ಪಿಲಿಭಿಟ್ ಮಾದರಿಯ ಮತದಾರರ ಪಟ್ಟಿ ಅಕ್ರಮಗಳು ಉತ್ತರ ಪ್ರದೇಶದ ಚುನಾವಣಾ ಫಲಿತಾಂಶ ಬದಲಾಯಿಸಬಲ್ಲವೇ?

ಉತ್ತರ ಪ್ರದೇಶದ ಪಿಲಿಭಿತ್ ವಿಧಾನಸಭಾ ಕ್ಷೇತ್ರದ ಮತದಾರರ ಪಟ್ಟಿಯಲ್ಲಿ 10,470 ಹೆಸರುಗಳ ಅಕ್ರಮ ನಡೆದಿರುವುದನ್ನು ಅಧಿಕೃತವಾಗಿ ಒಪ್ಪಿಕೊಳ್ಳಲಾಗಿದೆ. ಇದರೊಂದಿಗೆ ಅಝಂಗಢದಲ್ಲಿ 'ವಿಕಾಸ್ ಯಾದವ್' ಎಂಬ ಒಂದೇ ಹೆಸರಿನ 13 ಪ್ರತ್ಯೇಕ ದಾಖಲೆಗಳು ಪತ್ತೆಯಾಗಿವೆ. ಬರುವ ವರ್ಷದ ಆರಂಭದಲ್ಲಿ ರಾಜ್ಯದಲ್ಲಿ ಚುನಾವಣೆ ನಡೆಯಲಿದ್ದು, ಈ ಬೆಳವಣಿಗೆಯಿಂದಾಗಿ ಉತ್ತರ ಪ್ರದೇಶದ ಇತರ ಕ್ಷೇತ್ರಗಳ ಮತದಾರರ ಪಟ್ಟಿಯಲ್ಲೂ ಇಂತಹ ದೋಷಗಳು ಇವೆಯೇ ಎಂಬ ಗಂಭೀರ ಪ್ರಶ್ನೆಗಳು ಎದ್ದಿವೆ.

ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆ ಮುಗಿದ ನಂತರವೂ ಪಿಲಿಭಿತ್ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಭಾರೀ ಪ್ರಮಾಣದ ನಕಲಿ ಮತದಾರರಿದ್ದಾರೆ ಎಂದು ಪ್ರತಿಪಕ್ಷ ಸಮಾಜವಾದಿ ಪಾರ್ಟಿ ಈ ಹಿಂದೆ ತೋರಿಸಿತ್ತು. 13,000ಕ್ಕೂ ಹೆಚ್ಚು ನಕಲಿ ಮತದಾರರಿದ್ದಾರೆ ಎಂದು ಎಸ್ಪಿ ಆರೋಪಿಸಿದ್ದು, ತನಿಖೆಯ ನಂತರ 10,000ಕ್ಕೂ ಹೆಚ್ಚು ದಾಖಲೆಗಳಲ್ಲಿ ದೋಷವಿರುವುದು ದೃಢಪಟ್ಟಿದೆ.

ಉತ್ತರ ಪ್ರದೇಶದ ಮುಖ್ಯ ಚುನಾವಣಾಧಿಕಾರಿಗೆ (CEO) ಎಸ್ಪಿ ಇತ್ತೀಚೆಗೆ 100 ಕ್ಷೇತ್ರಗಳ ಪಟ್ಟಿಯನ್ನು ಸಲ್ಲಿಸಿದ್ದು, ಮತದಾರರ ಪಟ್ಟಿಯಲ್ಲಿ ಲಕ್ಷಾಂತರ ನಕಲಿ ಹೆಸರುಗಳನ್ನು ಪತ್ತೆಹಚ್ಚಿರುವುದಾಗಿ ತಿಳಿಸಿದೆ. ಬೇರೆ ಬೇರೆ ಎಪಿಕ್ (EPIC) ಸಂಖ್ಯೆಗಳನ್ನು ಹೊಂದಿರುವ ಸಾವಿರಾರು ಮತದಾರರು ಎರಡು, ಮೂರು ಅಥವಾ ಐದು ಬಾರಿ ಬೇರೆ ಬೇರೆ ಮತಗಟ್ಟೆಗಳಲ್ಲಿ ನೋಂದಾಯಿಸಿಕೊಂಡಿರುವುದನ್ನು ಪತ್ತೆಮಾಡಿರುವುದಾಗಿ ಪಕ್ಷ ಸ್ಪಷ್ಟಪಡಿಸಿದೆ.

ಮತ್ತೊಂದೆಡೆ, ರಾಜ್ಯಾದ್ಯಂತ ಮತದಾರರ ಪಟ್ಟಿಯನ್ನು ಶುದ್ಧೀಕರಿಸುವ ಕೆಲಸವನ್ನು ಸಕ್ರಿಯವಾಗಿ ನಡೆಸಲಾಗುತ್ತಿದೆ ಎಂದು ಚುನಾವಣಾ ಆಯೋಗ ತಿಳಿಸಿದೆ.

