ಹೌತಿಗಳ ವಿರುದ್ಧ ಯೆಮೆನ್ ಪಡೆಗಳ ಭಾರಿ ಕಾರ್ಯಾಚರಣೆ

ರಿಯಾದ್: ಸೌದಿ ಅರೇಬಿಯ ನೇತೃತ್ವದ ಮೈತ್ರಿಕೂಟದ ವೈಮಾನಿಕ ಬೆಂಬಲದೊಂದಿಗೆ ಯೆಮೆನ್ ಸರ್ಕಾರಿ ಪಡೆಗಳು ಹೌತಿ ಬಂಡುಕೋರರ ವಿರುದ್ಧ ಭಾರಿ ಮಿಲಿಟರಿ ಕಾರ್ಯಾಚರಣೆ ಆರಂಭಿಸಿದ್ದು, ಬಾಬ್ ಅಲ್-ಮಂಡೆಬ್ ಜಲಸಂಧಿ, ಸಮುದ್ರ ಮಾರ್ಗದ ಮೇಲ್ನೋಟವಿರುವ ಧುಬಾಬ್ ಪ್ರದೇಶ ಹಾಗೂ ಕಾರ್ಯತಂತ್ರದ ಬಂದರು ನಗರ ಮೋಖಾ ಮೇಲೆ ನಿಯಂತ್ರಣ ಸಾಧಿಸಿವೆ.

ಸೌದಿ ನೇತೃತ್ವದ ಮೈತ್ರಿಕೂಟವು ವೈಮಾನಿಕ ದಾಳಿ ಮತ್ತು ಬೆಂಬಲ ನೀಡುತ್ತಿರುವ ನಡುವೆಯೇ ಸೋಮವಾರ ಈ ಬೆಳವಣಿಗೆ ನಡೆದಿದೆ. ನೆಲದ ಮೇಲೆ ಹೋರಾಡುತ್ತಿರುವ ಯೆಮೆನ್ ಸಶಸ್ತ್ರ ಪಡೆಗಳಿಗೆ ಹಗಲು-ರಾತ್ರಿ ವೈಮಾನಿಕ ಬೆಂಬಲ ನೀಡಲಾಗುತ್ತಿದ್ದು, ಬಾಬ್ ಅಲ್-ಮಂಡೆಬ್ ಜಲಸಂಧಿಗೆ ವೈಮಾನಿಕ ರಕ್ಷಣೆಯನ್ನೂ ಒದಗಿಸಲಾಗುತ್ತಿದೆ ಎಂದು ಮೈತ್ರಿಕೂಟದ ವಕ್ತಾರ ಮೇಜರ್ ಜನರಲ್ ತುರ್ಕಿ ಅಲ್-ಮಲ್ಕಿ ತಿಳಿಸಿದ್ದಾರೆ.

ಸ್ಥಳ ಬದಲಾಯಿಸುತ್ತಿರುವ ನೆಲೆಗಳ ವಿರುದ್ಧವೂ ಕಾರ್ಯಾಚರಣೆ ಮುಂದುವರಿದಿದೆ. ‘ಯೆಮೆನ್ ಡಾನ್’ (Yemen Dawn) ಹೆಸರಿನ ಕಾರ್ಯಾಚರಣೆಯಲ್ಲಿ 100 ಯುದ್ಧ ವಿಮಾನಗಳು ಭಾಗವಹಿಸಿದ್ದು, 324 ‘ಪ್ರಮುಖ’ ಹೌತಿ ನೆಲೆಗಳನ್ನು ನಾಶಪಡಿಸಲಾಗಿದೆ ಎಂದು ಅಲ್-ಮಲ್ಕಿ ಹೇಳಿದ್ದಾರೆ.

►ಸನಾ ಮೇಲೂ ‘ಕಾರ್ಯತಂತ್ರದ ದಾಳಿ’

ಹೌತಿಗಳ ನಿಯಂತ್ರಣದಲ್ಲಿರುವ ರಾಜಧಾನಿ ಸನಾ ಮೇಲೆ ಯೆಮೆನ್ ಸಶಸ್ತ್ರ ಪಡೆಗಳು ಸೋಮವಾರ ‘ಕಾರ್ಯತಂತ್ರದ ದಾಳಿ’ ಆರಂಭಿಸಿವೆ ಎಂದು ಸೇನೆಯ ವಕ್ತಾರ ಕರ್ನಲ್ ಮಜಿದ್ ಅಲ್-ನುಜೈಲಿ ತಿಳಿಸಿದ್ದಾರೆ.

