"ನೀವು ನಮ್ಮ ತಾಯಿ ಭಾರತ ಮಾತೆಯನ್ನು ಮಾರಿದ್ದೀರಿ"; ಲೋಕಸಭೆಯಲ್ಲಿ ರಾಹುಲ್ ಗಾಂಧಿ ಭಾಷಣದ ಮುಖ್ಯಾಂಶಗಳು...

ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಬುಧವಾರ ಕೇಂದ್ರ ಬಜೆಟ್ ಮೇಲಿನ ಚರ್ಚೆಯಲ್ಲಿ ಭಾಗವಹಿಸಿ ಮಾತನಾಡುತ್ತಾ ಅಸ್ಥಿರ ಜಾಗತಿಕ ಕ್ರಮದಲ್ಲಿ ಭಾರತದ ಕಾರ್ಯತಂತ್ರದ ಹಿತಾಸಕ್ತಿಗಳೊಂದಿಗೆ ಸರ್ಕಾರ ರಾಜಿ ಮಾಡಿಕೊಂಡಿದೆ . ಅಮೆರಿಕದೊಂದಿಗಿನ ವ್ಯಾಪಾರ ಒಪ್ಪಂದದಲ್ಲಿ ದೇಶದ ಡೇಟಾವನ್ನು "ಮಾರಾಟ" ಮಾಡಿದೆ ಎಂದು ಆರೋಪಿಸಿದರು. ಭೌಗೋಳಿಕ ರಾಜಕೀಯ ಸಂಘರ್ಷ ಮತ್ತು ಆರ್ಥಿಕ ಶಸ್ತ್ರಾಸ್ತ್ರೀಕರಣದ ಯುಗದಲ್ಲಿ ಭಾರತವು ತನ್ನ ಜನರು, ದತ್ತಾಂಶ, ಇಂಧನ ಮತ್ತು ಆಹಾರ ವ್ಯವಸ್ಥೆಗಳನ್ನು ರಕ್ಷಿಸಬೇಕು ಎಂದು ರಾಹುಲ್ ಎಚ್ಚರಿಸಿದ್ದಾರೆ.

ತಮ್ಮ ಭಾಷಣದಲ್ಲಿ ಮೊದಲಿಗೆ ಆರ್ಥಿಕ ಸಮೀಕ್ಷೆಯನ್ನು ಉಲ್ಲೇಖಿಸಿದ ಅವರು ಆರ್ಥಿಕ ಸಮೀಕ್ಷೆಯನ್ನು ನಾನು ಕಂಡುಕೊಂಡ ಎರಡು ಪ್ರಮುಖ ಅಂಶಗಳನ್ನು ಹೇಳುತ್ತಿದ್ದೇನೆ. ಮೊದಲನೆಯ ಅಂಶವೆಂದರೆ, ನಾವು ತೀವ್ರಗೊಳ್ಳುತ್ತಿರುವ ಭೌಗೋಳಿಕ ರಾಜಕೀಯ ಸಂಘರ್ಷದ ಜಗತ್ತಿನಲ್ಲಿ ವಾಸಿಸುತ್ತಿದ್ದೇವೆ. ಅಮೆರಿಕದ ಪ್ರಾಬಲ್ಯವನ್ನು ಚೀನಿಯರು, ರಷ್ಯನ್ನರು, ಇತರ ಶಕ್ತಿಗಳು ಪ್ರಶ್ನಿಸುತ್ತಿದ್ದಾರೆ. ಎರಡನೆಯ ವಿಷಯವೆಂದರೆ ನಾವು ಇಂಧನ ಮತ್ತು ಆರ್ಥಿಕ ಶಸ್ತ್ರಾಸ್ತ್ರೀಕರಣದ ಜಗತ್ತಿನಲ್ಲಿ ವಾಸಿಸುತ್ತಿದ್ದೇವೆ ಎಂಬುದು.