ಚುನಾವಣಾ ಪಟ್ಟಿಯಲ್ಲಿನ ಭಾರೀ ಗೊಂದಲಗಳು ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆ ಹಾಗೂ ಮತದಾರರ ಹಕ್ಕುಗಳ ಸಮಗ್ರತೆಯ ಕುರಿತು ವ್ಯಾಪಕ ಕಳವಳಗಳನ್ನು ಹುಟ್ಟುಹಾಕಿವೆ. ಇಷ್ಟೇ ಅಲ್ಲದೆ, ಇವು ಅಭ್ಯರ್ಥಿಗಳು ಮತ್ತು ರಾಜಕೀಯ ಪಕ್ಷಗಳ ತಕ್ಷಣದ ರಾಜಕೀಯ ಭವಿಷ್ಯದ ಮೇಲೆಯೂ ನೇರ ಪರಿಣಾಮ ಬೀರುತ್ತವೆ. ಉತ್ತರ ಪ್ರದೇಶದಲ್ಲಿ ಗೆಲುವು ಮತ್ತು ಸೋಲಿನ ನಡುವಿನ ಅಂತರವು ಅತ್ಯಂತ ಕನಿಷ್ಠವಾಗಿರುವುದರಿಂದ, ಪಿಲಿಭಿತ್ ಮಾದರಿಯ ನಕಲಿ ಮತದಾರರ ಸಂಖ್ಯೆಯ ಏರಿಳಿತವು ತೀವ್ರ ಪೈಪೋಟಿ ಇರುವ ಕ್ಷೇತ್ರದ ಚುನಾವಣಾ ಫಲಿತಾಂಶವನ್ನೇ ಬದಲಾಯಿಸಬಲ್ಲದು.

ಸರಳವಾಗಿ ಹೇಳುವುದಾದರೆ, ಕಳೆದ ಎರಡು ಚುನಾವಣೆಗಳಲ್ಲಿ ಬಿಜೆಪಿ ಪಿಲಿಭಿತ್ ವಿಧಾನಸಭಾ ಕ್ಷೇತ್ರವನ್ನು ಕೇವಲ 6,970 ಮತಗಳ ಕನಿಷ್ಠ ಅಂತರದಿಂದ ಗೆದ್ದುಕೊಂಡಿತ್ತು. 2017ರ ಚುನಾವಣೆಯಲ್ಲಿ ಬಿಜೆಪಿ 43,000ಕ್ಕೂ ಹೆಚ್ಚು ಮತಗಳ ಬೃಹತ್ ಅಂತರದಿಂದ ಈ ಕ್ಷೇತ್ರವನ್ನು ತನ್ನದಾಗಿಸಿಕೊಂಡಿತ್ತು. ದುರ್ಬಳಕೆ ಮಾಡಲಾದ ಮತದಾರರ ವಿವರಗಳಲ್ಲಿ ಹೆಚ್ಚಿನವರು ಮುಸ್ಲಿಂ ಸಮುದಾಯಕ್ಕೆ ಸೇರಿದವರಾಗಿದ್ದು, ಅವರು ಸಾಂಪ್ರದಾಯಿಕವಾಗಿ ಬಿಜೆಪಿಗೆ ಮತ ಹಾಕದವರಾಗಿದ್ದಾರೆ ಎಂದು ಕಾಂಗ್ರೆಸ್ ಮತ್ತು ಎಸ್ಪಿ ಎರಡೂ ಪಕ್ಷಗಳು ಆರೋಪಿಸಿವೆ.

'ದಿ ವೈರ್' ನಡೆಸಿದ ವಿಶ್ಲೇಷಣೆಯ ಪ್ರಕಾರ, ಎಸ್ಪಿ ಪಟ್ಟಿ ಮಾಡಿದ 100 ಕ್ಷೇತ್ರಗಳ ಪೈಕಿ 43 ಕ್ಷೇತ್ರಗಳಲ್ಲಿ 2022ರ ಚುನಾವಣೆಯಲ್ಲಿ ಪಕ್ಷವು ಅತ್ಯಲ್ಪ ಅಂತರದಿಂದ ಸೋತಿದೆ ಅಥವಾ ಗೆದ್ದಿದೆ. ಅಂದರೆ, ಇವುಗಳಲ್ಲಿ ಹೆಚ್ಚಿನವು ಕಠಿಣ ಸ್ಪರ್ಧೆಯ ಕಣಗಳಾಗಿದ್ದು, ರಾಜಕೀಯ ಭವಿಷ್ಯವು ಯಾವುದೇ ಕಡೆಗೆ ಬದಲಾಗಬಹುದು.

