ಹುಣಸಗಿ | ಕುಪ್ಪಿ, ದ್ಯಾಮನಾಳ ಗ್ರಾಮಗಳಿಗೆ ನೂತನ ಬಸ್ ಸೇವೆ ಆರಂಭ: ಗ್ರಾಮಸ್ಥರ ಸಂಭ್ರಮ

ಹುಣಸಗಿ: ತಾಲೂಕಿನ ಕುಪ್ಪಿ ಹಾಗೂ ದ್ಯಾಮನಾಳ ಗ್ರಾಮಗಳ ಬಹುದಿನಗಳ ಬೇಡಿಕೆಗೆ ಸ್ಪಂದಿಸಿ ನೂತನ ಸಾರಿಗೆ ಬಸ್ ಸೇವೆ ಆರಂಭಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಕುಪ್ಪಿ ಗ್ರಾಮದಲ್ಲಿ ಗ್ರಾಮಸ್ಥರು ಬಸ್‌ಗೆ ಅಲಂಕಾರ ಮಾಡಿ ವಿಶೇಷ ಪೂಜೆ ಸಲ್ಲಿಸುವ ಮೂಲಕ ಸಂಭ್ರಮಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಮುಖಂಡ ಹಣಮಂತ್ರಾಯಗೌಡ ಹಣಮರಡ್ಡಿ, ಗ್ರಾಮಸ್ಥರ ಬಹುದಿನಗಳ ಬೇಡಿಕೆಗೆ ಸಾರಿಗೆ ಇಲಾಖೆ ಸ್ಪಂದಿಸಿರುವುದು ಸಂತಸದ ಸಂಗತಿಯಾಗಿದೆ. ನೂತನ ಬಸ್ ಸೇವೆಯಿಂದ ವಿದ್ಯಾರ್ಥಿಗಳು, ರೈತರು ಹಾಗೂ ಸಾರ್ವಜನಿಕರಿಗೆ ಶಾಲಾ-ಕಾಲೇಜು, ಆಸ್ಪತ್ರೆ, ಮಾರುಕಟ್ಟೆ ಸೇರಿದಂತೆ ವಿವಿಧ ಕೆಲಸಗಳಿಗೆ ತೆರಳಲು ಅನುಕೂಲವಾಗಲಿದೆ ಎಂದರು.

ಹಿರಿಯ ಮುಖಂಡ ಮನೋಹರರಾವ್ ಕುಲಕರ್ಣಿ ದ್ಯಾಮನಾಳ ಮಾತನಾಡಿ, ಗ್ರಾಮಗಳಿಗೆ ದೊರೆತಿರುವ ಸಾರಿಗೆ ಸೌಲಭ್ಯವನ್ನು ಸಾರ್ವಜನಿಕರು ಸದುಪಯೋಗಪಡಿಸಿಕೊಳ್ಳಬೇಕು. ನಿಗದಿತ ಸಮಯದಲ್ಲಿ ಬಸ್‌ನಲ್ಲಿ ಪ್ರಯಾಣಿಸುವ ಮೂಲಕ ಸಾರಿಗೆ ಇಲಾಖೆಯ ಸೇವೆಗೆ ಉತ್ತಮ ಸ್ಪಂದನೆ ನೀಡಬೇಕು. ಬಸ್ ಸೇವೆ ನಿರಂತರವಾಗಿ ಮುಂದುವರಿಯಲು ಗ್ರಾಮಸ್ಥರ ಸಹಕಾರ ಅಗತ್ಯವಾಗಿದೆ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ದ್ಯಾಮನಾಳ ಹಾಗೂ ಕುಪ್ಪಿ ಗ್ರಾಮದ ಗ್ರಾಮಸ್ಥರು ನೂತನ ಬಸ್‌ನ ಚಾಲಕ ಮತ್ತು ನಿರ್ವಾಹಕರನ್ನು ಸನ್ಮಾನಿಸಿ ಗೌರವಿಸಿದರು.

ಕಾರ್ಯಕ್ರಮದಲ್ಲಿ ಗ್ರಾಪಂ ನಿಕಟಪೂರ್ವ ಸದಸ್ಯ ಬಾಲದಂಡಪ್ಪ ವಜ್ಜಲ್, ಪಿಕೆಪಿಎಸ್ ಸಂಘದ ಸದಸ್ಯ ಬಸನಗೌಡ ಹಣಮರಡ್ಡಿ, ಶಾಂತಗೌಡ ಮಾಲಿಪಾಟೀಲ್, ಹಣಮಂತ್ರಾಯಗೌಡ ಹುಡೇದ್, ಸಂಗಣ್ಣ ದೇಸಾಯಿ, ಸುರೇಶಗೌಡ ಹಣಮರಡ್ಡಿ, ಪತ್ರಕರ್ತ ಬಾಲಪ್ಪ, ಯಂಕನಗೌಡ ತೆಗ್ಗಿನಮನಿ, ಬಾಲದಂಡಪ್ಪ ತಳವಾರ, ರವಿ ಹೆಬ್ಬಾಳ, ಬಸವರಾಜ್ ನಾಗಪ್ಪಗೋಳ ಹಾಗೂ ದ್ಯಾಮನಾಳ ಗ್ರಾಮದ ಸಿದ್ದರಾಮಯ್ಯ ಹಿರೇಮಠ, ಶೇಕಪ್ಪಗೌಡ ಪೊಲೀಸ್ ಪಾಟೀಲ್, ನಾರಾಯಣರಾವ್ ಕುಲಕರ್ಣಿ, ಸಂಗಪ್ಪ ಸಾಹುಕಾರ, ದಸ್ತಗೀರಸಾಬ ತಾಳಿಕೋಟಿ, ಪ್ರಭು ನೀಲಗಾರ, ದಾನಪ್ಪ ಸಾಹುಕಾರ ಅಪ್ಪಗೋಳ, ಶಂಕ್ರಪ್ಪ ನಾಯ್ಕೋಡಿ, ಬಸಪ್ಪ ದೇವರಮನಿ, ಮಹ್ಮದ ರಸೂಲ ತಾಳಿಕೋಟಿ ಹಾಗೂ ಪರಮೇಶ್ ಮೇಟಿ ಉಪಸ್ಥಿತರಿದ್ದರು.