ಪ್ರಧಾನಿ ಮತ್ತು NSA ಕೆಲ ಸಮಯಗಳ ಹಿಂದೆ ಯುದ್ಧದ ಯುಗ ಮುಗಿದಿದೆ ಎಂದಿದ್ದರು. ವಾಸ್ತವವಾಗಿ, ನಾವು ಯುದ್ಧದ ಯುಗಕ್ಕೆ ಕಾಲಿಡುತ್ತಿದ್ದೇವೆ. ಉಕ್ರೇನ್‌ನಲ್ಲಿ ಯುದ್ಧವಿದೆ, ಗಾಝಾದಲ್ಲಿ ಯುದ್ಧವಿತ್ತು, ಮಧ್ಯಪ್ರಾಚ್ಯದಲ್ಲಿ ಯುದ್ಧವಿದೆ, ಇರಾನ್‌ನಲ್ಲಿ ಯುದ್ಧದ ಬೆದರಿಕೆ ಇದೆ. ನಾವು ಸಿಂಧೂರ್‌ನಲ್ಲಿ ಕಾರ್ಯಾಚರಣೆಗಳನ್ನು ನಡೆಸಿದ್ದೇವೆ. ಆದ್ದರಿಂದ ನಾವು ಅಸ್ಥಿರತೆಯ ಜಗತ್ತಿಗೆ ಸಾಗುತ್ತಿದ್ದೇವೆ. ಇನ್ನೊಂದೆಡೆ ನಮಗೆ ಡಾಲರ್‌ನ ಸವಾಲು ಇದೆ, ಅಮೆರಿಕದ ಪ್ರಾಬಲ್ಯದ ಸವಾಲು ಇದೆ. ನಾವು ಒಂದು ಮಹಾಶಕ್ತಿಯ ಪ್ರಪಂಚದಿಂದ ನಿಜವಾಗಿಯೂ ನಾವು ಊಹಿಸಲು ಸಾಧ್ಯವಾಗದ ಹೊಸ ಜಗತ್ತಿಗೆ ಚಲಿಸುತ್ತಿದ್ದೇವೆ ಎಂದಿದ್ದಾರೆ ರಾಹುಲ್ ಗಾಂಧಿ.

►ರಾಹುಲ್ ಗಾಂಧಿ ಭಾಷಣದ ಪ್ರಮುಖ ಅಂಶಗಳು

ನಾವು ಸ್ಥಿರತೆಯ ಪ್ರಪಂಚದಿಂದ ಅಸ್ಥಿರತೆಯ ಜಗತ್ತಿಗೆ ಚಲಿಸುತ್ತಿದ್ದೇವೆ. ಪ್ರಧಾನಿ ಮೋದಿ ಮತ್ತು NSA ಯುದ್ಧದ ಯುಗ ಮುಗಿದಿದೆ ಎಂದಿದ್ದರು. ಆದರೆ ನಾವು ಯುದ್ಧದ ಯುಗಕ್ಕೆ ಚಲಿಸುತ್ತಿದ್ದೇವೆ. ಉಕ್ರೇನ್, ಗಾಝಾದಲ್ಲಿ ಯುದ್ಧವಿದೆ, ಆಪರೇಷನ್ ಸಿಂಧೂರ್ ಕಾರ್ಯಾಚರಣೆ ಆಗಿದೆ.

