IITಗಳಲ್ಲಿ ಆದ್ಯತೆ ಬದಲಾಗುತ್ತಿದೆಯೆ? ಪ್ರಾಮುಖ್ಯತೆ ಪಡೆದುಕೊಳ್ಳುತ್ತಿದೆ ಸಿವಿಲ್ ಇಂಜಿನಿಯರಿಂಗ್!
Photo credit : indiatoday - AI generated image
ಕಂಪ್ಯೂಟರ್ ಸೈನ್ಸ್ ಗೆ ಆದ್ಯತೆ ದೊರೆತ ನಂತರ, ಒಂದು ಕಾಲದಲ್ಲಿ ಬಹಳ ಗೌರವಾನ್ವಿತವಾದ ಇಂಜಿನಿಯರಿಂಗ್ ಶಾಖೆಯಾಗಿದ್ದ ಸಿವಿಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳ ಆದ್ಯತೆಯ ಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕೆ ಇಳಿದಿತ್ತು. ಏಕೆಂದರೆ ಭಾರತದ ಭವಿಷ್ಯ ಕೋಡಿಂಗ್ ನಲ್ಲಿದೆ ಎಂದು ಎಲ್ಲರೂ ಅಂದುಕೊಂಡಿದ್ದರು!
ದಶಕಗಳಿಂದ ಭಾರತದ ಶಿಕ್ಷಣ ವ್ಯವಸ್ಥೆಯಲ್ಲಿ ಒಂದು ವಿಷಯವಂತೂ ಬದಲಾಗದೆ ಉಳಿದಿತ್ತು. JEEಯಲ್ಲಿ ಅತಿ ಹೆಚ್ಚು ರ್ಯಾಂಕ್ ಪಡೆದವರು ಕಂಪ್ಯೂಟರ್ ಸೈನ್ಸ್ ಹಿಂದೆ ಬೀಳುತ್ತಿದ್ದರು. IIT ಬಾಂಬೆ ಮತ್ತು IIT ದಿಲ್ಲಿಯಂತಹ ಸಂಸ್ಥೆಗಳಲ್ಲಿ CSE ಬಹಳ ಗೌರವಾನ್ವಿತ ಸೀಟುಗಳಾಗಿದ್ದವು. ಸ್ಟಾರ್ಟ್ಅಪ್ ಯಶೋಗಾಥೆಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹೆಚ್ಚು ಸುದ್ದಿಯಾಗಿದ್ದವು. ಕೋಟಿಗಟ್ಟಲೆ ವೇತನದ ಪ್ಲೇಸ್ ಮೆಂಟ್ ಪ್ಯಾಕೇಜ್ ಗಳು ರಾಷ್ಟ್ರೀಯ ಸುದ್ದಿಗಳಾಗುತ್ತಿದ್ದವು. ಹೀಗಾಗಿ ಕಂಪ್ಯೂಟರ್ ಸೈನ್ಸ್ ಗೆ ಮೊದಲ ಸ್ಥಾನ. ನಂತರ ಎಲೆಕ್ಟ್ರಿಕಲ್, ಮೆಕಾನಿಕಲ್ ಮತ್ತು ಕೊನೆಗೆ ಸಿವಿಲ್ ಇಂಜಿನಿಯರಿಂಗ್ ಇತ್ತು.
ಒಂದು ಕಾಲದಲ್ಲಿ ಬಹಳ ಗೌರವಾನ್ವಿತವಾದ ಇಂಜಿನಿಯರಿಂಗ್ ಶಾಖೆಯಾಗಿದ್ದ ಸಿವಿಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳ ಆದ್ಯತೆಯ ಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕೆ ಇಳಿದಿತ್ತು. ಏಕೆಂದರೆ ಭಾರತದ ಭವಿಷ್ಯ ಕೋಡಿಂಗ್ ನಲ್ಲಿದೆ ಎಂದು ಎಲ್ಲರೂ ಅಂದುಕೊಂಡಿದ್ದರು.
