ನಕ್ಷತ್ರಗಳ ನೆರಳಲ್ಲಿ ನಿದ್ರಿಸಿ; ಭಾರತದಲ್ಲಿ ಕ್ಯಾಂಪಿಂಗ್‌ ಗೆ ಸೂಕ್ತ 10 ತಾಣಗಳಿವು!

ನಕ್ಷತ್ರಗಳಿಂದ ತುಂಬಿದ ಆಗಸ, ಬೆಳಿಗ್ಗೆ ಎದ್ದಾಗ ಕಣ್ಣೆದುರು ಪರ್ವತಗಳು, ದಟ್ಟ ಅರಣ್ಯಗಳು ಅಥವಾ ಮೈಲುಗಟ್ಟಲೆ ಹರಡಿರುವ ಮರುಭೂಮಿಯ ದೃಶ್ಯಗಳನ್ನು ಕಲ್ಪಿಸಿಕೊಳ್ಳಿ. ಅದಕ್ಕಾಗಿ ನಿಮಗೆ ನೀಡಿದ್ದೇವೆ 10 ಆಯ್ಕೆಗಳು!

ಕ್ಯಾಂಪಿಂಗ್ ಪ್ರವಾಸಿಗರಿಗೆ ತಾಣದಾಚೆಗಿನ ಅನುಭವ ನೀಡುತ್ತದೆ. ಭಾರತದಲ್ಲಿ ಅಂತಹ ಸ್ಮರಣೀಯ ರಾತ್ರಿ ಕಳೆಯಲು ಸೂಕ್ತವಾಗಿರುವ ವೈವಿಧ್ಯಮಯ ಭೂಪ್ರದೇಶಗಳಿಗೆ ಕೊರತೆಯಿಲ್ಲ. ನಕ್ಷತ್ರಗಳಿಂದ ತುಂಬಿದ ಆಗಸ, ಬೆಳಿಗ್ಗೆ ಎದ್ದಾಗ ಕಣ್ಣೆದುರು ಪರ್ವತಗಳು, ದಟ್ಟ ಅರಣ್ಯಗಳು ಅಥವಾ ಮೈಲುಗಟ್ಟಲೆ ಹರಡಿರುವ ಮರುಭೂಮಿಯ ದೃಶ್ಯಗಳನ್ನು ಕಲ್ಪಿಸಿಕೊಳ್ಳಿ. ಅಂತಹ ಅದ್ಭುತ ಅನುಭವಕ್ಕಾಗಿ ಇಲ್ಲಿವೆ 10 ಆಯ್ಕೆಗಳು.

1. ಕೊಡಗು, ಕರ್ನಾಟಕ

ಕಾಫಿ ತೋಟಗಳು ಮತ್ತು ಹಸಿರಿನಿಂದ ಕೂಡಿದ ಬೆಟ್ಟಗಳಿಗೆ ಹೆಸರುವಾಸಿಯಾಗಿರುವ ಕೊಡಗು ವಿಭಿನ್ನವಾದ ಕ್ಯಾಂಪಿಂಗ್ ಅನುಭವ ನೀಡುತ್ತದೆ. ಪ್ರದೇಶದ ಹಸಿರು, ಆಹ್ಲಾದಕರ ಹವಾಮಾನ ಮತ್ತು ಅರಣ್ಯ ಪರಿಸರವು ಪ್ರಕೃತಿಯ ಮಡಿಲಲ್ಲಿ ಸಮಯ ಕಳೆಯಲು ಬಯಸುವ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ಇಲ್ಲಿ ನೀವು ಕ್ಯಾಂಪಿಂಗ್ ಜೊತೆಗೆ ಕಾಫಿ ತೋಟಗಳಿಗೆ ಭೇಟಿ ನೀಡುವುದು, ಸಣ್ಣ ನಡಿಗೆ ಮತ್ತು ಜಲಪಾತಗಳಿಗೆ ಭೇಟಿ ನೀಡುವುದು ಮೊದಲಾದ ಆಕರ್ಷಣೆಗಳನ್ನು ಆನಂದಿಸಬಹುದು.

