ಸೆನ್ಸಾರ್ ಮಂಡಳಿ ಗಲಾಟೆಯಿಂದ ಝೀ5 ಒಟಿಟಿಯಿಂದ ವಾಪಸ್ ಪಡೆಯುವವರೆಗೆ; ದಿಲ್ಜಿತ್ ದೋಸಾಂಜ್ ನಟನೆಯ 'ಸತ್ಲುಜ್' ಚಿತ್ರ ವಿವಾದಕ್ಕೀಡಾಗಿದ್ದೇಕೆ?
ಹಲವು ವರ್ಷಗಳ ಸೆನ್ಸಾರ್ ಮಂಡಳಿಯ ಪ್ರಮಾಣಪತ್ರದ ತೊಂದರೆಗಳು, ಶೀರ್ಷಿಕೆ ಬದಲಾವಣೆಗಳು ಮತ್ತು ಬಿಡುಗಡೆ ವಿಳಂಬಗಳ ನಂತರ, ದಿಲ್ಜಿತ್ ದೋಸಾಂಜ್ ನಟನೆಯ, ಹನಿ ಟ್ರೆಹಾನ್ ನಿರ್ದೇಶನದ 'ಸತ್ಲುಜ್' ಸಿನಿಮಾವನ್ನು ಈಗ ಝೀ5 (ZEE5) ಒಟಿಟಿ ಸಂಸ್ಥೆಯು ತನ್ನ ವೇದಿಕೆಯಿಂದ ತೆಗೆದುಹಾಕಿದೆ. ಒಟಿಟಿಯಲ್ಲಿ ಬಿಡುಗಡೆಯಾದ ಕೇವಲ 48 ಗಂಟೆಗಳಲ್ಲೇ ಈ ಚಿತ್ರಕ್ಕೆ ಮತ್ತೊಂದು ದೊಡ್ಡ ಹಿನ್ನಡೆಯಾಗಿದೆ.
ಮಾನವ ಹಕ್ಕುಗಳ ಹೋರಾಟಗಾರ ಜಸ್ವಂತ್ ಸಿಂಗ್ ಖಾಲ್ರಾ ಅವರ ಜೀವನವನ್ನು ಆಧರಿಸಿದ ಈ ಸಿನಿಮಾವನ್ನು ಭಾರತದಲ್ಲಿ ಝೀ5ನಿಂದ ತೆಗೆದುಹಾಕಲಾಗಿದೆ. ಆದರೆ, ಝೀ5 ಗ್ಲೋಬಲ್ (ZEE5 Global) ಮೂಲಕ ವಿದೇಶಗಳಲ್ಲಿ ಇದು ಇನ್ನೂ ಲಭ್ಯವಿದೆ ಎಂದು ಒಟಿಟಿ ಸಂಸ್ಥೆಯು ರವಿವಾರ ತನ್ನ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದೆ.
ಭಾರತದಲ್ಲಿ 'ಸತ್ಲುಜ್' ಸಿನಿಮಾವನ್ನು ತೆಗೆದುಹಾಕಿರುವುದನ್ನು ಖಚಿತಪಡಿಸಿದ ಝೀ5
ಜುಲೈ 5ರಂದು ಝೀ5 ಸಂಸ್ಥೆಯು ಪ್ರಕಟನೆಯೊಂದನ್ನು ಹೊರಡಿಸಿ, "ಪ್ರಸ್ತುತ ಕೆಲವು ಬೆಳವಣಿಗೆಗಳ" ಕಾರಣದಿಂದಾಗಿ 'ಸತ್ಲುಜ್' ಸಿನಿಮಾ ಇನ್ನು ಮುಂದೆ ಭಾರತದಲ್ಲಿ ವೀಕ್ಷಣೆಗೆ ಲಭ್ಯವಿರುವುದಿಲ್ಲ ಎಂದು ಘೋಷಿಸಿದೆ.
