34 ಕೋಟಿ ಖಾತೆಗಳಿಗೆ 2025-26ರ ಹಣಕಾಸು ವರ್ಷದ EPFO ಬಡ್ಡಿ ಜಮೆ: ನಿಮ್ಮ PF ಬ್ಯಾಲೆನ್ಸ್ ಪರಿಶೀಲಿಸುವುದು ಹೇಗೆ?

ವಾರ್ಷಿಕ ಬಡ್ಡಿ ಜಮೆಯಾಗುವುದಕ್ಕಾಗಿ ಕಾಯುತ್ತಿದ್ದ ಕೋಟ್ಯಂತರ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ಚಂದಾದಾರರಿಗೆ ಶುಭ ಸುದ್ದಿ ಸಿಕ್ಕಿದೆ.

EPFO 2025-26ರ ಹಣಕಾಸು ವರ್ಷಕ್ಕೆ ಶೇಕಡಾ 8.25ರಷ್ಟು ಬಡ್ಡಿದರವನ್ನು 34 ಕೋಟಿ ಖಾತೆಗಳಿಗೆ ಜಮೆ ಮಾಡುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದೆ. ಈ ಸಂಸ್ಥೆಯು ಜುಲೈ 15ರ ಒಳಗಾಗಿ ಈ ಪ್ರಕ್ರಿಯೆಯನ್ನು ಮುಗಿಸಿರುವುದು ಇತಿಹಾಸದಲ್ಲೇ ಇದೇ ಮೊದಲು. ಜುಲೈ ಮಧ್ಯಭಾಗದ ವೇಳೆಗೆ ಸುಮಾರು 34 ಕೋಟಿ ಖಾತೆಗಳಿಗೆ ಬಡ್ಡಿ ಜಮೆಯಾಗಲಿದೆ ಎಂದು ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವೀಯ ಇತ್ತೀಚೆಗೆ ನೀಡಿದ್ದ ಪ್ರಕಟಣೆಯನ್ನು ಈ ಕ್ರಮವು ಖಚಿತಪಡಿಸಿದೆ.

ಹಿಂದಿನ ವರ್ಷಗಳಲ್ಲಿ ಬಡ್ಡಿ ಜಮೆ ಪ್ರಕ್ರಿಯೆಯು ಸೆಪ್ಟೆಂಬರ್ ಅಥವಾ ನವೆಂಬರ್ವರೆಗೆ ಮುಂದುವರಿಯುತ್ತಿತ್ತು. ಅದಕ್ಕೆ ಹೋಲಿಸಿದರೆ ಈ ಬಾರಿ ಅತ್ಯಂತ ಬೇಗನೆ ಪ್ರಕ್ರಿಯೆ ಪೂರ್ಣಗೊಂಡಿರುವುದು ದೊಡ್ಡ ಸುಧಾರಣೆಯಾಗಿದೆ.

►ಜುಲೈ ವೇಳೆಗೆ ಇತಿಹಾಸದಲ್ಲೇ ಮೊದಲ ಬಾರಿಗೆ ಸಂಪೂರ್ಣ ಬಡ್ಡಿ ಜಮೆ

The Indian Express ವರದಿಯ ಪ್ರಕಾರ, ಜುಲೈ 15ರ ವೇಳೆಗೆ EPFO ಇತಿಹಾಸದಲ್ಲೇ ಮೊದಲ ಬಾರಿಗೆ ಬಹುತೇಕ ಎಲ್ಲ ಸದಸ್ಯರ ಖಾತೆಗಳಿಗೆ ಬಡ್ಡಿಯನ್ನು ಜಮೆ ಮಾಡಿದೆ.

