E85 ಇಂಧನ ಬಿಡುಗಡೆ: ಈಗಿರುವ ವಾಹನಗಳಿಗೆ ಸಮಸ್ಯೆಯಾಗಲಿದೆಯೇ? ಯಾವ ವಾಹನಗಳಲ್ಲಿ E85 ಪೆಟ್ರೋಲ್ ಬಳಸಬಹುದು?

ಕೇಂದ್ರ ಸರ್ಕಾರವು E85 ಇಂಧನ ಬಳಕೆಯನ್ನು ಉತ್ತೇಜಿಸುತ್ತಿರುವುದರಿಂದ ಈಗ ಚಲಾವಣೆಯಲ್ಲಿರುವ ವಾಹನಗಳು ಸಮಸ್ಯೆಗೆ ಸಿಲುಕಲಿವೆ ಎಂಬ ವದಂತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುತ್ತಿವೆ. ಶೀಘ್ರದಲ್ಲೇ ಸಾಮಾನ್ಯ ಪೆಟ್ರೋಲ್ ಮತ್ತು ಡೀಸೆಲ್ ಪೂರೈಕೆಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗುತ್ತದೆ ಮತ್ತು ವಾಹನ ಮಾಲೀಕರು ತಮ್ಮ ವಾಹನಗಳಿಗೆ ಕಡ್ಡಾಯವಾಗಿ E85 ಇಂಧನವನ್ನೇ ತುಂಬಿಸಬೇಕಾಗುತ್ತದೆ ಎಂದು ಹಲವರು ಪ್ರತಿಪಾದಿಸುತ್ತಿದ್ದಾರೆ. ಆದರೆ, ಈ ಕುರಿತು ಸ್ಪಷ್ಟನೆ ನೀಡಿರುವ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವ ಹರ್ದೀಪ್ ಸಿಂಗ್ ಪುರಿ, E85 ಇಂಧನವು ಕೇವಲ ಒಂದು ನಿರ್ದಿಷ್ಟ ಮಾದರಿಯ ವಾಹನಗಳಿಗೆ ಮಾತ್ರ ಸೀಮಿತವಾಗಿದೆ ಎಂದು ಗೊಂದಲಗಳಿಗೆ ತೆರೆ ಎಳೆದಿದ್ದಾರೆ.

E85 ಇಂಧನ ಎಂದರೇನು? ಇದು E20 ಗಿಂತ ಹೇಗೆ ಭಿನ್ನ?

ವಿಶ್ವ ಪರಿಸರ ದಿನಾಚರಣೆಯ ಸಂದರ್ಭದಲ್ಲಿ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು E85 ಇಂಧನವನ್ನು ಬಿಡುಗಡೆ ಮಾಡಿದೆ. ಈ ಎರಡೂ ಇಂಧನಗಳ ನಡುವಿನ ಪ್ರಮುಖ ವ್ಯತ್ಯಾಸವೆಂದರೆ ಅವುಗಳ ಸಂಯೋಜನೆ ಮತ್ತು ವಾಹನಗಳ ಹೊಂದಾಣಿಕೆ. ಪ್ರಸ್ತುತ ಬಳಕೆಯಲ್ಲಿರುವ ಪ್ರಮಾಣಿತ E20 ಪೆಟ್ರೋಲ್ ಶೇಕಡಾ 20ರಷ್ಟು ಎಥನಾಲ್ ಮತ್ತು ಶೇಕಡಾ 80ರಷ್ಟು ಸಾಮಾನ್ಯ ಪೆಟ್ರೋಲ್ ಮಿಶ್ರಣವನ್ನು ಹೊಂದಿರುತ್ತದೆ. ಆದರೆ, ಹೊಸ E85 ಇಂಧನದಲ್ಲಿ ಈ ಸಮತೋಲನವು ಸಂಪೂರ್ಣ ಬದಲಾಗಿದ್ದು, ಶೇಕಡಾ 80ರಿಂದ 85ರಷ್ಟು ಎಥನಾಲ್ ಹಾಗೂ ಕೇವಲ ಶೇಕಡಾ 14ರಿಂದ 19ರಷ್ಟು ಪೆಟ್ರೋಲ್ ಮಿಶ್ರಣ ಇರಲಿದೆ.

