ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಟಿವಿ ಬಿಡುಗಡೆ ಮತ್ತು ಮಾಧ್ಯಮ ಬಹಿಷ್ಕಾರ: ಏನಿದು ವೈಟ್‌ಹೌಸ್ ಪ್ರೆಸ್ ಪೂಲ್?

ವೈಟ್‌ಹೌಸ್ ಸೋಮವಾರ (ಸೆಪ್ಟೆಂಬರ್ 21) ‘ಟ್ರಂಪ್ ಟಿವಿ’ (Trump TV) ಎಂಬ 24 ಗಂಟೆಗಳ ಸ್ಟ್ರೀಮಿಂಗ್ ಪ್ಲಾಟ್‌ಫಾರ್ಮ್ ಅನ್ನು ಆರಂಭಿಸಿದ್ದು, ಇದು ಅಧ್ಯಕ್ಷರ ಅಧಿಕೃತ ಕಾರ್ಯಕ್ರಮಗಳಿಗೆ ಪ್ರತ್ಯೇಕ ವೇದಿಕೆಯನ್ನು ಒದಗಿಸಲಿದೆ. “ಇದು ಲೈವ್ ಆಗಿದೆ. ಟ್ರಂಪ್ ಟಿವಿ ಈಗ ಪ್ರಸಾರವಾಗುತ್ತಿದೆ. 24x7, ನೈಜ ಸಮಯದಲ್ಲಿ ಅಪ್ಡೇಟ್ ನೀಡುತ್ತದೆ, ಪ್ರಮುಖ ಕ್ಷಣಗಳು, ಪ್ರಕಟಣೆಗಳು ಮತ್ತು ಆಡಳಿತದ ಇತ್ತೀಚಿನ ಮಹತ್ವದ ಸಂಗತಿಗಳು ಒಂದೇ ಸ್ಥಳದಲ್ಲಿ ಲಭ್ಯವಿವೆ. ಪ್ರತಿಯೊಂದು ದೊಡ್ಡ ಕ್ಷಣವೂ ನಿಮ್ಮ ಟಿವಿಗೆ ಬಂದಿಲ್ಲದಿರಬಹುದು, ಈಗ ಬರಬಹುದು” ಎಂದು ಎಕ್ಸ್ ಪೋಸ್ಟ್‌ನಲ್ಲಿ ವೈಟ್‌ಹೌಸ್ ಘೋಷಣೆ ಮಾಡಿದೆ.

ವೈಟ್‌ಹೌಸ್ ಪ್ರೆಸ್ ಪ್ರವೇಶದ ವಿಚಾರವಾಗಿ ಅಮೆರಿಕದ ಅಧ್ಯಕ್ಷ ಹಾಗೂ ಪ್ರಮುಖ ಸುದ್ದಿ ಸಂಸ್ಥೆಗಳ ನಡುವೆ ನಡೆಯುತ್ತಿರುವ ಸಂಘರ್ಷದ ಹಿನ್ನೆಲೆಯಲ್ಲಿ ಟ್ರಂಪ್ ಟಿವಿ ಬಿಡುಗಡೆಗೊಂಡಿದೆ. ಸಿಎನ್‌ಎನ್ (CNN), ಎಂಎಸ್ ನೌ (MS NOW) ಮತ್ತು ಪೊಲಿಟಿಕೋ ಸಂಸ್ಥೆಗಳು ವೈಟ್‌ಹೌಸ್‌ಗೆ ಪ್ರವೇಶ ನಿರಾಕರಿಸಿರುವುದನ್ನು ವಿರೋಧಿಸಿ ಟ್ರಂಪ್ ಆಡಳಿತದ ವಿರುದ್ಧ ಮೊಕದ್ದಮೆ ಹೂಡಿರುವುದರಿಂದ, ಈ ಕಾನೂನು ಸಮರ ನ್ಯಾಯಾಲಯದ ಮೆಟ್ಟಿಲೇರಿದೆ. ಇದು ತಮ್ಮ ಮೊದಲ ತಿದ್ದುಪಡಿ ಹಕ್ಕುಗಳ ಉಲ್ಲಂಘನೆಯಾಗಿದೆ ಎಂದು ಅವು ವಾದಿಸಿವೆ.

