81 ಕಾರ್ಯಕ್ರಮಗಳು, 53 ನಗರಗಳು, 70 ದಿನಗಳು: ಮಿತವ್ಯಯದ ಕರೆಗೆ ಮುನ್ನ, ಹೀಗಿತ್ತು ಮೋದಿ ಅವರ ಪ್ರವಾಸದ ದಿನಚರಿ

ಮೇ 10, 2026ರಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಸಾರ್ವಜನಿಕರಲ್ಲಿ ಮಿತವ್ಯಯ ಪಾಲಿಸುವಂತೆ ಮನವಿ ಮಾಡಿದ್ದರು. ಇಂಧನ ಬಳಕೆಯನ್ನು ಕಡಿಮೆ ಮಾಡುವಂತೆ ಕೋರಿದ್ದ ಅವರು, ಖಾಸಗಿ ವಾಹನಗಳ ಬಳಕೆಯನ್ನು ಕೈಬಿಟ್ಟು ಸಾರ್ವಜನಿಕ ಸಾರಿಗೆಯನ್ನು ಬಳಸುವಂತೆ ಜನರನ್ನು ಒತ್ತಾಯಿಸಿದ್ದರು. ಇಂಧನ ಆಮದನ್ನು ಕಡಿತಗೊಳಿಸುವ ಒಂದು ಮಾರ್ಗವಾಗಿ ಅಡುಗೆ ಎಣ್ಣೆಯ ಬಳಕೆಯನ್ನು ಕಡಿಮೆ ಮಾಡುವಂತೆಯೂ ಅವರು ಮನವಿ ಮಾಡಿದ್ದರು.

ಆದರೆ, ಯುದ್ಧ ಆರಂಭವಾದ ನಂತರದ ಪ್ರಧಾನಮಂತ್ರಿಯವರ ಪ್ರವಾಸದ ದಿನಚರಿಯನ್ನು ವಿಶ್ಲೇಷಿಸಿದಾಗ, ಮಾರ್ಚ್ 1ರಿಂದ ಮೇ 12ರವರೆಗಿನ ಅವಧಿಯಲ್ಲಿ, ಅಂದರೆ ಮೋದಿ ಅವರು ಮಿತವ್ಯಯಕ್ಕೆ ಕರೆ ನೀಡಿದ ಅವಧಿಯಲ್ಲೇ, ಪ್ರಧಾನಮಂತ್ರಿಯವರು ದಿಲ್ಲಿಯಿಂದ ಹೊರಗೆ ಒಟ್ಟು 81 ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದಾರೆ. ಯುದ್ಧ ಆರಂಭವಾದ ನಂತರದ 70 ದಿನಗಳ ಅವಧಿಯಲ್ಲಿ ಅವರು 11 ರಾಜ್ಯಗಳು ಹಾಗೂ ಪುದುಚೇರಿ ಕೇಂದ್ರಾಡಳಿತ ಪ್ರದೇಶದ ಒಟ್ಟು 53 ನಗರ ಮತ್ತು ಪಟ್ಟಣಗಳಿಗೆ ಭೇಟಿ ನೀಡಿದ್ದಾರೆ ಎಂದು the wire ವರದಿ ಹೇಳಿದೆ.

ಅವರ ಈ ಪ್ರವಾಸಗಳ ಪೈಕಿ ಕೇವಲ 13, ಅಂದರೆ ಶೇ 16ರಷ್ಟು ಕಾರ್ಯಕ್ರಮಗಳು ಮಾತ್ರ ಅಧಿಕೃತ ಕರ್ತವ್ಯಗಳಿಗೆ ಸಂಬಂಧಿಸಿದ್ದಾಗಿದ್ದವು. ಈ ಪ್ರವಾಸಗಳ ಅವಧಿಯಲ್ಲಿ ಮೋದಿ ಅವರು ನೋಯ್ಡಾದ ಜೇವರ್ ವಿಮಾನ ನಿಲ್ದಾಣದಂತಹ ಯೋಜನೆಗಳನ್ನು ಉದ್ಘಾಟಿಸಿದ್ದರು ಹಾಗೂ ಅಭಿವೃದ್ಧಿ ಯೋಜನೆಗಳಿಗೆ ಶಂಕುಸ್ಥಾಪನೆ ನೆರವೇರಿಸಿದ್ದರು. ಆದರೆ, ಅವರ ಪ್ರವಾಸದ ಪ್ರಮುಖ ಭಾಗವು ಪಶ್ಚಿಮ ಬಂಗಾಳ, ಅಸ್ಸಾಂ, ಕೇರಳ, ತಮಿಳುನಾಡು ಮತ್ತು ಪುದುಚೇರಿ ಚುನಾವಣೆಗಳ ಹಿನ್ನೆಲೆಯಲ್ಲಿ ಬಿಜೆಪಿ ಹಮ್ಮಿಕೊಂಡಿದ್ದ ಪ್ರಚಾರ ಕಾರ್ಯಕ್ರಮಗಳಿಗೆ ಸಂಬಂಧಿಸಿದ್ದಾಗಿತ್ತು.