ನೀವು ಅಪಾಯಕಾರಿ ಜಗತ್ತಿಗೆ ತೆರೆದುಕೊಂಡಾಗ ನೀವು ಅರ್ಥಮಾಡಿಕೊಳ್ಳಬೇಕಾದ ಮೊದಲ ವಿಷಯವೇನು? ಅದು ನಮ್ಮ ಸಾಮರ್ಥ್ಯಗಳು, ನಮ್ಮ ದೇಶದಲ್ಲಿ 1.4 ಬಿಲಿಯನ್ ಜನರಿದ್ದಾರೆ, ಅವರು ವಿಶ್ವದ ಯಾರಿಗಾದರೂ ಸವಾಲು ಹಾಕಬಲ್ಲ ಪ್ರತಿಭಾವಂತ, ಚೈತನ್ಯಶೀಲರು ಎಂದು ನಾನು ಸಂಸತ್ತಿಗೆ ಹೇಳಬಯಸುತ್ತೇನೆ. ಜನರು ಡೇಟಾವನ್ನು ರಚಿಸುತ್ತಾರೆ. ನಾವು ಗ್ರಹದಲ್ಲಿ ಅತಿದೊಡ್ಡ ಡೇಟಾ ಪೂಲ್ ಅನ್ನು ಹೊಂದಿದ್ದೇವೆ. 1.4 ಬಿಲಿಯನ್ ಜನರು ಎಂದರೆ ಭಾರತದಲ್ಲಿ ಬೃಹತ್ ಪ್ರಮಾಣದ ಡೇಟಾವನ್ನು ಉತ್ಪಾದಿಸಲಾಗುತ್ತಿದೆ. ಎಲ್ಲರೂ AI ಬಗ್ಗೆ ಮಾತನಾಡುತ್ತಾರೆ. ಆದರೆ AI ಬಗ್ಗೆ ಮಾತನಾಡುವುದು ಪೆಟ್ರೋಲ್ ಇಲ್ಲದೆ ಆಂತರಿಕ ದಹನಕಾರಿ ಎಂಜಿನ್ ಬಗ್ಗೆ ಮಾತನಾಡಿದಂತೆ. AI ಗೆ ಪೆಟ್ರೋಲ್ ಡೇಟಾ. ಅಂದರೆ ನಿಮ್ಮಲ್ಲಿ AI ಇದ್ದು ನೀವು ಡೇಟಾ ಹೊಂದಿಲ್ಲದಿದ್ದರೆ, ನಿಮ್ಮಲ್ಲಿ ಏನೂ ಇಲ್ಲ. ಗ್ರಹದಲ್ಲಿ ಎರಡು ದೊಡ್ಡ ಡೇಟಾ ಪೂಲ್‌ಗಳು ಯಾವುವು? ಭಾರತೀಯ ಡೇಟಾ ಪೂಲ್ ಮತ್ತು ಚೀನೀ ಡೇಟಾ ಪೂಲ್. ಜನಸಂಖ್ಯೆಯೂ ಒಂದು ಶಕ್ತಿ. ಆದರೆ ಡೇಟಾ ಮುಖ್ಯ ಎಂದು ನೀವು ಗುರುತಿಸಿದರೆ ಮಾತ್ರ.

ಅಮೆರಿಕ ಮತ್ತು ಚೀನಾ ನಡುವಿನ ಸ್ಪರ್ಧೆಯಲ್ಲಿ ಅತ್ಯಂತ ಅಮೂಲ್ಯವಾದ ಏಕೈಕ ಆಸ್ತಿ ಭಾರತದ ದತ್ತಾಂಶ. ಅಮೆರಿಕವು ಒಂದು ಮಹಾಶಕ್ತಿಯಾಗಿ ಉಳಿಯಲು ಬಯಸಿದರೆ ಮತ್ತು ತನ್ನ ಡಾಲರ್ ಅನ್ನು ರಕ್ಷಿಸಿಕೊಳ್ಳಲು ಬಯಸಿದರೆ, ಅದಕ್ಕೆ ಪ್ರಮುಖ ಕಾರಣ ಭಾರತೀಯ ದತ್ತಾಂಶವಾಗಿದೆ.