ಟ್ರಂಪ್ ಹಾಗೂ ಮಾಧ್ಯಮಗಳ ನಡುವಿನ ಈ ಸಮರವು ವೈಟ್‌ಹೌಸ್ ಪ್ರೆಸ್ ಪೂಲ್ ಮತ್ತು ದೈನಂದಿನ ಅಮೆರಿಕನ್ ರಾಜಕೀಯದಲ್ಲಿ ಅದರ ಪಾತ್ರದತ್ತ ಎಲ್ಲರ ಗಮನ ಸೆಳೆದಿದೆ.

ವೈಟ್‌ಹೌಸ್ ಪ್ರೆಸ್ ಪೂಲ್ ಎಂದರೇನು?

ವೈಟ್‌ಹೌಸ್ ಪ್ರೆಸ್ ಪೂಲ್ ಎಂದರೆ ಅಮೆರಿಕದ ಅಧ್ಯಕ್ಷರೊಂದಿಗೆ ಪ್ರಯಾಣಿಸುವ ಮತ್ತು ಅವರ ಚಟುವಟಿಕೆಗಳನ್ನು ವರದಿ ಮಾಡುವ ವರದಿಗಾರರು, ಪ್ರಸಾರ ಪತ್ರಕರ್ತರು ಹಾಗೂ ಛಾಯಾಗ್ರಾಹಕರ ಅಧಿಕೃತ ಗುಂಪು. ಇದು ಸುದ್ದಿ ಸಂಸ್ಥೆಗಳಿಗೆ ಮತ್ತು ಜನಸಾಮಾನ್ಯರಿಗೆ ಅಮೆರಿಕದ ಅಧ್ಯಕ್ಷರ ಪ್ರತಿ ಚಟುವಟಿಕೆಯ ನಿರಂತರ ಮಾಹಿತಿಯನ್ನು ಒದಗಿಸುತ್ತದೆ.

ಅಧ್ಯಕ್ಷ ಡ್ವೈಟ್ ಡಿ. ಐಸೆನ್‌ಹೋವರ್ ಅವರ ಆಡಳಿತಾವಧಿಯಲ್ಲಿ ವೈಟ್‌ಹೌಸ್ ಪ್ರೆಸ್ ಪೂಲ್ ರಚನೆಯಾಯಿತು. ಓವಲ್ ಆಫೀಸ್ ಅಥವಾ ಏರ್ ಫೋರ್ಸ್ ಒನ್ ವಿಮಾನದಲ್ಲಿ ಕೆಲವೇ ಕೆಲವು ಪತ್ರಕರ್ತರಿಗೆ ಮಾತ್ರ ಸ್ಥಳಾವಕಾಶವಿರುವುದರಿಂದ, ಅಧ್ಯಕ್ಷರೊಂದಿಗೆ ಪ್ರಯಾಣಿಸುವಾಗ ಅಥವಾ ವೈಟ್‌ಹೌಸ್‌ನಲ್ಲಿ ಅವರೊಂದಿಗೆ ಇರಬೇಕಾದವರು ಯಾರು ಎಂಬ ಸರಳ ಆದರೆ ಪ್ರಮುಖ ಸಮಸ್ಯೆಯನ್ನು ಬಗೆಹರಿಸಲು ಇದನ್ನು ಸೃಷ್ಟಿಸಲಾಯಿತು.