ಈ ಕುರಿತು the wire, PIB ಮೂಲಕ ಪ್ರಧಾನಮಂತ್ರಿ ಕಾರ್ಯಾಲಯವನ್ನು ಸಂದೇಶ ಮತ್ತು ಇಮೇಲ್ ಮೂಲಕ ಸಂಪರ್ಕಿಸಿದ್ದು, ವರದಿ ಪ್ರಕಟವಾಗುವವರೆಗೆ ಪ್ರತಿಕ್ರಿಯೆ ಬಂದಿಲ್ಲ ಎಂದು ಹೇಳಿದೆ.

ಪ್ರಧಾನಮಂತ್ರಿಯವರ ಮಿತವ್ಯಯದ ಮನವಿ ಮತ್ತು ಅವರದ್ದೇ ಪ್ರವಾಸದ ದಿನಚರಿಯು ಜಾಗತಿಕವಾಗಿ ಇತರ ದೇಶಗಳು ಅಳವಡಿಸಿಕೊಂಡಿರುವ ಕಾರ್ಯವಿಧಾನಕ್ಕೆ ತದ್ವಿರುದ್ಧವಾಗಿದೆ.

ಮಾರ್ಚ್ ಕೊನೆಯಲ್ಲಿ ಫಿಲಿಪೈನ್ಸ್ ರಾಷ್ಟ್ರೀಯ ಇಂಧನ ತುರ್ತು ಪರಿಸ್ಥಿತಿಯನ್ನು ಘೋಷಿಸಿತು. ಇದೇ ಅವಧಿಯಲ್ಲಿ ದಕ್ಷಿಣ ಕೊರಿಯಾ ಇಂಧನ ಉಳಿತಾಯ ಅಭಿಯಾನವನ್ನು ಆರಂಭಿಸಿ, ಜನರು ತಮ್ಮ ದೈನಂದಿನ ಜೀವನದಲ್ಲಿ ವಿದ್ಯುತ್ ಉಳಿಸುವಂತೆ ಒತ್ತಾಯಿಸಿತು. ಏಪ್ರಿಲ್ 6ರಂದು ಥಾಯ್ಲೆಂಡ್ ಪ್ರಧಾನಿ ಅನುತಿನ್ ಚಾರ್ನ್ವಿರಾಕುಲ್ ಅವರು ಇಂಧನ ಸಂರಕ್ಷಣೆಗಾಗಿ ‘ಕಾರ್‌ಪೂಲ್’ ಮಾಡಲು ಮತ್ತು ಮನೆಯಿಂದಲೇ ಕೆಲಸ ಮಾಡುವಂತೆ ಥಾಯ್ ನಾಗರಿಕರಿಗೆ ಕರೆ ನೀಡಿದ್ದರು.

ಆದರೆ ಭಾರತದಲ್ಲಿ, ಅಡುಗೆ ಅನಿಲ ವಿತರಣೆ ವಿಳಂಬವಾಗುತ್ತಿದೆ ಎಂದು ನಾಗರಿಕರು ದೂರುತ್ತಿದ್ದರೂ ಮತ್ತು ಪೆಟ್ರೋಲ್ ಪಂಪ್‌ಗಳಲ್ಲಿ ಅಭಾವ ಕಂಡುಬರುತ್ತಿದ್ದರೂ, ದೇಶದಲ್ಲಿ ಸಾಕಷ್ಟು ಇಂಧನ ದಾಸ್ತಾನು ಇದೆ ಎಂದೇ ಸರ್ಕಾರ ಪ್ರತಿಪಾದಿಸುತ್ತಾ ಬಂದಿತ್ತು.

ಆದರೆ, ಮೇ 4ರಂದು ರಾಜ್ಯಗಳ ಚುನಾವಣಾ ಫಲಿತಾಂಶಗಳು ಪ್ರಕಟವಾದ ಐದು ದಿನಗಳ ಬಳಿಕ ಮೋದಿ ಅವರು ಇಂಧನ ಉಳಿಸುವಂತೆ ನಾಗರಿಕರಿಗೆ ಕರೆ ನೀಡಿದರು. ಅವರ ಈ ಮನವಿಯ ಮರುದಿನಗಳಲ್ಲೇ ತೈಲ ಕಂಪನಿಗಳು ಕೇವಲ 10 ದಿನಗಳ ಅವಧಿಯಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಸತತ ನಾಲ್ಕು ಬಾರಿ ಏರಿಕೆ ಮಾಡಿದ್ದವು.