2022ರ ವಿಧಾನಸಭಾ ಚುನಾವಣೆಯಲ್ಲಿ 403 ಸದಸ್ಯಬಲದ ಸದನದಲ್ಲಿ ಬಿಜೆಪಿ ನೇತೃತ್ವದ ಮೈತ್ರಿಕೂಟ 273 ಸ್ಥಾನಗಳನ್ನು ಗೆದ್ದುಕೊಂಡರೆ, ಎಸ್ಪಿ ಮತ್ತು ಅದರ ಮಿತ್ರಪಕ್ಷಗಳು 125 ಸ್ಥಾನಗಳನ್ನು ಗೆದ್ದು ಬಹುಮತದ ಗಡಿಯಿಂದ ಸುಮಾರು 80 ಸ್ಥಾನಗಳ ಹಿನ್ನಡೆ ಕಂಡಿದ್ದವು.

ಮಾರ್ಚ್ 2027ರಲ್ಲಿ ನಡೆಯಲಿರುವ ಚುನಾವಣೆಗೆ ಇನ್ನು ಕೆಲವು ತಿಂಗಳು ಬಾಕಿ ಇರುವಂತೆ, ಆಡಳಿತಾರೂಢ ಬಿಜೆಪಿ ಮೈತ್ರಿಕೂಟವು 288 ಶಾಸಕರ ಬಲವನ್ನು ಹೊಂದಿದೆ. ಆದರೆ, ಅರ್ಧ ಡಜನ್ ಎಸ್ಪಿ ಶಾಸಕರು ಆಡಳಿತ ಪಕ್ಷದೊಂದಿಗೆ ಗುರುತಿಸಿಕೊಂಡಿರುವುದರಿಂದ ಸರ್ಕಾರದ ನೈಜ ಸಂಖ್ಯಾಬಲ ಇನ್ನೂ ಹೆಚ್ಚಾಗಿದೆ. ಕೌಶಂಬಿಯ ಚೈಲ್ ಕ್ಷೇತ್ರದ ಶಾಸಕಿ ಪೂಜಾ ಪಾಲ್ ಅವರು ದಾಖಲೆಗಳಲ್ಲಿ ಎಸ್ಪಿ ಶಾಸಕಿಯಾಗಿದ್ದರೂ, ಬಿಜೆಪಿ ಯುಪಿ ಘಟಕದ ಉಪಾಧ್ಯಕ್ಷೆಯಾಗಿ ಕಾರ್ಯನಿರ್ವಹಿಸುತ್ತಿರುವುದು ಇದಕ್ಕೆ ಸೂಕ್ತ ಉದಾಹರಣೆಯಾಗಿದೆ.

ರಾಜ್ಯದಲ್ಲಿ 'ಇಂಡಿಯಾ' (INDIA) ಒಕ್ಕೂಟದ ಭಾಗವಾಗಿರುವ ಎಸ್ಪಿ ಮತ್ತು ಕಾಂಗ್ರೆಸ್ ಜಂಟಿಯಾಗಿ 103 ಸ್ಥಾನಗಳ ಬಲವನ್ನು ಹೊಂದಿದ್ದು, ಅದರಲ್ಲಿ 101 ಶಾಸಕರು ಎಸ್ಪಿಗೆ ಸೇರಿದವರಾಗಿದ್ದಾರೆ. ಪ್ರಸ್ತುತ ಏಳು ಸ್ಥಾನಗಳು ಖಾಲಿಯಿದ್ದು, ಇವುಗಳಲ್ಲಿ ಬಿಜೆಪಿ ಮತ್ತು ಎಸ್ಪಿ ತಲಾ ಮೂರು ಹಾಗೂ ಬಹುಜನ ಸಮಾಜ ಪಾರ್ಟಿ (ಬಿಎಸ್ಪಿ) ಒಂದು ಸ್ಥಾನವನ್ನು ಹೊಂದಿದ್ದವು. 2027ರ ಮಾರ್ಚ್ ನಲ್ಲಿ ಎಸ್ಪಿ ಅಧ್ಯಕ್ಷ ಅಖಿಲೇಶ್ ಯಾದವ್ ಅವರು ಮುಖ್ಯಮಂತ್ರಿ ಆದಿತ್ಯನಾಥ್ ಅವರನ್ನು ಅಧಿಕಾರದಿಂದ ಕೆಳಗಿಳಿಸಲು, ಎಸ್ಪಿ ಮತ್ತು ಅದರ ಮಿತ್ರಪಕ್ಷಗಳು 202 ಸ್ಥಾನಗಳ ಮ್ಯಾಜಿಕ್ ಸಂಖ್ಯೆಯನ್ನು ತಲುಪುವ ನಿಟ್ಟಿನಲ್ಲಿ ವಿಧಾನಸಭೆಯಲ್ಲಿ ತಮ್ಮ ಪ್ರಸ್ತುತ ಸಂಖ್ಯಾಬಲವನ್ನು ದುಪ್ಪಟ್ಟುಗೊಳಿಸಬೇಕಾಗಿದೆ.