ಇನ್ಸ್ಟಾಗ್ರಾಮ್ನಲ್ಲಿ ಈ ಪ್ರಕಟಣೆಯನ್ನು ಹಂಚಿಕೊಂಡಿರುವ ಝೀ5, "ಪ್ರಸ್ತುತ ಬೆಳವಣಿಗೆಗಳನ್ನು ಗಮನದಲ್ಲಿಟ್ಟುಕೊಂಡು, ಮುಂದಿನ ಆದೇಶದವರೆಗೆ 'ಸತ್ಲುಜ್' ಸಿನಿಮಾ ಭಾರತದಲ್ಲಿ ಲಭ್ಯವಿರುವುದಿಲ್ಲ. ಸೂಕ್ತ ಕಾನೂನು ಪ್ರಕ್ರಿಯೆಗಳ ಮೂಲಕ ಈ ಸಿನಿಮಾವನ್ನು ಆದಷ್ಟು ಬೇಗ ನಮ್ಮ ಪ್ರೇಕ್ಷಕರ ಮುಂದೆ ಮತ್ತೆ ತರಲು ನಾವು ಬದ್ಧರಾಗಿದ್ದೇವೆ" ಎಂದು ಬರೆದಿದೆ. ಪ್ರೇಕ್ಷಕರ ಬೆಂಬಲಕ್ಕೆ ಧನ್ಯವಾದ ತಿಳಿಸುತ್ತಾ, "ನಮ್ಮ ಒಟಿಟಿ ಚಂದಾದಾರರಾಗಿ, ಈ ಸಿನಿಮಾವನ್ನು ನೋಡಿ ಬೆಂಬಲಿಸಿದ ಪ್ರತಿಯೊಬ್ಬ ವೀಕ್ಷಕರಿಗೂ ನಾವು ಹೃತ್ಪೂರ್ವಕವಾಗಿ ಕೃತಜ್ಞರಾಗಿದ್ದೇವೆ" ಎಂದು ಹೇಳಿದೆ.
"ನಿಮ್ಮ ಪ್ರೀತಿ ಮತ್ತು ಬೆಂಬಲ ನಮಗೆ ಹಾಗೂ ಈ ಕಥೆಗೆ ಜೀವ ತುಂಬಿದ ಪ್ರತಿಯೊಬ್ಬರಿಗೂ ದೊಡ್ಡ ಸಂಗತಿ. ಝೀ5 ಸಂಸ್ಥೆಯು ಯಾವಾಗಲೂ 'ಸತ್ಲುಜ್' ಸಿನಿಮಾ ಮತ್ತು ಅದರ ಹಿಂದಿರುವ ಸೃಜನಶೀಲ ಯೋಚನೆಯ ಪರವಾಗಿ ಗಟ್ಟಿಯಾಗಿ ನಿಲ್ಲುತ್ತದೆ. ಪ್ರಭಾವಶಾಲಿ ಕಥೆ ಹೇಳುವಿಕೆಗೆ ಜನರನ್ನು ಪ್ರೇರೇಪಿಸುವ, ದೀರ್ಘಕಾಲ ಉಳಿಯುವ ಮತ್ತು ಆಳವಾದ ಪ್ರಭಾವ ಬೀರುವ ಶಕ್ತಿ ಇದೆ ಎಂದು ನಾವು ನಂಬುತ್ತೇವೆ" ಎಂದು ಸಂಸ್ಥೆ ಹೇಳಿದೆ.
ಸಿನಿಮಾವನ್ನು ಮತ್ತೆ ಆನ್ಲೈನ್ನಲ್ಲಿ ಬಿಡುಗಡೆ ಮಾಡಲು ಪ್ರಯತ್ನಿಸುತ್ತಿರುವುದಾಗಿ ಭರವಸೆ ನೀಡಿರುವ ಅವರು, "ಸೂಕ್ತ ಕಾನೂನು ಪ್ರಕ್ರಿಯೆಗಳ ಮೂಲಕ ಸಿನಿಮಾವನ್ನು ಎಷ್ಟು ಬೇಗ ಸಾಧ್ಯವೋ ಅಷ್ಟು ಬೇಗ ನಮ್ಮ ಪ್ರೇಕ್ಷಕರಿಗೆ ಮರಳಿ ತರಲು ನಾವು ಎಲ್ಲಾ ರೀತಿಯ ಪ್ರಯತ್ನಗಳನ್ನು ಮಾಡುತ್ತಿದ್ದೇವೆ" ಎಂದು ಹೇಳಿದ್ದಾರೆ.
'ಸತ್ಲುಜ್' ಸಿನಿಮಾ ಯಾವುದರ ಬಗ್ಗೆ ಇದೆ?
