ಫ್ರಾನ್ಸ್ ನಲ್ಲಿ ವಿದ್ಯಾರ್ಥಿಗಳ ಪ್ರತಿಭಟನೆ: ಪೊಲೀಸರ ಬಲಪ್ರಯೋಗಕ್ಕೆ ಆಕ್ರೋಶ

ಪ್ಯಾರಿಸ್: ಉತ್ತಮ ಶಾಲಾ ಪರಿಸ್ಥಿತಿಗಾಗಿ ಆಗ್ರಹಿಸಿ ಫ್ರಾನ್ಸ್ ನಲ್ಲಿ ನಡೆಯುತ್ತಿರುವ ವಿದ್ಯಾರ್ಥಿಗಳ ಪ್ರತಿಭಟನೆ ವೇಳೆ ಪೊಲೀಸರ ಬಲಪ್ರಯೋಗದಿಂದ ಹಲವು ಹದಿಹರೆಯದವರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ನಡೆದಿದೆ. ಈ ಹಿನ್ನೆಲೆಯಲ್ಲಿ ಅಪ್ರಾಪ್ತರ ವಿರುದ್ಧ ಗಲಭೆ ನಿಯಂತ್ರಣ ಶಸ್ತ್ರಾಸ್ತ್ರಗಳ ಬಳಕೆ ಮತ್ತು ಪೊಲೀಸರ ಕಾರ್ಯವೈಖರಿ ಕುರಿತು ವ್ಯಾಪಕ ಟೀಕೆ ವ್ಯಕ್ತವಾಗಿದೆ ಎಂದು ಅಸೋಸಿಯೇಟೆಡ್‌ ಪ್ರೆಸ್‌ ವರದಿ ಮಾಡಿದೆ.

ಪ್ಯಾರಿಸ್ ನ ವಾಯವ್ಯ ಭಾಗದ ಸೇಂಟ್-ಔಯೆನ್-ಎಲ್'ಆಮೋನ್ ನಲ್ಲಿ ನಡೆದ ಪ್ರತಿಭಟನೆ ವೇಳೆ 14 ವರ್ಷದ ಬಾಲಕನ ಮುಖಕ್ಕೆ ಪೊಲೀಸ್ ಗ್ರೆನೇಡ್ ಬಡಿದು ದವಡೆಗೆ ಹಲವು ಮುರಿತಗಳಾಗಿವೆ. ಆತ ಹಲವು ಹಲ್ಲುಗಳನ್ನೂ ಕಳೆದುಕೊಂಡಿದ್ದಾನೆ. ಲೆನ್ಸ್ ನಲ್ಲಿ ಸ್ಟನ್ ಗ್ರೆನೇಡ್ ಸ್ಫೋಟಗೊಂಡು 15 ವರ್ಷದ ವಿದ್ಯಾರ್ಥಿಯೊಬ್ಬ ಕೈ ಕಳೆದುಕೊಂಡಿದ್ದಾನೆ. ಸೆಪ್ಟೆಂಬರ್ 30ರಂದು ಟೂರ್ಸ್ ನಲ್ಲಿ ಗಾಯಗೊಂಡ 16 ವರ್ಷದ ವಿದ್ಯಾರ್ಥಿಯ ಬಲಗಣ್ಣಿನ ದೃಷ್ಟಿ ಭಾಗಶಃ ಕುಂದಿದೆ ಎಂದು ತಿಳಿದು ಬಂದಿದೆ.

14 ವರ್ಷದ ಬಾಲಕನಿಗೆ ಗಾಯವಾದ ಪ್ರಕರಣದಲ್ಲಿ ಸಂಬಂಧಪಟ್ಟ ಪೊಲೀಸ್ ಅಧಿಕಾರಿಯನ್ನು ವಶಕ್ಕೆ ಪಡೆದು, ಕ್ರಿಮಿನಲ್ ಆರೋಪ ಹೊರಿಸಲಾಗಿದೆ. ಅವರನ್ನು ಸೇವೆಯಿಂದ ಅಮಾನತುಗೊಳಿಸಲಾಗಿದೆ. ತನ್ನ ಮಹಿಳಾ ಸಹೋದ್ಯೋಗಿಯನ್ನು ರಕ್ಷಿಸಲು ತಕ್ಷಣ ಪ್ರತಿಕ್ರಿಯಿಸಬೇಕಾಯಿತು ಎಂದು ಅಧಿಕಾರಿ ತನಿಖಾಧಿಕಾರಿಗಳಿಗೆ ತಿಳಿಸಿದ್ದಾರೆ. ಘಟನೆಯ ಕುರಿತು ತನಿಖೆ ಮುಂದುವರಿದಿದೆ.

