Yadgiri | ಹತ್ತಿಕುಣಿ–ಸೌದಾಗರ್ ಜಲಾಶಯಗಳ ಆಧುನೀಕರಣಕ್ಕೆ ಶಾಸಕ ಶರಣಗೌಡರಿಂದ ಒತ್ತಾಯ : ಸಚಿವರಿಂದ ಭರವಸೆ

ಯಾದಗಿರಿ : ತಮ್ಮ ಮತಕ್ಷೇತ್ರದ ರೈತರ ಜೀವನಾಡಿಯಾಗಿರುವ ಹತ್ತಿಕುಣಿ ಮತ್ತು ಸೌದಾಗರ್ ಜಲಾಶಯಗಳ ನಾಲೆಗಳ ಆಧುನೀಕರಣಕ್ಕೆ ಸರ್ಕಾರ ಕೂಡಲೇ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಶಾಸಕ ಶರಣಗೌಡ ಕಂದಕೂರು ಒತ್ತಾಯಿಸಿದರು.

ವಿಧಾನಸಭೆಯ ಅಧಿವೇಶನದಲ್ಲಿ ಮಂಗಳವಾರ ಮಾತನಾಡಿದ ಅವರು, ಈ ಎರಡೂ ಜಲಾಶಯಗಳು ಹಲವು ದಶಕಗಳ ಹಿಂದೆ ನಿರ್ಮಾಣಗೊಂಡಿದ್ದು ರೈತರಿಗೆ ಪ್ರಮುಖ ನೀರಾವರಿ ಮೂಲಗಳಾಗಿವೆ ಎಂದು ತಿಳಿಸಿದರು.

ಹತ್ತಿಕುಣಿ ಜಲಾಶಯವು ಸುಮಾರು 0.352 ಟಿಎಂಸಿ ನೀರು ಸಂಗ್ರಹಿಸುವ ಸಾಮರ್ಥ್ಯ ಹೊಂದಿದ್ದರೂ, 2025-26ನೇ ಸಾಲಿನಲ್ಲಿ ಕೇವಲ 12.87 ಲಕ್ಷ ರೂ. ಮಾತ್ರ ನಿರ್ವಹಣೆಗೆ ಅನುದಾನ ನೀಡಲಾಗಿದೆ ಎಂದು ಹೇಳಿದರು. ಇದೇ ರೀತಿ ಸೌದಾಗರ್ ಡ್ಯಾಂ (0.288 ಟಿಎಂಸಿ ಸಾಮರ್ಥ್ಯ) ನಿರ್ವಹಣೆಗೆ 8.50 ಲಕ್ಷ ರೂ. ಮಾತ್ರ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.

ಈ ಎರಡೂ ಯೋಜನೆಗಳಿಂದ ಒಟ್ಟು ಸುಮಾರು 9,000 ಎಕರೆ ಕೃಷಿಭೂಮಿಗೆ ನೀರು ಪೂರೈಕೆ ಆಗುತ್ತಿದ್ದು, 12 ಗ್ರಾಮಗಳ ರೈತರು ಅವಲಂಬಿತರಾಗಿದ್ದಾರೆ. ಹತ್ತಿಕುಣಿ ನಾಲೆ ಉದ್ದ ಸುಮಾರು 14 ಕಿಮೀ ಹಾಗೂ ಸೌದಾಗರ್ ನಾಲೆ 11 ಕಿಮೀ ಇದ್ದರೂ, ಇಂತಹ ಮಹತ್ವದ ಯೋಜನೆಗಳಿಗೆ ಕೇವಲ 20 ಲಕ್ಷ ರೂ. ಅನುದಾನ ನೀಡಿರುವುದು ಅಪರ್ಯಾಯವಾಗಿದೆ ಎಂದು ಸರ್ಕಾರದ ಗಮನ ಸೆಳೆದರು.

ಹತ್ತಿಕುಣಿ ಜಲಾಶಯ ಆಧುನೀಕರಣಕ್ಕೆ ಕೇಂದ್ರ ಸರ್ಕಾರದ ಎಂ-ಕ್ಯಾಡ್ ಯೋಜನೆಯಡಿ 72 ಕೋಟಿ ರೂ. ಮಂಜೂರಾಗಿದ್ದು, ರಾಜ್ಯ ಸರ್ಕಾರವು ಕ್ಯಾಬಿನೆಟ್ ಅನುಮೋದನೆ ನೀಡಬೇಕು ಎಂದು ಮನವಿ ಮಾಡಿದರು. ಇದೇ ರೀತಿ ಸೌದಾಗರ್ ಡ್ಯಾಂ ಆಧುನೀಕರಣಕ್ಕೂ ಸಿದ್ಧಪಡಿಸಿರುವ ಅಂದಾಜು ವೆಚ್ಚದ ವರದಿಗೆ ಅನುಮೋದನೆ ನೀಡುವಂತೆ ಕೋರಿದರು.