2026ರ ಭೌತಶಾಸ್ತ್ರದ ನೊಬೆಲ್ ವಿಜೇತರು ಮಾಡಿದ ಸಂಶೋಧನೆ ಏನು?

ಫ್ರಾನ್ಸಿಸ್ ಹ್ಯಾಲ್ಜೆನ್ (Francis Halzen) ಅವರಿಗೆ "ಐಸ್‌ಕ್ಯೂಬ್ ನ್ಯೂಟ್ರಿನೋ ಅಬ್ಸರ್ವೇಟರಿಗೆ ನಿರ್ಣಾಯಕ ಕೊಡುಗೆಗಳು ಮತ್ತು ಖಗೋಳ ಮೂಲದ ಉನ್ನತ-ಶಕ್ತಿಯ ನ್ಯೂಟ್ರಿನೋಗಳ ಆವಿಷ್ಕಾರಕ್ಕಾಗಿ" 2026ರ ಭೌತಶಾಸ್ತ್ರದ ನೊಬೆಲ್ ಪ್ರಶಸ್ತಿ ನೀಡಲಾಗಿದೆ.

1944ರ ಮಾರ್ಚ್ 23ರಂದು ಬೆಲ್ಜಿಯಂನಲ್ಲಿ ಜನಿಸಿದ ಹ್ಯಾಲ್ಜೆನ್, ಅಮೆರಿಕದ ಮ್ಯಾಡಿಸನ್‌ನಲ್ಲಿರುವ ವಿಸ್ಕಾನ್ಸಿನ್–ಮ್ಯಾಡಿಸನ್ ವಿಶ್ವವಿದ್ಯಾಲಯದಲ್ಲಿ ಕೆಲಸ ಮಾಡುತ್ತಿದ್ದಾರೆ.

ನಿಜವಾಗಿ ನ್ಯೂಟ್ರಿನೋಗಳು ಎಂದರೇನು? ಅವುಗಳನ್ನು ಗಮನಿಸಲು ನಮಗೆ ಐಸ್ ಏಕೆ ಬೇಕು? ಮತ್ತು ಅವುಗಳನ್ನು ಏಕೆ ಅಧ್ಯಯನ ಮಾಡಬೇಕು? ಎಂಬುದನ್ನು ನೋಡೋಣ.

ನ್ಯೂಟ್ರಿನೋ ಎನ್ನುವುದು ಯಾವುದೇ ವಿದ್ಯುತ್‌ ಚಾರ್ಜ್ ಇಲ್ಲದ ಮತ್ತು ಬಹುತೇಕ ದ್ರವ್ಯರಾಶಿಯೇ ಇಲ್ಲದ ಅತ್ಯಂತ ಸೂಕ್ಷ್ಮ ಕಣವಾಗಿದೆ. ನೊಬೆಲ್ ಪ್ರಶಸ್ತಿಯ ಅಧಿಕೃತ ಪ್ರಕಟಣೆಯು ಇದನ್ನು "ಬ್ರಹ್ಮಾಂಡದ ಅತ್ಯಂತ ನಾಚಿಕೆಯುಳ್ಳ ಕಣ" ಎಂದು ಕರೆದಿದೆ. ಏಕೆಂದರೆ ಇದು ಯಾವುದೇ ಸುಳಿವಿಲ್ಲದೆ ವಸ್ತುವಿನ ಮೂಲಕ ನೇರವಾಗಿ ಹಾದುಹೋಗುತ್ತದೆ. ಪ್ರತಿ ಸೆಕೆಂಡಿಗೆ ಸೂರ್ಯನಿಂದ ಬರುವ 65 ಶತಕೋಟಿ ನ್ಯೂಟ್ರಿನೋಗಳು ನಮ್ಮ ದೇಹದ ಮೂಲಕ ಹಾದುಹೋದರೂ ನಮಗೆ ಅದರ ಅರಿವೇ ಆಗುವುದಿಲ್ಲ.

