ಇರಾನ್ ಯುದ್ಧದ ಮಧ್ಯೆ ರಷ್ಯಾದ ತೈಲವನ್ನು ಖರೀದಿಸಲು ಅಮೆರಿಕ ಭಾರತಕ್ಕೆ 30 ದಿನಗಳ ವಿನಾಯಿತಿ ನೀಡಿದ್ದೇಕೆ?

ರಷ್ಯಾದಿಂದ ಕಚ್ಚಾ ತೈಲ ಖರೀದಿಸಲು ಭಾರತಕ್ಕೆ 30 ದಿನಗಳ ವರೆಗೆ ವಿನಾಯಿತಿ ನೀಡಲಾಗಿದೆ ಎಂದು ಅಮೆರಿಕದ ಹಣಕಾಸು ಸಚಿವ ಸ್ಕಾಟ್‌ ಬೆಸೆಂಟ್‌ ತಿಳಿಸಿದ್ದಾರೆ. ರಾಯಿಟರ್ಸ್ ಪ್ರಕಾರ, ಮಧ್ಯಪ್ರಾಚ್ಯ ಸಂಘರ್ಷಕ್ಕೆ ಸಂಬಂಧಿಸಿದ ಪೂರೈಕೆ ಅಡಚಣೆಗಳ ಬಗ್ಗೆ ಕಳವಳಗಳು ಹೆಚ್ಚುತ್ತಿರುವ ಕಾರಣ, ಅಮೆರಿಕವು ಭಾರತಕ್ಕೆ ಅಲ್ಪಾವಧಿಗೆ ರಷ್ಯಾದ ತೈಲವನ್ನು ಖರೀದಿಸಲು ಅವಕಾಶ ನೀಡಿದೆ.

ಸಮುದ್ರದಲ್ಲಿ ಈಗಾಗಲೇ ಸಿಲುಕಿರುವ ಸರಕುಗಳ ಖರೀದಿಗೆ ಅವಕಾಶ ನೀಡುವ ತಾತ್ಕಾಲಿಕ ವಿನಾಯಿತಿಯನ್ನು ಅಮೆರಿಕ ನೀಡಿದ ನಂತರ, ಭಾರತೀಯ ಸಂಸ್ಕರಣಾಗಾರರು ತ್ವರಿತ ವಿತರಣೆಗಾಗಿ ಲಕ್ಷಾಂತರ ಬ್ಯಾರೆಲ್ ರಷ್ಯಾದ ಕಚ್ಚಾ ತೈಲವನ್ನು ಖರೀದಿಸಲು ಪ್ರಾರಂಭಿಸಿದ್ದಾರೆ. ಉಕ್ರೇನ್ ಮೇಲೆ ರಷ್ಯಾ ಆಕ್ರಮಣ ಮಾಡಿದ ನಂತರ ರಷ್ಯಾದ ತೈಲ ಆಮದುಗಳನ್ನು ಕಡಿತಗೊಳಿಸುವಂತೆ ಅಮೆರಿಕ ಭಾರತದ ಮೇಲೆ ತಿಂಗಳುಗಳ ಕಾಲ ಒತ್ತಡ ಹೇರಿದ ನಂತರ ಈ ಕ್ರಮ ಬಂದಿದೆ.

►30 ದಿನಗಳ ತುರ್ತು ವಿನಾಯಿತಿ

ಈ ವಿನಾಯಿತಿ 30 ದಿನಗಳವರೆಗೆ ಇರುತ್ತದೆ. ಜಾಗತಿಕ ಮಾರುಕಟ್ಟೆಗೆ ತೈಲ ಪೂರೈಕೆ ನಿರಂತರವಾಗಿರುವುದನ್ನು ಖಚಿತಪಡಿಸಿಕೊಳ್ಳುವ ಗುರಿಯನ್ನು ಇದು ಹೊಂದಿದೆ ಎಂದು ಅಮೆರಿಕ ಹೇಳಿದೆ.