100 ಕ್ಷೇತ್ರಗಳಲ್ಲಿ ಪತ್ತೆಯಾಗಿರುವ ಸಾವಿರಾರು ನಕಲಿ ದಾಖಲೆಗಳನ್ನು ಸಮಗ್ರವಾಗಿ ಪರಿಶೀಲಿಸಬೇಕು ಮತ್ತು ನೋಂದಾಯಿತ ವಿಳಾಸದಲ್ಲಿ ಖಾಯಂ ಆಗಿ ವಾಸಿಸದ ವ್ಯಕ್ತಿಗಳ ಹೆಸರುಗಳನ್ನು ತೆಗೆದುಹಾಕಬೇಕು ಎಂದು ಕೋರಿ ಎಸ್ಪಿ ಉತ್ತರ ಪ್ರದೇಶದ ಮುಖ್ಯ ಚುನಾವಣಾಧಿಕಾರಿಗೆ ದೂರುಗಳನ್ನು ಸಲ್ಲಿಸಿದೆ.

"2027ರ ಸಾರ್ವತ್ರಿಕ ವಿಧಾನಸಭಾ ಚುನಾವಣೆಗಳು ಪಾರದರ್ಶಕವಾಗಿ ನಡೆಯುವುದನ್ನು ಖಚಿತಪಡಿಸಿಕೊಳ್ಳಲು, ರಾಜ್ಯದ ಎಲ್ಲಾ 403 ವಿಧಾನಸಭಾ ಕ್ಷೇತ್ರಗಳ ಪ್ರತಿಯೊಂದು ಮತಗಟ್ಟೆಯಲ್ಲಿರುವ ಎಲ್ಲಾ ನಕಲಿ ಹೆಸರುಗಳನ್ನು ತನಿಖೆ ಮಾಡಿ ತೆಗೆದುಹಾಕುವುದು ಅತ್ಯಗತ್ಯ. ಇದು ಪಾರದರ್ಶಕ, ನ್ಯಾಯಸಮ್ಮತ, ಮುಕ್ತ ಮತ್ತು ಭಯರಹಿತ ಚುನಾವಣಾ ಪ್ರಕ್ರಿಯೆಗೆ ಅನುವು ಮಾಡಿಕೊಡುತ್ತದೆ" ಎಂದು ಎಸ್ಪಿ ಉತ್ತರ ಪ್ರದೇಶ ಘಟಕದ ಅಧ್ಯಕ್ಷ ಶ್ಯಾಮ್ ಲಾಲ್ ಪಾಲ್ ಅವರು ಅಕ್ಟೋಬರ್ 12ರಂದು ಸಲ್ಲಿಸಿದ ಮನವಿ ಪತ್ರದಲ್ಲಿ ತಿಳಿಸಿದ್ದಾರೆ.

ಎಸ್ಪಿ ಅಧಿಕೃತವಾಗಿ ಹೈಲೈಟ್ ಮಾಡಿರುವ 100 ಕ್ಷೇತ್ರಗಳ ಪೈಕಿ 74 ಕ್ಷೇತ್ರಗಳನ್ನು 2022ರಲ್ಲಿ ಬಿಜೆಪಿ, 25 ಕ್ಷೇತ್ರಗಳನ್ನು ಎಸ್ಪಿ ಮತ್ತು ಒಂದು ಕ್ಷೇತ್ರವನ್ನು ಬಿಎಸ್ಪಿ ಗೆದ್ದುಕೊಂಡಿದ್ದವು. ಎಸ್ಪಿ ಗೆದ್ದ 25 ಸ್ಥಾನಗಳಲ್ಲಿ 11 ಸ್ಥಾನಗಳನ್ನು 10,000ಕ್ಕಿಂತ ಕಡಿಮೆ ಮತಗಳ ಅಂತರದಿಂದ ಗೆಲ್ಲಲಾಗಿತ್ತು. ಇದರಲ್ಲಿ ಘಾಜಿಪುರ ಸದರ್, ಬಹೇರಿ (ಬರೇಲಿ) ಮತ್ತು ಭದೋಹಿ ಎಂಬ ಮೂರು ಕ್ಷೇತ್ರಗಳು ಸೇರಿದ್ದು, ಇಲ್ಲಿ ಗೆಲುವಿನ ಅಂತರ 5,000ಕ್ಕಿಂತ ಕಡಿಮೆಯಿತ್ತು. ಗಮನಾರ್ಹವಾಗಿ, ಘಾಜಿಪುರ ಸದರ್ ಕ್ಷೇತ್ರವನ್ನು ಕೇವಲ 1,692 ಮತಗಳ ಅತ್ಯಲ್ಪ ಅಂತರದಿಂದ ಎಸ್ಪಿ ಗೆದ್ದುಕೊಂಡಿತ್ತು.