‘ನಾವು ಅತ್ಯಾಧುನಿಕ ಸಾಮರ್ಥ್ಯಗಳನ್ನು ಬಳಸುತ್ತಿದ್ದೇವೆ’ ಎಂದು ಅವರು ಹೇಳಿದ್ದಾರೆ. ಹೌತಿಗಳ ನಿಯಂತ್ರಣದಲ್ಲಿರುವ ‘ಅಲ್-ಮಸಿರಾ ಟಿವಿ’ ಕೂಡ ಸನಾ ಮೇಲಿನ ದಾಳಿಗಳನ್ನು ದೃಢಪಡಿಸಿದೆ.

ಸನಾದ ಸಂಹಾನ್ ಪ್ರದೇಶದ ಕೃಷಿ ಭೂಮಿಯ ಮೇಲೆ ನಡೆದ ವೈಮಾನಿಕ ದಾಳಿಯಲ್ಲಿ ಮಹಿಳೆಯೊಬ್ಬರು ಮೃತಪಟ್ಟಿದ್ದಾರೆ. ಸಾವನ್ ಪ್ರದೇಶದಲ್ಲಿ ಕಾರಿನ ಮೇಲೆ ನಡೆದ ಮತ್ತೊಂದು ದಾಳಿಯಲ್ಲಿ ಬಾಲಕಿಯೊಬ್ಬಳು ಮೃತಪಟ್ಟಿದ್ದು, ಏಳು ಮಂದಿ ಗಾಯಗೊಂಡಿದ್ದಾರೆ ಎಂದು ಹೌತಿಗಳ ನಿಯಂತ್ರಣದಲ್ಲಿರುವ ಆರೋಗ್ಯ ಸಚಿವಾಲಯ ತಿಳಿಸಿದೆ.

►ಬಾಬ್ ಅಲ್-ಮಂಡೆಬ್ ಜಲಸಂಧಿ ವಶಕ್ಕೆ

ಬಾಬ್ ಅಲ್-ಮಂಡೆಬ್ ಜಲಸಂಧಿಯ ನಿಯಂತ್ರಣ ಪಡೆಯಲು ಸರ್ಕಾರಿ ಪಡೆಗಳು ಪಾರ್ಶ್ವ ದಾಳಿ ತಂತ್ರ ಅನುಸರಿಸಿದವು ಎಂದು ಕರ್ನಲ್ ಅಲ್-ನುಜೈಲಿ ತಿಳಿಸಿದ್ದಾರೆ.

‘ಜೈಂಟ್ಸ್ ಬ್ರಿಗೇಡ್ಸ್’ ಹಾಗೂ ‘ನೇಷನ್ಸ್ ಶೀಲ್ಡ್ ಫೋರ್ಸಸ್’ ಈ ಕಾರ್ಯತಂತ್ರದ ಜಲಸಂಧಿಯ ಮೇಲೆ ಪರಿಣಾಮಕಾರಿ ನಿಯಂತ್ರಣ ಸಾಧಿಸಿವೆ. ಸರ್ಕಾರಿ ಪಡೆಗಳು ಧುಬಾಬ್ ವಿಮಾನ ನಿಲ್ದಾಣವನ್ನೂ ವಶಕ್ಕೆ ಪಡೆದಿವೆ. ಧುಬಾಬ್ ಮತ್ತು ಮೋಖಾ ನಗರವನ್ನು ಸಂಪರ್ಕಿಸುವ ರಸ್ತೆಯನ್ನು ಕಡಿತಗೊಳಿಸಿ, ಆ ಮಾರ್ಗದ ಮೇಲೂ ನಿಯಂತ್ರಣ ಸಾಧಿಸಿವೆ ಎಂದು ಅವರು ಹೇಳಿದ್ದಾರೆ.

