ರೈತರಿಗೆ ಪದೇಪದೇ ತೊಂದರೆ ಕೊಟ್ಟರೆ ಸಹಿಸುವುದಿಲ್ಲ: ಶಾಸಕ ಶರಣಗೌಡ ಕಂದಕೂರ
ಯಾದಗಿರಿ | ವಿದ್ಯುತ್ ಪರಿವರ್ತಕಗಳ ಸಮಸ್ಯೆ ಕುರಿತ ಸಂವಾದ
ಯಾದಗಿರಿ: ಪ್ರಸಕ್ತ ವರ್ಷದಲ್ಲಿ ಮುಂಗಾರು ಮಳೆ ಕೈಕೊಟ್ಟ ಕಾರಣ ಅನ್ನದಾತರು ಸಂದಿಗ್ಧ ಪರಿಸ್ಥಿತಿಯಲ್ಲಿದ್ದಾರೆ. ಇಂಥ ಸಂದರ್ಭದಲ್ಲಿ ರೈತರಿಗೆ ಜೆಸ್ಕಾಂ ಅಧಿಕಾರಿಗಳು ಪದೇಪದೇ ತೊಂದರೆ ಕೊಟ್ಟರೆ ಯಾವ ಕಾರಣಕ್ಕೂ ನಾನು ಸಹಿಸುವುದಿಲ್ಲ ಎಂದು ಗುರಮಠಕಲ್ ಶಾಸಕ ಶರಣಗೌಡ ಕಂದಕೂರ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿದರು.
ಸೋಮವಾರ ಇಲ್ಲಿನ ಜೆಸ್ಕಾಂ ಕಚೇರಿ ಸಭಾಂಗಣದಲ್ಲಿ ಪಕ್ಷದ ಜಿಲ್ಲಾಧ್ಯಕ್ಷ ಸುಭಾಶ್ಚಂದ್ರ ಕಟಕಟಿ ಹಾಗೂ ಮತ್ತಿತರ ಮುಖಂಡರ ನಿಯೋಗದೊಂದಿಗೆ ವಿದ್ಯುತ್ ಪರಿವರ್ತಕಗಳಲ್ಲಿನ ತೊಂದರೆ ಕುರಿತಾದ ಸಂವಾದದಲ್ಲಿ ಅಧಿಕಾರಿಗಳಿಗೆ ಅವರು ಎಚ್ಚರಿಕೆ ನೀಡಿದ್ದಾರೆ.
ವಿದ್ಯುತ್ ಪರಿವರ್ತಕದ ರಿಪೇರಿ ಕೇಂದ್ರ ಗುರಮಠಕಲ್ ನಲ್ಲೇ ಇದ್ದರೆ ನಮ್ಮ ಕ್ಷೇತ್ರದ ಜನತೆ ವಿನಾ ಕಾರಣ ಯಾದಗಿರಿ ಬರುವುದು ತಪ್ಪುತ್ತದೆ ಎಂಬ ಉದ್ದೇಶದಿಂದ ಅಲ್ಲೇ ಆರಂಭಿಸುವ ಉದ್ದೇಶ ನಮ್ಮದು. ಆದರೆ, ಯಾದಗಿರಿಯಲ್ಲಿ ಆರಂಭಿಸಿದರೆ ಪರಸ್ಥಿತಿ ಬೇರೆಯೇ ಆಗಲಿದೆ. ಇನ್ನೂ ಜೆಸ್ಕಾಂ ಜಾಗೃತಿ ದಳದವರು ಬೇಕಂತಲೇ ರೈತರಿಗೆ ತೊಂದರೆ ಕೊಡುತ್ತಿದ್ದಾರೆ. ಮೊದಲೇ ಮಳೆ ಇಲ್ಲದೆ ರೈತರು ವಿಷ ಕುಡಿಯುವ ಸ್ಥಿತಿಯಲ್ಲಿದ್ದಾರೆ. ಇಂಥ ಸಂದರ್ಭದಲ್ಲಿ ಅವರನ್ನು ಮಾನಸಿಕವಾಗಿ ಹಿಂಸಿಸಬೇಡಿ ಎಂದು ಹೇಳಿದರು.