ಫ್ರೀಡಮ್ ಆಫ್ ದಿ ಪ್ರೆಸ್ ಫೌಂಡೇಶನ್‌ನ ಮುಖ್ಯಸ್ಥ ಸೆತ್ ಸ್ಟರ್ನ್ ಅವರ ಪ್ರಕಾರ, ವೈಟ್‌ಹೌಸ್‌ನ ಒಳಗೆ ಸಾರ್ವಜನಿಕರ ಕಣ್ಣು ಮತ್ತು ಕಿವಿಯಾಗಿ ಈ ಪ್ರೆಸ್ ಪೂಲ್ ಕಾರ್ಯನಿರ್ವಹಿಸುತ್ತದೆ.

ವೈಟ್‌ಹೌಸ್ ಪ್ರೆಸ್ ಪೂಲ್ ಎಲ್ಲಾ ಮಾಧ್ಯಮ ಪ್ರಕಾರಗಳನ್ನು ಒಳಗೊಂಡಿದೆ. ಪ್ರಸ್ತುತ ಇದರಲ್ಲಿ ಮೂವರು ವಾರ್ತಾ ಸಂಸ್ಥೆಗಳ ವರದಿಗಾರರು, ಇಬ್ಬರು ಮುದ್ರಣ ಅಥವಾ ಆನ್‌ಲೈನ್ ವರದಿಗಾರರು, ಒಬ್ಬ ರೇಡಿಯೋ ವರದಿಗಾರ, ನಾಲ್ವರು ಛಾಯಾಗ್ರಾಹಕರು ಮತ್ತು ಓರ್ವ ನಿರ್ಮಾಪಕ, ಆಡಿಯೋ ತಂತ್ರಜ್ಞ ಹಾಗೂ ಕ್ಯಾಮೆರಾ ಆಪರೇಟರ್ ಒಳಗೊಂಡಿರುವ ಟಿವಿ ತಂಡವಿದೆ. ಪ್ರೆಸ್ ಪೂಲ್ ಇತಿಹಾಸದ ಬಹುಪಾಲು ಅವಧಿಯಲ್ಲಿ, ನಿರ್ದಿಷ್ಟ ದಿನದಂದು ಅಧ್ಯಕ್ಷರನ್ನು ಯಾವ ಮಾಧ್ಯಮಗಳು ವರದಿ ಮಾಡಬೇಕು ಎಂಬುದನ್ನು ವೈಟ್‌ಹೌಸ್ ಕರೆಸ್ಪಾಂಡೆಂಟ್ಸ್ ಅಸೋಸಿಯೇಷನ್ ನಿಯಂತ್ರಿಸುತ್ತಾ ಬಂದಿದೆ.

ಆರಂಭವಾದಾಗಿನಿಂದಲೂ, ಅಮೆರಿಕದ ಇತಿಹಾಸದ ಪ್ರಮುಖ ಘಟನೆಗಳಲ್ಲಿ ವೈಟ್‌ಹೌಸ್ ಪ್ರೆಸ್ ಪೂಲ್ ಉಪಸ್ಥಿತಿಯಿದೆ. 1963 ನವೆಂಬರ್ 23ರಂದು ಡಲ್ಲಾಸ್‌ ನಲ್ಲಿ ಜಾನ್ ಎಫ್. ಕೆನಡಿ ಹತ್ಯೆಗೀಡಾದಾಗಲೂ ಈ ತಂಡ ಅಲ್ಲಿತ್ತು. ಅಂದು ನಡೆದ ಘಟನೆಗಳ ಪ್ರತ್ಯಕ್ಷದರ್ಶಿ ವರದಿಗಳನ್ನು ನೀಡಿದ್ದು ಇದೇ ಪ್ರೆಸ್ ಪೂಲ್.

ಅಧ್ಯಕ್ಷ ರೊನಾಲ್ಡ್ ರೇಗನ್ ಅವರಿಗೆ ಗುಂಡೇಟು ತಗುಲಿದಾಗಲೂ ವೈಟ್‌ಹೌಸ್ ಪ್ರೆಸ್ ಪೂಲ್ ಅಲ್ಲೇ ಇತ್ತು. ಟರ್ಕಿಯಲ್ಲಿ ನಡೆದ NATO ಸಭೆಯ ಬಳಿಕ ಡೊನಾಲ್ಡ್ ಟ್ರಂಪ್ ರಹಸ್ಯವಾಗಿ ವಿಮಾನ ಬದಲಾಯಿಸಿದಾಗಲೂ ಈ ಪತ್ರಿಕಾ ತಂಡ ಉಪಸ್ಥಿತಿಯಿತ್ತು.

