ರಾಜ್ಯದಲ್ಲಿ ಹೆಚ್ಚಾದ ಪೊಕ್ಸೊ ಪ್ರಕರಣ: 4 ವರ್ಷಗಳಲ್ಲಿ 15,409 ಪ್ರಕರಣ ದಾಖಲು

ಬೆಂಗಳೂರು, ಜೂ.12: ರಾಜ್ಯದಲ್ಲಿ ಪೊಕ್ಸೊ ಕಾಯ್ದೆಯಡಿಯಲ್ಲಿ ದಾಖಲಾಗುವ ಪ್ರಕರಣಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವುದು ಆತಂಕಕಾರಿಯಾಗಿದೆ.

2025ರ ಎಪ್ರಿಲ್ ಹೊತ್ತಿಗೆ, ರಾಜ್ಯಾದ್ಯಂತ ಪ್ರತೀ ದಿನ ಸರಾಸರಿ 10 ಪೊಕ್ಸೊ ಪ್ರಕರಣಗಳು ದಾಖಲಾಗಿವೆ. ಬೆಂಗಳೂರಿನಲ್ಲಿ ಸುಮಾರು 1,386 ಪ್ರಕರಣಗಳು ದಾಖಲಾಗಿದ್ದು, ಎಲ್ಲ ಜಿಲ್ಲೆಗಳಿಗಿಂತ ಅತೀ ಹೆಚ್ಚು ಪ್ರಕರಣ ದಾಖಲಾಗಿರುವುದು ರಾಜಧಾನಿಯಲ್ಲೇ!.

ಜನವರಿ 2021ರಿಂದ 2025ರ ಎಪ್ರಿಲ್‌ವರೆಗೆ ಕರ್ನಾಟಕದಲ್ಲಿ ಒಟ್ಟು 15,409 ಪೊಕ್ಸೊ ಪ್ರಕರಣಗಳು ಬೆಳಕಿಗೆ ಬಂದಿವೆ. 2025ರಲ್ಲಿ ಶಿವಮೊಗ್ಗ(456), ಮೈಸೂರು(442), ಚಿಕ್ಕಬಳ್ಳಾಪುರ(410), ತುಮಕೂರು(362), ಬೆಳಗಾವಿ(335), ಮಂಡ್ಯ(311) ಮತ್ತು ಹಾಸನ(322). ಉತ್ತರ ಕರ್ನಾಟಕದ ಕೆಲವು ಜಿಲ್ಲೆಗಳಲ್ಲಿ ಸುಮಾರು 100 ಪ್ರಕರಣಗಳು ವರದಿಯಾಗಿದ್ದರೂ, ದಕ್ಷಿಣ ಕರ್ನಾಟಕದ ಹೆಚ್ಚಿನ ಜಿಲ್ಲೆಗಳು ಈ ಸಂಖ್ಯೆ 150 ಅನ್ನು ಮೀರಿವೆ.

ಪರಿಚಯಸ್ಥರೇ ಆರೋಪಿಗಳು: ಪೊಲೀಸ್ ವರದಿಗಳ ಪ್ರಕಾರ, ಸುಮಾರು ಶೇ.80ರಷ್ಟು ಪ್ರಕರಣಗಳಲ್ಲಿ ಆರೋಪಿಗಳು ಸಂತ್ರಸ್ತೆಯರ ನೆರೆಹೊರೆಯವರು ಅಥವಾ ಪರಿಚಯಸ್ಥರೇ ಆಗಿರುತ್ತಾರೆ. ಸಾಮಾಜಿಕ ಕಳಂಕದ ಭಯ ಮತ್ತು ಭವಿಷ್ಯದ ಬಗ್ಗೆ ಕಳವಳದಿಂದಾಗಿ, ಪೋಷಕರು ನ್ಯಾಯಾಲಯದಲ್ಲಿ ಸಂಪೂರ್ಣ ಸಾಕ್ಷ್ಯ ನೀಡಲು ಹಿಂಜರಿಯುತ್ತಾರೆ. ಅಲ್ಲದೇ, ದೀರ್ಘಕಾಲದ ಕಾನೂನು ಹೋರಾಟಗಳು ಮತ್ತು ಸಮುದಾಯ ಸಂಘರ್ಷ ತಡೆಗಟ್ಟಲು ಹೆಚ್ಚಾಗಿ ಕುಟುಂಬಗಳು ಪ್ರಭಾವಿ ಆರೋಪಿಗಳ ವಿರುದ್ಧ ಪ್ರಕರಣಗಳನ್ನು ಮುಂದುವರಿಸುವುದಿಲ್ಲ. ಈ ಕಾರಣದಿಂದಾಗಿ ಪ್ರಕರಣ ವಜಾಗೊಳಿಸಲು ಕಾರಣವಾಗುತ್ತಿವೆ ಎಂಬುದು ಕಾನೂನು ತಜ್ಞರ ಅಭಿಪ್ರಾಯವಾಗಿದೆ.

