ಇಂಧನ ಹಣದುಬ್ಬರ: ಪೆಟ್ರೋಲ್, CNG, LPG ಮತ್ತು PNG ಬೆಲೆ ಬದಲಾವಣೆಗಳು ನಿಮ್ಮ ಮನೆ ಬಜೆಟ್ ಮೇಲೆ ಹೇಗೆ ಪರಿಣಾಮ ಬೀರಬಹುದು?

ಅಡುಗೆ ಅನಿಲ ಹಾಗೂ PNGಯಿಂದ ಹಿಡಿದು ಪ್ರಯಾಣಕ್ಕೆ ಬಳಸುವ ಪೆಟ್ರೋಲ್, ಡೀಸೆಲ್ ಮತ್ತು CNGವರೆಗೆ ಎಲ್ಲದರ ಇಂಧನ ವೆಚ್ಚವು ಮನೆಯ ಮಾಸಿಕ ಬಜೆಟ್ ಮೇಲೆ ನೇರ ಪರಿಣಾಮ ಬೀರುತ್ತದೆ.

2026ರ ಸೆಪ್ಟೆಂಬರ್ ನ ಹಣಕಾಸು ಸಚಿವಾಲಯದ ಮಾಸಿಕ ಆರ್ಥಿಕ ವಿಮರ್ಶೆಯು, ಜೂನ್, ಜುಲೈ ಮತ್ತು ಆಗಸ್ಟ್ ತಿಂಗಳುಗಳಲ್ಲಿ ಈ ಇಂಧನ ಹಣದುಬ್ಬರವು ಹೇಗೆ ಬದಲಾಗಿದೆ ಎಂಬುದನ್ನು ಎತ್ತಿ ತೋರಿಸುತ್ತದೆ. ಇತ್ತೀಚಿನ ಈ ಅಂಕಿಅಂಶಗಳು ಗೃಹಬಳಕೆಯ ವೆಚ್ಚದ ಮೇಲೆ ಯಾವ ರೀತಿ ಪರಿಣಾಮ ಬೀರುತ್ತವೆ ಎಂಬುದನ್ನು ಇದು ತೋರಿಸುತ್ತದೆ.

► ಗ್ರಾಹಕ ಬೆಲೆ ಸೂಚ್ಯಂಕ (CPI) ಹಣದುಬ್ಬರ ಏನು ತೋರಿಸುತ್ತದೆ?

ಗ್ರಾಹಕ ಬೆಲೆ ಸೂಚ್ಯಂಕವು ಆಹಾರ, ಬಟ್ಟೆ, ಇಂಧನ ಮತ್ತು ಸಾರಿಗೆ ಸೇರಿದಂತೆ ಕುಟುಂಬಗಳು ನಿಯಮಿತವಾಗಿ ಖರೀದಿಸುವ ಸರಕು ಹಾಗೂ ಸೇವೆಗಳ ಬೆಲೆಗಳಲ್ಲಿನ ಬದಲಾವಣೆಗಳನ್ನು ಅಳೆಯುತ್ತದೆ.

ವರ್ಷದಿಂದ ವರ್ಷಕ್ಕೆ ಅಳೆಯುವ ಹಣದುಬ್ಬರವು, ನಿರ್ದಿಷ್ಟ ತಿಂಗಳೊಂದರ ಬೆಲೆಗಳು ಹಿಂದಿನ ವರ್ಷದ ಅದೇ ತಿಂಗಳಿಗೆ ಹೋಲಿಸಿದರೆ ಎಷ್ಟಿವೆ ಎಂಬುದನ್ನು ತೋರಿಸುತ್ತದೆ.

► ನಿಮ್ಮ ಮನೆಯ ಇಂಧನ ಬಿಲ್ ಮೇಲೆ ಪರಿಣಾಮ?

LPG ಮತ್ತು ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಹಣದುಬ್ಬರವು ಜೂನ್ 2026ರಲ್ಲಿ ಶೇ. 4.60ರಷ್ಟಿದ್ದು, ಆಗಸ್ಟ್ 2026ರ ವೇಳೆಗೆ ಶೇ. 5.28ಕ್ಕೆ ಏರಿಕೆಯಾಗಿದೆ. ಇದರರ್ಥ ಈ ಇಂಧನಗಳನ್ನು ಬಳಸುವ ಕುಟುಂಬಗಳು ಹಿಂದಿನ ವರ್ಷದ ಅದೇ ಅವಧಿಗೆ ಹೋಲಿಸಿದರೆ ಹೆಚ್ಚಿನ ಹಣವನ್ನು ಪಾವತಿಸುತ್ತಿವೆ.