ಸಂಸ್ಥೆಯು ತನ್ನ ನವೀಕೃತ ಐಟಿ ವ್ಯವಸ್ಥೆಯಡಿಯಲ್ಲಿ 123 ಪ್ರಾದೇಶಿಕ ಡೇಟಾಬೇಸ್ ಗಳನ್ನು ಒಂದೇ ಕೇಂದ್ರೀಕೃತ ರಾಷ್ಟ್ರೀಯ ದತ್ತಾಂಶವಾಗಿ ವಿಲೀನಗೊಳಿಸಿದ ನಂತರ ಈ ವೇಗದ ಪ್ರಕ್ರಿಯೆ ಸಾಧ್ಯವಾಯಿತು ಎಂದು EPFO ಹಿರಿಯ ಅಧಿಕಾರಿಯೊಬ್ಬರು ಪತ್ರಿಕೆಗೆ ತಿಳಿಸಿದ್ದಾರೆ. ಈ ಹಿಂದೆ ಪ್ರತಿ ಪ್ರಾದೇಶಿಕ ಕಚೇರಿಯು ತನ್ನದೇ ಆದ ಪ್ರತ್ಯೇಕ ದತ್ತಾಂಶವನ್ನು ನಿರ್ವಹಿಸುತ್ತಿತ್ತು. ಇದರಿಂದಾಗಿ ಪರಿಶೀಲನೆ ಮತ್ತು ಬಡ್ಡಿ ಜಮೆ ಪ್ರಕ್ರಿಯೆಯು ಸುದೀರ್ಘ ಸಮಯ ತೆಗೆದುಕೊಳ್ಳುತ್ತಿತ್ತು.

EPFO ಜೂನ್ 30ರಂದು ಈ ವಿಲೀನ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿತು. ಜುಲೈ 1 ಮತ್ತು 2ರಂದು ಬಡ್ಡಿಯನ್ನು ಲೆಕ್ಕಹಾಕಲಾಯಿತು. ತಂತ್ರಜ್ಞಾನ ಬದಲಾವಣೆಯ ನಂತರ ಯಾವುದೇ ತಪ್ಪುಗಳು ಸಂಭವಿಸದಂತೆ ಖಚಿತಪಡಿಸಿಕೊಳ್ಳಲು, ಬಡ್ಡಿ ಜಮೆ ಮಾಡುವ ಮುನ್ನ ಬ್ಯಾಲೆನ್ಸ್ ಪರಿಶೀಲನೆಯನ್ನು ನಡೆಸಲಾಯಿತು ಎಂದು ಅಧಿಕಾರಿ ಮಾಹಿತಿ ನೀಡಿದ್ದಾರೆ.

ಹೊಸ ವ್ಯವಸ್ಥೆಯ ಮೂಲಕ ಜುಲೈ 15ರ ಒಳಗಾಗಿ ಸುಮಾರು 1.44 ಲಕ್ಷ ಕೋಟಿ ರೂ. ವಾರ್ಷಿಕ ಬಡ್ಡಿಯನ್ನು ಸ್ವಯಂಚಾಲಿತವಾಗಿ ಸಂಸ್ಕರಿಸಿ (ಆಟೊ-ಪ್ರೊಸೆಸ್) ಜಮೆ ಮಾಡಲಾಗುವುದು ಎಂದು ಕಾರ್ಮಿಕ ಸಚಿವರು ಈ ಹಿಂದೆ ತಿಳಿಸಿದ್ದರು.

►ಈ ವರ್ಷದ ಪ್ರಕ್ರಿಯೆ ಏಕೆ ಭಿನ್ನವಾಗಿದೆ?

EPFO ಜಾರಿಗೆ ತಂದಿರುವ ಹೊಸ ಕೇಂದ್ರೀಕೃತ ಐಟಿ ಆಧಾರಿತ ಸೇವೆಗಳ (CITES) ವೇದಿಕೆಯೇ ಈ ಬಾರಿಯ ಅತ್ಯಂತ ದೊಡ್ಡ ಬದಲಾವಣೆಯಾಗಿದೆ.

ಈ ನವೀಕೃತ ಪೋರ್ಟಲ್ ಉದ್ಯೋಗದಾತರ ಮಾಹಿತಿ ಮತ್ತು ಸುಮಾರು 1,400 ಕೋಟಿ ಹಣಕಾಸು ವಹಿವಾಟುಗಳು ಸೇರಿದಂತೆ ಒಟ್ಟು 1,700 ಕೋಟಿಗೂ ಹೆಚ್ಚು ದಾಖಲೆಗಳನ್ನು ಒಂದೇ ರಾಷ್ಟ್ರೀಯ ದತ್ತಾಂಶದಲ್ಲಿ ವಿಲೀನಗೊಳಿಸಿದೆ. ಇದು ಬಡ್ಡಿ ಜಮೆ, ಕ್ಲೇಮ್ ಪರಿಶೀಲನೆ ಮತ್ತು ಹಣ ಹಿಂಪಡೆಯುವಿಕೆ ಸೇರಿದಂತೆ ಹಲವು ಸೇವೆಗಳನ್ನು ಸ್ವಯಂಚಾಲಿತಗೊಳಿಸಿದೆ.