ನಿಮ್ಮ ಹಳೆಯ ವಾಹನದಲ್ಲಿ E85 ಪೆಟ್ರೋಲ್ ಬಳಸಬಹುದೇ?

ಇಲ್ಲ, ಬಳಸಲು ಸಾಧ್ಯವಿಲ್ಲ. ಸಾಮಾನ್ಯ ಪೆಟ್ರೋಲ್ ವಾಹನಗಳಲ್ಲಿ E85 ಇಂಧನವನ್ನು ಬಳಸಲು ಬರುವುದಿಲ್ಲ. ಏಕೆಂದರೆ ಇದನ್ನು ಕೇವಲ ವಿಶೇಷವಾಗಿ ವಿನ್ಯಾಸಗೊಳಿಸಲಾದ 'ಫ್ಲೆಕ್ಸ್-ಫ್ಯುಯೆಲ್ ವಾಹನಗಳಿಗಾಗಿ' (FFVs) ಮಾತ್ರ ಸಿದ್ಧಪಡಿಸಲಾಗಿದೆ. ಗ್ರಾಹಕರು ಈ ಇಂಧನವನ್ನು ಹೆಚ್ಚಾಗಿ ಬಳಸುವಂತೆ ಪ್ರೋತ್ಸಾಹಿಸಲು, ಸರ್ಕಾರ E85 ಇಂಧನವನ್ನು ಸಾಮಾನ್ಯ ಪೆಟ್ರೋಲ್ ಬೆಲೆಗಿಂತ ಲೀಟರ್‌ಗೆ ಸುಮಾರು ₹20 ಅಗ್ಗವಾಗಿ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ದೆಹಲಿಯಲ್ಲಿ E85 ಇಂಧನದ ಬೆಲೆ ಲೀಟರ್‌ಗೆ ₹82.12 ಆಗಿದೆ.

ಕೇಂದ್ರ ಸರ್ಕಾರದ ದತ್ತಾಂಶಗಳ ಪ್ರಕಾರ, ಸಾಮಾನ್ಯ ಪಳೆಯುಳಿಕೆ ಆಧಾರಿತ ಇಂಧನಗಳಿಗೆ ಹೋಲಿಸಿದರೆ E85 ಇಂಧನ ಬಳಕೆಯಿಂದ ಹಸಿರುಮನೆ ಅನಿಲಗಳ ಹೊರಸೂಸುವಿಕೆ ಸುಮಾರು ಶೇಕಡಾ 61ರಷ್ಟು ಕಡಿಮೆಯಾಗಲಿದೆ.

ಬೆಲೆಯೂ ಕಡಿಮೆ

ದೇಶೀಯವಾಗಿ ಉತ್ಪಾದನೆಯಾಗುವ ಎಥನಾಲ್‌ನ ಆರ್ಥಿಕ ಲಾಭವನ್ನು ನೇರವಾಗಿ ಗ್ರಾಹಕರಿಗೆ ತಲುಪಿಸುವ ಉದ್ದೇಶದಿಂದ, ಸರ್ಕಾರವು E85 ಇಂಧನದ ಬೆಲೆಯನ್ನು ಸಾಮಾನ್ಯ ಪೆಟ್ರೋಲ್‌ಗಿಂತ ಲೀಟರ್‌ಗೆ ಸುಮಾರು 20 ರೂ. ಅಗ್ಗವಾಗಿ ನಿಗದಿಪಡಿಸಿದೆ. ಈ ಬೆಲೆ ಕಾರ್ಯತಂತ್ರವು ಒಂದು ಕಡೆ ಫ್ಲೆಕ್ಸ್-ಫ್ಯುಯೆಲ್ ವಾಹನಗಳನ್ನು ಆರ್ಥಿಕವಾಗಿ ಹೆಚ್ಚು ಆಕರ್ಷಕವಾಗಿಸಲಿದೆ. ಮತ್ತೊಂದು ಕಡೆ ಕಚ್ಚಾ ತೈಲ ಆಮದಿನ ಮೇಲಿನ ಭಾರತದ ಅವಲಂಬನೆಯನ್ನು ಕಡಿಮೆ ಮಾಡಲಿದೆ.