ಕಂದಕೂರ್ ಮತ್ತು ಕೌಳೂರು ಗ್ರಾಮಗಳಲ್ಲಿ ಹೊಸ ಸಬ್ ಸ್ಟೇಷನ್ ಸ್ಥಾಪನೆಗೆ ಸ್ಥಳ ಗುರುತಿಸಲಾಗಿದ್ದು, ಅಕ್ಟೋಬರ್ ನಲ್ಲಿ ಟೆಂಡರ್ ಪೂರ್ಣಗೊಳಿಸಲಾಗುವುದು. ಚೆಪೇಟ್ಲಾದಲ್ಲಿ ಹೊಸ ಕೇಂದ್ರ ಸ್ಥಾಪನೆಗೆ ಜಮೀನು ಹುಡುಕುವ ಮೂಲಕ ಸಾಧ್ಯವಾದಷ್ಟು ಬೇಗ ಕೆಲಸ ಆರಂಭಿಸಿ. ಇದರಿಂದ ಗಾಜರಕೋಟ ಸುತ್ತಮುತ್ತಲಿನ ಗ್ರಾಮಗಳ ವಿದ್ಯುತ್ ಹೊರೆ ಕಡಿಮೆಯಾಗುತ್ತದೆ ಎಂದು ಶಾಸಕರು ಸಲಹೆ ನೀಡಿದರು.
ಜೆಸ್ಕಾಂ ಇಇ ರಾಘವೇಂದ್ರ ದುಕಾನ್ ಮಾತನಾಡಿ, ನಿರಂತರ ಜ್ಯೋತಿ ಯೋಜನೆಯಡಿ ವಿದ್ಯುತ್ ಕೊಡಲಾಗುತ್ತಿದ್ದು, ಗಾಜರಕೋಟ ಹೊಸ ಸಬ್ ಸ್ಟೇಷನ್ ಅವಶ್ಯಕತೆ ಇದೆ. ಇನ್ನೂ ಶಾಸಕ ಶರಣಗೌಡರ ಪ್ರಯತ್ನದಿಂದ 50 ಹೊಸ ವಿದ್ಯುತ್ ಪರಿವರ್ತಕ ಬಂದಿವೆ. ಅವಶ್ಯಕತೆಗೆ ಅನುಗುಣವಾಗಿ ಅವುಗಳನ್ನು ಬಳಕೆ ಮಾಡಿಕೊಳ್ಳುತ್ತಿದ್ದೇವೆ ಎಂದರು.
ಪ್ರಸಕ್ತ ಸಾಲಿನಲ್ಲೂ 460 ಪರಿವರ್ತಕ ಸುಟ್ಟಿವೆ. ಬರಗಾಲ ಇರುವುದರಿಂದ ತೊಂದರೆಯಾಗಿದೆ. ಸಿಬ್ಬಂದಿ ಕೊರತೆ ಇದೆ. 70 ಗ್ರಾಮಗಳಿಗೆ ಒಬ್ಬರೇ ಅಧಿಕಾರಿಗಳು ಇದ್ದಾರೆ ಎಂದು ಗಮನಕ್ಕೆ ತಂದರು.
ಈ ವೇಳೆ ಜಿಲ್ಲಾ ವಕ್ತಾರ ಮಲ್ಲನಗೌಡ ಹಳಿಮನಿ ಕೌಳೂರು, ಅಜಯರಡ್ಡಿ ಯಲ್ಹೇರಿ, ಬ್ಲಾಕ್ ಅಧ್ಯಕ್ಷ ಪ್ರಕಾಶ ನೀರಟ್ಟಿ, ಪ್ರಮುಖರಾದ ಬಸವಂತ್ರಾಯಗೌಡ ಸೈದಾಪುರ, ರಾಮಣ್ಣ ಕೋಟಗೇರಾ,ವಿಶ್ವನಾಥ ಸಾಹುಕಾರ ಹೊನಗೇರಾ, ವಿಶ್ವನಾಥರಡ್ಡಿ ಗೊಂದಡಗಿ, ಹಂಪಯ್ಯಾ ಅಲ್ಲಿಪುರ, ಶರಣು ಆವಂಟಿ, ಮಲ್ಲಿಕಾರ್ಜುನ ಅರುಣಿ ಗಾಜರಕೋಟ, ಗುರು ಅಲ್ಲಿಪುರ ತಾಂಡಾ, ಡಿ.ತಾಯಪ್ಪ ಬದ್ದೆಪಲ್ಲಿ, ಪರಮರಡ್ಡಿ ಕಂದಕೂರ, ಸೋಮನಗೌಡ ಬೆಳಗೇರಾ, ಶಿವಯೋಗಿ ಯರಗೋಳ, ಮಲ್ಲರಡ್ಡಿಗೌಡ ಹತ್ತಿಕುಣಿ, ರವಿ ಪೊಲೀಸ್ ಪಾಟೀಲ್, ಗುರುನಾಥರಡ್ಡಿ ಸೈದಾಪುರ, ಹಣಮಂತ ಅಕ್ಕಿ ಬಂದಳ್ಳಿ, ಪರಮೇಶ್ ವಾರದ್ ಇದ್ದರು.
