ಅಂತರರಾಷ್ಟ್ರೀಯ ಫುಟ್ಬಾಲ್ ವೃತ್ತಿಜೀವನಕ್ಕೆ ವಿದಾಯ ಹೇಳಿದ ಕ್ರಿಸ್ಟಿಯಾನೊ ರೊನಾಲ್ಡೊ; ಹೀಗಿತ್ತು CR7ನ ವೃತ್ತಿಜೀವನ

ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ಭಾವನಾತ್ಮಕ ವೀಡಿಯೋ ಒಂದರ ಮೂಲಕ ಕ್ರಿಸ್ಟಿಯಾನೊ ರೊನಾಲ್ಡೊ ತಮ್ಮ 23 ವರ್ಷಗಳ ಸುದೀರ್ಘ ಅಂತರರಾಷ್ಟ್ರೀಯ ಫುಟ್ಬಾಲ್ ವೃತ್ತಿಜೀವನಕ್ಕೆ ವಿದಾಯ ಹೇಳಿದ್ದಾರೆ. ಮುಖ್ಯ ತರಬೇತುದಾರ ಜಾರ್ಜ್ ಜೀಸಸ್ ಅವರೊಂದಿಗಿನ ಭಿನ್ನಾಭಿಪ್ರಾಯದ ನಂತರ 41 ವರ್ಷದ ರೊನಾಲ್ಡೊ ಅವರ ಅಂತರರಾಷ್ಟ್ರೀಯ ವೃತ್ತಿಜೀವನ ಕಹಿ ಅನುಭವದೊಂದಿಗೆ ಕೊನೆಗೊಂಡಿದೆ.

ಪೋರ್ಚುಗಲ್ ತಂಡದ ಪ್ರಸಿದ್ಧ 7ನೇ ಸಂಖ್ಯೆಯ ಜೆರ್ಸಿಯನ್ನು ಮುಂದಿನ ಪೀಳಿಗೆಗೆ ಹಸ್ತಾಂತರಿಸುವುದಾಗಿ ರೊನಾಲ್ಡೊ ಖಚಿತಪಡಿಸಿದ್ದು, ಈ ನಿರ್ಧಾರ ತೆಗೆದುಕೊಳ್ಳುವುದು ತಮಗೆ ಅತ್ಯಂತ ಕಷ್ಟಕರವಾಗಿತ್ತು ಎಂದು ಹೇಳಿದ್ದಾರೆ. ಆಗಸ್ಟ್ 2003ರಲ್ಲಿ ಅಂತರರಾಷ್ಟ್ರೀಯ ಪಂದ್ಯಗಳಿಗೆ ಪದಾರ್ಪಣೆ ಮಾಡಿದ್ದ ಅಲ್ ನಸ್ರ್ ತಂಡದ ಈ ಮುಂಚೂಣಿ ಆಟಗಾರ, ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ 234 ಪಂದ್ಯಗಳಲ್ಲಿ 146 ಗೋಲು ಗಳಿಸುವ ಮೂಲಕ ಅತಿ ಹೆಚ್ಚು ಪಂದ್ಯಗಳನ್ನಾಡಿದ ಮತ್ತು ಗರಿಷ್ಠ ಗೋಲು ಗಳಿಸಿದ ಆಟಗಾರ ಎನಿಸಿಕೊಂಡಿದ್ದಾರೆ.

ಗೋಲು ಹೊಡೆದ ನಂತರ ಕಾರ್ನರ್ ಫ್ಲ್ಯಾಗ್ ನತ್ತ ಓಡಿ, ಎತ್ತರಕ್ಕೆ ಜಿಗಿದು, ಗಾಳಿಯಲ್ಲೇ 180 ಡಿಗ್ರಿ ತಿರುಗಿ, ಕಾಲುಗಳನ್ನು ಅಗಲವಾಗಿ ಚಾಚಿ ನಿಂತು ತಮ್ಮ ಎರಡೂ ಕೈಗಳನ್ನು ಕೆಳಗೆ ಬೀಸುತ್ತಾ 'Siuuu' ಎಂದು ಸಂಭ್ರಮಾಚರಣೆ ಮಾಡುವ ರೊನಾಲ್ಡೊ ಅವರನ್ನು ಅನುಕರಿಸದ ಅಭಿಮಾನಿಗಳೇ ಇಲ್ಲ. Siuuu ಎಂದರೆ ಸ್ಪ್ಯಾನಿಷ್ ಭಾಷೆಯಲ್ಲಿ Yes ಎಂದು ಅರ್ಥ.

ಪೋರ್ಚುಗಲ್ ಜನತೆಗೆ ನೀಡಿದ ತಮ್ಮ ವಿದಾಯದ ಸಂದೇಶದಲ್ಲಿ ರೊನಾಲ್ಡೊ, ರಾಷ್ಟ್ರೀಯ ತಂಡದೊಂದಿಗಿನ ತಮ್ಮ ಸುದೀರ್ಘ ಪಯಣವನ್ನು ನಿರೂಪಿಸಿದ ತ್ಯಾಗ, ನಿರಾಸೆ ಮತ್ತು ಗೆಲುವುಗಳನ್ನು ಸ್ಮರಿಸಿದ್ದಾರೆ. ತಮ್ಮ ಆಟವನ್ನು ವೀಕ್ಷಿಸಲು ಪ್ರಪಂಚದಾದ್ಯಂತ ಪ್ರಯಾಣಿಸಿದ ಬೆಂಬಲಿಗರು, ತಮ್ಮ ಕುಟುಂಬ ಮತ್ತು ವಿವಿಧ ಪೀಳಿಗೆಗಳಲ್ಲಿ ತಮ್ಮೊಂದಿಗೆ ಆಡಿದ ಸಹ ಆಟಗಾರರ ಬಗ್ಗೆಯೂ ಅವರು ಮಾತನಾಡಿದ್ದಾರೆ.

"ಇಂದು ರಾಷ್ಟ್ರೀಯ ತಂಡದೊಂದಿಗೆ ಮೈದಾನದಲ್ಲಿದ್ದ ನನ್ನ ಪಯಣ ಕೊನೆಗೊಳ್ಳುತ್ತಿದೆ. ನಾನು ಸಾಗಿದ ಹಾದಿಯ ಬಗ್ಗೆ ಹೆಮ್ಮೆಯಿಂದ ಮತ್ತು ಪೋರ್ಚುಗಲ್ ದೇಶಕ್ಕಾಗಿ ನನ್ನಲ್ಲಿದ್ದ ಎಲ್ಲವನ್ನೂ ನೀಡಿದ್ದೇನೆ ಎಂಬ ತೃಪ್ತಿಯೊಂದಿಗೆ ತಲೆಯೆತ್ತಿ ನಿರ್ಗಮಿಸುತ್ತಿದ್ದೇನೆ" ಎಂದು ರೊನಾಲ್ಡೊ ಹೇಳಿದ್ದಾರೆ.

"7ನೇ ಸಂಖ್ಯೆಯ ಜೆರ್ಸಿ ಇಲ್ಲೇ ಉಳಿಯುತ್ತದೆ. ಅದನ್ನು ಧರಿಸಿದ್ದ ಹೆಮ್ಮೆ ಎಂದಿಗೂ ನನ್ನದಾಗಿರುತ್ತದೆ. ಪೋರ್ಚುಗಲ್ ಯಾವಾಗಲೂ ನನ್ನಲ್ಲಿ ಇರುತ್ತದೆ. ಸದಾ ನಿಮ್ಮವನು, ಕ್ರಿಸ್ಟಿಯಾನೊ ರೊನಾಲ್ಡೊ."