ಸೂರ್ಯ, ಸ್ಫೋಟಗೊಳ್ಳುವ ನಕ್ಷತ್ರಗಳು, ಪರಮಾಣು ಪ್ರತಿಕ್ರಿಯೆಗಳು ಮತ್ತು ವಿಕಿರಣಶೀಲ ಕ್ಷಯದಿಂದ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ನ್ಯೂಟ್ರಿನೋಗಳು ಉತ್ಪತ್ತಿಯಾಗುತ್ತವೆ. ಇದೇ ಪ್ರಕ್ರಿಯೆಗಳಿಂದ ಪ್ರೋಟಾನ್‌ಗಳೂ ಉತ್ಪತ್ತಿಯಾಗುತ್ತವೆ. ಆದರೆ ಪ್ರೋಟಾನ್‌ಗಳು ವಿದ್ಯುತ್‌ ಚಾರ್ಜ್ ಹೊಂದಿರುವುದರಿಂದ, ವಿಜ್ಞಾನಿಗಳು ಅವುಗಳನ್ನು ಅಧ್ಯಯನ ಮಾಡುವಷ್ಟರಲ್ಲಿ ಅವುಗಳ ಹಾದಿಯು ಬದಲಾಗಿರುತ್ತದೆ. ಆದರೆ ನ್ಯೂಟ್ರಿನೋಗಳು ಸುತ್ತಮುತ್ತಲಿನ ಪ್ರಪಂಚದೊಂದಿಗೆ ತೀರಾ ಕಡಿಮೆ ಪರಸ್ಪರ ಕ್ರಿಯೆ ನಡೆಸುತ್ತವೆ. ಹೀಗಾಗಿ, ಈ ಕಣಗಳನ್ನು ಅಧ್ಯಯನ ಮಾಡುವುದರಿಂದ ವಿಜ್ಞಾನಿಗಳಿಗೆ ಅವುಗಳನ್ನು ಸೃಷ್ಟಿಸಿದ ಪ್ರಕ್ರಿಯೆಗಳ ರಹಸ್ಯ ತಿಳಿಯಲು ಒಂದು ಕಿಟಕಿ ತೆರೆದಂತಾಗುತ್ತದೆ.

ನೊಬೆಲ್ ಪ್ರಕಟಣೆಯಲ್ಲಿ ಹೇಳಿರುವಂತೆ, ನ್ಯೂಟ್ರಿನೋಗಳು ಬಾಹ್ಯಾಕಾಶದ ಇತರ ಪ್ರದೇಶಗಳಿಂದಲೂ ಬರುತ್ತವೆ ಮತ್ತು ಬ್ರಹ್ಮಾಂಡದ ಕೆಲವು ರಹಸ್ಯಗಳ ಸುಳಿವುಗಳನ್ನು ಹೊತ್ತುಕೊಂಡು ಬರುತ್ತವೆ. ಈ ಅಪರೂಪದ ಕಾಸ್ಮಿಕ್ ನ್ಯೂಟ್ರಿನೋಗಳನ್ನು ಸೆರೆಹಿಡಿಯುವಲ್ಲಿ ಯಶಸ್ವಿಯಾದ ಸಂಶೋಧಕರು, ಅವು ಹುಟ್ಟಿಕೊಂಡ ಬ್ರಹ್ಮಾಂಡದ ವಿಪರೀತ ವಾತಾವರಣದ ಬಗ್ಗೆ ಮಾಹಿತಿ ಪಡೆಯಬಹುದು.

ನ್ಯೂಟ್ರಿನೋಗಳನ್ನು ಅಧ್ಯಯನ ಮಾಡಲು ಯಾವುದು ಮುಖ್ಯವೋ, ಅದೇ ಕಾರಣದಿಂದ ಅವುಗಳನ್ನು ಪತ್ತೆ ಮಾಡುವುದೂ ಅತ್ಯಂತ ಕಷ್ಟಕರವಾಗಿದೆ. ಏಕೆಂದರೆ ಅವು ಯಾವುದೇ ಜಾಡನ್ನು ಬಿಡದೆ ವಸ್ತುವಿನ ಮೂಲಕ ಹಾದುಹೋಗುತ್ತವೆ.