ಲೆನ್ಸ್ ನಲ್ಲಿ ಅಕ್ಟೋಬರ್ 5ರಂದು ಶಾಲೆಯ ದಿಗ್ಬಂಧನದ ವೇಳೆ ಸ್ಟನ್ ಗ್ರೆನೇಡ್ ಸ್ಫೋಟಗೊಂಡು ವಿದ್ಯಾರ್ಥಿ ಕೈ ಕಳೆದುಕೊಂಡಿದ್ದಾನೆ. ಗ್ರೆನೇಡ್ ಅನ್ನು ಬಾಲಕ ಎತ್ತಿಕೊಂಡು ಮರಳಿ ಎಸೆಯಲು ಪ್ರಯತ್ನಿಸುತ್ತಿದ್ದಾಗ ಸ್ಫೋಟಗೊಂಡಿದೆ ಎಂದು ಪೊಲೀಸ್ ಮೂಲವೊಂದು ತಿಳಿಸಿದೆ. ಈ ಘಟನೆಯ ಬಳಿಕ, ಗಾಯಕ್ಕೆ ಕಾರಣವೆಂದು ಶಂಕಿಸಲಾದ ಮಾದರಿಯ ಸ್ಟನ್ ಗ್ರೆನೇಡ್ ಅನ್ನು ಪ್ರೌಢಶಾಲಾ ವಿದ್ಯಾರ್ಥಿಗಳ ವಿರುದ್ಧ ಬಳಸುವುದಿಲ್ಲ ಎಂದು ಗೃಹ ಸಚಿವ ಲಾರೆಂಟ್ ನುನೆಜ್ ಘೋಷಿಸಿದ್ದಾರೆ.

ಟೂರ್ಸ್ ನಲ್ಲಿನ ಗಾಯವು ಪೊಲೀಸ್ ಎಲ್ಬಿಡಿ (LBD) ರಬ್ಬರ್ ಪ್ರೊಜೆಕ್ಟೈಲ್ ಲಾಂಚರ್ ನಿಂದ ಉಂಟಾಗಿರಬಹುದು ಎಂದು ಸ್ಥಳೀಯ ಅಭಿಯೋಜಕರು ತಿಳಿಸಿದ್ದಾರೆ. ಈ ಪ್ರಕರಣದಲ್ಲಿಯೂ ತನಿಖೆ ಆರಂಭಿಸಲಾಗಿದೆ.

►6,500ಕ್ಕೂ ಹೆಚ್ಚು ಜನರ ಬಂಧನ

ಪ್ರತಿಭಟನೆ ಆರಂಭವಾದ ಬಳಿಕ 6,500ಕ್ಕೂ ಹೆಚ್ಚು ಜನರನ್ನು ಬಂಧಿಸಲಾಗಿದೆ ಎಂದು ಅಸೋಸಿಯೇಟೆಡ್ ಪ್ರೆಸ್ ವರದಿ ತಿಳಿಸಿದೆ. ಅಕ್ಟೋಬರ್ 6ರಂದು ಒಂದೇ ದಿನ 488 ಜನರನ್ನು ಬಂಧಿಸಲಾಗಿದೆ. ಬಂಧಿತರಲ್ಲಿ ಸುಮಾರು 4,500 ಮಂದಿ ಅಪ್ರಾಪ್ತ ವಯಸ್ಕರು ಎಂದು 'ಲೆ ಮಾಂಡೆ' ವರದಿ ಮಾಡಿದೆ.

ಪ್ರತಿಭಟನೆಗಳ ಸಂದರ್ಭದಲ್ಲಿ ಕನಿಷ್ಠ 215 ವಿದ್ಯಾರ್ಥಿಗಳು, 85 ಶಿಕ್ಷಣ ಸಿಬ್ಬಂದಿ ಹಾಗೂ 750 ಪೊಲೀಸ್ ಅಧಿಕಾರಿಗಳು ಮತ್ತು ಜೆಂಡರ್ಮ್ ಗಳು ಗಾಯಗೊಂಡಿದ್ದಾರೆ. ಶಂಕಿತ ಪೊಲೀಸ್ ಹಿಂಸಾಚಾರದ ಕುರಿತು 18 ತನಿಖೆಗಳನ್ನು ಆರಂಭಿಸಲಾಗಿದೆ ಎಂದು 'ಲೆ ಮಾಂಡೆ' ಅಕ್ಟೋಬರ್ 7ರಂದು ವರದಿ ಮಾಡಿದೆ.