ಹೊಸ ವ್ಯವಸ್ಥೆಯು ಬಾಕಿ ಉಳಿದಿರುವ ಕ್ಲೇಮ್ಗಳನ್ನು ವೇಗವಾಗಿ ವಿಲೇವಾರಿ ಮಾಡಲು EPFOಗೆ ನೆರವಾಗಿದೆ. The Indian Express ವರದಿಯ ಪ್ರಕಾರ, ಮೇಲ್ದರ್ಜೆಗೇರಿಸಲಾದ ಪೋರ್ಟಲ್ ಪುನರಾರಂಭಗೊಂಡ ನಂತರ ಸುಮಾರು 3,000 ಕೋಟಿ ರೂ. ಮೌಲ್ಯದ ಸುಮಾರು 11 ಲಕ್ಷ ಕ್ಲೇಮ್ಗಳನ್ನು ಇತ್ಯರ್ಥಪಡಿಸಲಾಗಿದೆ.

ನಿಮ್ಮ EPF ಬಡ್ಡಿ ಜಮೆಯಾಗಿದೆಯೇ ಎಂದು ಪರಿಶೀಲಿಸುವುದು ಹೇಗೆ?

ಬಡ್ಡಿ ಜಮೆಯಾದ ತಕ್ಷಣ, ನಿಮ್ಮ EPF ಖಾತೆಯಲ್ಲಿ ನವೀಕೃತ ಬ್ಯಾಲೆನ್ಸ್ ಕಾಣಿಸಿಕೊಳ್ಳುತ್ತದೆ. ಚಂದಾದಾರರು ಇದನ್ನು ಹಲವು ವಿಧಾನಗಳ ಮೂಲಕ ಪರಿಶೀಲಿಸಬಹುದು.

1. EPFO ಸದಸ್ಯರ ಪಾಸ್ಬುಕ್ ಪೋರ್ಟಲ್ ಮೂಲಕ:

• EPFO ಸದಸ್ಯರ ಪಾಸ್ಬುಕ್ ಪೋರ್ಟಲ್ ಗೆ ಭೇಟಿ ನೀಡಿ.

• ನಿಮ್ಮ ಯುನಿವರ್ಸಲ್ ಅಕೌಂಟ್ ನಂಬರ್ (UAN), ಪಾಸ್ ವರ್ಡ್ ಮತ್ತು ಕ್ಯಾಪ್ಚಾ ಬಳಸಿ ಲಾಗ್ ಇನ್ ಮಾಡಿ.

• ನಿಮ್ಮ ಆಧಾರ್ ಕಾರ್ಡ್ ಗೆ ಲಿಂಕ್ ಮಾಡಲಾದ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ (OTP) ಅನ್ನು ನಮೂದಿಸಿ ಪರಿಶೀಲಿಸಿ.

• ನಿಮ್ಮ ನವೀಕೃತ ಬ್ಯಾಲೆನ್ಸ್ ವೀಕ್ಷಿಸಲು ಮತ್ತು 2025-26ರ ಹಣಕಾಸು ವರ್ಷದ ಬಡ್ಡಿ ಜಮೆಯಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಲು "ವ್ಯೂ ಪಾಸ್ಬುಕ್" ಮೇಲೆ ಕ್ಲಿಕ್ ಮಾಡಿ.

2. ಉಮಂಗ್ (UMANG) ಆ್ಯಪ್ ಮೂಲಕ:

• ಗೂಗಲ್ ಪ್ಲೇ ಸ್ಟೋರ್ ಅಥವಾ ಆಪಲ್ ಆ್ಯಪ್ ಸ್ಟೋರ್ನಿಂದ ಉಮಂಗ್ ಆ್ಯಪ್ ಡೌನ್ಲೋಡ್ ಮಾಡಿಕೊಳ್ಳಿ.

• ಲಾಗ್ ಇನ್ ಆಗಿ, ನಿಮ್ಮ UAN (UAN) ಸಂಖ್ಯೆಯನ್ನು ಲಿಂಕ್ ಮಾಡಿ.