2. ವಯನಾಡ್, ಕೇರಳ

ಅರಣ್ಯ ಮತ್ತು ಹಸಿರಿನ ನಡುವೆ ಕ್ಯಾಂಪ್ ಮಾಡಲು ಬಯಸುವವರಿಗೆ ವಯನಾಡ್ ಉತ್ತಮ ಆಯ್ಕೆ. ಬೆಟ್ಟಗಳು, ತೋಟಗಳು, ಜಲಪಾತಗಳು ಮತ್ತು ವನ್ಯಜೀವಿಗಳಿಗೆ ಹೆಸರುವಾಸಿಯಾಗಿದೆ. ಚಾರಣ, ಪ್ರಕೃತಿಯ ನಡಿಗೆ ಮತ್ತು ಪ್ರದೇಶದ ಸುಂದರ ತಾಣಗಳನ್ನು ಅನ್ವೇಷಿಸಬಹುದು.

3. ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು

ಪರ್ವತಗಳು ಮತ್ತು ಮರುಭೂಮಿಗಳ ಹೊರತಾಗಿ ಏನಾದರೂ ಬಯಸುವವರಿಗೆ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು ಸಮುದ್ರದ ಸಮೀಪ ಕ್ಯಾಂಪಿಂಗ್ ಮಾಡುವ ಅವಕಾಶ ನೀಡುತ್ತವೆ. ಸ್ಥಳ ಮತ್ತು ಸ್ಥಳೀಯ ನಿಯಮಗಳಿಗೆ ಅನುಗುಣವಾಗಿ ಪ್ರವಾಸಿಗರು ಕಡಲತೀರಗಳು, ಉಷ್ಣವಲಯದ ಹಸಿರು ಮತ್ತು ಅನುಮತಿಸಲಾದ ಸ್ಥಳಗಳಲ್ಲಿ ಕ್ಯಾಂಪಿಂಗ್ ಮಾಡಬಹುದು. ಕಡಲತೀರ, ಬೆಚ್ಚಗಿನ ಹವಾಮಾನ ಮತ್ತು ಹೊರಾಂಗಣ ವಾಸ್ತವ್ಯದ ಸಂಯೋಜನೆಯು ಈ ದ್ವೀಪಗಳನ್ನು ವಿಭಿನ್ನ ರೀತಿಯ ಕ್ಯಾಂಪಿಂಗ್ ರಜೆಗಾಗಿ ಆಕರ್ಷಕ ಆಯ್ಕೆಯನ್ನಾಗಿಸುತ್ತದೆ.

4. ಸೋನಮಾರ್ಗ್‌, ಜಮ್ಮು ಮತ್ತು ಕಾಶ್ಮೀರ

ಹಿಮದಿಂದ ಆವೃತವಾದ ಪರ್ವತಗಳು, ಹುಲ್ಲುಗಾವಲು ಮತ್ತು ತೊರೆಗಳಿಂದ ಸುತ್ತುವರಿದ ಸೋನಮಾರ್ಗ್‌ ಹಿಮಾಲಯದ ಸಾಂಪ್ರದಾಯಿಕ ಕ್ಯಾಂಪಿಂಗ್ ವಾತಾವರಣ ಒದಗಿಸುತ್ತದೆ. ಬೇಸಿಗೆಯಲ್ಲಿ ಈ ಪ್ರದೇಶ ಹಸಿರಿನಿಂದ ಕಂಗೊಳಿಸುತ್ತದೆ. ಈ ಅವಧಿಯಲ್ಲಿ ಹೊರಾಂಗಣ ಚಟುವಟಿಕೆಗಳಿಗೆ ಅನುಕೂಲಕರ ವಾತಾವರಣ ದೊರೆಯುತ್ತದೆ. ವಿಭಿನ್ನ ಪರ್ವತಗಳು ಮತ್ತು ಪ್ರಕೃತಿಯ ಸನಿಹದಲ್ಲಿ ಕ್ಯಾಂಪ್ ಮಾಡಬಯಸುವವರಿಗೆ ಇದು ಉತ್ತಮ ಸ್ಥಳ.