ಪ್ರಧಾನಮಂತ್ರಿಯವರ ಪ್ರವಾಸ

ಯುದ್ಧ ಭುಗಿಲೆದ್ದ ತಕ್ಷಣದ ಅವಧಿಯಲ್ಲಿ ಪ್ರಧಾನಮಂತ್ರಿಯವರ ಸಾರ್ವಜನಿಕ ಕಾರ್ಯಕ್ರಮಗಳನ್ನು the wire ಸಂಸ್ಥೆಯು ಅವರ ಎಕ್ಸ್ ಖಾತೆ, ಯೂಟ್ಯೂಬ್ ಖಾತೆ ಹಾಗೂ PIB ಪ್ರಕಟಣೆಗಳನ್ನು ವಿಶ್ಲೇಷಿಸುವ ಮೂಲಕ ಪರಿಶೀಲಿಸಿದೆ. ಮೋದಿ ಅವರು ಭಾಗವಹಿಸಿದ ಪ್ರತಿಯೊಂದು ಕಾರ್ಯಕ್ರಮವನ್ನೂ ಪ್ರತ್ಯೇಕವಾಗಿ ಪರಿಗಣಿಸಲಾಗಿದೆ. ಅವರು ಒಂದೇ ನಗರದಲ್ಲಿದ್ದರೂ ಅದನ್ನು ಪ್ರತ್ಯೇಕ ಕಾರ್ಯಕ್ರಮವಾಗಿಯೇ ಲೆಕ್ಕ ಹಾಕಲಾಗಿದೆ. ಏಕೆಂದರೆ, ಪ್ರತಿ ಕಾರ್ಯಕ್ರಮವೂ ವಿಭಿನ್ನ ಲಾಜಿಸ್ಟಿಕಲ್ ಸವಾಲುಗಳನ್ನು ಒಳಗೊಂಡಿರುತ್ತದೆ. ಉದಾಹರಣೆಗೆ, ಒಂದೇ ನಗರದಲ್ಲಿ ಒಂದೇ ದಿನ ನಡೆದರೂ, ರೋಡ್ ಶೋ ನಡೆಸಲು ಬೇಕಾಗುವ ಸಂಪನ್ಮೂಲಗಳು ಸಾರ್ವಜನಿಕ ಸಭೆಗೆ ಬೇಕಾಗುವ ಸಂಪನ್ಮೂಲಗಳಿಗಿಂತ ಭಿನ್ನವಾಗಿರುತ್ತವೆ.

ಅವರು ವರ್ಚುವಲ್ ಆಗಿ ಭಾಗವಹಿಸಿದ ಕಾರ್ಯಕ್ರಮಗಳನ್ನು ಇದರಲ್ಲಿ ಸೇರಿಸಲಾಗಿಲ್ಲ. ದಿಲ್ಲಿಯಿಂದ ಹೊರಗೆ ಅವರು ಸ್ವತಃ ಪ್ರಯಾಣಿಸಿ ಭಾಗವಹಿಸಿದ ಕಾರ್ಯಕ್ರಮಗಳ ಮೇಲಷ್ಟೇ the wire ಗಮನ ಕೇಂದ್ರೀಕರಿಸಿದೆ.

ಈ ಮಾನದಂಡವನ್ನು ಬಳಸಿದಾಗ, ಮಾರ್ಚ್ 1ರಿಂದ ಮೇ 12ರವರೆಗೆ ಪ್ರಧಾನಮಂತ್ರಿಯವರು ದೇಶದಾದ್ಯಂತ ನಿರಂತರವಾಗಿ ಸಂಚರಿಸಿ, 11 ರಾಜ್ಯಗಳು ಮತ್ತು ಪುದುಚೇರಿ ಕೇಂದ್ರಾಡಳಿತ ಪ್ರದೇಶದ ಒಟ್ಟು 53 ನಗರ ಮತ್ತು ಪಟ್ಟಣಗಳಿಗೆ ಪ್ರಯಾಣ ಬೆಳೆಸಿರುವುದು ಕಂಡುಬಂದಿದೆ. ಒಟ್ಟಾರೆಯಾಗಿ, ಮೋದಿ ಅವರು ದಿಲ್ಲಿಯಿಂದ ಹೊರಗೆ 81 ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದಾರೆ.

