ಸುರಪುರ | ಶರಣರ ಕಾಯಕ ತತ್ವ ಸಮಾನತೆಯ ಪ್ರಮುಖ ಅಸ್ತ್ರ: ಪ್ರಭುಲಿಂಗ ಮಹಾಸ್ವಾಮೀಜಿ

ಸುರಪುರ: ಶರಣರ ಕಾಯಕ ತತ್ವವು ಸಮಾಜದಲ್ಲಿನ ಲಿಂಗ ಅಸಮಾನತೆ, ಮೇಲು-ಕೀಳು ಹಾಗೂ ಜಾತಿ ಆಧಾರಿತ ತಾರತಮ್ಯವನ್ನು ಹೋಗಲಾಡಿಸಿ ಸಂಪೂರ್ಣ ಸಮಾನತೆಯನ್ನು ಸ್ಥಾಪಿಸುವ ಪ್ರಮುಖ ಅಸ್ತ್ರವಾಗಿತ್ತು ಎಂದು ಶ್ರೀ ಪ್ರಭುಲಿಂಗ ಮಹಾಸ್ವಾಮೀಜಿ ಹೇಳಿದರು.

ಪಟ್ಟಣದ ಶ್ರೀ ನಿಷ್ಠಿ ಕಡ್ಲಪ್ಪನವರ ವಿರಕ್ತಮಠದಲ್ಲಿ ನಡೆದ ಶ್ರಾವಣ ಶಿವಾನುಭವ ಚಿಂತನ ಕಾರ್ಯಕ್ರಮದ ದಿವ್ಯ ಸಾನ್ನಿಧ್ಯ ವಹಿಸಿ ಮಾತನಾಡಿದ ಅವರು, ಜಾತಿ, ವರ್ಗ ಹಾಗೂ ಧರ್ಮಗಳ ತಾರತಮ್ಯವನ್ನು ನಿರಾಕರಿಸುವ ಶರಣರ ಕಾಯಕ ತತ್ವದಲ್ಲಿ ಶ್ರಮದ ಗೌರವ, ಸಾಮಾಜಿಕ ಮತ್ತು ಆರ್ಥಿಕ ಸಮಾನತೆ, ಆಧ್ಯಾತ್ಮಿಕತೆ ಹಾಗೂ ದಾಸೋಹದಂತಹ ಮೌಲ್ಯಗಳು ಅಡಕವಾಗಿವೆ ಎಂದರು.

‘ಕಾಯಕ ತತ್ವದಲ್ಲಿ ಸಮನ್ವಯತೆ’ ವಿಷಯದ ಕುರಿತು ಶಿವಾನುಭವ ಚಿಂತನೆ ಮಂಡಿಸಿದ ಸಗರ ಗ್ರಾಮದ ಸರ್ಕಾರಿ ಪಿಯು ಕಾಲೇಜಿನ ಉಪನ್ಯಾಸಕ ಭೀಮರೆಡ್ಡಿ ಪೊಲೀಸ್ ಪಾಟೀಲ್, ಕಾಯಕವು ಮನುಷ್ಯನ ಜೀವಾಳವಾಗಿದ್ದು, ಕಾಯಕ ತತ್ವದಲ್ಲಿ ಲಿಂಗ, ಜಾತಿ ಹಾಗೂ ವರ್ಣಭೇದಕ್ಕೆ ಅವಕಾಶವಿಲ್ಲ. ಎಲ್ಲ ಕಾಯಕಗಳಿಗೂ ಸಮಾನ ಗೌರವವಿದ್ದು, ಮಾಡುವ ಕೆಲಸ ಸಣ್ಣದು-ದೊಡ್ಡದು ಎಂದು ಪರಿಗಣಿಸದೆ ಸಮರ್ಪಣಾ ಭಾವದಿಂದ ನಿರ್ವಹಿಸಬೇಕು ಎಂದರು.