ಫ್ರಾನ್ಸಿಸ್ ಹ್ಯಾಲ್ಜೆನ್ ಅವರ ಐಡಿಯಾ: ಅಂಟಾರ್ಕ್ಟಿಕಾದ ಹಿಮದ ಬಳಕೆ

1980ರ ದಶಕದಲ್ಲಿ ದಕ್ಷಿಣ ಧ್ರುವದ ಗ್ಲೇಸಿಯರ್ ಹಿಮವು ನ್ಯೂಟ್ರಿನೋಗಳನ್ನು ಪತ್ತೆ ಮಾಡುವ ಬೃಹತ್ ಡಿಟೆಕ್ಟರ್ ಆಗಿ ಕಾರ್ಯನಿರ್ವಹಿಸಬಲ್ಲುದು ಎಂದು ಫ್ರಾನ್ಸಿಸ್ ಹ್ಯಾಲ್ಜೆನ್ ಅರಿತುಕೊಂಡರು.

ನ್ಯೂಟ್ರಿನೋವು ಪರಮಾಣು ಕೇಂದ್ರದೊಂದಿಗೆ ಡಿಕ್ಕಿಹೊಡೆಯುವ ಅಪರೂಪದ ಸಂದರ್ಭಗಳಲ್ಲಿ, ಅದು ಒಂದು ಚಾರ್ಜ್ ಹೊಂದಿರುವ ಕಣವನ್ನು ಸೃಷ್ಟಿಸಬಹುದು. ಈ ಕಣವು ಹಿಮದ ಮೂಲಕ ಚಲಿಸುವಾಗ ಮಸುಕಾದ ನೀಲಿ ಬಣ್ಣದ ಬೆಳಕನ್ನು ಹೊರಸೂಸುತ್ತದೆ. ವಸ್ತುವು ಪಾರದರ್ಶಕವಾಗಿದ್ದರೆ, ಸೆನ್ಸರ್‌ಗಳು ಆ ಬೆಳಕನ್ನು ಪತ್ತೆ ಮಾಡಬಹುದು. ಬೆಳಕಿನ ಮಾದರಿಯನ್ನು ಆಧರಿಸಿ, ನ್ಯೂಟ್ರಿನೋ ಯಾವ ದಿಕ್ಕಿನಿಂದ ಬಂದಿದೆ ಎಂಬುದನ್ನು ಊಹಿಸಬಹುದು. ಅಂತಹ ಹಲವಾರು ಡಿಕ್ಕಿಗಳನ್ನು ಸೆರೆಹಿಡಿಯಲು ಸಾಕಷ್ಟು ದೊಡ್ಡ ಪ್ರಮಾಣದ ವಸ್ತು ಇರುವುದು ಇಲ್ಲಿ ಅತ್ಯಂತ ಮುಖ್ಯವಾಗಿದೆ.

ಹಿಮವು ಹಲವಾರು ಪ್ರಯೋಜನಗಳನ್ನು ಹೊಂದಿದೆ. ಆಳವಾದ ಪ್ರದೇಶದಲ್ಲಿ ಕತ್ತಲು ನಿರಂತರವಾಗಿರುವುದರಿಂದ, ಬೆಳಕಿನ ಮಿನುಗುವಿಕೆಯನ್ನು ಸುಲಭವಾಗಿ ನೋಡಬಹುದು. ಸಾಗರದಂತೆ ಇಲ್ಲಿ ಜೀವಿಗಳಿಂದ ಯಾವುದೇ ತೊಂದರೆ ಇರುವುದಿಲ್ಲ. ಅಂಟಾರ್ಕ್ಟಿಕಾದಲ್ಲಿ ವಿಕಿರಣಶೀಲತೆ ಕಡಿಮೆ ಇದೆ, ಹಿಮವು ಸ್ಥಿರವಾಗಿದೆ ಮತ್ತು ಆ ಪ್ರದೇಶದಲ್ಲಿ ಭೂಕಂಪಗಳು ಸಂಭವಿಸುವುದಿಲ್ಲ. ಅಲ್ಲದೆ, ಹ್ಯಾಲ್ಜೆನ್ ಮೊದಲು ಈ ಕಲ್ಪನೆಯನ್ನು ಮುಂದಿಟ್ಟಾಗ, ಅಲ್ಲಿ ನಿಯಮಿತ ಸಾರಿಗೆ ಸೌಲಭ್ಯವಿರುವ ಸಂಶೋಧನಾ ಕೇಂದ್ರವು ಈಗಾಗಲೇ ಇತ್ತು.