ಧುಬಾಬ್ ನಲ್ಲಿ ನೂರಾರು ಹೌತಿ ಹೋರಾಟಗಾರರನ್ನು ಸುತ್ತುವರಿಯಲಾಗಿತ್ತು. ಅವರಿಗೆ ಶರಣಾಗುವಂತೆ ಸೂಚಿಸಲಾಗಿತ್ತು. ಆದರೆ ಕೆಲವರು ದೋಣಿಗಳ ಮೂಲಕ ಪರಾರಿಯಾಗಿದ್ದಾರೆ ಎಂದು ಅಲ್-ನುಜೈಲಿ ತಿಳಿಸಿದ್ದಾರೆ. ಹೌತಿಗಳೂ ಇದನ್ನು ದೃಢಪಡಿಸಿಲ್ಲ.

ಸರ್ಕಾರಿ ಸುದ್ದಿ ಸಂಸ್ಥೆ ‘ಸಬಾ’ ಉಲ್ಲೇಖಿಸಿರುವ ಮಿಲಿಟರಿ ಮೂಲಗಳ ಪ್ರಕಾರ, ಧುಬಾಬ್ ನಿಂದ ಸುಮಾರು 45 ಕಿ.ಮೀ ಉತ್ತರದಲ್ಲಿರುವ ಮೋಖಾ ನಗರದಲ್ಲಿ ತೀವ್ರ ಹೋರಾಟ ನಡೆದಿದೆ.

‘ಪಾಪುಲರ್ ರೆಸಿಸ್ಟೆನ್ಸ್’ ಹೋರಾಟಗಾರರು ಹಾಗೂ ವಾಯುಪಡೆಯ ಬೆಂಬಲದೊಂದಿಗೆ ‘ನೇಷನ್ಸ್ ಶೀಲ್ಡ್ ಫೋರ್ಸಸ್’, ‘ಜೈಂಟ್ಸ್ ಬ್ರಿಗೇಡ್ಸ್’ ಮತ್ತು ‘ತಿಹಾಮಾ ರೆಸಿಸ್ಟೆನ್ಸ್’ ಪಡೆಗಳು ಹೌತಿ ಪಡೆಗಳೊಂದಿಗೆ ತೀವ್ರ ಹೋರಾಟ ನಡೆಸಿ ನಗರವನ್ನು ವಶಕ್ಕೆ ಪಡೆದಿವೆ.

ಯೆಮೆನ್ ನ ತೈಝ್ ಗವರ್ನರೇಟ್ ನ ಪಶ್ಚಿಮ ಭಾಗದಲ್ಲಿರುವ ಈ ಬಂದರು ನಗರ ಸೆಪ್ಟೆಂಬರ್ ಆರಂಭದಿಂದ ಹೌತಿಗಳ ನಿಯಂತ್ರಣದಲ್ಲಿತ್ತು. ನಗರದ ಸುತ್ತಮುತ್ತಲಿನ ಹಲವು ಪ್ರದೇಶಗಳಲ್ಲಿ ಹೋರಾಟ ನಡೆದಿದ್ದು, ಹೌತಿಗಳಿಗೆ ಸಾವುನೋವುಗಳು ಸಂಭವಿಸಿವೆ. ಹಲವು ಹೋರಾಟಗಾರರನ್ನು ಸೆರೆಹಿಡಿಯಲಾಗಿದ್ದು, ಇತರರು ಪರಾರಿಯಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

►‘ಸೌದಿಗೆ ಆತ್ಮರಕ್ಷಣೆಯ ಹಕ್ಕಿದೆ’: ಅಮೆರಿಕ

ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಸೌದಿ ಅರೇಬಿಯ ಮತ್ತು ಯೆಮೆನ್ ಸರಕಾರಗಳ ಪರ ನಿಂತಿದ್ದಾರೆ.

‘ಸೌದಿಗಳು ಹೌತಿಗಳ ದಾಳಿಗೆ ಒಳಗಾಗಿದ್ದಾರೆ ಮತ್ತು ಅದರಿಂದ ಉಂಟಾಗುವ ಬೆದರಿಕೆಯನ್ನು ಅರಿತಿದ್ದಾರೆ. ಹಾಗಾಗಿ ತಮ್ಮನ್ನು ತಾವು ರಕ್ಷಿಸಿಕೊಳ್ಳುವ ಹಕ್ಕು ಅವರಿಗಿದೆ. ಹಾಗೆಯೇ, ತಾವು ಕಳೆದುಕೊಂಡ ಪ್ರದೇಶವನ್ನು ಮರುಪಡೆಯಲು ಯೆಮೆನ್ ಪಡೆಗಳು ಪ್ರಯತ್ನಿಸುವುದು ಸಹಜ’ ಎಂದು ರೂಬಿಯೊ ಹೇಳಿದ್ದಾರೆ.

