Flydubai ಘಟನೆ ಬೆನ್ನಲ್ಲೇ ಮುನ್ನೆಲೆಗೆ ಬಂದ ವಿಮಾನಯಾನ ಇತಿಹಾಸದ ಕರಾಳ ಪ್ರಕರಣಗಳ ಬಗ್ಗೆ ಗೊತ್ತಾ?

ಹೊಸದಿಲ್ಲಿ: ದುಬೈನಿಂದ ಟೆಲ್ ಅವೀವ್ ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ಕಾಕ್ ಪಿಟ್ನಲ್ಲೇ ಕ್ಯಾಪ್ಟನ್ ಗೆ ಚಾಕು ಇರಿತದ ಘಟನೆ, ವಿಮಾನಯಾನ ಭದ್ರತೆ ಕುರಿತು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಈ ಹಿಂದೆಯೂ ಕಾಕ್ ಪಿಟ್ ನಲ್ಲಿ ಪೈಲಟ್ ಗಳು, ಸಿಬ್ಬಂದಿ ಅಥವಾ ಪ್ರಯಾಣಿಕರಿಂದ ನಡೆದ ಹಿಂಸಾಚಾರದ ಘಟನೆಗಳು ಭೀಕರ ದುರಂತಗಳಿಗೆ ಕಾರಣವಾಗಿವೆ.

►ಫ್ಲೈದುಬೈ FZ1073 | 2026

ಕ್ಯಾಪ್ಟನ್ ಗೆ ಚಾಕು ಇರಿತ; ತಪ್ಪಿತು ಭಾರಿ ದುರಂತ

ದುಬೈನಿಂದ ಟೆಲ್ ಅವೀವ್ ಗೆ ತೆರಳುತ್ತಿದ್ದ ಫ್ಲೈದುಬೈ FZ1073 ವಿಮಾನದಲ್ಲಿ ಕ್ಯಾಪ್ಟನ್ ಸ್ಮಿತ್ ಮಚ್ಛಾರ್ ಮತ್ತು ಸಹ–ಪೈಲಟ್ ನಡುವೆ ಕಾಕ್ಪಿಟ್ ನಲ್ಲಿ ಹಿಂಸಾತ್ಮಕ ಘಟನೆ ನಡೆಯಿತು. ಸಹ–ಪೈಲಟ್ ಕ್ಯಾಪ್ಟನ್ಗೆ ಚಾಕುವಿನಿಂದ ಇರಿದ ಬಳಿಕ ವಿಮಾನ ತೀವ್ರವಾಗಿ ಎತ್ತರ ಕಳೆದುಕೊಂಡಿತು. ಸುಮಾರು ಒಂದು ನಿಮಿಷದಲ್ಲಿ ವಿಮಾನ 33,000 ಅಡಿಯಿಂದ 17,000 ಅಡಿಗೆ ಇಳಿಯಿತು.

ಗಾಯಗೊಂಡಿದ್ದರೂ ಮಚ್ಛಾರ್ ಕಾಕ್ಪಿಟ್ ಬಾಗಿಲು ತೆರೆಯುವಲ್ಲಿ ಯಶಸ್ವಿಯಾದರು. ಇದರಿಂದ ಪ್ರಯಾಣಿಕರು ಮತ್ತು ಸಿಬ್ಬಂದಿ ಕಾಕ್ ಪಿಟ್ ಗೆ ಪ್ರವೇಶಿಸಿ ಸಹ–ಪೈಲಟ್ ನನ್ನು ನಿಯಂತ್ರಿಸಲು ಸಾಧ್ಯವಾಯಿತು. ಬಳಿಕ ವಿಮಾನದಲ್ಲಿದ್ದ ಇತರ ಪೈಲಟ್ ಗಳು ನಿಯಂತ್ರಣ ಪಡೆದು ಸೌದಿ ಅರೇಬಿಯದ ತಬುಕ್ನಲ್ಲಿ ವಿಮಾನವನ್ನು ಸುರಕ್ಷಿತವಾಗಿ ಇಳಿಸಿದರು. ವಿಮಾನದಲ್ಲಿದ್ದ 174 ಮಂದಿ ಸುರಕ್ಷಿತವಾಗಿ ಪಾರಾದರು.

ಘಟನೆಯ ಉದ್ದೇಶವೇನು ಮತ್ತು ಸಹ–ಪೈಲಟ್ ಈ ಕೃತ್ಯ ಎಸಗಲು ಕಾರಣವೇನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಘಟನೆಯ ಕುರಿತು ತನಿಖೆ ಮುಂದುವರಿದಿದೆ.