ಇದರಲ್ಲಿದ್ದ ಏಕೈಕ ತೊಂದರೆಯೆಂದರೆ, ನವೆಂಬರ್ ಮತ್ತು ಫೆಬ್ರವರಿ ನಡುವಿನ ಅಂಟಾರ್ಕ್ಟಿಕಾದ ಕಡಿಮೆ ಅವಧಿಯ ಬೇಸಿಗೆಯಲ್ಲಿ ಮಾತ್ರ ಪ್ರಾಯೋಗಿಕ ಕೆಲಸ ಮಾಡಲು ಸಾಧ್ಯವಿತ್ತು.

ಹ್ಯಾಲ್ಜೆನ್ ಅವರು ಜಾನ್ ಜಿ. ಲರ್ನ್ಡ್ ಅವರೊಂದಿಗೆ 1988ರಲ್ಲಿ ಮೊದಲ ಬಾರಿಗೆ ಈ ಪರಿಕಲ್ಪನೆಯನ್ನು ಮಂಡಿಸಿದರು. ಈ ಕಲ್ಪನೆಯ ಬಗೆಗಿನ ಆಸಕ್ತಿಯು ಕ್ರಮೇಣ ಬೆಳೆಯಿತು ಮತ್ತು ಇಂತಹ ಅಬ್ಸರ್ವೇಟರಿ ನಿರ್ಮಿಸಲು ವಿವಿಧ ಸಂಸ್ಥೆಗಳ ಸಂಶೋಧಕರು ಹ್ಯಾಲ್ಜೆನ್ ಅವರೊಂದಿಗೆ ಕೈಜೋಡಿಸಿದರು.

ಐಸ್‌ಕ್ಯೂಬ್ ವೀಕ್ಷಣಾಲಯದ ನಿರ್ಮಾಣ

ಅತ್ಯಾಧುನಿಕ ಶವರ್ ಹೆಡ್ ಮೂಲಕ ಹರಿಯುವ ಬಿಸಿ ನೀರು ಒಂದು ಕಿಲೋಮೀಟರ್ ಆಳದ ಗುಂಡಿಗಳನ್ನು ಮಾಡಬಲ್ಲದು ಎಂದು ಹಿಮಶಾಸ್ತ್ರಜ್ಞರು ತಂಡಕ್ಕೆ ತೋರಿಸಿಕೊಟ್ಟರು. ಹ್ಯಾಲ್ಜೆನ್ ಅವರು "a lightbulb in reverse" (ತಿರುಚಿದ ಬಲ್ಬ್) ಎಂದು ಬಣ್ಣಿಸುವ ಬೆಳಕಿನ ಸಂವೇದಕಗಳ ಸರಪಳಿಗಳನ್ನು ನಂತರ ಆ ಗುಂಡಿಗಳಿಗೆ ಇಳಿಸಲಾಯಿತು. ಈ ಸಂವೇದಕಗಳು ಬೆಳಕನ್ನು ಸೆರೆಹಿಡಿದು ಅದನ್ನು ವಿದ್ಯುತ್ ಸಂಕೇತವನ್ನಾಗಿ ಪರಿವರ್ತಿಸುತ್ತವೆ.

ಮೇಲ್ಭಾಗದ ಹಿಮದಲ್ಲಿರುವ ಗುಳ್ಳೆಗಳು ಬೆಳಕನ್ನು ಚದುರಿಸಿದ್ದರಿಂದ ಮೊದಲ ಪ್ರಯತ್ನಗಳು ನಿರಾಶಾದಾಯಕವಾಗಿದ್ದವು. ಆದರೆ, 1,400 ಮೀಟರ್‌ಗಳಿಗಿಂತ ಕೆಳಗಿನ ಹಿಮವು ಅತ್ಯಂತ ಶುದ್ಧ ಮತ್ತು ಪಾರದರ್ಶಕವಾಗಿರುವುದು ಸಾಬೀತಾಯಿತು. ಇಲ್ಲಿ ಬೆಳಕು ಹೀರಲ್ಪಡುವ ಮೊದಲು 300 ಮೀಟರ್‌ಗಳವರೆಗೆ ಚಲಿಸಬಲ್ಲದು. ಮೊದಲ ವೀಕ್ಷಣಾಲಯ 'ಅಮಾಂಡಾ' (AMANDA) ಉದ್ದೇಶಿಸಿದಂತೆ ಕಾರ್ಯನಿರ್ವಹಿಸಿತು. ಆದರೆ ಅದು ಸಾಕಷ್ಟು ದೊಡ್ಡದಿರಲಿಲ್ಲ.