E85 ಇಂಧನ ಎಲ್ಲಿ ಲಭ್ಯವಿದೆ?

ಮೊದಲ ಹಂತದಲ್ಲಿ ದೇಶಾದ್ಯಂತ ಇರುವ ಸಾರ್ವಜನಿಕ ವಲಯದ 48 ಪೆಟ್ರೋಲ್ ಪಂಪ್‌ಗಳಲ್ಲಿ ಇದರ ಮಾರಾಟ ಆರಂಭವಾಗಲಿದೆ. ಡಿಸೆಂಬರ್ 2026ರ ವೇಳೆಗೆ ಈ ಇಂಧನ ಲಭ್ಯತೆಯನ್ನು 500 ಕೇಂದ್ರಗಳಿಗೆ ಮತ್ತು ಡಿಸೆಂಬರ್ 2027ರ ವೇಳೆಗೆ ಸುಮಾರು 5,000 ಕೇಂದ್ರಗಳಿಗೆ ವಿಸ್ತರಿಸಲು ಸರ್ಕಾರ ಯೋಜಿಸಿದೆ ಎಂದು ಸಚಿವ ಪುರಿ ತಿಳಿಸಿದ್ದಾರೆ. ಈ ಹೊಸ ಇಂಧನ ಈಗಾಗಲೇ ದೆಹಲಿಯಲ್ಲಿ ಲಭ್ಯವಿದೆ.

ವಾಹನಗಳ ಹೊಂದಾಣಿಕೆ

ಪ್ರಸ್ತುತ ಭಾರತದ ರಸ್ತೆಗಳಲ್ಲಿ ಚಲಿಸುವ ಬಹುತೇಕ ವಾಹನಗಳಲ್ಲಿ E85 ಇಂಧನವನ್ನು ಬಳಸಲು ಸಾಧ್ಯವಿಲ್ಲ. E20 ಇಂಧನದಿಂದ ಹಿಡಿದು E100 ವರೆಗಿನ ಎಥನಾಲ್ ಮಿಶ್ರಣಗಳಲ್ಲಿ ಚಲಿಸಬಲ್ಲ ಸಾಮರ್ಥ್ಯವಿರುವ 'ಫ್ಲೆಕ್ಸ್-ಫ್ಯುಯೆಲ್ ವಾಹನಗಳು' ಮಾತ್ರ ಈ ಇಂಧನಕ್ಕೆ ಹೊಂದಿಕೆಯಾಗುತ್ತವೆ.

ಸದ್ಯಕ್ಕೆ ಭಾರತದಲ್ಲಿ ಕೇವಲ ಮೂರು ವಾಹನಗಳು ಮಾತ್ರ E85 ಇಂಧನವನ್ನು ಬೆಂಬಲಿಸುತ್ತವೆ. ಇವುಗಳಲ್ಲಿ ಹೊಸದಾಗಿ ಮಾರುಕಟ್ಟೆಗೆ ಬಂದಿರುವ ಹೀರೋ ಸ್ಪ್ಲೆಂಡರ್ ಪ್ಲಸ್ ಫ್ಲೆಕ್ಸ್-ಫ್ಯುಯೆಲ್ ಮತ್ತು ಹೀರೋ ಎಚ್‌ಎಫ್ ಡಿಲಕ್ಸ್ ಫ್ಲೆಕ್ಸ್-ಫ್ಯುಯೆಲ್ ಮೋಟಾರ್‌ಸೈಕಲ್‌ಗಳು ಸೇರಿವೆ. ಇನ್ನು ನಾಲ್ಕು ಚಕ್ರಗಳ ವಾಹನಗಳ ವಿಷಯಕ್ಕೆ ಬಂದರೆ, ಮಾರುತಿ ಸುಜುಕಿ ಸಂಸ್ಥೆಯು ತನ್ನ ಮೊದಲ ಫ್ಲೆಕ್ಸ್-ಫ್ಯುಯೆಲ್ ಕಾರನ್ನು 'ವ್ಯಾಗನ್ಆರ್' ಮಾದರಿಯಲ್ಲಿ ಬಿಡುಗಡೆ ಮಾಡಲು ಯೋಜಿಸಿದೆ. ಇದರ ಬೆನ್ನಲ್ಲೇ ಟಾಟಾ ಮೋಟಾರ್ಸ್ ಸೇರಿದಂತೆ ಇತರ ಪ್ರಮುಖ ಬ್ರ್ಯಾಂಡ್‌ಗಳು ಕೂಡ ತಮ್ಮ ಹೊಂದಾಣಿಕೆಯ ಮಾದರಿಗಳನ್ನು ಮಾರುಕಟ್ಟೆಗೆ ತರಲಿವೆ.