AI ಯುಗದಲ್ಲಿ ಭವಿಷ್ಯದ ವೃತ್ತಿಜೀವನದ ಪ್ರಶ್ನೆ
ಆದರೆ ಇದೀಗ IIT ಸೀಟುಗಳ ಆಯ್ಕೆಯ ಪ್ರಶ್ನೆ ಬಂದಾಗ ಮತ್ತೊಂದು ಹೊಸ ಚರ್ಚೆ ಶುರುವಾಗಿದೆ. AI ಯುಗದಲ್ಲಿ ಭವಿಷ್ಯದ ಇಂಜಿನಿಯರಿಂಗ್ ವೃತ್ತಿಜೀವನ ಹೇಗಿರುತ್ತದೆ ಎನ್ನುವ ಪ್ರಶ್ನೆ ಎದ್ದಿದೆ. ಕೃತಕ ಬುದ್ಧಿಮತ್ತೆ (AI) ಸಾಫ್ಟ್ ವೇರ್ ಉದ್ಯಮದ ಆರಂಭಿಕ ಕೋಡಿಂಗ್ ಉದ್ಯೋಗಗಳನ್ನು ಕಿತ್ತೆಸೆಯುತ್ತಿರುವಾಗ, ಭಾರತದಲ್ಲಿ ಮತ್ತೊಂದು ಹೊಸ ಕ್ಷೇತ್ರದತ್ತ ಆಕರ್ಷಣೆ ಆರಂಭವಾಗಿದೆ.
ಭಾರತವು ಏಕಕಾಲದಲ್ಲಿ ದಶಕಗಳಲ್ಲೇ ಅತಿದೊಡ್ಡ ಮೂಲಸೌಕರ್ಯ ಯೋಜನೆಗಳನ್ನು ಆರಂಭಿಸುತ್ತಿದೆ. ಹೊಸ ಎಕ್ಸ್ ಪ್ರೆಸ್ ವೇಗಳು, ಮೆಟ್ರೋ ನೆಟ್ ವರ್ಕ್ ಗಳು, ಹೈಸ್ಪೀಡ್ ರೈಲ್ವೆ ಕಾರಿಡಾರ್ ಗಳು ನಿರ್ಮಾಣವಾಗುತ್ತಿವೆ. ಈ ಸಂದರ್ಭದಲ್ಲಿ ದೇಶದ ಕಲಿಕಾ ಆದ್ಯತೆಯೂ ಬದಲಾಗುತ್ತಿದೆ. ಸಿವಿಲ್ ಇಂಜಿನಿಯರಿಂಗ್ ಮತ್ತೊಮ್ಮೆ ಭಾರತದ ಕೆಲವು ಪ್ರತಿಭಾವಂತ JEE ಆಕಾಂಕ್ಷಿಗಳ ಗಮನ ಸೆಳೆಯುತ್ತಿದೆ.
ಕಂಪ್ಯೂಟರ್ ಸೈನ್ಸ್ IIT ವಲಯದಲ್ಲಿ ನಿರ್ವಿವಾದದ ರಾಜನಾಗಿ ಉಳಿದಿರುವುದು ನಿಜ. ಆದರೆ ವರ್ಷಗಳಲ್ಲಿ ಮೊದಲ ಬಾರಿಗೆ ಇಂಜಿನಿಯರಿಂಗ್ ವೃತ್ತಿಜೀವನದ ಕುರಿತಾದ ಸಂಭಾಷಣೆ ಬದಲಾಗುತ್ತಿದೆ. 2026ರ ಪ್ರವೇಶ ಸೀಸನ್ ನ ಅತ್ಯಂತ ಕುತೂಹಲಕಾರಿ ಕತೆಗಳಲ್ಲಿ ಇದೂ ಒಂದಾಗಬಹುದು.