ಇದಲ್ಲದೆ, ಲಖನೌ ಸೆಂಟ್ರಲ್, ಬೈರಿಯಾ ಮತ್ತು ಸಿಕಂದರ್ಪುರ (ಕೊನೆಯ ಎರಡು ಬಲ್ಲಿಯಾ ಜಿಲ್ಲೆಯಲ್ಲಿವೆ) ಎಂಬ ಇತರ ಮೂರು ಸ್ಥಾನಗಳನ್ನು ಎಸ್ಪಿ 10,000ರಿಂದ 15,000 ಮತಗಳ ಅಂತರದಲ್ಲಿ ಗೆದ್ದುಕೊಂಡಿತ್ತು.

ಮತ್ತೊಂದೆಡೆ, ಎಸ್ಪಿ ಮೈತ್ರಿಕೂಟ ಸೋತ 75 ಸ್ಥಾನಗಳಲ್ಲಿ (ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳ ಕೈಯಲ್ಲಿ ಸೋತ 74 ಸ್ಥಾನಗಳು ಸೇರಿ), ಅಖಿಲೇಶ್ ಯಾದವ್ ಅವರ ಪಕ್ಷವು 23 ಸ್ಥಾನಗಳಲ್ಲಿ 10,000ಕ್ಕಿಂತ ಕಡಿಮೆ ಮತಗಳ ಅಂತರದಿಂದ ಸೋಲನುಭವಿಸಿತ್ತು. ಈ ಪೈಕಿ 11 ಸ್ಥಾನಗಳಲ್ಲಿ 5,000ಕ್ಕಿಂತ ಕಡಿಮೆ ಮತಗಳ ಅಂತರದಿಂದ ಹಿನ್ನಡೆ ಕಂಡಿತ್ತು.

ತೀವ್ರ ಪೈಪೋಟಿ ನಡೆದ ಈ 11 ಕ್ಷೇತ್ರಗಳಲ್ಲಿ ಮೂರು ಕ್ಷೇತ್ರಗಳು ಎಸ್ಪಿಯ ಸಾಂಪ್ರದಾಯಿಕ ಭದ್ರಕೋಟೆಗಳಾದ ಕನೌಜ್ ಮತ್ತು ಇಟಾವಾ ಜಿಲ್ಲೆಗಳಲ್ಲಿದ್ದವು (ಫಲಿತಾಂಶದ ಅಂತರ: ಛಿಬ್ರಾಮೌ 1,111 ಮತಗಳು, ತಿರ್ವಾ 4,608 ಮತಗಳು ಮತ್ತು ಇಟಾವಾ 3,984 ಮತಗಳು). ಇನ್ನೂ ಮೂರು ಕ್ಷೇತ್ರಗಳು ಎಸ್ಪಿಗೆ ಬಲವಿರುವ ಜೌನ್ಪುರ ಜಿಲ್ಲೆಯಲ್ಲಿದ್ದವು (ಬದ್ಲಾಪುರ 1,326 ಮತಗಳು, ಮರಿಯಾಹು 1,206 ಮತಗಳು ಮತ್ತು ಶಾಹಗಂಜ್ 719 ಮತಗಳು).

ಎಸ್ಪಿ ಇತರ ಐದು ಕ್ಷೇತ್ರಗಳನ್ನು 10,000ರಿಂದ 15,000 ಮತಗಳ ಅಂತರದಲ್ಲಿ ಕಳೆದುಕೊಂಡಿತ್ತು. ಬಿಜೆಪಿ ಪ್ರಸ್ತುತ ಹೊಂದಿರುವ ಅದೇ 74 ಸ್ಥಾನಗಳ ಪೈಕಿ, ಎಸ್ಪಿ 45 ಸ್ಥಾನಗಳಲ್ಲಿ 15,000ಕ್ಕೂ ಹೆಚ್ಚು ಮತಗಳ ಭಾರೀ ಅಂತರದಿಂದ ಸೋತಿದೆ ಎಂಬುದು ಇಲ್ಲಿ ಗಮನಿಸಬೇಕಾದ ವಿಷಯ.