ಜಾಗತಿಕ ಮಾರುಕಟ್ಟೆಗೆ ತೈಲ ಪೂರೈಕೆ ನಿರಂತರವಾಗಿರುವುದನ್ನು ಖಚಿತಪಡಿಸಿಕೊಳ್ಳಲು, ರಷ್ಯಾದಿಂದ ಕಚ್ಚಾ ತೈಲವನ್ನು ಖರೀದಿಲು ಭಾರತಕ್ಕೆ ತಾತ್ಕಾಲಿಕವಾಗಿ ಅನುವು ಮಾಡಿಕೊಡಲಾಗಿದೆ. ಈ ಕ್ರಮವು ರಷ್ಯಾಗೆ ದೊಡ್ಡ ಲಾಭವನ್ನು ತರುವುದಿಲ್ಲ. ಏಕೆಂದರೆ ಇದು ಈಗಾಗಲೇ ಸಮುದ್ರ ಮಾರ್ಗದಲ್ಲಿ ಬಾಕಿ ಉಳಿದಿರುವ ತೈಲಕ್ಕೆ ಸಂಬಂಧಿಸಿದ ವಹಿವಾಟುಗಳಿಗೆ ಮಾತ್ರ ಅನುಮತಿ ನೀಡುತ್ತದೆ ಎಂದು ಅಮೆರಿಕದ ಯುಎಸ್ ಖಜಾನೆ ಕಾರ್ಯದರ್ಶಿ ಸ್ಕಾಟ್‌ ಬೆಸೆಂಟ್‌ ಹೇಳಿದ್ದಾರೆ.

ಈ ಕ್ರಮ ತಾತ್ಕಾಲಿಕ. ಆದರೆ ವಾಷಿಂಗ್ಟನ್ ಭಾರತವು ಅಂತಿಮವಾಗಿ ಅಮೆರಿಕದಿಂದ ಹೆಚ್ಚಿನ ತೈಲವನ್ನು ಖರೀದಿಸುತ್ತದೆ ಎಂದು ನಿರೀಕ್ಷಿಸುತ್ತದೆ ಎಂದಿದ್ದಾರೆ ಬೆಸೆಂಟ್ .

►ಭಾರತಕ್ಕೆ ವಿನಾಯಿತಿ ನೀಡಿದ್ದೇಕೆ?

ರಾಯಿಟರ್ಸ್ ಪ್ರಕಾರ, ದೇಶವು ತನ್ನ ಕಚ್ಚಾ ತೈಲದ ಸುಮಾರು 40% ಅನ್ನು ಮಧ್ಯಪ್ರಾಚ್ಯದಿಂದ ಹಾರ್ಮುಜ್ ಜಲಸಂಧಿಯ ಮೂಲಕ ಆಮದು ಮಾಡಿಕೊಳ್ಳುತ್ತದೆ. ಭಾರತದ ಕಚ್ಚಾ ನಿಕ್ಷೇಪಗಳು ಸುಮಾರು 25 ದಿನಗಳ ಬೇಡಿಕೆಯನ್ನು ಪೂರೈಸುತ್ತವೆ. ಆ ಬ್ಯಾಕಪ್ ತುಂಬಾ ಕಡಿಮೆ ಆಗಿರುವುದರಿಂದ ಮಧ್ಯಪ್ರಾಚ್ಯದಲ್ಲಿ ಯಾವುದೇ ಹಠಾತ್ ವಿಳಂಬ ಅಥವಾ ಸಂಘರ್ಷವು ಭಾರತದ ಇಂಧನ ಭದ್ರತೆಗೆ ಪ್ರಮುಖ ಸಮಸ್ಯೆಯಾಗುತ್ತದೆ.

ಇರಾನ್ ಒಳಗೊಂಡ ಸಂಘರ್ಷಕ್ಕೆ ಸಂಬಂಧಿಸಿದ ಕಳವಳಗಳಿಂದಾಗಿ ರಷ್ಯಾ ತೈಲವನ್ನು ಖರೀದಿಸಲು ಅನುಮೋದನೆ ಕೋರಿ ಭಾರತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತವನ್ನು ಸಂಪರ್ಕಿಸಿದೆ ಎಂದು ಮೂಲವೊಂದು ರಾಯಿಟರ್ಸ್‌ಗೆ ತಿಳಿಸಿದೆ.