ಪೋರ್ಚುಗಲ್ ಮುಖ್ಯ ತರಬೇತುದಾರ ಜಾರ್ಜ್ ಜೀಸಸ್ ಅವರೊಂದಿಗಿನ ಭಿನ್ನಾಭಿಪ್ರಾಯದ ನಂತರ ಈ ಪ್ರಕಟಣೆ ಬಂದಿದೆ. ಅಕ್ಟೋಬರ್ ನಲ್ಲಿ ರೊನಾಲ್ಡೊ ರಾಷ್ಟ್ರೀಯ ತಂಡದ ಶಿಬಿರದಿಂದ ಹೊರಬಂದದ್ದು ಅವರ ಭವಿಷ್ಯದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿತ್ತು. ತಂಡದಲ್ಲಿ ತಮ್ಮ ಪಾತ್ರದ ಕುರಿತು ನೀಡಿದ್ದ ಮಾತನ್ನು ತರಬೇತುದಾರರು ತಪ್ಪಿದ್ದಾರೆ ಎಂದು ರೊನಾಲ್ಡೊ ಆರೋಪಿಸಿದ್ದರು. ಹೊರನಡೆದಿದ್ದಕ್ಕಾಗಿ ರೊನಾಲ್ಡೊ ನಂತರ ಕ್ಷಮೆಯಾಚಿಸಿದ್ದರು ಮತ್ತು ತಾವು ಪಂದ್ಯಗಳಿಗೆ ಲಭ್ಯವಿರುವುದಾಗಿ ತಿಳಿಸಿದ್ದರು. ಈ ನಿವೃತ್ತಿಯ ನಿರ್ಧಾರವು ಪೋರ್ಚುಗಲ್ ಜೊತೆಗಿನ ಎರಡು ದಶಕಗಳಿಗಿಂತಲೂ ಹೆಚ್ಚು ಕಾಲದ ಬಾಂಧವ್ಯಕ್ಕೆ ನಿರೀಕ್ಷಿಸದ ರೀತಿಯಲ್ಲಿ ಅಂತ್ಯ ಹಾಡಿದೆ.

►ಏನಿದು ವಿವಾದ?

ಈ ಪ್ರಕಟಣೆ ಬರುವುದಕ್ಕಿಂತ ಕೆಲವು ತಿಂಗಳುಗಳ ಮುಂಚಿನಿಂದಲೂ ರೊನಾಲ್ಡೊ ಮತ್ತು ಜಾರ್ಜ್ ಜೀಸಸ್ ನಡುವಿನ ಸಂಬಂಧ ಅಷ್ಟೇನೂ ಚೆನ್ನಾಗಿರಲಿಲ್ಲ. ಸೆಪ್ಟೆಂಬರ್ 27ರಂದು ನಾರ್ವೆ ವಿರುದ್ಧ ಪೋರ್ಚುಗಲ್ 2-1 ಅಂತರದಿಂದ ಗೆದ್ದ ನೇಷನ್ಸ್ ಲೀಗ್ ಪಂದ್ಯದಲ್ಲಿ ರೊನಾಲ್ಡೊ ಅವರನ್ನು ಸಂಪೂರ್ಣವಾಗಿ ಬೆಂಚ್ಗೆ ಸೀಮಿತಗೊಳಿಸಿದಾಗ ಈ ಭಿನ್ನಾಭಿಪ್ರಾಯ ಮೊದಲ ಬಾರಿಗೆ ಬಹಿರಂಗವಾಯಿತು.

ತಮ್ಮ ದೈಹಿಕ ಸಾಮರ್ಥ್ಯದ ನಿರ್ವಹಣೆಯ ಭಾಗವಾಗಿ ನಾರ್ವೆ ಮತ್ತು ಡೆನ್ಮಾರ್ಕ್ ವಿರುದ್ಧದ ಪಂದ್ಯಗಳಿಂದ ತಮಗೆ ವಿಶ್ರಾಂತಿ ನೀಡಲಾಗುವುದು ಎಂದು ಆರಂಭದಲ್ಲಿ ತಿಳಿಸಲಾಗಿತ್ತು ಎಂದು ರೊನಾಲ್ಡೊ ನಂತರ ವಿವರಿಸಿದ್ದರು. ನಾರ್ವೆ ವಿರುದ್ಧದ ಪಂದ್ಯದಲ್ಲಿ ತಮ್ಮನ್ನು ಸುಮಾರು 30 ನಿಮಿಷಗಳ ಕಾಲ ಮೈದಾನಕ್ಕಿಳಿಸುವುದಾಗಿ ಜೀಸಸ್ ಆ ನಂತರ ಹೇಳಿದ್ದರು ಎಂದು ರೊನಾಲ್ಡೊ ಪ್ರತಿಪಾದಿಸಿದರು. ಮೈದಾನಕ್ಕಿಳಿಯುವ ನಿರೀಕ್ಷೆಯಲ್ಲಿದ್ದ ರೊನಾಲ್ಡೊ ದ್ವಿತೀಯಾರ್ಧದಿಂದಲೇ ವಾರ್ಮ್ಅಪ್ ನಡೆಸಿದ್ದರಾದರೂ, ಅವರಿಗೆ ಅವಕಾಶವೇ ಸಿಗಲಿಲ್ಲ.

ಪೋರ್ಚುಗಲ್ ನಾಯಕನಿಗೆ ಬೇಸರ ತಂದಿದ್ದು ಪಂದ್ಯದಿಂದ ಹೊರಗುಳಿದದ್ದು ಮಾತ್ರವಲ್ಲ. ಮಾಧ್ಯಮಗಳಿಗೆ ಈ ಪರಿಸ್ಥಿತಿಯನ್ನು ಹೇಗೆ ವಿವರಿಸಬೇಕು ಎಂಬ ವಿಷಯದಲ್ಲಿದ್ದ ತಿಳಿವಳಿಕೆಯಿಂದ ಜೀಸಸ್ ಹಿಂದೆ ಸರಿದರು ಎಂಬ ಭಾವನೆಯೂ ಅವರಲ್ಲಿ ಮೂಡಿತು. ತಾವು ಪಂದ್ಯವಾಡಲು ಕೇಳಿಕೊಂಡಿರಲಿಲ್ಲ ಮತ್ತು ತಮ್ಮ ಕಡಿಮೆ ಭಾಗವಹಿಸುವಿಕೆಯು ಮುಂಚಿತವಾಗಿಯೇ ಯೋಜಿತವಾಗಿತ್ತು ಎಂದು ತರಬೇತುದಾರರು ಸ್ಪಷ್ಟಪಡಿಸಲಿದ್ದಾರೆ ಎಂಬ ಒಪ್ಪಂದ ಅವರಿಬ್ಬರ ನಡುವೆ ಇತ್ತು ಎಂದು ರೊನಾಲ್ಡೊ ಹೇಳಿದ್ದರು. ಪತ್ರಿಕಾಗೋಷ್ಠಿಯಲ್ಲಿ ಜೀಸಸ್ ನೀಡಿದ ಹೇಳಿಕೆಗಳು ರೊನಾಲ್ಡೊ ವಿವರಿಸಿದ ಚರ್ಚೆಗೆ ತಾಳೆಯಾಗಲಿಲ್ಲ.