ಉತ್ತರ ಪ್ರದೇಶದ ರಾಜಕೀಯ ವಾತಾವರಣದಲ್ಲಿ ಹಿಂದಿನ ಗೆಲುವಿನ ಅಂತರ ಅಥವಾ ಸೋಲಿನ ಹಿನ್ನಡೆಯು ಮುಂಬರುವ ಚುನಾವಣೆಯ ಯಶಸ್ಸು ಅಥವಾ ವೈಫಲ್ಯಕ್ಕೆ ಅಂತಿಮ ಖಾತರಿಯಲ್ಲ. ಹಿಂದಿನ ಫಲಿತಾಂಶಗಳು ಮುಂದಿನ ಚುನಾವಣೆಯಲ್ಲಿ ನೇರವಾಗಿ ಪುನರಾವರ್ತನೆಯಾಗುವುದಿಲ್ಲ. ಪ್ರಬಲ ಪೈಪೋಟಿ ಇರುವ ಅಥವಾ ಮತದಾರರ ಒಲವು ಬದಲಾಗುವ ಕ್ಷೇತ್ರಗಳ ಫಲಿತಾಂಶವನ್ನು ಬದಲಾಯಿಸಬಹುದು ಎಂದು ರಾಜಕೀಯ ಪಕ್ಷಗಳು ಬಲವಾಗಿ ನಂಬುತ್ತವೆ. ಅಭ್ಯರ್ಥಿಗಳ ಬದಲಾವಣೆ, ಪಕ್ಷದ ಜನಪ್ರಿಯತೆ, ಬದಲಾಗುವ ಜಾತಿ ಸಮೀಕರಣಗಳು ಮತ್ತು ಸರ್ಕಾರಿ ವಿರೋಧಿ ಅಲೆಯು ಈ ಬದಲಾವಣೆಗಳನ್ನು ನಿರ್ಧರಿಸುವ ಪ್ರಮುಖ ಅಂಶಗಳಾಗಿವೆ.

ರಾಜ್ಯದ ಹೆಚ್ಚಿನ ಚುನಾವಣಾ ಕಣಗಳು ಒಟ್ಟಾರೆ ಫಲಿತಾಂಶಗಳು ಸೂಚಿಸುವುದಕ್ಕಿಂತಲೂ ಅತ್ಯಂತ ನಿಕಟ ಪೈಪೋಟಿಯಿಂದ ಕೂಡಿರುತ್ತವೆ. ಕಳೆದ ವಿಧಾನಸಭಾ ಚುನಾವಣೆಯನ್ನೇ ಇದಕ್ಕೆ ಉದಾಹರಣೆಯಾಗಿ ತೆಗೆದುಕೊಳ್ಳಬಹುದು.

2022ರ ಚುನಾವಣೆಯಲ್ಲಿ ಎಲ್ಲಾ 403 ಸ್ಥಾನಗಳ ಸರಾಸರಿ ಗೆಲುವಿನ ಅಂತರವು 26,600 ಮತಗಳಿಗಿಂತ ತುಸು ಹೆಚ್ಚಾಗಿತ್ತು. 250ಕ್ಕೂ ಹೆಚ್ಚು ಸ್ಥಾನಗಳ ಫಲಿತಾಂಶವು ಆ ಸರಾಸರಿಗಿಂತ ಕಡಿಮೆ ಅಂತರದಲ್ಲಿ ನಿರ್ಧಾರವಾಗಿತ್ತು.

ಒಟ್ಟು 170 ಕ್ಷೇತ್ರಗಳ ಫಲಿತಾಂಶವು 15,000 ಅಥವಾ ಅದಕ್ಕಿಂತ ಕಡಿಮೆ ಮತಗಳ ಅಂತರದಲ್ಲಿ ನಿರ್ಧಾರವಾಗಿತ್ತು. ಇವುಗಳಲ್ಲಿ 86 ಸ್ಥಾನಗಳನ್ನು ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳು ಪಡೆದುಕೊಂಡಿದ್ದವು.

124 ಕ್ಷೇತ್ರಗಳಲ್ಲಿ ವಿಜೇತರ ಗೆಲುವಿನ ಅಂತರವು 10,000 ಮತಗಳಿಗಿಂತ ಕಡಿಮೆಯಿತ್ತು. ಇವುಗಳಲ್ಲಿ 68 ಸ್ಥಾನಗಳನ್ನು ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳು ಗೆದ್ದುಕೊಂಡಿದ್ದವು.

ಇಷ್ಟೇ ಅಲ್ಲದೆ, 53 ಕ್ಷೇತ್ರಗಳಲ್ಲಿ ವಿಜೇತರನ್ನು ಕೇವಲ 5,000ಕ್ಕಿಂತ ಕಡಿಮೆ ಮತಗಳ ಅಂತರದಿಂದ ನಿರ್ಧರಿಸಲಾಗಿತ್ತು.

ಮತ್ತೆ 29 ಕ್ಷೇತ್ರಗಳಲ್ಲಿ 2,000ಕ್ಕಿಂತ ಕಡಿಮೆ ಮತಗಳ ಅಂತರದಲ್ಲಿ ಗೆಲುವು ದಾಖಲಾಗಿದ್ದು, ಅವುಗಳಲ್ಲಿ 18 ಕ್ಷೇತ್ರಗಳು ಬಿಜೆಪಿ ಮತ್ತು ಅದರ ಒಕ್ಕೂಟದ ಪಾಲಾಗಿದ್ದವು.

15 ಕ್ಷೇತ್ರಗಳ ಫಲಿತಾಂಶವು ಕೇವಲ 1,000ಕ್ಕಿಂತ ಕಡಿಮೆ ಮತಗಳ ಅತ್ಯಲ್ಪ ಅಂತರದಲ್ಲಿ ನಿರ್ಧಾರವಾಗಿತ್ತು.