• ಇದರ ನಂತರ ಆ್ಯಪ್ ಮೂಲಕವೇ ನಿಮ್ಮ EPF ಬ್ಯಾಲೆನ್ಸ್, ವಂತಿಗೆ (ಕಾಂಟ್ರಿಬ್ಯೂಷನ್), ವಹಿವಾಟುಗಳು ಮತ್ತು ನವೀಕೃತ ಪಾಸ್ಬುಕ್ ಅನ್ನು ನೇರವಾಗಿ ವೀಕ್ಷಿಸಬಹುದು.

3. SMS ಮೂಲಕ:

• ನಿಮ್ಮ UAN ಸಕ್ರಿಯವಾಗಿದ್ದು, ಮೊಬೈಲ್ ಸಂಖ್ಯೆಯೊಂದಿಗೆ ಲಿಂಕ್ ಆಗಿದ್ದರೆ, EPFO ನಿಗದಿಪಡಿಸಿರುವ ಮಾದರಿಯಲ್ಲಿ 7738299899 ಸಂಖ್ಯೆಗೆ SMS ಕಳುಹಿಸಿ.

• EPFO ನಿಮ್ಮ ಇತ್ತೀಚಿನ ವಂತಿಗೆ, ಲಭ್ಯವಿರುವ ಬ್ಯಾಲೆನ್ಸ್ ಮತ್ತು KYC ಸ್ಥಿತಿಗತಿಯ ವಿವರಗಳನ್ನು ಮರಳಿ ಸಂದೇಶದ ಮೂಲಕ ಕಳುಹಿಸಲಿದೆ. ಈ ಸೇವೆ ಹಲವು ಭಾರತೀಯ ಭಾಷೆಗಳಲ್ಲಿ ಲಭ್ಯವಿದೆ.

4. ಮಿಸ್ಡ್ ಕಾಲ್ ಸೇವೆ ಮೂಲಕ:

• ಚಂದಾದಾರರು ತಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಯಿಂದ EPFOನ ಮಿಸ್ಡ್ ಕಾಲ್ ಸೌಲಭ್ಯವನ್ನು ಬಳಸಿಕೊಂಡು ತಮ್ಮ ಇತ್ತೀಚಿನ PF ಬ್ಯಾಲೆನ್ಸ್ ವಿವರವನ್ನು ಪಡೆಯಬಹುದು.

ಖಾತೆಯಲ್ಲಿ ಬಡ್ಡಿ ಕಾಣಿಸುತ್ತಿಲ್ಲ ಎಂದಾದರೆ ಏನು ಮಾಡಬೇಕು?

ಖಾತೆಯಲ್ಲಿ ತಕ್ಷಣವೇ ಬಡ್ಡಿ ಜಮೆಯಾದ ವಿವರ ಕಾಣಿಸದಿದ್ದರೆ ಆತಂಕಪಡುವ ಅಗತ್ಯವಿಲ್ಲ.

ಬಡ್ಡಿಯನ್ನು ಪ್ರತಿ ತಿಂಗಳ ಚಾಲ್ತಿ ಬ್ಯಾಲೆನ್ಸ್ ಆಧಾರದ ಮೇಲೆ ಲೆಕ್ಕಹಾಕಲಾಗುತ್ತದೆ. ಪಾಸ್ಬುಕ್ನಲ್ಲಿ ತಡವಾಗಿ ನಮೂದಾದರೂ ಚಂದಾದಾರರು ಯಾವುದೇ ಹಣವನ್ನು ಕಳೆದುಕೊಳ್ಳುವುದಿಲ್ಲ ಎಂದು EPFO ಹಲವು ಬಾರಿ ಸ್ಪಷ್ಟಪಡಿಸಿದೆ.

EPF ಯೋಜನೆ-1952ರ ಪ್ಯಾರಾಗ್ರಾಫ್ 60ರ ಅಡಿಯಲ್ಲಿ, ಬಡ್ಡಿ ಹಣ ಜಮೆಯಾಗುವವರೆಗೆ ಅದು ಜಮೆಯಾಗುತ್ತಲೇ ಇರುತ್ತದೆ. ಅಂದರೆ ಬ್ಯಾಲೆನ್ಸ್ ನವೀಕರಣವಾಗುವುದು ತಡವಾದರೂ ಪಾವತಿಸಬೇಕಾದ ಒಟ್ಟು ಮೊತ್ತದಲ್ಲಿ ಯಾವುದೇ ಕಡಿತವಾಗುವುದಿಲ್ಲ.

