ಅಮೆರಿಕವು ಇರಾನ್ ಮೇಲೆ ದಾಳಿ ಮಾಡಿದ್ದು ಹೇಗೆ?

ಅಮೆರಿಕ ಮತ್ತು ಇರಾನ್ ನಡುವಿನ ಅಂತರ ಹತ್ತು ಸಾವಿರ ಕಿಲೋಮೀಟರ್ಗಳಿಗಿಂತ ಹೆಚ್ಚು. ಅಷ್ಟೊಂದು ದೂರದಿಂದ ಅಮೆರಿಕ ಹೇಳಿಕೊಂಡಿರುವಂತೆ, ತನ್ನ ಅತ್ಯಾಧುನಿಕ ಯುದ್ಧ ವಿಮಾನಗಳನ್ನು ಹಾರಿಸಿ ಇರಾನ್ನ ಸೂಕ್ಷ್ಮ ಪರಮಾಣು ಸ್ಥಾವರಗಳ ಮೇಲೆ ಯಶಸ್ವಿಯಾಗಿ ದಾಳಿ ಮಾಡಿದ್ದು ನಿಜಕ್ಕೂ ಅಚ್ಚರಿ ಮೂಡಿಸುವ ವಿಷಯ.

ಈ ರಹಸ್ಯ ಕಾರ್ಯಾಚರಣೆಯನ್ನು ಹೇಗೆ ಯೋಜಿಸಲಾಗಿತ್ತು? ಇಷ್ಟು ದೂರದವರೆಗೆ ಆ ಬಾಂಬರ್ ವಿಮಾನಗಳು ಹಾರಾಟ ನಡೆಸಿದ್ದು ಹೇಗೆ? ಯಾವೆಲ್ಲಾ ಅತ್ಯಾಧುನಿಕ ತಂತ್ರಜ್ಞಾನಗಳು ಈ ಕಾರ್ಯಾಚರಣೆಯನ್ನು ಯಶಸ್ವಿಗೊಳಿಸಿದವು? ಈ ಕುತೂಹಲಕಾರಿ ಪ್ರಶ್ನೆಗಳಿಗೆ ಉತ್ತರ ಇಲ್ಲಿದೆ.

ಅತ್ಯಾಧುನಿಕ ತಂತ್ರಜ್ಞಾನದ ಯುದ್ಧ ವಿಮಾನಗಳೇ ಈ ಕಾರ್ಯಾಚರಣೆಯ ಕೇಂದ್ರ ಬಿಂದು. ಅಮೆರಿಕದ ವಾಯುಸೇನೆಯಲ್ಲಿರುವ ಅತ್ಯಂತ ರಹಸ್ಯವಾದ ಬಿ-2 ಸ್ಪಿರಿಟ್ ಸ್ಟೆಲ್ತ್ ಬಾಂಬರ್ ವಿಮಾನಗಳನ್ನು ಈ ದಾಳಿಗೆ ಬಳಸಲಾಗಿತ್ತು. ಈ ವಿಮಾನಗಳು ಶತ್ರುಗಳ ರಾಡಾರ್ ಕಣ್ಣಿಗೆ ಕಾಣಿಸದಂತೆ ವಿನ್ಯಾಸಗೊಳಿಸಲ್ಪಟ್ಟಿವೆ.

ಜೂನ್ 22 ರಂದು, ಅಮೆರಿಕದ ಮಿಸ್ಸೌರಿ ರಾಜ್ಯದ ವೈಟ್ಮ್ಯಾನ್ ವಾಯುನೆಲೆಯಿಂದ ಈ ಏಳು ಬಿ-2 ಬಾಂಬರ್ಗಳು ರಾತ್ರಿಯ ಕತ್ತಲೆಯಲ್ಲಿ ತಮ್ಮ ಸುದೀರ್ಘ ಪ್ರಯಾಣವನ್ನು ಪ್ರಾರಂಭಿಸಿದವು. ಇರಾನ್ಗೆ ತಲುಪಲು ಈ ಬಾಂಬರ್ಗಳು ಸುಮಾರು 18 ಗಂಟೆಗಳ ಕಾಲ ನಿರಂತರವಾಗಿ ಹಾರಾಟ ನಡೆಸಬೇಕಿತ್ತು.

ಅಷ್ಟು ದೂರದವರೆಗೆ ಒಂದೇ ಸಮನೆ ಹಾರಾಟ ನಡೆಸುವುದು ಯಾವುದೇ ವಿಮಾನಕ್ಕೂ ಕಷ್ಟಸಾಧ್ಯ. ಹಾಗಾಗಿ, ಈ ಬಾಂಬರ್ಗಳಿಗೆ ದಾರಿಯಲ್ಲಿ ಹಲವು ಬಾರಿ ಇಂಧನವನ್ನು ತುಂಬಿಸಲಾಯಿತು. ವಿಶೇಷವೆಂದರೆ, ಈ ಇಂಧನ ತುಂಬುವ ಪ್ರಕ್ರಿಯೆಯೂ ಆಕಾಶದಲ್ಲಿಯೇ ನಡೆಯಿತು!