ಅದರ ಉತ್ತರಾಧಿಕಾರಿಯಾದ 'ಐಸ್‌ಕ್ಯೂಬ್', 2011ರಲ್ಲಿ ಪೂರ್ಣಗೊಂಡಿತು. ಇದು 86 ಕೇಬಲ್‌ಗಳ ಮೇಲೆ 5,160 ಬೆಳಕಿನ ಸಂವೇದಕಗಳನ್ನು ಹೊಂದಿರುವ ಒಂದು ಘನ ಕಿಲೋಮೀಟರ್ ಹಿಮದ ಪ್ರದೇಶವಾಗಿದೆ. ಹ್ಯಾಲ್ಜೆನ್ ಅವರು ಪ್ರಿನ್ಸಿಪಾಲ್ ಇನ್ವೆಸ್ಟಿಗೇಟರ್ ಆಗಿ ಈ ಎರಡೂ ಯೋಜನೆಗಳನ್ನು ಕಲ್ಪನೆಯಿಂದ ಫಲಿತಾಂಶದವರೆಗೆ ಮುನ್ನಡೆಸಿದರು.

ಅದರ ಬಳಿಕ ಐಸ್‌ಕ್ಯೂಬ್ ಮಾಡಿದ್ದೇನು?

ಐಸ್‌ಕ್ಯೂಬ್ ಅಪಾರ ಪ್ರಮಾಣದ ಹಿನ್ನೆಲೆ ಕಣಗಳ ನಡುವೆ ಕಾಸ್ಮಿಕ್ ನ್ಯೂಟ್ರಿನೋಗಳನ್ನು ಗುರುತಿಸಬೇಕಾಗುತ್ತದೆ. ಅಂಟಾರ್ಕ್ಟಿಕಾದ ಮೇಲಿನ ವಾತಾವರಣದಿಂದ ಪ್ರತಿ ದಿನ ನೂರಾರು ಮಿಲಿಯನ್ ಕಣಗಳು ದಾಖಲಾಗುತ್ತವೆ ಮತ್ತು ಭೂಮಿಯ ಮೂಲಕ ಪ್ರಯಾಣಿಸಿದ ಬಳಿಕ ಪ್ರತಿದಿನ ಕೆಲವು ನೂರು ವಾತಾವರಣದ ನ್ಯೂಟ್ರಿನೋಗಳು ಐಸ್‌ಕ್ಯೂಬ್ ಅನ್ನು ತಲುಪುತ್ತವೆ.

ತಂಡವು ಆಯ್ದ ಘಟನೆಗಳನ್ನು ಪರಿಶೀಲಿಸುತ್ತದೆ ಮತ್ತು ಒಟ್ಟಾರೆಯಾಗಿ ಅವುಗಳ ಗುಣಲಕ್ಷಣಗಳು ವಾತಾವರಣದ ನ್ಯೂಟ್ರಿನೋಗಳಿಗಿಂತ ಕಾಸ್ಮಿಕ್ ನ್ಯೂಟ್ರಿನೋಗಳಿಗೆ ಹೊಂದಿಕೆಯಾಗುತ್ತವೆಯೇ ಎಂದು ಪರೀಕ್ಷಿಸುತ್ತದೆ. 2013ರಲ್ಲಿ, ಅವರು ಖಗೋಳ ಮೂಲಗಳಿಂದ ಬಂದ ಉನ್ನತ-ಶಕ್ತಿಯ ನ್ಯೂಟ್ರಿನೋಗಳ ಮೊದಲ ಪುರಾವೆಯನ್ನು ವರದಿ ಮಾಡಿದರು. ಬಳಿಕದ ದತ್ತಾಂಶಗಳು ಆ ಫಲಿತಾಂಶವನ್ನು ಮತ್ತಷ್ಟು ಬಲಪಡಿಸಿದವು.