ಈ ಅವಧಿಯಲ್ಲಿ ಮೋದಿ ಅವರು ಒಟ್ಟು 37 ಸಾರ್ವಜನಿಕ ಸಭೆಗಳನ್ನು ಉದ್ದೇಶಿಸಿ ಮಾತನಾಡಿದ್ದಾರೆ, 25 ರೋಡ್ ಶೋಗಳನ್ನು ನಡೆಸಿದ್ದಾರೆ ಮತ್ತು ಮುಂಬರುವ ಯೋಜನೆಗಳಿಗೆ ಶಂಕುಸ್ಥಾಪನೆ ನೆರವೇರಿಸುವ ಅಥವಾ ಪೂರ್ಣಗೊಂಡ ಯೋಜನೆಗಳನ್ನು ಉದ್ಘಾಟಿಸುವ 13 ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದಾರೆ. ಇವುಗಳ ಹೊರತಾಗಿ, ಅಸ್ಸಾಂನಲ್ಲಿ ಚಹಾ ತೋಟದ ಕಾರ್ಮಿಕರನ್ನು ಭೇಟಿ ಮಾಡುವುದು, ಗುಜರಾತ್‌ನ ಸೋಮನಾಥ ದೇವಾಲಯಕ್ಕೆ ಭೇಟಿ ನೀಡುವುದು, ಬೆಂಗಳೂರಿನಲ್ಲಿ ‘ಆರ್ಟ್ ಆಫ್ ಲಿವಿಂಗ್’ ಸಂಸ್ಥೆಯ 45ನೇ ವಾರ್ಷಿಕೋತ್ಸವದ ಆಚರಣೆಯಲ್ಲಿ ಪಾಲ್ಗೊಳ್ಳುವುದು ಸೇರಿದಂತೆ ಇತರ ಕಾರ್ಯಕ್ರಮಗಳಲ್ಲೂ ಭಾಗವಹಿಸಿದ್ದಾರೆ.

ಒಟ್ಟು 81 ಕಾರ್ಯಕ್ರಮಗಳ ಪೈಕಿ 53, ಅಂದರೆ ಶೇ 65ರಷ್ಟು ಕಾರ್ಯಕ್ರಮಗಳು ಚುನಾವಣೆ ಎದುರಿಸುತ್ತಿದ್ದ ಪಶ್ಚಿಮ ಬಂಗಾಳ, ಅಸ್ಸಾಂ, ಕೇರಳ, ತಮಿಳುನಾಡು ಹಾಗೂ ಪುದುಚೇರಿಯಲ್ಲಿ ನಡೆದಿದ್ದವು. ಇವುಗಳಲ್ಲಿ 26 ಕಾರ್ಯಕ್ರಮಗಳು ಪಶ್ಚಿಮ ಬಂಗಾಳದಲ್ಲಿ, 11 ಅಸ್ಸಾಂನಲ್ಲಿ, ಎಂಟು ಕೇರಳದಲ್ಲಿ, ಆರು ತಮಿಳುನಾಡಿನಲ್ಲಿ ಮತ್ತು ಎರಡು ಪುದುಚೇರಿಯಲ್ಲಿ ನಡೆದಿದ್ದವು.

ಚುನಾವಣೆ ಎದುರಿಸುತ್ತಿದ್ದ ಈ ನಾಲ್ಕು ರಾಜ್ಯಗಳು ಹಾಗೂ ಪುದುಚೇರಿಯಲ್ಲಿ ಮೋದಿ ಅವರು ವಿಭಿನ್ನ ಮಾದರಿಯ ಕಾರ್ಯಕ್ರಮಗಳನ್ನು ನಡೆಸಿದ್ದರು. ಇದರಲ್ಲಿ ಮೂರು ಉದ್ಘಾಟನಾ ಕಾರ್ಯಕ್ರಮಗಳು, 31 ಸಾರ್ವಜನಿಕ ಸಭೆಗಳು ಹಾಗೂ 15 ರೋಡ್ ಶೋಗಳು ಸೇರಿದ್ದವು. ತಮ್ಮ ಪ್ರವಾಸಗಳ ಸಂದರ್ಭದಲ್ಲಿ ಈ ಕಾರ್ಯಕ್ರಮಗಳ ಬಗ್ಗೆ ಅವರು ಸಾಮಾಜಿಕ ಮಾಧ್ಯಮಗಳಲ್ಲಿ ಆಗಾಗ್ಗೆ ಹೆಮ್ಮೆಯಿಂದ ಹಂಚಿಕೊಳ್ಳುತ್ತಿದ್ದರು.

