ಚಿನ್ನ ಖರೀದಿ, ಪ್ರವಾಸ ಅಥವಾ ವಿದೇಶಗಳಲ್ಲಿ ಮದುವೆ ಬೇಡ: ಭಾರತೀಯರಿಗೆ ಪ್ರಧಾನಿ ಮೋದಿ ಮತ್ತೊಮ್ಮೆ ಮನವಿ ಮಾಡಿದ್ದೇಕೆ?

ಜಾಗತಿಕ ಸಂಘರ್ಷಗಳು ವ್ಯಾಪಾರ, ಇಂಧನ ಮಾರುಕಟ್ಟೆ ಮತ್ತು ಪೂರೈಕೆ ಸರಪಣಿಯನ್ನು ಅಸ್ತವ್ಯಸ್ತಗೊಳಿಸುತ್ತಿರುವ ಈ ಸಂದರ್ಭದಲ್ಲಿ, ಸ್ವಾವಲಂಬನೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಪ್ರಧಾನಿ ನರೇಂದ್ರ ಮೋದಿ ಅವರು ಭಾರತೀಯರಿಗೆ ಮತ್ತೊಮ್ಮೆ ಕರೆ ನೀಡಿದ್ದಾರೆ. ಅಗತ್ಯವಿಲ್ಲದಿದ್ದರೆ ಚಿನ್ನ ಖರೀದಿಸಬೇಡಿ ಹಾಗೂ ವಿದೇಶಿ ಪ್ರವಾಸಗಳು ಮತ್ತು ವಿದೇಶಗಳಲ್ಲಿ ನಡೆಯುವ ಮದುವೆಗಳಂತಹ ಅನಾವಶ್ಯಕ ವಿದೇಶಿ ಪ್ರಯಾಣಗಳನ್ನು ಮುಂದೂಡುವಂತೆ ಅವರು ಮನವಿ ಮಾಡಿದ್ದಾರೆ.

ಜೂನ್ ಅಂತ್ಯದ ತ್ರೈಮಾಸಿಕದಲ್ಲಿ ಭಾರತವು ನಿರೀಕ್ಷೆಗಿಂತ ಉತ್ತಮವಾದ ಶೇಕಡಾ 7.8ರಷ್ಟು ಆರ್ಥಿಕ ಬೆಳವಣಿಗೆಯನ್ನು ದಾಖಲಿಸಿರುವ ಬೆನ್ನಲ್ಲೇ, ಬಿಶ್ಕೆಕ್ ನಿಂದ ಮಂಗಳವಾರ ಬಿಡುಗಡೆ ಮಾಡಿದ ವೀಡಿಯೊ ಸಂದೇಶದಲ್ಲಿ ಪ್ರಧಾನಿ ಈ ಮನವಿ ಮಾಡಿದ್ದಾರೆ. ಯುದ್ಧಗಳು, ಜಾಗತಿಕ ಅನಿಶ್ಚಿತತೆ ಮತ್ತು ಪೂರೈಕೆ ಸರಪಣಿಯ ಅಡಚಣೆಗಳ ನಡುವೆಯೂ ದೇಶವು ವೇಗವಾಗಿ ಪ್ರಗತಿ ಸಾಧಿಸುತ್ತಿದೆ ಎಂದು ಮೋದಿ ಹೇಳಿದರು. ಆದರೆ, ಸ್ವದೇಶಿ ಉತ್ಪನ್ನಗಳನ್ನು ಆಯ್ಕೆ ಮಾಡುವ ಮೂಲಕ ಮತ್ತು ಅನಾವಶ್ಯಕ ವಿದೇಶಿ ವಿನಿಮಯ ಹೊರಹರಿವನ್ನು ಕಡಿಮೆ ಮಾಡುವ ಮೂಲಕ ಭಾರತೀಯರು ದೇಶದ ಆರ್ಥಿಕ ಬಲಕ್ಕೆ ನಿರಂತರವಾಗಿ ಕೊಡುಗೆ ನೀಡಬೇಕು ಎಂದು ಅವರು ಒತ್ತಿ ಹೇಳಿದರು.