►ಜಪಾನ್ ಏರ್ ಲೈನ್ಸ್ ಫ್ಲೈಟ್ 350 | 1982

ಕ್ಯಾಪ್ಟನ್ ನಿಂದಲೇ ವಿಮಾನ ಪತನಕ್ಕೆ ಯತ್ನ:

ಕ್ಯಾಪ್ಟನ್ ಸೀಜಿ ಕಟಗಿರಿ ಉದ್ದೇಶಪೂರ್ವಕವಾಗಿ ವಿಮಾನವನ್ನು ಕೆಳಮುಖವಾಗಿ ತಿರುಗಿಸಿದರು. ಟೋಕಿಯೊ ಸಮೀಪಿಸುತ್ತಿದ್ದಾಗ ಥ್ರಸ್ಟ್ ರಿವರ್ಸರ್ ಗಳನ್ನು ಸಕ್ರಿಯಗೊಳಿಸಿದರು. ಮೊದಲ ಅಧಿಕಾರಿ ಅವರ ನಿಯಂತ್ರಣದ ಪ್ರಯತ್ನವನ್ನು ತಡೆಯಲು ಮುಂದಾದಾಗ, ಫ್ಲೈಟ್ ಇಂಜಿನಿಯರ್ ಕ್ಯಾಪ್ಟನ್ ರನ್ನು ದೈಹಿಕವಾಗಿ ತಡೆದರು.

ವಿಮಾನ ಹನೆಡಾ ಬಳಿ ಅಪಘಾತಕ್ಕೀಡಾಯಿತು. ವಿಮಾನದಲ್ಲಿದ್ದ 174 ಮಂದಿಯಲ್ಲಿ 24 ಮಂದಿ ಮೃತಪಟ್ಟರು. ಬಳಿಕ ಕಟಗಿರಿಯನ್ನು ಮಾನಸಿಕ ಅಸ್ವಸ್ಥತೆಯ ಕಾರಣದಿಂದ ತಪ್ಪಿತಸ್ಥರಲ್ಲ ಎಂದು ಘೋಷಿಸಲಾಯಿತು.

►ಪೆಸಿಫಿಕ್ ಸೌತ್ವೆಸ್ಟ್ ಏರ್ ಲೈನ್ಸ್ ಫ್ಲೈಟ್ 1771 | 1987

ಪ್ರಯಾಣಿಕನಾಗಿ ಬಂದ ಮಾಜಿ ಉದ್ಯೋಗಿಯ ದಾಳಿ:

ಅಸಮಾಧಾನಗೊಂಡ ಮಾಜಿ ಉದ್ಯೋಗಿಯೊಬ್ಬರು ಪ್ರಯಾಣಿಕನಾಗಿ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದರು. ಅವರು ತಮ್ಮ ಮಾಜಿ ಮೇಲ್ವಿಚಾರಕ ಹಾಗೂ ವಿಮಾನ ಸಿಬ್ಬಂದಿಯೊಬ್ಬರ ಮೇಲೆ ಗುಂಡು ಹಾರಿಸಿದರು. ಬಳಿಕ ವಿಮಾನ ಮಾರಣಾಂತಿಕವಾಗಿ ಕೆಳಮುಖವಾಗಿ ಧುಮುಕಿತು.

ವಿಮಾನದಲ್ಲಿದ್ದ ಎಲ್ಲ 43 ಮಂದಿ ಮೃತಪಟ್ಟರು.

►ಫೆಡ್ಎಕ್ಸ್ ಫ್ಲೈಟ್ 705 | 1994

ಜಂಪ್ ಸೀಟ್ ನಲ್ಲಿದ್ದ ಉದ್ಯೋಗಿಯಿಂದ ದಾಳಿ:

ಆಫ್–ಡ್ಯೂಟಿ ಫೆಡ್ಎಕ್ಸ್ ಉದ್ಯೋಗಿ ಆಬರ್ನ್ ಕ್ಯಾಲೋವೇ ಕಾಕ್ ಪಿಟ್ ನ ಜಂಪ್ ಸೀಟ್ ನಲ್ಲಿ ಪ್ರಯಾಣಿಸುತ್ತಿದ್ದರು. ವಿಮಾನವನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಯತ್ನಿಸಿದ ಅವರು, ಮೂವರು ವಿಮಾನ ಸಿಬ್ಬಂದಿಯ ಮೇಲೆ ಸುತ್ತಿಗೆ ಮತ್ತು ಇತರ ಆಯುಧಗಳಿಂದ ದಾಳಿ ನಡೆಸಿದರು.