IIT ಪ್ರವೇಶದಲ್ಲಿ ಅಚ್ಚರಿಯ ಟ್ರೆಂಡ್ ಬದಲಾವಣೆ
ಮೊದಲ ಸುತ್ತಿನ ಐಐಟಿ ಪ್ರವೇಶವು ಅಚ್ಚರಿಯ ಟ್ರೆಂಡ್ ಅನ್ನು ಗುರುತಿಸಿದೆ. ಐಐಟಿ ಬಾಂಬೆಯಲ್ಲಿ ಸಿವಿಲ್ ಇಂಜಿನಿಯರಿಂಗ್ 385ರೊಳಗಿನ ಆರಂಭಿಕ ಶ್ರೇಯಾಂಕ ಹೊಂದಿರುವ ವಿದ್ಯಾರ್ಥಿಗಳನ್ನು ಆಕರ್ಷಿಸಿದೆ. ಒಂದು ವರ್ಷದ ಹಿಂದೆ ಸಿವಿಲ್ ಇಂಜಿನಿಯರಿಂಗ್ಗೆ 2,666ರ ಮೇಲಿನ ಶ್ರೇಯಾಂಕ ಪಡೆದವರು ಮಾತ್ರ ಅರ್ಜಿ ಸಲ್ಲಿಸುತ್ತಿದ್ದರು. IIT ದಿಲ್ಲಿಯಲ್ಲಿ ಇನ್ನಷ್ಟು ಬದಲಾವಣೆ ಕಂಡಿದೆ. ಈ ಮೊದಲು 3,030ರ ಮೇಲಿನ ಶ್ರೇಯಾಂಕ ಪಡೆದವರು ಅರ್ಜಿ ಸಲ್ಲಿಸುತ್ತಿದ್ದರೆ, ಈ ಬಾರಿ ಅದು 179ಕ್ಕೆ ಏರಿದೆ. IIT ರೂರ್ಕಿ ಮತ್ತು IIT ಭುವನೇಶ್ವರದಲ್ಲೂ ಇದೇ ರೀತಿಯ ಟ್ರೆಂಡ್ ಕಂಡುಬಂದಿದೆ. ಹೀಗಾಗಿ ಈ ಬಾರಿಯ ಪ್ರವೇಶ ಚಕ್ರದಲ್ಲಿ ಅಸಹಜವಾದ ಬದಲಾವಣೆ ಬಂದಿರುವುದು ಖಾತ್ರಿಯಾಗಿದೆ.
ಈ ಸಂಖ್ಯೆಗಳು ಕಂಪ್ಯೂಟರ್ ಇಂಜಿನಿಯರಿಂಗ್ ನಿಂದ ಸಿವಿಲ್ ಇಂಜಿನಿಯರಿಂಗ್ ನತ್ತ ಸಾಮೂಹಿಕ ವರ್ಗಾವಣೆಯನ್ನು ಸೂಚಿಸುವುದಿಲ್ಲ. ಆದರೆ ಹೆಚ್ಚಿನ ಸಾಧನೆ ಮಾಡಿದ ವಿದ್ಯಾರ್ಥಿಗಳ ಆದ್ಯತೆ ಬದಲಾಗುತ್ತಿರುವುದು ಕಂಡುಬರುತ್ತಿದೆ. ಶೈಕ್ಷಣಿಕವಾಗಿ ಹೆಚ್ಚು ಪ್ರತಿಭಾವಂತ ವಿದ್ಯಾರ್ಥಿಗಳ ಆದ್ಯತೆ ಸಾಮಾನ್ಯವಾಗಿ ದೀರ್ಘಾವಧಿಯ ವೃತ್ತಿಜೀವನದ ಲೆಕ್ಕಾಚಾರವನ್ನು ಸೂಚಿಸುತ್ತದೆ.
"JoSAA 2026 (Joint Seat Allocation Authority 2026) ರ ಮೊದಲ ಸುತ್ತಿನ ದತ್ತಾಂಶದ ಪ್ರಕಾರ, IIT ಬಾಂಬೆಯಲ್ಲಿ AIR (ಅಖಿಲ ಭಾರತ ಶ್ರೇಯಾಂಕ) 65ರ ಆಸುಪಾಸಿನಲ್ಲಿ CSE ಮುಕ್ತಾಯಗೊಂಡಿದೆ. ಆದರೆ ಸಿವಿಲ್ 4,300ಕ್ಕೂ ಹೆಚ್ಚು ಶ್ರೇಯಾಂಕದಲ್ಲಿ ಮುಕ್ತಾಯಗೊಂಡಿದೆ. ಇದನ್ನು ಗಮನಿಸಿದರೆ ಈಗಲೂ ಟಾಪ್ 100 ಶ್ರೇಯಾಂಕಿತರ ಆಯ್ಕೆ ಕಂಪ್ಯೂಟರ್ ಸೈನ್ಸ್ ಎನ್ನುವುದು ಖಚಿತವಾಗುತ್ತದೆ" ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಸಿಲಿಕಾನ್ ನಿಂದ ಸಿಮೆಂಟ್ ಗೆ ಬದಲಾವಣೆ?
