ಧರ್ಮಸ್ಥಳ ಸರಣಿ ಹತ್ಯೆ ಪ್ರಕರಣ: ಕೇರಳ ಸರ್ಕಾರದ ಮಧ್ಯಪ್ರವೇಶಕ್ಕೆ ಸುಪ್ರೀಂ ಕೋರ್ಟ್ ವಕೀಲರ ಆಗ್ರಹ

ಧರ್ಮಸ್ಥಳದಲ್ಲಿ ನಡೆದಿದೆ ಎನ್ನಲಾಗುತ್ತಿರುವ ಸರಣಿ ಹತ್ಯೆಗಳು ಮತ್ತು ಅಲ್ಲಿ ಶವಗಳನ್ನು ಹೂತು ಹಾಕಲಾಗಿದೆ ಎನ್ನಲಾದ ಪ್ರಕರಣ ಸಂಬಂಧ ಮತ್ತೊಂದು ಬೆಳವಣಿಗೆ ನಡೆದಿದೆ. ಪ್ರಕರಣ ಸಂಬಂಧ ಕೇರಳ ಸರಕಾರ ಮದ್ಯ ಪ್ರವೇಶಿಸುವಂತೆಯೂ, ಪ್ರಕರಣದ ತನಿಖೆ ಸಂಬಂಧ ಕೇರಳ ವಿಧಾನಸಭೆಯಲ್ಲಿ ನಿರ್ಣಯ ಅಂಗೀಕರಿಸುವಂತೆ ಸುಪ್ರೀಮ್ ಕೋರ್ಟ್ ವಕೀಲರಾದ ಕೆ ವಿ ಧನಂಜಯ ಆಗ್ರಹಿಸಿದ್ದಾರೆ.

ಧರ್ಮಸ್ಥಳಕ್ಕೆ ಕೇವಲ ಕರ್ನಾಟಕದಿಂದ ಮಾತ್ರ ಜನ ಬರುತ್ತಿಲ್ಲ. ಅಲ್ಲಿಗೆ ಕೇರಳ ಸಹಿತ ವಿವಿಧ ರಾಜ್ಯಗಳಿಂದ ಜನ ಬರುತ್ತಾರೆ. ಹೀಗಾಗಿ ಅಲ್ಲಿ ಮೃತಪಟ್ಟವರು, ಹೂತುಹಾಕಲ್ಪಟ್ಟವರ ಪೈಕಿ ಕೇರಳದವರು ಇರಬಹುದು. ಹಾಗಾಗಿ ಈ ತನಿಖೆಯಲ್ಲಿ ಕೇರಳ ಸರಕಾರವು ಭಾಗಿಯಾಗಬೇಕು. ಕೇರಳ ಪೊಲೀಸರಿಗೆ ಈಗ ನಡೆಯುತ್ತಿರುವ ತನಿಖೆಯಲ್ಲಿ ನೆರವಾಗಲು ಅವಕಾಶ ನೀಡುವಂತೆ ವಕೀಲ ಕೆವಿ ಧನಂಜಯ ಶಿಫಾರಸು ಮಾಡಿದ್ದಾರೆ.

ಇದಕ್ಕೆ ಕೇರಳ ಸರ್ಕಾರವು ಸುಪ್ರೀಂ ಕೋರ್ಟ್ ಅನ್ನು ಸಂಪರ್ಕಿಸುವ ಅಗತ್ಯವಿದೆ. ಯಾವುದೇ ವಿಳಂಬವಿಲ್ಲದೆ ಇದನ್ನು ಮಾಡಬೇಕು ಎಂದು ಧನಂಜಯ್ ತಮ್ಮ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಇದು ಕರ್ನಾಟಕ ಪೊಲೀಸರ ತನಿಖೆಯ ನಂಬಿಕೆ, ಅಪನಂಬಿಕೆಯ ವಿಚಾರವಲ್ಲ. ಇಲ್ಲಿ ದೂರದಾರನ ಆರೋಪ ಸತ್ಯವೇ ಆಗಿದ್ದಲ್ಲಿ, ಅಲ್ಲಿ ಇತರ ರಾಜ್ಯಗಳ ಸಂತ್ರಸ್ತರು ಇದ್ದಲ್ಲಿ ಆ ರಾಜ್ಯಗಳ ಪ್ರಶ್ನೆಗೆ ಉತ್ತರಿಸಬೇಕಾದ ಜವಾಬ್ದಾರಿಯು ಕರ್ನಾಟಕ ಸರಕಾರದ ಮೇಲಿದೆ. ಈ ನಿಟ್ಟಿನಲ್ಲಿ ತನಿಖೆಗೆ ಕೇರಳ ಪೊಲೀಸರ ಸಹಕಾರವನ್ನು ರಾಜ್ಯ ಸರಕಾರ ಪಡೆಯುವುದು ಉತ್ತಮ ಎಂದು ಅವರು ಹೇಳಿದ್ದಾರೆ.