'ಸತ್ಲುಜ್' ಸಿನಿಮಾವು ಮಾನವ ಹಕ್ಕುಗಳ ಹೋರಾಟಗಾರ ಜಸ್ವಂತ್ ಸಿಂಗ್ ಖಾಲ್ರಾ ಅವರ ಜೀವನವನ್ನು ಆಧರಿಸಿದೆ. ಇವರು 1984 ಮತ್ತು 1994ರ ನಡುವೆ ಪಂಜಾಬ್ನಲ್ಲಿ ನಡೆದಿದೆ ಎನ್ನಲಾದ ಸಾವಿರಾರು ಗುರುತಿಸದ ಶವಗಳ ಅಕ್ರಮ ಅಂತ್ಯಸಂಸ್ಕಾರದ ಬಗ್ಗೆ ತನಿಖೆ ನಡೆಸಿದ್ದರು. ಈ ನಾಪತ್ತೆ ಪ್ರಕರಣಗಳ ಬಗ್ಗೆ ತನಿಖೆ ನಡೆಸಿ, ಇಡೀ ದೇಶದ ಗಮನ ಸೆಳೆದಿದ್ದ ಖಾಲ್ರಾ ಅವರ ಪಾತ್ರವನ್ನು ದಿಲ್ಜಿತ್ ದೋಸಾಂಜ್ ನಿರ್ವಹಿಸಿದ್ದಾರೆ. ಈ ತನಿಖೆಯ ನಂತರ, 1995ರಲ್ಲಿ ಖಾಲ್ರಾ ಅವರೂ ಸಹ ನಿಗೂಢವಾಗಿ ನಾಪತ್ತೆಯಾದರು. 2005ರಲ್ಲಿ, ಖಾಲ್ರಾ ಅವರ ಅಪಹರಣ ಮತ್ತು ಕೊಲೆ ಪ್ರಕರಣದಲ್ಲಿ ಪಂಜಾಬ್ ಪೊಲೀಸರ ನಾಲ್ವರು ಸಿಬ್ಬಂದಿ ತಪ್ಪಿತಸ್ಥರೆಂದು ಸಾಬೀತಾಗಿ, ಅವರಿಗೆ ಏಳು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಯಿತು.
ಎರಡು ವರ್ಷಗಳ ನಂತರ, ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್ ಈ ಶಿಕ್ಷೆಯನ್ನು ಜೀವಾವಧಿ ಜೈಲು ಶಿಕ್ಷೆಗೆ ಹೆಚ್ಚಿಸಿತು.
ಸಿಬಿಎಫ್ಸಿ ಜೊತೆಗಿನ ಸೆನ್ಸಾರ್ ಹೋರಾಟ ಮತ್ತು ಚಿತ್ರಮಂದಿರದ ಬಿಡುಗಡೆ ವಿಳಂಬ
ಈ ಸಿನಿಮಾದ ಒಟಿಟಿ ಬಿಡುಗಡೆಯು ಹಲವು ವರ್ಷಗಳ ವಿವಾದದ ನಂತರ ನಡೆದಿದೆ. ಆರಂಭದಲ್ಲಿ ಭಾರತದಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಬೇಕಿದ್ದ ಈ ಸಾಮಾಜಿಕ ಕಥಾಹಂದರದ ಚಿತ್ರಕ್ಕೆ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ ಅಡ್ಡಿಪಡಿಸಿತು. ವರದಿಗಳ ಪ್ರಕಾರ, ಚಿತ್ರಕ್ಕೆ ಸೆನ್ಸಾರ್ ಪ್ರಮಾಣಪತ್ರ ನೀಡುವ ಮುನ್ನ ಮಂಡಳಿಯು ಒಟ್ಟು 127 ದೃಶ್ಯಗಳಿಗೆ ಕತ್ತರಿ ಹಾಕಲು ಸೂಚಿಸಿತ್ತು. ಈ ವಿಳಂಬಗಳಿಂದಾಗಿ ಚಿತ್ರತಂಡವು ತನ್ನ ಬಿಡುಗಡೆಯ ಯೋಜನೆಗಳನ್ನು ಪದೇ ಪದೇ ಮುಂದೂಡಬೇಕಾಯಿತು. ಮೂಲತಃ 'ಪಂಜಾಬ್ '95' ಎಂಬ ಹೆಸರಿದ್ದ ಈ ಸಿನಿಮಾ 2025ರ ಫೆಬ್ರವರಿ 7ರಂದು ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಬೇಕಿತ್ತು. ಆದರೆ, ಇದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲೇ ಇಲ್ಲ.