ಅಮೆರಿಕದ ಒತ್ತಡದ ನಂತರ ಮತ್ತು ಯುಎಸ್ ಸುಂಕಗಳನ್ನು ತಪ್ಪಿಸುವ ಮತ್ತು ಮಧ್ಯಂತರ ವ್ಯಾಪಾರ ಒಪ್ಪಂದವನ್ನು ಪಡೆಯುವ ಪ್ರಯತ್ನಗಳ ಭಾಗವಾಗಿ ಭಾರತ ಈ ವರ್ಷ ರಷ್ಯಾದ ತೈಲ ಖರೀದಿಯನ್ನು ಕಡಿಮೆ ಮಾಡಿತ್ತು.

►ಭಾರತೀಯ ಸಂಸ್ಕರಣಾಗಾರರು ಈಗ ಏನು ಮಾಡುತ್ತಿದ್ದಾರೆ?

ಸರ್ಕಾರಿ ಸ್ವಾಮ್ಯದ ಸಂಸ್ಕರಣಾಗಾರಗಳಾದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್, ಭಾರತ್ ಪೆಟ್ರೋಲಿಯಂ, ಹಿಂದೂಸ್ತಾನ್ ಪೆಟ್ರೋಲಿಯಂ ಮತ್ತು ಮಂಗಳೂರು ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ ರಷ್ಯಾದ ಕಚ್ಚಾ ತೈಲವನ್ನು ತ್ವರಿತವಾಗಿ ತಲುಪಿಸಲು ವ್ಯಾಪಾರಿಗಳೊಂದಿಗೆ ಮಾತುಕತೆ ನಡೆಸುತ್ತಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಭಾರತೀಯ ರಾಜ್ಯ ಸಂಸ್ಕರಣಾಗಾರರು ಈಗಾಗಲೇ ವ್ಯಾಪಾರಿಗಳಿಂದ ಸುಮಾರು 20 ಮಿಲಿಯನ್ ಬ್ಯಾರೆಲ್‌ಗಳನ್ನು ಖರೀದಿಸಿದ್ದಾರೆ ಎಂದು ಮೂಲವೊಂದು ತಿಳಿಸಿದೆ.

ರಷ್ಯಾದ ತೈಲದ ಬೆಲೆಯಲ್ಲಿ ಭಾರೀ ಬದಲಾವಣೆಯಾಗಿದೆ. ಫೆಬ್ರವರಿಯಲ್ಲಿ ಭಾರತವು ಜಾಗತಿಕ ಮಾನದಂಡ (ಬ್ರೆಂಟ್) ಬೆಲೆಗಿಂತ 13 ಡಾಲರ್ ಅಗ್ಗಕ್ಕೆ ರಷ್ಯಾದ ತೈಲವನ್ನು ಖರೀದಿಸುವ ಮೂಲಕ ಹೆಚ್ಚಿನ ಲಾಭ ಗಳಿಸುತ್ತಿತ್ತು. ಆದಾಗ್ಯೂ, ಮಧ್ಯಪ್ರಾಚ್ಯದಲ್ಲಿನ ಯುದ್ಧವು ಇತರ ತೈಲ ಮೂಲಗಳನ್ನು ತಲುಪಲು ಕಷ್ಟಕರವಾಗಿರುವುದರಿಂದ, ರಷ್ಯಾದ ತೈಲಕ್ಕೆ ಬೇಡಿಕೆ ಹೆಚ್ಚಾಗಿದೆ. ಈಗ, ರಿಯಾಯಿತಿಯ ಬದಲು ಭಾರತೀಯ ಕಂಪನಿಗಳು "ಪ್ರೀಮಿಯಂ" ಪಾವತಿಸಲು ಒತ್ತಾಯಿಸಲ್ಪಟ್ಟಿವೆ . ಅಂದರೆ ಸಾಗಣೆಯನ್ನು ಪಡೆಯಲು ಅವರು ಜಾಗತಿಕ ಬೆಲೆಗಿಂತ 4 ಡಾಲರ್ ನಿಂದ 5 ಡಾಲರ್ ಹೆಚ್ಚು ಪಾವತಿಸುತ್ತಿದ್ದಾರೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ ಕಳೆದ ವರ್ಷ ಭಾರತ ಅವಲಂಬಿಸಿದ್ದ "ಅಗ್ಗದ" ರಷ್ಯಾದ ತೈಲವು ಇದ್ದಕ್ಕಿದ್ದಂತೆ ದುಬಾರಿಯಾಗಿದೆ.

