Gmail ನ AI ರಚಿತ ಸಾರಾಂಶಗಳು ಜಾಗತಿಕವಾಗಿ ಲಭ್ಯ; ಆಫ್ ಮಾಡುವುದು ಹೇಗೆ?

AI-ರಚಿತ ಸಾರಾಂಶಗಳು ಕೆಲವು ಬಳಕೆದಾರರಿಗೆ ಸಮಯ ಉಳಿಸಬಹುದಾದರೂ ಗೂಗಲ್ನ AI ತಮ್ಮ ಇನ್ಬಾಕ್ಸ್ಗಳನ್ನು ವಿಶ್ಲೇಷಿಸುವುದನ್ನು ಬಳಕೆದಾರರು ಬಯಸದೆ ಇರಬಹುದು.

ನಿಮಗೆ ಬಂದಿರುವ ದೀರ್ಘ ಥ್ರೆಡ್ ತೆರೆದು ಯಾರಾದರೂ ಇಮೇಲ್ನ ಮುಖ್ಯಾಂಶಗಳನ್ನು ನಿಮಗೆ ನೀಡಬೇಕು ಎಂದು ಎಂದಾದರೂ ಬಯಸಿದ್ದೀರಾ? ಗೂಗಲ್ ಈಗ ಜೆಮಿನಿಯನ್ನು ನಿಖರವಾಗಿ ಹಾಗೆ ಮಾಡಲು ಬಳಸುತ್ತಿದೆ. AI-ರಚಿತ ಸಾರಾಂಶಗಳು ಕೆಲವು ಬಳಕೆದಾರರಿಗೆ ಸಮಯ ಉಳಿಸಬಹುದಾದರೂ ಗೂಗಲ್ನ AI ತಮ್ಮ ಇನ್ಬಾಕ್ಸ್ಗಳನ್ನು ವಿಶ್ಲೇಷಿಸುವುದನ್ನು ಬಳಕೆದಾರರು ಬಯಸದೆ ಇರಬಹುದು. Gmail ನ AI ಸಾರಾಂಶಗಳು ಈಗ ವಿಶ್ವಾದ್ಯಂತ ಬಿಡುಗಡೆಯಾಗುತ್ತಿರುವ ಕಾರಣದಿಂದ ಬಳಕೆದಾರರು ಈ ಫೀಚರ್ ಆಫ್ ಮಾಡುವ ಆಯ್ಕೆಯನ್ನೂ ಹೊಂದಿದ್ದಾರೆ.

Google Gmail ನಲ್ಲಿ Gemini ಚಾಲಿತ ಸಂಭಾಷಣೆ ಸಾರಾಂಶಗಳನ್ನು ವಿಸ್ತರಿಸಿದೆ. ಇದನ್ನು ಆಂಡ್ರಾಯ್ಡ್, ಐಒಎಸ್ ಮತ್ತು ವೆಬ್ನಾದ್ಯಂತ ಜಾಗತಿಕವಾಗಿ ಬಳಕೆದಾರರು ಮುಕ್ತವಾಗಿ ಬಳಸಬಹುದು. ಆರಂಭದಲ್ಲಿ ಈ ಫೀಚರ್ ಗೂಗಲ್ನ ಪಾವತಿದಾರ AI ಚಂದಾದಾರರಿಗೆ ಮಾತ್ರ ಲಭ್ಯವಿತ್ತು. ನಂತರ ಅಮೆರಿಕದಲ್ಲಿ ಮುಕ್ತ ಬಳಕೆದಾರರಿಗೂ ವಿಸ್ತರಿಸಲಾಗಿತ್ತು. ಇದೀಗ ವಿಶ್ವಾದ್ಯಂತ ಬಳಕೆದಾರರನ್ನು ತಲುಪುತ್ತಿದೆ.

Googleನ ಬೆಂಬಲ ಪುಟದಲ್ಲಿರುವ ನವೀಕರಣದ ಪ್ರಕಾರ, “AI ಅವಲೋಕನಗಳ ಸಂಭಾಷಣೆ ಸಾರಾಂಶಗಳು” (“AI Overviews conversation summaries”) ಈಗ ಪಾವತಿದಾರ, ವರ್ಕ್ಸ್ಪೇಸ್ ಮತ್ತು ಮುಕ್ತ Gmail ಖಾತೆಗಳಿಗೆ ಜಾಗತಿಕವಾಗಿ ಲಭ್ಯವಿದೆ. ಆಂಡ್ರಾಯ್ಡ್, ಐಒಎಸ್ ಮತ್ತು ವೆಬ್ ವೇದಿಕೆಯಲ್ಲಿ ಬಳಸುವವರಿಗೂ ಲಭ್ಯವಿದೆ. ಬೆಂಬಲ ಈಗ ಇಂಗ್ಲಿಷ್, ಫ್ರೆಂಚ್, ಜರ್ಮನ್, ಇಟಾಲಿಯನ್, ಜಪಾನೀಸ್, ಕೊರಿಯನ್, ಪೋರ್ಚುಗೀಸ್ ಮತ್ತು ಸ್ಪ್ಯಾನಿಷ್ ಸೇರಿದಂತೆ ಆಯ್ದ ಭಾಷೆಗಳಿಗೆ ಸೀಮಿತವಾಗಿದೆ.