5. ಪುಷ್ಕರ್, ರಾಜಸ್ಥಾನ

ಗ್ರಾಮೀಣ ಪರಿಸರ ಮತ್ತು ಸಾಂಸ್ಕೃತಿಕ ಅನುಭವಗಳ ಸಮ್ಮಿಶ್ರಣವನ್ನು ನೀಡುತ್ತದೆ. ವಾರ್ಷಿಕ ‘ಪುಷ್ಕರ್ ಒಂಟೆ ಜಾತ್ರೆ’ಯ ಸಮಯದಲ್ಲಿ ಇಲ್ಲಿನ ಕ್ಯಾಂಪಿಂಗ್ ವಿಶೇಷವಾಗಿ ಆಸಕ್ತಿದಾಯಕವಾಗಿರುತ್ತದೆ. ಪಟ್ಟಣ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಪ್ರವಾಸಿಗರು, ವ್ಯಾಪಾರಿಗಳು, ಒಂಟೆಗಳು ಮತ್ತು ಸಾಂಪ್ರದಾಯಿಕ ಪ್ರದರ್ಶನಗಳನ್ನು ಕಾಣಬಹುದು. ಪುಷ್ಕರ್‌ ನಲ್ಲಿ ಕ್ಯಾಂಪಿಂಗ್ ಜೊತೆಗೆ ರಾಜಸ್ಥಾನದ ಸಂಸ್ಕೃತಿ ಮತ್ತು ಸಂಪ್ರದಾಯ ಅನುಭವಿಸುವ ಅವಕಾಶವೂ ದೊರೆಯುತ್ತದೆ.

6. ಜೈಸಲ್ಮೇರ್, ರಾಜಸ್ಥಾನ

ಪರ್ವತ ಪ್ರದೇಶಗಳಿಗಿಂತ ಸಂಪೂರ್ಣ ಭಿನ್ನವಾದ ಕ್ಯಾಂಪಿಂಗ್ ಅನುಭವಕ್ಕಾಗಿ ಥಾರ್ ಮರುಭೂಮಿಗೆ ಭೇಟಿ ಕೊಡಲೇಬೇಕು. ಜೈಸಲ್ಮೇರ್ ತನ್ನ ಮರುಭೂಮಿ ಕ್ಯಾಂಪ್‌ಗಳಿಗೆ, ವಿಶೇಷವಾಗಿ ಮರಳಿನ ದಿಬ್ಬಗಳಿಗೆ ಹೆಸರುವಾಸಿಯಾಗಿದೆ. ಪ್ರವಾಸಿಗರು ಟೆಂಟ್‌ನಲ್ಲಿ ಉಳಿದುಕೊಂಡು ಸಾಂಪ್ರದಾಯಿಕ ರಾಜಸ್ಥಾನಿ ಸಂಗೀತ ಮತ್ತು ಆಹಾರವನ್ನು ಆನಂದಿಸಬಹುದು. ಸೂರ್ಯಾಸ್ತದ ಸಮಯದಲ್ಲಿ ಮರುಭೂಮಿಯ ಬಣ್ಣ ಬದಲಾಗುವುದನ್ನು ವೀಕ್ಷಿಸಬಹುದು.

7. ರಿಷಿಕೇಶ, ಉತ್ತರಾಖಂಡ

ಕ್ಯಾಂಪಿಂಗ್ ಜೊತೆಗೆ ಸಾಹಸ ಚಟುವಟಿಕೆ ಬಯಸುವವರಿಗೆ ರಿಷಿಕೇಶ ಜನಪ್ರಿಯ ಆಯ್ಕೆ. ಗಂಗಾ ನದಿಯ ದಡದಲ್ಲಿರುವ ಅನುಮತಿಸಲಾದ ಕ್ಯಾಂಪ್‌ ಗಳಲ್ಲಿ ನದಿಯ ಸಮೀಪ ರಾತ್ರಿ ಕಳೆಯಲು ಮತ್ತು ರಾಫ್ಟಿಂಗ್ ಹಾಗೂ ಟ್ರೆಕ್ಕಿಂಗ್‌ನಂತಹ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಲು ಅವಕಾಶವಿದೆ. ಸುತ್ತಮುತ್ತಲಿನ ಬೆಟ್ಟಗಳು ಮತ್ತು ಅರಣ್ಯ ಪ್ರದೇಶಗಳು ಇದನ್ನು ಅಲ್ಪಾವಧಿಯ ಕ್ಯಾಂಪಿಂಗ್ ಪ್ರವಾಸಕ್ಕೆ ಸೂಕ್ತ ಸ್ಥಳವನ್ನಾಗಿ ಮಾಡಿವೆ.