ವೈಟ್‌ಹೌಸ್ ಪ್ರೆಸ್ ಪೂಲ್ ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತದೆ. ಈ ಪೂಲ್‌ನಲ್ಲಿರುವ ಪತ್ರಕರ್ತರು ಅಧ್ಯಕ್ಷರ ಪ್ರತಿಯೊಂದು ನಡೆ ಹಾಗೂ ಕ್ರಮವನ್ನು ವರದಿ ಮಾಡಬೇಕಾಗುತ್ತದೆ. ಅಂದರೆ ಅಮೆರಿಕದ ಅಧ್ಯಕ್ಷರು ಹೇಳುವ ಅಥವಾ ಮಾಡುವ ಪ್ರತಿಯೊಂದು ವಿಷಯದ ಬಗ್ಗೆಯೂ ಅವರು ವಿವರವಾದ ಟಿಪ್ಪಣಿಗಳನ್ನು ದಾಖಲಿಸಿಕೊಳ್ಳಬೇಕು.

ಟ್ರಂಪ್ ಮತ್ತು ಪ್ರೆಸ್ ಪೂಲ್ ನಡುವಿನ ಈ ತಿಕ್ಕಾಟಕ್ಕೆ ಕಾರಣವೇನು?

ಇದೆಲ್ಲವೂ ಆರಂಭವಾಗಿದ್ದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಶುಕ್ರವಾರ (ಸೆಪ್ಟೆಂಬರ್ 18) ತಮ್ಮ ‘ಟ್ರೂತ್ ಸೋಶಿಯಲ್’ ಖಾತೆಯಲ್ಲಿ ಮಾಡಿದ ಪೋಸ್ಟ್‌ ನಿಂದ. ಸಿಎನ್‌ಎನ್, ಎಂಎಸ್ ನೌ ಮತ್ತು ಪೊಲಿಟಿಕೋ ಸಂಸ್ಥೆಗಳನ್ನು ವೈಟ್‌ಹೌಸ್‌ಗೆ ಪ್ರವೇಶಿಸದಂತೆ ನಿಷೇಧಿಸಿರುವುದಾಗಿ ಟ್ರಂಪ್ ಘೋಷಿಸಿದ್ದಾರೆ.

ಈ ನಿಷೇಧವು “ಅವರು ನಿರಂತರವಾಗಿ ‘ಸುಳ್ಳು ಸುದ್ದಿ’ ವರದಿ ಮಾಡುತ್ತಿರುವುದರ ಪರಿಣಾಮವಾಗಿದೆ” ಎಂದು ಟ್ರಂಪ್ ಹೇಳಿದ್ದು, “ಇತರ ಸುಳ್ಳು ಸುದ್ದಿ ಮಾಧ್ಯಮಗಳಿಗೂ” ಇದೇ ಗತಿ ಬರಲಿದೆ ಎಂದು ಎಚ್ಚರಿಕೆ ನೀಡಿದರು. ಶನಿವಾರದ ವೇಳೆಗೆ ಆ ಮೂರು ಸಂಸ್ಥೆಗಳ ವರದಿಗಾರರಿಗೆ ವೈಟ್‌ಹೌಸ್ ಪ್ರವೇಶವನ್ನು ನಿರಾಕರಿಸಲಾಯಿತು.