ಒಂದು ರಾಜ್ಯದೊಳನೆ ನಡೆದ ಕ್ರಿಮಿನಲ್ ಪ್ರಕರಣಗಳ ತನಿಖೆಯನ್ನು ಆ ರಾಜ್ಯದ ಗೃಹ ಇಲಾಖೆಯ ಕಾರ್ಯಕ್ಷೇತ್ರವೆಂದು ಪರಿಗಣಿಸಲಾಗುತ್ತದೆ.

ಆದರೆ, ಭಾರತದ ಸಂವಿಧಾನವು ರಾಜ್ಯಗಳ ನಡುವೆ ಇಂತಹ ಪ್ರತ್ಯೇಕತೆಯನ್ನು ಬೆಂಬಲಿಸುವುದಿಲ್ಲ. ಭಾರತವು ರಾಜ್ಯಗಳ ಒಕ್ಕೂಟವಾಗಿದ್ದು, ಕರ್ನಾಟಕವು 28 ರಾಜ್ಯಗಳಲ್ಲಿ ಒಂದಾಗಿದೆ. ಧರ್ಮಸ್ಥಳಕ್ಕೆ ದೇಶದೆಲ್ಲೆಡೆಯಿಂದ ಯಾತ್ರಾರ್ಥಿಗಳು ಭೇಟಿ ನೀಡುತ್ತಾರೆ. ಈ ನಿಟ್ಟಿನಲ್ಲಿ ಅಲ್ಲಿ ಮೃತಪಟ್ಟವರಲ್ಲಿ ಇತರ ರಾಜ್ಯದವರೂ ಇರಬಹುದೆಂದು ವಕೀಲ ಕೆವಿ ಧನಂಜಯ ಶಂಕಿಸಿದ್ದಾರೆ.

ಈ ಪ್ರಕರಣ ಸಂಬಂಧ ಕೇರಳದ ಮಾಧ್ಯಮಗಳು ಮುತುವರ್ಜಿಯಿಂದ ಸುದ್ದಿ ಮಾಡಿದ್ದು , ಪ್ರಕರಣದ ಗಂಭೀರತೆ ಅಲ್ಲಿನ ಸರಕಾರಕ್ಕೆ ತಿಳಿದಿರಬಹುದು. ಹೀಗಾಗಿ ಕೇರಳ ಸರಕಾರವು ರಾಜಕೀಯ ರಹಿತವಾಗಿ ಈ ವಿಚಾರಕ್ಕೆ ಮಧ್ಯಪ್ರವೇಶಿಸಬೇಕಿದೆ. ಈ ನಿಟ್ಟಿನಲ್ಲಿ ಶಾಸಕಾಂಗದ ಒಮ್ಮತದಿಂದ, ಆದ್ಯತೆಯ ಮೇರೆಗೆ ಕೇರಳ ವಿಧಾನಸಭೆಯ ಸರ್ವಾನುಮತದ ಅಥವಾ ಬಹುಮತದ ನಿರ್ಣಯದ ರೂಪದಲ್ಲಿ ಬೆಂಬಲಿತವಾಗಿರಬೇಕು. ಇಂತಹ ನಿರ್ಣಯವು ಪ್ರಜಾಪ್ರಭುತ್ವದ ನ್ಯಾಯಸಮ್ಮತತೆಯನ್ನು ಪ್ರದರ್ಶಿಸುತ್ತದೆ ಮತ್ತು ಕೇರಳಕ್ಕೆ ನ್ಯಾಯದ ಹಿತಾಸಕ್ತಿಯಲ್ಲಿ ತನಿಖೆಗೆ ನೆರವಾಗುವ ಪಾತ್ರವನ್ನು ಪಡೆಯಲು ಸುಪ್ರೀಂ ಕೋರ್ಟ್ ಅನ್ನು ಸಂಪರ್ಕಿಸಲು ಅನುವು ಮಾಡಿಕೊಡುತ್ತದೆ ಎಂದು ವಕೀಲ ಕೆವಿ ಧನಂಜಯ ವಿವರಿಸಿದ್ದಾರೆ.