ಮಾರಾಟದಲ್ಲಿ ಭಾಗಿಯಾಗಿರುವ ವ್ಯಾಪಾರಿಯೊಬ್ಬರು ಪೂರೈಕೆ ಲಭ್ಯತೆಯು ಮುಖ್ಯ ಕಾಳಜಿಯಾಗಿದೆ. ಭಾರತೀಯ ಸಂಸ್ಕರಣಾಗಾರರು ಮತ್ತೆ ಮಾರುಕಟ್ಟೆಗೆ ಬಂದಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಬೆಲೆಗಳಿಗಿಂತ ಹೆಚ್ಚು, ತೈಲದ ಲಭ್ಯತೆಯು ಸಮಸ್ಯೆಯಾಗಿದೆ ಎಂದು ವ್ಯಾಪಾರಿ ರಾಯಿಟರ್ಸ್‌ಗೆ ತಿಳಿಸಿದರು.

ರಿಲಯನ್ಸ್ ಇಂಡಸ್ಟ್ರೀಸ್ ತ್ವರಿತವಾಗಿ ರಷ್ಯಾದ ಸರಕುಗಳನ್ನು ಖರೀದಿಸಲು ವ್ಯಾಪಾರಿಗಳನ್ನು ಸಂಪರ್ಕಿಸಿದೆ ಎಂದು ಮೂಲಗಳು ತಿಳಿಸಿವೆ.

►ತೈಲ ಯಾವಾಗ ಬರಬಹುದು?

ರಾಯಿಟರ್ಸ್ ಮೂಲಗಳ ಪ್ರಕಾರ, ವಿನಾಯಿತಿ ಅಡಿಯಲ್ಲಿ ಖರೀದಿಸಿದ ಸರಕುಗಳು ಮಾರ್ಚ್ ಮತ್ತು ಏಪ್ರಿಲ್ ಆರಂಭದಲ್ಲಿ ಭಾರತೀಯ ಬಂದರುಗಳನ್ನು ತಲುಪುವ ನಿರೀಕ್ಷೆಯಿದೆ. ಕೆಲವು ಸಂಸ್ಕರಣಾಗಾರಗಳು ಮಧ್ಯಪ್ರಾಚ್ಯದಿಂದ ಕಡಿಮೆಯಾದ ಪೂರೈಕೆಯನ್ನು ಸರಿದೂಗಿಸಲು ಭಾರತದ ಕರಾವಳಿಯ ಬಳಿಯ ಹಡಗುಗಳಲ್ಲಿ ಸಂಗ್ರಹಿಸಲಾದ ರಷ್ಯಾದ ತೈಲವನ್ನು ಬಳಸಲು ಪ್ರಾರಂಭಿಸಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

►ಭಾರತದ ಕಡೆಗೆ ತಿರುಗಿದ ತೈಲ ಟ್ಯಾಂಕರ್

ಹಡಗು-ಟ್ರ್ಯಾಕಿಂಗ್ ದತ್ತಾಂಶದ ಪ್ರಕಾರ, ಪೂರ್ವ ಏಷ್ಯಾಕ್ಕೆ ಹೋಗುತ್ತಿದ್ದ ಎರಡು ಬೃಹತ್ ಟ್ಯಾಂಕರ್‌ಗಳು ಭಾರತಕ್ಕೆ ತೈಲ ತಲುಪಿಸಲು ಪ್ರಯಾಣದ ಮಧ್ಯೆ ತಮ್ಮ ಗಮ್ಯಸ್ಥಾನವನ್ನು ಬದಲಾಯಿಸಿವೆ. ಮಧ್ಯಪ್ರಾಚ್ಯದಲ್ಲಿನ ಯುದ್ಧವು ಸಾಂಪ್ರದಾಯಿಕ ಮೂಲಗಳಿಂದ ಇಂಧನವನ್ನು ಪಡೆಯುವುದು ಕಷ್ಟಕರವಾಗಿಸುತ್ತಿದ್ದಂತೆ, ಭಾರತೀಯ ತೈಲ ಕಂಪನಿಗಳು ಲಭ್ಯವಿರುವ ಯಾವುದೇ ಸಾಗಣೆಯನ್ನು ಪಡೆಯಲು ಪರದಾಡುತ್ತಿವೆ. ಬ್ಲೂಮ್‌ಬರ್ಗ್‌ನ ವರದಿಯ ಪ್ರಕಾರ ಒಡುನೆ ಮತ್ತು ಮಟಾರಿ ಎಂದು ಹೆಸರಿಸಲಾದ ಈ ಎರಡು ಹಡಗುಗಳು ಒಟ್ಟು 1.4 ಮಿಲಿಯನ್ ಬ್ಯಾರೆಲ್ ರಷ್ಯಾದ ತೈಲವನ್ನು ಸಾಗಿಸುತ್ತಿವೆ. ಭಾರತೀಯ ಬಂದರುಗಳ ಕಡೆಗೆ ಇದರ ಹಠಾತ್ ಯು-ಟರ್ನ್ ಭಾರತವು ಕೊರತೆಯನ್ನು ತಪ್ಪಿಸಲು ಪ್ರಯತ್ನಿಸುತ್ತಿರುವಾಗ ಇಂಧನದ ಅಗತ್ಯ ಎಷ್ಟು ತುರ್ತು ಎಂದು ತೋರಿಸುತ್ತದೆ.