"ನೀವು ವಿಹಾರಕ್ಕಾಗಿ ವಿದೇಶಿ ಪ್ರವಾಸಗಳಿಗೆ ಹೋಗುತ್ತಿದ್ದರೆ, ಹೋಗಬಾರದು. ನೀವು ವಿದೇಶದಲ್ಲಿ ಮದುವೆ ಮಾಡಿಕೊಳ್ಳುತ್ತಿದ್ದರೆ, ಹಾಗೆ ಮಾಡಬೇಡಿ. ಮತ್ತು ಅಗತ್ಯವಿಲ್ಲದಿದ್ದರೆ, ನೀವು ಚಿನ್ನವನ್ನು ಸಹ ಖರೀದಿಸಬಾರದು" ಎಂದಿದ್ದಾರೆ ಮೋದಿ.

►ಜನರು ಚಿನ್ನ ಖರೀದಿಸುವುದನ್ನು ನಿಯಂತ್ರಿಸುವಂತೆ ಮೋದಿ ಕೇಳಿಕೊಳ್ಳುತ್ತಿರುವುದೇಕೆ?

ಆಮದು ಮಾಡಿಕೊಳ್ಳುವ ಚಿನ್ನಕ್ಕಾಗಿ ಭಾರತವು ವೆಚ್ಚ ಮಾಡುತ್ತಿರುವ ಅಪಾರ ಪ್ರಮಾಣದ ವಿದೇಶಿ ವಿನಿಮಯವೇ ತಕ್ಷಣದ ಆರ್ಥಿಕ ಚಿಂತೆಗೆ ಕಾರಣವಾಗಿದೆ.

ಭಾರತವು ತನ್ನ ಚಿನ್ನದ ಅಗತ್ಯಕ್ಕಾಗಿ ಸಂಪೂರ್ಣವಾಗಿ ವಿದೇಶಿ ಪೂರೈಕೆಯನ್ನೇ ನೆಚ್ಚಿಕೊಂಡಿದೆ. ಹೀಗಾಗಿ, ಕಚ್ಚಾ ತೈಲದ ನಂತರ ದೇಶದ ಅತ್ಯಂತ ದೊಡ್ಡ ಆಮದು ವಸ್ತುವಾಗಿ ಚಿನ್ನ ಗುರುತಿಸಿಕೊಂಡಿದೆ. ಭಾರತೀಯರು ಹೆಚ್ಚು ಚಿನ್ನ ಖರೀದಿಸಿದಾಗ, ದೇಶದಿಂದ ಹೆಚ್ಚಿನ ಪ್ರಮಾಣದ ವಿದೇಶಿ ಹಣ ಹೊರಹೋಗುತ್ತದೆ. ಇದು ವ್ಯಾಪಾರ ಕೊರತೆಯನ್ನು ಹೆಚ್ಚಿಸುವುದಲ್ಲದೆ, ಡಾಲರ್ ಗೆ ಬೇಡಿಕೆ ಹೆಚ್ಚಾದಾಗ ರೂಪಾಯಿ ಮೌಲ್ಯದ ಮೇಲೆಯೂ ಹೆಚ್ಚುವರಿ ಒತ್ತಡವನ್ನು ಹೇರುತ್ತದೆ.

ಪ್ರಸ್ತುತ ಹಣಕಾಸು ವರ್ಷದಲ್ಲಿ ಚಿನ್ನದ ಆಮದು ಗಣನೀಯವಾಗಿ ಏರಿಕೆಯಾಗಿದೆ. ಏಪ್ರಿಲ್ನಿಂದ ಆರಂಭವಾದ ಪ್ರಸಕ್ತ ಹಣಕಾಸು ವರ್ಷದ ಮೊದಲ ನಾಲ್ಕು ತಿಂಗಳುಗಳಲ್ಲಿ ಚಿನ್ನದ ಆಮದು ಪ್ರಮಾಣವು ಕಳೆದ ವರ್ಷಕ್ಕಿಂತ ಶೇಕಡಾ 32ಕ್ಕೂ ಹೆಚ್ಚು ಏರಿಕೆಯಾಗಿದೆ ಎಂದು ಇತ್ತೀಚಿನ ವರದಿಗಳು ತಿಳಿಸಿವೆ. ಅದೇ ಸಮಯದಲ್ಲಿ, ಜುಲೈ ನಲ್ಲಿ ಭಾರತದ ಸರಕು ವ್ಯಾಪಾರ ಕೊರತೆಯು ಸುಮಾರು 3,200 ಕೋಟಿ ಡಾಲರ್ ಗೆ ತಲುಪಿದ್ದು, ಇದು ಕಳೆದ ಜನವರಿಯ ನಂತರದ ಗರಿಷ್ಠ ಮಟ್ಟವಾಗಿದೆ.