'ಘಲ್ಲುಘಾರಾ'ದಿಂದ 'ಪಂಜಾಬ್ '95', ನಂತರ 'ಸತ್ಲುಜ್' ವರೆಗಿನ ಪ್ರಯಾಣ
ಜುಲೈ 3ರಂದು ಅಂತಿಮವಾಗಿ ಬಿಡುಗಡೆಯಾಗುವ ಮೊದಲು ಈ ಚಿತ್ರದ ಹೆಸರು ಹಲವು ಬಾರಿ ಬದಲಾಗಿದೆ. ಈ ಚಿತ್ರಕ್ಕೆ ಮೊದಲು 'ಘಲ್ಲುಘಾರಾ' ಎಂದು ಹೆಸರಿಡಲಾಗಿತ್ತು. ಇದು 1746, 1762 ಮತ್ತು 1984ರಲ್ಲಿ ನಡೆದ ಸಿಖ್ಖರ ಮಾರಣಹೋಮಕ್ಕೆ ಸಂಬಂಧಿಸಿದ ಒಂದು ಐತಿಹಾಸಿಕ ಪಂಜಾಬಿ ಪದವಾಗಿದೆ. ವರದಿಗಳ ಪ್ರಕಾರ, 2022ರ ಕೊನೆಯಲ್ಲಿ ಚಿತ್ರತಂಡವು ಸೆನ್ಸಾರ್ ಪ್ರಮಾಣಪತ್ರಕ್ಕಾಗಿ ಅರ್ಜಿ ಸಲ್ಲಿಸಿದಾಗ, ಸಿಬಿಎಫ್ಸಿ 21 ದೃಶ್ಯಗಳನ್ನು ಕತ್ತರಿಸಿ, ಚಿತ್ರದ ಹೆಸರನ್ನು 'ಪಂಜಾಬ್ 95' ಎಂದು ಬದಲಾಯಿಸುವಂತೆ ಸೂಚಿಸಿ ಅದನ್ನು ಪಾಸ್ ಮಾಡಿತ್ತು.
ನಿರ್ಮಾಪಕರು ಈ ಆದೇಶವನ್ನು ಬಾಂಬೆ ಹೈಕೋರ್ಟ್ನಲ್ಲಿ ಪ್ರಶ್ನಿಸಿದ್ದರು. ಇದೇ ಸಮಯದಲ್ಲಿ, 2023ರ ಟೊರೊಂಟೊ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ (TIFF) ಪ್ರದರ್ಶನಗೊಳ್ಳಬೇಕಿದ್ದ ಈ ಸಿನಿಮಾವನ್ನು ವಾಪಸ್ ಪಡೆಯಲಾಯಿತು. ಆ ಸಮಯದಲ್ಲಿ, "ರಾಜಕೀಯ ಕಾರಣಗಳು" ಈ ನಿರ್ಧಾರದ ಹಿಂದೆ ಪಾತ್ರವಹಿಸಿವೆ ಎಂದು 'ವೆರೈಟಿ' ಪತ್ರಿಕೆಗೆ ಮೂಲಗಳು ತಿಳಿಸಿದ್ದವು. ಅಂತಿಮವಾಗಿ, ಜುಲೈ 3ರಂದು ಈ ಸಿನಿಮಾ 'ಸತ್ಲುಜ್' ಎಂಬ ಹೊಸ ಹೆಸರಿನೊಂದಿಗೆ ಡಿಜಿಟಲ್ ಪರದೆಯ ಮೇಲೆ ಬಿಡುಗಡೆಯಾಯಿತು. ಈ ಇತ್ತೀಚಿನ ಬದಲಾವಣೆಯ ಬಗ್ಗೆ ವಿವರಿಸಿದ ನಿರ್ದೇಶಕ ಟ್ರೆಹಾನ್, "ನಮಗೆ ಚಿತ್ರದ ಹಳೆಯ ಶೀರ್ಷಿಕೆ ಸಿಗಲಿಲ್ಲ. ಹಾಗಾಗಿ ಈಗ ಇದರ ಹೆಸರು 'ಸತ್ಲುಜ್'" ಎಂದು 'ವೆರೈಟಿ' ಪತ್ರಿಕೆಗೆ ತಿಳಿಸಿದ್ದರು ಎಂದು 'ಟೈಮ್ಸ್ ಆಫ್ ಇಂಡಿಯಾ' ವರದಿ ಉಲ್ಲೇಖಿಸಿದೆ.