ತಂಡದ ಆಯ್ಕೆಯು ತಮ್ಮ ಜವಾಬ್ದಾರಿ ಎಂದು ಜೀಸಸ್ ಪ್ರತಿಪಾದಿಸಿದರು ಮತ್ತು ಯಾವುದೇ ದೊಡ್ಡ ಭಿನ್ನಾಭಿಪ್ರಾಯವಿಲ್ಲ ಎಂದು ಸ್ಪಷ್ಟನೆ ನೀಡಿದರು. ಆದರೆ, ಈ ವಿಷಯ ಅಲ್ಲಿಗೇ ಮುಗಿಯಲಿಲ್ಲ. ಪೋರ್ಚುಗೀಸ್ ಫುಟ್ಬಾಲ್ ಫೆಡರೇಷನ್ ಅಧ್ಯಕ್ಷ ಪೆಡ್ರೊ ಪ್ರೊಯೆಂಕಾ ಅವರೊಂದಿಗೆ ಮಾತನಾಡಿದ ನಂತರ, ರೊನಾಲ್ಡೊ ಡೆನ್ಮಾರ್ಕ್ ವಿರುದ್ಧದ ಪಂದ್ಯಕ್ಕೂ ಮುನ್ನ ಕೋಪನ್ಹೇಗನ್ ನ ತರಬೇತಿ ಶಿಬಿರದಿಂದ ನಿರ್ಗಮಿಸಿದರು.

ವಿಶೇಷವಾಗಿ ನಾಯಕನಾಗಿದ್ದಾಗ ಶಿಬಿರದಿಂದ ಹೊರನಡೆಯುವ ಅವರ ನಿರ್ಧಾರವು ಪೋರ್ಚುಗಲ್ ನಲ್ಲಿ ಟೀಕೆಗೆ ಗುರಿಯಾಯಿತು. ತರಬೇತಿ ಶಿಬಿರದಿಂದ ಹೊರನಡೆದಿದ್ದು ತಪ್ಪಾಯಿತು ಎಂದು ಒಪ್ಪಿಕೊಂಡ ರೊನಾಲ್ಡೊ, ನಂತರ ತಮ್ಮ ಸಹ ಆಟಗಾರರು ಮತ್ತು ಬೆಂಬಲಿಗರಲ್ಲಿ ಕ್ಷಮೆಯಾಚಿಸಿದರು. ತಮ್ಮ ಪ್ರಭಾವದ ಕಾರಣಕ್ಕಾಗಿ ತಮ್ಮನ್ನು ವಿನಾಯಿತಿಯಿಂದ ನೋಡಬೇಡಿ ಎಂದೂ ಅವರು ಫೆಡರೇಷನ್ಗೆ ಮನವಿ ಮಾಡಿದರು.

ಫೆಡರೇಷನ್ ಅವರಿಗೆ 30 ದಿನಗಳ ಅಮಾನತು ಮತ್ತು 255 ಯುರೋ ದಂಡವನ್ನು ವಿಧಿಸಿತು. ಈ ಶಿಕ್ಷೆಯನ್ನು ಹಿಂದಿನ ದಿನಾಂಕದಿಂದಲೇ ಅನ್ವಯವಾಗುವಂತೆ ಜಾರಿಗೊಳಿಸಿದ್ದರಿಂದ, ಪೋರ್ಚುಗಲ್ ನ ಮುಂದಿನ ಪಂದ್ಯಗಳಿಗೆ ಅವರು ಲಭ್ಯವಿರುವಂತಾಯಿತು.

ಅಮಾನತಿನ ಅವಧಿ ಮುಗಿದ ನಂತರ ಪೋರ್ಚುಗಲ್ ಪರ ಆಟ ಮುಂದುವರಿಸಲು ಬಯಸುವುದಾಗಿ ರೊನಾಲ್ಡೊ ತಿಳಿಸಿದ್ದರು. 2026ರ ವಿಶ್ವಕಪ್ ನಂತರ ತಮ್ಮ ಅಂತರರಾಷ್ಟ್ರೀಯ ವೃತ್ತಿಜೀವನಕ್ಕೆ ವಿದಾಯ ಹೇಳುವ ಬಗ್ಗೆಯೂ ಅವರು ಯೋಚಿಸಿದ್ದರು. ಈ ಬಗ್ಗೆ ಮರುಪರಿಶೀಲಿಸುವಂತೆ ಪ್ರೊಯೆಂಕಾ ಅವರನ್ನು ಒಪ್ಪಿಸಿದ್ದರು ಎಂದೂ ಅವರು ಹೇಳಿದ್ದರು. ಈಗ ಬಂದಿರುವ ಈ ಪ್ರಕಟಣೆಯು ಆ ಎಲ್ಲ ಯೋಜನೆಗಳಿಗೆ ಅಂತ್ಯ ಹಾಡಿದೆ.

ಜೀಸಸ್ ಅವರೊಂದಿಗಿನ ಭಿನ್ನಾಭಿಪ್ರಾಯವೇ ತಮ್ಮ ನಿವೃತ್ತಿಯ ನಿರ್ಧಾರಕ್ಕೆ ಕಾರಣ ಎಂದು ರೊನಾಲ್ಡೊ ಎಲ್ಲೂ ಹೇಳಿಲ್ಲ. ಪೋರ್ಚುಗಲ್ ಜೊತೆಗಿನ ಅವರ ಅಂತಿಮ ತಿಂಗಳುಗಳ ಪಯಣದಲ್ಲಿ ಈ ವಿಷಯವನ್ನು ನಿರ್ಲಕ್ಷಿಸಲು ಸಾಧ್ಯವೇ ಇರಲಿಲ್ಲ.

►ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ವೃತ್ತಿಜೀವನ

2003ರ ಆಗಸ್ಟ್ ನಲ್ಲಿ ಕಜಕಿಸ್ತಾನ್ ವಿರುದ್ಧದ ಪಂದ್ಯದ ಮೂಲಕ ರೊನಾಲ್ಡೊ ಪೋರ್ಚುಗಲ್ ಪರ ಪದಾರ್ಪಣೆ ಮಾಡಿದರು. ಕೇವಲ 19ನೇ ವಯಸ್ಸಿನಲ್ಲಿ, ಅಂದರೆ ಒಂದು ವರ್ಷದ ನಂತರ, ಸ್ವದೇಶದಲ್ಲೇ ನಡೆದ ಯುರೋ 2004 ಟೂರ್ನಿಯ ಫೈನಲ್ ತಲುಪಿದ ತಂಡದಲ್ಲಿದ್ದರು. ಟೂರ್ನಿಯಲ್ಲಿ ಅವರು ಗೋಲು ಬಾರಿಸಿದರಾದರೂ, ಆತಿಥೇಯ ಪೋರ್ಚುಗಲ್ ಅನ್ನು ಮಣಿಸಿ ಗ್ರೀಸ್ ಟ್ರೋಫಿ ಎತ್ತಿಹಿಡಿದಾಗ ರೊನಾಲ್ಡೊಗೆ ನಿರಾಶೆಯಾಯಿತು.

ರೊನಾಲ್ಡೊ ಅಂತರರಾಷ್ಟ್ರೀಯ ಟ್ರೋಫಿ ಗೆಲ್ಲುವ ಮುನ್ನ ಹಲವು ಬಾರಿ ಪ್ರಶಸ್ತಿಯ ಹತ್ತಿರ ಬಂದು ವಂಚಿತರಾಗಿದ್ದರು. 2006ರ ವಿಶ್ವಕಪ್ ಹಾಗೂ ಯುರೋ 2012ರ ಸೆಮಿಫೈನಲ್ ನಲ್ಲಿ ಪೋರ್ಚುಗಲ್ ಸೋಲನುಭವಿಸಿತು. ಈ ವೇಳೆ ರೊನಾಲ್ಡೊ ತಂಡದ ಪ್ರಮುಖ ಆಟಗಾರನಾಗಿ ಹೊರಹೊಮ್ಮಿದ್ದರು. ಯುರೋ 2016ರ ವೇಳೆಗೆ ಅವರು ತಂಡದ ನಾಯಕ ಮತ್ತು ಪೋರ್ಚುಗೀಸ್ ಫುಟ್ಬಾಲ್ ನ ಪ್ರಮುಖ ಮುಖವಾಗಿದ್ದರು.