ಇದು ಸರ್ಕಾರದ ನೀತಿ ರೂಪಿಸುವಿಕೆಯಲ್ಲಿ ಚಿನ್ನಕ್ಕೆ ಪ್ರಮುಖ ಸ್ಥಾನ ನೀಡಿದೆ. ಭವಿಷ್ಯದ ಉತ್ಪಾದನೆಗೆ ನೆರವಾಗುವ ಆಮದು ಯಂತ್ರೋಪಕರಣಗಳು, ತಂತ್ರಜ್ಞಾನ ಅಥವಾ ಕೈಗಾರಿಕಾ ಕಚ್ಚಾ ವಸ್ತುಗಳಿಗೆ ಹೋಲಿಸಿದರೆ, ಭಾರತದಲ್ಲಿ ಚಿನ್ನದ ಬಳಕೆಯು ಪ್ರಮುಖವಾಗಿ ಉಳಿತಾಯ, ಮದುವೆ ಹಾಗೂ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಉದ್ದೇಶಗಳಿಗೇ ಹೆಚ್ಚಾಗಿ ಬಳಕೆಯಾಗುತ್ತದೆ.

ಭಾರತವು ವಿಶ್ವದಲ್ಲೇ ಎರಡನೇ ಅತಿ ದೊಡ್ಡ ಚಿನ್ನದ ಆಮದುದಾರ ದೇಶವಾಗಿದೆ. ಅಂದರೆ, ಗ್ರಾಹಕರ ಬೇಡಿಕೆಯಲ್ಲಿ ಉಂಟಾಗುವ ಸಣ್ಣ ಬದಲಾವಣೆಯೂ ದೇಶದ ಆಮದು ವೆಚ್ಚದ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ.

►ತೈಲ ಬೆಲೆ ಹೆಚ್ಚಿರುವಾಗ ಇದ್ಯಾಕೆ ಪ್ರಾಮುಖ್ಯತೆ ಪಡೆದಿದೆ?

ಭಾರತ ಎದುರಿಸುತ್ತಿರುವ ವಿದೇಶಿ ಪಾವತಿಗಳ ಸವಾಲಿನಲ್ಲಿ ಚಿನ್ನದ ಆಮದು ಒಂದು ಭಾಗ ಮಾತ್ರ.

ಭಾರತವು ತನ್ನ ಕಚ್ಚಾ ತೈಲ ಅಗತ್ಯದ ಶೇಕಡಾ 88ಕ್ಕೂ ಹೆಚ್ಚಿನ ಭಾಗವನ್ನು ಆಮದು ಮಾಡಿಕೊಳ್ಳುತ್ತದೆ. ಹೀಗಾಗಿ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆಗಳು ನಿರಂತರವಾಗಿ ಹೆಚ್ಚಾದರೆ, ಅದು ದೇಶದ ಆಮದು ವೆಚ್ಚವನ್ನು ತಕ್ಷಣವೇ ಹೆಚ್ಚಿಸುತ್ತದೆ. ಪಶ್ಚಿಮ ಏಷ್ಯಾದಲ್ಲಿ ಮುಂದುವರಿದಿರುವ ಯುದ್ಧ ಮತ್ತು ಹಾರ್ಮುಝ್ ಜಲಸಂಧಿಯ ಸುತ್ತಲಿನ ಅಡಚಣೆಗಳು ಇಂಧನ ಮಾರುಕಟ್ಟೆಯನ್ನು ಮತ್ತಷ್ಟು ಆಘಾತಗಳಿಗೆ ಈಡಾಗುವಂತೆ ಮಾಡಿವೆ.

ತೈಲ ಆಮದು ವೆಚ್ಚ ತೀವ್ರವಾಗಿ ಏರಿದಾಗ, ಆಮದು ಪಾವತಿಗಾಗಿ ಭಾರತಕ್ಕೆ ಹೆಚ್ಚಿನ ಡಾಲರ್ಗಳ ಅಗತ್ಯವಿರುತ್ತದೆ. ಅದೇ ಸಮಯದಲ್ಲಿ ಚಿನ್ನದ ಆಮದೂ ಹೆಚ್ಚಾದರೆ, ವ್ಯಾಪಾರ ಸಮತೋಲನ ಮತ್ತು ರೂಪಾಯಿ ಮೌಲ್ಯದ ಮೇಲಿನ ಒತ್ತಡ ಮತ್ತಷ್ಟು ಹೆಚ್ಚಾಗುತ್ತದೆ.