ಭಾರತದ ಎಥನಾಲ್ ಯೋಜನೆಯ ಹಿನ್ನೆಲೆ

ಭಾರತವು ಪೆಟ್ರೋಲ್‌ನಲ್ಲಿ ಎಥನಾಲ್ ಮಿಶ್ರಣದ ಪ್ರಮಾಣವನ್ನು 2014ರಲ್ಲಿದ್ದ ಶೇಕಡಾ 1.53ರಿಂದ ಪ್ರಸ್ತುತ ಶೇಕಡಾ 20ಕ್ಕೆ ಯಶಸ್ವಿಯಾಗಿ ಹೆಚ್ಚಿಸಿದೆ. ಈ ಮೂಲಕ ನಿಗದಿತ ಸಮಯಕ್ಕಿಂತ ಐದು ವರ್ಷ ಮುಂಚಿತವಾಗಿಯೇ ಶೇಕಡಾ 20ರ ಮಿಶ್ರಣದ ಗುರಿಯನ್ನು ತಲುಪಿದೆ.

ಸಚಿವ ಪುರಿ ಅವರ ಮಾಹಿತಿ ಪ್ರಕಾರ, ಈ ಯೋಜನೆಯಿಂದಾಗಿ ದೇಶಕ್ಕೆ 1.84 ಲಕ್ಷ ಕೋಟಿ ರೂಪಾಯಿ ವಿದೇಶಿ ವಿನಿಮಯ ಉಳಿತಾಯವಾಗಿದೆ ಮತ್ತು ಕಚ್ಚಾ ತೈಲ ಆಮದು ಸುಮಾರು 302 ಲಕ್ಷ ಮೆಟ್ರಿಕ್ ಟನ್‌ಗಳಷ್ಟು ಕಡಿಮೆಯಾಗಿದೆ.

ಕೇಂದ್ರ ಸರ್ಕಾರ ಹೇಳುತ್ತಿರುವುದೇನು?

ಈಗ ಎದುರಾಗುವ ಅತ್ಯಂತ ಪ್ರಮುಖ ಪ್ರಶ್ನೆಯೆಂದರೆ, ಹಾಗಾದರೆ ಸದ್ಯ ನಿಮ್ಮ ಬಳಿ ಇರುವ E20 ವಾಹನಗಳು ಮೂಲೆ ಸೇರಲಿವೆಯೇ? ಇದಕ್ಕೆ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರು ಖಂಡಿತಾ ಇಲ್ಲ ಎಂದು ಉತ್ತರಿಸಿದ್ದಾರೆ.

"ನಿಮ್ಮ E20 ವಾಹನಗಳು ಇನ್ನು ದೀರ್ಘಕಾಲದವರೆಗೆ ಯಾವುದೇ ತೊಂದರೆಯಿಲ್ಲದೆ ರಸ್ತೆಯಲ್ಲಿರಲಿವೆ. E20 ಮತ್ತು E85 ಇಂಧನಗಳು ಎರಡು ವಿಭಿನ್ನ ವರ್ಗಗಳಿಗೆ ಸೇರಿದ್ದು, ಇವುಗಳನ್ನು ಬೇರೆ ಬೇರೆ ಮಾದರಿಯ ವಾಹನಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ. E85 ಇಂಧನ ಮಾರುಕಟ್ಟೆಗೆ ಬಂದಿದೆ ಎನ್ನುವ ಕಾರಣಕ್ಕೆ E20 ಅಥವಾ ಸಾಮಾನ್ಯ ಪೆಟ್ರೋಲ್ ವಾಹನಗಳ ಬಳಕೆ ನಿಲ್ಲುತ್ತದೆ ಎಂದು ಅರ್ಥವಲ್ಲ. E85 ಇಂಧನ ಸಿಗುವ ಪಂಪ್‌ಗಳಲ್ಲಿ 'E85 ಇಂಧನ ಹೊಂದಾಣಿಕೆಯಾಗುವ ಕಾರುಗಳಿಗೆ ಮಾತ್ರ' ಎಂಬ ದೊಡ್ಡ ಬೋರ್ಡ್‌ಗಳನ್ನು ಹಾಕಲಾಗುತ್ತದೆ" ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