'ಸತ್ಲುಜ್' ಬಗ್ಗೆ ಹನಿ ಟ್ರೆಹಾನ್ ಮಾತು
ಚಿತ್ರದ ಬಿಡುಗಡೆಯ ಕುರಿತು ಮಾತನಾಡಿದ ನಿರ್ದೇಶಕ ಟ್ರೆಹಾನ್, "ಮೊದಲಿನಿಂದಲೂ ಈ ಕಥೆಯನ್ನು ಯಾವುದೇ ರಾಜಿ ಇಲ್ಲದೆ, ಪ್ರಾಮಾಣಿಕವಾಗಿ ಮತ್ತು ಸೂಕ್ಷ್ಮವಾಗಿ ಹೇಳುವುದು ನಮ್ಮ ಉದ್ದೇಶವಾಗಿತ್ತು. ಸುದೀರ್ಘ ಕಾಯುವಿಕೆಯ ನಂತರ, ಪ್ರೇಕ್ಷಕರು ಕೊನೆಗೂ ನಮ್ಮ ಪ್ರೀತಿ ಮತ್ತು ಕಠಿಣ ಪರಿಶ್ರಮದ ಫಲವನ್ನು ನೋಡಲಿದ್ದಾರೆ. 'ಸತ್ಲುಜ್' ಕೇವಲ ಒಬ್ಬ ವ್ಯಕ್ತಿಯ ಕಥೆಯಲ್ಲ. ಇದು ಕಷ್ಟದ ಸಂದರ್ಭಗಳಲ್ಲಿ ಮನುಷ್ಯನ ಅಪ್ರತಿಮ ಮನೋಬಲಕ್ಕೆ ಸಲ್ಲಿಸುವ ಗೌರವವಾಗಿದೆ. ಮಹಾನ್ ಹುತಾತ್ಮ ಜಸ್ವಂತ್ ಸಿಂಗ್ ಅವರ ಜೀವನದಿಂದ ಪ್ರೇರಿತವಾಗಿರುವ ಈ ಕಥೆಯ ಪ್ರಾಮುಖ್ಯತೆಯನ್ನು ಚಿತ್ರದೊಂದಿಗೆ ಕೆಲಸ ಮಾಡಿದ ಪ್ರತಿಯೊಬ್ಬರೂ ಗಟ್ಟಿಯಾಗಿ ನಂಬಿದ್ದರು" ಎಂದು ಹೇಳಿದ್ದಾರೆ.
"ಈ ಸಿನಿಮಾವನ್ನು ಪ್ರಾಮಾಣಿಕತೆಯಿಂದ, ಸೂಕ್ಷ್ಮತೆಯಿಂದ ಮತ್ತು ಯಾವುದೇ ರಾಜಿ ಇಲ್ಲದೆ ಮಾಡುವುದು ನನ್ನ ಆಶಯವಾಗಿತ್ತು. ದೀರ್ಘ ಕಾಯುವಿಕೆಯ ನಂತರ, ಪ್ರೇಕ್ಷಕರು ಕೊನೆಗೂ ನಮ್ಮ ಕಠಿಣ ಪರಿಶ್ರಮದ ಫಲವನ್ನು ನೋಡುತ್ತಿದ್ದಾರೆ. 'ಸತ್ಲುಜ್' ಕೇವಲ ಒಬ್ಬ ವ್ಯಕ್ತಿಯ ಕಥೆಯಲ್ಲ. ಇದು ಕಷ್ಟದ ಪರಿಸ್ಥಿತಿಗಳನ್ನು ಎದುರಿಸಿ ನಿಲ್ಲುವ ಮಾನವನ ಮನೋಸ್ಥೈರ್ಯಕ್ಕೆ ಸಲ್ಲಿಸುವ ಗೌರವವಾಗಿದೆ" ಎಂದು ಟ್ರೆಹಾನ್ ಹೇಳಿದ್ದಾರೆ.