ಏಪ್ರಿಲ್ 11ರಂದು ಮೋದಿ ಅವರು ಸಿಲಿಗುರಿಯಲ್ಲಿ 15 ಕಿಲೋಮೀಟರ್ ಉದ್ದದ ರೋಡ್ ಶೋ ನಡೆಸಿದ್ದರು. ಇದನ್ನು ಅವರು ತಮ್ಮ ಎಕ್ಸ್ ಪೋಸ್ಟ್‌ನಲ್ಲಿ “ಅತ್ಯಂತ ಸ್ಮರಣೀಯ” ಎಂದು ಬಣ್ಣಿಸಿದ್ದರು. ಮೋದಿ ಅವರು ತಮ್ಮ ಯೂಟ್ಯೂಬ್ ಖಾತೆಯಲ್ಲಿ ಹಂಚಿಕೊಂಡ ದೃಶ್ಯಗಳಲ್ಲಿ, ಅವರ ಕಾರಿನ ಹಿಂದೆ ವಾಹನಗಳ ಸುದೀರ್ಘ ಸಾಲು ಸಾಗುತ್ತಿರುವುದು ಕಾಣುತ್ತದೆ.

ಎಪ್ರಿಲ್ 19ರಂದು ಮೋದಿ ಅವರು ಪಶ್ಚಿಮ ಬಂಗಾಳದ ಝಾರ್ಗ್ರಾಮ್‌ಗೆ ಭೇಟಿ ನೀಡಿದ್ದರು. ಎಕ್ಸ್ ಪೋಸ್ಟ್‌ನಲ್ಲಿ ಜನರ “ಉತ್ಸಾಹ” ಕಂಡು “ತಕ್ಷಣದ ರೋಡ್ ಶೋ” ನಡೆಸಿದ್ದಾಗಿ ಹೇಳಿಕೊಂಡಿದ್ದರು. ಆ ಪೋಸ್ಟ್‌ಗೆ ಲಗತ್ತಿಸಲಾದ ವಿಡಿಯೊದಲ್ಲಿ ಅವರ ಕಾರಿನ ಹಿಂದೆ ಕನಿಷ್ಠ 11 ವಾಹನಗಳು ಹಿಂಬಾಲಿಸುತ್ತಿರುವುದು ಕಂಡುಬರುತ್ತದೆ.

ರೋಡ್ ಶೋ ಬಳಿಕ ಅವರು ಉದ್ದೇಶಿಸಿ ಮಾತನಾಡಿದ ರ‍್ಯಾಲಿಯಲ್ಲಿ, ಹೆಲಿಪ್ಯಾಡ್‌ನಿಂದ ರ‍್ಯಾಲಿ ಸ್ಥಳದವರೆಗೆ 2–3 ಕಿಲೋಮೀಟರ್ ದೂರದ ಮಾರ್ಗದಲ್ಲಿ ಜನರು ಸಾಲಾಗಿ ನಿಂತಿದ್ದರು ಎಂದು ವಿವರಿಸಿದ್ದರು. “ಅದು ಎಷ್ಟು ಅದ್ಭುತವಾದ ರೋಡ್ ಶೋ ಆಗಿತ್ತೆಂದರೆ, ನಾನು ಕಾರಿನ ಫುಟ್‌ಬೋರ್ಡ್ ಮೇಲೆ ನಿಲ್ಲಬೇಕಾಯಿತು” ಎಂದು ಅವರು ಭಾಷಣದ ಆರಂಭದಲ್ಲಿ ಹೇಳಿದ್ದರು.

ಅದೇ ರೀತಿ, ಎಪ್ರಿಲ್ 26ರಂದು ಅವರ ಯೂಟ್ಯೂಬ್ ಚಾನೆಲ್‌ನಲ್ಲಿ ಕೋಲ್ಕತ್ತಾದ ರೋಡ್ ಶೋನ ವಿಡಿಯೊವನ್ನು ಅಪ್‌ಲೋಡ್ ಮಾಡಲಾಗಿತ್ತು. ಅದನ್ನು ‘ಮೆಗಾ ರೋಡ್ ಶೋ’ ಎಂದು ಕರೆಯಲಾಗಿದ್ದು, ವಿಡಿಯೊ 84 ನಿಮಿಷಗಳಷ್ಟು ದೀರ್ಘವಾಗಿತ್ತು.

ಇಂತಹ ರೋಡ್ ಶೋಗಳು ಕೇವಲ ಚುನಾವಣಾ ಪ್ರಚಾರಕ್ಕಷ್ಟೇ ಸೀಮಿತವಾಗಿರಲಿಲ್ಲ.