"ಈ ಮೂಲಕ ನ್ಯೂಟ್ರಿನೋಗಳು ಸೂರ್ಯನ ಒಳಗಿನ ಪ್ರಕ್ರಿಯೆಗಳು ಮತ್ತು ಸೂಪರ್‌ನೋವಾದೊಳಗೆ ಏನಾಗುತ್ತದೆ ಎಂಬುದರ ಕುರಿತಾದ ಭೌತವಿಜ್ಞಾನಿಗಳ ಮಾದರಿಗಳನ್ನು ದೃಢೀಕರಿಸಲು ಸಹಾಯ ಮಾಡಿದೆ. ನ್ಯೂಟ್ರಿನೋ ಖಗೋಳಶಾಸ್ತ್ರವನ್ನು ಹೊಸ ಮಟ್ಟಕ್ಕೆ ಕೊಂಡೊಯ್ಯುವುದು ಐಸ್‌ಕ್ಯೂಬ್‌ನ ಹಿಂದಿನ ಕಲ್ಪನೆಯಾಗಿದೆ. ಧೂಳಿನ ಮೋಡಗಳ ಹಿಂದೆ ಅಡಗಿರುವ ವಿದ್ಯಮಾನಗಳ ಬಗ್ಗೆ ಅಥವಾ ದಾರಿಯಲ್ಲಿ ಇತರ ರೀತಿಯ ವಿಕಿರಣಗಳು ಕಣ್ಮರೆಯಾಗುವಷ್ಟು ದೂರದಲ್ಲಿರುವ ವಸ್ತುಗಳ ಬಗ್ಗೆ ನ್ಯೂಟ್ರಿನೋಗಳು ಮಾಹಿತಿ ನೀಡುತ್ತವೆ ಎಂಬುದು ಇದರ ಆಶಯವಾಗಿದೆ. ಬೇರೆ ಯಾವುದೇ ರೀತಿಯಲ್ಲಿ ಪಡೆಯಲು ಸಾಧ್ಯವಿಲ್ಲದ ಅರಿವನ್ನು ಗಳಿಸುವುದು ಇದರ ಗುರಿಯಾಗಿದೆ" ಎಂದು ನೊಬೆಲ್ ಪ್ರಕಟಣೆ ತಿಳಿಸಿದೆ.

ಮುಂದೇನು?

ಭೂಮಿಯತ್ತ ಬರುವ ನ್ಯೂಟ್ರಿನೋಗಳ ಮೂಲಗಳನ್ನು ಪತ್ತೆಹಚ್ಚಲು ವಿಜ್ಞಾನಿಗಳು ಬಯಸಿದ್ದಾರೆ.

ಪ್ರಕಟಣೆಯಲ್ಲಿ ತಿಳಿಸಿರುವಂತೆ, "ಐಸ್‌ಕ್ಯೂಬ್ ಕೆಲವು ಸಂಭಾವ್ಯ ಮೂಲಗಳನ್ನು ಪತ್ತೆ ಮಾಡಿದೆ, ಅದರಲ್ಲಿ NGC 1068 (NGC 1068 — ಇದನ್ನು M77 ಎಂದೂ ಕರೆಯಲಾಗುತ್ತದೆ) ಎಂಬ ಸಕ್ರಿಯ ಗ್ಯಾಲಕ್ಸಿಯೂ ಸೇರಿದೆ. ಐಸ್‌ಕ್ಯೂಬ್‌ನಲ್ಲಿ ದಾಖಲಾದ ನ್ಯೂಟ್ರಿನೋಗಳಲ್ಲಿ 79 ಕಣಗಳು ಈ ಗ್ಯಾಲಕ್ಸಿಯ ದಿಕ್ಕಿನಿಂದ ಬಂದಂತೆ ಕಾಣಿಸುತ್ತವೆ. ಆದರೆ, NGC 1068 ಅನ್ನು ನ್ಯೂಟ್ರಿನೋಗಳ ಮೂಲವೆಂದು ಖಚಿತವಾಗಿ ಗುರುತಿಸಲು ಈ ಸಾಕ್ಷ್ಯವು ಸಾಲಲ್ಲ. ಸಂವೇದಕಗಳು ಎಷ್ಟು ಹೆಚ್ಚು ನ್ಯೂಟ್ರಿನೋಗಳನ್ನು ಸೆರೆಹಿಡಿಯುತ್ತವೆಯೋ, ಅವುಗಳ ಮೂಲವನ್ನು ಕಂಡುಹಿಡಿಯುವ ಅವಕಾಶವು ಅಷ್ಟೇ ಹೆಚ್ಚಾಗುತ್ತದೆ.