ಚುನಾವಣಾ ಪಟ್ಟಿಯ ಮತ್ತೊಂದು ಮಗ್ಗಲನ್ನು ಗಮನಿಸುವುದಾದರೆ, ರಾಜ್ಯಾದ್ಯಂತ ಕೇವಲ 50 ಕ್ಷೇತ್ರಗಳಲ್ಲಿ ಮಾತ್ರ ಗೆಲುವಿನ ಅಂತರವು 50,000 ಮತಗಳಿಗಿಂತ ಹೆಚ್ಚಾಗಿತ್ತು. ಇವುಗಳಲ್ಲಿ ಸಿಂಹಪಾಲು, ಅಂದರೆ 45 ಸ್ಥಾನಗಳನ್ನು ಬಿಜೆಪಿ ಮತ್ತು ಅದರ ಮಿತ್ರಪಕ್ಷಗಳು ವಶಪಡಿಸಿಕೊಂಡಿದ್ದವು.

ಚುನಾವಣಾ ವಿಶ್ಲೇಷಣಾ ಸಂಸ್ಥೆ 'ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್' (ADR) ಪ್ರಕಟಿಸಿದ ವರದಿಯ ಪ್ರಕಾರ, 2022ರಲ್ಲಿ ಒಟ್ಟು 403 ಕ್ಷೇತ್ರಗಳ ಪೈಕಿ ಕೇವಲ ಎಂಟು ಕ್ಷೇತ್ರಗಳಲ್ಲಿ ಶೇಕಡಾ 40ಕ್ಕಿಂತ ಹೆಚ್ಚಿನ ಗೆಲುವಿನ ಅಂತರ ದಾಖಲಾಗಿತ್ತು. ಈ ಎಲ್ಲಾ ವಿಜೇತರು ಬಿಜೆಪಿ ಪಕ್ಷಕ್ಕೆ ಸೇರಿದವರಾಗಿದ್ದರು. ಗೊರಖ್ಪುರ ಅರ್ಬನ್ ಕ್ಷೇತ್ರದಲ್ಲಿ 1.03 ಲಕ್ಷ ಮತಗಳ ಬೃಹತ್ ಅಂತರದಿಂದ ಗೆದ್ದ ಮುಖ್ಯಮಂತ್ರಿ ಆದಿತ್ಯನಾಥ್ ಅವರು ಇದರಲ್ಲಿ ಸೇರಿದ್ದಾರೆ.

ಇಂಥದ್ದೇ ಮಾದರಿಯು 2017ರ ಚುನಾವಣೆಯಲ್ಲೂ ದಾಖಲಾಗಿತ್ತು. ಆ ಚುನಾವಣೆಯಲ್ಲಿ ಸುಮಾರು 115 ಕ್ಷೇತ್ರಗಳಲ್ಲಿ ಸೋಲು-ಗೆಲುವಿನ ಅಂತರವು 15,000 ಮತಗಳಿಗಿಂತ ಕಡಿಮೆಯಿತ್ತು.

ಎಸ್ಪಿ ಮಾಡಿರುವ ಬೃಹತ್ ಪ್ರಮಾಣದ ನಕಲಿ ಮತದಾರರ ಆರೋಪಗಳು ಈ 100 ಕ್ಷೇತ್ರಗಳಿಗಷ್ಟೇ ಸೀಮಿತವಾಗಿಲ್ಲ. ಅಕ್ಟೋಬರ್ 20ರಂದು, ಬಸ್ತಿ ಜಿಲ್ಲೆಯ ಬಸ್ತಿ ಸದರ್, ಮಹಾದೇವ, ರುಧೌಲಿ ಮತ್ತು ಹರೈಯಾ ಎಂಬ ನಾಲ್ಕು ವಿಧಾನಸಭಾ ಕ್ಷೇತ್ರಗಳ ಮತದಾರರ ಪಟ್ಟಿಯಲ್ಲಿ ಭಾರೀ ಸಂಖ್ಯೆಯ ನಕಲಿ ದಾಖಲೆಗಳನ್ನು ಪತ್ತೆಹಚ್ಚಿರುವುದಾಗಿ ಎಸ್ಪಿ ಹೇಳಿದೆ. ಉದಾಹರಣೆಗೆ, ರುಧೌಲಿ ಕ್ಷೇತ್ರದಲ್ಲಿ 30 ವರ್ಷದ ಸಂಜು ಎಂಬ ಮತದಾರರು 419 ಮತ್ತು 422ನೇ ಮತಗಟ್ಟೆಗಳಲ್ಲಿ ಸತತ ಐದು ಬಾರಿ ನೋಂದಾಯಿಸಲ್ಪಟ್ಟಿರುವುದು (ಕ್ರಮ ಸಂಖ್ಯೆ 959, 597, 1,025, 1,027 ಮತ್ತು 1,028) ಕಂಡುಬಂದಿದೆ. ಪ್ರತಿಯೊಂದು ದಾಖಲೆಯೂ ಬೇರೆ ಬೇರೆ ಎಪಿಕ್ (EPIC) ಸಂಖ್ಯೆಯನ್ನು ಹೊಂದಿದೆ.