ದೊಡ್ಡ ಟ್ಯಾಂಕರ್ ವಿಮಾನಗಳು ಹಾರಾಟದಲ್ಲಿರುವಾಗಲೇ ಈ ಬಾಂಬರ್ಗಳಿಗೆ ಇಂಧನವನ್ನು ಪೂರೈಸಿದವು. ಇದು ಅತ್ಯಂತ ಕಷ್ಟಕರ ಮತ್ತು ಅಪಾಯಕಾರಿ ಪ್ರಕ್ರಿಯೆಯಾಗಿದ್ದು, ಅಮೆರಿಕದ ವಾಯುಸೇನೆಗೆ ಮಾತ್ರ ಸಾಧ್ಯವಿರುವ ತಂತ್ರಜ್ಞಾನವಾಗಿದೆ ಎಂದು ಹೇಳಲಾಗಿದೆ.

ಈ ಕಾರ್ಯಾಚರಣೆಯನ್ನು ಇನ್ನಷ್ಟು ರಹಸ್ಯವಾಗಿಸಲು ಅಮೆರಿಕ ಒಂದು ಮೋಸದ ತಂತ್ರವನ್ನು ಸಹ ಬಳಸಿತ್ತು. ಕೆಲವು ವಿಮಾನಗಳನ್ನು ಪೆಸಿಫಿಕ್ ಸಾಗರದ ಕಡೆಗೆ ಕಳುಹಿಸಿ ಎದುರಾಳಿಗಳ ಗಮನವನ್ನು ಬೇರೆಡೆಗೆ ಸೆಳೆಯಲಾಗಿತ್ತು. ಮುಖ್ಯ ದಾಳಿ ಪಡೆ ಅಟ್ಲಾಂಟಿಕ್ ಸಾಗರದ ಮೂಲಕ ಇರಾನ್ ನತ್ತ ಸಾಗುತ್ತಿತ್ತು.

ಬಾಂಬರ್ಗಳು ಇರಾನ್ನ ವಾಯುಪ್ರದೇಶವನ್ನು ಪ್ರವೇಶಿಸುವ ಸ್ವಲ್ಪ ಸಮಯದ ಮುಂಚೆ, ಅರೇಬಿಯನ್ ಸಮುದ್ರದಲ್ಲಿದ್ದ ಅಮೆರಿಕದ ಜಲಾಂತರ್ಗಾಮಿ ನೌಕೆಯೊಂದು ಇರಾನ್ ನ ಇಸ್ಫಹಾನ್ನಲ್ಲಿದ್ದ ಪರಮಾಣು ಸ್ಥಾವರದ ಮೇಲೆ ಟೊಮಾಹಾಕ್ ಕ್ರೂಸ್ ಕ್ಷಿಪಣಿಗಳನ್ನು ಉಡಾಯಿಸಿತು. ಇದು ಭೂಮಿಯ ಮೇಲಿನ ಗುರಿಗಳ ಮೇಲೆ ಏಕಕಾಲದಲ್ಲಿ ದಾಳಿ ಮಾಡುವ ಉದ್ದೇಶವನ್ನು ಹೊಂದಿತ್ತು.

ಫೋರ್ಡೊದಲ್ಲಿರುವ ಇರಾನ್ ನ ಮುಖ್ಯ ಪರಮಾಣು ಸ್ಥಾವರವು ಪರ್ವತದ ಆಳದಲ್ಲಿ, ಸುಮಾರು 80-90 ಮೀಟರ್ಗಳಷ್ಟು ಕೆಳಗಡೆ ನಿರ್ಮಿಸಲಾಗಿತ್ತು. ಇಂತಹ ಭದ್ರವಾದ ಸ್ಥಾವರವನ್ನು ನಾಶಮಾಡಲು ಅಮೆರಿಕ ಬಂಕರ್ ಭೇದಕ ಬಾಂಬ್ ಗಳಾದ ಜಿಬಿಯು-57 ಎಂಒಪಿ ಗಳನ್ನು ಬಳಸಿತು. ಪ್ರತಿಯೊಂದು ಬಾಂಬ್ 13,000 ಕೆಜಿಗೂ ಹೆಚ್ಚು ತೂಕವಿದ್ದು, 60 ಅಡಿಗಳಷ್ಟು ಕಾಂಕ್ರೀಟ್ ಅಥವಾ 200 ಅಡಿಗಳಷ್ಟು ಭೂಮಿಯನ್ನು ಭೇದಿಸುವ ಸಾಮರ್ಥ್ಯವನ್ನು ಹೊಂದಿದೆ.