ಇದೇ ಕಾರಣಕ್ಕೆ, ಜಾಗತಿಕ ಮಟ್ಟದಲ್ಲಿ ಅಪಾಯಗಳು ಹೆಚ್ಚಿರುವ ಈ ಸಮಯದಲ್ಲಿ ಐಷಾರಾಮಿ ಅಥವಾ ಅನಾವಶ್ಯಕ ಆಮದುಗಳನ್ನು ಕಡಿಮೆ ಮಾಡುವಂತೆ ಮೋದಿ ಸಂದೇಶ ನೀಡಿದ್ದಾರೆ.

ಚಿನ್ನ ಖರೀದಿಸುವುದು ಅಥವಾ ವಿದೇಶಿ ಪ್ರವಾಸ ಮಾಡುವುದರಿಂದಲೇ ದೇಶದಲ್ಲಿ ಆರ್ಥಿಕ ಬಿಕ್ಕಟ್ಟು ಸೃಷ್ಟಿಯಾಗುತ್ತದೆ ಎಂಬುದು ಇಲ್ಲಿನ ವಾದವಲ್ಲ. ಬದಲಿಗೆ, ಜಾಗತಿಕ ಅನಿಶ್ಚಿತತೆ ಇರುವಾಗ ವಿದೇಶಕ್ಕೆ ಹಣ ಹರಿದುಹೋಗುವಂತಹ ವೆಚ್ಚಗಳನ್ನು ಸಾರ್ವಜನಿಕರು ಒಟ್ಟಾಗಿ ಕಡಿಮೆ ಮಾಡಬೇಕು ಎಂದು ಸರ್ಕಾರ ಕೇಳಿಕೊಳ್ಳುತ್ತಿದೆ.

►ವಿದೇಶಿ ಪ್ರವಾಸದ ವಿಷಯವನ್ನು ಮೋದಿ ಮತ್ತೆ ಪ್ರಸ್ತಾಪಿಸಿದ್ದೇಕೆ?

ವಿದೇಶಿ ಪ್ರವಾಸಗಳು ಮತ್ತು ವಿದೇಶಗಳಲ್ಲಿ ನಡೆಯುವ ಮದುವೆಗಳು ಸಹ ಹೆಚ್ಚಿನ ಪ್ರಮಾಣದ ಹಣ ವಿದೇಶಕ್ಕೆ ಹರಿಯಲು ಕಾರಣವಾಗುತ್ತವೆ. ವಿದೇಶಕ್ಕೆ ಪ್ರಯಾಣಿಸುವ ಭಾರತೀಯರು ವಿಮಾನದ ಟಿಕೆಟ್, ಹೋಟೆಲ್, ಆಹಾರ, ಸ್ಥಳೀಯ ಸಾರಿಗೆ ಮತ್ತು ಇತರ ಸೇವೆಗಳಿಗಾಗಿ ಹಣ ವೆಚ್ಚ ಮಾಡುತ್ತಾರೆ. ವಿದೇಶದಲ್ಲಿ ನಡೆಯುವ ಮದುವೆಗಳಲ್ಲಂತೂ ಇಂತಹ ವೆಚ್ಚ ಇನ್ನಷ್ಟು ಹೆಚ್ಚಾಗಿರುತ್ತದೆ. ಈ ಹೆಚ್ಚಿನ ವೆಚ್ಚವು ದೇಶೀಯ ಉದ್ಯಮಗಳಿಗೆ ಬೆಂಬಲ ನೀಡುವ ಬದಲು ಭಾರತದ ಹೊರಗಿನ ಸೇವೆಗಳಿಗೆ ತಲುಪುತ್ತದೆ.

ಹೀಗಾಗಿ, ಮೋದಿಯವರ ಈ ಮನವಿಯು ಸ್ವದೇಶಿ ಸಿದ್ಧಾಂತದ ವಿಸ್ತರಿತ ಭಾಗವಾಗಿದೆ. ಭಾರತದಲ್ಲೇ ಮಾಡಲು ಸಾಧ್ಯವಿರುವ ವೆಚ್ಚಗಳನ್ನು ಗ್ರಾಹಕರು ಇಲ್ಲೇ ಮಾಡಲು ಪರಿಶೀಲಿಸಬೇಕು ಎಂಬುದು ಇದರ ಉದ್ದೇಶ.