ಬಾಬ್ ಅಲ್-ಮಂಡೆಬ್ ಜಲಸಂಧಿಯು ಕೆಂಪು ಸಮುದ್ರದ ದಕ್ಷಿಣ ನಿರ್ಗಮನ ಮಾರ್ಗವಾಗಿದೆ. ಮೆಡಿಟರೇನಿಯನ್ ಮತ್ತು ಏಷ್ಯಾ ನಡುವಿನ ಪ್ರಮುಖ ನೌಕಾಯಾನ ಮಾರ್ಗವೂ ಇದಾಗಿದೆ.

ಇರಾನ್ ಸಂಘರ್ಷದ ಹಿನ್ನೆಲೆಯಲ್ಲಿ ಹಾರ್ಮುಝ್ ಜಲಸಂಧಿ ವಾಸ್ತವಿಕವಾಗಿ ಮುಚ್ಚಲ್ಪಟ್ಟಿರುವ ಸಂದರ್ಭದಲ್ಲಿ, ಪರ್ಯಾಯ ಜಲಮಾರ್ಗವಾಗಿರುವ ಬಾಬ್ ಅಲ್-ಮಂಡೆಬ್ ಈ ವರ್ಷ ಮತ್ತಷ್ಟು ಮಹತ್ವ ಪಡೆದುಕೊಂಡಿದೆ.

ಸೌದಿ ಅರೇಬಿಯದ ‘ಆಕ್ರಮಣಕಾರಿ ಧೋರಣೆ’ ಮುಂದುವರಿಯುವವರೆಗೆ ಸೌದಿ ವಾಯುಪ್ರದೇಶದಲ್ಲಿ ಹಾರಾಟ ನಡೆಸುವ ವಿಮಾನಯಾನ ಸಂಸ್ಥೆಗಳಿಗೆ ಅದು ಸುರಕ್ಷಿತವಾಗಿರುವುದಿಲ್ಲ ಎಂದು ಹೌತಿಗಳು ನಡೆಸುತ್ತಿರುವ ಕಡಲ ವ್ಯವಹಾರಗಳ ಸಂಸ್ಥೆಯೊಂದು ಎಚ್ಚರಿಕೆ ನೀಡಿದೆ.

►‘ಯೆಮೆನ್ ಡಾನ್’ ಕಾರ್ಯಾಚರಣೆ

ರಾಜ್ಯ ಸಂಸ್ಥೆಗಳನ್ನು ಪುನಃಸ್ಥಾಪಿಸುವುದು, ಸನಾ ನಗರವನ್ನು ಮರುಪಡೆಯುವುದು ಮತ್ತು ಹೌತಿಗಳ ‘ದಂಗೆ’ಯನ್ನು ಕೊನೆಗೊಳಿಸುವ ಉದ್ದೇಶದಿಂದ ‘ಆಪರೇಷನ್ ಯೆಮೆನ್ ಡಾನ್’ ಆರಂಭಿಸಲಾಗಿದೆ ಎಂದು ಯೆಮೆನ್ ನ ಅಧ್ಯಕ್ಷೀಯ ನಾಯಕತ್ವ ಮಂಡಳಿ (PLC) ಮುಖ್ಯಸ್ಥ ರಶಾದ್ ಅಲ್-ಅಲಿಮಿ ಘೋಷಿಸಿದ್ದಾರೆ.

‘ದೇವರ ಸಹಾಯ, ನಮ್ಮ ಜನರ ಸಂಕಲ್ಪ, ನಮ್ಮ ಸಶಸ್ತ್ರ ಪಡೆಗಳು ಹಾಗೂ ಎಲ್ಲ ಮಿಲಿಟರಿ ಘಟಕಗಳ ಶೌರ್ಯ ಮತ್ತು ನಮ್ಮ ಸಹೋದರರು ಹಾಗೂ ಸ್ನೇಹಿತರ ಬೆಂಬಲದೊಂದಿಗೆ ಯೆಮೆನ್ ಸ್ವಾತಂತ್ರ್ಯ, ಶಾಂತಿ ಮತ್ತು ಸ್ಥಿರತೆಯ ಹೊಸ ಉದಯದತ್ತ ಸಾಗಲಿದೆ’ ಎಂದು ಅಲ್-ಅಲಿಮಿ ಹೇಳಿದ್ದಾರೆ.