ಉದಾಹರಣೆಗೆ, 2026ರ ಆಗಸ್ಟ್ ನಲ್ಲಿ LPG ಸಿಲಿಂಡರ್ ಬೆಲೆ 1,000 ರೂ. ಇದ್ದರೆ, ಶೇ. 5.28ರಷ್ಟು ವಾರ್ಷಿಕ ಹಣದುಬ್ಬರ ದರವು ಹಿಂದಿನ ವರ್ಷದ ಇದೇ ಅವಧಿಯಲ್ಲಿ ಇದರ ಬೆಲೆ ಸುಮಾರು 950 ರೂ. ಇತ್ತು ಎಂಬುದನ್ನು ಸೂಚಿಸುತ್ತದೆ. ಆದ್ದರಿಂದ ಈ ಏರಿಕೆಯು ಪ್ರತಿ ಸಿಲಿಂಡರ್ ಗೆ ಸುಮಾರು 50 ರೂ. ಆಗಿದೆ.

ಆಗಸ್ಟ್ ನಲ್ಲಿ ಕಲ್ಲಿದ್ದಲು ಮತ್ತು ಸೌದೆ ಹಣದುಬ್ಬರವು LPG ಹಣದುಬ್ಬರಕ್ಕಿಂತ ಹೆಚ್ಚಿದ್ದು, ಕ್ರಮವಾಗಿ ಶೇ. 8.06 ಮತ್ತು ಶೇ. 8.26ರಷ್ಟಿತ್ತು.

ಸಾರಿಗೆ ಇಂಧನ ಹಣದುಬ್ಬರವು ಕುಟುಂಬಗಳ ಮೇಲೆ ನೇರ ಹಾಗೂ ಪರೋಕ್ಷ ಎರಡೂ ರೀತಿಯಲ್ಲಿ ಪರಿಣಾಮ ಬೀರುತ್ತದೆ. ಕಾರು ಅಥವಾ ದ್ವಿಚಕ್ರ ವಾಹನಗಳನ್ನು ಬಳಸುವ ಜನರು ಹೆಚ್ಚಿನ ಇಂಧನ ವೆಚ್ಚದ ಮೂಲಕ ನೇರ ಪರಿಣಾಮ ಎದುರಿಸಬೇಕಾಗಬಹುದು.

ಉದಾಹರಣೆಗೆ, ಒಬ್ಬ ವ್ಯಕ್ತಿಯು ಪೆಟ್ರೋಲ್ ಗಾಗಿ ತಿಂಗಳಿಗೆ 5,000 ರೂ. ಖರ್ಚು ಮಾಡುತ್ತಿದ್ದರೆ, ಶೇ. 7.51ರಷ್ಟು ವಾರ್ಷಿಕ ಏರಿಕೆಯು, ಅಷ್ಟೇ ಪ್ರಮಾಣದ ಇಂಧನವನ್ನು ಖರೀದಿಸಲಾಗಿದೆ ಎಂದು ಭಾವಿಸಿದರೆ ಹಿಂದಿನ ವರ್ಷ ಇದೇ ಖರ್ಚು ಸುಮಾರು 4,650 ರೂ. ಇತ್ತು ಎಂಬುದನ್ನು ಸೂಚಿಸುತ್ತದೆ.

CNG ಹಣದುಬ್ಬರವು ಜುಲೈ ತಿಂಗಳಲ್ಲಿದ್ದ ಶೇ 6.23ರಿಂದ ಆಗಸ್ಟ್ನಲ್ಲಿ ಶೇ. 8.16ಕ್ಕೆ ತೀವ್ರವಾಗಿ ಏರಿಕೆಯಾಗಿದ್ದು, ಇದು CNG ವಾಹನಗಳನ್ನು ಬಳಸುವ ಜನರ ಇಂಧನ ವೆಚ್ಚವನ್ನು ಹೆಚ್ಚಿಸುವ ಸಾಧ್ಯತೆಯಿದೆ. ಆದರೆ, ಡೀಸೆಲ್ ಮತ್ತು ಪೆಟ್ರೋಲ್ ಹಣದುಬ್ಬರವು ಬಹುತೇಕ ಬದಲಾಗದೆ ಹಾಗೇ ಉಳಿದಿದೆ.

ಸಾರಿಗೆ ಇಂಧನ ವೆಚ್ಚಗಳು ಇತರೆ ಗೃಹೋಪಯೋಗಿ ವೆಚ್ಚಗಳ ಮೇಲೆಯೂ ಪ್ರಭಾವ ಬೀರಬಹುದು. ಏಕೆಂದರೆ ಸರಕು ಮತ್ತು ಸೇವೆಗಳ ಸಾಗಣೆಗೆ ಇಂಧನವೇ ಪ್ರಮುಖ ಆಧಾರವಾಗಿದೆ. ಇದರರ್ಥ ವಾಹನ ಹೊಂದಿಲ್ಲದ ಕುಟುಂಬಗಳೂ ಸಹ ಪ್ರಯಾಣ, ವಿತರಣಾ ಶುಲ್ಕಗಳು ಅಥವಾ ಕೆಲವು ಸರಕು ಹಾಗೂ ಸೇವೆಗಳ ಬೆಲೆಗಳ ಮೂಲಕ ಪರೋಕ್ಷ ಪರಿಣಾಮವನ್ನು ಅನುಭವಿಸಬೇಕಾಗಬಹುದು.

