ಸುರಪುರದಲ್ಲಿ ಅದ್ಧೂರಿ ನಾಡಹಬ್ಬಕ್ಕೆ ಚಾಲನೆ: ಆನೆಯ ಮೇಲೆ ಅಂಬಾರಿಯಲ್ಲಿ ನಾಡದೇವತೆ ಮೆರವಣಿಗೆ

ಸುರಪುರ: ನಾಡಹಬ್ಬ ದಸರಾ ಆಚರಣೆ ಅಂಗವಾಗಿ ಪಟ್ಟಣದಲ್ಲಿ ನಾಡಹಬ್ಬ ಉತ್ಸವ ಸಮಿತಿಯಿಂದ 40ನೇ ವರ್ಷದ ನಾಡ ಹಬ್ಬಕ್ಕೆ ಅದ್ಧೂರಿ ಚಾಲನೆ ನೀಡಲಾಗಿದೆ.

ಪ್ರಥಮ ಬಾರಿಗೆ ಮೈಸೂರು ದಸರಾ ಮಾದರಿಯಲ್ಲಿ ಆನೆಯ ಮೇಲೆ ಅಂಬಾರಿ ಕೂಡಿಸಿ ಅದರಲ್ಲಿ ನಾಡ ದೇವತೆಯ ಮೂರ್ತಿ ಪ್ರತಿಷ್ಠಾಪಿಸಿ ಭವ್ಯವಾದ ಮೆರವಣಿಗೆಯನ್ನು ನಡೆಸುವ ಮೂಲಕ ನಾಡ ಹಬ್ಬ ಆರಂಭಗೊಂಡಿದೆ.

ಪಟ್ಟಣದ ಶ್ರೀ ವೇಣುಗೋಪಾಲ ಸ್ವಾಮಿ ದೇವಸ್ಥಾನದ ಆವರಣದಲ್ಲಿ ಅಂಬಾರಿಯಲ್ಲಿರುವ ನಾಡ ದೇವಿಯ ಮೂರ್ತಿಗೆ ಸುರಪುರ ಅರಸು ವಂಶಸ್ಥ ರಾಜ ಕೃಷ್ಣಪ್ಪ ನಾಯಕ ಪುಷ್ಪಾರ್ಚನೆ ಮಾಡುವುದರ ಮೂಲಕ ಚಾಲನೆ ನೀಡಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ರಾಜಾ ಕೃಷ್ಣಪ್ಪ ನಾಯಕ ಅವರು, ಹಿಂದೆ ಸುರಪುರದಲ್ಲಿಯೂ ಮೈಸೂರು ದಸರಾದಂತೆ ನವರಾತ್ರಿ ಹಾಗೂ ದಸರಾ ಆಚರಣೆ ನಡೆಯುತ್ತಿತ್ತು ಎಂದು ತಿಳಿದು ಬರುತ್ತದೆ. ಈಗ ಅದರ ಸ್ಮರಣೆಯ ರೀತಿಯಲ್ಲಿ ದಸರಾ ಹಬ್ಬ ಆಚರಣೆಗೆ ನಾಡಹಬ್ಬ ಉತ್ಸವ ಸಮಿತಿ ಮುಂದಾಗಿರುವುದು ತುಂಬಾ ಸಂತೋಷದ ಸಂಗತಿಯಾಗಿದೆ ಎಂದರು.

ಇದಕ್ಕೂ ಮುನ್ನ ಗರುಡಾದ್ರಿ ಕಲಾಮಂದಿರದಲ್ಲಿ ಆನೆಗೆ ಪೂಜೆ ಸಲ್ಲಿಸಿ ಸಿಂಗಾರಗೊಳಿಸಲಾಯಿತು. ನಾಡದೇವತೆಯ ಮೂರ್ತಿಗೂ ವಿಷ್ಣು ಪ್ರಕಾಶ್ ಜೋಶಿ ನೇತೃತ್ವದಲ್ಲಿ ಪೂಜೆ ಸಲ್ಲಿಸುವ ಮೂಲಕ ನಾಡ ದೇವಿಯ ಮೂರ್ತಿಯನ್ನು ಆನೆಯ ಸಾರೋಟಿನಲ್ಲಿ ಕರೆದುಕೊಂಡು ಶ್ರೀ ವೇಣುಗೋಪಾಲ ಸ್ವಾಮಿ ದೇವಸ್ಥಾನದವರೆಗೂ ತೆರಳಿ ನಂತರ ಅಂಬಾರಿಯಲ್ಲಿ ನಾಡ ದೇವಿಯ ಮೂರ್ತಿ ಪ್ರತಿಷ್ಠಾಪಿಸಲಾಯಿತು.

ಈ ಸಂದರ್ಭದಲ್ಲಿ ನಾಡಹಬ್ಬ ಉತ್ಸವ ಸಮಿತಿಯ ಗೌರವಾಧ್ಯಕ್ಷ ರಾಜಾ ಪಾಮ ನಾಯಕ, ಅಧ್ಯಕ್ಷ ರಾಜಾ ಮುಕುಂದ ನಾಯಕ, ನಗರ ಯೋಜನಾ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ರಾಜಾ ವಾಸುದೇವ ನಾಯಕ, ಅರ್ಬನ್ ಕೋ ಆಪರೇಟಿವ್ ಸೊಸೈಟಿಯ ಅಧ್ಯಕ್ಷ ರಾಜಾ ವಿಜಯ ಕುಮಾರ ನಾಯಕ, ಕನ್ನಡ ಸಾಹಿತ್ಯ ಸಂಘದ ಅಧ್ಯಕ್ಷ ಬಸವರಾಜ ಜಮಾದರಖಾನಿ, ಪಬ್ಲಿಕ್ ರೀಕ್ರೀಯೇಶನ್ ಕ್ಲಬ್ ಅಧ್ಯಕ್ಷ ಅರವಿಂದ ಕುಮಾರ, ಕಾರ್ಯದರ್ಶಿ ಡಾ.ಸುರೇಶ್. ಆರ್ ಸಜ್ಜನ್, ಕಿಶೋರ್ ಚಂದ್ ಜೈನ್,ಗ್ಯಾನ್ ಚಂದ್ ಜೈನ್,ಹೆಚ್.ಸಿ.ಪಾಟೀಲ್, ನಯೋಪ್ರಾ ಮಾಜಿ ಅಧ್ಯಕ್ಷ ಪ್ರಕಾಶ ಸಜ್ಜನ್, ಸೋಮನಾಥ ಡೊಣ್ಣಿಗೇರ, ಗೋಪಾಲದಾಸ್ ಲಡ್ಡಾ , ವಿರೇಶ ನಿಷ್ಠಿ ದೇಶಮುಖ, ಪ್ರಕಾಶ ಅಂಗಡಿ, ಸೋಮರಾಯ ಶಖಾಪುರ, ಅಮರೇಶ ಕುಂಬಾರ, ಮಂಜುನಾಥ ಗುಳಗಿ, ರಾಘವೇಂದ್ರ ಗುಡಗುಂಟಿ, ವೆಂಕಟೇಶ ಬೈರಿಮಡ್ಡಿ,ಯಲ್ಲಪ್ಪ ಹುಲಿಕಲ್ ಸೇರಿದಂತೆ ಸಾವಿರಾರು ಜನ ಭಾಗವಹಿಸಿದ್ದರು.