ಫ್ರಾನ್ಸ್ ವಿರುದ್ಧದ ಫೈನಲ್ ಪಂದ್ಯ ಅವರ ವೈಯಕ್ತಿಕ ಪಾಲಿಗೆ ಅಂದುಕೊಂಡಂತೆ ಸಾಗಲಿಲ್ಲ. ಮೊಣಕಾಲಿನ ಗಾಯದಿಂದಾಗಿ ರೊನಾಲ್ಡೊ ಮೊದಲಾರ್ಧದಲ್ಲೇ ಮೈದಾನದಿಂದ ಹೊರನಡೆಯಬೇಕಾಯಿತು. ಆದರೆ, ಮೈದಾನದ ಹೊರಗಿನಿಂದಲೇ ಸಹ ಆಟಗಾರರಲ್ಲಿ ಉತ್ಸಾಹ ತುಂಬಿದರು. ಹೆಚ್ಚುವರಿ ಸಮಯದಲ್ಲಿ ಏಡರ್ ಬಾರಿಸಿದ ಗೆಲುವಿನ ಗೋಲಿನ ನೆರವಿನಿಂದ ಪೋರ್ಚುಗಲ್ ತನ್ನ ಚೊಚ್ಚಲ ಯುರೋಪಿಯನ್ ಚಾಂಪಿಯನ್‌ ಶಿಪ್ ಮುಡಿಗೇರಿಸಿಕೊಂಡಿತು.

2019ರಲ್ಲಿ ಪೋರ್ಚುಗಲ್ ಮೊದಲ ಆವೃತ್ತಿಯ ನೇಷನ್ಸ್ ಲೀಗ್ ಗೆದ್ದಾಗ ರೊನಾಲ್ಡೊ ತಮ್ಮ ಖಾತೆಗೆ ಮತ್ತೊಂದು ಪ್ರಮುಖ ಟ್ರೋಫಿ ಸೇರಿಸಿದರು. ಸೆಮಿಫೈನಲ್ ನಲ್ಲಿ ಸ್ವಿಟ್ಜರ್ಲೆಂಡ್ ವಿರುದ್ಧ ಹ್ಯಾಟ್ರಿಕ್ ಗೋಲು ಗಳಿಸಿದ ಅವರು, ಫೈನಲ್ ನಲ್ಲಿ ನೆದರ್ಲ್ಯಾಂಡ್ಸ್ ವಿರುದ್ಧ ತಂಡದ ಗೆಲುವಿಗೆ ನೆರವಾದರು. ಆರು ವರ್ಷಗಳ ನಂತರ, ಸ್ಪೇನ್ ವಿರುದ್ಧದ ಫೈನಲ್ ನಲ್ಲಿ ಗೋಲು ಬಾರಿಸಿ, ಪೆನಾಲ್ಟಿ ಶೂಟೌಟ್ನಲ್ಲಿ ಪೋರ್ಚುಗಲ್ ಎರಡನೇ ಬಾರಿಗೆ ನೇಷನ್ಸ್ ಲೀಗ್ ಪ್ರಶಸ್ತಿ ಗೆಲ್ಲುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಅಂತರರಾಷ್ಟ್ರೀಯ ಫುಟ್ಬಾಲ್ಗೆ ವಿದಾಯ ಹೇಳುವ ವೇಳೆಗೆ ರೊನಾಲ್ಡೊ 234 ಪಂದ್ಯಗಳಲ್ಲಿ 146 ಗೋಲು ಗಳಿಸಿದ್ದರು. ಇವೆರಡೂ ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ವಿಶ್ವದಾಖಲೆಗಳಾಗಿವೆ. 2026ರ ಫೀಫಾ ವಿಶ್ವಕಪ್ ನಲ್ಲಿ ಗೋಲು ಬಾರಿಸುವ ಮೂಲಕ ಆರು ಬೇರೆ ಬೇರೆ ಆವೃತ್ತಿಗಳ ವಿಶ್ವಕಪ್ ಗಳಲ್ಲಿ ಗೋಲು ಗಳಿಸಿದ ವಿಶ್ವದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದು ಅವರ ದೀರ್ಘಕಾಲದ ಫಾರ್ಮ್ಗೆ ಸಾಕ್ಷಿಯಾಗಿದೆ.

►ಪೋರ್ಚುಗಲ್ ಪರ ಅವರ ಪ್ರಮುಖ ಸಾಧನೆಗಳು

ಯುರೋ 2016: ತಂಡದ ನಾಯಕನಾಗಿ ಮೂರು ಗೋಲು ಬಾರಿಸಿ ಪೋರ್ಚುಗಲ್ ಮೊದಲ ಯುರೋಪಿಯನ್ ಚಾಂಪಿಯನ್‌ ಶಿಪ್ ಗೆಲ್ಲಲು ನೆರವಾದರು.

ನೇಷನ್ಸ್ ಲೀಗ್ 2019: ಸ್ವಿಟ್ಜರ್ಲೆಂಡ್ ವಿರುದ್ಧ ಸೆಮಿಫೈನಲ್ ನಲ್ಲಿ ಹ್ಯಾಟ್ರಿಕ್ ಗೋಲು ಗಳಿಸಿ, ಮೊದಲ ಆವೃತ್ತಿಯ ಟ್ರೋಫಿ ಗೆಲ್ಲಲು ಕಾರಣರಾದರು.

ನೇಷನ್ಸ್ ಲೀಗ್ 2025: ಸ್ಪೇನ್ ವಿರುದ್ಧದ ಫೈನಲ್ ನಲ್ಲಿ ಗೋಲು ಬಾರಿಸಿ ತಂಡ ಎರಡನೇ ಬಾರಿಗೆ ಪ್ರಶಸ್ತಿ ಎತ್ತಿಹಿಡಿಯಲು ನೆರವಾದರು.

ಅಂತರರಾಷ್ಟ್ರೀಯ ಗೋಲುಗಳು: 146 ಗೋಲುಗಳು (ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು).

ಅಂತರರಾಷ್ಟ್ರೀಯ ಪಂದ್ಯಗಳು: 234 ಪಂದ್ಯಗಳು (ವಿಶ್ವದಾಖಲೆ).

ವಿಶ್ವಕಪ್ ದಾಖಲೆ: 2026ರಲ್ಲಿ ಆರು ಬೇರೆ ಬೇರೆ ವಿಶ್ವಕಪ್ ಆವೃತ್ತಿಗಳಲ್ಲಿ ಗೋಲು ಬಾರಿಸಿದ ಮೊದಲ ಆಟಗಾರ.

ಯುರೋಪಿಯನ್ ಚಾಂಪಿಯನ್‌ ಶಿಪ್ ದಾಖಲೆ: ಕೂಟದ ಇತಿಹಾಸದಲ್ಲೇ ಅತಿ ಹೆಚ್ಚು ಗೋಲುಗಳು (14) ಮತ್ತು ಅತಿ ಹೆಚ್ಚು ಪಂದ್ಯಗಳನ್ನು (30) ಆಡಿದ ದಾಖಲೆ.

