ಯಾದಗಿರಿ | ಪಂಚಾಯತ್ ಅನುದಾನ ದುರ್ಬಳಕೆ ಆರೋಪ: ಸುರಪುರ ತಾಲ್ಲೂಕಿನ ಗ್ರಾಮ ಪಂಚಾಯತ್ಗಳ ವಿರುದ್ಧ ದೂರು
ಯಾದಗಿರಿ : ಸುರಪುರ ತಾಲ್ಲೂಕಿನ ವಿವಿಧ ಗ್ರಾಮ ಪಂಚಾಯತ್ಗಳಲ್ಲಿ 2024-25ನೇ ಸಾಲಿನ 15ನೇ ಹಣಕಾಸು ಯೋಜನೆಯಡಿ ಪರಿಶಿಷ್ಟ ಜಾತಿಗೆ ಮೀಸಲಾದ ಅನುದಾನ ದುರ್ಬಳಕೆಗೊಂಡಿರುವ ಬಗ್ಗೆ ಗಂಭೀರ ಆರೋಪಗಳು ಕೇಳಿಬಂದಿವೆ.
ಈ ಕುರಿತು ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ಭೀಮವಾದ) ಸುರಪುರ ಘಟಕದ ಪದಾಧಿಕಾರಿಗಳು ಸಂಬಂಧಿಸಿದ ಅಧಿಕಾರಿಗಳಿಗೆ ದೂರು ಸಲ್ಲಿಸಿದ್ದು, ಪಂಚಾಯತ್ ಅಭಿವೃದ್ಧಿ ಅಧಿಕಾರಿಗಳು (PDO) ವಿವಿಧ ಕಾಮಗಾರಿಗಳ ಹೆಸರಿನಲ್ಲಿ ಮೀಸಲಾದ ಅನುದಾನವನ್ನು ನಿಯಮಬಾಹಿರವಾಗಿ ಬಳಸಿಕೊಂಡಿದ್ದಾರೆ ಎಂದು ಆರೋಪಿಸಿದ್ದಾರೆ.
ಸಂಘದ ಪ್ರತಿನಿಧಿಗಳ ಪ್ರಕಾರ, ಸುರಪುರ ತಾಲ್ಲೂಕಿನ ಹಲವಾರು ಗ್ರಾಮ ಪಂಚಾಯತಗಳಲ್ಲಿ ಪರಿಶಿಷ್ಟ ಜಾತಿಗೆ ಮೀಸಲಾಗಿದ್ದ ಅನುದಾನವನ್ನು ಸರಿಯಾದ ಉದ್ದೇಶಗಳಿಗೆ ಬಳಸದೇ, ಕಾಗದದಲ್ಲೇ ಕಾಮಗಾರಿಗಳನ್ನು ತೋರಿಸಿ ದುರ್ಬಳಕೆ ಮಾಡಲಾಗಿದೆ. ಹೆಗ್ಗನದೊಡ್ಡಿ, ಬಾದ್ಯಾಪುರ, ಏವೂರು, ಯಾಳಗಿ, ಯಕ್ತಾಪುರ, ವಾಗಣಗೇರಾ, ತಿಂಥಣಿ, ಸೂಗೂರು, ಪೇಠ ಅಮ್ಮಾಪುರ, ಕಿರದಳ್ಳಿ, ನಗನೂರ, ಮಲ್ಲಾಬಿ, ಮಾಲಗತ್ತಿ, ಖಾನಾಪುರ (ಎಸ್.ಹೆಚ್.), ಕರಡಕಲ್ಲ, ಕಚಕನೂರ, ದೇವಿಕೇರಾ, ದೇವತ್ಕಲ್, ದೇವರಗೋನಾಲ, ದೇವಾಪುರ, ಅರಕೇರಾ (ಕೆ), ಆಲ್ದಾಳ ಸೇರಿದಂತೆ ಹಲವು ಪಂಚಾಯತಗಳಲ್ಲಿ ಈ ಅಕ್ರಮ ನಡೆದಿದೆ ಎಂಬ ಶಂಕೆ ವ್ಯಕ್ತವಾಗಿದೆ.