ಇರಾನ್ ಪರ ಹೌತಿ ಬಂಡುಕೋರರ ವಶದಲ್ಲಿರುವ ಪ್ರದೇಶಗಳನ್ನು ಮರುಪಡೆಯಲು ಸೌದಿ ಬೆಂಬಲಿತ ಯೆಮೆನ್ ಸರಕಾರ ರವಿವಾರ ಆಕ್ರಮಣಕಾರಿ ಕಾರ್ಯಾಚರಣೆ ಆರಂಭಿಸಿತ್ತು. ಸ್ಥಳ ಬದಲಾಯಿಸುವ ನೆಲೆಗಳ ಮೇಲಿನ ದಾಳಿಗಳು ಸೇರಿದಂತೆ ವೈಮಾನಿಕ ಕಾರ್ಯಾಚರಣೆಗಳು ಮುಂದುವರಿದಿವೆ ಎಂದು ಮೈತ್ರಿಕೂಟ ತಿಳಿಸಿದೆ.

►2014ರಿಂದ ಆರಂಭವಾದ ಯೆಮೆನ್ ಸಂಘರ್ಷ

2014ರಲ್ಲಿ ಹೌತಿಗಳು ರಾಜಧಾನಿ ಸನಾವನ್ನು ವಶಪಡಿಸಿಕೊಂಡ ಬಳಿಕ ಯೆಮೆನ್ ಸಂಘರ್ಷ ಆರಂಭವಾಯಿತು. ಸರಕಾರವನ್ನು ಪುನಃಸ್ಥಾಪಿಸಿ ಬಂಡುಕೋರ ಗುಂಪನ್ನು ಉಚ್ಚಾಟಿಸುವ ಉದ್ದೇಶದಿಂದ ಸೌದಿ ನೇತೃತ್ವದ ಮೈತ್ರಿಕೂಟ ಮುಂದಿನ ವರ್ಷ ವೈಮಾನಿಕ ಕಾರ್ಯಾಚರಣೆ ಮೂಲಕ ಸಂಘರ್ಷಕ್ಕೆ ಮಧ್ಯಪ್ರವೇಶಿಸಿತು.

ಸೌದಿ ಬೆಂಬಲಿತ ಹಾಗೂ ವಿಶ್ವಸಂಸ್ಥೆಯಿಂದ ಮಾನ್ಯತೆ ಪಡೆದ PLC, ಹೌತಿಗಳ ವಶದ ನಂತರದ ಅವಧಿಯಲ್ಲಿ ದಕ್ಷಿಣ ನಗರ ಅಡೆನ್ ಅನ್ನು ಕೇಂದ್ರವಾಗಿಸಿಕೊಂಡು ದೇಶದ ದಕ್ಷಿಣ ಮತ್ತು ಪೂರ್ವ ಭಾಗಗಳ ನಿಯಂತ್ರಣ ಹೊಂದಿದೆ.

ಯುದ್ಧವು ಶೀಘ್ರದಲ್ಲೇ ರಕ್ತಸಿಕ್ತ ಮತ್ತು ನಿರ್ಣಾಯಕವಲ್ಲದ ಸ್ಥಿತಿಗೆ ತಲುಪಿತು. ಬಹುತೇಕ ಮುಂಚೂಣಿ ಪ್ರದೇಶಗಳಲ್ಲಿ ಹೋರಾಟ ಸ್ಥಗಿತಗೊಂಡಿತ್ತು. ಈಗಾಗಲೇ ಅತ್ಯಂತ ಬಡ ಅರಬ್ ರಾಷ್ಟ್ರವಾಗಿದ್ದ ಯೆಮೆನ್ ನಲ್ಲಿ ಸಂಘರ್ಷ ತೀವ್ರ ಮಾನವೀಯ ಬಿಕ್ಕಟ್ಟಿಗೆ ಕಾರಣವಾಯಿತು. 2022ರಲ್ಲಿ ಒಪ್ಪಿಕೊಳ್ಳಲಾದ ಕದನ ವಿರಾಮವು ಈ ಬೇಸಿಗೆಯವರೆಗೂ ಬಹುತೇಕ ಪಾಲನೆಯಾಯಿತು.