ಚುನಾವಣೆ ಎದುರಿಸುತ್ತಿದ್ದ ರಾಜ್ಯಗಳ ನಂತರ, ಮೋದಿ ಅವರು ತಮ್ಮ ತವರು ರಾಜ್ಯವಾದ ಗುಜರಾತ್‌ನಲ್ಲಿ ಅತಿ ಹೆಚ್ಚು ಸಮಯ ಕಳೆದಿದ್ದಾರೆ. ಈ 70 ದಿನಗಳ ಅವಧಿಯಲ್ಲಿ ಅವರು ಅಲ್ಲಿ 10 ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದು, ಅವುಗಳಲ್ಲಿ ನಾಲ್ಕು ರೋಡ್ ಶೋಗಳಾಗಿದ್ದವು.

ಪ್ರಧಾನಮಂತ್ರಿಯವರು ನಾಗರಿಕರಲ್ಲಿ ಇಂಧನ ಉಳಿಸುವಂತೆ ಮನವಿ ಮಾಡಿದ ದಿನದಂದು ಸಿಕಂದರಾಬಾದ್‌ನಲ್ಲಿ ಮತ್ತು ಅದೇ ದಿನ ತಡರಾತ್ರಿ ಜಾಮ್‌ನಗರದಲ್ಲಿ ಎರಡು ರೋಡ್ ಶೋಗಳನ್ನು ನಡೆಸಿದ್ದರು. ಮರುದಿನ ಬೆಳಿಗ್ಗೆ ಅವರು ಗುಜರಾತ್‌ನ ಸೋಮನಾಥದಲ್ಲಿ ಮೂರನೇ ರೋಡ್ ಶೋ ನಡೆಸಿದ್ದರು. ಬಳಿಕ ಸೋಮನಾಥ ದೇವಾಲಯದ ಪುನರ್ನಿರ್ಮಾಣದ 75ನೇ ವರ್ಷದ ಸ್ಮರಣಾರ್ಥ ದೇವಾಲಯಕ್ಕೆ ಭೇಟಿ ನೀಡಿದ್ದರು.

ದೇವಾಲಯದಲ್ಲಿ ಮೋದಿಯವರ ಸಮ್ಮುಖದಲ್ಲೇ ಭಾರತೀಯ ವಾಯುಪಡೆಯ ‘ಸೂರ್ಯ ಕಿರಣ್ ಏರೋಬ್ಯಾಟಿಕ್ ತಂಡ’ವು ತನ್ನ ಆರು ಬಿಎಇ ಸಿಸ್ಟಮ್ಸ್ ಹಾಕ್ ಎಂಕೆ–132 ಸುಧಾರಿತ ಜೆಟ್ ತರಬೇತಿ ವಿಮಾನಗಳೊಂದಿಗೆ ದೇವಾಲಯದ ಮೇಲೆ ಕೇಸರಿ, ಬಿಳಿ ಮತ್ತು ಹಸಿರು ಬಣ್ಣದ ಹೊಗೆಯ ರೇಖೆಗಳನ್ನು ಮೂಡಿಸುತ್ತಾ ಸಾಹಸ ಪ್ರದರ್ಶನ ನೀಡಿತ್ತು. ಇದರ ಬೆನ್ನಲ್ಲೇ ವಾಯುಪಡೆಯ ಹೆಲಿಕಾಪ್ಟರ್ ಒಂದು ದೇವಾಲಯದ ಆವರಣದ ಮೇಲೆ ಪುಷ್ಪವೃಷ್ಟಿ ಮಾಡಿತ್ತು.

ವಿಮಾನ ಇಂಧನದ ಕೊರತೆಯ ಆತಂಕ ವ್ಯಕ್ತವಾಗುತ್ತಿದ್ದ ಸಂದರ್ಭದಲ್ಲೇ ಗಣನೀಯ ಪ್ರಮಾಣದ ಇಂಧನ ಬಳಕೆಗೆ ಕಾರಣವಾಗುವ ಇಂತಹ ಪ್ರದರ್ಶನವು, ಮಿತವ್ಯಯದ ಕುರಿತಾದ ಮೋದಿಯವರ ಸಾರ್ವಜನಿಕ ಸಂದೇಶಕ್ಕೆ ತೀವ್ರವಾಗಿ ವ್ಯತಿರಿಕ್ತವಾಗಿದೆ ಎಂದು ಕೆಲವು ನಿವೃತ್ತ IAF ಅಧಿಕಾರಿಗಳು ಅಭಿಪ್ರಾಯಪಟ್ಟಿರುವುದಾಗಿ the wire ವರದಿ ಉಲ್ಲೇಖಿಸಿದೆ.