ಬಂಧಿತ ವಿದ್ಯಾರ್ಥಿಗಳನ್ನು ಪ್ರತಿನಿಧಿಸುತ್ತಿರುವ ವಕೀಲರು ಪೊಲೀಸ್ ಕಸ್ಟಡಿಯಲ್ಲಿನ ಪರಿಸ್ಥಿತಿಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಯುವಕರು ಅನೈರ್ಮಲ್ಯದ ಕೋಣೆಗಳಲ್ಲಿ ಗಂಟೆಗಟ್ಟಲೆ ಇರಬೇಕಾಯಿತು. ವಿಚಾರಣೆ ವೇಳೆ ಬೆದರಿಕೆ ಮತ್ತು ಒತ್ತಡವನ್ನೂ ಎದುರಿಸಬೇಕಾಯಿತು ಎಂದು ವಕೀಲ ಅಲೆಕ್ಸಿಸ್ ಬೌಡೆಲಿನ್ ತಿಳಿಸಿದ್ದಾರೆ.

►ಶಾಲೆಗಳ ಸುಧಾರಣೆಗೆ ಆಗ್ರಹ

ಸೆಪ್ಟೆಂಬರ್ ನಲ್ಲಿ ಪ್ಯಾರಿಸ್ ನ ಉಪನಗರಗಳಲ್ಲಿ ಆರಂಭವಾದ ಪ್ರತಿಭಟನೆಗಳು ಫ್ರಾನ್ಸ್ ನಾದ್ಯಂತ ಹರಡಿವೆ. ಶಿಕ್ಷಕರ ಕೊರತೆ, ಕಿಕ್ಕಿರಿದ ತರಗತಿಗಳು, ಹದಗೆಡುತ್ತಿರುವ ಶಾಲಾ ಕಟ್ಟಡಗಳು, ಸಹಾಯಕ ಸಿಬ್ಬಂದಿಯ ಕೊರತೆ ಮತ್ತು ದೀರ್ಘ ವೇಳಾಪಟ್ಟಿಗಳ ವಿರುದ್ಧ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸುತ್ತಿದ್ದಾರೆ. ವಿಶ್ವವಿದ್ಯಾಲಯ ಪ್ರವೇಶಕ್ಕೆ ಬಳಸುವ 'ಪಾರ್ಕೋರ್ಸ್ಅಪ್' ಆನ್ಲೈನ್ ವ್ಯವಸ್ಥೆಯ ಬಗ್ಗೆಯೂ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಹೆಚ್ಚುವರಿ ಶಿಕ್ಷಕರು ಮತ್ತು ಸಹಾಯಕ ಸಿಬ್ಬಂದಿ ನೇಮಕ, ತರಗತಿಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವುದು, ಶಾಲಾ ಕಟ್ಟಡಗಳ ದುರಸ್ತಿ ಹಾಗೂ ವಿಶ್ವವಿದ್ಯಾಲಯ ಪ್ರವೇಶ ಪ್ರಕ್ರಿಯೆಯಲ್ಲಿನ ಒತ್ತಡ ಕಡಿಮೆ ಮಾಡುವುದು ಪ್ರಮುಖ ಬೇಡಿಕೆಗಳಾಗಿವೆ. ವಿದ್ಯಾರ್ಥಿ ಸಂಘಟನೆಗಳು, ಶಿಕ್ಷಕರ ಸಂಘಗಳು, ಪೋಷಕರು ಮತ್ತು ಕಾರ್ಮಿಕ ಸಂಘಟನೆಗಳು ಚಳವಳಿಗೆ ಬೆಂಬಲ ನೀಡಿವೆ.