'ಸತ್ಲುಜ್' ಸಿನಿಮಾವನ್ನು ಆಯ್ಕೆ ಮಾಡಿಕೊಂಡಿದ್ದಕ್ಕೆ ಕಾರಣ ತಿಳಿಸಿದ ದಿಲ್ಜಿತ್ ದೋಸಾಂಜ್
ಒಟಿಟಿ ಬಿಡುಗಡೆಗೂ ಮುನ್ನ ಮಾತನಾಡಿದ್ದ ದಿಲ್ಜಿತ್ ದೋಸಾಂಜ್, 'ಸತ್ಲುಜ್' ಚಿತ್ರವನ್ನು ತಮ್ಮ ವೃತ್ತಿಜೀವನದ ಅತ್ಯಂತ ಮಹತ್ವದ ಸಿನಿಮಾಗಳಲ್ಲಿ ಒಂದು ಎಂದು ಬಣ್ಣಿಸಿದ್ದರು.
ಅವರು, "ನಮ್ಮ 'ಸತ್ಲುಜ್' ಸಿನಿಮಾವು ದೃಢ ನಂಬಿಕೆ, ಧೈರ್ಯ ಮತ್ತು ಮಾನವೀಯತೆಯ ಕಥೆಯಾಗಿದೆ. ಈ ಪಾತ್ರವನ್ನು ನಿರ್ವಹಿಸಿದ್ದು ನನ್ನ ವೃತ್ತಿಜೀವನದ ಅತ್ಯಂತ ಅರ್ಥಪೂರ್ಣ ಅನುಭವಗಳಲ್ಲಿ ಒಂದಾಗಿದೆ. ವಿಶ್ವದಾದ್ಯಂತ ಇರುವ ಪ್ರೇಕ್ಷಕರು ಕೊನೆಗೂ ಈ ಸಿನಿಮಾವನ್ನು ಝೀ5ನಲ್ಲಿ ವೀಕ್ಷಿಸಲು ಮತ್ತು ಅತ್ಯಂತ ಆಪ್ತವಾದ ಹಾಗೂ ಪ್ರತಿಯೊಬ್ಬರೂ ನೋಡಲೇಬೇಕಾದ ಈ ಕಥೆಯೊಂದಿಗೆ ಸಂಪರ್ಕ ಸಾಧಿಸಲು ಸಾಧ್ಯವಾಗುತ್ತಿರುವುದಕ್ಕೆ ನಾನು ಕೃತಜ್ಞನಾಗಿದ್ದೇನೆ" ಎಂದು ಹೇಳಿದ್ದರು.
ಈ ಸಿನಿಮಾವನ್ನು ಒಪ್ಪಿಕೊಳ್ಳಲು ತಮಗೆ ಪ್ರೇರಣೆ ನೀಡಿದ ವಿಷಯದ ಬಗ್ಗೆ ಮಾತನಾಡಿದ ಅವರು, "ಭಾಯಿ ಜಸ್ವಂತ್ ಸಿಂಗ್ ಖಾಲ್ರಾ ಅವರ ಬಲಿದಾನ ಮತ್ತು ಮಾನವಕುಲಕ್ಕೆ ಅವರು ನೀಡಿದ ಕೊಡುಗೆಯೇ ನಾನು ಈ ಸಿನಿಮಾದ ಭಾಗವಾಗಲು ಮುಖ್ಯ ಕಾರಣ. ನಾನು ಮೊದಲ ಬಾರಿ ಈ ಕಥೆಯನ್ನು ಕೇಳಿದಾಗ ಅದು ನನ್ನ ಮನಸ್ಸನ್ನು ಆಳವಾಗಿ ಕಲಕಿತು, ಏಕೆಂದರೆ ಇದು ನಿಜವಾದ ಜನರ ಜೀವನದ ಅನುಭವಗಳು, ಹೋರಾಟಗಳು ಮತ್ತು ತ್ಯಾಗದ ಮೇಲೆ ಆಧಾರಿತವಾಗಿದೆ. ಒಬ್ಬ ಕಲಾವಿದನಾಗಿ ಇಂತಹ ಅರ್ಥಪೂರ್ಣ ಕಥೆಗಳ ಭಾಗವಾಗುವ ಅವಕಾಶಗಳು ಸಿಗುವುದು ತುಂಬಾ ಅಪರೂಪ" ಎಂದು ಹೇಳಿದ್ದರು.