ಅವರ ಈ ಕರೆ ಮುಖ್ಯವಾಗಿ ಅನಾವಶ್ಯಕ ಪ್ರಯಾಣಗಳನ್ನು ಗುರಿಯಾಗಿಸಿಕೊಂಡಿದೆ. ಅವರು ಭಾರತೀಯರಿಗೆ ಎಲ್ಲಾ ವಿದೇಶಿ ಪ್ರಯಾಣಗಳನ್ನು ಸಂಪೂರ್ಣವಾಗಿ ನಿಲ್ಲಿಸಲು ಹೇಳುತ್ತಿಲ್ಲ; ಬದಲಿಗೆ, ಆರ್ಥಿಕ ಅನಿಶ್ಚಿತತೆಯ ಈ ಸಮಯದಲ್ಲಿ ವಿಹಾರ ಪ್ರವಾಸಗಳು ಮತ್ತು ವಿದೇಶಿ ಮದುವೆಗಳನ್ನು ಮರುಪರಿಶೀಲಿಸುವಂತೆ ಕೋರುತ್ತಿದ್ದಾರೆ.

►ಮೋದಿ ಈ ರೀತಿಯ ಮನವಿ ಮಾಡುತ್ತಿರುವುದು ಇದೇ ಮೊದಲೇನಲ್ಲ

ಕಳೆದ ಮೇ ತಿಂಗಳಿನಲ್ಲಿ ಅಮೆರಿಕ–ಇರಾನ್ ಸಂಘರ್ಷದ ಆರ್ಥಿಕ ಪರಿಣಾಮ ತೀವ್ರವಾಗಿದ್ದಾಗಲೂ ಪ್ರಧಾನಿಯವರು ಇದೇ ರೀತಿಯ ಮನವಿ ಮಾಡಿದ್ದರು.

ಆ ಸಮಯದಲ್ಲಿ ಮೋದಿ ಅವರು ಒಂದು ವರ್ಷದ ಮಟ್ಟಿಗೆ ಚಿನ್ನ ಖರೀದಿಸುವುದನ್ನು ನಿಯಂತ್ರಿಸುವಂತೆ, ಅನಾವಶ್ಯಕ ವಿದೇಶಿ ಪ್ರವಾಸಗಳನ್ನು ಮುಂದೂಡುವಂತೆ ಹಾಗೂ ಪೆಟ್ರೋಲ್–ಡೀಸೆಲ್ ಬಳಕೆಯನ್ನು ಮಿತಗೊಳಿಸುವಂತೆ ಭಾರತೀಯರನ್ನು ಕೇಳಿಕೊಂಡಿದ್ದರು. ಜೊತೆಗೆ, ಸಾಧ್ಯವಿದ್ದಲ್ಲಿ ಮನೆಯಿಂದಲೇ ಕೆಲಸ (ವರ್ಕ್ ಫ್ರಮ್ ಹೋಮ್) ಮಾಡುವ ಮತ್ತು ವರ್ಚುವಲ್ ಸಭೆಗಳ ಸಂಸ್ಕೃತಿಯನ್ನು ಮತ್ತೆ ಬೆಳೆಸಿಕೊಳ್ಳಲು, ಸಾರ್ವಜನಿಕ ಸಾರಿಗೆ ಹಾಗೂ ಕಾರ್ಪೂಲಿಂಗ್ ಬಳಸಲು ಮತ್ತು ಸರಕು ಸಾಗಣೆಯನ್ನು ರಸ್ತೆಗಳ ಬದಲಿಗೆ ಹೆಚ್ಚಾಗಿ ರೈಲ್ವೆಗೆ ಸ್ಥಳಾಂತರಿಸಲು ಅವರು ಜನರಿಗೆ ಕರೆ ನೀಡಿದ್ದರು.

ಕಚ್ಚಾ ತೈಲ ಬೆಲೆಗಳು ತೀವ್ರವಾಗಿ ಏರುತ್ತಿದ್ದ ಮತ್ತು ಹಾರ್ಮುಝ್ ಜಲಸಂಧಿಯ ಸಾಗಣೆ ಅಡಚಣೆಗಳ ಬಗ್ಗೆ ಆತಂಕವಿದ್ದ ಹಿನ್ನೆಲೆಯಲ್ಲಿ ಮೇ ತಿಂಗಳ ಮನವಿಯನ್ನು ಮಾಡಲಾಗಿತ್ತು.

►ಜಿಡಿಪಿ ಬೆಳವಣಿಗೆ ಉತ್ತಮವಾಗಿದ್ದರೂ ಮತ್ತೆ ಈ ಮನವಿ ಮಾಡಿದ್ದೇಕೆ?

