್ನು 'ಡಿಜಿಲಾಕರ್' (DigiLocker) ಮತ್ತು 'ವಾಹನ್' (VAHAN) ಸಾಫ್ಟ್ವೇರ್ಗೆ ಲಿಂಕ್ ಮಾಡಲಾಗಿದೆ. ಇದು ವಾಹನ ಚಾಲಕರ ವಿಳಾಸ, 20 ಕಿ.ಮೀ ವ್ಯಾಪ್ತಿಯ ನಿಯಮ, ವಾಹನದ ವಿವರಗಳು ಹಾಗೂ ಲಿಂಕ್ ಆಗಿರುವ ಫಾಸ್ಟ್ಯಾಗ್ (FASTag) ಅನ್ನು ಸ್ವಯಂಚಾಲಿತವಾಗಿ ಪರಿಶೀಲಿಸುತ್ತದೆ.

►ಪಾಸ್ ದರ ಪರಿಷ್ಕರಣೆಯಾಗುತ್ತದೆಯೇ?

ಹೌದು, ಕೇಂದ್ರ ಸರ್ಕಾರವು ಪ್ರತಿ ವರ್ಷ ಎಪ್ರಿಲ್ 1ರಿಂದ ಜಾರಿಗೆ ಬರುವಂತೆ ಪಾಸ್ ದರಗಳನ್ನು ಪರಿಷ್ಕರಿಸಬಹುದು. ರಾಷ್ಟ್ರೀಯ ಹೆದ್ದಾರಿಗಳ ಕಾಯ್ದೆ, 1956ರ ಅಡಿಯಲ್ಲಿ 'ರಾಷ್ಟ್ರೀಯ ಹೆದ್ದಾರಿಗಳ ಶುಲ್ಕ (ದರ ನಿರ್ಧಾರ ಮತ್ತು ಸಂಗ್ರಹಣೆ) (ಐದನೇ ತಿದ್ದುಪಡಿ) ನಿಯಮಗಳು, 2026' ಮೂಲಕ ಈ ತಿದ್ದುಪಡಿಯನ್ನು ತರಲಾಗಿದೆ.

ಪ್ರಸ್ತುತ ದೇಶಾದ್ಯಂತ 13 ಕೋಟಿಗೂ ಹೆಚ್ಚು ಫಾಸ್ಟ್ಯಾಗ್ಗಳನ್ನು ನೀಡಲಾಗಿದ್ದು, ಸ್ಥಳೀಯರಿಗೆ ಪಾಸ್ ಪಡೆಯುವ ಪ್ರಕ್ರಿಯೆಯನ್ನು ಸುಲಭಗೊಳಿಸುವುದು ಈ ಹೊಸ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

►ವಾಹನ ಮಾಲೀಕರು ತಿಳಿದುಕೊಳ್ಳಬೇಕಾದ ಅಂಶಗಳು

ಸಮೀಪದ ರಾಷ್ಟ್ರೀಯ ಹೆದ್ದಾರಿ ಟೋಲ್ ಪ್ಲಾಝಾಗಳ ಮೂಲಕ ನಿಯಮಿತವಾಗಿ ಪ್ರಯಾಣಿಸುವ ನಿವಾಸಿಗಳು ತಮ್ಮ ವಾಹನಗಳು ಮತ್ತು ಸಂಬಂಧಿತ ಟೋಲ್ ಪ್ಲಾಝಾಗಳು ಈ ಅರ್ಹತಾ ಮಾನದಂಡಗಳನ್ನು ಪೂರೈಸುತ್ತವೆಯೇ ಎಂಬುದನ್ನು ಪರಿಶೀಲಿಸಿಕೊಳ್ಳಬೇಕು.

ಖಾಸಗಿ ಬಳಕೆಗೆ ನೋಂದಾಯಿಸಲಾದ ಸಕ್ರಿಯ ಫಾಸ್ಟ್ಯಾಗ್ ಹೊಂದಿರುವುದು ಈ ಹೊಸ ನಿಯಮಗಳ ಅಡಿಯಲ್ಲಿ ಪ್ರಮುಖ ಅಗತ್ಯವಾಗಿದೆ.

ಈ ವಾರ್ಷಿಕ ಪಾಸ್ ನಿರ್ದಿಷ್ಟ ಟೋಲ್ ಪ್ಲಾಝಾಗೆ ಮಾತ್ರ ಅನ್ವಯಿಸುತ್ತದೆಯೇ ಹೊರತು, ದೇಶಾದ್ಯಂತ ಇರುವ ಎಲ್ಲಾ ಟೋಲ್ ಪ್ಲಾಝಾಗಳಿಗೆ ಇದು ಅನ್ವಯಿಸುವುದಿಲ್ಲ.

ನಿಗದಿತ ಷರತ್ತುಗಳೊಂದಿಗೆ ಅರ್ಹ ಸ್ಥಳೀಯ ವಾಹನ ಮಾಲೀಕರಿಗೆ ರಿಯಾಯಿತಿ ದರದ ವಾರ್ಷಿಕ ಟೋಲ್ ಪಾಸ್ ಆಯ್ಕೆಯನ್ನು ನೀಡುವ ಈ ನೂತನ ನಿಯಮಗಳು 2026ರ ನವೆಂಬರ್ 1ರಿಂದ ಜಾರಿಗೆ ಬರಲಿವೆ.