'ನೀವು ನನ್ನನ್ನು ಶೂಟ್ ಮಾಡುತ್ತೀರಾ?'; ಬದುಕಿರುವವರೆಗೂ ಜನರಿಗೆ ಡಿಸೆಂಬರ್ 6 ಅನ್ನು ನೆನಪಿಸುತ್ತೇನೆ ಎಂದ ಅಸದುದ್ದೀನ್ ಉವೈಸಿ

ಹೈದರಾಬಾದ್: ಉತ್ತರ ಪ್ರದೇಶದ ಐತಿಹಾಸಿಕ ಬಾಬರಿ ಮಸೀದಿಯನ್ನು ಹಿಂದುತ್ವದ ಗುಂಪು ಧ್ವಂಸಗೊಳಿಸಿದ ಡಿಸೆಂಬರ್ 6 ರ ದಿನವನ್ನು ಜನರಿಗೆ ನಿರಂತರವಾಗಿ ನೆನಪಿಸುವ ತನ್ನ ಬದ್ಧತೆಯನ್ನು ಆಲ್ ಇಂಡಿಯಾ ಮಜ್ಲಿಸ್-ಎ-ಇತ್ತೆಹಾದುಲ್ ಮುಸ್ಲಿಮೀನ್ (ಎಐಎಂಐಎಂ) ಅಧ್ಯಕ್ಷ ಮತ್ತು ಹೈದರಾಬಾದ್ ಸಂಸದ ಅಸದುದ್ದೀನ್ ಉವೈಸಿ ಬುಧವಾರ ಪುನರುಚ್ಛರಿಸಿದ್ದಾರೆ.

"ನಾನು ಬದುಕಿರುವವರೆಗೂ, ಡಿಸೆಂಬರ್ 6 ರ ಬಗ್ಗೆ ಜನರಿಗೆ ನೆನಪಿಸುತ್ತೇನೆ. ಯಾರಾದರೂ ನಾನು ಹೇಳುವುದನ್ನು ಕೇಳಲು ಬಯಸದಿದ್ದರೆ, ಅವರು ತಮ್ಮ ಕಿವಿಯನ್ನು ಹತ್ತಿ ತುಂಬಿಕೊಳ್ಳಬಹುದು. ಈ ಬಗ್ಗೆ ಪ್ರಶ್ನಿಸದಿರಲು ನಾವು ಇಸ್ರೇಲ್ ಅಥವಾ ಉತ್ತರ ಕೊರಿಯಾದಲ್ಲಿ ಇದ್ದೇವೋ? ನಾನು ಎತ್ತಿರುವ ಪ್ರಶ್ನೆಗಳಿಗೆ ಸರ್ಕಾರ ಉತ್ತರಿಸಲಿ. ಅವರು ನನ್ನನ್ನು ಶೂಟ್ ಮಾಡುತ್ತಾರೆಯೇ? ಅವರು ಈಗಾಗಲೇ ನನ್ನ ಕಾರಿಗೆ ಗುಂಡು ಹಾರಿಸಿದ್ದಾರೆ, ಅದನ್ನೂ ಮಾಡಲಿ" ಎಂದು ಉವೈಸಿ ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ಮಸೀದಿಗಳ ರಕ್ಷಣೆಯ ಕುರಿತು ತಮ್ಮ ಹೇಳಿಕೆಗಳನ್ನು ಸಂಸದ ಅಸದುದ್ದೀನ್ ಉವೈಸಿ ಸಮರ್ಥಿಸಿಕೊಂಡರು. ತನ್ನ ಭಾಷಣವು ವಾಸ್ತವದ ಮೇಲೆ ನೆಲೆಗೊಂಡಿದೆ ಎಂದು ಅವರು ಒತ್ತಿ ಹೇಳಿದ್ದಾರೆ. “ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಪೂಜಾ ಸ್ಥಳಗಳ ಕಾಯಿದೆಯನ್ನು ದೇಶದ ಕಾನೂನು ಎಂದು ದೃಢೀಕರಿಸಿದರೆ, ಮಸೀದಿಗಳ ಮೇಲಿನ ಅನಿಶ್ಚಿತತೆ ಮತ್ತು ಆತಂಕಗಳನ್ನು ಪರಿಹರಿಸಬಹುದು” ಎಂದು ಉವೈಸಿ ಹೇಳಿದ್ದಾರೆ.