ಇಂಡಿಯಾ ಬ್ಲಾಕ್ ಬಣವು ಅಧ್ಯಕ್ಷ ಟ್ರಂಪ್ ಅವರೊಂದಿಗೆ ಮಾತುಕತೆ ನಡೆಸುತ್ತಿದ್ದರೆ, ನಾವು 'ಈ ಸಮೀಕರಣದಲ್ಲಿ ಅತ್ಯಂತ ಮುಖ್ಯವಾದ ವಿಷಯವೆಂದರೆ ಭಾರತೀಯ ದತ್ತಾಂಶ' ಎಂದು ಹೇಳುತ್ತಿದ್ದೆವು. ಅಧ್ಯಕ್ಷ ಟ್ರಂಪ್, ನೀವು ಈ ದತ್ತಾಂಶಕ್ಕೆ ಪ್ರವೇಶವನ್ನು ಬಯಸಿದರೆ, ದಯವಿಟ್ಟು ನೀವು ನಮ್ಮೊಂದಿಗೆ ಸಮಾನವಾಗಿ ಮಾತನಾಡಬೇಕು ಎಂಬುದನ್ನು ಅರ್ಥಮಾಡಿಕೊಳ್ಳಿ. ನಾವು ನಿಮ್ಮ ಸೇವಕರು ಎಂಬಂತೆ ನೀವು ನಮ್ಮೊಂದಿಗೆ ಮಾತನಾಡಲು ಬರಬೇಡಿ. ನೀವು ಭಾರತೀಯ ದತ್ತಾಂಶಕ್ಕೆ ಪ್ರವೇಶವನ್ನು ಬಯಸಿದರೆ, ನೀವು ನಮ್ಮೊಂದಿಗೆ ಸಮಾನವಾಗಿ ಮಾತನಾಡಬೇಕಾಗುತ್ತದೆ ಎಂದು ನಾವು ಹೇಳುತ್ತಿದ್ದೆವು.

ನಮ್ಮನ್ನು ಪಾಕಿಸ್ತಾನಕ್ಕೆ ಸಮಾನರಾಗುವಂತೆ ಮಾಡಲಾಗುವುದಿಲ್ಲ. ಪಾಕಿಸ್ತಾನ ಸೇನಾ ಮುಖ್ಯಸ್ಥರು ಅವರೊಂದಿಗೆ ಉಪಾಹಾರ ಸೇವಿಸಬೇಕೆಂದು ಅಧ್ಯಕ್ಷ ಟ್ರಂಪ್ ನಿರ್ಧರಿಸಿದರೆ, ಅದರ ಬಗ್ಗೆ ನಾವು ಏನಾದರೂ ಹೇಳಬೇಕಾಗುತ್ತದೆ.

ನಾವು ಯಾರಿಂದ ತೈಲ ಖರೀದಿಸಬೇಕು ಎಂಬುದನ್ನು ನಮ್ಮ ಪ್ರಧಾನಿ ನಿರ್ಧರಿಸುವುದಿಲ್ಲ. ಅದನ್ನು ಟ್ರಂಪ್‌ ನಿರ್ಧಾರ ಮಾಡುತ್ತಾರೆ. ಅವರು ಇಷ್ಟಪಡದ ದೇಶದಿಂದ ತೈಲ ಖರೀದಿಸಿದರೆ ನಮ್ಮನ್ನು ಶಿಕ್ಷಿಸುತ್ತಾರೆ. ಅವರು ಸುಂಕವನ್ನು ಶೇ 50ಕ್ಕೆ ಏರಿಸುತ್ತಾರೆ.