ಇಂತಹ ಸಂದರ್ಭದಲ್ಲಿ ಕರ್ನಾಟಕವು ಅದನ್ನು ಹಸ್ತಕ್ಷೇಪವೆಂದು ಪರಿಗಣಿಸಬಾರದು. ಬದಲಾಗಿ, ಅಂತಹ ಒಳಗೊಳ್ಳುವಿಕೆಯನ್ನು ಅಂತರ-ರಾಜ್ಯ ವಿಶ್ವಾಸವನ್ನು ಬೆಳೆಸಲು, ಸಾರ್ವಜನಿಕರಿಗೆ ಭರವಸೆ ನೀಡಲು ಮತ್ತು ತನ್ನದೇ ಪ್ರಕ್ರಿಯೆಯ ನ್ಯಾಯಸಮ್ಮತತೆಯನ್ನು ಬಲಪಡಿಸಲು ಒಂದು ಅವಕಾಶವಾಗಿ ನೋಡಬೇಕು ಎಂದು ಅವರು ಹೇಳಿದ್ದಾರೆ.

ಮುಂದೊಂದು ದಿನ ಈ ಪ್ರಕರಣದ ತನಿಖೆಯ ಬಗ್ಗೆ ಇತರ ರಾಜ್ಯಗಳು ಸಂಶಯ ವ್ಯಕ್ತಪಡಿಸಿದರೆ, ಅಥವಾ ತನಿಖೆಯ ಮಾಹಿತಿ ಕೇಳಿದರೆ ರಾಜ್ಯ ಸರಕಾರಕ್ಕೆ ಅದನ್ನು ನೀಡುವ ಜವಾಬ್ದಾರಿ ಇರುತ್ತದೆ. ಈ ಸಂದರ್ಭದಲ್ಲಿ ರಾಜ್ಯ ಸರಕಾರಕ್ಕೆ ತನ್ನ ಪಾರದರ್ಶಕತೆಯನ್ನು ಪ್ರಕಟಿಸಲು ಈ ರೀತಿಯ ನಡೆ ನೆರವಾಗುತ್ತದೆ ಎಂದು ಅವರು ಹೇಳಿದ್ದಾರೆ.

ಈ ಪ್ರಕರಣದ ತನಿಖೆ ಸಂಬಂಧ ವಿಶೇಷ ತನಿಖಾ ತಂಡ ರಚಿಸಬೇಕೆಂದು ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ನಾಗಲಕ್ಷ್ಮಿ ಚೌಧರಿ ಒತ್ತಾಯಿಸಿದ್ದರು. ನಿವೃತ್ತ ಪೊಲೀಸ್ ಅಧಿಕಾರಿ ಪ್ರಣಬ್ ಮೊಹಾಂತಿ ನೇತೃತ್ವದಲ್ಲಿ ವಿಶೇಷ ತನಿಖಾ ತಂಡ ರಚಿಸಿ ತನಿಖೆ ನಡೆಸಬೇಕೆಂದು ದೂರುದಾರನ ವಕೀಲರು ಆಗ್ರಹಿಸಿದ್ದರು. ಅದೇ ಆಗ್ರಹವನ್ನು ರಾಜ್ಯದ ಹಿರಿಯ ವಕೀಲರುಗಳ ತಂಡವೂ ಸಿಎಂ ಅವರನ್ನು ಭೇಟಿ ಮಾಡಿ ಆಗ್ರಹಿಸಿತ್ತು.