“ಅಧಿಕಾರಿ ನನ್ನ ಬ್ಯಾಡ್ಜ್ ಅನ್ನು ಹಿಂತಿರುಗಿಸುವಂತೆ ಕೇಳಿದರು. ಅದನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಅವರು ಹೇಳಿದರು. ಒಳಗೆ ಹೋಗಲು ನನಗೆ ಯಾಕೆ ಅವಕಾಶವಿಲ್ಲ ಎಂದು ನಾನು ಕೇಳಿದೆ. ಅದಕ್ಕೆ ಅವರು, ಇದು ನನ್ನ ಅಧಿಕಾರ ಮೀರಿರುವ ವಿಷಯ ಎಂದರು” ಎಂದು ಎಂಎಸ್ ನೌ ವರದಿಗಾರ್ತಿ ಅಕೈಲಾ ಗಾರ್ಡ್ನರ್ ಅವರು ಶನಿವಾರ ವೈಟ್‌ಹೌಸ್‌ನಲ್ಲಿ ತಮಗೆ ಎದುರಾದ ಅನುಭವವನ್ನು ವಿವರಿಸಿದ್ದಾರೆ. ಸಿಎನ್‌ಎನ್ ಮತ್ತು ಪೊಲಿಟಿಕೋ ವರದಿಗಾರರೂ ಸಹ ಇಂತಹದೇ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.

ಟ್ರಂಪ್ ಹೇರಿರುವ ನಿಷೇಧಕ್ಕೆ ಪತ್ರಕರ್ತರು ಯಾವ ರೀತಿ ಪ್ರತಿಕ್ರಿಯಿಸಿದ್ದಾರೆ?

ಈ ಮೂರು ಸುದ್ದಿ ಸಂಸ್ಥೆಗಳು ಟ್ರಂಪ್ ನಿಷೇಧವನ್ನು ಎದುರಿಸಿದ ಬಳಿಕ, ಇತರ ಪ್ರಮುಖ ಟೆಲಿವಿಷನ್ ನೆಟ್‌ವರ್ಕ್‌ಗಳು ತಮ್ಮ ಒಗ್ಗಟ್ಟನ್ನು ಪ್ರದರ್ಶಿಸಿ, ವೈಟ್‌ಹೌಸ್ ಪೂಲ್ ತಂಡದ ಬದಲಿಗೆ ಬೇರೆವರನ್ನು ಕಳುಹಿಸಲು ನಿರಾಕರಿಸಿದವು.

ಎಬಿಸಿ (ABC), ಸಿಬಿಎಸ್ (CBS), ಸಿಎನ್‌ಎನ್ (CNN), ಫಾಕ್ಸ್ ನ್ಯೂಸ್ (Fox News) ಮತ್ತು ಎನ್‌ಬಿಸಿ (NBC) ಅಪರೂಪದ ಜಂಟಿ ಹೇಳಿಕೆಯಲ್ಲಿ “ತಮ್ಮ ಸರ್ಕಾರದ ಬಗ್ಗೆ ನಿಖರವಾದ ಮತ್ತು ಸ್ವತಂತ್ರ ಮಾಹಿತಿಯನ್ನು ಪಡೆಯುವಲ್ಲಿ ಸಾರ್ವಜನಿಕರಿಗೆ ಪ್ರಮುಖ ಆಸಕ್ತಿಯಿದೆ. ಯಾವುದೇ ಆಡಳಿತವು ವರದಿಯನ್ನು ವಿರೋಧಿಸುತ್ತದೆ ಎಂಬ ಕಾರಣಕ್ಕಾಗಿ ಸುದ್ದಿ ಸಂಸ್ಥೆಯೊಂದರ ಮೇಲೆ ನಿರ್ಬಂಧ ವಿಧಿಸಬಾರದು” ಎಂದು ಹೇಳಿವೆ.