ಸರಳವಾಗಿ ಹೇಳುವುದಾದರೆ, ಐಸ್‌ಕ್ಯೂಬ್ ನಮಗೆ ನಮ್ಮ ಬ್ರಹ್ಮಾಂಡದ ಬಗ್ಗೆ ಉತ್ತಮ ಕಲ್ಪನೆಯನ್ನು ನೀಡುತ್ತದೆ. ವೀಕ್ಷಣಾಲಯದ ವೆಬ್‌ಸೈಟ್ ಹೇಳುವಂತೆ, "ಐಸ್‌ಕ್ಯೂಬ್ ಮೂಲಭೂತ ಸಂಶೋಧನೆಯಾಗಿದೆ. ಕೇವಲ ಅನ್ವೇಷಣಾತ್ಮಕ ಸಂಶೋಧನೆಯು ಸಾಮಾನ್ಯವಾಗಿ ಇತರ ಅಚ್ಚರಿಯ ಆವಿಷ್ಕಾರಗಳಿಗೆ ದಾರಿ ಮಾಡಿಕೊಡುತ್ತದೆ. ಐಸ್‌ಕ್ಯೂಬ್ ನಮ್ಮ ಬ್ರಹ್ಮಾಂಡದ ರಹಸ್ಯಗಳನ್ನು ಅಧ್ಯಯನ ಮಾಡಲು ನಮಗೆ ಹೊಸ ಮಾರ್ಗಗಳನ್ನು ನೀಡುವುದರಿಂದ, ನಮಗೆ ಮುಂಚಿತವಾಗಿ ಊಹಿಸಲು ಸಾಧ್ಯವಿಲ್ಲದ ವಿಷಯಗಳನ್ನು ಇದು ಬಹಿರಂಗಪಡಿಸಬಹುದು ಅಥವಾ ಅವುಗಳ ಆವಿಷ್ಕಾರಕ್ಕೆ ಕಾರಣವಾಗಬಹುದು."

ಉದಾಹರಣೆಗೆ, ನಮ್ಮ ಬ್ರಹ್ಮಾಂಡದ ಸರಿಸುಮಾರು ಶೇಕಡಾ 4ರಷ್ಟು ಭಾಗವು ಪರಮಾಣುಗಳು ಮತ್ತು ಅಣುಗಳಂತಹ ಸಾಮಾನ್ಯ ವಸ್ತುವಿನಿಂದ ಮಾಡಲ್ಪಟ್ಟಿದೆ. ನಮ್ಮ ಬ್ರಹ್ಮಾಂಡದ ಉಳಿದ ಶೇಕಡಾ 96ರಷ್ಟು ಭಾಗವು ನಮಗೆ ಕಾಣದ ಮತ್ತು ನಮಗೆ ಸರಿಯಾಗಿ ಅರ್ಥವಾಗದ ವಸ್ತುವಿನಿಂದ ಕೂಡಿದೆ. ಇದು ಡಾರ್ಕ್ ಮ್ಯಾಟರ್ (ಶೇಕಡಾ 23) ಮತ್ತು ಡಾರ್ಕ್ ಎನರ್ಜಿ (ಶೇಕಡಾ 73)ಯಿಂದ ರೂಪುಗೊಂಡಿದೆ. ನ್ಯೂಟ್ರಿನೋಗಳು ಡಾರ್ಕ್ ಮ್ಯಾಟರ್ ಮತ್ತು ಡಾರ್ಕ್ ಎನರ್ಜಿಯನ್ನು ಉತ್ತಮವಾಗಿ ಅರ್ಥಮಾಡಿಕೊಳ್ಳಲು ನಮಗೆ ಸಹಾಯ ಮಾಡಬಹುದು.

ಸೌಜನ್ಯ: indianexpress.com