ನೆಟ್ಫ್ಲಿಕ್ಸ್ ಬಳಕೆದಾರರಿಗೆ ಮತ್ತೊಂದು ನವೀಕರಣ; ಇನ್ನುಮುಂದೆ ಪ್ರತಿ ಪ್ರೊಫೈಲ್ಗೂ ಬೇಕು ಲಾಗಿನ್ ಇಮೇಲ್!
Photo Credit : Netflix
ಈಗಾಗಲೇ ಬಳಕೆದಾರರು ಗೌಪ್ಯತಾ ನಿಯಮಗಳಿಗೆ ಒಪ್ಪಿಗೆ ನೀಡಿದ್ದು, ತಮ್ಮ ವೀಕ್ಷಣಾ ವಿವರಗಳನ್ನೆಲ್ಲ ನೆಟ್ಫ್ಲಿಕ್ಸ್ಗೆ ನೀಡುತ್ತಿರುವ ಕಾರಣ, ಹೊಸ ನಿಯಮದ ಮೂಲಕ ಹಲವು ಖಾತೆಗಳಿಂದ ಮಾಹಿತಿಯನ್ನು ಪಡೆಯುವ ಅವಕಾಶ ನೆಟ್ಫ್ಲಿಕ್ಸ್ಗೆ ಸಿಗುತ್ತದೆ.
ನೆಟ್ಫ್ಲಿಕ್ಸ್ ಅನ್ನು ಬೇರೆಯವರ ಖಾತೆಯಿಂದ ಬಳಸುವವರಿಗೆ ಹೊಸ ನಿಯಮದಿಂದಾಗಿ ಸಮಸ್ಯೆ ಎದುರಾಗುವ ಸಾಧ್ಯತೆಯಿದೆ. ಬೇರೆಯವರ ಖಾತೆಯಲ್ಲಿ ಸೇರ್ಪಡೆ ಸದಸ್ಯರಾಗಿ ಸ್ಟ್ರೀಮಿಂಗ್ ಪ್ಲಾಟ್ಫಾರ್ಮ್ಗೆ ಪ್ರವೇಶಿಸುವ ನೆಟ್ಫ್ಲಿಕ್ಸ್ ಬಳಕೆದಾರರು, ಹೊಸ ನಿಯಮದ ಕಾರಣದಿಂದ ತಮ್ಮ ಪ್ರೊಫೈಲ್ಗಳಿಗೆ ಲಾಗಿನ್ ಆಗುವಲ್ಲಿ ತೊಂದರೆ ಅನುಭವಿಸಬಹುದು.
ಒಟಿಟಿ (OTT) ಪ್ಲಾಟ್ಫಾರ್ಮ್ ನೆಟ್ಫ್ಲಿಕ್ಸ್, ತನ್ನ ಚಂದಾದಾರಿಕೆ ಯೋಜನೆಯ ಅಡಿಯಲ್ಲಿರುವ ಪ್ರತಿ ಪ್ರೊಫೈಲ್ ಪ್ಲಾಟ್ಫಾರ್ಮ್ಗೆ ಲಾಗಿನ್ ಆಗುವಾಗ ಪ್ರತ್ಯೇಕ ಇಮೇಲ್ ವಿಳಾಸವನ್ನು ಬಳಸಬೇಕು ಎಂದು ಒತ್ತಾಯಿಸುತ್ತಿದೆ. ಈ ಸೈನ್-ಇನ್ ನವೀಕರಣವು ಜೂನ್ 15, 2026ರಿಂದ ಜಾರಿಗೆ ಬಂದಿರುವ ಶಾಶ್ವತ ಬದಲಾವಣೆಯಾಗಿದೆ.
ಇತ್ತೀಚೆಗೆ ಸಾಮಾಜಿಕ ಮಾಧ್ಯಮದಲ್ಲಿ ಅನೇಕ ಬಳಕೆದಾರರು, ಮುಂದುವರಿಯಲು "ನಿಮ್ಮ ಪ್ರೊಫೈಲ್ಗೆ ಇಮೇಲ್ ವಿಳಾಸ ಸೇರಿಸಿ" ಎಂದು ಕೇಳುವ ಪಾಪ್-ಅಪ್ ಅಧಿಸೂಚನೆಯನ್ನು ನೋಡಿರುವುದಾಗಿ ವರದಿ ಮಾಡಿದ್ದಾರೆ. ಆದರೆ, ನೆಟ್ಫ್ಲಿಕ್ಸ್ ಪ್ರೊಫೈಲ್ ಬಳಸುವವರು ಮಕ್ಕಳಾಗಿದ್ದರೆ, ಅವರಿಗೆ ಪ್ರತ್ಯೇಕ ಇಮೇಲ್ ವಿಳಾಸದ ಅಗತ್ಯವಿರುವುದಿಲ್ಲ.