"E85 ಇಂಧನವು ಕೇವಲ ಫ್ಲೆಕ್ಸ್-ಫ್ಯುಯೆಲ್ ವಾಹನಗಳಿಗೆ ಮಾತ್ರ ಸೀಮಿತವಾಗಿದ್ದು, ಸಾಮಾನ್ಯ E20 ಚಾಲಿತ ವಾಹನಗಳಿಗಲ್ಲ. ಬ್ರೆಜಿಲ್ ದೇಶದಲ್ಲಿ E85 ಇಂಧನವನ್ನು ದಶಕಗಳಿಂದ ಬಳಸಲಾಗುತ್ತಿದೆ. ಫ್ಲೆಕ್ಸ್-ಫ್ಯುಯೆಲ್ ವಾಹನಗಳ ಎಂಜಿನ್‌ಗಳು E20 ಇಂಧನದಿಂದ ಹಿಡಿದು E100 (ಸಂಪೂರ್ಣ ಎಥನಾಲ್) ವರೆಗಿನ ಯಾವುದೇ ಮಿಶ್ರಣದ ಇಂಧನದಲ್ಲೂ ಚಲಿಸಬಲ್ಲ ಸಾಮರ್ಥ್ಯ ಹೊಂದಿರುತ್ತವೆ. ಇದರಿಂದ ರೈತರ ಆದಾಯ ಹೆಚ್ಚಾಗಲಿದ್ದು, ಕಚ್ಚಾ ತೈಲ ಆಮದಿನ ಮೇಲಿನ ಅವಲಂಬನೆ ತಗ್ಗಲಿದೆ. ಜೊತೆಗೆ ದೇಶದ ಇಂಧನ ಭದ್ರತೆಯೂ ಬಲಗೊಳ್ಳಲಿದೆ. ಇದು ಸ್ವಚ್ಛ ಮತ್ತು ಸ್ವಾವಲಂಬಿ ಭವಿಷ್ಯದ ಕಡೆಗೆ ಭಾರತ ಇಡುತ್ತಿರುವ ದಿಟ್ಟ ಹೆಜ್ಜೆಯಾಗಿದೆ" ಎಂದು ಅವರು ಎಕ್ಸ್‌ನಲ್ಲಿ ಬರೆದುಕೊಂಡಿದ್ದಾರೆ.

ಪರಿಸರಕ್ಕೆ ಪೂರಕವಾಗಿರಲು ಮತ್ತು ಪಳೆಯುಳಿಕೆ ಇಂಧನಗಳ ಬಳಕೆಯನ್ನು ಕಡಿಮೆ ಮಾಡಲು ಜನರು ಮುಂದಿನ ದಿನಗಳಲ್ಲಿ E85 ಕಾರುಗಳನ್ನು ಆಯ್ಕೆ ಮಾಡಿಕೊಳ್ಳಲಿದ್ದಾರೆ ಎಂದು ಅವರು ಹೇಳಿದ್ದಾರೆ. ಅಷ್ಟೇ ಅಲ್ಲದೆ, ಪ್ರಸ್ತುತ ಮಾರುಕಟ್ಟೆಗೆ ಸಂಪೂರ್ಣವಾಗಿ ದೇಶೀಯ ತಂತ್ರಜ್ಞಾನದಿಂದ ತಯಾರಾದ ವಾಹನಗಳನ್ನು ಬಿಡುಗಡೆ ಮಾಡಲಾಗುತ್ತಿದ್ದು, ಇದು ಭಾರತೀಯ ಕಂಪನಿಗಳಿಗೆ ಭಾರಿ ಉತ್ತೇಜನ ನೀಡಲಿದೆ ಎಂದು ಅವರು ಆಶಾವಾದ ವ್ಯಕ್ತಪಡಿಸಿದ್ದಾರೆ.