ಇತರರೂ ಕೂಡ ಇದೇ ರೀತಿ ದನಿಯೆತ್ತಿದ್ದಾರೆ. ಅಮೆರಿಕದ ಅಧ್ಯಕ್ಷರು ವಿಶ್ವಸಂಸ್ಥೆಯ ಮಹಾಸಭೆಗಾಗಿ ನ್ಯೂಯಾರ್ಕ್‌ಗೆ ತೆರಳುತ್ತಿದ್ದಾಗ, “ಯಾವುದೇ ನೆಟ್‌ವರ್ಕ್ ಟ್ರಾವೆಲ್ ಪೂಲ್ ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ಇರಲು ನಿರೀಕ್ಷಿಸಲಾಗುವುದಿಲ್ಲ ಎಂಬುದನ್ನು ದಯವಿಟ್ಟು ಗಮನಿಸಿ” ಎಂದು ಅಸೋಸಿಯೇಟೆಡ್ ಪ್ರೆಸ್ ತಿಳಿಸಿದೆ.

ಈ ಮಧ್ಯೆ, ನ್ಯೂಯಾರ್ಕ್ ಟೈಮ್ಸ್ ಮತ್ತು ವಾಷಿಂಗ್ಟನ್ ಪೋಸ್ಟ್ ಸೋಮವಾರ ವೈಟ್‌ಹೌಸ್ ಪೂಲ್ ವರದಿಯ ಭಾಗವಾಗಿ ತೆಗೆದ ಸ್ಥಿರ ಛಾಯಾಚಿತ್ರಗಳನ್ನು ಪ್ರಕಟಿಸುವುದನ್ನು ಅಥವಾ ಹಂಚಿಕೊಳ್ಳುವುದನ್ನು ತಾತ್ಕಾಲಿಕವಾಗಿ ತಡೆಯುವುದಾಗಿ ಘೋಷಿಸಿದವು.

ಹೆಚ್ಚುವರಿಯಾಗಿ, ಸಿಎನ್‌ಎನ್, ಪೊಲಿಟಿಕೋ ಮತ್ತು ಎಂಎಸ್ ನೌ ಸಂಸ್ಥೆಗಳು ಟ್ರಂಪ್ ಆಡಳಿತದ ವಿರುದ್ಧ ಮೊಕದ್ದಮೆ ಹೂಡಿವೆ. ಈ ನಿಷೇಧವು “ಮೊದಲ ತಿದ್ದುಪಡಿಯ ಮೇಲಿನ ನೇರ ದಾಳಿಯಾಗಿದೆ” ಎಂದು ಅವು ವಾದಿಸಿವೆ.

“ಈ ನಿಷೇಧವು ಮೊದಲ ತಿದ್ದುಪಡಿಯ ಮೇಲಿನ ಅತ್ಯಂತ ನೇರವಾದ ದಾಳಿಯಾಗಿದೆ ಹಾಗೂ ನಮ್ಮ ಅತ್ಯಂತ ಮೂಲಭೂತ ಸಾಂವಿಧಾನಿಕ ತತ್ವಗಳ ಅತ್ಯಂತ ಸ್ಪಷ್ಟ ಉಲ್ಲಂಘನೆಯಾಗಿದೆ” ಎಂದು ಆ ಮಾಧ್ಯಮ ಸಂಸ್ಥೆಗಳು ತಮ್ಮ ದೂರಿನಲ್ಲಿ ತಿಳಿಸಿವೆ. ವೈಟ್‌ಹೌಸ್‌ಗೆ ತಮ್ಮ ಪತ್ರಕರ್ತರ ಪ್ರವೇಶವನ್ನು ಮರುಸ್ಥಾಪಿಸಲು ನ್ಯಾಯಾಲಯವು ಕೂಡಲೇ ಕ್ರಮ ಕೈಗೊಳ್ಳಬೇಕೆಂದು ಈ ಮೊಕದ್ದಮೆ ಕೋರಿದೆ.