ಏಳು ಬಿ-2 ಬಾಂಬರ್ಗಳು ಫೋರ್ಡೊವೊಂದರ ಮೇಲೆಯೇ 14 ಬಂಕರ್ ಭೇದಕ ಬಾಂಬ್ ಗಳನ್ನು ಹಾಕಿದ್ದು, ಸ್ಥಾವರವನ್ನು ಸಂಪೂರ್ಣವಾಗಿ ನಾಶಪಡಿಸಿವೆ ಎಂದು ಅಮೆರಿಕ ಹೇಳಿಕೊಂಡಿದೆ. ಗುರಿಯನ್ನು ಮುಟ್ಟಿದ ನಂತರ, ಎಲ್ಲಾ ಬಿ-2 ಬಾಂಬರ್ಗಳು ಯಾವುದೇ ಅಡೆತಡೆಯಿಲ್ಲದೆ ಮತ್ತೆ ಅಮೆರಿಕಕ್ಕೆ ಮರಳಿದವು. ಅವು ಸುಮಾರು 18 ಗಂಟೆಗಳ ಹಾರಾಟದ ನಂತರ ತಮ್ಮ ನೆಲೆಯನ್ನು ತಲುಪಿದವು.

ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೇತ್ ಈ ಕಾರ್ಯಾಚರಣೆಯನ್ನು "ಶಕ್ತಿಶಾಲಿ ಮತ್ತು ಸ್ಪಷ್ಟ" ಎಂದು ಬಣ್ಣಿಸಿದ್ದಾರೆ. ಇರಾನ್ ಮೇಲಿನ ಅಮೇರಿಕಾದ ದಾಳಿಗಳು ಎಲ್ಲ ಅಂತರ್ ರಾಷ್ಟ್ರೀಯ ಕಾನೂನುಗಳನ್ನು ಉಲ್ಲಂಘಿಸಿವೆ ಹಾಗು ನೈತಿಕವಾಗಿಯೂ ತಪ್ಪಾಗಿವೆ.. ಆದರೆ ಈ ರಹಸ್ಯ ದಾಳಿಯು ಮತ್ತೊಮ್ಮೆ ಅಮೆರಿಕದ ತಂತ್ರಜ್ಞಾನ ಮತ್ತು ಮಿಲಿಟರಿ ಕಾರ್ಯತಂತ್ರದ ಬಲವನ್ನು ಜಗತ್ತಿಗೆ ತೋರಿಸಿದೆ.

ಅಮೆರಿಕದ ಈ ಬಿ-2 ಬಾಂಬರ್ ನ ಬೆಲೆ ಸುಮಾರು 16,000 ಕೋಟಿ ರೂಪಾಯಿ. ಅತ್ಯಾಧುನಿಕ ಸ್ಟೆಲ್ತ್ ತಂತ್ರಜ್ಞಾನವನ್ನು ಹೊಂದಿರುವ ಈ ಬಾಂಬರ್ ನ ಉತ್ಪಾದನೆಯು 1980 ರ ದಶಕದ ಉತ್ತರಾರ್ಧದಲ್ಲಿ ಪ್ರಾರಂಭವಾಯಿತು. ಆದರೆ ಸೋವಿಯತ್ ಒಕ್ಕೂಟದ ಪತನದಿಂದಾಗಿ ಇದರ ಉತ್ಪಾದನೆಯನ್ನು ಮೊಟಕುಗೊಳಿಸಲಾಯಿತು.

ಪೆಂಟಗನ್ ನ ಯೋಜಿತ ಖರೀದಿ ಕಾರ್ಯಕ್ರಮವು ಮೊಟಕುಗೊಂಡ ನಂತರ ಕೇವಲ 21 ವಿಮಾನಗಳನ್ನು ಮಾತ್ರ ತಯಾರಿಸಲಾಯಿತು. ಬಿ-2 ಬಾಂಬರ್ ಸುಮಾರು 6,000 ನಾಟಿಕಲ್ ಮೈಲುಗಳಿಗಿಂತಲೂ ಅಂದರೆ 11,112 ಕಿಮೀ ಹೆಚ್ಚು ದೂರದವರೆಗೆ ಇಂಧನ ತುಂಬಿಸಲು ಇಳಿಯದೆ ಹಾರಾಟ ನಡೆಸುವ ಸಾಮರ್ಥ್ಯವನ್ನು ಹೊಂದಿದೆ. ಆಕಾಶದಲ್ಲಿ ಇಂಧನ ತುಂಬಿಸುವ ವ್ಯವಸ್ಥೆಯೊಂದಿಗೆ, ಬಿ-2 ವಿಶ್ವದ ಯಾವುದೇ ಗುರಿಯನ್ನು ತಲುಪಬಲ್ಲದು. ಮಿಸೌರಿಯಿಂದ ಅಫ್ಘಾನಿಸ್ತಾನ ಮತ್ತು ಲಿಬಿಯಾಕ್ಕೆ ಹಾಗೂ ಈಗ ಇರಾನ್ಗೆ ನಡೆಸಲಾದ ಕಾರ್ಯಾಚರಣೆಗಳು ಇದನ್ನು ಸಾಬೀತುಪಡಿಸಿವೆ.