ಹಾಗೆ ನೋಡಿದರೆ, ಸಿಲಿಕಾನ್ ನಿಂದ ಸಿಮೆಂಟ್ ಗೆ ಸಾಮೂಹಿಕ ವಲಸೆಯಾಗಿಲ್ಲ ಮತ್ತು ಕಂಪ್ಯೂಟರ್ ಸೈನ್ಸ್ ತನ್ನ ಕಿರೀಟ ಕಳೆದುಕೊಂಡಿಲ್ಲ. ಆದರೆ ವಿದ್ಯಾರ್ಥಿಗಳು ಭವಿಷ್ಯದ ಬಗ್ಗೆ ಕಠಿಣ ಪ್ರಶ್ನೆಗಳನ್ನು ಕೇಳಲು ಪ್ರಾರಂಭಿಸುತ್ತಿರುವುದು ಖಚಿತವಾಗಿದೆ.
ತಂತ್ರಜ್ಞಾನ ವೃತ್ತಿಜೀವನಗಳು ಬದಲಾಗುತ್ತಿರುವ ಸಂದರ್ಭದಲ್ಲಿ ಭಾರತದ ಮೂಲಸೌಕರ್ಯ ಕ್ಷೇತ್ರ ನಿರ್ಣಾಯಕ ಹಂತವನ್ನು ಪ್ರವೇಶಿಸುತ್ತಿದೆ. ದೇಶದಲ್ಲಿ ಹೆದ್ದಾರಿಗಳು, ಮೆಟ್ರೋ ರೈಲು ವ್ಯವಸ್ಥೆಗಳು, ಲಾಜಿಸ್ಟಿಕ್ಸ್ ಕಾರಿಡಾರ್ ಗಳು, ವಿಮಾನ ನಿಲ್ದಾಣಗಳು, ನವೀಕರಿಸಬಹುದಾದ ಇಂಧನ ಯೋಜನೆಗಳು, ಕೈಗಾರಿಕಾ ಕೇಂದ್ರಗಳು ಮತ್ತು ನಗರಾಭಿವೃದ್ಧಿ ಕಾರ್ಯಕ್ರಮಗಳಲ್ಲಿ ಭಾರೀ ಹೂಡಿಕೆ ಮಾಡಲಾಗುತ್ತಿದೆ. ದಿಲ್ಲಿ–ಮುಂಬೈ ಎಕ್ಸ್ ಪ್ರೆಸ್ ವೇ ಯಿಂದ ಹಿಡಿದು ಹೊಸ ಮೆಟ್ರೋ ನೆಟ್ವರ್ಕ್ ಗಳು ಮತ್ತು ಹಸಿರು ಇಂಧನ ಕಾರಿಡಾರ್ ಗಳವರೆಗೆ ನಿರ್ಮಾಣದ ಪ್ರಮಾಣ ಅಭೂತಪೂರ್ವವಾಗಿರುವಾಗ, ಸಿವಿಲ್ ಇಂಜಿನಿಯರ್ ಗಳಿಗೆ ಅದ್ಭುತ ಅವಕಾಶಗಳು ಸೃಷ್ಟಿಯಾಗುತ್ತಿವೆ.
