ವಾಟ್ಸ್ಆ್ಯಪ್ ಪ್ಲಸ್ ಪ್ರೀಮಿಯರ್ ಸೌಲಭ್ಯ ನೀಡಲು ಮುಂದಾದ ಮೆಟಾ; ಇಲ್ಲಿದೆ ವಿವರ…
ಸಾಂದರ್ಭಿಕ ಚಿತ್ರ
ಅಪ್ಲಿಕೇಶನ್ ಐಕಾನ್ ಬದಲಿಸುವುದು ಮತ್ತು ವಿವಿಧ ವಿಶೇಷ ಸ್ಟಿಕರ್ಗಳು, ರಿಂಗ್ಟೋನ್ಗಳನ್ನು ಅನ್ಲಾಕ್ ಮಾಡುವುದು ಸೇರಿದಂತೆ ಬಳಕೆದಾರರಿಗೆ ವಾಟ್ಸ್ಆ್ಯಪ್ ಅಪ್ಲಿಕೇಶನ್ ಅನ್ನು ಕಸ್ಟಮೈಸ್ ಮಾಡಲು ಅನುವು ಮಾಡಿಕೊಡುತ್ತದೆ.
ಮೆಟಾ ಸಂಸ್ಥೆಯು ‘ವಾಟ್ಸ್ಆ್ಯಪ್ ಪ್ಲಸ್’ ಎಂದು ಕರೆಯಲಾಗುವ ಐಚ್ಛಿಕ ಪ್ರೀಮಿಯಂ ಚಂದಾದಾರಿಕೆ ಯೋಜನೆಯನ್ನು ಅಭಿವೃದ್ಧಿಪಡಿಸುತ್ತಿದೆ. ಹೊಸ ಯೋಜನೆಯಲ್ಲಿ ಬಳಕೆದಾರರಿಗೆ ಅಪ್ಲಿಕೇಶನ್ ಐಕಾನ್ ಬದಲಿಸುವುದು ಮತ್ತು ವಿವಿಧ ವಿಶೇಷ ಸ್ಟಿಕರ್ಗಳು, ರಿಂಗ್ಟೋನ್ಗಳನ್ನು ಅನ್ಲಾಕ್ ಮಾಡುವುದು ಸೇರಿದಂತೆ ವಾಟ್ಸ್ಆ್ಯಪ್ ಅಪ್ಲಿಕೇಶನ್ ಅನ್ನು ಕಸ್ಟಮೈಸ್ ಮಾಡಲು ಅನುವು ಮಾಡಿಕೊಡುತ್ತದೆ.
ವಾಟ್ಸ್ಆ್ಯಪ್ ಪ್ಲಸ್ನಲ್ಲಿ ಬಳಕೆದಾರರಿಗೆ ವೇದಿಕೆಯನ್ನು ಇನ್ನಷ್ಟು ವೈಯಕ್ತಿಕವಾಗಿಸುವ ಅವಕಾಶ ಲಭಿಸಬಹುದು. ಆದರೆ ವಾಟ್ಸ್ಆ್ಯಪ್ ನ ಪ್ರಮುಖ ವೈಶಿಷ್ಟ್ಯಗಳಾದ ಕರೆ, ಸಂದೇಶ ಮತ್ತು ಧ್ವನಿ ಟಿಪ್ಪಣಿ ಕಳುಹಿಸುವುದು ಬದಲಾಗದೆ ಇರುತ್ತದೆ. ಚಂದಾದಾರಿಕೆ ಸಂಪೂರ್ಣವಾಗಿ ಐಚ್ಛಿಕವಾಗಿರುತ್ತದೆ. ಅಂದರೆ ಬಳಕೆದಾರರು ವಾಟ್ಸ್ಆ್ಯಪ್ ಪ್ಲಸ್ಗೆ ಬದಲಾಗದೆ ಉಚಿತ ಆವೃತ್ತಿ ಬಳಸುವುದನ್ನು ಮುಂದುವರಿಸಬಹುದು.
ಮಾಧ್ಯಮ ವರದಿಗಳ ಪ್ರಕಾರ, ವಾಟ್ಸ್ಆ್ಯಪ್ ಪ್ಲಸ್ನಲ್ಲಿ ಅನೇಕ ಕಸ್ಟಮೀಕರಿಸಲಾಗಿರುವ ಥೀಮ್, ಐಕಾನ್ ಮತ್ತು ಆಕ್ಸೆಂಟ್ ಕಲರ್ಗಳನ್ನು ನೀಡಲಾಗುವುದು. ಅವುಗಳಲ್ಲಿ 14 ಹೊಸ ವಾಟ್ಸ್ಆ್ಯಪ್ ಐಕಾನ್ಗಳು ಮತ್ತು ಇಂಟರ್ಫೇಸ್ಗಾಗಿ ಬಹು ಬಣ್ಣದ ಆಯ್ಕೆಗಳು ಒಳಗೊಂಡಿರಬಹುದು. ಬಳಕೆದಾರರಿಗೆ ವಾಟ್ಸ್ಆ್ಯಪ್ ಅಪ್ಲಿಕೇಶನ್ನ ನೋಟದ ಮೇಲೆ ಹೆಚ್ಚಿನ ನಿಯಂತ್ರಣವನ್ನು ನೀಡಲಿದೆ.