ಖಾತೆ ನವೀಕರಣ ಮತ್ತು ಕ್ಲೇಮ್ಗಳ ವಿಲೇವಾರಿ ತಡವಾಗಲು ಅಪೂರ್ಣ KYC ಪ್ರಮುಖ ಕಾರಣವಾಗಿರುತ್ತದೆ. ಚಂದಾದಾರರು ತಮ್ಮ UAN ಸಕ್ರಿಯಗೊಳಿಸಿರುವುದನ್ನು ಮತ್ತು KYC ವಿವರಗಳನ್ನು, ಪ್ರಮುಖವಾಗಿ ಆಧಾರ್ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಯನ್ನು, ನವೀಕರಿಸಿರುವುದನ್ನು ಖಚಿತಪಡಿಸಿಕೊಳ್ಳಬೇಕು.

ಯಾರಿಗೆ ಲಾಭವಾಗಲಿದೆ?

EPFO ಪ್ರಸ್ತುತ ಸುಮಾರು 35 ಕೋಟಿ ಸದಸ್ಯರ ಖಾತೆಗಳಲ್ಲಿ ಒಟ್ಟು 32 ಲಕ್ಷ ಕೋಟಿ ರೂ.ಗೂ ಅಧಿಕ ಮೌಲ್ಯದ ಆಸ್ತಿಯನ್ನು ನಿರ್ವಹಿಸುತ್ತಿದೆ. ಈ ಪೈಕಿ ಸರಿಸುಮಾರು 8 ಕೋಟಿ ಸಕ್ರಿಯ ವಂತಿಗೆದಾರರ (ಖಾತೆಗೆ ಹಣ ಜಮೆ ಮಾಡುತ್ತಿರುವವರು) ಖಾತೆಗಳಾಗಿವೆ. 2025-26ರ ಹಣಕಾಸು ವರ್ಷದ ಬಡ್ಡಿದರವನ್ನು ಶೇಕಡಾ 8.25ರಷ್ಟೇ ಉಳಿಸಿಕೊಳ್ಳಲಾಗಿದ್ದು, ಇದು ಕಳೆದ ಎರಡು ಹಣಕಾಸು ವರ್ಷಗಳ ಬಡ್ಡಿದರಕ್ಕೆ ಸಮನಾಗಿದೆ.

ಹೆಚ್ಚಿನ PF ಮೊತ್ತ ಹೊಂದಿರುವ ಸದಸ್ಯರಿಗೆ ಈ ವಾರ್ಷಿಕ ಬಡ್ಡಿ ಜಮೆಯು ದೊಡ್ಡ ಲಾಭ ತಂದುಕೊಡಲಿದೆ. ಉದಾಹರಣೆಗೆ, ಹಣಕಾಸು ವರ್ಷದಲ್ಲಿ ಖಾತೆಯ ಮೊತ್ತದಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ ಎಂದು ಭಾವಿಸಿದರೆ, 10 ಲಕ್ಷ ರೂ. ಬ್ಯಾಲೆನ್ಸ್ ಹೊಂದಿರುವವರು ಶೇಕಡಾ 8.25ರ ಬಡ್ಡಿದರದಲ್ಲಿ ವಾರ್ಷಿಕ ಸುಮಾರು 82,500 ರೂ. ಬಡ್ಡಿ ಗಳಿಸುತ್ತಾರೆ. ಅದೇ ರೀತಿ, 50 ಲಕ್ಷ ರೂ. ಬ್ಯಾಲೆನ್ಸ್ ಹೊಂದಿರುವವರು ಸುಮಾರು 4.12 ಲಕ್ಷ ರೂ. ಬಡ್ಡಿ ಪಡೆಯುತ್ತಾರೆ. ಆದರೆ, ವಾಸ್ತವಿಕ ಬಡ್ಡಿ ಮೊತ್ತವು ಪ್ರತಿ ತಿಂಗಳ ವಂತಿಗೆ ಮತ್ತು ಖಾತೆಯಿಂದ ಹಣ ಹಿಂಪಡೆದಿರುವ ವಿವರಗಳ ಆಧಾರದ ಮೇಲೆ ಬದಲಾಗುತ್ತದೆ.

ಸೌಜನ್ಯ: Indiatoday.in