ಮೌನಕ್ಕೆ ಜಾರಿದ ಸಾಮಾಜಿಕ ನ್ಯಾಯ ಸಮಿತಿ: ಪೊಕ್ಸೊ ಕಾಯ್ದೆಯು ಆಟಕ್ಕುಂಟು, ಲೆಕ್ಕಕ್ಕಿಲ್ಲದಂತಾಗಿದೆ. ರಾಜ್ಯದ ಆಯಾ ಗ್ರಾ.ಪಂ. ಅಧ್ಯಕ್ಷ ಒಳಗೊಂಡ ಸಾಮಾಜಿಕ ನ್ಯಾಯ ಸಮಿತಿಗಳು ಯಾವುದೇ ನೈತಿಕ ಕೆಲಸವನ್ನು ನಿರ್ವಹಿಸುತ್ತಿಲ್ಲ. ಮಾತ್ರವಲ್ಲದೇ ಇದಕ್ಕೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಬೇಜವಾಬ್ದಾರಿ ಕೂಡ ಎದ್ದು ಕಾಣುತ್ತಿವೆ. ರಹಸ್ಯವಾಗಿ ನಡೆಯುವ ಬಾಲ್ಯ ವಿವಾಹಗಳು ಕೂಡ ಹೆಚ್ಚಾಗುತ್ತಿದ್ದು, ಸರಕಾರ ಕಣ್ಣು ಮುಚ್ಚಿ ಕುಳಿತು ಇದಕ್ಕೂ ನಮಗೂ ಸಂಬಂಧವಿಲ್ಲದ ರೀತಿಯಲ್ಲಿ ವರ್ತಿಸುತ್ತಿವೆ. ಚಿತ್ರದುರ್ಗ ಜಿಲ್ಲೆಯಲ್ಲಿ ನಡೆದ 9ನೇ ತರಗತಿ ವಿದ್ಯಾರ್ಥಿನಿಯ ಮದುವೆಗೆ ಕುಟುಂಬ ಮುಂದಾಗಿದ್ದಾಗ, ಬಾಲಕಿ ಮನೆಯಿಂದ ಹೊರಬಂದು ಪೊಲೀಸರಿಗೆ ದೂರು ನೀಡಿದ್ದಳು. ಈ ರೀತಿಯ ಹಲವು ದೌರ್ಜನ್ಯ ಪ್ರಕರಣಗಳು ಮುನ್ನೆಲೆಗೆ ಬಾರದೇ ಉಳಿದಿವೆ ಎಂದು ಅಖಿಲ ಭಾರತ ಜನವಾದಿ ಮಹಿಳಾ ಸಂಘಟನೆಯ ರಾಜ್ಯ ಪ್ರಧಾನ ಕಾರ್ಯದರ್ಶಿ ದೇವಿ ಹೇಳುತ್ತಾರೆ.

ಜಾಗೃತಿ ಕ್ರಮ: ಅಪ್ರಾಪ್ತ ವಯಸ್ಕರ ವಿರುದ್ಧ ಹೆಚ್ಚುತ್ತಿರುವ ಲೈಂಗಿಕ ದೌರ್ಜನ್ಯವನ್ನು ಎದುರಿಸಲು, ಶಾಲೆಗಳು, ಕಾಲೇಜುಗಳು ಮತ್ತು ವಸತಿ ನಿಲಯಗಳಲ್ಲಿ ಜಾಗೃತಿ ಕಾರ್ಯಕ್ರಮಗಳನ್ನು ತೀವ್ರಗೊಳಿಸಲಾಗುತ್ತಿದೆ. ಸಹಾಯವಾಣಿಗಳಿಗೆ ಬರುವ ದೂರುಗಳ ಮೇಲೆ ತ್ವರಿತವಾಗಿ ಕ್ರಮ ಕೈಗೊಳ್ಳಲಾಗುವುದು. ಎಫ್‌ಐಆರ್‌ಗಳ ತ್ವರಿತ ನೋಂದಣಿ ಮತ್ತು ಕಾನೂನು ಕ್ರಮಕ್ಕೆ ಅಧಿಕಾರಿಗಳು ಭರವಸೆ ನೀಡಿದ್ದಾರೆ ಎಂದು ಮಕ್ಕಳ ರಕ್ಷಣಾ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಕ್ಷೀಣಿಸಿದ ಶಿಕ್ಷೆಯ ಪ್ರಮಾಣ

ವರದಿಯಾದ ಪೊಕ್ಸೊ ಪ್ರಕರಣಗಳಲ್ಲಿ ಶಿಕ್ಷೆಯ ಪ್ರಮಾಣವು ಕಡಿಮೆಯಾಗಿದೆ. 2023 ಮತ್ತು 2024ರಲ್ಲಿ ದಾಖಲಾಗಿದ್ದ ಸುಮಾರು 8,000 ಪ್ರಕರಣಗಳಲ್ಲಿ ಕೇವಲ 130 ಪ್ರಕರಣಗಳಲ್ಲಿ ಮಾತ್ರ ಶಿಕ್ಷೆಯಾಗಿದೆ. ಚಾರ್ಜ್‌ಶೀಟ್‌ಗಳಲ್ಲಿನ ದೋಷಗಳು ಅಥವಾ ಸುಳ್ಳು ಆರೋಪಗಳಿಂದಾಗಿ 1,682 ಪ್ರಕರಣಗಳನ್ನು ವಜಾಗೊಳಿಸಲಾಗಿದೆ, ಇನ್ನೂ ಅನೇಕ ಪ್ರಕರಣಗಳು ತನಿಖೆ ಅಥವಾ ವಿಚಾರಣೆಗೆ ಬಾಕಿ ಉಳಿದಿವೆ ಎಂಬುದನ್ನು ಅಂಕಿ ಅಂಶಗಳು ಹೇಳುತ್ತವೆ.