ಈ ಬಾಂಬರ್ 40,000 ಪೌಂಡ್ ಅಂದ್ರೆ 18,144 ಕೆಜಿ ಗಿಂತಲೂ ಹೆಚ್ಚು ಪೇಲೋಡ್ ಸಾಮರ್ಥ್ಯವನ್ನು ಹೊಂದಿದೆ, ಅಂದರೆ ಇದು ವಿವಿಧ ರೀತಿಯ ಸಾಂಪ್ರದಾಯಿಕ ಮತ್ತು ಪರಮಾಣು ಶಸ್ತ್ರಾಸ್ತ್ರಗಳನ್ನು ಒಯ್ಯಬಲ್ಲದು. ಇದರ ಆಂತರಿಕ ಶಸ್ತ್ರಾಸ್ತ್ರ ಕೋಣೆಗಳನ್ನು ದೊಡ್ಡ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ಸಾಗಿಸುವಾಗಲೂ ಸದ್ದಿಲ್ಲದ ಗುಣಲಕ್ಷಣಗಳನ್ನು ಕಾಪಾಡಿಕೊಳ್ಳಲು ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾಗಿದೆ.

ಇದರಲ್ಲಿ ಭಾರೀ ಪ್ರಮಾಣದ ಬಂಕರ್ ಭೇದಕ ಬಾಂಬ್ಗಳನ್ನು ಸಹ ಸಾಗಿಸಬಹುದು. ಬಿ-2 ವಿಮಾನದಲ್ಲಿ ಇಬ್ಬರು ಪೈಲಟ್ ಇರುತ್ತಾರೆ. ಇದು ಸುಧಾರಿತ ಸ್ವಯಂಚಾಲಿತ ವ್ಯವಸ್ಥೆಗಳ ಮೂಲಕ ಕಾರ್ಯಾಚರಣೆ ನಡೆಸಿ ಸಿಬ್ಬಂದಿ ಅಗತ್ಯವನ್ನು ಕಡಿಮೆ ಮಾಡುತ್ತದೆ. ಬಿ-2 ನ ಸ್ಟೆಲ್ತ್ ತಂತ್ರಜ್ಞಾನವು ರಾಡಾರ್-ಹೀರಿಕೊಳ್ಳುವ ವಸ್ತುಗಳು ಮತ್ತು ಕೋನೀಯ ವಿನ್ಯಾಸದ ವೈಶಿಷ್ಟ್ಯಗಳನ್ನು ಒಳಗೊಂಡಿದೆ. ಇದು ಶತ್ರುಗಳ ವಾಯು ರಕ್ಷಣಾ ವ್ಯವಸ್ಥೆಗಳಿಂದ ಪತ್ತೆಯಾಗುವುದನ್ನು ಕಡಿಮೆ ಮಾಡುತ್ತದೆ. ಇದರ ರಾಡಾರ್ ಅಡ್ಡ-ಛೇದವನ್ನು ಸಣ್ಣ ಹಕ್ಕಿಯೊಂದಕ್ಕೆ ಹೋಲಿಸಬಹುದಾಗಿದೆ ಎಂದು ವರದಿಯಾಗಿದೆ. ಇದು ಸಾಂಪ್ರದಾಯಿಕ ರಾಡಾರ್ ಗೆ ಬಹುತೇಕ ಅಗೋಚರವಾಗಿರುತ್ತದೆ. ಬಿ-2 ಅಮೆರಿಕದ ಪರಮಾಣು ತ್ರಿವಳಿಯ ಪ್ರಮುಖ ಅಂಶವಾಗಿದೆ. ಇದು ಸದ್ದಿಲ್ಲದೇ ಮತ್ತು ನಿಖರತೆಯೊಂದಿಗೆ ಪರಮಾಣು ಶಸ್ತ್ರಾಸ್ತ್ರಗಳನ್ನು ತಲುಪಿಸುವ ಸಾಮರ್ಥ್ಯವನ್ನು ಹೊಂದಿದೆ.