►ನನಸಾಗದ ವಿಶ್ವಕಪ್ ಕನಸು

ಸಾಕಷ್ಟು ಯಶಸ್ಸು ಕಂಡರೂ, ಫೀಫಾ ವಿಶ್ವಕಪ್ ಮಾತ್ರ ರೊನಾಲ್ಡೊ ಕೈಗೆಟುಕಲಿಲ್ಲ. 2006ರಲ್ಲಿ ಸೆಮಿಫೈನಲ್ ತಲುಪಿದ್ದೇ ವಿಶ್ವಕಪ್ ನಲ್ಲಿ ಪೋರ್ಚುಗಲ್ ನ ಅತ್ಯುತ್ತಮ ಸಾಧನೆಯಾಗಿತ್ತು. 2022ರ ಕ್ವಾರ್ಟರ್ ಫೈನಲ್ ನಲ್ಲಿ ಮೊರಾಕೊ ವಿರುದ್ಧ ಹಾಗೂ 2026ರ 16ರ ಘಟ್ಟದ ಪಂದ್ಯದಲ್ಲಿ ಸ್ಪೇನ್ ವಿರುದ್ಧ ಅನುಭವಿಸಿದ ಸೋಲುಗಳು ಅವರ ಅಂತರರಾಷ್ಟ್ರೀಯ ವೃತ್ತಿಜೀವನದ ತೀವ್ರ ನೋವಿನ ಕ್ಷಣಗಳಾಗಿದ್ದವು.

ಪ್ರಶಸ್ತಿಗಳನ್ನು ಹೊರತುಪಡಿಸಿಯೂ ಪೋರ್ಚುಗೀಸ್ ಫುಟ್ಬಾಲ್ ಮೇಲೆ ರೊನಾಲ್ಡೊ ಬೀರಿದ ಪ್ರಭಾವ ಅಪಾರ. ತಲೆಮಾರುಗಳ ಕಾಲ ರಾಷ್ಟ್ರೀಯ ತಂಡದ ಹೆಮ್ಮೆಯ ಸಂಕೇತವಾಗಿದ್ದ ಅವರು, ಲಕ್ಷಾಂತರ ಅಭಿಮಾನಿಗಳಿಗೆ ಪ್ರೇರಣೆಯಾದರು. ಯುರೋ 2004ರ ಫೈನಲ್ ಸೋತಾಗ ಕಣ್ಣೀರಿಟ್ಟ ಹದಿಹರೆಯದ ಹುಡುಗನಿಂದ ಹಿಡಿದು 2016ರಲ್ಲಿ ಯುರೋಪಿಯನ್ ಚಾಂಪಿಯನ್‌ ಶಿಪ್ ಟ್ರೋಫಿ ಎತ್ತಿಹಿಡಿದ ನಾಯಕನವರೆಗೆ, ಅವರ ಪಯಣವು ದೇಶದ ಫುಟ್ಬಾಲ್ ಬೆಳವಣಿಗೆಯ ಜೊತೆಗೇ ಸಾಗಿತ್ತು.

ಅವರ ಅಂತರರಾಷ್ಟ್ರೀಯ ವೃತ್ತಿಜೀವನ ಅಂತ್ಯಗೊಂಡಿದ್ದರೂ, ಐತಿಹಾಸಿಕ ಮೈಲಿಗಲ್ಲಿನ ಕಡೆಗೆ ರೊನಾಲ್ಡೊ ಓಟ ಮುಂದುವರಿದಿದೆ. ಪ್ರಸ್ತುತ ಅಲ್ ನಸ್ರ್ ಕ್ಲಬ್ ಪರ ಆಡುತ್ತಿರುವ ರೊನಾಲ್ಡೊ 1,000 ವೃತ್ತಿಪರ ಗೋಲುಗಳ ಸನಿಹದಲ್ಲಿದ್ದು, ಸದ್ಯ ಅವರ ಖಾತೆಯಲ್ಲಿ 979 ಗೋಲುಗಳಿವೆ.

ಕಳೆದ ಎರಡು ದಶಕಗಳಿಂದ ತಂಡವನ್ನು ಮುನ್ನಡೆಸಿದ ನಾಯಕನಿಲ್ಲದೆ ಪೋರ್ಚುಗಲ್ ಈಗ ಮುನ್ನಡೆಯಬೇಕಿದೆ. ರೊನಾಲ್ಡೊ 234 ಪಂದ್ಯಗಳು, 146 ಗೋಲುಗಳು, ಒಂದು ಯುರೋಪಿಯನ್ ಚಾಂಪಿಯನ್‌ ಶಿಪ್ ಹಾಗೂ ಎರಡು ನೇಷನ್ಸ್ ಲೀಗ್ ಪ್ರಶಸ್ತಿಗಳೊಂದಿಗೆ ಅಂತರರಾಷ್ಟ್ರೀಯ ರಂಗದಿಂದ ನಿರ್ಗಮಿಸಿದ್ದಾರೆ. ಇನ್ನು ಪೋರ್ಚುಗಲ್ ನ 7ನೇ ಸಂಖ್ಯೆಯ ಜೆರ್ಸಿಯನ್ನು ಮತ್ತೊಬ್ಬ ಆಟಗಾರ ಧರಿಸಬಹುದು, ಆದರೆ ಫುಟ್ಬಾಲ್ಗೆ ರೊನಾಲ್ಡೊ ನೀಡಿದ ಕೊಡುಗೆಯನ್ನು ಭರ್ತಿ ಮಾಡುವುದು ಅಸಾಧ್ಯ.

►ಕ್ರಿಸ್ಟಿಯಾನೊ ರೊನಾಲ್ಡೊ ಅವರ ದಾಖಲೆಗಳು

1. ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು ಗೋಲುಗಳು – 146

ಪೋರ್ಚುಗಲ್ ಪರ 146 ಗೋಲುಗಳನ್ನು ಗಳಿಸಿರುವ ರೊನಾಲ್ಡೊ, ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ಇತಿಹಾಸದಲ್ಲೇ ಅತಿ ಹೆಚ್ಚು ಗೋಲು ಬಾರಿಸಿದ ಆಟಗಾರನಾಗಿ ತಮ್ಮ ವೃತ್ತಿಜೀವನಕ್ಕೆ ವಿದಾಯ ಹೇಳಿದ್ದಾರೆ.

2021ರ ಸೆಪ್ಟೆಂಬರ್ 1ರಂದು ಫಾರೊ-ಲೌಲೆಯಲ್ಲಿ ನಡೆದ ವಿಶ್ವಕಪ್ ಅರ್ಹತಾ ಪಂದ್ಯದಲ್ಲಿ ರಿಪಬ್ಲಿಕ್ ಆಫ್ ಐರ್ಲೆಂಡ್ ವಿರುದ್ಧ ಎರಡು ಗೋಲು ಗಳಿಸುವ ಮೂಲಕ ಅವರು ಈ ಹಿಂದಿನ ವಿಶ್ವದಾಖಲೆಯನ್ನು ಮುರಿದರು. ಈ ಗೋಲುಗಳೊಂದಿಗೆ ಅವರ ಅಂತರರಾಷ್ಟ್ರೀಯ ಗೋಲುಗಳ ಸಂಖ್ಯೆ 110 ಮತ್ತು 111ಕ್ಕೆ ಏರಿತು. ಇದರೊಂದಿಗೆ ಇರಾನ್ ನ ಮಾಜಿ ಸ್ಟ್ರೈಕರ್ ಅಲಿ ದಾಯಿ ಹೆಸರಿನಲ್ಲಿದ್ದ 109 ಗೋಲುಗಳ ದಾಖಲೆಯನ್ನು ರೊನಾಲ್ಡೊ ತಮ್ಮ ಹೆಸರಿಗೆ ಬರೆದುಕೊಂಡರು. 100 ಅಂತರರಾಷ್ಟ್ರೀಯ ಗೋಲುಗಳನ್ನು ಗಳಿಸಿದ ಮೊದಲ ಪುರುಷ ಫುಟ್ಬಾಲ್ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದ ಅಲಿ ದಾಯಿ ಅವರ ಸಾಧನೆಯನ್ನು ರೊನಾಲ್ಡೊ ಹಿಂದಿಕ್ಕಿದರು.