"ನನ್ನ ಭಾಷಣವು ಸತ್ಯವನ್ನು ಆಧರಿಸಿದೆ. ಡಿಸೆಂಬರ್ 6 ರಂದು ಬಾಬರಿ ಮಸೀದಿ ಧ್ವಂಸವಾಗಲಿಲ್ಲವೇ? ಯಾರಿಗೂ ಶಿಕ್ಷೆಯಾಗಲಿಲ್ಲ ಎಂಬುದು ಸತ್ಯವಲ್ಲವೇ? ಸುಪ್ರೀಂ ಕೋರ್ಟ್ ತೀರ್ಪಿನ ವಿರುದ್ಧ ಮೋದಿ ಸರ್ಕಾರ ಏಕೆ ಮೇಲ್ಮನವಿ ಸಲ್ಲಿಸಲಿಲ್ಲ? ಒಂದು ವೇಳೆ ಮಸೀದಿ ಇದ್ದಿದ್ದರೆ, ಸುಪ್ರೀಂ ಕೋರ್ಟ್‌ನಿಂದ ವಿಭಿನ್ನ ತೀರ್ಪು ಬರುತ್ತಿತ್ತೇ?” ಎಂದು ಪ್ರಶ್ನಿಸಿದ್ದಾರೆ.

ಇತರ ಮಸೀದಿಗಳಿಗೆ ಇತ್ತೀಚೆಗಿನ ಬೆದರಿಕೆಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಉವೈಸಿ, "ತೀರ್ಪು ನಂಬಿಕೆಯ ಮೇಲೆ ಆಧಾರಿತವಾಗಿದೆ ಎಂಬ ಆತಂಕ ನಮಗಿತ್ತು. ಸುನೆಹ್ರಿ ಮತ್ತು ಟೀಲೆ ವಾಲಿ ಮಸೀದಿಗಳಂತಹ ಇತರ ಮಸೀದಿಗಳು ಬೆದರಿಕೆಗಳನ್ನು ಎದುರಿಸುತ್ತಿರುವಾಗ ನಮ್ಮ ಆತಂಕಗಳು ಈಗ ನಿಜವೆಂದು ಸಾಬೀತಾಗಿದೆ. ಹೌದು, ತೀರ್ಪು ಅಂತಿಮವಾಗಿದೆ. ಆದರೆ ನ್ಯಾಯಮೂರ್ತಿ ವರ್ಮಾ ಹೇಳಿದಂತೆ, ಸುಪ್ರೀಂ ಕೋರ್ಟ್ ಸರ್ವೋಚ್ಚವಾಗಿದೆ, ಆದರೆ ದೋಷಾತೀತವೇನಲ್ಲ” ,ಎಂದು ಹೇಳಿದ್ದಾರೆ.

ರಾಮಮಂದಿರದ ಶಂಕುಸ್ಥಾಪನೆ ಸಮಾರಂಭವನ್ನು (ಪ್ರಾಣ ಪ್ರತಿಷ್ಠಾ) ಜನವರಿ 22 ರಂದು ನಿಗದಿಪಡಿಸಲಾಗಿದೆ. ನವೆಂಬರ್ 9, 2019 ರಂದು ಭಾರತದ ಸರ್ವೋಚ್ಚ ನ್ಯಾಯಾಲಯವು ದೇವಾಲಯಕ್ಕೆ ಸಂಪೂರ್ಣ ಭೂಮಿಯನ್ನು ಮಂಜೂರು ಮಾಡುವಂತೆ ಆದೇಶಿಸಿದ ನಂತರ ದೇವಾಲಯದ ನಿರ್ಮಾಣವು ಪ್ರಾರಂಭವಾಯಿತು. ಈ ಸ್ಥಳವು ಐತಿಹಾಸಿಕ ಮಹತ್ವವನ್ನು ಹೊಂದಿದೆ. ಡಿಸೆಂಬರ್ 6, 1992 ರಂದು ಹಿಂದೂ ರಾಷ್ಟ್ರೀಯವಾದಿಗಳ ಗುಂಪೊಂದು ಕೆಡವಲ್ಪಟ್ಟ ಬಾಬರಿ ಮಸೀದಿಯ ಸ್ಥಳವಾಗಿತ್ತು.