ಸಿಬ್ಬಂದಿ ಅವರೊಂದಿಗೆ ಹೋರಾಡಿ ಅವರನ್ನು ನಿಯಂತ್ರಿಸಿದರು. ಬಳಿಕ ವಿಮಾನವನ್ನು ಮೆಂಫಿಸ್ನಲ್ಲಿ ಸುರಕ್ಷಿತವಾಗಿ ಇಳಿಸಲಾಯಿತು.

►ಜರ್ಮನ್ ವಿಂಗ್ಸ್ ಫ್ಲೈಟ್ 9525 | 2015

ಸಹ–ಪೈಲಟ್ ನಿಂದಲೇ 150 ಮಂದಿಯ ಸಾವು:

ಸಹ–ಪೈಲಟ್ ಆಂಡ್ರಿಯಾಸ್ ಲುಬಿಟ್ಜ್ ಕ್ಯಾಪ್ಟನ್ ರನ್ನು ಕಾಕ್ ಪಿಟ್ನಿಂದ ಹೊರಗೆ ಲಾಕ್ ಮಾಡಿದರು. ಬಳಿಕ A320 ವಿಮಾನವನ್ನು ಉದ್ದೇಶಪೂರ್ವಕವಾಗಿ ಫ್ರೆಂಚ್ ಆಲ್ಪ್ಸ್ಗೆ ಹಾರಿಸಿದರು. ವಿಮಾನದಲ್ಲಿದ್ದ ಎಲ್ಲ 150 ಮಂದಿ ಮೃತಪಟ್ಟರು.

ಗಂಭೀರ ಮಾನಸಿಕ ಅಸ್ವಸ್ಥತೆಯಿಂದ ಬಳಲುತ್ತಿದ್ದ ಪೈಲಟ್ ವಿಮಾನ ಹಾರಿಸುವುದನ್ನು ತಡೆಯುವಲ್ಲಿ ವೈದ್ಯಕೀಯ ಪ್ರಮಾಣೀಕರಣ ವ್ಯವಸ್ಥೆ ವಿಫಲವಾಗಿತ್ತು ಎಂದು ಫ್ರಾನ್ಸ್ ನ BEA ತನಿಖೆಯಲ್ಲಿ ತಿಳಿದುಬಂದಿತು.

►ಚೀನಾ ಈಸ್ಟರ್ನ್ ವಿಮಾನ MU5735 | 2022

ಇಂಧನ ಸ್ವಿಚ್ ಗಳು ‘CUTOFF’; 132 ಮಂದಿ ಸಾವು:

ಚೀನಾ ಈಸ್ಟರ್ನ್ ನ ಬೋಯಿಂಗ್ 737–800 ವಿಮಾನ ಮಾರಣಾಂತಿಕವಾಗಿ ಕೆಳಮುಖವಾಗಿ ಧುಮುಕುವ ಮುನ್ನ, ಎರಡೂ ಇಂಜಿನ್ ಗಳ ಇಂಧನ ಸ್ವಿಚ್ ಗಳನ್ನು ಕೈಯಾರೆ ‘CUTOFF’ ಸ್ಥಿತಿಗೆ ಬದಲಾಯಿಸಲಾಗಿತ್ತು ಎಂದು ಅಮೆರಿಕದ ರಾಷ್ಟ್ರೀಯ ಸಾರಿಗೆ ಸುರಕ್ಷತಾ ಮಂಡಳಿ (NTSB)ದ ದತ್ತಾಂಶ ತಿಳಿಸಿದೆ.

ಆದರೆ, ಆ ಬದಲಾವಣೆಗಳನ್ನು ನಿಖರವಾಗಿ ಯಾರು ಮಾಡಿದರು ಮತ್ತು ಏಕೆ ಮಾಡಿದರು ಎಂಬುದನ್ನು ಖಚಿತಪಡಿಸುವ ಅಂತಿಮ ತನಿಖಾ ವರದಿಯನ್ನು ಚೀನಾ ಇನ್ನೂ ಪ್ರಕಟಿಸಿಲ್ಲ. ಈ ದುರಂತದಲ್ಲಿ ವಿಮಾನದಲ್ಲಿದ್ದ ಎಲ್ಲ 132 ಮಂದಿ ಮೃತಪಟ್ಟರು.

ಸೌಜನ್ಯ: Aljazeera.com