2023ರ ಮಾರ್ಚ್ 28ರಂದು ಲಿಯೋನೆಲ್ ಮೆಸ್ಸಿ ಸಹ ಕನಿಷ್ಠ 100 ಅಂತರರಾಷ್ಟ್ರೀಯ ಗೋಲುಗಳನ್ನು ಗಳಿಸಿದ ಆಟಗಾರರ ಪಟ್ಟಿಗೆ ಸೇರ್ಪಡೆಯಾದರು. ರೊನಾಲ್ಡೊ ಅವರ 146 ಗೋಲುಗಳ ಅಂತಿಮ ಸಾಧನೆಯು ಈ ದಾಖಲೆಯನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ದಿದೆ ಹಾಗೂ ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಈ ಮೈಲಿಗಲ್ಲು ತಲುಪಿದ ಮೊದಲ ಆಟಗಾರ ಎಂಬ ಕೀರ್ತಿಗೆ ಅವರನ್ನು ಭಾಜನರನ್ನಾಗಿ ಮಾಡಿದೆ.

►2. ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು ಪಂದ್ಯಗಳು – 234

ಪೋರ್ಚುಗಲ್ ಪರ 234 ಪಂದ್ಯಗಳಲ್ಲಿ ಕಣಕ್ಕಿಳಿದಿರುವ ರೊನಾಲ್ಡೊ, ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನು ಆಡಿದ ಆಟಗಾರ ಎಂಬ ದಾಖಲೆಯೊಂದಿಗೆ ನಿರ್ಗಮಿಸಿದ್ದಾರೆ.

2003ರ ಆಗಸ್ಟ್ ನಲ್ಲಿ ನಡೆದ ಪದಾರ್ಪಣೆ ಪಂದ್ಯದಿಂದ ಹಿಡಿದು 2026ರ ಅಂತರರಾಷ್ಟ್ರೀಯ ಆವೃತ್ತಿಯವರೆಗೆ ಅವರ ಈ ಪಯಣ ಎರಡು ದಶಕಗಳಿಗೂ ಹೆಚ್ಚು ಕಾಲ ವಿಸ್ತರಿಸಿದೆ. ವಿಭಿನ್ನ ತಲೆಮಾರಿನ ಆಟಗಾರರು, ವಿವಿಧ ತರಬೇತುದಾರರು ಮತ್ತು ಪ್ರಮುಖ ಟೂರ್ನಿಗಳ ಉದ್ದಕ್ಕೂ ಪೋರ್ಚುಗಲ್ ತಂಡದ ನಿಯಮಿತ ಸದಸ್ಯರಾಗಿದ್ದ ರೊನಾಲ್ಡೊ ಅವರ ಈ ದಾಖಲೆಯು ಅಂತರರಾಷ್ಟ್ರೀಯ ಫುಟ್ಬಾಲ್ ನ ಅತ್ಯುನ್ನತ ಮಟ್ಟದಲ್ಲಿ ಅವರ ಸುದೀರ್ಘ ವೃತ್ತಿಜೀವನವನ್ನು ಬಿಂಬಿಸುತ್ತದೆ. 2023ರ ಜೂನ್ ನಲ್ಲಿ ಐಸ್ಲ್ಯಾಂಡ್ ವಿರುದ್ಧದ ಪಂದ್ಯದಲ್ಲಿ ಕಣಕ್ಕಿಳಿಯುವ ಮೂಲಕ 200 ಹಿರಿಯರ ಅಂತರರಾಷ್ಟ್ರೀಯ ಪಂದ್ಯಗಳನ್ನು ಪೂರೈಸಿದ ಮೊದಲ ಫುಟ್ಬಾಲ್ ಆಟಗಾರ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾದರು. ತಮ್ಮ ಅಂತರರಾಷ್ಟ್ರೀಯ ವೃತ್ತಿಜೀವನಕ್ಕೆ ತೆರೆ ಎಳೆಯುವ ಮುನ್ನ ಅವರು ಮತ್ತಷ್ಟು 34 ಪಂದ್ಯಗಳನ್ನು ಆಡಿದರು.

►3. ಆರು ವಿಭಿನ್ನ ಫೀಫಾ ವಿಶ್ವಕಪ್ ಗಳಲ್ಲಿ ಗೋಲು ಗಳಿಸಿದ ಮೊದಲ ಆಟಗಾರ

ಪುರುಷರ ಫುಟ್ಬಾಲ್ ಇತಿಹಾಸದಲ್ಲಿ ಆರು ವಿಭಿನ್ನ ಆವೃತ್ತಿಗಳ ಫೀಫಾ ವಿಶ್ವಕಪ್ ಗಳಲ್ಲಿ ಗೋಲು ಗಳಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆ ರೊನಾಲ್ಡೊ ಅವರದ್ದು. ಅವರು 2006, 2010, 2014, 2018, 2022 ಮತ್ತು 2026ರ ಫೀಫಾ ವಿಶ್ವಕಪ್ ಗಳಲ್ಲಿ ಗೋಲು ಬಾರಿಸಿದರು.

2026ರ ವಿಶ್ವಕಪ್ ನ ಲೀಗ್ ಹಂತದಲ್ಲಿ ಉಜ್ಬೇಕಿಸ್ತಾನ್ ವಿರುದ್ಧ ಗೋಲು ಗಳಿಸುವ ಮೂಲಕ ಅವರು ಈ ಐತಿಹಾಸಿಕ ಮೈಲಿಗಲ್ಲು ತಲುಪಿದರು. ಈ ಹಿಂದಿನ ಐದು ವಿಶ್ವಕಪ್ ಗಳಲ್ಲೂ ಗೋಲು ಗಳಿಸಿದ್ದ ರೊನಾಲ್ಡೊ, ಈ ಗೋಲಿನೊಂದಿಗೆ ಆರು ಬೇರೆ ಬೇರೆ ಆವೃತ್ತಿಗಳಲ್ಲಿ ಗೋಲು ಬಾರಿಸಿದ ಪ್ರಥಮ ಆಟಗಾರ ಎನಿಸಿಕೊಂಡರು. 20 ವರ್ಷಗಳ ಕಾಲ ವಿಶ್ವಕಪ್ ಆಡಿರುವ ಅವರು, ಅತಿ ಹೆಚ್ಚು ಆವೃತ್ತಿಗಳಲ್ಲಿ ಭಾಗವಹಿಸಿದ ವಿಶೇಷ ದಾಖಲೆಯನ್ನೂ ತಮ್ಮದಾಗಿಸಿಕೊಂಡಿದ್ದಾರೆ.

►4. ಫೀಫಾ ವಿಶ್ವಕಪ್ ಇತಿಹಾಸದಲ್ಲಿ ಎರಡನೇ ಅತಿ ಹೆಚ್ಚು ಪಂದ್ಯಗಳು – 27

ತಮ್ಮ ಆರು ವಿಶ್ವಕಪ್ ಆವೃತ್ತಿಗಳಲ್ಲಿ ಒಟ್ಟು 27 ಪಂದ್ಯಗಳನ್ನು ಆಡಿರುವ ರೊನಾಲ್ಡೊ, ವಿಶ್ವಕಪ್ ಇತಿಹಾಸದಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನಾಡಿದ ಆಟಗಾರರ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ.