“ಸರ್ಕಾರದ ಪ್ರಸ್ತುತ ಮತ್ತು ಸಂಪೂರ್ಣ ಮಾಹಿತಿಗೆ ಪ್ರವೇಶವನ್ನು ಈ ಅಸಂವಿಧಾನಿಕ ನಿಷೇಧವು ಎಷ್ಟು ಕಾಲ ನಿರ್ಬಂಧಿಸುತ್ತದೋ, ಅಷ್ಟು ಕಾಲ ಸಾರ್ವಜನಿಕರು ತೊಂದರೆ ಅನುಭವಿಸುತ್ತಾರೆ” ಎಂದು ಅದು ಹೇಳಿದೆ.

ಈ ವಿಚಾರವಾಗಿ ಬುಧವಾರ (ಸೆಪ್ಟೆಂಬರ್ 23) ನ್ಯಾಯಾಲಯದಲ್ಲಿ ವಿಚಾರಣೆ ನಡೆಯಲಿದೆ. ಸದ್ಯಕ್ಕಂತೂ ಅಮೆರಿಕದ ಅಧ್ಯಕ್ಷರ ವರದಿಯ ಮೇಲೆ ನಿಷೇಧ ಮುಂದುವರಿದಿದೆ. ಟ್ರಂಪ್ ಅವರು ತಮ್ಮ ಹೊಸ ವೈಟ್‌ಹೌಸ್ ಹೆಲಿಪ್ಯಾಡ್ ಅನ್ನು ಉದ್ಘಾಟಿಸಲು ರಿಬ್ಬನ್ ಕತ್ತರಿಸಿದಾಗ ಟಿವಿ ಪೂಲ್ ಅಲ್ಲಿರಲಿಲ್ಲ. ಬಳಿಕ ಆಡಳಿತ ಮಂಡಳಿಯ ವಿಡಿಯೊ ಪ್ರಸಾರವೂ ಕೇಳಿಸದಂತಾಯಿತು.

ಈ ತಿಕ್ಕಾಟದ ಬಗ್ಗೆ ಟ್ರಂಪ್ ಹೇಳುವುದೇನು?

ಈ ಮೂರು ಮಾಧ್ಯಮ ಸಂಸ್ಥೆಗಳ ಮೇಲಿನ ನಿಷೇಧಕ್ಕೂ ಸ್ವತಂತ್ರ ಪತ್ರಿಕಾ ಸ್ವಾತಂತ್ರ್ಯಕ್ಕೂ ಯಾವುದೇ ಸಂಬಂಧವಿಲ್ಲ, ಬದಲಿಗೆ ಇದು “ಸುಳ್ಳು ಸುದ್ದಿಗಳನ್ನು” ಗುರಿಯಾಗಿಸಿಕೊಂಡಿದೆ ಎಂದು ಅಮೆರಿಕದ ಅಧ್ಯಕ್ಷ ಟ್ರಂಪ್ ವಾದಿಸಿದ್ದಾರೆ.

“ವೈಟ್‌ಹೌಸ್ ಸ್ವತಂತ್ರ ಪತ್ರಿಕಾ ಸ್ವಾತಂತ್ರ್ಯದ ಮೇಲೆ ದಾಳಿ ಮಾಡುತ್ತಿಲ್ಲ, ಅದನ್ನು ನಾನು ಗೌರವಿಸುತ್ತೇನೆ. ಇದು ಸುಳ್ಳು ಸುದ್ದಿಗಳ ಮೇಲಿನ ದಾಳಿಯಾಗಿದೆ. ನಮ್ಮ ಪ್ರೀತಿಯ ಅಮೆರಿಕ ಸಂಯುಕ್ತ ಸಂಸ್ಥಾನದಲ್ಲಿ ಇದು ಕ್ಯಾನ್ಸರ್‌ನಂತೆ ಬೆಳೆದುಬಂದಿದೆ” ಎಂದು ಟ್ರಂಪ್ ಸೋಮವಾರ ಬೆಳಿಗ್ಗೆ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದ್ದಾರೆ. “ಇದು ಭ್ರಷ್ಟ, ಉದ್ದೇಶಪೂರ್ವಕ, ವ್ಯಾಪಕವಾದ, ಸಂಪೂರ್ಣವಾಗಿ ಸಂಘಟಿತವಾದ ಮತ್ತು ಸಂಪೂರ್ಣ ನಿಯಂತ್ರಣವಿಲ್ಲದ ಸಂಗತಿಯಾಗಿದೆ. ಇದು ನಮ್ಮ ರಾಷ್ಟ್ರೀಯ ಭದ್ರತೆಗೆ ಬೆದರಿಕೆಯಾಗಿದ್ದು, ಈಗಲೇ ತಡೆಯಬೇಕು!” ಎಂದಿದ್ದಾರೆ ಟ್ರಂಪ್.