ಶರಣರು ಹಾಗೂ ವಚನಕಾರರು ತಮ್ಮ ಕಾಯಕದಲ್ಲಿ ತೊಡಗಿಸಿಕೊಂಡು ಕಾಯಕಕ್ಕೆ ನ್ಯಾಯ ಒದಗಿಸುವ ಮೂಲಕ ಸಮಾಜಕ್ಕೆ ಸಮನ್ವಯತೆಯ ಸಂದೇಶ ನೀಡಿದ್ದಾರೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಕರಬ ಕ್ಷೇಮಾಭಿವೃದ್ಧಿ ಸಂಘದ ಉಪಾಧ್ಯಕ್ಷ ಬಸವರಾಜ ಜಾಲಹಳ್ಳಿ ಉಪಸ್ಥಿತರಿದ್ದರು. ತಾಲೂಕು ಕಸಾಪ ಗೌರವ ಕಾರ್ಯದರ್ಶಿ ಎಚ್.ವೈ. ರಾಠೋಡ ಕಾರ್ಯಕ್ರಮ ನಿರೂಪಿಸಿದರು. ಉಪನ್ಯಾಸಕ ವೆಂಕಟೇಶ್ ಪಾಟೀಲ್ ಸ್ವಾಗತಿಸಿದರು. ಜಗದೀಶ್ ಮಾನು ಪ್ರಾರ್ಥಿಸಿದರು.

ಕಾರ್ಯಕ್ರಮದ ಆರಂಭದಲ್ಲಿ ಹಿರಿಯ ಸಂಗೀತ ಕಲಾವಿದರಾದ ಮೋಹನರಾವ್ ಮಾಳದಕರ್, ಉಮೇಶ್ ಯಾದವ್, ರಮೇಶ್ ಕುಲಕರ್ಣಿ, ಸುರೇಶ್ ಅಂಬುರೆ, ಶರಣಬಸವ ಕೊಂಗಂಡಿ ಸೇರಿದಂತೆ ಹಲವರು ಸಂಗೀತ ಸೇವೆ ಸಲ್ಲಿಸಿದರು. ಮಾನಪ್ಪ ಭಜಂತ್ರಿ ಅವರ ಕೊಳಲು ವಾದನ, ಉಮೇಶ್ ಯಾದವ್ ಅವರ ಹಾರ್ಮೋನಿಯಂ ಹಾಗೂ ರಮೇಶ್ ಕುಲಕರ್ಣಿ ಅವರ ತಬಲಾ ಜುಗಲ್‌ಬಂದಿ ಗಮನ ಸೆಳೆಯಿತು.

ಕಾರ್ಯಕ್ರಮದಲ್ಲಿ ಪ್ರಮುಖರಾದ ವೀರೇಶ ನಿಷ್ಟಿ ದೇಶಮುಖ, ತಾಲೂಕ ಕಸಾಪ ಅಧ್ಯಕ್ಷ ಶರಣಬಸಪ್ಪ ಯಾಳವಾರ, ರಸ್ತಾಪುರದ ಬಸವರಾಜಗೌಡ ಬ್ಯಾಲಾಳ್, ಶಿವಕುಮಾರ ಮಸ್ಕಿ, ಸಂಗಮೇಶ ಗುಳಗಿ, ಸುಭಾಷ್ ಹೂಗಾರ್, ಉಪನ್ಯಾಸಕರಾದ ದೇವು ಹೆಬ್ಬಾಳ್, ವಿಜಯಕುಮಾರ ಬಣಗಾರ, ಮಾನಪ್ಪ ಹೂಗಾರ, ಮಹೇಂದ್ರ ಅಂಗಡಿ, ಶಿವುಕುಮಾರ್ ಮಸ್ಕಿ, ಡಾ.ಶರಣಬಸವ ಹೂಗಾರ, ಬಸವರಾಜ್ ಗೋಗಿ, ಬಸವಲಿಂಗಯ್ಯ ಸ್ವಾಮಿ,ಶರಣಪ್ಪ ಮಗಲಿ, ಭೀಮಾಶಂಕರ್ ಕಳಿಮನಿ,ಶೇಖರ ಕುಂಬಾರ, ಕೊಟ್ರಯ್ಯ ಸ್ವಾಮಿ ಕೊಟ್ರಯ್ಯ ಮಠ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.