ಇದರ ಬೆನ್ನಲ್ಲೇ ಗುರುವಾರ ಸುಪ್ರೀಂ ಕೋರ್ಟ್ ನಿವೃತ್ತ ನ್ಯಾಯ ಮೂರ್ತಿ ಗೋಪಾಲ್ ಗೌಡ ಈ ಪ್ರಕರಣ ಸಂಬಂಧ ಮಾತನಾಡಿದ್ದು , ಪ್ರಕರಣದ ತನಿಖೆಗೆ ವಿಶೇಷ ತನಿಖಾ ತಂಡ ರಚಿಸಬೇಕೆಂದು ಒತ್ತಾಯಿಸಿದ್ದಾರೆ. ಕೇಂದ್ರ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಅನ್ನಪೂರ್ಣ ದೇವಿಯವರೂ ಈ ಪ್ರಕರಣದ ಸಮಗ್ರ ತನಿಖೆ ನಡೆಯಬೇಕು ಎಂದು ರಾಜ್ಯ ಸರಕಾರವನ್ನು ಆಗ್ರಹಿಸಿದ್ದಾರೆ.

ಈ ಪ್ರಕರಣದ ಬಗ್ಗೆ ಈಗಾಗಲೇ ಕೇರಳದ ಹಲವು ಟಿವಿ ಚಾನಲ್ ಗಳಲ್ಲಿ ನಿರಂತರ ವರದಿಗಳು ಪ್ರಸಾರ ಆಗುತ್ತಿವೆ. ಘಟನೆಯ ಪ್ರತಿಯೊಂದು ಬೆಳವಣಿಗೆಯನ್ನು ಕೇರಳದ ಟಿವಿ ಚಾನಲ್ ಗಳು ಅಲ್ಲಿನ ಜನರ ಮುಂದಿಡುತ್ತಿವೆ. ಇವೆಲ್ಲದರ ನಡುವೆ ಈಗ ಪ್ರಕರಣದ ತನಿಖೆಯಲ್ಲಿ ಕೇರಳ ಸರ್ಕಾರದ ಮಧ್ಯಪ್ರವೇಶಕ್ಕೆ ಸುಪ್ರೀಂ ಕೋರ್ಟ್ ವಕೀಲರು ಆಗ್ರಹಿಸಿದ್ದು, ಕೇರಳ ಸರಕಾರ ಇದಕ್ಕೆ ಪ್ರತಿಕ್ರಿಯಿಸುತ್ತಾ ಎಂಬುದು ಕುತೂಹಲ ಮೂಡಿಸಿದೆ.

ವಕೀಲ ಧನಂಜಯ್ ಅವರ ಬೇಡಿಕೆಯ ಬಗ್ಗೆ ಫೇಸ್ ಬುಕ್ ಪೋಸ್ಟ್ ಮಾಡಿರುವ ಬಿಜೆಪಿ ಹಿರಿಯ ನಾಯಕ ಮಾಜಿ ಸಚಿವ ಸುರೇಶ್ ಕುಮಾರ್ ಅವರು ಕೇರಳ ಸರಕಾರಕ್ಕೆ ಈ ಕುರಿತು ಮನವಿ ಮಾಡುವ ಅಗತ್ಯವೇನಿತ್ತು? ಈ ಮನವಿ ಅನೇಕ ಸಂಶಯಗಳಿಗೆ ಆಸ್ಪದ ಕೊಡುತ್ತದೆ ಎಂದು ಹೇಳಿದ್ದಾರೆ. ಸುರೇಶ್ ಕುಮಾರ್ ಅವರ ಫೇಸ್ ಬುಕ್ ಪೋಸ್ಟ್ ಗೆ ಪ್ರತಿಕ್ರಿಯೆ ನೀಡಿರುವ ಜನರಲ್ಲಿ ಕೆಲವರು ಅವರ ಹೇಳಿಕೆಯನ್ನು ಬೆಂಬಲಿಸಿದರೆ ಹೆಚ್ಚಿನವರು ಅವರ ನಿಲುವನ್ನು ಟೀಕಿಸಿದ್ದಾರೆ. ನೀವು ಈವರೆಗೆ ಎಲ್ಲಿದ್ದಿರಿ? ಈಗ ಯಾಕೆ ಹೀಗೆ ಹೇಳುತ್ತಿದ್ದೀರಿ ಎಂದು ಅವರನ್ನೇ ಪ್ರಶ್ನಿಸಿದ್ದಾರೆ.