ಇದೇ ರೀತಿ, ಹರೈಯಾ ಕ್ಷೇತ್ರದಲ್ಲಿ 19 ವರ್ಷದ ಸೂರಜ್ ನಿಶಾದ್ ಎಂಬ ಮತದಾರರು ಮತಗಟ್ಟೆ ಸಂಖ್ಯೆ 219ರಲ್ಲಿ ಪ್ರತ್ಯೇಕ ಎಪಿಕ್ ಸಂಖ್ಯೆಗಳೊಂದಿಗೆ ಮೂರು ಬಾರಿ ನೋಂದಾಯಿಸಲ್ಪಟ್ಟಿರುವುದು (ಕ್ರಮ ಸಂಖ್ಯೆ 597, 605 ಮತ್ತು 624) ಕಂಡುಬಂದಿದೆ.

2027ರ ವಿಧಾನಸಭಾ ಚುನಾವಣೆಯ ತಯಾರಿಯಾಗಿ ಮತದಾರರ ಪಟ್ಟಿಯನ್ನು ಸಮಗ್ರವಾಗಿ ಪರಿಶೀಲಿಸಿ ನಿಖರಗೊಳಿಸಬೇಕು ಎಂದು ಎಸ್ಪಿ ರಾಜ್ಯ ಅಧ್ಯಕ್ಷ ಶ್ಯಾಮ್ ಲಾಲ್ ಪಾಲ್ ಅವರು ಮುಖ್ಯ ಚುನಾವಣಾಧಿಕಾರಿಗೆ ಸಲ್ಲಿಸಿದ ಮನವಿಯಲ್ಲಿ ಒತ್ತಿಹೇಳಿದ್ದಾರೆ.

"ಅಕ್ಟೋಬರ್ 27, 2025ರಿಂದ ಪ್ರಾರಂಭವಾಗಿ 166 ದಿನಗಳ ಕಾಲ ನಡೆದ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ ಪ್ರಕ್ರಿಯೆಯ ನಂತರವೂ, ವಿವಿಧ ವಿಧಾನಸಭಾ ಕ್ಷೇತ್ರಗಳ ಮತಗಟ್ಟೆಗಳಲ್ಲಿ ಭಾರೀ ಸಂಖ್ಯೆಯ ನಕಲಿ ಹೆಸರುಗಳು ಉಳಿದುಕೊಂಡಿವೆ" ಎಂದು ಪಾಲ್ ಹೇಳಿದ್ದಾರೆ. ಇದು ಭಾರತೀಯ ಚುನಾವಣಾ ಆಯೋಗದ ವಿಶ್ವಾಸಾರ್ಹತೆ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತುತ್ತದೆ.

ನಕಲಿ ದಾಖಲೆಗಳನ್ನು ತೆಗೆದುಹಾಕಲು ಚುನಾವಣಾಧಿಕಾರಿಗಳು ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಉತ್ತರ ಪ್ರದೇಶದ ಮುಖ್ಯ ಚುನಾವಣಾಧಿಕಾರಿ ನವದೀಪ್ ರಿನ್ವಾ ತಿಳಿಸಿದ್ದಾರೆ. ಆದರೆ, SIR ಮುಕ್ತಾಯದ ನಂತರ ಈಗಾಗಲೇ ಹೆಚ್ಚಿನ ಪ್ರಮಾಣದ ಪರಿಶೀಲನೆ ನಡೆದಿರುವುದರಿಂದ ಅಂತಿಮ ಸಂಖ್ಯೆಯು ಲಕ್ಷಗಳನ್ನು ತಲುಪುವುದಿಲ್ಲ ಎಂದು ಅವರು ಅಂದಾಜಿಸಿದ್ದಾರೆ. ಪಿಲಿಭಿತ್ ಪ್ರಕರಣ ಬೆಳಕಿಗೆ ಬಂದ ನಂತರ, ತಮ್ಮ ತಮ್ಮ ಜಿಲ್ಲೆಗಳ ಮತದಾರರ ಪಟ್ಟಿಯನ್ನು ಮರುಪರಿಶೀಲಿಸುವಂತೆ ಎಲ್ಲಾ ಜಿಲ್ಲಾ ಚುನಾವಣಾಧಿಕಾರಿಗಳಿಗೆ ಮುಖ್ಯ ಚುನಾವಣಾಧಿಕಾರಿ ನಿರ್ದೇಶನ ನೀಡಿದ್ದಾರೆ.

ಸೌಜನ್ಯ: thewire.in