ಯೆಮೆನ್ ಸರ್ಕಾರಿ ಪಡೆಗಳಿಗೆ ಶಸ್ತ್ರಾಸ್ತ್ರ ಮತ್ತು ತರಬೇತಿ ಒದಗಿಸುತ್ತಿರುವ ಸೌದಿ ಅರೇಬಿಯ, ಹೌತಿ ಬಂಡುಕೋರರನ್ನು ಹಿಮ್ಮೆಟ್ಟಿಸಲು, ಕೆಂಪು ಸಮುದ್ರದಲ್ಲಿ ಮುಕ್ತ ಸಂಚಾರವನ್ನು ಪುನಃಸ್ಥಾಪಿಸಲು ಮತ್ತು ತನ್ನ ಭೂಪ್ರದೇಶದ ಮೇಲಿನ ಹೌತಿಗಳ ದಾಳಿಗಳನ್ನು ಕೊನೆಗೊಳಿಸಲು ವಾಯುಪಡೆಯ ನೆರವಿನೊಂದಿಗೆ ಮಿಲಿಟರಿ ಕಾರ್ಯಾಚರಣೆ ನಡೆಸುತ್ತಿದೆ. ಅಗತ್ಯ ಲಾಜಿಸ್ಟಿಕಲ್ ನೆರವಿಗಾಗಿ ಮಿತ್ರರಾಷ್ಟ್ರಗಳ ಬೆಂಬಲವನ್ನೂ ಕೋರಲಾಗಿದೆ.

►ಇರಾನ್ ಪ್ರಮುಖ ಪೂರೈಕೆದಾರ

ಇರಾನ್ ಹೌತಿ ಬಂಡುಕೋರರಿಗೆ ಡ್ರೋನ್ ಗಳು, ಕ್ಷಿಪಣಿಗಳು ಮತ್ತು ಇತರ ಉಪಕರಣಗಳ ಪ್ರಮುಖ ಪೂರೈಕೆದಾರ ಎಂದು ಮಿಲಿಟರಿ ತಜ್ಞರು ಹೇಳುತ್ತಾರೆ. ಆದರೆ ಹೌತಿಗಳು ತಮ್ಮದೇ ಶಸ್ತ್ರಾಸ್ತ್ರಗಳನ್ನು ಅಭಿವೃದ್ಧಿಪಡಿಸುವ ಪ್ರಯತ್ನಗಳನ್ನೂ ನಡೆಸಿದ್ದಾರೆ.

ಅಬ್ದುಲ್-ಮಲಿಕ್ ಅಲ್-ಹೌತಿ ನೇತೃತ್ವದ ಈ ಗುಂಪು ಸೌದಿ ಅರೇಬಿಯದ ಮೇಲೂ ದಾಳಿ ನಡೆಸಿದೆ. ಪವಿತ್ರ ನಗರಗಳಾದ ಮಕ್ಕಾ ಮತ್ತು ಮದೀನಾಗಳನ್ನು ಗುರಿಯಾಗಿಸುವ ಮೂಲಕ ತೀವ್ರ ಆಕ್ರೋಶಕ್ಕೂ ಕಾರಣವಾಗಿದೆ.

ಯೆಮೆನ್ ನ ಹಲವು ರಣರಂಗಗಳಲ್ಲಿ ವಾರಗಳಿಂದ ಹೋರಾಟ ತೀವ್ರಗೊಂಡಿದ್ದು, ಇದು ಅಮೆರಿಕ–ಇರಾನ್ ನಡುವಿನ ವ್ಯಾಪಕ ಸಂಘರ್ಷದಲ್ಲಿ ಹೊಸದೊಂದು ಅಧ್ಯಾಯವನ್ನು ತೆರೆದಿದೆ.

ಹೌತಿಗಳು ಕಳೆದ ತಿಂಗಳು ಯೆಮೆನ್ ಕರಾವಳಿಯ ವಿಶಾಲ ಪ್ರದೇಶಗಳ ಜೊತೆಗೆ ಬಾಬ್ ಅಲ್-ಮಂಡೆಬ್ ಜಲಸಂಧಿಯಲ್ಲಿರುವ ಪೆರಿಮ್ ದ್ವೀಪವನ್ನೂ ವಶಪಡಿಸಿಕೊಂಡಿದ್ದರು.