ಜೂನ್ ತ್ರೈಮಾಸಿಕದಲ್ಲಿ ಭಾರತವು ಸಾಧಿಸಿರುವ ಶೇಕಡಾ 7.8ರಷ್ಟು ಬೆಳವಣಿಗೆಯು ಪ್ರಬಲವಾದ ಅಂಕಿಅಂಶವಾಗಿದೆ. ಆದರೆ ಆರ್ಥಿಕ ಬೆಳವಣಿಗೆಯಾದ ತಕ್ಷಣವೇ ಜಾಗತಿಕ ಸವಾಲುಗಳು ಸಂಪೂರ್ಣವಾಗಿ ಇಲ್ಲವಾಗುವುದಿಲ್ಲ ಎಂಬ ಅರಿವು ಸರ್ಕಾರಕ್ಕಿದೆ.

ಪಶ್ಚಿಮ ಏಷ್ಯಾ ಯುದ್ಧದಿಂದ ಉಂಟಾದ ಅಡಚಣೆಗಳ ಹೊರತಾಗಿಯೂ ಆರ್ಥಿಕತೆಯು ಚೇತರಿಕೆಯ ಹಾದಿಯಲ್ಲಿದೆ ಎಂಬುದನ್ನು ಇತ್ತೀಚಿನ ಜಿಡಿಪಿ ದತ್ತಾಂಶ ತೋರಿಸಿದೆ. ಆದರೆ, ಮಾರ್ಚ್ ತ್ರೈಮಾಸಿಕದಲ್ಲಿದ್ದ ಶೇಕಡಾ 8.6ರಷ್ಟು ಬೆಳವಣಿಗೆಗೆ ಹೋಲಿಸಿದರೆ ಪ್ರಸ್ತುತ ವೇಗ ಕೊಂಚ ಕಡಿಮೆಯಾಗಿದೆ. ಇದರ ಜೊತೆಗೆ ಹಣದುಬ್ಬರ, ಮುಂಗಾರು ಮಳೆ ಮತ್ತು ಶೇಖರಣಾ ಖರ್ಚುಗಳ ಸ್ಥಿರತೆಯ ಕುರಿತಾಗಿಯೂ ಆತಂಕಗಳಿವೆ.

ಹೀಗಾಗಿ, ಜಾಗತಿಕ ಆಘಾತಗಳು ತಾನಾಗಿಯೇ ಮಾಯವಾಗುತ್ತವೆ ಎಂದು ಕಾಯುವ ಬದಲು, ಈಗಿರುವ ಆರ್ಥಿಕ ಬಲವನ್ನು ಬಳಸಿಕೊಂಡು ಪ್ರಗತಿಯ ಅಡಿಪಾಯವನ್ನು ಮತ್ತಷ್ಟು ಭದ್ರಪಡಿಸಿಕೊಳ್ಳಬೇಕು ಎಂಬುದು ಈ ಎಚ್ಚರಿಕೆಯ ಹಿಂದಿನ ತಾರ್ಕಿಕ ಕಾರಣವಾಗಿದೆ.

ಸ್ವದೇಶಿ ಬಳಕೆಯನ್ನು ಸ್ವಾವಲಂಬನೆಯ ತಮ್ಮ ದೊಡ್ಡ ಕಲ್ಪನೆಗೆ ಜೋಡಿಸುವ ಮೂಲಕ ಮೋದಿ ಈ ಅಂಶವನ್ನು ಸ್ಪಷ್ಟಪಡಿಸಿದ್ದಾರೆ. "ನಾವು ಸ್ವದೇಶಿಗೆ ಎಷ್ಟರಮಟ್ಟಿಗೆ ಒತ್ತು ನೀಡುತ್ತೇವೆಯೋ, ಸ್ವಾವಲಂಬನೆಗೆ ಎಷ್ಟರಮಟ್ಟಿಗೆ ಒತ್ತು ನೀಡುತ್ತೇವೆಯೋ, ಸ್ವಾತಂತ್ರ್ಯದ 100ನೇ ವರ್ಷದ ವೇಳೆಗೆ ನಮ್ಮ ಯುವ ಪೀಳಿಗೆಗೆ ಅಭಿವೃದ್ಧಿ ಹೊಂದಿದ ಭಾರತವನ್ನು ಸಮರ್ಪಿಸಲಿದ್ದೇವೆ ಎಂಬ ದೃಢವಾದ ನಂಬಿಕೆ ನನಗಿದೆ" ಎಂದು ಅವರು ಹೇಳಿದ್ದಾರೆ.