21 ನೇ ಶತಮಾನದಲ್ಲಿ ಭಾರತವನ್ನು ಪರಿವರ್ತಿಸಲಿರುವ, 21 ನೇ ಶತಮಾನದಲ್ಲಿ ನಮ್ಮನ್ನು ಸೂಪರ್ ಪವರ್ ಆಗಿ ಮಾಡಲಿರುವ ವಿಷಯ, ಮೋದಿ ಸರ್ಕಾರ ನಮ್ಮ ಡೇಟಾದೊಂದಿಗೆ ಇದನ್ನೇ ಮಾಡಿದೆ. ನಮ್ಮ ಡಿಜಿಟಲ್ ವ್ಯಾಪಾರ ನಿಯಮಗಳ ಮೇಲಿನ ನಿಯಂತ್ರಣವನ್ನು ನಾವು ಬಿಟ್ಟುಕೊಡುತ್ತೇವೆ. ಎರಡನೆಯದು, ಡೇಟಾ ಲೋಕಲೈಸೇಷನ್ ಅಗತ್ಯವಿಲ್ಲ. ಮೂರನೆಯದು, ಅಮೆರಿಕದ ಉಚಿತ ಡೇಟಾ ಹರಿವು. ನಾಲ್ಕನೆಯದು, ಡಿಜಿಟಲ್ ತೆರಿಗೆಯ ಮೇಲಿನ ಮಿತಿ. ಐದನೆಯದು, ಯಾವುದೇ ಸೋರ್ಸ್ ಕೋಡ್ ಅನ್ನು ಬಹಿರಂಗಪಡಿಸುವ ಅಗತ್ಯವಿಲ್ಲ. ಹಣಕಾಸು ಸಚಿವರು ನಗುತ್ತಿದ್ದಾರೆ. ಅವರು ತುಂಬಾ ನಗಲು ಇಷ್ಟಪಡುತ್ತಾರೆ. ನೀವು ಜಗತ್ತಿನ ಅತ್ಯಂತ ಶ್ರೀಮಂತ ಕಂಪನಿಗಳು ನಮ್ಮ ಜನರ ಡೇಟಾವನ್ನು ಬಳಸಿಕೊಂಡು ಶತಕೋಟಿ ಗಳಿಸಲು ಬಿಡುತ್ತಿದ್ದೀರಿ, ಮತ್ತು ನೀವು 20 ವರ್ಷಗಳ ಕಾಲ ತೆರಿಗೆ ರಜೆ ಕೊಟ್ಟಿದ್ದೀರಿ. ನೀವು ಡೇಟಾದ ಮೇಲೆ ಮಾಡಿದ್ದು ಇದನ್ನೇ.

ಇಂಧನ ಮತ್ತು ಹಣಕಾಸು ಶಸ್ತ್ರಾಸ್ತ್ರೀಕರಣಗೊಳ್ಳುತ್ತಿದೆ ಎಂದು ಬಜೆಟ್ ಗುರುತಿಸುತ್ತದೆ. ಆದರೆ ಬಜೆಟ್‌ನಲ್ಲಿ ಇದನ್ನು ಪರಿಶೀಲಿಸುವ ಯಾವುದೂ ಇಲ್ಲ. ನಮ್ಮ ಜನರನ್ನು ಡೇಟಾ, ಆಹಾರ ಪೂರೈಕೆ ಮತ್ತು ಇಂಧನ ವ್ಯವಸ್ಥೆಯಲ್ಲಿ ರಕ್ಷಿಸಬೇಕಾಗಿದೆ.

ಸರ್ಕಾರದ AI ಅನೇಕ ಪರಿಣಾಮಗಳನ್ನು ಬೀರಲಿದೆ ಎಂದು ನಾನು ಎಚ್ಚರಿಸುತ್ತೇನೆ. ಮಾಹಿತಿ ತಂತ್ರಜ್ಞಾನದ ಮುಂಚೂಣಿಯಲ್ಲಿರುವ ಕಂಪನಿಗಳು ಹೋರಾಡುತ್ತವೆ. ಸಮರ ಕಲೆಗಳಲ್ಲಿ grip, choke ಮತ್ತು tap ಎಂಬ ಅನುಕ್ರಮವಿದೆ . ಈ ಹಿಡಿತ ರಾಜಕೀಯದಲ್ಲೂ ಇದೆ. ಆದರೆ, ರಾಜಕೀಯದಲ್ಲಿ ಇವುಗಳು ಮರೆಯಾಗಿರುತ್ತದೆ.