ಹೊಸ ಚಂದಾದಾರಿಕೆ ಮಾದರಿಯಡಿಯಲ್ಲಿ, ವಾಟ್ಸ್ಆ್ಯಪ್ ಪಿನ್ ಮಾಡಿದ ಚಾಟ್ಗಳಿಗೆ ಇರುವ ಮಿತಿಯನ್ನು ಮೂರರಿಂದ 20ಕ್ಕೆ ಹೆಚ್ಚಿಸಬಹುದು. ಹೀಗಾಗಿ ಬಳಕೆದಾರರು ಅಗತ್ಯವಿರುವ ಪ್ರಮುಖ ಸಂಭಾಷಣೆಗಳನ್ನು ಸರಳವಾಗಿ ಪ್ರವೇಶಿಸಲು ಹೆಚ್ಚಿನ ಅವಕಾಶವನ್ನು ನೀಡುತ್ತದೆ. ವಾಟ್ಸ್ಆ್ಯಪ್ ಪ್ಲಸ್ ಮೂಲಕ ಚಂದಾದಾರರಿಗೆ ವಿಶಿಷ್ಟವಾದ ರಿಂಗ್ಟೋನ್ಗಳನ್ನು ನೀಡುವ ಉದ್ದೇಶವನ್ನೂ ಹೊಂದಿದೆ. ಈ ರಿಂಗ್ಟೋನ್ಗಳನ್ನು ಬಳಕೆದಾರರು ತಮ್ಮ ಆದ್ಯತೆ ಮತ್ತು ಮನೋಸ್ಥಿತಿಗೆ ಅನುಗುಣವಾಗಿ ಕರೆಯ ಅಧಿಸೂಚನೆಗಳನ್ನು ವೈಯಕ್ತೀಕರಿಸಲು ಅನುಮತಿಸುತ್ತದೆ. ಇತರ ಅಪ್ಲಿಕೇಶನ್ಗಳು ಕಳುಹಿಸುವ ಅಧಿಸೂಚನೆಗಳಿಂದ ವಾಟ್ಸ್ಆ್ಯಪ್ ಕರೆ ಎಚ್ಚರಿಕೆಗಳನ್ನು ಸುಲಭವಾಗಿ ಪ್ರತ್ಯೇಕಿಸಲು ಇಂತಹ ವ್ಯವಸ್ಥೆ ನೆರವಾಗಲಿದೆ.
ವಾಟ್ಸ್ಆ್ಯಪ್ ಪ್ಲಸ್ ಚಂದಾದಾರರಿಗೆ ಅನುಭವ ಹೆಚ್ಚಿಸಲು ಕಾಲಕ್ರಮೇಣ ಕಂಪನಿ ಹೆಚ್ಚುವರಿ ವೈಶಿಷ್ಟ್ಯಗಳನ್ನು ಪರಿಚಯಿಸಬಹುದು. ಅವುಗಳಲ್ಲಿ ವಿಶೇಷ ಸ್ಟಿಕರ್ಗಳಿಗೆ ಪ್ರವೇಶ ಸಿಗಬಹುದು. ಸಾಮಾನ್ಯ ಬಳಕೆದಾರರಿಗೆ ಇವು ಲಭ್ಯವಿಲ್ಲದೆ ಇರಬಹುದು.
ವರದಿಯ ಪ್ರಕಾರ ವಾಟ್ಸ್ಆ್ಯಪ್ ಪ್ಲಸ್ ಈಗ ಅಭಿವೃದ್ಧಿಯ ಹಂತದಲ್ಲಿದೆ. ಬಿಡುಗಡೆಯಾದ ಮೇಲೆ ಆ್ಯಂಡ್ರಾಯ್ಡ್ ಮತ್ತು ಐಒಎಸ್ ಎರಡಕ್ಕೂ ಲಭ್ಯವಿರುತ್ತದೆ. ವಾಟ್ಸ್ಆ್ಯಪ್ ಪ್ಲಸ್ ಗೆ ಸಂಬಂಧಿಸಿ ಇದೀಗ ವಾಟ್ಸ್ಆ್ಯಪ್ ಬೆಲೆ, ಅಧಿಕೃತ ಬಿಡುಗಡೆ ದಿನಾಂಕ ಮೊದಲಾದ ವಿವರಗಳನ್ನು ದೃಢೀಕರಿಸಿಲ್ಲ.
ವಾಟ್ಸ್ಆ್ಯಪ್ ಪ್ಲಸ್ ನಲ್ಲಿ ನಿಗದಿತ ಸಂದೇಶಗಳನ್ನು ಕಳುಹಿಸುವ ವ್ಯವಸ್ಥೆಯನ್ನೂ ನೀಡುವ ಸಾಧ್ಯತೆಯಿದೆ. ಹೀಗಾಗಿ ಬಳಕೆದಾರರು ಮುಂಚಿತವಾಗಿ ಸಂದೇಶಗಳನ್ನು ಬರೆಯುವುದು ಮತ್ತು ಆಯ್ಕೆ ಮಾಡಿದ ದಿನಾಂಕ ಮತ್ತು ಸಮಯದಲ್ಲಿ ಅವುಗಳನ್ನು ಸ್ವಯಂಚಾಲಿತವಾಗಿ ತಲುಪಿಸಬಹುದು.