ಸಿನಿಮಾವನ್ನು ಒಟಿಟಿಯಿಂದ ತೆಗೆದುಹಾಕಬಹುದು ಎಂದು ಮೊದಲೇ ಊಹಿಸಿದ್ದ ದಿಲ್ಜಿತ್
'ಸತ್ಲುಜ್' ಸಿನಿಮಾವನ್ನು ಒಟಿಟಿಯಿಂದ ತೆಗೆದುಹಾಕುವ ಮೊದಲೇ, ಈ ಸಿನಿಮಾ ಭಾರತದಲ್ಲಿ ಹೆಚ್ಚು ದಿನ ಲಭ್ಯವಿರುವುದಿಲ್ಲ ಎಂಬ ಸುಳಿವನ್ನು ದಿಲ್ಜಿತ್ ನೀಡಿದ್ದರು. ಇನ್ಸ್ಟಾಗ್ರಾಮ್ ಲೈವ್ ಸೆಷನ್ನಲ್ಲಿ ಮಾತನಾಡಿದ್ದ ನಟ, ಸಿನಿಮಾ ಒಟಿಟಿಯಲ್ಲಿ ಪ್ರಸಾರವಾಗುತ್ತಿರುವಾಗಲೇ ಅದನ್ನು ಡೌನ್ಲೋಡ್ ಮಾಡಿಕೊಳ್ಳುವಂತೆ ಅಭಿಮಾನಿಗಳಿಗೆ ಮನವಿ ಮಾಡಿದ್ದರು.
"ಇಂದು ಶನಿವಾರ. ಸೋಮವಾರದ ವೇಳೆಗೆ ಈ ಸಿನಿಮಾವನ್ನು ಒಟಿಟಿಯಿಂದ ತೆಗೆದುಹಾಕಬಹುದು ಎಂದು ನನಗೆ ಅನಿಸುತ್ತಿದೆ. ಆದರೆ ಯಾವುದೇ ಚಿಂತೆ ಬೇಡ, ನೀವು ಅದನ್ನು ಡೌನ್ಲೋಡ್ ಮಾಡಿಟ್ಟುಕೊಳ್ಳಿ" ಎಂದು ಅವರು ಹೇಳಿದ್ದರು.
ಡೌನ್ಲೋಡ್ ಮಾಡಿದ ಸಿನಿಮಾವನ್ನು ಸ್ನೇಹಿತರಿಗೂ ತೋರಿಸಿ ಎಂದು ಅಭಿಮಾನಿಗಳಿಗೆ ಕರೆ ನೀಡಿದ ದಿಲ್ಜಿತ್ ದೋಸಾಂಜ್
ಸೋಮವಾರ ಬೆಳಗ್ಗೆ ನಟ ತಮ್ಮ ಸಾಮಾಜಿಕ ಜಾಲತಾಣದ ಮೂಲಕ, ಡೌನ್ಲೋಡ್ ಮಾಡಲಾದ ಸಿನಿಮಾದ ಪ್ರತಿಗಳನ್ನು ಇತರರೊಂದಿಗೆ ಹಂಚಿಕೊಳ್ಳುವಂತೆ ಮತ್ತು ಅದನ್ನು ಇನ್ನೂ ಹಲವರಿಗೆ ತೋರಿಸುವಂತೆ ಅಭಿಮಾನಿಗಳಿಗೆ ಕರೆ ನೀಡಿದ್ದಾರೆ. "ಸತ್ಲುಜ್ ಸಿನಿಮಾವನ್ನು ವೀಕ್ಷಿಸಿದ್ದಕ್ಕಾಗಿ ಜನರಿಗೆ ಧನ್ಯವಾದ ಹೇಳಲು ನಾನು ಇನ್ಸ್ಟಾಗ್ರಾಮ್ ಲೈವ್ಗೆ ಬಂದಿದ್ದೆ" ಎಂದು ಮಾತು ಆರಂಭಿಸಿದ ಅವರು, "ನಾನು ಯಾವುದಕ್ಕೆ ಹೆದರಿದ್ದೆನೋ ಅದೇ ಈಗ ನಡೆದಿದೆ. ಸೋಮವಾರದ ವೇಳೆಗೆ ಸಿನಿಮಾ ವಾಪಸ್ ಪಡೆಯಬಹುದು ಎಂದು ನಾನು ಅಂದುಕೊಂಡಿದ್ದೆ, ಆದರೆ ಅದು ಅಂದುಕೊಂಡಿದ್ದಕ್ಕಿಂತ ಬೇಗನೆ ನಡೆದಿದೆ.