ನೀವು ಭಾರತವನ್ನು ಮಾರಿದ್ದೀರಿ ಎಂದು ನಾನು ಹೇಳುತ್ತಿದ್ದೇನೆ. ಭಾರತವನ್ನು ಮಾರಲು ನಿಮಗೆ ನಾಚಿಕೆಯಾಗುವುದಿಲ್ಲವೇ? ನೀವು ನಮ್ಮ ತಾಯಿ ಭಾರತ ಮಾತೆಯನ್ನು ಮಾರಿದ್ದೀರಿ. ಆಸಕ್ತಿದಾಯಕ ವಿಷಯವೆಂದರೆ ಪ್ರಧಾನ ಮಂತ್ರಿಗಳು ಸಾಮಾನ್ಯ ಸಂದರ್ಭಗಳಲ್ಲಿ ಭಾರತವನ್ನು ಮಾರಾಟ ಮಾಡುವುದಿಲ್ಲ ಎಂದು ನನಗೆ ತಿಳಿದಿದೆ. ಅವರು ಭಾರತವನ್ನು ಏಕೆ ಮಾರಿದರು ಎಂದು ನಿಮಗೆ ತಿಳಿದಿದೆಯೇ? ಏಕೆಂದರೆ ಅವರು (ಅಮೆರಿಕದವರು) ಅವರನ್ನು(ಮೋದಿಯನ್ನು) ಉಸಿರುಗಟ್ಟಿಸುತ್ತಿದ್ದಾರೆ. ಅವರಿಗೆ ಅವರ ಕುತ್ತಿಗೆಯ ಮೇಲೆ ಹಿಡಿತವಿದೆ. ಪ್ರಧಾನಿಯವರ ಕಣ್ಣಲ್ಲಿ ನಾವು ಭಯವನ್ನು ನೋಡಬಹುದು. ಎರಡು ವಿಷಯಗಳಿವೆ- ಮೊದಲನೆಯದ್ದು ಎಪ್ಸ್ಟೀನ್. ಎರಡನೆಯದು ಇನ್ನೂ 30 ಲಕ್ಷ ಫೈಲ್‌ಗಳು ಲಾಕ್‌ ಆಗಿವೆ.

21 ನೇ ಶತಮಾನದಲ್ಲಿ, ಡೇಟಾ ಭಾರತದ ಅತ್ಯಮೂಲ್ಯ ಆಸ್ತಿಯಾಗಿದೆ . ನಾವು ನಿಮ್ಮ ಮುಂದಿಡುವುದು ನಮ್ಮ ಜನರನ್ನು, ಅವರ ಬುದ್ಧಿವಂತಿಕೆ, ಅವರು ಏನು ಮಾಡುತ್ತಾರೆ, ಅವರ ಇಷ್ಟಗಳು, ಇಷ್ಟವಿಲ್ಲದಿರುವುದು, ಅವರ ಕಲ್ಪನೆ ಮತ್ತು ಅವರ ಭಯ ಎಲ್ಲವನ್ನೂ. ಇದು 21 ನೇ ಶತಮಾನದಲ್ಲಿ ಇದ್ದಕ್ಕಿದ್ದಂತೆ ಮೌಲ್ಯವನ್ನು ಪಡೆದುಕೊಂಡಿದೆ. 20 ನೇ ಶತಮಾನದಲ್ಲಿ, ಅದಕ್ಕೆ ಯಾವುದೇ ಮೌಲ್ಯವಿರಲಿಲ್ಲ. ಜನಸಂಖ್ಯೆಯು ಒಂದು ಭಾರ, ಜನಸಂಖ್ಯೆಯು ಒಂದು ವಿಪತ್ತು ಎಂದು ಅನೇಕ ಜನರು ಹೇಳಿದ್ದು ನನಗೆ ನೆನಪಿದೆ.

ಇಲ್ಲ, ಜನಸಂಖ್ಯೆಯು ನೀವು ಹೊಂದಬಹುದಾದ ದೊಡ್ಡ ಆಸ್ತಿ. ಅದು ಒಂದು ಶಕ್ತಿ. ಆದರೆ ನೀವು ಆ ಡೇಟಾವನ್ನು ಗುರುತಿಸಿದರೆ ಅದು ಕೇವಲ ಒಂದು ಶಕ್ತಿ.ಅಪಾಯಕಾರಿ ಜಗತ್ತಿಗೆ ಚಲಿಸುವಾಗ, ನಾವು ನಮ್ಮ ಸಾಮರ್ಥ್ಯಗಳನ್ನು ಅರ್ಥಮಾಡಿಕೊಳ್ಳಬೇಕು. ನಮ್ಮ ದೇಶದ ಕೇಂದ್ರ ಶಕ್ತಿ ನಮ್ಮ ಜನರು ಎಂದಿದ್ದಾರೆ ರಾಹುಲ್ ಗಾಂಧಿ .