ಯೆಮೆನ್ ಸರಕಾರಕ್ಕೆ ಸೌದಿ ಅರೇಬಿಯ ನೀಡುತ್ತಿರುವ ಬೆಂಬಲದ ಹಿನ್ನೆಲೆಯಲ್ಲಿ, ಸೌದಿಗೆ ಸಂಬಂಧಿಸಿದ ಹಡಗುಗಳ ಮೇಲೆ ದಾಳಿ ನಡೆಸುವುದಾಗಿ ಹೌತಿಗಳು ಪ್ರತಿಜ್ಞೆ ಮಾಡಿದ್ದಾರೆ.

► ತೀವ್ರಗೊಂಡ ಮಾನವೀಯ ಬಿಕ್ಕಟ್ಟು

ಹೋರಾಟದ ತೀವ್ರತೆಯಿಂದಾಗಿ ಯೆಮೆನ್ ನ ಕೆಲವು ಭಾಗಗಳಲ್ಲಿ ನಾಲ್ಕರಲ್ಲಿ ಮೂರು ಕುಟುಂಬಗಳು ಹಸಿವಿನ ಸಮಸ್ಯೆ ಎದುರಿಸುತ್ತಿವೆ. ಸಂಘರ್ಷದಿಂದ ಸಾವಿರಾರು ಜನರು ಸ್ಥಳಾಂತರಗೊಂಡಿದ್ದು, ಲಕ್ಷಾಂತರ ಜನರಿಗೆ ಅಗತ್ಯ ಸರಬರಾಜುಗಳ ಪೂರೈಕೆಯಲ್ಲೂ ವ್ಯತ್ಯಯ ಉಂಟಾಗಿದೆ ಎಂದು ವಿಶ್ವ ಆಹಾರ ಕಾರ್ಯಕ್ರಮ (WFP) ಕಳೆದ ವಾರ ತಿಳಿಸಿದೆ.

ಹೋರಾಟ ತೀವ್ರಗೊಂಡು ವಿಸ್ತರಿಸುತ್ತಿರುವ ಹಿನ್ನೆಲೆಯಲ್ಲಿ, ಆಗಸ್ಟ್ 6ರಿಂದ ಯೆಮೆನ್ ನಲ್ಲಿ 959 ಸಾವುಗಳು ಸೇರಿದಂತೆ ಒಟ್ಟು 5,000ಕ್ಕೂ ಹೆಚ್ಚು ಸಾವು-ನೋವುಗಳು ದಾಖಲಾಗಿವೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ತಿಳಿಸಿದೆ.

ಕೇವಲ ಆರು ದಿನಗಳಲ್ಲಿ 685 ಹೊಸ ಸಾವು-ನೋವುಗಳು ವರದಿಯಾಗಿವೆ. ತೈಝ್ ಪ್ರದೇಶವು ಅತ್ಯಂತ ತೀವ್ರ ಸಂಘರ್ಷದ ಕೇಂದ್ರವಾಗಿ ಹೊರಹೊಮ್ಮಿದೆ ಎಂದು WHO ಹೇಳಿದೆ. ಸುಮಾರು 2 ಲಕ್ಷ ಜನರು ಸ್ಥಳಾಂತರಗೊಂಡಿದ್ದು, 3,600ಕ್ಕೂ ಹೆಚ್ಚು ಮಂದಿ ಜಿಬೂಟಿಗೆ ತೆರಳಿದ್ದಾರೆ.

ಮೂರು ವಾರಗಳ ಅವಧಿಯಲ್ಲಿ ಕಾಲರಾ ಪ್ರಕರಣಗಳು ಮೂರು ಪಟ್ಟು ಹೆಚ್ಚಾಗಿವೆ ಎಂದು WHO ಎಚ್ಚರಿಸಿದೆ. ಮೂರು ವಾರಗಳ ಹಿಂದೆ 217 ಶಂಕಿತ ಪ್ರಕರಣಗಳಿದ್ದರೆ, ಇತ್ತೀಚಿನ ವಾರದಲ್ಲಿ 647 ಶಂಕಿತ ಪ್ರಕರಣಗಳು ವರದಿಯಾಗಿವೆ.

ಸೌಜನ್ಯ: thenationalnews.com