ಸಾರ್ವಜನಿಕ ಸಭೆಗಳು ಮತ್ತು ರೋಡ್ ಶೋಗಳ ಹೊರತಾಗಿ, ಮೋದಿ ಅವರು ಕನಿಷ್ಠ 13 ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದು, ಅಲ್ಲಿ ಅಭಿವೃದ್ಧಿ ಕಾಮಗಾರಿಗಳಿಗೆ ಶಂಕುಸ್ಥಾಪನೆ ನೆರವೇರಿಸಿದ್ದರು ಅಥವಾ ಯೋಜನೆಗಳನ್ನು ಉದ್ಘಾಟಿಸಿದ್ದರು.

ಇಂತಹ ಉದ್ಘಾಟನೆಗಳನ್ನು ವರ್ಚುವಲ್ ಆಗಿಯೂ ಮಾಡಬಹುದಿತ್ತು ಎಂಬುದಕ್ಕೆ ಸ್ವತಃ ಮೋದಿ ಅವರೇ ಮಾರ್ಚ್ 7ರಂದು ಕೋಟಾ ವಿಮಾನ ನಿಲ್ದಾಣಕ್ಕೆ ವರ್ಚುವಲ್ ಸಮಾರಂಭದ ಮೂಲಕ ಶಂಕುಸ್ಥಾಪನೆ ನೆರವೇರಿಸುವ ಮೂಲಕ ಉದಾಹರಣೆ ನೀಡಿದ್ದರು.

ಪ್ರಯಾಣವನ್ನು ತಪ್ಪಿಸಲು ಮನೆಯಿಂದಲೇ ಕೆಲಸಕ್ಕೆ ಆದ್ಯತೆ ನೀಡುವಂತೆ ಮೋದಿ ಮನವಿ ಮಾಡಿದ ಬೆನ್ನಲ್ಲೇ, ನೀತಿ ಆಯೋಗದ ಸೆಮಿನಾರ್‌ಗಳು, ಕಾರ್ಯಾಗಾರಗಳು ಮತ್ತು ಸಮ್ಮೇಳನಗಳು ಸೇರಿದಂತೆ ಎಲ್ಲಾ ಖುದ್ದಾಗಿ ಭಾಗವಹಿಸುವ ಕಾರ್ಯಕ್ರಮಗಳನ್ನು ಸ್ಥಗಿತಗೊಳಿಸಿದೆ ಎಂದು ವರದಿಯಾಗಿದೆ.

ಇದೇ ಅವಧಿಯಲ್ಲಿ, ಮೋದಿ ಅವರು ತಮ್ಮ ಬೆಂಗಾವಲು ವಾಹನಗಳ ಸಂಖ್ಯೆಯನ್ನು ಈಗಿರುವುದಕ್ಕಿಂತ ಅರ್ಧದಷ್ಟು ಕಡಿಮೆ ಮಾಡಲು ಸೂಚಿಸಿದ್ದಾರೆ ಎಂದು ಮಾಧ್ಯಮ ವರದಿಗಳು ಹೇಳಿವೆ.

ಇದಕ್ಕೆ ವ್ಯತಿರಿಕ್ತವಾಗಿ, ಮೋದಿಯವರ ಮನವಿಯ ಎರಡು ದಿನಗಳ ಬಳಿಕ ಅಸ್ಸಾಂ ಸರ್ಕಾರವು ಮೇ 12ರಂದು ನೂತನ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಮತ್ತು ಅವರ ಸಚಿವರ ಪ್ರಮಾಣ ವಚನ ಸ್ವೀಕಾರಕ್ಕಾಗಿ ಬೃಹತ್ ಸಮಾರಂಭವನ್ನು ಆಯೋಜಿಸಿತ್ತು. ಈ ಸಮಾರಂಭಕ್ಕೆ ಒಂದು ಲಕ್ಷ ಜನರನ್ನು ಸೇರಿಸುವ ನಿರೀಕ್ಷೆ ಇತ್ತು ಎಂದು ಸ್ಥಳೀಯ ಬಿಜೆಪಿ ನಾಯಕರ ಹೇಳಿಕೆಯನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿದ್ದವು.

ಅತಿಯಾದ ವೆಚ್ಚಗಳು

ಮೋದಿ ಅವರ ದೇಶೀಯ ಪ್ರವಾಸಗಳು ಹೆಚ್ಚಾಗಿ ವಾಯುಮಾರ್ಗದ ಮೂಲಕವೇ ನಡೆಯುತ್ತವೆ. ಕೊನೆಯ ಹಂತದ ಪ್ರಯಾಣಗಳು ರಸ್ತೆ ಅಥವಾ ಹೆಲಿಕಾಪ್ಟರ್ ಮೂಲಕ ಸಾಗುತ್ತವೆ.