ಪೋರ್ಚುಗಲ್ ಪರ ವಿಶ್ವಕಪ್ ನಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನು ಆಡಿದ ದಾಖಲೆಯೂ ಅವರ ಹೆಸರಲ್ಲಿದೆ. 2006ರಲ್ಲಿ ಜರ್ಮನಿಯಲ್ಲಿ ಆರಂಭವಾದ ಅವರ ವಿಶ್ವಕಪ್ ಪಯಣ, 2010ರ ದಕ್ಷಿಣ ಆಫ್ರಿಕಾ, 2014ರ ಬ್ರೆಝಿಲ್, 2018ರ ರಷ್ಯಾ, 2022ರ ಖತರ್ ಹಾಗೂ 2026ರ ಉತ್ತರ ಅಮೆರಿಕ ಆವೃತ್ತಿಯವರೆಗೆ ಮುಂದುವರಿಯಿತು.

►5. ವಿಶ್ವಕಪ್ ನಲ್ಲಿ ಪೋರ್ಚುಗಲ್ ನ ಗರಿಷ್ಠ ಗೋಲು ಸರದಾರ – 11 ಗೋಲುಗಳು

ಆರು ವಿಶ್ವಕಪ್ ಆವೃತ್ತಿಗಳಲ್ಲಿ ಒಟ್ಟು 11 ಗೋಲುಗಳನ್ನು ಬಾರಿಸಿರುವ ರೊನಾಲ್ಡೊ, ಟೂರ್ನಿಯಲ್ಲಿ ಪೋರ್ಚುಗಲ್ ಪರ ಅತಿ ಹೆಚ್ಚು ಗೋಲು ಗಳಿಸಿದ ಆಟಗಾರನಾಗಿದ್ದಾರೆ. 2006ರ ಚೊಚ್ಚಲ ವಿಶ್ವಕಪ್‌ ನಿಂದ ಹಿಡಿದು 2026ರ ಕೊನೆಯ ಪಂದ್ಯದವರೆಗೆ ಅವರ ಈ ಗೋಲುಗಳು ಬಂದಿವೆ. ಈ ಸಾಧನೆಯು ಅವರನ್ನು ವಿಶ್ವಕಪ್ ಇತಿಹಾಸದ ಶ್ರೇಷ್ಠ ಗೋಲ್ ಸ್ಕೋರರ್ಗಳ ಸಾಲಿನಲ್ಲಿ ನಿಲ್ಲಿಸಿದೆ.

6. UEFA ಯುರೋಪಿಯನ್ ಚಾಂಪಿಯನ್‌ ಶಿಪ್ ಫೈನಲ್ ಟೂರ್ನಿಗಳಲ್ಲಿ ಅತಿ ಹೆಚ್ಚು ಗೋಲುಗಳು – 14

UEFA ಯುರೋಪಿಯನ್ ಚಾಂಪಿಯನ್‌ ಶಿಪ್ ನ ಪ್ರಮುಖ ಕೂಟಗಳಲ್ಲಿ ಒಟ್ಟು 14 ಗೋಲು ಬಾರಿಸಿರುವ ರೊನಾಲ್ಡೊ, ಅತಿ ಹೆಚ್ಚು ಗೋಲು ಗಳಿಸಿದ ವಿಶ್ವದಾಖಲೆಯನ್ನು ಹೊಂದಿದ್ದಾರೆ.

ಈ ಕೂಟದ ಆರು ಆವೃತ್ತಿಗಳಲ್ಲಿ ಆಡಿರುವ ಅವರು, ಅತಿ ಹೆಚ್ಚು ಆವೃತ್ತಿಗಳಲ್ಲಿ ಭಾಗವಹಿಸಿದ ದಾಖಲೆಯನ್ನೂ ಬರೆದಿದ್ದಾರೆ. 2004ರಲ್ಲಿ ಸ್ವದೇಶದಲ್ಲಿ ಪೋರ್ಚುಗಲ್ ಫೈನಲ್ ತಲುಪಿದಾಗ ಮೊದಲ ಬಾರಿಗೆ ಕಣಕ್ಕಿಳಿದಿದ್ದ ಅವರು, ನಂತರ 2008, 2012, 2016, 2020 ಮತ್ತು 2024ರ ಕೂಟಗಳಲ್ಲೂ ದೇಶವನ್ನು ಪ್ರತಿನಿಧಿಸಿದರು. ಆರು ಆವೃತ್ತಿಗಳಲ್ಲಿ ಅವರ ಈ ದಾಖಲೆ ನಿರ್ಮಾಣದ ಪಯಣವು ಕೂಟದ ಆಧುನಿಕ ಇತಿಹಾಸದಲ್ಲಿ ಅವರನ್ನು ಅತ್ಯಂತ ಪ್ರಭಾವಿ ಆಟಗಾರನಾಗಿ ರೂಪಿಸಿತು.

►7. ಯುರೋಪಿಯನ್ ಚಾಂಪಿಯನ್‌ ಶಿಪ್ ಫೈನಲ್ ಟೂರ್ನಿಗಳಲ್ಲಿ ಅತಿ ಹೆಚ್ಚು ಪಂದ್ಯಗಳು – 30

ಆರು ಟೂರ್ನಿಗಳಾದ್ಯಂತ ರೊನಾಲ್ಡೊ 30 ಪಂದ್ಯಗಳನ್ನು ಆಡಿದ್ದು, ಇದು ಯುರೋಪಿಯನ್ ಚಾಂಪಿಯನ್‌ ಶಿಪ್ ಇತಿಹಾಸದಲ್ಲೇ ಅತ್ಯಧಿಕ ಸಂಖ್ಯೆಯಾಗಿದೆ. 2004ರಲ್ಲಿ ಯುವ ಫಾರ್ವರ್ಡ್ ಆಟಗಾರನಾಗಿ ಆರಂಭಿಸಿ, ನಂತರ ತಂಡದ ನಾಯಕನಾಗಿ ಎರಡು ದಶಕಗಳ ಕಾಲ ಈ ಕೂಟದಲ್ಲಿ ಅವರು ತೋರಿದ ನಿರಂತರ ಭಾಗವಹಿಸುವಿಕೆಗೆ ಈ ಸಾಧನೆ ಸಾಕ್ಷಿಯಾಗಿದೆ.

►8. ಅರ್ಹತಾ ಪಂದ್ಯಗಳು ಸೇರಿ ಯುರೋಪಿಯನ್ ಚಾಂಪಿಯನ್‌ ಶಿಪ್ ನಲ್ಲಿ ಅತಿ ಹೆಚ್ಚು ಗೋಲುಗಳು – 55

ರೊನಾಲ್ಡೊ ಅವರ ಯುರೋಪಿಯನ್ ಚಾಂಪಿಯನ್‌ ಶಿಪ್ ಗೋಲುಗಳ ದಾಖಲೆಯು ಫೈನಲ್ ಪಂದ್ಯಾವಳಿಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಅರ್ಹತಾ ಪಂದ್ಯಗಳನ್ನೂ ಒಳಗೊಂಡಂತೆ ಅವರು ಒಟ್ಟು 55 ಗೋಲುಗಳನ್ನು ಗಳಿಸಿದ್ದು, ಇದು ಕೂಟದ ಇತಿಹಾಸದಲ್ಲೇ ಗರಿಷ್ಠ ಮೊತ್ತವಾಗಿದೆ. ಪ್ರಮುಖ ಟೂರ್ನಿಯ 14 ಗೋಲುಗಳು ಮತ್ತು ಪೋರ್ಚುಗಲ್ ಅರ್ಹತೆ ಪಡೆಯಲು ನೆರವಾದ ಅರ್ಹತಾ ಪಂದ್ಯಗಳ ಗೋಲುಗಳು ಇದರಲ್ಲಿ ಸೇರಿವೆ.