►ಇದರಿಂದ ಸರ್ಕಾರಕ್ಕೆ ಆಗುವ ಲಾಭವೇನು?

ಈ ಮನವಿಯ ಹಿಂದೆ ಮೂರು ಮುಖ್ಯ ಉದ್ದೇಶಗಳಿವೆ.

ಮೊದಲನೆಯದಾಗಿ, ವಿದೇಶಿ ವಿನಿಮಯವನ್ನು ಉಳಿಸುವುದು. ಅನಾವಶ್ಯಕ ಆಮದುಗಳನ್ನು ಕಡಿತಗೊಳಿಸುವುದರಿಂದ ಡಾಲರ್ ಗೆ ಇರುವ ಬೇಡಿಕೆ ಕಡಿಮೆಯಾಗುತ್ತದೆ. ಇದು ರೂಪಾಯಿ ಮೌಲ್ಯದ ಮೇಲಿನ ಒತ್ತಡ ಹಾಗೂ ವ್ಯಾಪಾರ ಕೊರತೆಯನ್ನು ನಿಯಂತ್ರಿಸಲು ನೆರವಾಗುತ್ತದೆ.

ಎರಡನೆಯದಾಗಿ, ಜಾಗತಿಕ ಆಘಾತಗಳ ಪ್ರಭಾವವನ್ನು ತಗ್ಗಿಸುವುದು. ಭಾರತವು ತೈಲಕ್ಕಾಗಿ ಸಂಪೂರ್ಣವಾಗಿ ಆಮದನ್ನೇ ನೆಚ್ಚಿಕೊಂಡಿದೆ ಹಾಗೂ ಚಿನ್ನದ ಹೆಚ್ಚಿನ ಭಾಗಕ್ಕೂ ವಿದೇಶಿ ಪೂರೈಕೆಯನ್ನೇ ಅವಲಂಬಿಸಿದೆ. ಜಾಗತಿಕ ಮಟ್ಟದಲ್ಲಿ ಸರಕುಗಳ ಬೆಲೆ ಏರಿಕೆಯಾದಾಗ ಅಥವಾ ಸಾರಿಗೆ ಮಾರ್ಗಗಳಿಗೆ ಅಡಚಣೆಯಾದಾಗ, ಅನಾವಶ್ಯಕ ಆಮದು ಬೇಡಿಕೆಯನ್ನು ಕಡಿಮೆ ಮಾಡುವುದು ದೇಶಕ್ಕೆ ಒಂದು ರಕ್ಷಣಾತ್ಮಕ ಕವಚವಾಗಿ ಕೆಲಸ ಮಾಡುತ್ತದೆ.

ಮೂರನೆಯದಾಗಿ, ದೇಶೀಯ ಬಳಕೆ ಮತ್ತು ಉದ್ಯಮಗಳಿಗೆ ಉತ್ತೇಜನ ನೀಡುವುದು. ಭಾರತೀಯರು ವಿದೇಶಿ ಪರ್ಯಾಯಗಳ ಬದಲಿಗೆ ದೇಶೀಯ ಉತ್ಪನ್ನಗಳು, ಪ್ರವಾಸಗಳು ಮತ್ತು ಸೇವೆಗಳನ್ನು ಆಯ್ಕೆ ಮಾಡಿಕೊಂಡರೆ, ಆ ವೆಚ್ಚದ ಹೆಚ್ಚಿನ ಭಾಗವು ಭಾರತೀಯ ಆರ್ಥಿಕತೆಯಲ್ಲೇ ಉಳಿಯುತ್ತದೆ. ಇದು ಸ್ವದೇಶಿ ಮತ್ತು ಸ್ವಾವಲಂಬನೆಗೆ ಮೋದಿ ನೀಡುತ್ತಿರುವ ಹೆಚ್ಚಿನ ಒತ್ತು ನೀಡುವಿಕೆಗೆ ಪೂರಕವಾಗಿದೆ.

►ಪ್ರಸ್ತುತ ಸಮಯದಲ್ಲಿ ಚಿನ್ನದ ವಿಷಯ ಏಕೆ ಹೆಚ್ಚು ಸೂಕ್ಷ್ಮವಾಗಿದೆ?