ಅವರು ಹೆಚ್ಚಾಗಿ ಭಾರತೀಯ ವಾಯುಪಡೆಯ ಬೋಯಿಂಗ್ ಬಿಸಿನೆಸ್ ಜೆಟ್ 737 ವಿಮಾನದಲ್ಲಿ ದೇಶೀಯವಾಗಿ ಪ್ರಯಾಣಿಸುತ್ತಾರೆ. ಇದು 2009ರಲ್ಲಿ ಭಾರತೀಯ ವಾಯುಪಡೆಗೆ ಸೇರ್ಪಡೆಗೊಂಡ ಇಂತಹ ಮೂರು ಜೆಟ್‌ಗಳಲ್ಲಿ ಒಂದಾಗಿದೆ. ಪಶ್ಚಿಮ ಬಂಗಾಳದ ನೂತನ ಸಚಿವ ಸಂಪುಟದ ಪ್ರಮಾಣ ವಚನ ಸ್ವೀಕಾರ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಮೇ 9ರಂದು ಕೋಲ್ಕತ್ತಾಗೆ ಭೇಟಿ ನೀಡಿದ್ದಾಗ ಮೋದಿ ಈ ಜೆಟ್‌ನಲ್ಲಿ ಪ್ರಯಾಣಿಸುತ್ತಿರುವುದು ಕಂಡುಬಂದಿತ್ತು.

ಇಂತಹ ಜೆಟ್‌ಗಳ ಕಾರ್ಯಾಚರಣೆಯ ವೆಚ್ಚ ಎಷ್ಟು ಎಂಬುದು ತಿಳಿದಿಲ್ಲ. ಆದರೆ, 2016ರಲ್ಲಿ IAF ನೀಡಿದ್ದ ಮಾಹಿತಿ ಹಕ್ಕು ಕಾಯ್ದೆಯ ಉತ್ತರವು ಈ ಕುರಿತು ಬೆಳಕು ಚೆಲ್ಲುತ್ತದೆ. ರಾಷ್ಟ್ರಪತಿ, ಉಪರಾಷ್ಟ್ರಪತಿ ಮತ್ತು ಪ್ರಧಾನಮಂತ್ರಿಯವರು ಅಧಿಕೃತ ಕರ್ತವ್ಯದ ಮೇಲೆ ಪ್ರಯಾಣಿಸುವಾಗ ಅವರಿಗೆ ಶುಲ್ಕ ವಿನಾಯಿತಿ ನೀಡಲಾಗುತ್ತದೆಯಾದರೂ, ವಾಯುಪಡೆಯು 1999ರಲ್ಲಿ ಅಂತಿಮಗೊಳಿಸಿದ್ದ ದರಗಳ ಪ್ರಕಾರ, ಇಂತಹ ಬೋಯಿಂಗ್ 737 ಜೆಟ್‌ನಲ್ಲಿ ಪ್ರಯಾಣಿಸಲು ಗಂಟೆಗೆ 5.42 ಲಕ್ಷ ರೂಪಾಯಿ ಶುಲ್ಕ ನಿಗದಿಪಡಿಸಲಾಗಿತ್ತು. ಅಂದಿನಿಂದ ಈ ದರಗಳನ್ನು ಪರಿಷ್ಕರಿಸಲಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.

ಇದರ ಜೊತೆಗೆ, ಪ್ರಧಾನಮಂತ್ರಿಯವರು ರಾಜ್ಯದೊಳಗಿನ ಕಡಿಮೆ ದೂರದ ಪ್ರಯಾಣಕ್ಕಾಗಿ ಹೆಲಿಕಾಪ್ಟರ್‌ಗಳನ್ನು ಸಹ ಬಳಸುತ್ತಾರೆ. ಉದಾಹರಣೆಗೆ, ಮೇ 12ರಂದು ಜಾಮ್‌ನಗರದಿಂದ ಸೋಮನಾಥಕ್ಕೆ ಪ್ರಯಾಣಿಸುವಾಗ ಮೋದಿ ಅವರು ಹೆಲಿಕಾಪ್ಟರ್‌ನಲ್ಲಿ ತೆರಳಿದ್ದರು. ಸೋಮನಾಥ ದೇವಾಲಯದ ವೈಮಾನಿಕ ನೋಟವನ್ನು ತೋರಿಸುವ ವಿಡಿಯೊವನ್ನೂ ಅವರು ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿದ್ದರು.