►9. ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು ಹ್ಯಾಟ್ರಿಕ್ಗಳು – 10

ಪುರುಷರ ಅಂತರರಾಷ್ಟ್ರೀಯ ಫುಟ್ಬಾಲ್ ನಲ್ಲಿ ಅತಿ ಹೆಚ್ಚು, ಅಂದರೆ 10 ಹ್ಯಾಟ್ರಿಕ್ ಗೋಲುಗಳನ್ನು ಬಾರಿಸಿದ ದಾಖಲೆಯೂ ರೊನಾಲ್ಡೊ ಅವರ ಹೆಸರಲ್ಲಿದೆ.

►10. ಪೋರ್ಚುಗಲ್ ಪರ ಸತತ 23 ಕ್ಯಾಲೆಂಡರ್ ವರ್ಷಗಳಲ್ಲಿ ಗೋಲು – 2004ರಿಂದ 2026ರವರೆಗೆ

ರೊನಾಲ್ಡೊ 2004ರಿಂದ 2026ರವರೆಗೆ ಸತತ 23 ಕ್ಯಾಲೆಂಡರ್ ವರ್ಷಗಳಲ್ಲಿ ಪೋರ್ಚುಗಲ್ ಪರ ಗೋಲು ಬಾರಿಸಿದ್ದಾರೆ.

ಅವರ ಅಂತರರಾಷ್ಟ್ರೀಯ ವೃತ್ತಿಜೀವನವು ಆಗಸ್ಟ್ 2003ರಲ್ಲಿ ಪ್ರಾರಂಭವಾಯಿತು. ಆದರೆ, ಸತತ ವರ್ಷಗಳಲ್ಲಿ ಗೋಲು ಗಳಿಸುವ ಅವರ ಈ ಸರಣಿಯು ಮರುವರ್ಷದಿಂದ ಶುರುವಾಗಿ, ಅವರ ಅಂತಿಮ ಋತುವಿನವರೆಗೆ ಯಾವುದೇ ಅಡಚಣೆಯಿಲ್ಲದೆ ಮುಂದುವರಿಯಿತು.

►ಪೋರ್ಚುಗಲ್ ಪರ ಮೂರು ಪ್ರಮುಖ ಅಂತರರಾಷ್ಟ್ರೀಯ ಟ್ರೋಫಿಗಳು

ರೊನಾಲ್ಡೊ ಅವರ ವೈಯಕ್ತಿಕ ದಾಖಲೆಗಳ ಜೊತೆಗೆ ಪೋರ್ಚುಗಲ್ ಪಡೆದ ಮೂರು ಪ್ರಮುಖ ಪ್ರಶಸ್ತಿಗಳೂ ಸೇರಿವೆ. ಇವು ಆಯಾ ಕೂಟಗಳಲ್ಲಿ ದೇಶದ ಹಿರಿಯರ ಫುಟ್ಬಾಲ್ ಇತಿಹಾಸದಲ್ಲೇ ಬಂದ ಮೊದಲ ಅಂತರರಾಷ್ಟ್ರೀಯ ಟ್ರೋಫಿಗಳಾಗಿವೆ.

►UEFA ಯುರೋಪಿಯನ್ ಚಾಂಪಿಯನ್‌ ಶಿಪ್ – 2016:

ಫ್ರಾನ್ಸ್ನಲ್ಲಿ ನಡೆದ ಪಂದ್ಯಾವಳಿಯಲ್ಲಿ ರೊನಾಲ್ಡೊ ನಾಯಕತ್ವದಲ್ಲಿ ಪೋರ್ಚುಗಲ್ ತನ್ನ ಮೊದಲ ಯುರೋಪಿಯನ್ ಚಾಂಪಿಯನ್‌ ಶಿಪ್ ಪ್ರಶಸ್ತಿ ಮುಡಿಗೇರಿಸಿಕೊಂಡಿತು. ಫೈನಲ್ ನಲ್ಲಿ ಮೊಣಕಾಲಿನ ಗಾಯದಿಂದಾಗಿ ರೊನಾಲ್ಡೊ ಮೊದಲಾರ್ಧದಲ್ಲೇ ಮೈದಾನದಿಂದ ಹೊರನಡೆಯಬೇಕಾಯಿತು. ಹೀಗಿದ್ದರೂ, ಆತಿಥೇಯ ಫ್ರಾನ್ಸ್ ತಂಡವನ್ನು ಹೆಚ್ಚುವರಿ ಸಮಯದಲ್ಲಿ 1-0 ಅಂತರದಲ್ಲಿ ಪೋರ್ಚುಗಲ್ ಸೋಲಿಸಿತು. ಮೈದಾನದ ಹೊರಗಿನಿಂದಲೇ ರೊನಾಲ್ಡೊ ತಂಡಕ್ಕೆ ನಿರಂತರ ಪ್ರೋತ್ಸಾಹ ನೀಡಿದರು.

►UEFA ನೇಷನ್ಸ್ ಲೀಗ್ – 2019: ಸ್ವದೇಶದಲ್ಲೇ ನಡೆದ ಚೊಚ್ಚಲ ಆವೃತ್ತಿಯ ನೇಷನ್ಸ್ ಲೀಗ್ ಕೂಟವನ್ನು ಪೋರ್ಚುಗಲ್ ಗೆದ್ದುಕೊಂಡಿತು. ಪೋರ್ಟೊದಲ್ಲಿ ನಡೆದ ಫೈನಲ್ ನಲ್ಲಿ ನೆದರ್ಲ್ಯಾಂಡ್ಸ್ ತಂಡವನ್ನು 1-0 ಅಂತರದಿಂದ ಮಣಿಸಿತು. ನಾಯಕನಾಗಿ ರೊನಾಲ್ಡೊ ತಂಡವನ್ನು ಪ್ರಶಸ್ತಿಯತ್ತ ಮುನ್ನಡೆಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.

►UEFA ನೇಷನ್ಸ್ ಲೀಗ್ – 2025: ಪೋರ್ಚುಗಲ್ 2025ರಲ್ಲಿ ತನ್ನ ಎರಡನೇ ನೇಷನ್ಸ್ ಲೀಗ್ ಪ್ರಶಸ್ತಿಯನ್ನು ವಶಪಡಿಸಿಕೊಂಡಿತು. ಇದರೊಂದಿಗೆ ನಾಯಕನಾಗಿ ರೊನಾಲ್ಡೊ ಮೂರನೇ ಪ್ರಮುಖ ಅಂತರರಾಷ್ಟ್ರೀಯ ಟ್ರೋಫಿ ಎತ್ತಿಹಿಡಿದರು. 2026ರ ವಿಶ್ವಕಪ್‌ ನಿಂದ ಪೋರ್ಚುಗಲ್ ಹೊರಬಿದ್ದ ನಂತರ, ಅವರು ತಮ್ಮ ದೇಶಕ್ಕಾಗಿ ಗೆದ್ದುಕೊಟ್ಟ ಈ ಮೂರು ಪ್ರಶಸ್ತಿಗಳನ್ನು ಸ್ಮರಿಸಿದ್ದರು.