►ಅದಾನಿ, ಅಂಬಾನಿ , ಎಪ್ಸ್ಟೀನ್ ಫೈಲ್ಸ್

ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದವು ಭಾರತದ ಇಂಧನ ಮತ್ತು ದತ್ತಾಂಶ ಭದ್ರತೆಗೆ ಹಾನಿ ಮಾಡುತ್ತದೆ. ಇದು ಜವಳಿ ಮತ್ತು ಕೃಷಿಯಂತಹ ದೇಶದ ಸಣ್ಣ ಮತ್ತು ಮಧ್ಯಮ ವ್ಯವಹಾರಗಳಿಗೆ ಹಾನಿ ಮಾಡುತ್ತದೆ . ಆದರೆ ಪ್ರಧಾನಿ ಇನ್ನೂ ಅದಾನಿ ಗುಂಪನ್ನು ರಕ್ಷಿಸಲು ಅಮೆರಿಕದ ಒತ್ತಡಕ್ಕೆ ಮಣಿದರು. ಅವರ ಸ್ಥಿರತೆಯು ಬಿಜೆಪಿಯ ಹಣಕಾಸಿಗೆ ಮುಖ್ಯವಾಗಿದೆ ಎಂದಿದ್ದಾರೆ ರಾಹುಲ್. ರಾಹುಲ್, ಅದಾನಿಯನ್ನು ಹೆಸರಿಸಿದ ತಕ್ಷಣ ಲೋಕಸಭೆಯಲ್ಲಿ ಗದ್ದಲವುಂಟಾಗಿದ್ದು ಸಂಸದರು ಈ ಹೇಳಿಕೆಗೆ ಆಕ್ಷೇಪ ವ್ಯಕ್ತಪಡಿಸಿದರು. ಬಜೆಟ್‌ಗೆ ಸಂಬಂಧವಿಲ್ಲದ ವಿಷಯಗಳನ್ನು ಚರ್ಚಿಸಲು ಗಾಂಧಿಯವರು ಪ್ರಸ್ತಾವನೆಯನ್ನು ಕೋರಿಲ್ಲವಾದ್ದರಿಂದ ಅವರ ಹೇಳಿಕೆಗಳು ಆಕ್ಷೇಪಾರ್ಹ ಎಂದು ಸೂಚಿಸಲು ಬಿಜೆಪಿ ಸಂಸದ ರವಿಶಂಕರ್ ಪ್ರಸಾದ್ ಲೋಕಸಭೆಯ 352 ನೇ ವಿಧಿಯ ನಿಯಮಗಳನ್ನು ಉಲ್ಲೇಖಿಸಿದರು.

ಸದನದ ಅಧ್ಯಕ್ಷೆ ಜಗದಾಂಬಿಕಾ ಪಾಲ್ ಮಧ್ಯಪ್ರವೇಶಿಸಿ ಅದಾನಿ ಅಥವಾ ಇತರ ಯಾವುದೇ ವ್ಯಕ್ತಿಯ ಹೇಳಿಕೆಗಳು ದೃಢೀಕರಿಸದಿದ್ದರೆ ಅವರ ಹೆಸರನ್ನು ಹೇಳಲು ಸಾಧ್ಯವಿಲ್ಲ. ಬಜೆಟ್ ಕುರಿತು ಮಾತನಾಡಲು ಮತ್ತು ಬಜೆಟ್ ಚರ್ಚೆಗೆ ತಕ್ಷಣ ಸಂಬಂಧಿಸದ ಹೇಳಿಕೆಗಳನ್ನು ನೀಡದಂತೆ ರಾಹುಲ್ ಗಾಂಧಿಯವರಲ್ಲಿ ಒತ್ತಾಯಿಸಿದರು.