ಜಾಗತಿಕ ಅನಿಶ್ಚಿತತೆಯ ನಡುವೆ ಚಿನ್ನದ ಬೆಲೆಯು ಪ್ರಬಲ ಏರಿಕೆಯನ್ನು ಕಾಣುತ್ತಿದೆ. ಸರ್ಕಾರಿ ಸಾಲಗಳ ಆತಂಕ, ಕರೆನ್ಸಿ ಮೌಲ್ಯ ಕುಸಿತ ಮತ್ತು ಅಮೆರಿಕದ ವಿತ್ತೀಯ ನೀತಿಯ ನಿರೀಕ್ಷೆಗಳ ಕಾರಣದಿಂದಾಗಿ ಆಗಸ್ಟ್ ತಿಂಗಳಿನಲ್ಲಿ ಚಿನ್ನದ ಬೆಲೆ ಶೇಕಡಾ 10ರಷ್ಟು ಏರಿಕೆಯಾಗಿದೆ. ಇದು ಕಳೆದ ಜನವರಿಯ ನಂತರದ ಅತಿ ದೊಡ್ಡ ಮಾಸಿಕ ಏರಿಕೆಯಾಗಿದೆ. ಮಂಗಳವಾರದಂದು ಸ್ಪಾಟ್ ಗೋಲ್ಡ್ ದರವು ಪ್ರತಿ ಔನ್ಸ್ಗೆ ಸುಮಾರು 4,430 ಡಾಲರ್ ತಲುಪಿತ್ತು.

ಭಾರತೀಯ ಗ್ರಾಹಕರಿಗೆ, ಜಾಗತಿಕ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆಯಾದಷ್ಟೂ ರೂಪಾಯಿ ಲೆಕ್ಕದಲ್ಲಿ ಚಿನ್ನದ ಆಮದು ಮತ್ತಷ್ಟು ದುಬಾರಿಯಾಗುತ್ತದೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಬೆಲೆ ಹೆಚ್ಚಿರುವಾಗ ದೇಶದಲ್ಲೂ ಬೇಡಿಕೆ ಹೆಚ್ಚಾದರೆ, ಅದು ಆಮದು ವೆಚ್ಚದ ಮೇಲೆ ಹೆಚ್ಚುವರಿ ಭಾರವನ್ನು ಹಾಕುತ್ತದೆ.

ಅದೇ ಸಮಯದಲ್ಲಿ, ಭೌಗೋಳಿಕ–ರಾಜಕೀಯ ಬಿಕ್ಕಟ್ಟಿನ ಸಮಯದಲ್ಲಿ ಚಿನ್ನವು ಒಂದು ಸಂಕೀರ್ಣ ಆಸ್ತಿಯಾಗಿದೆ. ಯುದ್ಧಗಳು ಮತ್ತು ಅನಿಶ್ಚಿತತೆಗಳು ಸುರಕ್ಷಿತ ಹೂಡಿಕೆಯಾಗಿ ಚಿನ್ನದ ಆಕರ್ಷಣೆಯನ್ನು ಹೆಚ್ಚಿಸುತ್ತವೆ. ಆದರೆ ತೈಲ ಬೆಲೆ ಏರಿಕೆಯು ಹಣದುಬ್ಬರವನ್ನು ಹೆಚ್ಚಿಸಿ, ಬಡ್ಡಿ ದರಗಳು ಅಧಿಕವಾಗಿ ಉಳಿಯುವಂತೆ ಮಾಡಬಹುದು. ಚಿನ್ನದಿಂದ ಯಾವುದೇ ಬಡ್ಡಿ ಆದಾಯ ಬಾರದ ಕಾರಣ, ಇದು ಚಿನ್ನದ ಹೂಡಿಕೆಯ ಮೇಲೆ ಪ್ರಭಾವ ಬೀರಬಹುದು.

ಆದರೆ ಸರ್ಕಾರದ ಮಟ್ಟಿಗೆ ಮೂಲ ವಿಷಯ ಸರಳವಾಗಿದೆ. ಚಿನ್ನದ ಬೆಲೆ ಏರಲಿ ಅಥವಾ ಇಳಿಯಲಿ, ಹೆಚ್ಚಿನ ಪ್ರಮಾಣದ ಲೋಹವನ್ನು ಆಮದು ಮಾಡಿಕೊಳ್ಳಲು ಭಾರತವು ವಿದೇಶಿ ಹಣವನ್ನು ಬಳಸಲೇಬೇಕಾಗುತ್ತದೆ.

ಸೌಜನ್ಯ: hindustantimes.com