730,000 ಬ್ಯಾರೆಲ್‌ಗಳನ್ನು ಹೊತ್ತ ಸೂಯೆಜ್‌ಮ್ಯಾಕ್ಸ್ ಹಡಗು ಒಡುನೆ ಬುಧವಾರ ಪಾರಾದೀಪ್ ಬಂದರಿಗೆ ಆಗಮಿಸಿತು. ಆದರೆ ಸರಕುಗಳನ್ನು ಬಿಡುಗಡೆ ಮಾಡಲಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ ಎಂದು ವರದಿ ತಿಳಿಸಿದೆ. 700,000 ಬ್ಯಾರೆಲ್‌ಗಳಿಗಿಂತ ಹೆಚ್ಚು ಲೋಡ್ ಮಾಡಲಾದ ಅಫ್ರಾಮ್ಯಾಕ್ಸ್ ಟ್ಯಾಂಕರ್ ಮಟಾರಿ ಗುರುವಾರ ಪಶ್ಚಿಮ ಭಾರತದ ವಾಡಿನಾರ್ ತಲುಪಲಿದೆ. ಎರಡೂ ಹಡಗುಗಳು ಆರಂಭದಲ್ಲಿ ಭಾರತದ ಕಡೆಗೆ ತಮ್ಮ ಮಾರ್ಗಗಳನ್ನು ಬದಲಾಯಿಸುವ ಮೊದಲು ಪೂರ್ವ ಏಷ್ಯಾದ ತಾಣಗಳಿಗೆ ಸಂಕೇತ ನೀಡಿದ್ದವು.

ಈ ಪ್ರವೃತ್ತಿಯನ್ನು ಇನ್ನಷ್ಟು ಹಡಗುಗಳು ಅನುಸರಿಸುವ ನಿರೀಕ್ಷೆಯಿದೆ. ಒಂದು ಪ್ರಮುಖ ಉದಾಹರಣೆಯೆಂದರೆ ಪ್ರಸ್ತುತ ಅರೇಬಿಯನ್ ಸಮುದ್ರದಲ್ಲಿರುವ ದೊಡ್ಡ ಸೂಯೆಜ್‌ಮ್ಯಾಕ್ಸ್ ಟ್ಯಾಂಕರ್ ಇಂದ್ರಿ. ಇದು ಮೂಲತಃ ಸಿಂಗಾಪುರಕ್ಕೆ ಹೋಗುತ್ತಿತ್ತು, ಆದರೆ ಅದು ಈ ವಾರ ಅದು ಹಠಾತ್ತನೆ ತಿರುವು ಪಡೆದು ಸುಮಾರು 730,000 ಬ್ಯಾರೆಲ್ ರಷ್ಯಾದ ತೈಲವನ್ನು ಹೊತ್ತೊಯ್ದು ಭಾರತದ ಕಡೆಗೆ ತಿರುಗಿತು.

ಒಡುನೆ, ಮಟಾರಿ ಮತ್ತು ಇಂದ್ರಿಗಳನ್ನು ಕಳೆದ ವರ್ಷ ಯುಕೆ ಮತ್ತು ಯುರೋಪಿಯನ್ ಒಕ್ಕೂಟವು ನಿಷೇಧಿಸಿತ್ತು.