“ವೈಟ್‌ಹೌಸ್ ಪ್ರವೇಶ ಎಂಬುದು ಹಕ್ಕಲ್ಲ, ಅದೊಂದು ಸೌಲಭ್ಯ” ಎಂಬ ಶೀರ್ಷಿಕೆಯೊಂದಿಗೆ ಪತ್ರಿಕಾ ಪ್ರಕಟಣೆಯನ್ನು ಹೊರಡಿಸುವ ಮೂಲಕ ವೈಟ್‌ಹೌಸ್ ಕೂಡ ತನ್ನ ನಿಲುವನ್ನು ಸಮರ್ಥಿಸಿಕೊಂಡಿದೆ. ಮೊದಲ ತಿದ್ದುಪಡಿಯು ಪ್ರಕಟಿಸುವ ಅವರ ಹಕ್ಕನ್ನು ರಕ್ಷಿಸುತ್ತದೆ. ಆದರೆ ಅದು ಅವರಿಗೆ ಹಾರ್ಡ್ ಪಾಸ್, ಬ್ರೀಫಿಂಗ್ ರೂಮ್‌ನಲ್ಲಿ ಆಸನ ಅಥವಾ ಪ್ರೆಸ್ ಪೂಲ್‌ನಲ್ಲಿ ಸ್ಥಾನವನ್ನು ಖಾತರಿಪಡಿಸುವುದಿಲ್ಲ ಎಂದು ಅದರಲ್ಲಿ ವಾದಿಸಲಾಗಿದೆ.

ಈ ಮಧ್ಯೆ, ಟ್ರಂಪ್ ಆಡಳಿತವು ತನ್ನ ವೆಬ್‌ಸೈಟ್‌ ನಲ್ಲಿ ‘ಟ್ರಂಪ್ ಟಿವಿ’ ಎಂಬ ಸ್ಟ್ರೀಮಿಂಗ್ ಚಾನೆಲ್ ಅನ್ನು ಆರಂಭಿಸಿದೆ. “ಟ್ರಂಪ್ ಆಡಳಿತದ ಪ್ರಮುಖ ಕ್ಷಣಗಳನ್ನು ಒಂದೇ ಸ್ಥಳದಲ್ಲಿ ವೀಕ್ಷಿಸಿ. ಪ್ರಮುಖ ವಿಡಿಯೊಗಳು, ಪ್ರಮುಖ ಭಾಷಣಗಳು ಮತ್ತು ಕಡ್ಡಾಯವಾಗಿ ನೋಡಲೇಬೇಕಾದ ಮುಖ್ಯಾಂಶಗಳು 24/7 ಸ್ಟ್ರೀಮ್ ಆಗುತ್ತವೆ ಹಾಗೂ ನೈಜ ಸಮಯದಲ್ಲಿ ಅಪ್ಡೇಟ್ ಆಗುತ್ತದೆ. ಮಾಹಿತಿ ಪಡೆಯುತ್ತಿರಿ ಮತ್ತು ಅಪ್ಡೇಟ್ ಆಗಿರಿ” ಎಂದು ಆ ಸ್ಟ್ರೀಮಿಂಗ್‌ ನ ವಿವರಣೆಯಲ್ಲಿ ತಿಳಿಸಲಾಗಿದೆ.

ಸೌಜನ್ಯ: firstpost.com