ತಮ್ಮ ಹೇಳಿಕೆಗಳು ಬಜೆಟ್‌ಗೆ ಸಂಬಂಧಿಸಿವೆ ಎಂದ ರಾಹುಲ್, ಅದಾನಿ ಮಾತ್ರವಲ್ಲದೆ, ವಿವಾದಾತ್ಮಕ ಎಪ್ಸ್ಟೀನ್ ಫೈಲ್ಸ್‌ನಲ್ಲಿ ಹಲವಾರು ಬಾರಿ ಹೆಸರುಗಳು ಕಾಣಿಸಿಕೊಂಡಿರುವ ಮತ್ತೊಬ್ಬ ಕೈಗಾರಿಕೋದ್ಯಮಿ ಅನಿಲ್ ಅಂಬಾನಿ ಮತ್ತು ಕೇಂದ್ರ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರ ಹೆಸರನ್ನು ಕೂಡಾ ಹೇಳಿದರು. ಸಾಮಾನ್ಯ ಸಂದರ್ಭಗಳಲ್ಲಿ ಪ್ರಧಾನ ಮಂತ್ರಿ ಅಮೆರಿಕದ ಒತ್ತಡಕ್ಕೆ ಮಣಿಯುತ್ತಿರಲಿಲ್ಲ, ಆದರೆ ಗೌತಮ್ ಅದಾನಿ ಮತ್ತು "ಜೈಲಿನಲ್ಲಿ ಇರಬೇಕಾದ" ಅನಿಲ್ ಅಂಬಾನಿಯಂತಹ ಜನರ ಹಿತಾಸಕ್ತಿಗಳನ್ನು ರಕ್ಷಿಸಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುಂದೆ ತಲೆಬಾಗಬೇಕಾಯಿತು ಎಂದು ರಾಹುಲ್ ಆರೋಪಿಸಿದ್ದಾರೆ.

ಬಿಜೆಪಿ ಸಂಸದರು 352 ನೇ ವಿಧಿಯನ್ನು ಉಲ್ಲೇಖಿಸಿ ಆಕ್ಷೇಪ ವ್ಯಕ್ತಪಡಿಸಿದಾಗ,ವಿರೋಧ ಪಕ್ಷದ ನಾಯಕ ಮಾತನಾಡುವುದನ್ನು ತಡೆಯಲು ಅಧ್ಯಕ್ಷರು ನಿಯಮಗಳನ್ನು ಉಲ್ಲೇಖಿಸುತ್ತಿದ್ದಾರೆ, ಆದರೆ ಬಿಜೆಪಿ ಸಂಸದರೊಬ್ಬರು ಕೆಲವು ದಿನಗಳ ಹಿಂದೆ ಇಬ್ಬರು ಮಾಜಿ ಪ್ರಧಾನ ಮಂತ್ರಿಗಳನ್ನು ದೂಷಿಸಿದಾಗ ಏನೂ ಹೇಳಿಲ್ಲ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ.ವೇಣುಗೋಪಾಲ್ ಎದ್ದು ನಿಂತು ವಾದಿಸಿದರು.

ಆನಂತರ ಮಾತು ಮುಂದುವರಿಸಿದ ರಾಹುಲ್ ನಾನು ಗೌತಮ್ ಅದಾನಿ ಹೆಸರನ್ನು ಹೇಳುವುದಿಲ್ಲ, ನಾನು ಅನಿಲ್ ಅಂಬಾನಿ ಹೆಸರನ್ನು ಹೇಳುವುದಿಲ್ಲ. ನಾನು ಎಪ್ಸ್ಟೀನ್ ಫೈಲ್ಸ್ ಹೇಳುವುದಿಲ್ಲ ಎಂದಿದ್ದಾರೆ.