► ರಷ್ಯಾದ ಆಮದುಗಳ ಪ್ರಸ್ತುತ ಸ್ಥಿತಿ

ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಇತ್ತೀಚಿನ ಪ್ರಾಥಮಿಕ ದತ್ತಾಂಶದ ಕುರಿತು 'ದಿ ಹಿಂದೂ' ನಡೆಸಿದ ಹಿಂದಿನ ವಿಶ್ಲೇಷಣೆ ಪ್ರಕಾರ ಭಾರತವು 2026 ರ ಜನವರಿಯಲ್ಲಿ ರಷ್ಯಾದಿಂದ 1.98 ಬಿಲಿಯನ್ ಡಾಲರ್ ಮೌಲ್ಯದ ಕಚ್ಚಾ ತೈಲವನ್ನು ಆಮದು ಮಾಡಿಕೊಂಡಿದೆ ಎಂದು ತೋರಿಸುತ್ತದೆ. ಅಂದರೆ ಭಾರತ ಮತ್ತು ಅಮೆರಿಕ ಎರಡೂ ದೇಶಗಳ ನಡುವಿನ ಮಧ್ಯಂತರ ವ್ಯಾಪಾರ ಒಪ್ಪಂದದ ಬಗ್ಗೆ ಜಂಟಿ ಹೇಳಿಕೆಯನ್ನು ನೀಡುವ ಒಂದು ತಿಂಗಳ ಮೊದಲು. ಇದು 44 ತಿಂಗಳಲ್ಲಿ ಅತ್ಯಂತ ಕಡಿಮೆ ಆಗಿದೆ.

ಇದರ ಪರಿಣಾಮವಾಗಿ, ಭಾರತೀಯ ತೈಲ ಆಮದುಗಳಲ್ಲಿ ರಷ್ಯಾದ ಪಾಲು ಜನವರಿ 2026 ರಲ್ಲಿ 19.3% ಕ್ಕೆ ಇಳಿದಿದೆ. ಇದು ಡಿಸೆಂಬರ್ 2022 ರ ನಂತರದ ಅತ್ಯಂತ ಕಡಿಮೆ ಮಟ್ಟವಾಗಿದೆ. ಏತನ್ಮಧ್ಯೆ ರಷ್ಯಾದ ಪಾಲು ಎರಡು ತಿಂಗಳ ಹಿಂದೆ 27.5% ಮತ್ತು 2025 ಮೇ ತಿಂಗಳಲ್ಲಿ 33% ರಷ್ಟಿತ್ತು.

►ರಷ್ಯಾದ ತೈಲದ ಅವಶ್ಯಕತೆ

ಭಾರತದ ತೈಲ ಆಮದುಗಳಲ್ಲಿ ಶೇ.55 ಕ್ಕಿಂತ ಹೆಚ್ಚು ಹಾರ್ಮುಜ್ ಜಲಸಂಧಿಯ ಮೂಲಕ ಪಡೆಯುವುದರಿಂದ, ಯುದ್ಧ-ಸಂಬಂಧಿತ ಯಾವುದೇ ವಿಳಂಬವು ದೇಶದ ಮಾಸಿಕ 11.5 ಬಿಲಿಯನ್ ಡಾಲರ್ ತೈಲ ಬಿಲ್ ಅನ್ನು ಮತ್ತಷ್ಟು ದುಬಾರಿಯನ್ನಾಗಿ ಮಾಡುತ್ತದೆ. ಇದನ್ನು ತಡೆಯಲು, ಭಾರತವು ರಷ್ಯಾದ ತೈಲವನ್ನು ಕಡಿಮೆ ಖರೀದಿಸುವುದನ್ನು ನಿಲ್ಲಿಸಬೇಕಾಗುತ್ತೆ ಮತ್ತೆ ಹೆಚ್ಚಿನದನ್ನು ಖರೀದಿಸಲು ಪ್ರಾರಂಭಿಸಬೇಕಾಗುತ್ತದೆ. ಅಂದರೆ ಪ್ರಸ್ತುತ 19% ರಿಂದ 2024 ರಲ್ಲಿದ್ದ 43% ಮಟ್ಟಕ್ಕೆ ಇದನ್ನು ಏರಿಸಬೇಕಾಗುತ್ತದೆ ಎಂದು ಜೆಎಂ ಫೈನಾನ್ಷಿಯಲ್ ಸರ್ವೀಸಸ್ ಹೇಳಿದೆ.