AI-ರಚಿತ ಸಾರಾಂಶಗಳು ಇಮೇಲ್ ಥ್ರೆಡ್ನ ವಿಷಯಗಳನ್ನು ವಿಶ್ಲೇಷಿಸಲು ಮತ್ತು ಸಂಭಾಷಣೆಯ ಸಂಕ್ಷಿಪ್ತ ಅವಲೋಕನ ಒದಗಿಸಲು Gemini ಅನ್ನು ಬಳಸುತ್ತವೆ. ಪ್ರತಿ ಸಂದೇಶ ಪ್ರತ್ಯೇಕವಾಗಿ ಓದದೆ ಬಳಕೆದಾರರು ವಿವರ ಪಡೆಯಲು ಸಹಾಯವಾಗಲು ಈ ವೈಶಿಷ್ಟ್ಯ ವಿನ್ಯಾಸಗೊಳಿಸಲಾಗಿದೆ.

Gmail AI ಸಾರಾಂಶ ಆಫ್ ಮಾಡುವುದು ಹೇಗೆ?

ಜೆಮಿನಿ ಮತ್ತು ಇಮೇಲ್ಗಳನ್ನು ವಿಶ್ಲೇಷಿಸಲು ಬಯಸದ ಬಳಕೆದಾರರು Gmail ನಲ್ಲಿ workspace smart features ಗಳನ್ನು ನಿಷ್ಕ್ರಿಯಗೊಳಿಸಬಹುದು. ಅದಕ್ಕಾಗಿ Gmail ಗೆ ಹೋಗಿ ಅಲ್ಲಿ Settings ಗೆ ಹೋಗಿ. ಅಲ್ಲಿ General ಟ್ಯಾಬ್ ಆಡಿಯಲ್ಲಿ, “Google Workspace smart features” ಗಳನ್ನು ಪತ್ತೆ ಮಾಡಿ. ನಂತರ “Manage Workspace smart features setting” ಆಯ್ಕೆ ಮಾಡಿ. ಅಲ್ಲಿ “disable” ಆಯ್ಕೆ ಮೇಲೆ ಕ್ಲಿಕ್ ಮಾಡಿ. ಒಮ್ಮೆ ನಿಷ್ಕ್ರಿಯಗೊಳಿಸಿದ ನಂತರ Gemini-ಚಾಲಿತ ಸಾರಾಂಶಗಳು ಮತ್ತು ಇತರ ಸ್ಮಾರ್ಟ್ ಫೀಚರ್ಗಳು Gmail ಒಳಗೆ ಕೆಲಸ ಮಾಡುವುದಿಲ್ಲ.

ಈ ಸೆಟ್ಟಿಂಗ್ ಅನ್ನು ಆಫ್ ಮಾಡುವುದರಿಂದ Gemini ಇಮೇಲ್ ಸಂಭಾಷಣೆಗಳ ಸಾರಾಂಶ ರಚಿಸುವುದನ್ನು ತಡೆಯುತ್ತದೆ. ಆದರೆ ಇದು Google Drive ಮತ್ತು Google Tasks ನಂತಹ ಹಲವಾರು ಕಾರ್ಯಸ್ಥಳ-ಸಂಬಂಧಿತ AI ಸಾಮರ್ಥ್ಯಗಳನ್ನು ಸಹ ನಿಷ್ಕ್ರಿಯಗೊಳಿಸುತ್ತದೆ. ಬಳಕೆದಾರರು Gemini ಮೂಲಕ ಜ್ಞಾಪನೆಗಳನ್ನು ರಚಿಸುವಂತಹ ಕ್ರಿಯೆಗಳನ್ನು ನಿರ್ವಹಿಸಲು ಸಾಧ್ಯವಾಗದಿರಬಹುದು. ಹೀಗಾಗಿ ಈ ನಿರ್ಧಾರವನ್ನು ಗೌಪ್ಯತೆ ಆದ್ಯತೆ ಮತ್ತು AI ಚಾಲಿತ ಅನುಕೂಲತೆ ನಡುವಿನ ಸಮತೋಲನವನ್ನಾಗಿ ಮಾಡುತ್ತದೆ.