ವಿದ್ಯಾರ್ಥಿಗಳ ಬೇಡಿಕೆಗಳನ್ನು ಪರಿಶೀಲಿಸಿ ಅಕ್ಟೋಬರ್ ಅಂತ್ಯದ ವೇಳೆಗೆ ಪ್ರಾಥಮಿಕ ಪ್ರಸ್ತಾವನೆಗಳನ್ನು ಮಂಡಿಸುವಂತೆ ಪ್ರಧಾನಿ ಸೆಬಾಸ್ಟಿಯನ್ ಲೆಕೋರ್ನು ಸಚಿವರಿಗೆ ಸೂಚಿಸಿದ್ದಾರೆ. ಗೈರುಹಾಜರಾದ ಶಿಕ್ಷಕರ ಸ್ಥಾನಕ್ಕೆ ಬದಲಿ ಶಿಕ್ಷಕರ ನೇಮಕ, ಶಾಲಾ ವೇಳಾಪಟ್ಟಿಯ ಪರಿಶೀಲನೆ ಮತ್ತು ಹಳೆಯ ಕಟ್ಟಡಗಳ ದುರಸ್ತಿ ಪ್ರಸ್ತಾವಿತ ಕ್ರಮಗಳಲ್ಲಿ ಸೇರಿವೆ.

ಪ್ರತಿಭಟನೆಗಳ ಕೆಲವು ಘಟನೆಗಳು ಹಿಂಸಾಚಾರಕ್ಕೆ ತಿರುಗಿವೆ. ಶಾಲಾ ಸಿಬ್ಬಂದಿಯ ಮೇಲೆ ದಾಳಿ, ಕಟ್ಟಡಗಳಿಗೆ ಹಾನಿ, ಕಸದ ತೊಟ್ಟಿಗಳಿಗೆ ಬೆಂಕಿ ಹಚ್ಚುವುದು ಮತ್ತು ಪೊಲೀಸರ ಮೇಲೆ ಸ್ಫೋಟಕಗಳನ್ನು ಎಸೆಯುವುದು ಸೇರಿದಂತೆ ಹಲವು ಘಟನೆಗಳು ನಡೆದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕೆಲವು ಕಡೆ ಶಾಲೆಗಳನ್ನು ಮುಚ್ಚಲಾಗಿದ್ದು, ಸಾರ್ವಜನಿಕ ಸಾರಿಗೆಗೂ ಅಡ್ಡಿಯಾಗಿದೆ.

ಹಿಂಸಾತ್ಮಕ ಗುಂಪುಗಳು ಪ್ರತಿಭಟನೆಗಳನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿವೆ ಎಂದು ಸರಕಾರ ಆರೋಪಿಸಿದೆ. ಆದರೆ, 'ಲಾ ಫ್ರಾನ್ಸ್ ಇನ್ಸೌಮೈಸ್' ಪಕ್ಷ ಪ್ರತಿಭಟನೆಗಳನ್ನು ತಾನೇ ಆಯೋಜಿಸಿದೆ ಎಂಬ ಆರೋಪವನ್ನು ತಳ್ಳಿಹಾಕಿದೆ.

ಅಕ್ಟೋಬರ್ 7ರಂದು ಪ್ರಕಟವಾದ ಸಂಪಾದಕೀಯದಲ್ಲಿ 'ಲೆ ಮಾಂಡೆ' ಪತ್ರಿಕೆ, 2018–19ರ 'ಯೆಲ್ಲೋ ವೆಸ್ಟ್' ಪ್ರತಿಭಟನೆಗಳ ಅನುಭವವು ಸರಕಾರದ ಪ್ರತಿಕ್ರಿಯೆಯ ಮೇಲೆ ಪ್ರಭಾವ ಬೀರಿದೆ ಎಂದು ಅಭಿಪ್ರಾಯಪಟ್ಟಿದೆ. ಹಿಂಸಾಚಾರವನ್ನು ತಡೆಯುವುದು ಮತ್ತು ಶಾಲೆಗಳನ್ನು ರಕ್ಷಿಸುವುದು ಸರಕಾರದ ಜವಾಬ್ದಾರಿಯಾದರೂ, ವಿಶೇಷವಾಗಿ ಅಪ್ರಾಪ್ತರ ವಿರುದ್ಧ ಪೊಲೀಸರು ಕಾನೂನುಬದ್ಧವಾಗಿ ಹಾಗೂ ಮಿತವಾಗಿ ಬಲಪ್ರಯೋಗಿಸಬೇಕು ಎಂಬ ಒತ್ತಾಯ ಕೇಳಿಬಂದಿದೆ.