ಜಾಗತಿಕ ತೈಲ ಬೆಲೆಗಳು ಪ್ರತಿ ಬ್ಯಾರೆಲ್‌ಗೆ 90 ಡಾಲರ್ ದಾಟಿದರೆ, ಅದು ಭಾರತದ ಇಡೀ ಆರ್ಥಿಕತೆಗೆ ಹಾನಿ ಮಾಡಬಹುದು. ಈ ತೀವ್ರ ಪರಿಸ್ಥಿತಿಯು ಭಾರತೀಯ ರೂಪಾಯಿ ಮೌಲ್ಯವು ಅಮೆರಿಕ ಡಾಲರ್‌ಗೆ ರೂ 95 ಆಗಿ ಇಳಿಯಲು ಮತ್ತು ದೇಶದ ಚಾಲ್ತಿ ಖಾತೆ ಕೊರತೆ ಹೆಚ್ಚಿಸಲು ಕಾರಣವಾಗಬಹುದು. ಸಂಕ್ಷಿಪ್ತವಾಗಿ ಹೇಳುವುದಾದರೆ ಹೆಚ್ಚು ದುಬಾರಿ ಜಾಗತಿಕ ತೈಲವಾದಷ್ಟೂ, ಭಾರತವು ರಷ್ಯಾದ ಇಂಧನವನ್ನು ಅವಲಂಬಿಸಲು ಒತ್ತಾಯಿಸಲ್ಪಡುತ್ತದೆ.

ಏಷ್ಯಾದ ಇತರ ಪ್ರಮುಖ ರಾಷ್ಟ್ರಗಳಿಗೆ ಹೋಲಿಸಿದರೆ ಭಾರತವು ವಿಶೇಷವಾಗಿ ಕಠಿಣ ಸ್ಥಿತಿಯಲ್ಲಿದೆ ಎಂದು ಮೂಡೀಸ್ ಹೇಳಿದೆ. ಏಕೆಂದರೆ ಭಾರತವು ತನ್ನ ಇಂಧನಕ್ಕಾಗಿ ಮಧ್ಯಪ್ರಾಚ್ಯವನ್ನು ಹೆಚ್ಚು ಅವಲಂಬಿಸಿದೆ ಮತ್ತು ಅದೇ ಸಮಯದಲ್ಲಿ ರಷ್ಯಾದಿಂದ ತೈಲ ಖರೀದಿಸುವುದನ್ನು ನಿಲ್ಲಿಸಲು ಅಮೆರಿಕದಿಂದ ರಾಜತಾಂತ್ರಿಕ ಒತ್ತಡವನ್ನು ಎದುರಿಸುತ್ತಿದೆ.

ಈ ಇಂಧನವನ್ನು ಆಮದು ಮಾಡಿಕೊಳ್ಳುವ ವೆಚ್ಚ ಹೆಚ್ಚಿದ್ದರೆ, ಅದು ಇಡೀ ಭಾರತೀಯ ಆರ್ಥಿಕತೆ ಮೇಲೆ ಪರಿಣಾಮ ಬೀರಬಹುದು. ನಿರ್ದಿಷ್ಟವಾಗಿ ಹೇಳುವುದಾದರೆ, ಇದು ಡಾಲರ್ ವಿರುದ್ಧ ರೂಪಾಯಿ ತನ್ನ ಮೌಲ್ಯವನ್ನು ಕಳೆದುಕೊಳ್ಳಲು ಕಾರಣವಾಗಬಹುದು ಮತ್ತು ದಿನನಿತ್ಯದ ಸರಕುಗಳಿಗೆ ಹೆಚ್ಚಿನ ಬೆಲೆಗಳಿಗೆ ಕಾರಣವಾಗಬಹುದು. ಈ ಪರಿಸ್ಥಿತಿಯು ಸರ್ಕಾರವು ತನ್ನ ಬಜೆಟ್ ಅನ್ನು ನಿರ್ವಹಿಸುವುದನ್ನು ಹೆಚ್ಚು ಕಷ್ಟಕರವಾಗಿಸುತ್ತದ ಎಂದು ಮೂಡೀಸ್ ಹೇಳಿದೆ.