ಈ ನಡುವೆ AI ಪ್ರವೇಶಮಟ್ಟದ ತಂತ್ರಜ್ಞಾನ ಪಾತ್ರಗಳನ್ನು ಮರುರೂಪಿಸುತ್ತಿದೆ. ಇಂದಿನ ಸಿವಿಲ್ ಇಂಜಿನಿಯರ್ ಗಳು ಕಾಂಕ್ರೀಟ್ ಮತ್ತು ಉಕ್ಕಿನಷ್ಟೇ ಅಲ್ಲದೆ, ಡೇಟಾ ವಿಶ್ಲೇಷಣೆ, ಡಿಜಿಟಲ್ ಟ್ವಿನ್ಸ್, ಜಿಯೋಗ್ರಾಫಿಕ್ ಇನ್ಫಾರ್ಮೇಶನ್ ಸಿಸ್ಟಮ್ಸ್ (GIS), ಸುಸ್ಥಿರತೆಯ ಮಾದರಿಗಳು ಮತ್ತು AI ಚಾಲಿತ ಯೋಜನಾ ಸಾಧನಗಳೊಂದಿಗೆ ಕೆಲಸ ಮಾಡುವ ಸಾಧ್ಯತೆಯಿದೆ. ಈ ವಿಭಾಗಗಳಲ್ಲಿ ಇಂಜಿನಿಯರಿಂಗ್, ತಂತ್ರಜ್ಞಾನ ಮತ್ತು ಪರಿಸರ ವಿಜ್ಞಾನದ ಸಮ್ಮಿಳನವಾಗುತ್ತಿದೆ.
ಡೇಟಾದ ಜೊತೆಗಿನ ಸಿವಿಲ್ ಇಂಜಿನಿಯರಿಂಗ್
IIT ಬಾಂಬೆಯಲ್ಲಿ ಸಿವಿಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳು ವಿಶೇಷವಾಗಿ ಸೆಂಟರ್ ಫಾರ್ ಸ್ಟಡೀಸ್ ಇನ್ ರಿಸೋರ್ಸಸ್ ಇಂಜಿನಿಯರಿಂಗ್ (CSRE) ಮೂಲಕ Machine Learning for Remote Sensing ನಂತಹ ಕೋರ್ಸ್ಗಳನ್ನು ತೆಗೆದುಕೊಳ್ಳಬಹುದು. ಇದು ಮೂಲಸೌಕರ್ಯ, ಜಿಯೋಸ್ಪೇಷಿಯಲ್ ತಂತ್ರಜ್ಞಾನ ಮತ್ತು ಕೃತಕ ಬುದ್ಧಿಮತ್ತೆಯ ಸಂಯೋಜಿತ ಲೋಕಕ್ಕೆ ಅವರನ್ನು ಕರೆದೊಯ್ಯುತ್ತದೆ.
IIT ಹೈದರಾಬಾದ್ನಲ್ಲಿ ವಿದ್ಯಾರ್ಥಿಗಳು ಸಿವಿಲ್ ಇಂಜಿನಿಯರಿಂಗ್ ಗೆ ಸಂಬಂಧಿಸಿದ ರಿಮೋಟ್ ಸೆನ್ಸಿಂಗ್ ಮತ್ತು GIS ಅಪ್ಲಿಕೇಶನ್ ಗಳಂತಹ ವಿಷಯಗಳನ್ನು ಅಧ್ಯಯನ ಮಾಡುತ್ತಾರೆ. ಸಿವಿಲ್ ಇಂಜಿನಿಯರಿಂಗ್ ಇನ್ನು ಮುಂದೆ ಕಾಂಕ್ರೀಟ್, ಉಕ್ಕು ಮತ್ತು ನಿರ್ಮಾಣ ತಾಣಗಳಿಗೆ ಸೀಮಿತವಾಗಿಲ್ಲ. 21ನೇ ಶತಮಾನದ ಕೆಲವು ಸಂಕೀರ್ಣ ಮೂಲಸೌಕರ್ಯ ಸವಾಲುಗಳನ್ನು ಪರಿಹರಿಸಲು ಡೇಟಾ ಸೈನ್ಸ್, AI, ಜಿಯೋಸ್ಪೇಷಿಯಲ್ ಅನಾಲಿಟಿಕ್ಸ್, ಸುಸ್ಥಿರತೆ ಮತ್ತು ನಗರ ಯೋಜನೆಗಳನ್ನು ಸಂಯೋಜಿಸುತ್ತದೆ.