► ಕುಟುಂಬಗಳು ಈ ಹಣದುಬ್ಬರ ಅಂಕಿಅಂಶಗಳನ್ನು ಹೇಗೆ ಅರ್ಥಮಾಡಿಕೊಳ್ಳಬೇಕು?

ಉದಾಹರಣೆಗೆ, ಮೂವರು ಸದಸ್ಯರಿರುವ ಒಂದು ಕುಟುಂಬವನ್ನು ತೆಗೆದುಕೊಳ್ಳೋಣ. ಇಲ್ಲಿ ತಾಯಿ ಅಡುಗೆಗಾಗಿ PNG ಬಳಸುತ್ತಾರೆ, ತಂದೆ CNG ಕಾರು ಚಲಾಯಿಸುತ್ತಾರೆ ಮತ್ತು ಮಗ ಪೆಟ್ರೋಲ್ ಸ್ಕೂಟರ್ ಬಳಸುತ್ತಾನೆ. ಈ ಕುಟುಂಬವು ಆಗಸ್ಟ್ 2025ರಲ್ಲಿ PNGಗೆ 1,500 ರೂ., CNGಗೆ 6,000 ರೂ. ಮತ್ತು ಪೆಟ್ರೋಲ್ ಗಾಗಿ 3,000 ರೂ. ಖರ್ಚು ಮಾಡಿದೆ ಎಂದುಕೊಳ್ಳೋಣ.

2026ರ ಆಗಸ್ಟ್ ನಲ್ಲಿನ ಹಣದುಬ್ಬರ ದರಗಳನ್ನು ಬಳಸಿದರೆ, ಪೈಪ್ಡ್ ನೈಸರ್ಗಿಕ ಅನಿಲದ ಬೆಲೆಯಲ್ಲಿ ಶೇ. 5.28ರಷ್ಟು ಏರಿಕೆಯು PNG ವೆಚ್ಚವನ್ನು ಸುಮಾರು 1,579 ರೂ.ಗೆ ತಲುಪಿಸುತ್ತದೆ. ಅದೇ ರೀತಿ, CNG ಬೆಲೆಯಲ್ಲಿ ಶೇ. 8.16ರಷ್ಟು ಏರಿಕೆಯು ಆ ವೆಚ್ಚವನ್ನು ಸುಮಾರು 6,490 ರೂ.ಗೆ ಕೊಂಡೊಯ್ಯುತ್ತದೆ ಮತ್ತು ಪೆಟ್ರೋಲ್ ಬೆಲೆಯಲ್ಲಿ ಶೇ. 7.51ರಷ್ಟು ಏರಿಕೆಯು ಪೆಟ್ರೋಲ್ ವೆಚ್ಚವನ್ನು ಸುಮಾರು 3,225 ರೂ.ಗೆ ಹೆಚ್ಚಿಸುತ್ತದೆ.

ಇದರರ್ಥ ಆಗಸ್ಟ್ 2025ರಲ್ಲಿ 10,500 ರೂ. ಇದ್ದ ಒಟ್ಟು ಮಾಸಿಕ ಇಂಧನ ವೆಚ್ಚವು, ಆಗಸ್ಟ್ 2026ರಲ್ಲಿ ಸುಮಾರು 11,294 ರೂ.ಗೆ ಏರಿಕೆಯಾಗಲಿದೆ. ಅಂದರೆ ಎರಡೂ ತಿಂಗಳುಗಳಲ್ಲಿ ಕುಟುಂಬವು ಒಂದೇ ಪ್ರಮಾಣದ ಇಂಧನವನ್ನು ಬಳಸಿದೆ ಎಂದು ಭಾವಿಸಿದರೆ ಇದು ಸುಮಾರು 794 ರೂ.ಗಳ ಹೆಚ್ಚಳವಾಗಿದೆ.

ಕುಟುಂಬದ ವೆಚ್ಚದಲ್ಲಿನ ನಿಜವಾದ ಹೆಚ್ಚಳವು ಇಂಧನ ಬಳಕೆ, ಸುಂಕಗಳು, ಚಿಲ್ಲರೆ ಬೆಲೆಗಳು ಮತ್ತು ಬಳಕೆಯ ಮಾದರಿಗಳಲ್ಲಿನ ಬದಲಾವಣೆಗಳನ್ನು ಅವಲಂಬಿಸಿರುತ್ತದೆ.

ಸೌಜನ್ಯ: livemint.com