ವಿಶೇಷವಾಗಿ ಸೂಗೂರು (10,70,190 ರೂ.), ಪೇಠ ಅಮ್ಮಾಪುರ (2,93,000 ರೂ.), ಕಿರದಳ್ಳಿ (4,45,000 ರೂ.), ನಗನೂರ (1,60,000 ರೂ.), ಮಲ್ಲಾಬಿ, ಮಾಲಗತ್ತಿ (3,50,000 ರೂ.), ಖಾನಾಪುರ (ಎಸ್.ಹೆಚ್.) (4,10,000 ರೂ.), ಕರಡಕಲ್ಲ (2,00,000 ರೂ.), ಕಚಕನೂರ (1,23,500 ರೂ.), ದೇವಿಕೇರಾ (5,60,000 ರೂ.), ದೇವತ್ಕಲ್ (6,62,500 ರೂ.), ದೇವರಗೋನಾಲ (2,50,000 ರೂ.), ದೇವಾಪುರ (1,45,493 ರೂ.), ಅರಕೇರಾ (ಕೆ) (6,61,857 ರೂ.) ಹಾಗೂ ಆಲ್ದಾಳ (5,80,000 ರೂ.) ಗ್ರಾಮ ಪಂಚಾಯತಗಳಲ್ಲಿ ಲಕ್ಷಾಂತರ ರೂಪಾಯಿ ಅನುದಾನ ದುರ್ಬಳಕೆಯಾಗಿದೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಒಟ್ಟು 86,26,345 ರೂ. ಅನುದಾನವನ್ನು ಯಾವುದೇ ಕಾಮಗಾರಿಗಳಿಗೆ ಬಳಸದೇ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಬೋಗಸ್ ಬಿಲ್ಗಳ ಮೂಲಕ ಲೂಟಿ ಮಾಡಲಾಗಿದೆ ಎಂದು ಸಂಘ ಗಂಭೀರವಾಗಿ ಆರೋಪಿಸಿದೆ.
ಈ ಹಿನ್ನೆಲೆಯಲ್ಲಿ ತಕ್ಷಣ ಸ್ಥಳ ಪರಿಶೀಲನೆ ನಡೆಸಿ, ಪ್ರತ್ಯೇಕ ತನಿಖಾ ತಂಡವನ್ನು ರಚಿಸಿ, ತಪ್ಪಿತಸ್ಥ ಪಂಚಾಯತ್ ಅಭಿವೃದ್ಧಿ ಅಧಿಕಾರಿಗಳನ್ನು ಅಮಾನತ್ತುಗೊಳಿಸಿ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಸಂಘ ಒತ್ತಾಯಿಸಿದೆ. ಜೊತೆಗೆ ದುರ್ಬಳಕೆಯಾದ ಹಣವನ್ನು ಸರ್ಕಾರಕ್ಕೆ ಮರಳಿ ವಸೂಲಿ ಮಾಡಬೇಕು ಹಾಗೂ ಭವಿಷ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ದಕ್ಷ ಮತ್ತು ಪ್ರಾಮಾಣಿಕ ಅಧಿಕಾರಿಗಳನ್ನು ನೇಮಿಸಬೇಕೆಂದು ಆಗ್ರಹಿಸಲಾಗಿದೆ.
ಮನವಿಗೆ ತಕ್ಷಣ ಸ್ಪಂದನೆ ಸಿಗದಿದ್ದರೆ ಭ್ರಷ್ಟ ಅಧಿಕಾರಿಗಳ ವಿರುದ್ಧ ಹಂತ ಹಂತವಾಗಿ ಹೋರಾಟ ಕೈಗೊಳ್ಳುವುದಾಗಿ ಜೈಭೀಮ ಮಲ್ಲಪ್ಪ ಹಾಗೂ ದೇವರಾಜ ಎಚ್ಚರಿಕೆ ನೀಡಿದ್ದಾರೆ.