ತಮ್ಮದೇ ಲಾಗಿನ್ ರುಜುವಾತುಗಳನ್ನು (login credentials) ಹೊಂದಿರುವವರಿಗೆ ಈ ನವೀಕರಣದಿಂದಾಗಿ ದ್ವಿತೀಯ ಖಾತೆ ಬಳಕೆದಾರರನ್ನು ನೆನಪಿಟ್ಟುಕೊಳ್ಳುವುದು, ನಿರ್ವಹಿಸುವುದು ಅಥವಾ ಬದಲಿಸುವುದು ಸುಲಭವಾಗಲಿದೆ. ಅಲ್ಲದೆ, ಹೊಸ ಸಾಧನಗಳಿಗೆ ಲಾಗಿನ್ ಆಗುವುದು ಅಥವಾ ಎರಡು ಹಂತದ ದೃಢೀಕರಣವನ್ನು ಬಳಸುವುದೂ ಸರಳವಾಗಲಿದೆ.
ಹೆಚ್ಚುವರಿಯಾಗಿ, ದ್ವಿತೀಯ ಖಾತೆ ಬಳಕೆದಾರರು ತಮ್ಮ ವೈಯಕ್ತಿಕ ಆದ್ಯತೆಗಳ ಆಧಾರದ ಮೇಲೆ ಭಾಷೆ, ಆಡಿಯೋ ಮತ್ತು ಡಿಸ್ಪ್ಲೇ ಸೆಟ್ಟಿಂಗ್ಗಳನ್ನು ಪ್ರತ್ಯೇಕವಾಗಿ ಹೊಂದಿಸಬಹುದಾಗಿದೆ.
ಆದರೆ, ನೆಟ್ಫ್ಲಿಕ್ಸ್ ಬಳಕೆದಾರರು ಈ ಸೈನ್-ಇನ್ ನವೀಕರಣದ ಕುರಿತು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ಕೆಲವರು ಗೃಹಬಳಕೆಯ ಟಿವಿಯಂತಹ ಒಂದೇ ಸಾಧನದಲ್ಲಿ ವಿಭಿನ್ನ ನೆಟ್ಫ್ಲಿಕ್ಸ್ ಪ್ರೊಫೈಲ್ಗಳನ್ನು ಬಳಸುತ್ತಾರೆ. ಹೀಗಾಗಿ ಖಾಸಗಿತನಕ್ಕೆ ಧಕ್ಕೆಯಾಗುವ ಸಾಧ್ಯತೆಯಿದೆ ಎಂಬ ಕಳವಳವೂ ವ್ಯಕ್ತವಾಗಿದೆ. ನೆಟ್ಫ್ಲಿಕ್ಸ್ಗೆ ಈ ಮಾಹಿತಿಯ ಅಗತ್ಯವೇನು ಎಂದು ಕೆಲವರು ಪ್ರಶ್ನಿಸಿದ್ದಾರೆ.
ಮುಖ್ಯವಾಗಿ, ನೆಟ್ಫ್ಲಿಕ್ಸ್ನ ಗೌಪ್ಯತಾ ನೀತಿಯ ಪ್ರಕಾರ, ಪ್ಲಾಟ್ಫಾರ್ಮ್ ಬಳಕೆದಾರರ ಇಮೇಲ್ ವಿಳಾಸಗಳನ್ನು ಮಾರ್ಕೆಟಿಂಗ್ ಮತ್ತು ಜಾಹೀರಾತು ಸಂಸ್ಥೆಗಳೊಂದಿಗೆ ಹಂಚಿಕೊಳ್ಳಬಹುದು ಎಂದು ಹೇಳಲಾಗಿದೆ. ಆದರೆ, ಬಹುತೇಕ ಬಳಕೆದಾರರ ಪ್ರಕಾರ ಇದರಿಂದ ದೊಡ್ಡ ವ್ಯತ್ಯಾಸ ಉಂಟಾಗುವುದಿಲ್ಲ.
ಈಗಾಗಲೇ ಬಳಕೆದಾರರು ಗೌಪ್ಯತಾ ನಿಯಮಗಳಿಗೆ ಒಪ್ಪಿಗೆ ನೀಡಿದ್ದು, ತಮ್ಮ ವೀಕ್ಷಣಾ ವಿವರಗಳನ್ನೆಲ್ಲ ನೆಟ್ಫ್ಲಿಕ್ಸ್ಗೆ ನೀಡುತ್ತಿರುವ ಕಾರಣ, ಹೊಸ ನಿಯಮದ ಮೂಲಕ ಹಲವು ಖಾತೆಗಳಿಂದ ಮಾಹಿತಿಯನ್ನು ಪಡೆಯುವ ಅವಕಾಶ ನೆಟ್ಫ್ಲಿಕ್ಸ್ಗೆ ಸಿಗುತ್ತದೆ.
ಆದರೆ, ಮುಖ್ಯ ಖಾತೆಯ ಮಾಲೀಕರು ಎಲ್ಲಾ ಪ್ರೊಫೈಲ್ಗಳ ಮೇಲಿನ ನಿಯಂತ್ರಣವನ್ನು ಸಂಪೂರ್ಣವಾಗಿ ಹೊಂದಲು ಸಾಧ್ಯವಾಗುವುದಿಲ್ಲ.