ಅದಕ್ಕಾಗಿಯೇ ನಾವು ಈ ಸಿನಿಮಾದ ಪ್ರಚಾರ ಮಾಡಿರಲಿಲ್ಲ. ಯಾವುದೇ ಪ್ರಚಾರವಿಲ್ಲದೆ ಸಿನಿಮಾವನ್ನು (ಆನ್ಲೈನ್ನಲ್ಲಿ) ಬಿಡುಗಡೆ ಮಾಡುವುದೇ ಸೂಕ್ತವಾಗಿತ್ತು. ಇಂದು ಯುವ ಪೀಳಿಗೆ ಜಸ್ವಂತ್ ಸಿಂಗ್ ಖಾಲ್ರಾ ಅವರ ಬಗ್ಗೆ ಮಾತನಾಡುತ್ತಿದೆ. ಪ್ರತಿಯೊಂದು ಮನೆಯಲ್ಲೂ ಜಸ್ವಂತ್ ಸಿಂಗ್ ಖಾಲ್ರಾ ಅವರ ಬಗ್ಗೆ ಚರ್ಚೆಯಾಗುತ್ತಿದೆ" ಎಂದಿದ್ದಾರೆ.
ಇನ್ಸ್ಟಾಗ್ರಾಮ್ ಲೈವ್ ಚಾಟ್ನಲ್ಲಿ ಪಂಜಾಬಿ ಭಾಷೆಯಲ್ಲಿ ಮಾತನಾಡಿದ ದಿಲ್ಜಿತ್, "ನೀವು ನನಗೆ ಎಷ್ಟು ತೊಂದರೆ ಕೊಡಬೇಕೋ ಅಷ್ಟು ಕೊಡಿ. ನಾನು ಸಾಯುವವರೆಗೂ ಪಂಜಾಬ್ ಪರವಾಗಿಯೇ ಇರುತ್ತೇನೆ" ಎಂದು ಹೇಳಿದ್ದಾರೆ.
"ಆದರೆ ಸಿನಿಮಾ ಕೊನೆಗೂ ಪ್ರೇಕ್ಷಕರನ್ನು ತಲುಪಿದೆ ಎನ್ನುವ ಸಂತೋಷ ಮತ್ತು ನೆಮ್ಮದಿ ನನಗಿದೆ. ಈಗಾಗಲೇ ಹಲವರು ಇದನ್ನು ಡೌನ್ಲೋಡ್ ಮಾಡಿಕೊಂಡಿದ್ದಾರೆ. ಒಮ್ಮೆ ಯಾವುದೇ ವಿಷಯ ಆನ್ಲೈನ್ಗೆ ಬಂದರೆ, ಅದು ಎಂದಿಗೂ ಡಿಲೀಟ್ ಆಗುವುದಿಲ್ಲ. ರಾಜಸ್ಥಾನದ ವೀಡಿಯೊ ಒಂದನ್ನು ನಾನು ನೋಡಿದೆ, ಅಲ್ಲಿ ಜನರು ಈ ಸಿನಿಮಾವನ್ನು ಒಟ್ಟಿಗೆ ಕುಳಿತು ವೀಕ್ಷಿಸುತ್ತಿದ್ದಾರೆ. ಇದನ್ನು ನೋಡಿ ನನಗೆ ತುಂಬಾ ಸಂತೋಷವಾಯಿತು. ದಯವಿಟ್ಟು ಈ ಸಿನಿಮಾವನ್ನು ನಿಮ್ಮ ಸ್ನೇಹಿತರಿಗೆ ಮತ್ತು ನಿಮ್ಮ ಸುತ್ತಮುತ್ತಲಿನ ಎಲ್ಲರಿಗೂ ತೋರಿಸಿ" ಎಂದು ಅವರು ವಿನಂತಿಸಿದ್ದಾರೆ.