8. ಸ್ಪಿಟಿ ವ್ಯಾಲಿ, ಹಿಮಾಚಲ ಪ್ರದೇಶ

ವಿಭಿನ್ನವಾದ ಕ್ಯಾಂಪಿಂಗ್ ಅನುಭವ ಬಯಸುವ ಪ್ರಯಾಣಿಕರಿಗೆ ಸ್ಪಿಟಿ ಕಣಿವೆ ಸೂಕ್ತ. ಬಂಜರು ಪರ್ವತಗಳು, ಎತ್ತರ ಪ್ರದೇಶದಲ್ಲಿರುವ ಹಳ್ಳಿಗಳು ಮತ್ತು ಅದ್ಭುತ ಭೂದೃಶ್ಯಗಳಿಂದ ಸುತ್ತುವರಿದಿರುವ ಈ ಕಣಿವೆಯು ಹಿಮಾಚಲ ಪ್ರದೇಶದ ಹಸಿರಿನಿಂದ ಕೂಡಿದ ಇತರ ಗಿರಿಧಾಮಗಳಿಗೆ ತದ್ವಿರುದ್ಧವಾದ ಅನುಭವ ನೀಡುತ್ತದೆ.

9. ತೀರ್ಥನ್ ಕಣಿವೆ, ಹಿಮಾಚಲ ಪ್ರದೇಶ

ಹಸಿರು ಮತ್ತು ಶಾಂತಿಯುತ ಪರಿಸರ ಬಯಸುವುದಾದರೆ ತೀರ್ಥನ್ ಕಣಿವೆ ಉತ್ತಮ ಆಯ್ಕೆ. ಕಾಡುಗಳು, ಪರ್ವತದ ತೊರೆಗಳು ಮತ್ತು ಶಾಂತ ವಾತಾವರಣಕ್ಕೆ ಹೆಸರುವಾಸಿಯಾಗಿದೆ. ನಿಧಾನಗತಿಯ ಜೀವನಶೈಲಿ, ಹೊರಾಂಗಣದಲ್ಲಿ ಸಮಯ ಕಳೆಯಲು ಮತ್ತು ಜನಸಂದಣಿ ಇಲ್ಲದ ಹಿಮಾಲಯದ ಭೂಪರಿಸರವನ್ನು ಅನ್ವೇಷಿಸಲು ಅವಕಾಶ ನೀಡುತ್ತದೆ.

10. ರಣ್ ಆಫ್ ಕಚ್, ಗುಜರಾತ್

ರಣ್ ಆಫ್ ಕಚ್‌ನ ವಿಶಾಲವಾದ ಬಿಳಿ ಭೂಪ್ರದೇಶವು ಭಾರತದ ಅತ್ಯಂತ ವಿಶಿಷ್ಟವಾದ ಕ್ಯಾಂಪಿಂಗ್ ತಾಣಗಳಲ್ಲಿ ಒಂದಾಗಿಸಿದೆ. ತಂಪಾದ ತಿಂಗಳುಗಳಲ್ಲಿ ‘ರಣ್ ಉತ್ಸವ್‌’ ಸಮಯದಲ್ಲಿ ಪ್ರವಾಸಿಗರು ಟೆಂಟ್ ಮತ್ತು ವಸತಿಗಳಲ್ಲಿ ಉಳಿದುಕೊಂಡು ಉಪ್ಪಿನ ಮರುಭೂಮಿಯನ್ನು ಅನ್ವೇಷಿಸಬಹುದು. ಸೂರ್ಯಾಸ್ತ, ಹುಣ್ಣಿಮೆಯ ದೃಶ್ಯಗಳು ಮತ್ತು ಅಂತ್ಯವಿಲ್ಲದಂತೆ ತೋರುವ ಬಿಳಿ ಭೂಪ್ರದೇಶ ಕ್ಯಾಂಪಿಂಗ್ ಅನ್ನು ಸಾಮಾನ್ಯ ಬೆಟ್ಟ ಮತ್ತು ಅರಣ್ಯ ಪ್ರವಾಸಗಳಿಗಿಂತ ಭಿನ್ನವಾಗಿಸುತ್ತದೆ.

ಕೃಪೆ: Indian Express